Cultura e festas

Arranca outubro co inicio dos cursos nas asociacións veciñais e culturais con máis de 90 clases á semana

  • 19 entidades das oito parroquias ofrecen, gracias ás axudas nominativas do Concello, máis de 550 horas mensuais de actividades para todas as idades e gustos, con formación en música, idiomas, pintura, costura, teatro e deporte

O Porriño, 2 de outubro de 2025.- O Concello do Porriño dá a benvida ao mes de outubro cunha intensa programación de actividades formativas e de lecer nas distintas parroquias, da man do tecido asociativo local. Son 19 asociacións veciñais e culturais, repartidas polas oito parroquias do municipio, as que ofertan máis de 550 horas mensuais de cursos, o que supón unha media de 138 horas semanais distribuídas nunhas noventa clases de luns a sábado.

A programación abrangue propostas para todas as idades e gustos, desde actividades deportivas como ximnasia, pilates, zumba ou ioga, ata obradoiros de música tradicional (percusión, canto, pandeireta, acordeón, gaita, coro), pasando por clases de inglés, costura, labores, corte e confección, pintura, restauración, traballos con coiro, teatro e arte floral, entre outras. As actividades desenvólvense de luns a sábado, en diferentes horarios, maioritariamente polas tardes para facilitar a participación da veciñanza.

Na xornada inaugural, o alcalde do Porriño Alejandro Lorenzo visitou unha das actividades con maior participación, o curso de ximnasia en Pontellas, que se ofrece en dúas quendas debido á alta demanda. “Desde o Concello apostamos por apoiar o dinamismo das asociacións e garantir que en todas as parroquias haxa acceso a actividades culturais, deportivas e formativas. É unha forma de facer comunidade, de mellorar a calidade de vida e de fortalecer o tecido social que tanto caracteriza ao noso municipio”, sinalou o alcalde.

Esta ampla oferta de cursos é posible gracias á colaboración entre o Concello e as entidades organizadoras. O Concello do Porriño colabora economicamente con todas estas asociacións mediante achegas nominativas anuais, cuxo importe total supera os 50.000 euros, que permiten garantir a continuidade e calidade das actividades en cada parroquia..

O Concello continuará a traballar da man das asociacións para ampliar e diversificar a oferta ao longo do ano, consolidando o seu compromiso cun Porriño activo, participativo e unido.

02/10/2025 in Cultura e festas, Parroquias

Uns 300 corredores tomarán as rúas da vila na tradicional Milla Urbana Porriñesa

  • A proba chega a súa décimo terceira edición o vindeiro sábado, 4 de outubro, dentro das Festas do Cristo
  • A inscrición, on line e gratuíta, permanecerá aberta ata a medianoite da xornada previa

O Porriño, 1 de outubro de 2025.- O Concello do Porriño, en colaboración co Club Atletismo Porriño, organiza a XIII Milla Porriñesa “Festas do Cristo”, que terá lugar o vindeiro sábado 4 de outubro, a partir das 19.00 horas, nas rúas do centro urbano da vila, con saída e chegada na Praza Arquitecto Antonio Palacios.

Desde o Club Atletismo Porriño agardan a participación duns 300 atletas entre todas as categorías, dende cativada de 2 anos ata corredores veteranos. Con todo, lembran que a inscrición continúa aberta de xeito gratuíto ata a medianoite do venres 3 de outubro, a través da páxina web ecultura.net

O alcalde do Porriño Alejandro Lorenzo fixo un chamamento á participación destacando o valor do evento como parte das Festas do Cristo. “A Milla Porriñesa é un exemplo de como o deporte e as nosas tradicións poden ir da man. É unha festa para toda a familia e unha oportunidade para encher as rúas de Porriño de vida e compañeirismo. Animo a todas as veciñas e veciños a que se anoten e formen parte desta proba tan nosa”.

O evento está aberto tanto a atletas federados como non federados, e contará con cinco categorías por idades: Pitufiñas e Pitufiños (2-4 anos) que correrán 100 metros, velociraptores (5-7 anos) 200 m, Esprinters (8-10 anos) 400 m, Correcamiños (11-14 anos) 800 m e Milla Porriñesa (15 anos en diante) 1.609 metros, dentro desta inclúense tamén as subcategorías Veteranos A (35-50 anos) e Veteranos B (máis de 50 anos). Todos os participantes recibirán medallas ou trofeos segundo a categoría, ademais os tres primeiros absolutos (masculino e feminino) recibirán cadansúa bola de pan do Porriño. O cronometraxe será manual a cargo do persoal do Club Atletismo Porriño, contabilizándose os tempos dos tres primeiros clasificados de cada carreira.

