Cultura e festas

• A homenaxe recoñeceu o paso de Laura Carmona polas audicións a cegas de La Voz Kids, onde, con só 14 anos, superou con éxito a primeira fase do concurso musical televisivo.

O Porriño, 15 de maio de 2025.– O Concello do Porriño rendeu este martes unha emotiva homenaxe a Laura Carmona, unha nova porriñesa de tan só 14 anos que vén de superar con éxito as audicións a cegas do prestixioso concurso televisivo La Voz Kids.

Durante o acto, celebrado na casa consistorial, o alcalde Alejandro Lorenzo quixo poñer en valor “o talento, o esforzo e a valentía” de Laura, destacando que “representa con orgullo a nosa vila e demostra que os soños poden cumprirse cando se traballa por ele”s.

“Laura emocionounos a todos cunha interpretación marabillosa, en galego, dun tema tan noso como Lela. Non só levou o seu talento á televisión nacional, senón que fixo que o noso idioma e a nosa cultura brillaran tamén nese escenario. Para O Porriño é un orgullo contar con unha artista coma ela”, subliñou o rexedor.

A actuación de Laura, quen escollera a versión de Dulce Pontes do tema composto orixinalmente por Castelao, conquistou ao xurado do programa desde o primeiro momento. Cunha voz doce e chea de emoción, conseguiu que un dos coaches virase a súa cadeira, garantindo así o seu pase á seguinte fase do concurso.

Natural de O Porriño, Laura leva cantando desde os cinco anos no coro dirixido polo seu pai. Ademais de cantar, tamén toca a pandeireta, algo de piano e órgano, e ten formación en baile. A música corre polas súas veas, pois tanto o seu pai como o seu irmán son guitarristas. Porén, o logro acadado no plató de La Voz Kids foi froito do seu talento e dedicación persoal.

Con esta homenaxe, O Porriño quixo recoñecer publicamente a traxectoria e o futuro prometedor dunha artista que, sen dúbida, dará moito que falar nos escenarios.

A aldea de Cans xa respira ambiente de festival. Esta mañá celebrouse no Torreiro o acto de presentación oficial do XXII Festival de Cans, que terá lugar entre os días 20 e 24 de maio, reunindo unha vez máis o mellor do cinema galego e estatal nun dos eventos culturais máis singulares do país.

O acto contou coa participación do alcalde do Porriño, Alejandro Lorenzo; do presidente da Deputación de Pontevedra, Luis López Diéguez; do director da AGADIC da Xunta de Galicia, Jacobo Sutil; así como de representantes das principais empresas patrocinadoras, como Cristina Canosa por Estrella Galicia, Melisa Pagliaro por Gadis e Ana Rus por Lonza. Tamén estiveron presentes a actriz Isabel Blanco e o director do festival, Alfonso Pato.

O alcalde do Porriño, Alejandro Lorenzo, destacou o papel do festival como motor cultural e social: “Cans é un espello no que se amosa o mellor da nosa comunidade. Non é só un festival, é parte do noso ADN como concello. É identidade, dinamismo local e compromiso colectivo.”

Lorenzo puxo tamén en valor o carácter integrador do festival, que transforma espazos cotiáns en escenarios de cine: “Aquí a cultura nace das casas, dos galpóns, dos camiños e do corazón da xente. Esa conexión co territorio é o que fai de Cans algo irrepetible.”

O acto serviu tamén para lembrar os homenaxeados desta edición, catro figuras que encarnan á perfección o espírito do Festival de Cans. O director Alfonso Zarauza será distinguido co Premio Pedigree pola súa traxectoria exemplar no cinema galego. Tamén recibirán os Chimpíns de Prata a actriz e directora Nerea Barros, a artista Uxía Senlle e Adriano Campos, o veciño máis lonxevo da aldea, memoria viva do lugar, colaborador nos documentais colectivos do festival, membro do xurado veciñal e actor veterano da Compañía Fontevella.

