Benestar

Ducias de persoas renden homenaxe a 9 veciños do Porriño asasinados polo exército golpista de Franco en 1936

O lugar da ‘Volta da Moura’, foi o escenario, este domingo día 6 de agosto, da homenaxe  a 9 veciños do Porriño que foron asasinados polo Exército franquista días despois do golpe de Estado de xullo de 1936.

Os voceiros do Grupo Municipal socialista no Concello do Porriño, Soledad Girón, do BNG, Pedro Pereira, e de EU-SON, Pedro Ocampo, ademaís do concelleiro Orlando Mázquez, estiveron presentes no acto ao que acudiron ducias de persoas, entre elas familiares dos represaliados, veciños, amigos e os alcaldes de Tui, Enrique Cabaleiro, e de Salceda, Marcos Besada.

Un monumento, obra do artista Marcos Escudero, lembra para sempre a Víctor Valverde Mayo, oficial primeiro do Concello do Porriño, Domingos Carpintero, Juan Grova, Marcelino Rey e Demetrio Pérez Mayo, gardas municipais, Adolfo Pérez Mayo, Juan Carpintero e Daniel Pérez Sebes, vixiantes de arbitrios, e Luciano Baladrón, porteiro, todos eles axustizados logo de ser sacados pola forza das súas casas e levados ata a ‘Volta da Moura’ en dúas quendas.

Os seus nomes están a carón da Oliveira na que cada 14 de abril, Día da República, por iniciativa da ‘Asociación Levada Libre’, de Tui, faise unha homenaxe ás persoas que asasinadas polos golpistas hai xa 81 anos.

Xunto aos nomes destes nove veciños do Porriño, noutra das caras do monumento, están esculpidos os das súas mulleres e compañeiras, Asunción, Carmiña, Emilia, Manuela, Carmen, Consolación de la Asunción e Elvira, que como se indicará na mesma pedra, “a pesar da dor infinda, preservaron con orgullo e dignidade todo o lume que portaban os seus ollos e agromara e florecera”.

07/08/2017 in Alcaldía, Benestar, Cultura e festas, Igualdade

Homenaxe, este domingo, na ‘Volta da Moura’ a 9 veciños do Porriño asasinados polo exército franquista días despois do Golpe de Estado de 1936

O lugar da ‘Volta da Moura’, servirá de escenario, este domingo día 6 de agosto, ás 7 e media da tarde, para lembrar a 9 veciños do Porriño que foron asasinados polo Exército franquista días despois do golpe de Estado de xullo de 1936.

Un monumento, obra do artista Marcos Escudero, lembrará a Víctor Valverde Mayo, oficial primeiro do Concello do Porriño, Domingos Carpintero, Juan Grova, Marcelino Rey e Demetrio Pérez Mayo, gardas municipais, Adolfo Pérez Mayo, Juan Carpintero e Daniel Pérez Sebes, vixiantes de arbitrios, e Luciano Baladrón, porteiro, todos eles axustizados logo de ser sacados pola forza das súas casas e levados ata a ‘Volta da Moura’ en dúas quendas.

Neste lugar, os seus nomes ficarán escritos na pedra, a carón da Oliveira na que cada 14 de abril, Día da República, por iniciativa da ‘Asociación Levada Libre’, de Tui, faise unha homenaxe ás persoas que asasinadas polos golpistas hai xa 81 anos.

Xunto aos nomes destes nove veciños do Porriño, noutra das caras do monumento, estarán esculpidos os das súas mulleres e compañeiras, Asunción, Carmiña, Emilia, Manuela, Carmen, Consolación de la Asunción e Elvira, que como se indicará na mesma pedra, “a pesar da dor infinda, preservaron con orgullo e dignidade todo o lume que portaban os seus ollos e agromara e florecera”.