Para facilitar a participación, o Concello poñerá a disposición dos atletas vestiarios e duchas no Polideportivo Municipal. Dende a organización fan un último convite a sumarse á carreira antes do peche de inscrición, destacando o carácter familiar, integrador e festivo da proba, xa convertida nun referente deportivo local nas Festas do Cristo.

01/10/2025 in Cultura e festas, Deportes

O Porriño presenta a XXXII Festa dos Callos cunha receita exclusiva de Yayo Daporta que fusiona tradición e vangarda gastronómica

  • 33 establecementos hostaleiros da vila servirán os callos o vindeiro domingo, 5 de outubro, a partir das 12.00 horas, ao prezo único de 8 euros

O Porriño, 30 de setembro de 2025.- A Praza do Concello acolleu este serán o acto de presentación da XXXII Festa dos Callos, un dos eventos gastronómicos máis arraigados da comarca que, como vén sendo habitual, porá o broche de ouro das Festas do Cristo.

O acto contou coa presenza do alcalde, Alejandro Lorenzo; os deputados provinciais, Jorge Cubela e Javier Tourís; o recoñecido cociñeiro galego con estrela Michelín, Yayo Daporta e José Manuel Fernández, presidente da Asociación de Hostaleiros do Porriño, ademais dunha representación de hostaleiros, de asociacións culturais, veciñais e deportivas do municipio e veciños,  que participaron da degustación deste prato tradicional coa que rematou o acto.

“A Festa dos Callos é moito máis ca unha cita gastronómica, é un reflexo da nosa identidade como pobo, da nosa capacidade para mesturar tradición e innovación e da forza do noso tecido hostaleiro e social”, sinalaba o alcalde que convidou “a toda a veciñanza do Porriño, da comarca e de toda Galicia a que se acheguen este domingo a gozar dunha xornada única, onde a boa comida, o ambiente festivo e o orgullo de ser do Porriño se mesturan nun prato tan noso como son os callos”.

Nesta edición, a festa dá un paso máis alá ao contar, durante o acto de presentación deste serán, coa participación especial de Yayo Daporta, membro do grupo Nove, quen presentou unha receita exclusiva de callos, que une creatividade culinaria e respecto pola tradición. Trátase de dúas elaboracións singulares: “callos de tenreira estofados como unha cochinita pibil” e “callos de bacallau ao pilpil”, que se fusionan nun prato único e cuxos ingredientes, modo de elaboración e preparación foi presentado durante o acto, desvelando así o “segredo” entre tódolos asistentes.

A XXXII Festa dos Callos celebrarase este domingo, 5 de outubro, a partir das 12.00 horas, e contará coa participación de 33 establecementos hostaleiros da vila, que ofrecerán cadansúa receita de callos, poñendo en valor a diversidade e a creatividade da gastronomía local. As racións poderán degustarse ao prezo único de 8 euros, que inclúe ración de callos, pan e unha cazola de barro conmemorativa.

30/09/2025 in Cultura e festas

As campioas berran e O Porriño responde: comezan as festas!

  • As xogadoras do equipo feminino de División de Honra do Club do Balonmán Porriño puxeron voz ao pregón das Festas do Cristo 2025
  • Esta noite DJ Sash! subirase ao escenario do Dabuten! Remember Festival e antes, actuación da Banda de Gaitas San Xoán de Paramos. A programación continuará mañá domingo e o luns

O Porriño, 27 de setembro de 2025.- Cun berro de equipo “Porriño en festas” así foi como deron o pistoletazo de saída oficial das Festas do Cristo as pregoeiras deste ano. As xogadoras do equipo feminino de División de Honra do Club de Balonmán Porriño subíronse ao balcón do Concello para dirixirse á veciñanza e visitantes que ateigaban este mediodía a Praza Arquitecto Antonio Palacios. Alicia, Aitana, Paula, Iria e Katia foron as encargadas de poñerlle voz a todo o equipo, subcampión de Europa cunhas verbas cheas de emoción, orgullo e gratitude, as mesmas coas que o alcalde Alejandro Lorenzo se dirixiu tamén a elas. “Hoxe é un día especial para todo o Porriño. As nosas festas comezan coa forza, a ilusión e o exemplo dun grupo de mulleres que levan o nome do noso concello por toda Europa con orgullo e dignidade. Elas representan o mellor do noso pobo: esforzo, traballo en equipo, humildade e paixón polo que se fai. Por iso, este ano, decidimos que sexan elas as encargadas de dar o pregón e prender a chama desta celebración. Porque elas son un exemplo para a nosa mocidade, un orgullo para a nosa veciñanza e un símbolo da unión entre deporte, cultura e tradición. Porriñesas e porriñeses, co voso permiso… deixámosvos coas auténticas campioas: as pregoeiras das Festas do Cristo 2025!”