Nesta XXII edición, o festival ofrecerá máis de 150 actividades, con seccións que apostan pola creación colectiva, a memoria e o talento local. A programación inclúe actos tan emotivos como a inauguración da Rúa Efémera Cruz Risco, a homenaxe ao Can de Pedra e á veciña Alicia Sánchez, así como a colocación da placa ao homenaxeado Adriano Campos. O público poderá gozar tamén do documental colectivo Proxecto Cans 303, das rutas literarias con Iria Misa e Carlos Meixide, e do tradicional roteiro musical de Xurxo Souto. Non faltarán as exposicións, os concertos, o concurso Pintar o Cine, nin as esperadas procesións de chimpibuses, que percorrerán a aldea e o Porriño cheas de música. O festival culminará o sábado 24 coa gala de entrega dos premios Cans de Pedra no Espazo Estrella Galicia da Leira do Río.

Durante a presentación, destacouse o apoio do Concello do Porriño, que mantén un compromiso firme coa continuidade e crecemento do festival. Xunto a el, recoñeceuse tamén o respaldo da Xunta de Galicia e da Deputación de Pontevedra, así como a implicación das empresas patrocinadoras. Subliñouse, ademais, a importancia da colaboración entre institucións e dunha veciñanza que entende a cultura como un ben común e compartido.

O acto rematou coa tradicional foto de familia e a presenza simbólica dos chimpíns, sinal de identidade do festival, que un ano máis converterá esta aldea nun epicentro de cine, memoria e creatividade.

• Se traballará para buscar unha nova data que permita celebrar o evento en condicións máis axeitadas.

O Porriño, 2 de maio de 2025.– O Concello do Porriño vese na obriga de cancelar o Festival Folclórico das Asociacións Culturais e Veciñais, previsto para este sábado 3 de maio na Praza Antonio Palacios, debido á previsións meteorolóxicas adversas.

A decisión responde á necesidade de garantir a seguridade das persoas asistentes e das agrupacións participantes, xa que o evento se ía desenvolver ao aire libre.

A administración local destaca que o festival representa unha celebración moi especial, que pon en valor as tradicións populares do municipio e o labor das asociacións culturais. Se traballará para buscar unha nova data que permita celebrar o evento en condicións máis axeitadas.

O alcalde, Alejandro Lorenzo, explicou que “é unha mágoa ter que aprazar unha cita tan esperada, pero a seguridade e a comodidade da veciñanza e dos grupos participantes deben ser prioritarias”.

O Concello comunicará a nova data en canto sexa posible e agradece á cidadanía a súa comprensión.

. En plena primavera, o Concello do Porriño anuncia a primeira edición  da Mostra da Camelia. Será a vindeira fin de semana, os días 12 e 13 de abril, no Parque do Cristo, cando expositores chegados de toda a provincia amosen os seus traballos de floricultura e os asistentes poidan contemplar ducias de especies e variedades deste xénero orixinario das rexións tropicais e subtropicais de Asia suroriental, China e Xapón.

Con todo, a climatoloxía e acidez do terreo en toda Galicia e moi particularmente nas Rías Baixas favorecen o cultivo deste arbusto e inducen unha larga floración. “No Porriño o culto a esta flor é unha tradición moi arraigada xa que contamos coas condicións idóneas para o seu cultivo, o que dá lugar a curiosos exemplares desta flor da que existen máis de 250 variedades diferentes”, apuntan dende a organización desta I Mostra da Camelia Concello do Porriño, a cal dará continuidade a organizada durante a última década pola Asociación San Salvador de Torneiros.

Na xornada do sábado o horario será vespertino, de 16.00 a 20.00 horas, e xa o domingo a mostra estará aberta ao público pola mañá, de 10.30 a 14.00 e pola tarde de 16.00 a 20.00 horas.

O alcalde Alejandro Lorenzo anima a toda a veciñanza e visitantes a acudir a esta cita, “dar unha volta, compartir conversas e deixarse sorprender polo recendo destas flores”.

Esta do Porriño, organizada polo Concello coa colaboración da Xunta de Galicia e a Deputación de Pontevedra, é unha das citas xa ineludibles no calendario de feiras, mostras, eventos e exposicións da camelia na nosa Comunidade deste ano 2025.

O Porriño prepárase para acoller, o vindeiro sábado 5 de abril, a XXXVII Feira Apícola Rías Baixas, un evento organizado pola Agrupación Apícola de Galicia en colaboración coa Asociación de Apicultores da Provincia de Pontevedra e o Concello do Porriño. Durante toda a xornada, que se desenvolverá na Praza do Cristo de 10:00 h a 20:00 h, o mel converterase no gran protagonista nunha celebración que mestura tradición, gastronomía e innovación apícola.

