Cultura e festas

As Festas de San Bieito 2025 chegan con novidades e unha ampla programación para todos os públicos

O Porriño, 4 de xullo de 2025.- O Concello do Porriño presentou esta mañá, ao carón da Capela de San Bieito, a programación das Festas de San Bieito 2025, que se celebrarán os días 10 e 11 de xullo, cun cartel que combina novidades, tradición, música e actividades para todas as idades.

O acto contou coa presenza do alcalde, Alejandro Lorenzo; o concelleiro de Cultura, Festas e Novas Tecnoloxías, Bienvenido Estévez; a Asociación de Veciños de San Benito e San Sebastián e representantes do Mano de Santo DJ Festival, que se consolidan nestas festas.

Durante a presentación, resaltouse o espírito participativo das festas, que volven ser un punto de encontro da veciñanza porriñesa e unha cita obrigatoria do verán. Alejandro Lorenzo animou a todos os asistentes “a desfrutar dunhas festas no barrio de San Bieito que combinan o mellor da nosa tradición co espírito alegre e familiar que caracteriza ao Porriño”.

Programación:

Xoves, 10 de xullo:

  • A partir das 21:30 h:
    • Orquestra Gran Parada
    • Mano de Santo DJ Festival

Venres, 11 de xullo:

  • Ás 9:00 h: Misa na Capela de San Bieito
  • A partir das 12:00 h:
    • Misa solemne na Igrexa de Santa María, coa Coral de Música da E.M.M
    • Procesión, acompañada pola Banda de Música da E.M.M 
    • Ao rematar a procesión, terá lugar a tradicional puxa benéfica do racimo de uvas do Santo, que este ano destinará o recaudado a AECC do Porriño. O Concello renderalle unha homenaxe a veciños de San Benito e San Sebastián.
  • A partir das 12:00 h: Concerto da Banda de Música da Escola Municipal de Música 
  • Ás 19:30 h: Actuación de Os Zoqueiros 
  • Ás 20:00 h: Misa vespertina na Igrexa de Santa María
  • A partir das 21:30 h:
    • Orquestra Los Player’s
    • Concerto de Roi Casal

Ademais, dende o día 2 de xullo hai novenas ás 9:00 h na Capela de San Bieito e ás 20:00 h na Igrexa de Santa María.

O Concello do Porriño convida a toda a cidadanía a participar activamente nestas festas, agradecendo a colaboración da Asociación de Veciños de San Benito e San Sebastián e de todas as entidades que fan posible esta celebración ano tras ano.

04/07/2025 in Cultura e festas

O Porriño énchese de ritmo este verán con clases gratuítas de zumba ao aire libre

 

O Porriño, 2 de xullo de 2025.- O Concello do Porriño pon en marcha un novo programa de actividades para animar as noites de verán e fomentar o exercicio ao aire libre. Trátase das clases gratuítas de zumba, que se celebrarán durante os meses de xullo e agosto na Praza Arquitecto Antonio Palacios.

As sesións terán lugar todos os martes e xoves, de 21:00 a 22:00 horas, e estarán abertas a persoas de todas as idades, sen necesidade de inscrición previa.

O obxectivo é ofrecer unha actividade saudable, divertida e accesible para toda a veciñanza, ao tempo que se dinamiza o espazo público e se promove un estilo de vida activo.

“Queremos que a xente se mova, se divirta e aproveite as noites de verán nun ambiente san e participativo”, sinala o Alcalde, Alejandro Lorenzo, que se animou a participar na primeira clase. “A zumba é unha proposta que combina música, exercicio e convivencia, perfecta para o noso Porriño”, engade.

A iniciativa forma parte do programa de actividades de verán que o Concello está a desenvolver para fomentar a cultura, o deporte e a participación cidadá durante os meses estivais.