Ao acto, aberto ao público, agárdase que acudan os alcaldes de Tui e Salceda, Enrique Cabaleiro e Marcos Besada, a voceira do Grupo Municipal Socialista do Porriño, Soledad Girón, o tamén concelleiro socialista do Porriño Orlando Márquez, e unha persoa en representación da Deputación de Pontevedra, ademais de amigos e familiares dos veciños da vila aos que se renderá homenaxe neste acto.

04/08/2017 in Alcaldía, Benestar, Educación e tecnoloxía, Igualdade

A Confederación do Miño-Sil empeza a recuperación das beiras do Louro nunha actuación que completará o Concello con varias actuacións nas vindeiras semanas

O alcalde accidental do Porriño, Manuel Carrera, xunto coa concelleira Soledad Girón e o concelleiro Orlando Márquez, acompañaron este xoves ao presidente da Confederación Hidrográfica do Miño-Sil, Francisco Marín, e a subdelegada do Goberno en Pontevedra, Ana María Ortiz, na visita que fixeron ás obras iniciadas pola Confederación, na beira do río Louro ao seu paso pola vila.

O proxecto, que ten un orzamento total de de 62.000€, abrangue varias actuacións en diferentes treitos que suman, en conxunto, máis dun quilómetro de lonxitude e que reforzarán as beiras máis afectadas pola subida das augas nas épocas de choiva.

Para as mesmas empregaranse troncos, estacas verticais, de piñeiro, e a parte superior estará recuberta de terra vexetal que facilitara a reforestación da mesma con especie propias da zona. Así mesmo, haberá unha actuación na senda, que ten partes moi danadas e que, coma lembrou o alcalde accidental, é moi empregada no so polos porriñeses, senón polos peregrinos, dado que a mesma é parte do Camiño Portugués a Santiago.

A actuación da da Confederación Hidrográfica do Miño-Sil estará completada por outras cinco que porá en marcha o Concello do Porriño nas vindeiras semanas para a mellora de camiños, e que contarán cun orzamento duns 45.000€.

03/08/2017 in Alcaldía, Benestar, Emprego e formación, Limpeza, Parques e xardíns, Turismo

Segue a desenrolarse o Plan de Igualdade do Concello coa posta en marcha do taller ‘Descúbrete, unha nova ollada de ti’

Seguindo a liña de actuación do III Plan de Igualdade de Oportunidades do Concello de Porriño, 2016 – 2019, dende a Concellería de Igualdade, que dirixe Soledad Girón, estase a traballar en distintas liñas de actuación coa posta en marcha de diferentes accións que se recollen no devandito plan, logo de facer unha diagnose da situación social e demográfica do Porriño.

Ditas accións acométense trimestralmente: no primeiro trimestre deste ano abordouse a Saúde, no segundo o Emprego e neste terceiro “abordaremos a  participación social e o  Empoderamento con un claro obxectivo: incrementar a participación da cidadanía na loita a prol da Igualdade entre mulleres e homes, adicando o derradeiro trimestre do ano á Violencia Machista”.

Os vindeiros meses de agosto e setembro, indica Soledad Girón,“realizaremos talleres de crecemento persoal e habilidades sociais”, dende a perspectiva de xénero, “para fomentar nas mulleres as estratexias necesarias para mellorar a comunicación e as relación interpersoais”.

Desde a Concellería de Igualdade saliéntase a importancia do ‘empoderamento feminino’ que facilita as ferramentas precisas para “ampliar a capacidade de configurar as nosas vidas e a súa contorna”.

O taller “Descúbrete, unha nova ollada de ti” ten coma obxectivo “ampliar a conciencia sobre a noa vida, a realización persoal e individual, o descubrimento das diferencias, compartir vivezas e éxitos e comprender que  pódense crear novos camiños individuais,  proporcionar ferramentas imprescindíbeis para afrontar doutro xeito a experiencia da vida e ‘empoderarse’ , tomando conciencia e exercendo o poder de liderar as nosas vidas”.

