Benestar

O paro volveu baixar en xuño e en dous anos O Porriño pasou de 2.139 desempregados a 1.705

O número de parados descendeu o o mes de xuño no Porriño en 72 persoas, segundo informou este martes o  Ministerio de Emprego e Seguridade Social. Dacordo cos mesmos, na vila hai 1.705 desempregados anotados nas listas da oficina do Servizo Galego de Emprego.

Trátase do mellor dato de emprego dende 2009 e sitúa o paro no Porriño no 18,7% de paro  amosando unha baixada que fai que o número de veciñas e veciños sen traballo se achegue aos 1.700, o cal non pasaba dende finais de 2008.

En relación co mes de xuño de 2016 o desemprego descendeu no Porriño en 314 persoas, pasando de 2.019 a 1.705 e, porcentualmente, do 23,4 ao 18,7%, preto de 4 puntos nun ano.

Dacordo coas cifras oficiais sobre a evolución do paro, dende que actual Goberno local tomara posesión, o desemprego no  Porriño reduciuse de 2.139 persoas en xuño de 2015 a 1.705 este mes de xuño, o que supón a creación de 434 empregos e unha caída do paro dun 5%.

A concelleira de Emprego, Soledad Girón reitera que a creación de postos de traballo segue a ser a prioridade número un do Goberno municipal e reitera que as iniciativas promovidas dende o Concello “funcionan”.

A concelleira fai referencia aos acordos con empresas para a formación de traballadores desempregados; os  ‘Plans de Emprego’, que foron posibles logo da sinatura dun convenio coa Deputación de Pontevedra e do investimento de fondos municipais, de preto de medio millón de euros no que vai deste ano, e o feito de buscar e promover o entendemento con outras administracións.

Neste senso, este mesmo venres, día 7 de xuño,a Concellería de Emprego organiza ‘Recursos para o acceso ao emprego’, unha xornada na que se fará unha exposición dos recursos que ofrece o Concello para a busca de emprego e daqueles acordos aos que chegou coas  empresas da contorna para a execución de programas formativos.

05/07/2017 in Alcaldía, Benestar, Emprego e formación, Igualdade

Xornada ‘Recursos para o acceso ao emprego’, este venres, día 7 de xullo, organizada pola Concellería de Emprego

O Multicentro de Torneiros será a sede, o vindeiro venres, día 7 de xullo, da xornada  ‘Recursos para o acceso ao emprego’, organizada pola Concellería de Emprego e Formación, que dirixe Soledad Girón.

Durante a mesma-en horario de 9 da mañá a 2 da tarde-  farase unha exposición dos recursos que ofrece a Concellería para a busca de emprego e dos acordos de colaboración coas empresas da contorna para a execución de programas formativos. 

“O obxectivo é chegar á xente, para que cada vez sexan máis as porriñesas e os porriñeses que obteñan unha oportunidade a través da Concellería de Emprego”, indica Soledad Girón quen engade que “aproveitamos o encontro para que axentes institucionais, profesionais e especialistas no mercado laboral poidan aportar a súa visión sobre o acceso ao emprego e proporcionar ferramentas de utilidade para a toma de decisións laborais”.

Para expor todos estes puntos participarán nesta xornada poñentes de ámbito galego, como Eduardo Adán, director territorial de Nortempo en Galicia, que falará de ‘Intermediarios de Emprego, Alejandro Martínez e Teresa Ventín, conselleiros de Eures, que informarán de cómo ‘Traballar en Europa’; Pablo Búa, titular do ‘blog’ ‘Escenario Laboral’, quen sinalará qué liñas hai que seguir para ‘Mellorar a túa marca persoal na búsqueda de emprego’; Fernando Clemente, director de ‘Quick Up, quen desenrolará o tema ‘Máis información, máis emprego’; xunto a eles, a concelleira de Emprego, Benestar e Igualdade, Soledad Girón,e dous técnicos que exporán, polo miudo, o Programa de Formación Municipal.