02/07/2025 in Cultura e festas, Deportes

O Concello do Porriño amplía o prazo para solicitar postos de venda ambulante na festa de Porrigalia 2025

 

  • O prazo de solicitude está aberto desde hoxe, 1 de xullo, e rematará o 7 de xullo de 2025 ás 14:00 horas

Porriño, 1 de xullo de 2025.– O Concello do Porriño informa de que se amplía o prazo de presentación de solicitudes para a instalación de postos de venda ambulante durante a celebración da festa de Porrigalia 2025. As persoas interesadas poderán presentar a súa solicitude desde hoxe ata o 7 de xullo de 2025 ás 14:00 horas.

As solicitudes deberán presentarse a través do rexistro xeral do Concello, da sede electrónica(https://oporrino.sedelectronica.gal) ou polas vías previstas na Lei 39/2015 de procedemento administrativo común. No caso de empregar un rexistro distinto ao municipal, será obrigatorio remitir unha copia ao correo electrónico rexistro@oporrino.org antes do fin do prazo, para garantir a súa inclusión.

As persoas solicitantes deberán cubrir correctamente:

  • A solicitude oficial
  • A Declaración Responsable (Anexo I)
    e achegar a documentación requirida segundo o tipo de posto solicitado (alimentación, atraccións, etc.).

Documentación obrigatoria xeral:

  • Fotocopia do DNI/NIF ou documento análogo
  • No caso de actuar mediante representante: documentación do representante e acreditación do poder
  • CIF no caso de empresas ou asociacións

Ademais:

  • Os postos de atraccións deberán achegar documentación técnica, seguros e informes segundo o RD 226/2022.
  • Os postos de alimentación deberán achegar o carné de manipulador de alimentos.

Lémbrase que:

  • Só se admitirá unha solicitude por persoa.
  • A persoa titular da autorización será responsable de calquera dano ou anomalía na zona asignada.
  • Será obrigatorio exhibir no posto: a autorización, follas de reclamación e listaxe de produtos con prezos.

Enlace ás bases para a instalación de postos: 

https://oporrino.org/wp-content/uploads/2025/06/20250607_Publicacion_BASES-REGULADORAS-QUE-REGIRAN-LA-CONVOCATORIA-PARA-LA-AUTORIZACION-DE-INSTALACIONES-DE-PUESTOS-DE-VENTA-AMBULANTE-EN-LA-FIESTA-DE-PORRIGALIA-PARA-EL-ANO-2025-GALLEGO.pdf

Para máis información, as persoas interesadas poden consultar a sede electrónica do Concello do Porriño. 

01/07/2025 in Cultura e festas, Urbanismo, comercio e industria

O Porriño celebrou o Día do Porriño Orgulloso 2025 por todo o alto e con ampla programación no Paseo do Louro

 

  • Gala Drag Queen ás 20:00 horas e concerto de Baiuca ás 23:00, grandes momentos da festa

O Porriño, 29 de xuño de 2025. – Hoxe o Concello do Porriño converteuse nun espazo de celebración, diversidade e inclusión coa celebración do Día do Porriño Orgulloso 2025, que se desenvolveu no Paseo do Louro coincidindo co Día Internacional do Orgullo LGTBI+.

A xornada comezou ás 16:00 horas e prolongouse ata as 2:00 da madrugada, cun programa pensado para todos os públicos. De 16:30 a 19:30, as nenas e nenos desfrutaron de inchables de auga e de salto para pasalo en grande. Ademais, o Mago Marco ofreceu espectáculos e maxia a partir das 18:00 horas, sorprendendo aos máis pequenos e a toda a familia ao longo do día. Entre as 18:00 e as 20:00 horas, houbo obradoiros de tatuaxes temporais e pintacaras para todas as idades, unha proposta creativa para animar a tarde.

A música en directo protagonizou o escenario principal, onde actuaron Acoustic Mode (17:00), Iker Faure’s Band (19:00) e Orballo Cultural (21:00). Ás 23:00 horas tivo lugar o gran concerto de Baiuca, unha das estrelas galegas con maior proxección internacional, que ofreceu un espectáculo audiovisual único e impactante.