Durante as súas intervencións, as xogadoras destacaron o apoio incondicional que sempre reciben da afección e da veciñanza en xeral, a importancia das tradicións locais e o vínculo entre deporte e comunidade. Houbo lembranzas, recoñecementos ás persoas que coidaron e coidan con tanto agarimo a capela do Cristo, referencias ao ambiente festivo do Porriño e moito humor compartido co público, sen esquecerse de animar a todos os presentes a que acudan ao pavillón municipal a ver os seus partidos.

As xogadoras puxeron en valor o papel do club como símbolo de unión e inspiración para a mocidade, e remataron cun berro colectivo que puxo a praza en pé: “1, 2, 3… Porriño en festas!”. Un inicio perfecto para unhas festas pensadas para todas e todos, “igual que o balonmán”, e para as que deron un consello ”gardar forzas atar o final… pois temos escoitado que poderían incluír os nosos adestramentos como parte do programa nas vindeiras festas e a mestura pode ser explosiva”, advertiron entre sorrisos.

A festa continuará ao longo de toda a xornada de hoxe, prolongándose ata o vindeiro luns, festividade local no Porriño. Así, esta  tarde, a partir das 18.30 horas, haberá animación de rúa con batucadas. Ás 19.00 horas no Parque do Cristo tocarán a Agrupación Musical do Porriño e a Banda Unión Musical de Tenorio e ás 21.00 horas a Banda de Gaitas San Xoán de Paramos ofrecerá un concerto en Domingo Bueno e a orquestra Ritmo Joven amenizará a verbena a partir das 22.30 horas na Praza Central.

O DJ e produtor máis icónico da escena dance europea dende os anos 90, Sash! será o cabeza de cartel do Dabuten! Remember Festival, a gran cita musical da xornada, a partir das 22.00 horas, con entrada gratuíta, no aparcadoiro da rúa Progreso. A actuación de Sash! está previstas para as 00.30 horas, previamente actuarán Dmirón (22.00 h) e Traffic House (23.15 h) e despois Groove Amigos (01.45 h) e Michi (03.00 h).

Domingo 28

Os actos relixiosos centran a xornada matinal do domingo. A misa solemne oficiarase ás 12.00 horas na igrexa de Santa María, amenizada pola Coral Polifónica da EMM do Porriño, trala cal terá lugar a procesión do Santísimo Cristo da Agonía cara a capela do Cristo, acompañada pola Banda de Guerra da Brilat, a Escuadra de Gastadores e a Banda de Gaitas Os Coribantes.

De novo haberá animación de rúa con batucadas e charangas, de 12.00 a 14.30 e de 18.00 a 20.30 horas. E para os máis pequenos da casa, ás 18.00 horas chegará ao Porriño o espectáculo de Cantajuego “Coco y Pepe”, na rúa Domingo Bueno, de xeito paralelo no Parque do Cristo, haberá tamén obradoiro infantís.

A partir do serán música, primeiro da man de Os Coribantes, ás 19.30 horas na Praza Arquitecto Antonio Palacios, e logo coas orquestras Galilea e América, a partir das 21.00 horas, na Praza Central e na rúa Domingo Bueno.

Luns 29

O luns, festividade local, oficiarase a xa tradicional a misa solemne de campaña ao mediodía no Parque do Cristo e ao rematar concerto da Banda de Música Municipal de Redondela, que volverá a actuar pola tarde, ás 19.00 horas, no mesmo lugar xunto coa Banda de Música Cultural de Arcade. Haberá tamén animación de rúa de 12.00 a 14.30 e de 18.00 a 20.30 horas. Ademais, ás 17.00 horas na Praza Arquitecto Antonio Palacios, “Jauja, xogos e cancións do país soñado” a cargo de Titiriteros de Benéfar. Xa pola noite, broche de ouro, coas orquestras París de Noia, ás 21.00 na rúa Domingo Bueno e Panorama no aparcadoiro da rúa Progreso, ás 23.45 horas.