O taller será o 28, 29 de Agosto e 1 de Setembro, cunha duración de 8 horas, en horario de mañá, no centro Cultural do Porriño. Para máis información e formalizar a inscrición as persoas interesadas poden dirixirse ao CIM do Concello do Porriño ou chamar ao número de teléfono  teléfono 986337429. O número de prazas é limitado.

27/07/2017 in Alcaldía, Benestar, Emprego e formación, Igualdade

Os enfermos que acoden ao Centro de Saúde do Porriño teñen que aguantar temperaturas de ata 35 graos

O pasado 20 de xuño a Xerencia da Área Sanitaria de Vigo anunciaba que dotara ao Centro de Saúde do Porriño dun sistema de climatización que, sublimaba,daba  “resposta ás demandas de profesionais e usuarios, que nos meses de verán tiñan que soportar altas temperaturas, dadas as especiais características arquitectónicas deste edificio sanitario”.

Menos dun mes despois a realidade é que a devandita climatización non funciona, que nas consultas houbo que recuperar os antigos aparellos de refrixeración e que non hai ningún tipo de sistema que alivie a situación das persoas que están agardando para ser atendidas polos médicos.

Curiosamente, o propio Servizo de Saúde xa recoñecera  que eses vellos equipos, “resultaran insuficientes” cando se colocaran dado que este inmoble, completamente acristalado, está moi exposto á luz solar, absorbendo e condensando o calor.

A situación é aínda máis lamentable tendo en conta que os devanditos equipos que teñen que usarse nas consultas polo fallo do sistema de climatización, son uns aparellos portátiles que foran colocados por Sanidade en 2010, hai sete anos, mentres o centro segue sen ter, nas áreas de espera ou nos corredores nin sequera uns ventiladores que fagan máis soportable esta situación.

Este xoves, a temperatura nas salas de espera superaba nalgún intre os 35 graos e en algunha das consultas estaban preto dos 30, cando nos momentos centrais do día o termómetro marcaba na rúa 31 graos e para este venres agárdanse que se achegue aos 34 dende o mediodía.

Este calor, que está a afectar, especialmente a os cativos e anciáns,  é outra das graves deficiencias deste centro de saúde que atendeu so nos seis primeiros meses deste ano a máis de 100.000 persoas, veciñas do Porriño, de Salceda e de Mos que parecen non importar ao conselleiro de Sanidade que, maila ás promesas do Goberno de Galicia e do seu partido, segue sen querer afrontar as gravísimas deficiencias deste inmoble que, como poden comprobar centos de doentes cada día, non cumpre xa as condicións básicas para tratar aos enfermos.

14/07/2017 in Alcaldía, Benestar

O Porriño é, con moito, o concello que máis medra de Galicia en poboación superando en habitantes a Moaña ou Monforte

A principios deste 2017, a Biblioteca Municipal do Porriño, dependente da Alcaldía, iniciou o  programa permanente de alfabetización temperá “Le ao teu bebé”, pensado para que a Biblioteca Municipal colaborase coas familias, axudando a crear un primeiro vínculo entre a lectura, a biblioteca e os bebés.

Dende entón, nais e país podían facer socio da Biblioteca Municipal aos seu fillo ou filla ao mesmo tempo que o empadroaban no Concello. O carné do cativo chegaba a súa casa por correo, xunto cun paquete de benvida, de balde. Pois ben: ese número de carnés e de regalos xa superou os cen .

A explicación delo está no feito de que O Porriño é o concello de Galicia que máis aumentou a súa poboación no último ano. Dacordo cos datos publicados polo Instituto Nacional de Estatística (INE), a 1 de xaneiro de este ano o concello tiña 19.567 habitantes, 669 máis que o 1 de xaneiro de 2016 o que significa un incremento de poboación do 3,5%, moi por diante dos outras cidades e vilas galegas que aumentaron o seu número de habitantes, coma Santiago –que ten 367 veciños máis- ou Ames, que ten 277 residentes novos.