Un dos momentos máis agardados foi a Gala Drag Queen do Porriño Orgulloso, que comezou ás 20:00 horas, conducida por Marlen Soto e Khrystal De Luxe, coa actuación estelar de Marisa Prisa, unha das figuras máis recoñecidas do panorama drag estatal.

A celebración estivo acompañada de foodtrucks, postos de segunda man, a presenza de protectoras de animais e actividades familiares, facendo do evento un espazo de encontro e visibilidade para toda a veciñanza e visitantes.

“O Porriño é un concello que se caracteriza pola súa apertura e diversidade, comprometido firmemente coa igualdade real e efectiva. Facemos un chamamento a toda a veciñanza para que se una e participe activamente nesta celebración tan significativa”, declarou o alcalde, Alejandro Lorenzo.

30/06/2025 in Cultura e festas

O Porriño e Ribadeo formalizan o seu irmandamento a través da figura do filántropo Ramón González

 

O Porriño, 25 de xuño de 2025.– O Concello do Porriño acolleu esta mañá un emotivo acto institucional no que se formalizou o irmandamento entre os concellos do Porriño e Ribadeo, unidos pola figura de Ramón González (1856–1925), filántropo galego cuxo legado marcou profundamente a vida social, cultural e patrimonial de ambas vilas.

O acto comezou coa recepción das autoridades na Casa Consistorial do Porriño, que sorprenderon na súa chegada caracterizados de indianos, e coa interpretación do Himno Galego. A continuación, tiveron lugar as intervencións institucionais, nas que participaron Alejandro Lorenzo, alcalde do Porriño; Daniel Vega, alcalde de Ribadeo; Vanessa Ucha, concelleira de Turismo do Concello do Porriño; e Begoña Sanjurjo, concelleira de Cultura do Concello de Ribadeo. Tamén interviron descendentes de Ramón González, que emocionaron aos asistentes lembrando a traxectoria humana e solidaria do seu devanceiro. 

Un legado entre dúas vilas

Ramón González naceu en Ribadeo e emigrou moi novo á Arxentina, onde fixo fortuna como comerciante en Rosario de Santa Fe. Membro activo de entidades culturais e financeiras, regresou a Galicia a comezos do século XX e estableceuse no Porriño, vila natal da súa esposa, Corona González Santos. Desde alí desenvolveu unha intensa actividade filantrópica que se materializou na financiación da igrexa parroquial do Porriño, inaugurada en 1913, na construción da Casa Consistorial deseñada polo arquitecto Antonio Palacios, e tamén en doazóns destinadas ao campo de fútbol, escolas e entidades culturais. A súa xenerosidade estendeuse igualmente á súa vila natal, Ribadeo, onde contribuíu á creación de infraestruturas educativas, culturais e sociais, como o teatro, a praza de abastos e o apoio ao Ateneo local.

Un irmandamento con visión de futuro 

Durante as intervencións do acto de Irmandamento destacouse o valor do legado indiano e o potencial turístico e patrimonial que representa para ambas vilas. O Alcalde do Porriño subliñou que este irmandamento simboliza algo máis ca unha relación institucional: representa un vínculo entre dúas comunidades que comparten historia, valores e unha visión común de futuro. 

Alejandro Lorenzo declarou: “Un día especial, hoxe abrimos unha porta simbólica entre dúas vilas. Hoxe celebramos o irmandamento entre O Porriño e Ribadeo e facémolo da man dun home que soubo tender pontes antes ca ninguén, Ramón González Fernández”. O rexedor engadiu que “cando fixo falta construir o Concello, puxos mans á obra literalmentee pagou todo cos seus aforros”. Lorenzo quixo compartir unha anécdota coas persoas presentes: “Cando chegou o busto de Ramón González ao Porriño, que debía render homenaxe ao noso benfeitor, quedou tirado na estación, sen que ninguén o recollera. Dous bandos rifaban por dicir que eran os que máis o querían e, mentres tanto, o busto seguía alí, abandonado, a piques de ser subastado en Vigo… Un esperpento, como dicía Valle-Inclán.”