27/09/2025 in Cultura e festas

O Concello do Porriño recupera a maxia da correspondencia escrita co seu primeiro cuño turístico e un envío masivo de tarxetas postais de Correos

  • Escolares e veciñanza convértense en embaixadores da vila escribindo cadansúa postal co edificio consistorial como símbolo vivo do legado de Antonio Palacios, cuxo busto de perfil protagoniza o cuño
  • O alcalde Alejandro Lorenzo estrea a primeira das 5.000 impresas para remitila ao Presidente do Goberno solicitándolle un soño histórico: a supresión do paso a nivel do tren

O Porriño, 26 de setembro de 2025.- Un acto emotivo e cargado de sentimento foi o celebrado esta mañá na Praza Arquitecto Antonio Palacios do que participaron arredor de 200 escolares de 5º de Primaria dos distintos colexios do Porriño. O Concello vén de presentar o primeiro cuño turístico da vila e a tarxeta postal de Correos en homenaxe ao seu fillo predilecto, Antonio Palacios a través dunha iniciativa que parte da biblioteca municipal co obxectivo de recuperar a maxia da correspondencia escrita nun contexto comunicativo cada vez máis dixital.

O cuño, que se conseguiu grazas á solicitude que realizou o Concello do Porriño á Sociedade Estatal Correos e Telégrafos e o apoio da Sociedade Filatélica e Numísmática Canguesa, está dispoñible dende hoxe na oficina de Correos do Porriño para calquera persoa que desexe enviar unha misiva con selo a calquera parte do mundo. Cómpre lembrar que a imaxe de Antonio Palacios apareceu por primeira vez nun selo no ano 1975, pero nunca nun cuño turístico. Precisamente é a destacar que ao igual que hoxe estamos nós aquí, en Madrid están a presentar outro cuño turístico e postal dedicados tamén a Palacios. O noso amosa o seu busto de perfil xunto á casa consistorial porriñesa e o de Madrid a mesma imaxe do arquitecto acompañada doutra das súas obras, o Palacio de Cibeles.

Por outra banda, emítense un total de 5.000 tarxetas postais prefranqueadas para territorio nacional. Ademais das repartidas no acto de hoxe estarán tamén a disposición da cidadanía, de xeito gratuíto, na casa consistorial e na biblioteca municipal.

“Hoxe é un día moi especial para O Porriño, porque con esta iniciativa recuperamos non só a memoria e o legado do noso ilustre arquitecto Antonio Palacios, senón tamén a maxia da correspondencia escrita por vía postal, que cada vez se vai perdendo nun mundo dominado pola comunicación dixital”, explicou o alcalde Alejandro Lorenzo durante o acto ao que asistiron, ademais dos escolares e os seus mestres, Borja Otero, director da Oficina de Correos do Porriño; Marta Verde, presidenta da Comisión de Filatelia Aberta da Federación Española de Sociedades Filatélicas (FESOFI); María Elisa Abad, vicesecretaria da Federación Española de Sociedades Filatélicas e Isabel Couselo, directora territorial da Consellería de Cultura, Lingua e Xuventude na provincia de Pontevedra.

O alcalde convidou a tódolos presentes, dirixíndose especialmente á rapazada, a facer uso destas postais, “eu vou facelo agora enviando a primeira ao presidente do Goberno, Pedro Sánchez, pedíndolle que nos axude a cumprir un soño que leva demasiado tempo esperando: eliminar o paso a nivel do tren”.

A coordinadora do Club de Lectura da Biblioteca Municipal, Ana Abad, foi a encargada de explicarlles aos escolares a actividade programada, consistente en escribir unha mensaxe a modo de invitación para que escolares de todo o país veñan coñecer O Porrriño.  Deste xeito, repartíronse cadansúa postal, xa selada e tendo como destinatarios unha listaxe de centros escolares de tódalas provincias de España, para que a redactasen e posteriormente dirixirse todos xuntos a depositala á caixa do correo máis próximo, situada ao carón da Fonte do Cristo, clausurando así o acto e poñendo punto e seguido a esta iniciativa enmarcada dentro das liñas de animación á lectura e á escritura promovida dende a Concellería de Cultura, “coa que se quere recuperar o encanto da comunicación escrita en formato físico, unha maxia que envolve tanto a quen escribe como a quen a recibe”.

Envío con posibilidade de premio

Dende o Concello do Porriño convídase a toda a veciñanza a sumarse a esta iniciativa escribindo unha postal, co destinatario que queiran e depositándoa, na caixas de correo habilitada para elo, no propio Concello, participando así nun sorteo dunha cesta con produtos de Nadal.

Ademais, en diálogo coa comunicación dixital, convídase a que as persoas que escriban e tamén as que reciban estas postais publiquen unha fotografía da mesma en redes sociais etiquetando ao Concello do Porriño (@oporrinoconcello) e engadindo o cancelo #postalpalacios.

