Cultura e festas

O alcalde, Alejandro Lorenzo, e o concelleiro de Cultura, Bienvenido Estévez, recibiron na Casa do Concello a Julia de la Cal, a destacada artesá e deseñadora porriñesa especializada en cestería, quen foi galardoada co prestixioso Premio de Artesanía de Galicia 2024. Este premio, dotado con 9.000 euros, recoñece a súa obra “PERIFERIA #01”.

Julia, quen ten o seu estudo-obradoiro La Parabólica no barrio de San Sebastián, dedicou a súa vida á cestería, unha paixón que descubriu durante a súa formación na Escola Massana de Barcelona, tras estudar Ilustración na Coruña. Desde o seu regreso ao Porriño en 2015, traballou incansablemente, obtendo a Carta de Artesá de Galicia e acumulando unha serie de recoñecementos, entre eles a Bolsa Eloy Xesto de Artesanía de Galicia en 2021, que lle permitiu formarse en técnicas tradicionais de cestería en Francia. Ademais, foi finalista nos Premios Nacionais de Artesanía en 2023 na categoría de Emprendemento.

O seu traballo caracterízase polo uso de vimbia que ela mesma cultiva, creando pezas únicas. Julia destaca polo seu enfoque na sustentabilidade, utilizando vimbia viva para tecer estructuras que reflicten o seu compromiso co medio ambiente.

O Concello do Porriño, a través da Concellería de Festexos e Cultura, abre o prazo para que as ANPAS dos centros educativos e as asociacións culturais do municipio poidan inscribirse na tradicional Cabalgata de Reis, que terá lugar o próximo domingo 5 de xaneiro de 2025.

A Cabalgata de Reis, un dos eventos máis esperados das festas de Nadal no Porriño, contará con tres carrozas reais acompañadas de dúas de paquetaría e do tren do Nadal, que percorrerán as rúas da vila para levar a ilusión a nenos e maiores. Este ano, as ANPAS e asociacións culturais poderán optar a premios en función do número de participantes que leven á cabalgata.

Requisitos e bases da convocatoria

As ANPAS e asociacións culturais do Concello do Porriño que desexen participar deben contar cun mínimo de seis compoñentes (entre nenos e adultos) e un máximo de 16, con 8 nenos e 8 adultos por grupo. A inscrición estará aberta ata o 20 de decembro de 2024, sendo imprescindible presentar a documentación establecida, que inclúe a fotocopia do CIF da ANPA ou asociación, unha declaración responsable de non ter débedas tributarias nin coa Seguridade Social, así como o certificado orixinal da conta bancaria da entidade.

A inscrición poderán realizarse de forma telemática a través da sede electrónica do Concello.  O número total de prazas está limitado a 76, polo tanto, as ANPAS e asociacións culturais interesadas deben formalizar a súa inscrición o antes posible para garantir a súa participación.

Premios e recompensas

O Concello do Porriño destina un total de 3000 euros en premios para as ANPAS e asociacións culturais que participen na Cabalgata de Reis. Os premios serán os seguintes:

• 300 euros para ANPAS ou asociacións culturais con entre 6 e 10 participantes.
• 450 euros para ANPAS ou asociacións culturais con entre 11 e 16 participantes.

DESCARGA AS BASES NA SEGUINTE LIGAZÓN:

O Porriño prepárase para vivir un Nadal cheo de actividades e eventos ofrecendo a veciños e visitantes un mes de propostas para gozar destas datas tan especiais. Desde o 7 de decembro ata mediados de xaneiro, a localidade converterase nun vibrante centro de tradición, cultura, solidariedade e entretemento para todos os públicos.

O Nadal comezará co Concurso de Postais de Nadal que alcanza xa a súa cuarta edición, un evento que convida aos máis pequenos a plasmar os seus mellores desexos do Nadal. A creatividade tamén se verá reflectida na Exposición Origen Es: Familia e Fogar, organizada pola Facultade de Belas Artes da Universidade de Vigo, que poderá visitarse no Centro Cultural Municipal do 23 de decembro ao 2 de xaneiro. Ademais, celebraranse varios espectáculos infantís que non deixarán indiferentes aos máis novos, como o Titiricircus de Tanxarina Monicreques ou o espectáculo María Faltri Picadiscos. A programación inclúe tamén contacontos, como o de Antón e o Apalpador, ou o popular O gato zapato de Barafunda Teatro, que farán as delicias dos nenos e nenas.

