Alcaldía

A deputada autonómica do PSdG-PSOE, Leticia Gallego recolleu hoxe diversas solicitudes da alcaldesa Eva García e concelleiros socialistas do goberno municipal para darlles traslado ante o Parlamento de Galicia. A parlamentaria realizou unha visita ao Concello e mantivo unha reunión de traballo coa alcaldesa e cos concelleiros Lourdes Moure, Sergio Casal e David Alonso.

Entre as peticións recollidas, a principal é a ampliación do Centro de Saúde, demandada dende hai unha década. O Concello do Porriño cedeu os terrenos para acometer a execución do proxecto comprometido polos sucesivos gobernos de Alberto Núñez Feijóo. Precisamente a alcaldesa informou á deputada que no pasado mes de setembro solicitou unha entrevista ao novo conselleiro de Sanidade, Julio García Comesaña para interesarlle polo estado dese proxecto e que aínda non tivo resposta.

Leticia Gallego tamén recolleu outras demandas do goberno municipal como a construcción dun novo colexio que sustitua ao actual CEIP Fernández López, totalmente desfasado e que soporta o maior número de escolares entre os centros docentes da vila. Asimesmo a deputada informouse tamén do problema da descontaminación por lindano e tomou nota da petición do Concello porriñés para demandar que a Xunta de Galicia habilite unha partida orzamentaria para executar os traballos na parroquia de Torneiros, segundo o compromiso adquirido en 2018 pola administración autonómica.

O encontro serviu tamén para que a deputada informase do ocorrido o pasado mércores 4, na Comisión de Industria do Parlamento coa ocasión de debaterse a situación da empresa porriñesa “Maderas Iglesias”. Leticia Gallego explicou que os votos do Partido Popular que ten a maioría, impediron que prosperase unha proposición non de lei do PSOE que instaba ao vicepresidente económico da Xunta, Francisco Conde a convocar unha reunión de urxencia co comité de empresa cara a paralizar a poxa desta firma.

A alcaldesa Eva García e a deputada Leticia Gallego lamentaron que “esta mostra de falta de empatía e sensibilidade do Partido Popular vaia impedir unha solución para 150 traballadores, na súa meirande parte mulleres abocandolles a unha situación sen retorno”, segundo valoraron.

A alcaldesa Eva Garcia recibiu hoxe, a primeira hora da mañá ao ministro de Sanidade do Goberno de España, Salvador Illa que acudiu a visitar as instalacións da factoría “Biofabri” do grupo empresarial “Zendal”, sita en Torneiros. O ministro manifestou que tiña un especial interese en coñecer o traballo que está a desenvolver para a fabricación dunha das vacinas contra a Covid que xa está en pleno proceso de fabricación.

Xunto co ministro e a alcaldesa do Porriño acudiron á visita das instalacións Julio García Comesaña, conselleiro de Sanidade; Abel Caballero, alcalde de Vigo e presidente da FEMP; a directora da Axencia Española dos Medicamentos, María Jesús Lamas e Javier Losada, delegado do Goberno de Galicia. Na visita ás instalacións de “Biofabri” tiveron como anfitrións a Pedro Fernández Puentes, presidente do grupo “Zendal”; Andrés Fernández, conselleiro delegado e Ricardo Troncoso, director da factoría.

O ministro mantivo unha reunión de traballo coas autoridades presentes e os directivos do grupo “Zendal” na que a alcaldesa do Porriño reclamou ás administracións competentes “unha maior axilidade nos procedementos urbanísticos para facilitar o crecemento das instalacións de Biofabri no Porriño”. Precisamente o presidente do grupo empresarial agradeceu a Eva García “a estreita colaboración e as facilidades que a alcaldesa do Porriño nos dispensa dende que ela chegou ao cargo”.

A Alcaldesa Eva García decidiu adiar para mañá mércores a reunión telemática que manterá a Comisión Municipal de Seguimento do Covid, á espera do que decida e comunique a Consellería de Sanidade esta tarde. A Consellería celebrará a partir das 18 horas, a reunión co comité científico que lles asesora e despois informará das decisións que se adopten e que poderían afectar ao Porriño, no que atinxe á área sanitaria de Vigo.

Por esta razón decidiuse adiar ata mañá ás 13 horas a reunión da Comisión Municipal que integran xunto coa alcaldesa, os cinco concelleiros do goberno local; os voceiros de PP, EU SON e UDDL, o Inspector Xefe da Policía Local, o responsable da Agrupación de Protección Civil e o secretario municipal.

Namentres O Porriño cumpre o noveno día en máximo nivel de contaxios ou alerta vermella. Eva García demandou hoxe novos datos á Consellería de Sanidade que lle informou que no Porriño, ata onte luns 2, hai 63 contaxios activos.

A alcaldesa asinou este mediodía a convocatoria da Comisión Municipal de Seguimento da Evolución do Covid que terá lugar mañá martes 3 de novembro, ás 13 horas. Forman a devandita comisión a alcaldesa e os cinco concelleiros do goberno local; os voceiros de PP, EU SON e UDDL, o Inspector Xefe da Policía Local, o responsable da Agrupación de Protección Civil e o secretario municipal.

Será unha sesión telemática que abordará o análise e debate da situación actual do Porriño que leva máis de oito días de xeito consecutivos en máximo nivel de contaxios ou alerta vermella.

Eva García demandou hoxe datos á Consellería de Sanidade que lle informou que no Porriño, ata o sábado 31 de outubro había 61 contaxios activos. Restan por coñecerse os datos de onte domingo que non se lle facilitaron aínda.

A reunión que mañá manterá a Comisión Municipal de Seguimento adquire maior importancia porque se celebrará despois de coñecer a avaliación e as medidas que a Consellería de Sanidade poida adoptar, unha vez escoitado o comité científico que ten convocado previamente.

En declaracións efectuadas esta mañá, a alcaldesa porriñesa lamentou unha vez máis “a falla de permeabilidade na comunicación que a Xunta realiza porque adoece de máis cortesía institucional”. “Botamos en falla maior detalle na información solicitada o que nos permitiría aos concellos poder colaborar dun xeito máis eficaz nos diversos eidos posibles, xa sexa en tarefas de desinfección, control da mobilidade ou velar por que se cumpran os illamentos domiciliarios dos contaxiados”, manifestou Eva García.