26/09/2025 in Cultura e festas, Patrimonio Municipal

A voz de Beret pon banda sonora ao inicio da fin de semana grande das Festas do Cristo

  • Unha actuación sorpresa, mañá ás 19.00 horas, abrirá a programación que se pechará o luns coas orquestras Panorama e París de Noia
  • O sábado, ás 13.00 horas, as xogadoras do Club Balonmán Porriño serán as encargadas de ler o pregón

O Porriño, 25 de setembro de 2025.- O Porriño prepárase para a fin de semana grande das Festas do Cristo 2025. Quedan por diante catro xornadas cheas de actividades para todos os públicos nas que a música será a protagonista. Beret será a cabeza de cartel do Louro Valley Festival, mañá venres. O cantante e compositor subirase ao escenario ás 22.45 horas para interpretar os seus temas, unha mestura de pop urbano, balada e toques de rap e reggae. O andaluz estará acompañado doutros artistas, precisamente trala súa actuación subiranse ao escenario os Heredeiros da Crus; Shameless será o encargado de abrir o festival ás 22.00 horas e Pitty, Samu Pexe e Khris Guez completan o cartel do Louro Valley, que se presentou esta mañá no Concello de xeito conxunto co Dabuten! Remember, que nace este ano pensado nun público diferente e trae para a súa estrea ao DJ e produtor máis icónico da escena dance europea dende os anos 90: Sash!, que pinchará a partir da media noite, previamente actuarán Dmirón e Traffic House e despois Groove Amigos e Michi.

 “Ámbolos dous festivais, que terán entrada de balde e se celebrarán no aparcadoiro da rúa Progreso, son un claro exemplo do compromiso do Concello para apoiar a cultura local á vez que atrae grandes nomes do panorama musical nacional e internacional, consolidándose como espazos de celebración, convivencia e proxección cultural que enche de vida o noso municipio”, explica o alcalde Alejandro Lorenzo.

Unha actuación sorpresa, ás 19.00 horas na Praza Arquitecto Antonio Palacios, dará o pistoletazo de saída mañá. Ás 20.30 horas Xoana dará un concerto no Parque do Cristo e terá lugar tamén a primeira das sete verbenas amenizada pola orquestra Tango, que fará dous pases na Praza do Concello, un ás 21.30 horas e outro á medianoite.

“Convido a todas as persoas, veciñas e visitantes, a que se sumen a esta fin de semana grande das Festas do Cristo no Porriño, unha oportunidade perfecta para desfrutar da cultura, a música e a tradición que nos unen como comunidade. Temos un programa variado e pensado para todas as idades, onde a alegría, a inclusión e a convivencia serán as protagonistas. Vén a celebralo con nós, e fai que esta edición das festas sexa inesquecible para todos”

Sábado 27

O acto central do sábado será, sen dúbida, a lectura do pregón a cargo do equipo feminino, do Club Balonmán Porriño, subcampión de Europa. Será ás 13.00 horas na Praza Arquitecto Antonio Palacios. Antes dará comezo xa a animación de rúa con batucadas, charangas e xigantes e cabezudos que estarán ata ás 14.30 horas e logo de novo pola tarde a partir das 18.30 horas.

A música de bandas será a outra protagonista da xornada. Ás 19.00 horas no Parque do Cristo tocarán a Agrupación Musical do Porriño e a Banda Unión Musical de Tenorio e ás 21.00 horas a Banda de Gaitas San Xoán de Paramos ofrecerá un concerto en Domingo Bueno. A orquestra Ritmo Joven amenizará a verbena a partir das 22.30 horas na Praza Central.

Domingo 28

Os actos relixiosos centran a xornada matinal do domingo. A misa solemne oficiarase ás 12.00 horas na igrexa de Santa María, amenizada pola Coral Polifónica da EMM do Porriño, trala cal terá lugar a procesión do Santísimo Cristo da Agonía cara a capela do Cristo, acompañada pola Banda de Guerra da Brilat, a Escuadra de Gastadores e a Banda de Gaitas Os Coribantes.

De novo haberá animación de rúa con batucadas e charangas, de 12.00 a 14.30 e de 18.00 a 20.30 horas. E para os máis pequenos da casa, ás 18.00 horas chegará ao Porriño o espectáculo de Cantajuego “Coco y Pepe”, na rúa Domingo Bueno, de xeito paralelo no Parque do Cristo, haberá tamén obradoiro infantís.

A partir do serán música, primeiro da man de Os Coribantes, ás 19.30 horas na Praza Arquitecto Antonio Palacios, e logo coas orquestras Galilea e América, a partir das 21.00 horas, na Praza Central e na rúa Domingo Bueno.