A música será outro dos grandes protagonistas en Porriño estas festas. Desde o Festival de Nadal da Escola de Música Municipal ata o Encontro de Corais, no que participarán diferentes corais locais, incluíndo a Coral Polifónica da Escola Municipal de Música do Porriño e a Coral Polifónica Os Penediños de Atios, os sons do Nadal encherán a cidade en concertos de todos os estilos. Destacan, entre outros, os concertos de Cherry Sweet, Xingro´s Band, Iker Faure´s Band, Somoza Trío, e Noemí & Band, que ofrecerán diversas propostas musicais para todos os gustos.

Os máis pequenos poderán gozar tamén de diversas actividades e espectáculos na rúa, como a animación e os tradicionais obradoiros de Nadal. O Tren Turístico de Nadal percorrerá as principais rúas de Porriño, levando a maxia do Nadal a cada recuncho da localidade e unha gran Pista de patinaxe sobre xeo  fará as delicias dos máis pequenos na contorna do pavillón municipal. Ademais, os Elfos de SSMM Os Reis Magos e a Visita do Carteiro Real aos centros educativos de Porriño, facilitarán que os máis pequenos entreguen as súas cartas aos Reis Magos e a Papá Noel. Pola súa banda, Papá Noel visitará o Porriño na tarde de Noiteboa, xusto antes de repartir os agasallos.

Un dos eventos máis esperados cada ano é a Carreira de Nadal, que convoca por centos de corredores nunha xornada deportiva que combina a solidariedade coa diversión. Tamén será un éxito seguro o Mercado Solidario de Nadal, organizado pola Asociación Española Contra o Cancro, onde o espírito solidario fusiónase coa tradición do Nadal.

O Porriño non se esquece da diversión nocturna, e por iso tamén haberá espazo para a festa. Non podía faltar a Festa Pre-Fin de Ano promete ser un gran evento para despedir o 2024, con actividades para toda a familia durante o día e unha intensa noite de actuacións de rondallas, pasacalles, música en vivo con El Combo Dominicano e un dj set. Ademais, o XV Maratón de Panxoliñas do grupo de catequistas da Parroquia Santa María de Porriño na praza será outro dos momentos de encontro e alegría do Nadal.

A véspera de Reis culminará coa tradicional Cabalgata Real, que percorrerá as rúas de Porriño, dando a benvida á visita máis esperada do ano. E como peche da programación, o Certame de Rondallas de Porriño poñerá o broche de ouro a unhas festas cargadas de emoción, cultura e tradición.

“Propoñemos encher as rúas de maxia, solidariedade e cultura durante un mes enteiro. O Nadal en Porriño será, como sempre, un momento para lembrar!”, concluíu o alcalde, Alejandro Lorenzo, convidando a toda a veciñanza do Porriño e da contorna a visitar a vila.

Consulta a programación completa en: https://www.ecultura.net

O escritor porriñés Diego Giráldez acaba de conquistar un dos premios literarios máis importantes de Galicia. No XLIII Premio de Novela Eduardo Blanco Amor, Giráldez proclamouse vencedor ca súa novela “As obras póstumas”, un relato que explora, de maneira profunda e conmovedora, as inquietudes dunha escritora ante o diagnóstico de demencia.

O xurado, tras revisar un total de 49 obras, destacou o estilo “directo, rico e cargado de simbolismo” da novela, cuxa prosa, dixeron, crea unha atmosfera “estremecedora” sobre o tempo, a memoria e a dura realidade da enfermidade psiquiátrica. Un tratamento, subliña o fallo, que foxe dos estereotipos e penetra nos recunchos máis humanos e dolorosos da existencia.