Pola súa banda, o alcalde de Ribadeo, Daniel Vega, destacou a importancia de poñer en valor figuras como a de Ramón González, exemplo de entrega desinteresada ao progreso das súas comunidades: “Gustaríame destacar a entrega, a filantropía e o bo facer de Ramón González, que tanto beneficiaron aos pobos do Porriño e de Ribadeo. Foi un home adiantado ao seu tempo e comprometido coa mellora da sociedade. Reivindicar a súa figura era unha débeda pendente, e foi precisamente esa filantropía, ese xeito de entender o ben común por riba dos intereses persoais, o que nos levou a pensar na homenaxe”. 

Unha xornada de celebración

O acto completouse coa proxección dun vídeo conmemorativo polo décimo aniversario do festival Ribadeo Indiano, unha actuación musical e unha degustación de callos para os asistentes como colofón dunha xornada marcada pola historia, a emoción e a convivencia.

Este irmandamento entre O Porriño e Ribadeo representa un compromiso firme por reforzar a colaboración cultural, turística e institucional entre ambas vilas, sustentado na memoria compartida e no exemplo das persoas que entenderon que traballar polo ben común é o maior legado que se pode deixar ás futuras xeracións.

25/06/2025 in Cultura e festas, Patrimonio Municipal, Turismo

O Porriño presenta o Día do Porriño Orgulloso 2025 e anuncia novas actuacións en materia de saneamento nas parroquias

 

O Porriño, 24 de xuño de 2025.- O Alcalde do Porriño, Alejandro Lorenzo, mantivo esta mañá un encontro cos medios de comunicación no que presentou a nova edición do Día do Porriño Orgulloso e anunciou novas actuacións en materia de saneamento nas parroquias, cun investimento continuado e comprometido coa mellora da calidade de vida da veciñanza.

Unha vila orgullosa, diversa e comprometida

O Día do Porriño Orgulloso 2025 celebrarase o sábado 28 de xuño no Paseo do Louro, coincidindo co Día Internacional do Orgullo LGTBI+. A xornada contará cunha programación continua desde as 16:00 horas ata as 2:00 da madrugada, pensada para todos os públicos.

As actividades infantís desenvolveranse de 16:30 a 20:30 horas, con inchables de auga e de salto para os máis pequenos. Entre as 18:00 e as 20:00, haberá obradoiros de tatuaxes temporais e pintacaras. Ademais, a tarde contará coa participación especial do Mago Marco, que sorprenderá ao longo da xornada.

Durante toda a tarde e noite, o escenario do Paseo do Louro vibrará coa música en directo de varios artistas, entre os que destacan Acoustic (16:00), Law (17:00), Iker Faure’s Band (18:00), Sheila Patricia (19:00), As Drags (20:00) e Orballo Cultural (21:00). Ás 23:00 terá lugar o gran concerto de Baiuca, un dos artistas galegos con maior proxección internacional, que ofrecerá un espectáculo audiovisual impactante.

Un dos momentos máis especiais da xornada será a Gala Drag Queen do Porriño Orgulloso, conducida por Marlen Soto e Khrystal De Luxe, coa actuación estelar de Marisa Prisa, unha das figuras máis queridas do panorama drag estatal.

A festa estará acompañada de foodtrucks, postos de segunda man, presenza de protectoras de animais e actividades pensadas para toda a familia, convertendo esta cita nun espazo de encontro, inclusión e celebración para toda a veciñanza e visitantes.

“O Porriño é unha vila orgullosa, aberta, diversa e comprometida coa igualdade real e efectiva. Animamos a toda a veciñanza a sumarse e participar nesta xornada tan especial”, sinalou o Alcalde, Alejandro Lorenzo.

Saneamento: prioridade para as parroquias

O alcalde anunciou tamén a execución de novas actuacións de saneamento en diversas parroquias, sinalando que a prioridade absoluta do Concello son os núcleos rurais.