Hoxe tivo lugar a presentación oficial, na que participaron o alcalde de O Porriño, Alejandro Lorenzo, a delegada territorial da Xunta de Galicia en Vigo, Ana Ortiz, membros da Agrupación Apícola de Galicia, da IXP Mel de Galicia e da Asociación de Apicultores da Provincia de Pontevedra, así como autoridades municipais.

O alcalde do Porriño, Alejandro Lorenzo, salientou que “é un orgullo para o Porriño ser punto de encontro de expertos nacionais e internacionais que comparten coñecementos e experiencias en beneficio do sector apícola”. Tamén destacou “a importancia de atraer visitantes e dinamizar a economía local mediante eventos que poñen en valor a nosa tradición e cultura apícola”.

A delegada territorial da Xunta de Galicia en Vigo, Ana Ortiz, quixo manifestar o apoio do goberno autonómico a este tipo de iniciativas: “Desde a Xunta de Galicia sempre estaremos ao carón de proxectos que contribúan a poñer en valor sectores fundamentais para o desenvolvemento rural e a conservación do noso patrimonio natural”. Ortiz destacou, ademais, que “a Feira Apícola Rías Baixas é un exemplo de cooperación institucional que permite promover a excelencia e profesionalización dun sector esencial para Galicia”.

A feira comezará ás 10:00 e durará ata as 20:00, cunha programación que combinará actividades de divulgación e gastronomía. Entre as actividades destacadas, estarán as Xornadas Técnicas Internacionais de Apicultura, nas que se reunirá a expertos para abordar os retos do sector. Na Praza do Concello, tamén se celebrará un showcooking a cargo de Xulio Mato, do programa da TVG A voltas co prato, no que o mel será o ingrediente protagonista.

Ademais, haberá catas comentadas dos meles da IXP Mel de Galicia e da DOP Miel de la Alcarria, xunto cunha cata de queixos galegos con DOP premiados nas Catas de Galicia 2024. “Queremos que todos os asistentes vivan unha experiencia sensorial, degustando produtos de alta calidade e coñecendo de cerca o seu proceso de elaboración”, destacou o rexedor.

A parte máis lúdica incluirá o Bee Happy Market, un espazo de venda de meles e produtos artesanais, así como obradoiros infantís para achegar aos máis pequenos ao mundo da apicultura. Pola súa banda, o venres pola mañá terá lugar unha actividade didáctica para os centros educativos da vila, onde os escolares aprenderán sobre as abellas e a súa importancia na polinización.

Outra das propostas máis agardadas é a tradicional degustación do Pan do Porriño, que se celebrará ás 18:30. Tamén se organizará unha ruta de tapas nos establecementos locais e un sorteo de tres caixas con produtos galegos entre os asistentes á feira ou os clientes das tascas adheridas.

O evento converterá, un ano máis, ao Porriño no epicentro da apicultura en Galicia, demostrando o traballo colectivo e o compromiso co desenvolvemento sostible do sector.

O alcalde do Porriño, Alejandro Lorenzo, destacou hoxe a importancia da artesanía como elemento clave para o desenvolvemento económico e cultural do municipio durante a visita ao taller La Parabólica da deseñadora e cesteira Julia de la Cal. O rexedor acompañou ao conselleiro de Emprego, Comercio e Emigración, José González, ao director xeral de Comercio e Consumo, Gabriel Alén, e á xerente da Fundación Artesanía de Galicia, Elena Fabeiro, nesta visita institucional que puxo en valor o talento local e o futuro do sector artesán.

Lorenzo Alonso subliñou que “no Porriño temos a sorte de contar con obradoiros que son exemplo de como a tradición pode convivir coa innovación e a modernidade. A artesanía non só representa un legado cultural senón que tamén se converte nun motor de xeración de emprego e dinamización económica para a nosa vila”.