Luns 29

O luns, festividade local, oficiarase a xa tradicional a misa solemne de campaña ao mediodía no Parque do Cristo e ao rematar concerto da Banda de Música Municipal de Redondela, que volverá a actuar pola tarde, ás 19.00 horas, no mesmo lugar xunto coa Banda de Música Cultural de Arcade. Haberá tamén animación de rúa de 12.00 a 14.30 e de 18.00 a 20.30 horas. E pola noite, broche de ouro, coas orquestras París de Noia, ás 21.00 na rúa Domingo Bueno e Panorama no aparcadoiro da rúa Progreso, ás 23.45 horas.

Festas inclusivas

As Festas do Cristo destacan tamén pola súa aposta pola inclusión e accesibilidade, incorporando unha serie de accións pensadas para que todas as persoas poidan desfrutar das actividades. Durante o concerto de Beret, así como na sesión de DJs, estarán dispoñibles una intérprete de lingua de signos (LSE) e mochilas vibratorias que permiten sentir a música a través do tacto. Ademais, a lectura do pregón e o espectáculo infantil de Cantajuegos “Coco y Pepe” contarán tamén con interpretación en lingua de signos, garantindo que nenos, nenas e persoas con discapacidade auditiva poidan participar activamente nesta celebración.

 

 

25/09/2025 in Cultura e festas

O Porriño acolle unha exhibición de partida simultánea de xadrez na rúa

  • 15 taboleiros na Praza Arquitecto Palacios convidan a xogar a pequenos e maiores

O Porriño, 23 de setembro de 2025.- A Praza Arquitecto Antonio Palacios do Porriño convértese, nesta tarde de martes, nun escenario único para a práctica do xadrez coa celebración dunha exhibición de partida simultánea. Trátase dunha iniciativa do Concello, enmarcada nas Festas do Cristo, coa colaboración do Club Xadrez Mos.

A actividade, que dá comezo ás 18.00 horas, conta coa participación de xogadores do club que se enfrontan de maneira simultánea a todas as persoas, pequenos e maiores, que desexen poñer a proba as súas habilidades. En total, haberá 15 taboleiros dispoñibles para que calquera persoa que pase pola rúa poida sentarse a xogar.

Como incentivo especial, todas aquelas persoas que consigan vencer na súa partida serán agasalladas cun taboleiro de xadrez.

“Eventos como este non só dan visibilidade ao xadrez, que destaca como ferramenta educativa e social, senón que tamén fomentan valores como a concentración, a toma de decisións e o respecto polo adversario. Desde o Concello apoiamos este tipo de iniciativas que unen o deporte, a educación e a participación cidadá, e animamos a todas e todos os porriñeses a achegarse e desfrutar dunha xornada diferente e para todas as idades.”

O Concello do Porriño apoia con este evento o deporte base e fomenta actividades culturais e recreativas abertas á cidadanía. Así, convida a toda a veciñanza a achegarse, participar ou simplemente desfrutar observando un evento diferente e aberto a todos os públicos.

 

23/09/2025 in Cultura e festas, Deportes

Dúas mil persoas tomarán o domingo as rúas do Porriño para participar da CAE Interrunning

  • A proba coincide coa conmemoración do Día Mundial do Alzhéimer e con tal motivo iluminarase a casa do Concello de cor verde
  • O SummerSon Jam, a foodtruck de “Galicia Sabe Amar” e un espectáculo de marionetas completan a programación festiva da xornada dominical
  • Mañá sábado celébrase a Festa do Peregrino e do Turista e o Torneo Resmine-Atios Cup 2025

O Porriño, 19 de setembro de 2025.-  Chega ao Porriño un ano máis a CAE Interrunning. Será o vindeiro domingo, cando unhas 2.000 persoas, de todas as idades, afeccionadas e profesionais, tomen as rúas do casco urbano para participar da que será a terceira edición da Carreira de Empresas de Galicia e a XIV Interrunning, que conta nesta ocasión ademais cunha tripla acción solidaria de apoio a Asociación Española Contra o Cancro, Aceesca e Afaga. Precisamente, o domingo 21 de setembro conmemórase o Día Mundial do Alzhéimer que promoven e poñen en valor as accións levadas a cabo por asociacións como Afaga, destinada a mellorar a calidade de vida dos enfermos de Alzhéimer e outras demencias, e con tal motivo, a partir do serán, iluminarase de verde a casa consistorial.