As intervencións previstas inclúen melloras en saneamento en Budiño, Eiriz, Seixo, Cerquido e Arrotea. Así mesmo, destacou que hai actuacións pendentes de autorización por parte da Confederación Hidrográfica, como as de Benunes en Budiño e a de Carbón en Atios, así como proxectos para iniciarse en Torneiros, Mosende e Chenlo.

Lorenzo fixo fincapé en que se trata dun compromiso firme coa mellora dos servizos básicos e lembrou que, desde 2022, o Concello do Porriño leva investidos máis de 4,2 millóns de euros en obras de saneamento, gracias á colaboración entre distintas administracións, como a Xunta de Galicia, a Deputación de Pontevedra e o propio Consorcio do Louro, que achegaría arredor de 850.000 euros en novas actuacións de abastecemento e saneamento en Torneiros e Budiño. 

“Non se trata só de canalizacións e infraestruturas. Falamos de garantir dignidade, salubridade e igualdade para todos os veciños, vivan onde vivan”, concluíu o rexedor.

24/06/2025 in Cultura e festas, Vías e obras

O Porriño amence cuberto de flores para celebrar o Corpus Christi

O Porriño, 22 de xuño de 2025.- Tras unha noite de intenso traballo e emoción colectiva, O Porriño espertou esta mañá cunha das súas tradicións máis fermosas vestindo as rúas: as alfombras florais do Corpus Christi, auténticas obras de arte efémeras que xa agardan o paso da procesión deste mediodía.

Desde primeiras horas da tarde de onte, centos de veciños e veciñas de tódalas idades —avós, pais, fillos e netos— traballaron man a man para crear máis de de 900 metros cadrados de tapices florais, ao longo dos 290 metros que unen a igrexa de Santa María coa praza do Arquitecto Antonio Palacios. O resultado é un espectáculo visual que mestura tradición, identidade e beleza.

O esforzo de colectivos como as Amas de Casa Rosais e de numerosos voluntarios doutras parroquias fixo posible este tapiz comunitario feito con pétalos, follas, area, virutas e moito agarimo. Este ano, ademais, a temática rende homenaxe á tradición alfombrista do Porriño, que se remonta a 1930.

Actos principais do Corpus: procesión e misa solemne

Hoxe domingo celébrase o día grande do Corpus Christi, cun dos momentos máis agardados:

  • 12:00 h | Misa solemne na igrexa parroquial de Santa María
  • A continuación, procesión do Santísimo Sacramento polo percorrido alfombrado

Será un momento de gran simbolismo e emoción, coa participación de nenos e nenas da primeira comuñón, autoridades, confrarías e centos de persoas que acompañarán ao Santísimo polo tapiz elaborado con tanto esforzo pola veciñanza.

“Hoxe O Porriño amence orgulloso da súa tradición, do traballo colectivo e da beleza que emana das súas rúas. O Corpus é unha festa que nos une e nos representa. Sen a Asociación Amas de Casa Rosais, os nenos e nenas, os voluntarios e os veciños e veciñas que colaboraron, non sería posible facer todo isto”, declarou o Alcalde Alejandro Lorenzo, que tamén participou na elaboración das alfombras. “Convidamos a toda a cidadanía a achegarse e vivir este día tan especial. As alfombras son arte viva feita por e para o pobo”, engadiu o rexedor.

23/06/2025 in Cultura e festas, Turismo

O Porriño prepara as alfombras florais para celebrar o Corpus Christi e organiza unha festa de benvida ao verán

O Porriño, 21 de xuño de 2025.- As rúas do Porriño énchense hoxe de cor, traballo comunitario e tradición coa elaboración das alfombras florais que preceden á celebración do Corpus Christi, unha das festas máis emblemáticas e participativas do noso municipio.

Desde primeiras horas da tarde, a partir das 17:00 h, comeza o pintado e posterior colocación dos tapices florais que cobren os 290 metros de rúa que unen a igrexa de Santa María coa praza do Arquitecto Antonio Palacios, sumando máis de 900 metros cadrados de arte efémera.