As persoas interesadas en participar nesta xornada poden facer a inscrición na mesma entrando no portal web de Porremprego, www.porremprego.org, ou ben nas oficinas de Torneiros, no Polígono III, 36410 O Porriño.

04/07/2017 in Alcaldía, Benestar, Emprego e formación, Igualdade

Empezaron os Campamentos de Verán do Porriño

Dende este luns, día 3 de xullo, están en marcha os Campamentos de Verán organizados pola Concellería de Igualdade, que dirixe Soledad Girón, coa colaboración da Deputación de Pontevedra, que fai posible que, ano tras ano sexan unha realidade.

Os mesmos, que durarán seis semanas, ata metade de agosto, son totalmente de balde para os 40 nenas e nenos que gozarán, cada unha desas semanas, dos mesmos.

O único requisito que teñen que cumprir as rapazas e rapaces, os que están xa participando dos campamentos e os que o faràn os vindeiros día-, como sucederá nos campamentos programados para 15 días no Nadal- e que deben de estar empadroados no Porriño e ter nado entre os anos 2005 e 2011.

Soledad Girón lembra que o obxectivo destes campamentos é o de “fomentar a conciliación familiar” durante os meses de lecer, “de aí que sexa a Concellería de Igualdade quen os organice”, ademais de impulsar a interacción e a integración entre todos os asistentes aos mesmos.

A concelleira salienta que durante estas semanas, as rapazas e rapaces desenrolarán diferentes actividades que terán moito que ver co respecto á natureza, coa súa conservación e coidado, impulsando acción de reciclaxe.

Así mesmo, outro dos eixos destas semanas de convivencia será  unha “aposta afouta pola  igualdade”: a mesma estará presente en cada unha das propostas que se leven adiante estes días nos diferentes escenarios aos que irán movéndose ás rapazas e rapaces que participan nos campamentos.

04/07/2017 in Alcaldía, Benestar, Cultura e festas, Igualdade

Todo preparado para as Festas de San Benito, que se celebran os días 9, 10 e 11 deste mes de xullo

As Festas de San Benito, que se desenrolarán o vindeiro domingo, día 9 de xullo, luns, día 10 e martes, día 11, abranguen un completo programa de actuacións musicais e actos relixiosos, todo programado pola Comisión de Festas de San Benito, coa colaboración do Concello do Porriño.

O domingo, día 9, ás 8 da tarde, está previsto o Concerto folk das Asociación Cultural San Xurxo de Mosende; ás 9 e media chegará a primeira das distintas verbenas previstas, neste caso a cargo da Orquestra Salazar.

O luns, día 10, ás 8 da tarde, Concerto folk da Asociación Cultural Os Zoqueiros, do Porriño, ás 9, Concerto de Argonat Band e ás 11 da noite, Verbena coa Orquestra Saudade.

O martes, 11, empezará ás 10 e media da mañá co Pasarrúas da Banda Popular de Tui; seguirá ás 12 coa misa solemne na Igrexa de Santa María, co Coro Orfeón Porriñés, dirixido por Antonio Paz.

De seguido, Procesión ata a Capela de San Benito, co acompañamento da Banda Popular de Tui; posteriormente, será a poxa das uvas do santo e as ofrendas diante da capela.

Ás 8 da tarde, Concerto da Banda Popular de Tui; ás 9 e media, Verbena coa Orquestra Quien lo diría, e pechará as festas co Concerto de Best Boy.

04/07/2017 in Alcaldía, Benestar, Cultura e festas

Alumnos e pais do CPI da Ribeira, de Torneiros, acompañados polo concelleiro Orlando Márquez, manifestáronse en Santiago contra o peche das unidades da ESO

Centos de persoas, entre elas unha importante cantidade de alumnas e alumnos e país e nais, ademais de profesores dos concellos nos que a Consellería de Educación decidiu pechar centros educativos ou traspasar unidades dos mesmos, manifestáronse este xoves en Compostela en defensa da Educación e contra os recortes no sistemapúblico.