“Esta fin de semana, O Porriño énchese de vida cunha programación cultural e deportiva pensada para todos os públicos e que serve de antesala perfecta á fin de semana grande das Festas do Cristo. Festa do Peregrino, Carreira de Empresas, Interrunning, SummerSon Jam, foodtruck Galicia Sabe Amar, espectáculo de marionetas… convidamos a toda a veciñanza e visitantes a desfrutar desta fin de semana, que comeza xa esta mesma tarde coa Festa Flamenca, continúa con concertó de Noemí e a Noite Aberta, chea de cultura, deporte, solidariedade e tradición, que nos prepara para vivir con máis forza as festas que están por chegar”, explica Alejandro Lorenzo.

A xornada do domingo arrancará ás 09.30 horas coa Andaina Antonio Palacios de 8 quilómetros, ás 11.30 horas será a saída das competicións 5K e 10K e ás 12.45 e 12.50 horas celebraranse as carreiras infantís de Pitufos e Chupetes. Trala entrega de premios terá lugar unha “after run party” aberta a todo o público, con música, regalos e moito ambiente festivo, no que tampouco faltará a boa gastronomía, cunha nova visita ao Porriño da foodtruck de “Galicia Sabe Amar”, que estará instalada e ofrecendo petiscos de peixe e marisco galegos, en horario de 09.30 a 14.00.

De xeito paralelo, celebrarase o festival de música urbana e batallas de baile SummerSon Jam, no Parque Infantil, que comezará ás 10.00 horas, cun workshop de hip hop impartido pola francesa Lindsay Badnes. De 12.00 a 14.00 horas será a competición de beginners e a partir das 16.00 horas será a quenda da categoría advanced. A música da xornada virá da man de DJ Walid e o broche de ouro dunha xornada épica de baile urbano porao Law, cun concerto ás 20.30 horas.

Por outra banda, enmarcado tamén nas Festas do Cristo, a compañía Pelele presentará o seu espectáculo de marionetas “A morte de don Cristóbal”. Será o domingo ás 19.30 horas na Praza Arquitecto Antonio Palacios.

Antes de todo isto, O Porriño acolle mañá sábado, a partir das 16.00 horas, a Festa do Peregrino e do Turista. Haberá un photocall situado a pé de rúa no que os visitantes poderán selar a súa credencial de peregrino; organízanse dúas visitas guiadas, unha “Camiñando polo Porriño”, de 16.00 a 17.00 horas, a través da cal se percorrerán espazos emblemáticos da vila, achegando historia, arquitectura e urbanismo local, e outra “O Porriño con ollos de peregrino”, de 17.00 a 19.00 horas, combinada cun obradoiro de pintado de cunchas. A xornada estará amenizada con música a cargo de artistas locais e como peche, ás 19.00 horas, concerto do grupo de pandereteiras Alxibeiras de Ponteareas.

Tamén mañá o campo municipal do Carballo acollerá a última xornada do Torneo Resmine-Atios Cup 2025. Logo de disputarse as categorías alevín e prebenxamíns é a quenda agora dos benxamíns, coa que se pon fin a esta competición.

 

 

19/09/2025 in Cultura e festas

O Porriño prepárase para a gran batalla de baile coa SummerSon Jam

  • O Parque Infantil acollerá este festival o vindeiro domingo, 21 de setembro, a partir das 10.00 horas, con competición de diferentes estilos e niveis, workshop e un concerto de Law
  • Estréase unha nova categoría de hip hop e repartiranse máis de 2.600 euros en premios

O Porriño, 18 de setembro de 2025.- Volve a SummerSon Jam ao Porriño con máis enerxía ca nunca, unha nova categoría e máis premios. A recentemente renovada zona de lecer do Parque Infantil do Porriño converterase por un día nun escenario de baile urbano coa celebración da SummerSon Jam 2025. Será o vindeiro domingo, 21 de setembro, ao longo de toda a xornada, cando se leven a cabo batallas de bailes de diferentes estilos e niveis con participación en parellas nas categorías de beginners, para quen comeza e quere deixar xa pegada, e de advanced, de alto nivel. As inscricións continuarán abertas ata o propio día do evento, a través do correo electrónico info@maisonmusicaedanza.es ou do número de teléfono 600 304 056. A día de hoxe xa son numerosas as persoas inscritas, chegadas de toda Galicia e incluso do Perú. Pero ademais nesta edición, como novidade, engádese unha nova categoría, a de advanced hip hop, un auténtico cara a cara definitivo.

“A SummerSon Jam volve as súas orixes, ao Parque Infantil, agora totalmente renovado, cunha zona de  baile que estará lista para as batallas, céspede, espazos de sombra e área de picnic e descanso. Un evento cun programa cheo de música e moito espectáculo para o público asistente”, explicaba o alcalde Alejandro Lorenzo durante o acto presentación do festival, organizado por Maison Música e Danza en colaboración co Concello do Porriño e enmarcado, un ano máis, na programación das Festas do Cristo. Con todo, no caso de choiva o evento trasladarase ao polideportivo municipal.