O Porriño iniciou o ano con preto de 70 nacementos máis que mortes o cal, xunto coa chegada de novos veciños-a maioría procedentes doutos concellos de Galicia- fixo que superase no padrón de habitantes a Moaña, na provincia- e a Monforte e Boiro fora dela- e se achegue a A Estrada ou Lalín.

Grazas ao traballo realizado polos funcionarios municipais, o Instituto Nacional de Estadística xa admitirá a corrección do padrón de habitantes solicitada polo Concello en marzo do ano pasado, de xeito que se incorporaron ao mesmo a 1.009 persoas. Daquela, o Goberno local adiantara a Instituto Nacional de Estatística que a recollida de información sobre as altas e baixas no empadroamento non remataran e que, dacordo cos primeiros datos, a poboación total do Porriño superaría os 20.200 habitantes, polo cal agárdase a resposta do INE a unha nova solicitude de modificación do padrón que, no caso de admitirse, confirmaría oficialmente que o número de veciños da vila supera xa os 20.000.

Agora mesmo, os datos do INE sinalan que o maior aumento de poboación no concello produciuse entre os homes: en 2016 a poboación masculina aumentou en 345 persoas- de 9.296 a 9.641- algo que xa pasara en 2015-cando o incremento fora de 200-; tamén medrou a poboación feminina, que sigue sendo maioritaria no Porriño, pasando de 9.602 mulleres a 1 de xaneiro de 2015 a 9.926 a principios deste ano- o anterior pasou de 9.412 a 9.602-.

13/07/2017 in Alcaldía, Benestar

Un cento de persoas aprende coma integrarse ou voltar ao mercado de traballo e coñecen polo miúdo o Plan Municipal de Formación

Preto dun cento de persoas asistiron este venres a un ateigado  Multicentro de Torneiros no que celebrouse a xornada  ‘Recursos para o acceso ao emprego’, organizada pola Concellería de Emprego e Formación, que dirixe Soledad Girón.

De 9 da mañá a 2 da tarde Eduardo Adán, director territorial de Nortempo en Galicia, falou de ‘Intermediarios de Emprego; Alejandro Martínez e Teresa Ventín, conselleiros de Eures, amosaron cómo é ‘Traballar en Europa’; Pablo Búa, titular do ‘blog’ ‘Escenario Laboral’, expuxo aos asistentes qué hai que facer para  ‘Mellorar a túa marca persoal na búsqueda de emprego’ e Fernando Clemente, director de ‘Quick Up, desenrolou o tema ‘Máis información, máis emprego’

Ademáis, deles, a concelleira Soledad Girón, xunto con dous técnicos municipais, explicou, polo miúdo, o ‘Programa de Formación Municipal’ e presentou  os recursos que ofrece a Concellería de Emprego para a busca de traballo e dos acordos de colaboración coas empresas da contorna para a execución de programas formativos. 

O obxectivo: chegar á amosando as diferentes posibilidades e propostas para atopar emprego, conqueriuse e, ao tempo, os asistentes e  tiveron a posibilidade de debatir, escoitar e preguntar a  axentes institucionais, profesionais e especialistas no mercado laboral que aportaron a súa visión sobre o acceso ao emprego e que puxeron a dispor dos asistentes ferramentas de utilidade para a toma de decisión relacionadas co eido laboral.

08/07/2017 in Alcaldía, Benestar, Emprego e formación

Aprazada a proxección da película ‘Hotel Transylvania 2’, programada para este xoves, 6 de xullo, na Praza de Antonio Palacios

A proxección da película ‘ Hotel Transylvania 2’, que estaba programada para este xoves, día 6 de xullo, ás 10 e media da noite, na Praza de Antonio Palacios, ven de quedar aprazada por mor das condicións climatolóxicas.

Nuns días coñecerase a nova data fixada para a exhibición deste filme que poden ver todos os públicos.