Para Giráldez, este é un novo fito que engade á súa xa envexable traxectoria literaria. A súa prolífica carreira comezou con “Galería de saldos” (2016), un libro de relatos que lle valeu o recoñecemento unánime de crítica e público. Con este galardón, ademais, coroouse como “Autor galego do ano” segundo a revista Fervenzas Literarias. E o seu nome seguiu soando con forza nos anos seguintes, con títulos como “Hotel para coleccionistas discretos” (2019) ou “O meu sangue” (2022). Non foi unha sorpresa, por tanto, que o escritor de Porriño engada este novo aceno na súa carreira literaria.

A noticia do galardón foi celebrada por toda a comunidade literaria galega, e non podía faltar o toque local. O alcalde do Porriño, Alejandro Lorenzo, xunto co concelleiro de Cultura, Bienvenido Estévez, recibiron a Diego Giráldez no salón de plenos da casa do concello. O alcalde felicitou a Giráldez non só polo premio, senón tamén pola honra que supón para o municipio ter nas súas filas a un escritor da súa talla. “É un orgullo ver a un dos nosos, chegar tan alto. Este premio é un reflexo do seu traballo e paixón, e un motivo máis para sentirnos orgullosos do seu talento”, dixo o alcalde.

Giráldez, que afondou en Galicia a través da súa pluma, ten unha vasta traxectoria tanto na literatura como no xornalismo, sendo columnista, editor e fundador de varias revistas. A súa última obra, ademais deste novo triunfo literario, tamén ten un matiz persoal: en 2023 presentou o seu primeiro libro infantil, “Xulia e as cóxegas das nubes”, que ten como protagonista á súa filla.  Este novo premio é só o reflexo dunha carreira que continúa dando máis froitos e abrindo novas portas para Diego Giráldez, quen segue demostrando que a literatura galega e, a porriñesa, ten un lugar fundamental no panorama cultural.

O Concello de Porriño contará cun Cinema Municipal con aforo para unhas 170 persoas que ofrecerá un espazo moderno e de calidade para a proxección de películas de estrea, infantís e ciclos clásicos ou de autor.

A nova sala estará instalada no actual Auditorio do Centro Cultural, un lugar emblemático que será renovado para ofrecer aos espectadores unha experiencia única de visión e son. A Sala de Proxeccións Municipal contará cun sistema de proxección de última tecnoloxía en 4K Ultra Alta Definición e un avanzado sistema de son envolvente, o que garantirá a mellor calidade audiovisual.

Ademais destas innovadoras instalacións, a nova sala adaptarase ás necesidades da industria cultural e os gustos dos cidadáns, ofrecendo un espazo cómodo e funcional. Crearase un novo patio de butacas cun aforo para 170 persoas, que será accesible e versátil, permitindo o seu uso tanto para proxeccións cinematográficas como para outros eventos culturais e educativos.

As butacas, confortables e modernas, serán deseñadas para facilitar a súa transformación en pupitres, aumentando así a utilidade do espazo e potenciando o uso da sala para diversas actividades.

O proxecto, que xa se atopa en proceso de licitación, conta cun orzamento de supoñerá un investimento duns 275.000 euros, un investimento significativo para garantir as mellores prestacións en canto a equipamento e confort para os usuarios.

O Porriño prepárase para vivir unhas festas de Nadal inesquecibles cunha nova atracción estrela: unha pista de patinaxe sobre xeo ecolóxico, pensada especialmente para que os máis pequenos e as súas familias gocen da maxia do Nadal no centro da vila.

Cunhas dimensións de 160 metros cadrados (16 metros de longo por 10 de ancho) e capacidade para 40 persoas simultaneamente, a pista instalarase no aparcamento público da rúa Antonio Palacios. Para garantir a diversión calquera día, estará cuberta por unha carpa, permitindo o seu uso mesmo en días de choiva. E o mellor de todo: o acceso será completamente gratuíto.

Está previsto que a pista de patinaxe abra as súas portas do 7 de decembro ata o 8 de xaneiro, converténdose nun lugar imprescindible para gozar destas datas. O horario xeral será de 11:00 a 21:00 horas, de luns a domingo, aínda que en días sinalados como o 7, 24, 25 e 31 de decembro, e o 1 e 5 de xaneiro, estableceranse horarios especiais que se comunicarán proximamente.