Durante o percorrido polo taller, o alcalde resaltou o papel de Julia de la Cal como referente no sector, especialmente tras ser galardoada nos Premios Artesanía de Galicia pola súa obra PERIFERIA#01. “A súa traxectoria demostra que a formación e a aposta pola contemporaneidade permiten que os oficios tradicionais sigan tendo un papel relevante no mercado actual. Desde o Concello seguiremos apoiando estas iniciativas que contribúen á nosa identidade e ao desenvolvemento sostible”, afirmou Lorenzo Alonso.

A súa obra ‘PERIFERIA#01’, pola que foi recoñecida na última edición dos galardóns Artesanía de Galicia, supón unha redefinición da cesta tradicional, experimentando co uso de elementos e materiais máis industriais como o cemento.

O concelleiro de Cultura, Benvenido Estévez, tamén quixo destacar o valor da artesanía para a identidade cultural do Porriño. “A artesanía non é só un oficio, é unha manifestación da nosa historia e do noso xeito de entender o mundo. Iniciativas como as de Julia de la Cal mostran como o pasado e o presente poden fusionarse para crear proxectos con gran proxección de futuro. Desde a Concellería de Cultura seguiremos promovendo e apoiando a difusión destas manifestacións artísticas e tradicionais”, sinalou Estévez.

O goberno municipal, consciente da importancia de preservar e impulsar o sector artesanal, reitera o seu compromiso de colaborar con iniciativas que fomenten a remuda xeracional e a competitividade do sector con modelos de negocio sustentables e innovadores.

O Club de Lectura da Biblioteca Municipal do Porriño celebrará o vindeiro 17 de marzo unha sesión especial en aberto dedicada á figura de Castelao, coincidindo coa exposición “Castelao grafista (facsímile)”, que pode visitarse no Centro Cultural Municipal ata o 19 de marzo. Esta iniciativa enmárcase na conmemoración do Ano Castelao, ao cumprirse o 75 aniversario do seu pasamento.

A sesión, aberta a toda a cidadanía interesada, estará guiada pola coordinadora do Club de Lectura, Ana Abad de Larriva, quen participou como tradutora no catálogo Castelao grafista. Pinturas, dibujos, estampas. Durante o encontro, que se desenvolverá no Centro Cultural Municipal de 18.00 a 19.30 horas, abordarase especialmente a relación entre pintura, ilustración e texto na obra do autor rianxeiro, achegando unha perspectiva singular sobre a súa produción artística e literaria.

O alcalde do Porriño, Manuel Alejandro Lorenzo Alonso, quixo salientar a relevancia desta actividade dentro do panorama cultural local: “Con esta sesión especial, seguimos a fomentar o acceso á cultura e a poñer en valor o legado de Castelao, unha figura fundamental da nosa identidade e do noso patrimonio”.

Pola súa banda, o concelleiro de Cultura, Benvido Estévez Maceira, destacou o papel que xoga esta iniciativa dentro da ampla programación cultural do Concello: “A exposición e o encontro do club de lectura son unha oportunidade excepcional para que a veciñanza se achegue a Castelao desde diferentes perspectivas, promovendo un diálogo enriquecedor entre a literatura e a arte”.

A exposición Castelao grafista (facsímile) está comisariada por Miguel Fernández-Cid e organizada pola Fundación Gonzalo Torrente Ballester, a Real Academia Galega de Belas Artes e Turismo de Galicia – Xunta de Galicia. Trátase dun dos proxectos máis ambiciosos para difundir a obra e o pensamento de Castelao a nivel internacional. Ademais, enmárcase dentro da iniciativa Cultura por Alimentos, promovida por Afundación a favor de FESBAL (Federación Española de Bancos de Alimentos).

Esta actividade especial forma parte da ampla travesía literaria e artística que realiza o Club de Lectura da Biblioteca Municipal do Porriño, que combina paradas en referentes do contexto máis próximo con achegamentos a culturas máis afastadas. Despois de explorar a figura de Castelao, o club continuará a súa viaxe literaria ata Corea do Sur, coa lectura de A vexetariana, obra da recente gañadora do Premio Nobel de Literatura, Han Kang.

O Entroido do Porriño 2025 xa está oficialmente en marcha, cunha primeira xornada que encheu as rúas de alegría, música e moita participación veciñal. A festa comezou ao mediodía co desfile dos tradicionais xigantes e cabezudos, que percorreron a vila entre as 12:00 e as 14:00 h contaxiando á veciñanza e visitantes co seu ambiente festivo, acompañados polas charangas Vai de Baile e Noroeste.