06/07/2017 in Alcaldía, Benestar, Cultura e festas, Turismo

A Concellería de Vías e Obras acomete a recuperación da Avenida Buenos Aires e a mellora da súa acccesibilidade

A Concellería de Vías e Obras, dirixida por Manuel Carrera, leva a cabo na Avenida Buenos Aires unha recuperación integral da mesma coa reparación de beirarrúas, a construción dunha nova na entrada do popular  ‘escondidiño’ , na que anteriormente se fixera unha cesión para facilitar o seu ensanchamento, e  a adaptación de todos os pasos desta avenida para mellorar a accesibilidade da mesma.

O concelleiro salienta que a obra, que rematarase no prazo de dous meses, está a cargo de traballadores contratados grazas ao ‘Plan Concellos 2017’ da Deputación de Pontevedra, e agradece a importante colaboración neste proxecto de Israel Mercader, un referente no Porriño na loita pola eliminación das barreiras arquitectónicas e a mellora da accesibilidade.

A mellora da avenida, explica Manuel Carrera, ten un orzamento, nesta primeira fase, de 20.000€, “que se asumen con fondos do propio Concello” e, engade, “cumpre coa solicitude de moitos veciños do Porriño que viñan reclamando, dende hai tempo, que se acometerán estas melloras”.

06/07/2017 in Alcaldía, Benestar, Emprego e formación, Igualdade, Vías e obras

Iniciativas no Parlamento de Galicia para que @Xunta acometa xa as melloras que precisa o Centro de Saúde

Os deputados no Parlamento de Galicia, Abel Losada, Julio Torrado Quintela e Noela Blanco Rodríguez, veñen de impulsar dous iniciativas relacionadas coa situación do Centro de Saúde do Porriño e as súas condicións.

Logo de lembrar que hai máis de sete anos, o día 21 de abril de 2010 no Faro de Vigo, publicouse unha noticia na que se destacaba que o entón alcalde do Porriño,do PP, xunto coa concelleira de Sanidade en aquela data, reuníronse en Santiago co director de Recursos Económicos do Servizo Galego de Saúde (SERGAS) para poñer a disposición da Xunta de Galicia unha parcela cunha superficie de 525 metros cadrados, e poder iniciar así as obras de ampliación do Centro de Saúde do Porriño canto antes e de que esta ampliación “fora anunciada en varias ocasións xa en anos anteriores subliñando que a firma do acordo entre o Concello e a Xunta de Galicia permitiría priorizar estas instalacións de Atención Primaria” e que estas  promesas quedaran en nada, presentan, en primeiro lugar unha proposición non de lei.

Nela piden ao Parlamento a que inste ao Goberno de Galicia a que presente, “no prazo de tres meses un plan específico para acadar unha solución aos problemas que presentan o Centro de Saúde e a UAD (Unidade Asistencial de Drogodependencias) do Porriño”.

Así mesmo, esixen que se reinicie neste mesmo ano o proxecto de ampliación do centro de saúde, “e a debida dotación dos medios técnicos e humanos, acorde coas necesidades existentes, consignando as partidas orzamentarias correspondentes nos orzamentos de 2018”.

Finalmente piden que se garanta o reforzo da UAD, para que “poda levar a cabo unha labor integral no tratamento das drogodependencias”, e que esta se faga nas mellores condicións para os e as usuarias e as súas familias.

Ademais desta proposición non de lei, os deputados fan varias preguntas parlamentarias para o seu debate na Comisión de Sanidade: “É consciente a Xunta de Galicia das carencias existentes no ámbito da atención sanitaria no concello do Porriño, tanto no centro de saúde, como na UAD?”;  “ Despois de anos de promesas valeiras, ten desenvolvido algún plan de actuación específico para solucionar eses problemas?”;  De ser así, cal é o calendario da aplicación deste plan?; Cales son as actuacións mais relevantes? e cales son os seus obxectivos?”

06/07/2017 in Alcaldía, Benestar