Entre eles estaban os representantes do CPI da Ribeira, de Torneiros, acompañados polo concelleiro Orlando Mázquez, que achegáronse a Santiago, xunto cos representantes do CPI Tomás de Lemos de Ribadavia, CPI Monte Caxado, de As Pontes, e CEIP Emilio de Navasqüés, de Outes.

Hai que lembrar que o Goberno de Galicia comunicara aos directivos do Centro Público Integrado (CPI) da Ribeira, que tomara a decisión de pechar as unidades de Ensino Secundario (ESO) e trasladar as mesmas a IES Ribeira do Louro , en contra da opinión da ANPA, quen convocara o pasado xoves, día 22 una manifestación no Porriño baixo o lema ‘Non ao peche da ESO do CPI da Ribeira’, mobilización apoiada pola alcaldesa, o Goberno local e os representantes do BNG, Pedro Pereira, EU-SON, Pedro Ocampo, e do Grupo Municipal de Non Adscritos, Sabela Landín.

29/06/2017 in Alcaldía, Benestar, Educación e tecnoloxía, Igualdade, Parques e xardíns

O Concello do Porriño súmase este mércores, 28 de xuño á celebración do Día do Orgullo LGTBI

O Concello do Porriño, súmase á celebración do Día do Orgullo LGTBI, “no seu compromiso coa igualdade de dereitos de todas e todos os cidadáns, sexa cal for a súa orientación afectiva e/ou sexual ou identidade de xénero”.

O Porriño engade o seu nome á campaña “Celebramos a diversidade” impulsada pola directiva da Federación Galega de Municipios e Provincias (Fegamp), da cal a alcaldesa, Eva García de la Torre, forma parte, e que hoxe volve a pedir “Respecto, Dignidade e Autoestima para todas as persoas”.

Ano a ano son máis os concellos galegos que contribúen coas súas políticas á non discriminación de calquera colectivo. “Nós sumámonos a este sentir común e animamos aos concellos a unirse á visibilización desta causa a través da celebración de actos de apoio ó Día do Orgullo LGTBI”.

Este 28 de xuño, as cores do arco da vella lucirán diante de moitas casas consistoriais e a alcaldesa do Porriño súmase á petición da Federación Galega de Municipios quen anima ás galegas e galegos a que participen nos actos programados nos seus concellos, nun chamado conxunto á igualdade e á diversidade.

28/06/2017 in Alcaldía, Benestar, Igualdade

A Unidade Móbil de Doazón de Sangue estará no Porriño o xoves, 29, o venres, 30 de xuño e o sábado 1 de xullo

A Unidade móbil de Doazón de Sangue estará no Porriño diante da cafetería Scala –na rúa Domingo Bueno-este xoves, día 29, o venres, 3º de xuño-os dous días de 9 e media da mañá a 2 e media da tarde e de 4 da tarde a 9 da noite- e o sábado, 1 de xullo, de 10 da mañá a 2 da tarde.

A doazón de sangue è un acto seguro, sinxelo e necesario para axudar a moitas persoas. En xeral, poden doar sangue persoas maiores de 18 anos -se cumpren 65 anos poden continuar co permiso do seu médico-, con máis de 50 quilos de peso e que non padezan nin teñan padecido enfermidades transmisibles polo sangue (hepatite B, hepatite C, sífilis, SIDA).

Os homes poden doar un máximo de 4 veces e as mulleres 3 veces ao ano; deixando pasar entre cada doazón un mínimo de 2 meses. Non se debe acudir sen almorzar e despois de xantar hai que deixar pasar 2 horas.

De cada doazón de sangue é posible obter tres compoñentes sanguíneos: Glóbulos vermellos, necesarios para intervencións cirúrxicas, transplantes de órganos, hemorraxias debidas a accidentes de tráfico. Os mesmos duran ata 42 días; Plasma: Contén proteínas para o tratamento de grandes queimados ou transplantes de fígado e consérvase ata 2 anos, e Plaquetas: para o tratamento de enfermos con cancro ou leucemia, transplantes de medula ósea. Tan só duran 7 días.