Ás 13:00 h celebrouse o acto central da mañá: o pregón do Entroido, a cargo de Carla Marques Vaquero, alumna de 4º da ESO do Colexio Santo Tomás e gañadora do concurso de carteis na categoría de Secundaria. O pregón desenvolveuse no balcón da Casa Consistorial, onde Carla estivo acompañada polos outros escolares premiados, resaltando o talento e a creatividade da mocidade porriñesa.

Durante a súa intervención, Carla compartiu a emoción que sentiu ao ver o seu cartel convertido na imaxe oficial destas festas. No seu discurso destacou a importancia da arte e da creatividade nas nosas tradicións, lembrando que o Entroido é moito máis ca unha festa: é unha expresión da identidade colectiva do Porriño, unha conexión directa coas nosas raíces e unha celebración aberta a toda a comunidade. “A capacidade de crear e de festexar é algo que nos fai humanos”, afirmou a pregoeira, que tamén quixo reivindicar o papel da xuventude como garante de que esta festa siga viva no futuro.

O alcalde do Porriño, Manuel Alejandro Lorenzo Alonso, destacou a relevancia de darlle voz á mocidade no inicio dunha das festas máis queridas da vila: “O Entroido do Porriño é de todos e todas, e contar cunha pregoeira nova, creativa e orgullosa da súa cultura é unha mensaxe clara de que o futuro da nosa festa está asegurado”.

Unha tarde e unha noite cheas de propostas para todos os públicos

A programación continúa esta tarde cun dos actos máis tradicionais e simbólicos do noso Entroido: o 81º Xogo da Ola, que comezará ás 16:00 h na súa rúa homónima. Este evento, que forma parte da historia do Entroido local, ofrecerá unha tarde chea de emoción e tradición.

Entre as 16:30 e as 18:00 h, a festa volverá ás rúas da man dos cabezudos e das Charangas SDK, Vai de Baile e Bate no Cobre, que seguirán espallando música e bo humor polas rúas da vila. Ao mesmo tempo, na Praza Arquitecto Antonio Palacios, terá lugar un obradoiro infantil para que a cativada tamén poida gozar da festa a súa maneira.

Ás 18:30 h, sairá dende o Pavillón Municipal de Deportes o esperado Desfile de Comparsas, que promete ser o máis multitudinario da historia de O Porriño, con 27 comparsas e 2.155 participantes dispostos a encher as rúas de cor e vitalidade. O desfile percorrerá as principais rúas ata a praza central, onde as comparsas desfilarán ao ritmo de música, baile e ledicia, creando un espectáculo incrible que contaxiará a todo o público.

Para pechar a xornada por todo o alto, a música tomará o escenario da Praza Arquitecto Antonio Palacios cos concertos de Gin Toni’s, Henry Méndez e Samu Pexe, que farán vibrar ao público co seu ritmo e bo ambiente.

E nos próximos días…

O Entroido non remata aquí. O domingo, a festa continuará cunha xornada dedicada á cativada, que incluirá unha festa infantil pola mañá, e ás 22:00 h, o concerto da Orquestra París de Noia porá o broche final ao día cunha actuación chea de enerxía e música festiva. O luns, ás 17:00 h, a cativada continuará desfrutando das actividades do entroido cun obradoiro infantil na Praza Arquitecto Antonio Palacios.

As Charangas Imperiais e a Fanfarria Furruxa volverán animar as rúas o martes de 12:00 a 14:00 h. Pola tarde, a partir das 17:00 h, desfilarán novamente as comparsas acompañadas de charangas e batucadas, dende a  Rúa Manuel Rodríguez ata a Praza Central.

Finalmente, o mércores de cinza, último día do Entroido, as 17:00 h. celebrarase o tradicional velorio da sardiña no Círculo Recreativo Cultural. A xornada continuará coa lectura do testamento da sardiña na Praza do Concello e o acompañamento da sardiña ata o río Louro, pechando a festa de forma inesquecible.

O Porriño xa está na rúa e a mensaxe é clara: Que de comezo o Entroido! Viva O Porriño!