A competición de beginners será en horario de mañá, comezando ás 12.00 e ata ás 14.00 horas, e pola tarde, a partir das 16.00 horas será a quenda do alto nivel. Entre as diferentes categorías repartiranse máis de 2.600 euros en premios. A música da xornada virá da man de DJ Walid, residente da crew Street Life e dj de múltiples artistas, cunha carreira sólida en batallas de freestyle, e o broche de ouro do festival porao, ás 20.30 horas, un concerto de Law.

A maiores das competicións, a xornada abrirase, ás 10.00 horas, cun workshop de hip hop impartido pola francesa Lindsay Badness, bailarina con 16 anos de traxectoria no underground, experiencia en batallas lexendarias como Just Standing e Summer Dance Forever e formación internacional e visión única do baile urbano. A Lindsay Badness acompañarana no xurado Rick Indigo, Sara Herrera e un cuarto membro, exclusivo para a categoría beginners, BBoy Vlady, chegado dende Rusia.

 

 

 

18/09/2025 in Cultura e festas

O Porriño difunde unha historia de compromiso real coa sociedade

  • O libro “Ramón González e Corona González Santos: Un matrimonio de filántropos”, de Celia Castro, presentouse hoxe no Concello porriñés como un vínculo profundo entre dúas vilas irmáns: O Porriño e Ribadeo
  • A obra homenaxea a estas dúas figuras xenerosas con ambos pobos, que contribuíron ao seu desenvolvemento, deixando neles un gran legado

O Porriño, 17 de setembro de 2025.- “Ramón González e Corona González Santos: un matrimonio de filántropos”, é o título da obra que afonda na vida e legado de dúas figuras clave na historia recente do Porriño e de Ribadeo e que foi presentado hoxe na casa consistorial porriñesa. Durante o acto, o alcalde Alejandro Lorenzo destacou que “non só presentamos un libro, senón que reivindicamos unha historia compartida, un vínculo profundo entre dúas vilas que xa son irmás. Ramón e Corona nunca buscaron protagonismo, pero hoxe, con este libro, devolvémoslles a visibilidade que merecen”. Pola súa banda, o seu homólogo ribadense, Daniel Vega subliñou a importancia de seguir fortalecendo os lazos institucionais e culturais que unen ambos concellos, promovendo actuacións para homenaxear a figuras como don Ramón e dona Corona que foron clave para o desenvolvemento das nosas vilas, destacando  o seu labor altruísta.

A obra, escrita por Celia Castro, recupera a memoria de Ramón González e da súa esposa, Corona González Santos, un matrimonio que destacou polo seu compromiso social e a súa xenerosidade tanto co pobo do Porriño como co de Ribadeo. A autora, que contou como se coñeceron, “na estación de tren do Porriño dun xeito fortuíto, foi un frechazo e casaron os poucos meses”, agradeceu a acollida e puxo en valor a importancia de conservar e transmitir exemplos de filantropía coma o de don Ramón e dona Corona. A escritora, que coñeceu persoalmente a dona Corona, lembrou que “ambos axudaron na época de fame, aos damnificados da gripe do 18, ás viúvas de náufragos… todo isto a maiores dos feitos materiais, de financiación para a construción de edificios, como este no que nos atopamos, deseñado polo seu amigo Antonio Palacios”.

Alejandro Lorenzo incidiu na gran pegada que deixou Ramón González e tamén a súa dona Corona, unha muller xenerosa e discreta. “A súa historia non é só memoria, é tamén exemplo, exemplo de filantropía verdadeira, de compromiso social, de amor ás raíces, de traballo polo ben común. O seu legado segue presente nas numerosas familias que axudaron, nas institucións que impulsaron e nas obras que hoxe forman parte do noso patrimonio”.

O evento contou tamén coa presenza de representantes da familia Fontán Domínguez, descendentes do matrimonio homenaxeado, así como doutras autoridades locais e veciñanza, que quixeron participar desta emotiva xornada de memoria e cultura.

Este libro é unha ponte entre o pasado e o presente. Por iso, dende o Concello, “celebramos con orgullo esta publicación e reafirmamos o noso desexo de seguir fortalecendo os lazos con Ribadeo, enaltecendo a figura deste matrimonio de filántropos, nun irmandamento que non é só simbólico, senón cheo de contido e de afectos reais”, concluía Lorenzo.

 

 

17/09/2025 in Cultura e festas, Sen categoría