O motivo deste ano é a recuperación das nosas tradicións de tapices florais que datan do ano 1930 e que ademais homenaxeamos nos carteis promocionais.

As Amas de Casa Rosais, acompañadas por voluntarios e voluntarias doutras parroquias, levan semanas traballando na preparación dos materiais para dar vida a este tapiz colectivo.

Usaranse pétalos, follas, virutas de madeira, area e outros elementos naturais que converterán as rúas porriñesas nun auténtico espectáculo de cor e simbolismo.

“As alfombras do Corpus son moito máis ca unha tradición: son unha expresión da identidade do noso pobo, da súa historia e da súa capacidade para traballar xuntos por algo fermoso. É un orgullo ver como xeracións enteiras participan e manteñen viva esta arte. O Corpus no Porriño non se entende sen as súas alfombras”, destacou o Alcalde Alejandro Lorenzo.

Pola súa banda, a Concelleira de Turismo, Vanessa, subliñou o valor da participación veciñal: “Animamos a todas e todos, pequenos e maiores, a achegarse esta tarde e colaborar na elaboración das alfombras. É unha tradición viva e aberta, que nos une como comunidade”.

Festa de benvida ao verán

A partir das 18:30h, no Parque do Cristo, o Concello do Porriño da a benvida ao verán con música a cargo de DJ Ferro, DJ Samu C, DJ Varito_Guerreiro e DJ Meu. A festa contará coa actuación en directo dos grupos Wilson´s Band e King Kids. A entrada é de balde nun espazo ao aire libre pensado para gozar da cultura e do ambiente. 

Os actos principais do Corpus Christi celebraranse mañá domingo, 22 de xuño, cunha misa solemne e procesión ás 12:00 horas desde a igrexa parroquial de Santa María, percorrendo o camiño decorado co esforzo e a ilusión de todo un pobo.

21/06/2025 in Cultura e festas, Turismo

O Porriño énchese de cor para celebrar o Corpus Christi coas súas tradicionais alfombras florais

 

  • Veciñanza e voluntariado preparan unha fin de semana de arte efémera, participación cidadá e orgullo colectivo

O Porriño, 18 de xuño de 2025.- O Porriño prepárase xa para celebrar esta fin de semana unha das súas tradicións máis emblemáticas e emotivas: as alfombras florais do Corpus Christi, unha expresión de arte popular que enche as rúas do centro de cor, devoción e traballo comunitario.

Esta tradición, que se remonta á década de 1930 da man das floristas do municipio, continúa viva grazas ao esforzo e á ilusión de numerosas persoas voluntarias. A celebración terá lugar este domingo 22 de xuño, e o proceso de elaboración das alfombras comezará xa o sábado pola tarde, coa participación aberta a toda a cidadanía.

Na presentación oficial da lona e dos carteis da campaña, celebrada onte, o Alcalde Alejandro Lorenzo destacou a importancia cultural e emocional desta celebración:

“O Corpus no Porriño non se entende sen as súas alfombras. É unha tradición que fala de nós, da nosa xente, de como un pobo se une para crear arte efémera na rúa. Gracias a todos os voluntarios, ás Amas de Casa Rosais, aos debuxantes e a todas as persoas que cada ano fan posible esta marabilla.”

A Concelleira de Turismo, Vanessa Ucha, puxo en valor o carácter participativo do evento:

“As alfombras do Corpus son unha tradición preciosa que queremos seguir mantendo entre todas e todos. A elaboración e pintado das alfombras comezará o sábado pola tarde, e estamos encantados de convidar a todas as persoas que queiran colaborar a que se acheguen e nos axuden a seguir facendo historia.”

Desde o Concello do Porriño anímase a veciñas, veciños e visitantes a gozar e participar nunha festividade que cada ano transforma as rúas nun auténtico tapiz de cor, fe e tradición, reafirmando o sentimento de comunidade e pertenza.