Unha doazón de sangue pode beneficiar a máis dun enfermo, xa que os tres compoñentes sanguíneos adoitan utilizarse por separado. A Axencia de Doación de Órganos e Sangue (ADOS) subliña que as épocas de maior dificultade para acadar as doazóns que precisan os enfermos coinciden co verán, polo que é necesario salientar a importancia deste acto solidario para cubrir as necesidades dos hospitais e fai un chamamento a un grupo especial de doadores universais que son moi importantes nas Urxencias: sangue do grupo cero negativo hai pouco – só 7 de cada 100 doadores – e urxencias moitas tódolos días.

Os porriñeses son solidarios

O Porriño acadou o pasado ano 2016 unha taxa de 69 doazóns por cada 1.000 habitantes e, como subliña a alcaldesa, Eva García de la Torre, “temos que manter as cifras dentro do que recomenda a Organización Mundial da Saúde: 40 a 60 doazóns por cada 1.000 habitantes”.

A alcaldesa quere facer un agradecemento especial as persoas que participan cada ano nas campañas de doazón de sangue. “Grazas a este xesto solidario, os hospitais atenden aos enfermos de cancro e leucemia e levan a cabo cada día unha media de 2.700 urxencias, 500 intervencións cirúrxicas e 3 transplantes de órganos e tecidos”.

As persoas que precisen máis información poden entrar na web ados.sergas.es, no perfil de Twitter: @doadoressangue ou no de Facebook: https://www.facebook.com/doadoressangue.

28/06/2017 in Alcaldía, Benestar, Igualdade

Manifestación, este martes, día 27 para reclamar unha solución urxente ao Centro de Saúde

A xunta de portavoces do Concello do Porriño, reunida o pasado mércores 14, acordou facer un chamamento ás veciñas e veciños, asociacións, sindicatos e diferentes colectivos do Porriño para mobilizarse este martes día 27 para reclamar á Xunta de Galicia unha solución urxente ao Centro de Saúde . O acordo contou cos votos a favor dos portavoces dos grupos municipais do PSdeG-PSOE, UDDL, BNG, EU-Son e Non Adcritos, e a oposición do representante do PP.

Os grupos convocantes esixen á Consellería de Sanidade da Xunta de Galicia a ampliación do Centro de Saúde, a reforma das instalacións e o incremento de persoal, para que tanto usuarios do centro, como os e as traballadoras do mesmo, conten cunhas condicións dignas na prestación e recepción da asistencia médica.

Respecto da UAD, que atende desde O Porriño a usuarios de 19 concellos, os citados grupos municipais reclaman á Xunta que asuma as súas competencias no que se refire á dotación de medios humanos e materiais para garantir a calidade do servizo e os dereitos de dignidade dos e das usuarias. Os 19 concellos que reciben atención da UAD do Porriño serán convocados a unha reunión para apoiar estas demandas á Consellería de Sanidade.

A manifestación celebrarase o martes 27 ás 21:00 horas e terá o seu inicio fronte ao Centro de Saúde para, dende alí, dirixirse á Praza de Antonio Palacios, onde se dará lectura a un manifesto.

26/06/2017 in Alcaldía, Benestar, Igualdade

Reformados e adaptados para persoas con diversidade funcional 6 parques infantís cun orzamento de máis de 72.000€

O Goberno local ven de rematar o arranxo de varios parques infantís da vila, que en moitos casos “non se tocaran en anos”,  e que xa están en funcionamento ou, coma o caso do parque da Praza do Cristo, poderán usarse dende esta mesma semana, logo de facer importantes melloras en todos eles.