A instalación conta con tecnoloxía de xeo ecolóxico, unha solución respectuosa co medio ambiente que permite gozar desta actividade tradicional do Nadal de maneira sustentable.

Esta iniciativa forma parte dun completo programa do Nadal que o Concello está a ultimar e que comezará hoxe co tradicional aceso da iluminación do Nadal, nun acto cheo de emotividade a cargo dos usuarios e usuarias de Aceesca.

“Queremos encher O Porriño de ilusión e ledicia este Nadal, creando espazos de encontro para as familias e actividades que nos fagan gozar xuntos destas datas tan especiais”, sinalou o alcalde, Alejandro Lorenzo, convidando a todo o mundo a visitar a vila “para gozar dun Nadal inesquecible”.

O Círculo Recreativo Cultural acolle este sábado 19 de outubro, ás 19 h, o concerto do XX aniversario da Coral Polifónica San Blas de Budiño. 

Xunto coa anfitriona actuarán a Coral Polifónica de Tomiño, a Coral Polifónica do Porriño e a Agrupación Musical do Porriño. 

Organiza: Coral Polifónica San Blas de Budiño coa colaboración do Concello do Porriño

Con motivo do centenario da Casa do Concello e o 150 aniversario do nacemento do soado arquitecto Antonio Palacios, O Porriño acolle un ciclo de música clásica que promete ser unha homenaxe á rica tradición cultural da rexión. Este evento levarase a cabo do 19 ao 27 de outubro no Centro Cultural Municipal e na igrexa de Santa María do Porriño

O ciclo dará inicio o sábado 19 de outubro ás 20:00 horas coa conferencia e concerto “O piano na obra de Reveriano Soutullo (1980-1932)” a cargo do recoñecido pianista Alejo Amoedo. Soutullo, unha figura clave na música lírica do primeiro terzo do século XX, é coñecido pola súa produción operística, aínda que o seu repertorio para piano permaneceu en gran medida no esquecemento. Amoedo ofrecerá unha visión xeral da vida e obra do compositor pontareano, acompañado dunha selección das súas pezas pianísticas.

O domingo 20 de outubro ás 18:00 horas, presentaranse os CDs “Saudades d´Alborada” e “No meu peito”, que recompilan baladas e zarzuelas galegas. Este concerto contará coa participación da soprano Loli Crespo, o pianista Alejo Amoedo e o catedrático de Historia da Música Javier Jurado, quen ofrecerá unha velada chea de emocións e tradición.

O ciclo continuará o luns 21 de outubro ás 20:00 horas co concerto “A mansión dos anxos. Música de salón de compositores pontevedreses do XIX e XX”, interpretado novamente por Alejo Amoedo, que explorará as pezas máis significativas da época.

Finalmente, culminará o domingo 27 de outubro ás 19:00 horas na igrexa de Santa María cun concerto lírico protagonizado pola soprano Loli Crespo, o barítono Luis Santana e o pianista Víctor Carbajo. Este trío de artistas de renome promete unha noite inesquecible coas resonancias da lírica española e as melodías máis belas do repertorio clásico.

Este ciclo non só é unha oportunidade para gozar da música, senón tamén para render homenaxe á figura de Antonio Palacios, un símbolo do patrimonio cultural do Porriño. 

O Centro Cultural Municipal do Porriño acolleu hoxe a presentación de Fóra de campo, a obra de Rosalía Fernández Rial que resultou gañadora do Premio Roberto Vidal Bolaño 2024.

Acompañando á autora, estiveron representantes das tres entidades que organizan o certame literario, o Alejandro Lorenzo, alcalde do Concello do Porriño; Raquel Castro,  do IES Ribeira do Louro ; e Marcos Calveiro, director de Edicións de Editorial Galaxia.