18/06/2025 in Cultura e festas, Turismo

O Porriño rende homenaxe ao talento local na gala dos II Premios Antonio Palacios

 

  • O Festival de Cans, a Imprenta Paz e Gráficas Bolfer, o Círculo Recreativo Cultural CRC,  Claudio Giráldez e Lola Magno son os premiados desta edición 

O Porriño, 14 de xuño de 2025.- A Praza Arquitecto Antonio Palacios acolleu esta noite a gala dos II Premios Antonio Palacios, un acto cargado de emoción, identidade e recoñecemento ao talento porriñés nos ámbitos da cultura, a empresa, o compromiso social, o deporte e a memoria histórica. Centos de persoas reuníronse para celebrar o labor e a traxectoria dos premiados nunha xornada festiva que comezou pola mañá e se prolongou ata entrada a noite.

O día arrincou co II Concurso de Pintura Rápida “Pintando a Palacios”, seguido dun concerto da Agrupación Musical do Porriño. Xa pola tarde, entregouse o premio do certame pictórico e, a partir das 21:00 horas, deu comezo a gala central da xornada, conducida pola presentadora Icia Alcalde, coa interpretación do Himno Galego a cargo de Noemi Fernández e Banda de Gaitas de Paramos e a proxección dun vídeo conmemorativo.

O primeiro dos recoñecementos da noite foi o Premio á Cultura, que recaeu no Festival de Cans, unha iniciativa que transforma o Porriño nun referente do cinema galego, combinando vangarda, participación veciñal e identidade rural. Recolleu o galardón o director do festival, Alfonso Pato. O premio foi entregado por Bienvenido Estévez, Concelleiro de Cultura do Concello do Porriño.

A continuación, entregouse o Premio á Empresa, que foi para Imprenta Paz e Gráficas Bolfer, dúas empresas familiares cunha longa traxectoria vencellada ao desenvolvemento do tecido económico local. Foron recoñecidas polo seu compromiso coa calidade, a innovación tecnolóxica e o servizo á comunidade. A entrega deste premio correu a cargo de Carlos Martínez, Tenente-Alcalde e Concelleiro de Industria do Concello do Porriño.

O Premio ao Compromiso Social recaeu no Círculo Recreativo Cultural CRC, unha entidade histórica no municipio que ten servido como espazo de encontro e dinamización durante décadas. Recolleu o premio o seu presidente, Abel Gallego, e fixo a entrega Nava Castro, Deputada de Turismo.

No ámbito deportivo, o Premio ao Deporte foi concedido a Claudio Giráldez González, actual adestrador do Real Club Celta de Vigo e referente na formación de base e nos valores do deporte. O galardón foi recollido polo seu sobriño xa que o premiado non puido asistir e enviou un vídeo de agradecemento. A encargada de facer a entrega foi Ana Ortiz, Delegada Territorial da Xunta de Galicia en Vigo.

O momento máis emotivo da noite chegou coa entrega do Premio de Honra, concedido a título póstumo a Lola Magno, coñecida como “Lola a fotógrafa”, pioneira da fotografía no Porriño e autora dun arquivo visual irrepetible sobre a vida e evolución da vila. O premio foi recollido pola súa filla, Cristina Blázquez, e entregado polo Alcalde do Porriño, Alejandro Lorenzo.

No peche da gala, o alcalde agradeceu a presenza de todos os asistentes e “o exemplo de cada persoa e entidade premiada, que coa súa traxectoria dignifican o nome do Porriño e representan o mellor da nosa identidade”. Na súa intervención, destacou tamén que:

“Hoxe reafirmamos algo que os porriñeses sentimos cada día: que aquí hai talento, hai memoria e hai futuro. Estes premios non son só unha homenaxe a Antonio Palacios, senón tamén unha mirada cara a todo o que somos capaces de construír como comunidade.”

A música da Banda de Gaitas de Paramos puxo o broche final a unha noite que quedará na memoria colectiva do municipio, unindo recoñecemento e celebración arredor da figura do arquitecto Antonio Palacios, símbolo do orgullo porriñés.

14/06/2025 in Cultura e festas