A Concellería de Parques e Xardíns, que dirixe Orlando Márquez, renovou totalmente o Parque da Urbanización do Sol, no que se arranxaron todos os bambáns, colocouse un para persoas con diversidade funcional e colocouse o chan de caucho, facendo un investimento de 21.777€.

Tamén está acabado o do Campo da Feira, que “ven de recuperarse totalmente”, coma indica o concelleiro, logo de contar cun orzamento de 4.173€; o mesmo sucedeu co Parque Lamazares, detrás de Correos, no que se cambiaron os seus elementos investindo 4.655€.

Igualmente, están xa reformados os de San Diego, no que ademais colocouse un chan de caucho continuo, logo de facer unha inversión de 1.952€ e o de Torneiros no que, cun investimento de 9.181€, ademais dos distintos xogos, se arranxaron os bancos, as varandas, o valado de madeira e adaptouse para persoas con diversidade funcional.

Por último, a metade desta semana que ven,  as cativas e cativos poderán xogar de novo no Parque do Cristo logo dunha reforma que abrangueu a reparación dos compoñentes do mesmo- tobogán, balancín ou a torre- a substitución do chan por un novo de caucho que evita que os pequenos poidan mancarse, a colocación dun bambán para persoas con diversidade funcional  e a eliminación de calquera elemento que represente un risco para nenos. En total o orzamento para este traballo superou os 30.300€.

Orlando Márquez subliña que “logo de que se publique no Boletín Oficial do Estado a lei de Orzamentos Xerais do Estado, o Goberno local levará ao Pleno da Corporación a proposta para arranxar outros seis parques, os de Orbenlle, e A Forna, en Budiño e o do Centro Social de Atios, os dos centros sociais de Pontellas e Mosende e o de Pío XII”.

Márquez lembra que ata o dagora, o Ministerio de Facenda  non autoriza aos concellos con superávit, como é o do Porriño, a destinar partidas a gastos coma estes e confía en que tal situación quede solucionada nos Presupostos do Estado para este ano o cal posibilitaría que se rematase a mellora de todos os parques do Porriño.

26/06/2017 in Alcaldía, Benestar, Limpeza, Parques e xardíns

150 rapaces e rapazas participan, no CEIP Fernández López, no II Torneo Escolar de Xadrez do Porriño

Un total de 150 rapazas e rapaces participaron no II Torneo Escolar de Xadrez do Porriño que se disputou este ano no CEIP Fernández López entre xogadoras e xogadores de 6 a 16 anos, todos eles alumnas e alumnos de centro educativos do Porriño.

O Campionato xogouse segundo o sistema suízo, a 5 rondas, resultando gañador do mesmo, Anxo Castaño Otero, que repetiu o título conquistado o ano pasado, seguido de Lucas Represas, Nicolás Teixeira, Rocío Fernández e Raúl Rodríguez.

Por centros, o primeiro posto foi para o IES Ribeira do Louro, con 62 puntos, en segunda posición o CEIP de Atios, con 60.5, a terceira praza foi para o CEIP Antonio Palacios, con 52, seguido do CPR Hermanos Quiroga (46), CEIP Fernández López (39,5); CEIP Cruz Budiño (35), CPI da Ribeira (10,5) e IES Pino Manso (8,5).

A concelleira de Educación, Lourdes Moure, fixo entrega dos premios aos primeiros clasificados e pechou o torneo amosando a súa satisfacción porque “o mesmo chegase a 150 participantes, o que amosa a boa acollida que está a ter o xadrez”, felicitou a todas e todos os xogadores, “porque sodes vos o que facedes posible que este torneo sexa hoxe unha realidade e que mesmo O Porriño empece a ter relevancia no eido deste deporte, a nivel de Galicia”.

A concelleira non quixo confirmar qué centro será a sede do campionato do ano que ven,aínda que deu unha pista ao afirmar, entre os aplausos dos participantes que “o Antonio Palacios soa con forza”. 

21/06/2017 in Alcaldía, Benestar, Educación e tecnoloxía, Igualdade