O Premio Roberto Vidal Bolaño 2024 naceu pola necesidade de fomentar a escrita de textos teatrais dirixidos ao alumnado de ESO e Bacharelato. Por iso, o Concello do Porriño, o IES Ribeira do Louro e a Editorial Galaxia, convocan anualmente este certame coa finalidade de crear un fondo de textos teatrais susceptibles de ser representados e lidos por alumnado do ensino secundario. Asemade, preténdese honrar a figura de Roberto Vidal Bolaño que tanto contribuíu a engrosar o corpus do teatro galego.

Rosalía Fernández comezou a súa intervención agradecendo aos tres vértices do triángulo organizador. En primeiro lugar ao Concello do Porriño por “ter conciencia de que os adolescentes son o noso futuro máis inmediato e entender que o mellor investimento que se pode facer a futuro son eles. E facelo ademais da mellor maneira, coa cultura. O apoio á cultura é un símbolo de democracia”.  Ao IES Ribeira do Louro “polo bo facer da súa comunidade educativa” e á Editorial Galaxia “e a todo o seu equipo pola súa boa acollida sempre”.

A autora explicou que coa súa obra quixo poñer o foco nesa parte de atrás das redes sociais, “nesa que non se ve na que se agocha o narcisismo, o engano, o maltrato…todas esas cosas perigosas que non se ven de primeiras”. Pero tamén esa otra parte que a resolve, “ese terceiro acto, “As de fiar” esas que sempre te axudan” e é que “detras do espello todas somos a mesma muller e temos toda unha rede de afectos e sororidade que nos salva”.

O alcalde, Alejandro Lorenzo, quixo poñer en valor unha vez máis esta iniciativa xa que, obras como a de Rosalía Fernández Rial,  “non só enriquecen á mocidade no eido educativo e cultural, senón que tamén lles trasmiten valores como a sororidade, a empatía e o respecto, preparándoos para enfrentar a súa vida desde unha perspectiva máis comprensiva e aberta”.

O rexedor aproveitou para felicitar novamente á autora “xa que é unha verdadeira honra contar co seu nome engrosando o palmarés do Premio Roberto Vidal Bolaño”.

Fóra de Campo, o perigo das redes sociais

Fóra de campo, publicada na colección Costa Oeste da Editorial Galaxia, conta a historia de Nere, @nerenao para as escasas seguidoras de Instagram, é unha moza dilixente e vivaz que adora as súas amigas e se leva ben coas compañeiras do equipo de vólei. É unha adolescente máis, unha estudante máis dun instituto máis, coma calquera outra. Pero todo cambia cando Gladius, o influencer máis admirado pola comunidade, repara nela. En canto lle pide participar na súa nova serie, a vida dálle un xiro radical. Entra no reino das elixidas e nada volve ser coma antes.

Fóra de campo enfoca o que fica alén do plano, o que se pode intuír pero non se ve, nese espazo onde se revela a cara oculta das redes sociais, o poder das contendas cotiás, os fíos que unen as mulleres que non se deixan enredar. Fóra de campo fala unha linguaxe contemporánea onde conflúen as artes escénicas, plásticas e musicais

Sobre a autora

Rosalía Fernández Rial (Muxía, 1988) é filóloga, doutora en Didáctica das Linguas e da Expresión Dramática pola USC e performer.

Dedícase á escrita desde moi nova e, como poeta, publicou os libros En clave de sol (2009), Átonos (2011), Un mar de sensacións (2012), Vinte en escena (2012, 2014), Ningún amante sabe conducir (2014), Contra-acción (2016) e a antoloxía bilingüe Sacar a bailar. Poesía reunida (2009-2016) e Árbores no deserto (Galaxia, 2020). No ámbito da narrativa publicou Bonus Track (Galaxia, 2016), e no do ensaio, o seu traballo Aulas sen paredes (2016) un libro-DVD sobre unha metodoloxía innovadora no ámbito da didáctica das linguas que mereceu o Premio á Mellor Iniciativa Bibliográfica da II Gala do Libro Galego en 2017. En 2024 publica, na colección de Biblioteca de Intervención Social, Mover ficha. É gañadora do Premio Roberto Vidal Bolaño 2024 por Fóra de campo.