Alcaldía

O Concello expresa o seu fondo pesar polo falecemento do profesor Moncho Iglesias

 

O goberno municipal no nome do Concello do Porriño expresa o seu fondo pesar polo falecemento do profesor Moncho Iglesias.

A alcaldesa Eva García lembrou a inestimable colaboración que o profesor mantivo co Concello nos traballos que se editaron ao longo destes últimos anos sobre a obra e figura do arquitecto Antonio Palacios.

Moncho Iglesias tiña un extraordinario coñecemento sobre Palacios como acredita a súa bibliografía na que hai varios títulos sobranceiros adicados ao arquitecto porriñés. De feito coa colaboración do Concello editáronse a propia tese doutoral de Iglesias que adicou a Palacios e o libro “Antonio Palacios, unha viaxe por Galicia”, no que se recompilan un cento de bocetos, debuxos e apuntes dos cadernos de campo, totalmente inéditos, que o arquitecto realizou nas súas viaxes

A alcaldesa lamentou que a desaparición de Moncho Iglesias impida a súa participación nos actos que ata o 27 de outubro de 2021 celebrará o Concello coa ocasión do “Ano Arquitecto Antonio Palacios”

Pola súa banda, tamén Lourdes Moure, concelleira de Educación recoñeceu no nome da comunidade educativa porriñesa a intensa traxectoria pedagóxica e o gran legado que deixa o profesor Iglesias como docente que foi do Instituto de Ensino Secundario Pino Manso da nosa vila ata a súa recente xubilación.

04/11/2020 in Alcaldía, Cultura e festas, Educación e tecnoloxía

Desconvocase a concentración da Vaquería ante o anuncio da Xunta de que informará do proxecto o luns 16

 

O Concello do Porriño anuncia que decidiu desconvocar a concentración de protesta que ía celebrarse o xoves 12 na Vaquería ante o anuncio da Xunta de Galicia de que o luns 16 informará sobre o proxecto de reforma e mellora da seguridade viaria desa travesía.
Este mediodía, recibiuse no Concello a chamada da Axencia Galega de Infraestruturas indicando que o seu director xeral, Francisco Menéndez recibirá o luns 16, ás 10 horas a Pedro Pereira, primeiro tenente de alcalde e responsable municipal de infraestruturas. Trátase da entrevista solicitada e varias veces reiterada por parte municipal para coñecer o estado do proxecto comprometido hai meses pola administración autonómica.
En consecuencia, o Concello ven de comunicar á Subdelegación do Goberno a desconvocatoria da concentración para a que tiña solicitada autorización.

04/11/2020 in Alcaldía, Urbanismo, comercio e industria, Vías e obras

Corte de subministro de auga en Torneiros por reparacións

O Concello do Porriño informa que HOXE MÉRCORES 4 de novembro, a partir das 23.30 horas terá lugar un corte no subministro de auga que afectará a toda a parroquia de TORNEIROS.

Trátase da reparación dunha avaría na rede principal de abastecemento, segundo informan os servizos técnicos municipais.

A previsión é que o corte de auga durará ata as 4 da madrugada do xoves 5.

Rogamos desculpen as molestias.

04/11/2020 in Alcaldía, Vías e obras

O Concello e veciños convocan unha concentración para demandar o proxecto pendente para a travesía de A Vaquería

 

O goberno municipal de Porriño e a veciñanza de A Vaqueria acordaron convocar unha concentración de protesta para demandar á Xunta de Galicia o proxecto pendente de reforma da travesía da estrada PO-510 ao seu paso por este barrio de Budiño.

O acordo de pasar ás mobilizacións adoptouse polo primeiro tenente de alcalde, Pedro Pereira cos veciños despois dunha reunión mantida hai poucos días e de solicitar por varias veces e sen resultado, unha entrevista ao director da Axencia Galega de Infraestruturas da Xunta de Galicia. Ese departamento comprometeuse hai meses a redactar o proxecto da Variante de A Vaquería. Este proxecto ten unha indubidable importancia tanto para a mellora da seguridade viaria nese tramo como tamén pola súa influencia na trama viaria do Porriño en relación co tráfico cara a outros concellos limítrofes e coa Autovía A-55.

O Concello ven de solicitar autorización á Subdelegación do Goberno para celebrar a concentración que terá lugar o xoves 12, a mediodía.

 

03/11/2020 in Alcaldía, Tráfico, Urbanismo, comercio e industria, Vías e obras

Adíase ata o mércores a reunión da comisión municipal de seguimento do covid á espera do que decida a Consellería de Sanidade

 

A Alcaldesa Eva García decidiu adiar para mañá mércores a reunión telemática que manterá a Comisión Municipal de Seguimento do Covid, á espera do que decida e comunique a Consellería de Sanidade esta tarde. A Consellería celebrará a partir das 18 horas, a reunión co comité científico que lles asesora e despois informará das decisións que se adopten e que poderían afectar ao Porriño, no que atinxe á área sanitaria de Vigo.

Por esta razón decidiuse adiar ata mañá ás 13 horas a reunión da Comisión Municipal que integran xunto coa alcaldesa, os cinco concelleiros do goberno local; os voceiros de PP, EU SON e UDDL, o Inspector Xefe da Policía Local, o responsable da Agrupación de Protección Civil e o secretario municipal.

Namentres O Porriño cumpre o noveno día en máximo nivel de contaxios ou alerta vermella. Eva García demandou hoxe novos datos á Consellería de Sanidade que lle informou que no Porriño, ata onte luns 2, hai 63 contaxios activos.

03/11/2020 in Alcaldía

Eva García convoca á comisión municipal de seguimento do covid

A alcaldesa asinou este mediodía a convocatoria da Comisión Municipal de Seguimento da Evolución do Covid que terá lugar mañá martes 3 de novembro, ás 13 horas. Forman a devandita comisión a alcaldesa e os cinco concelleiros do goberno local; os voceiros de PP, EU SON e UDDL, o Inspector Xefe da Policía Local, o responsable da Agrupación de Protección Civil e o secretario municipal.

Será unha sesión telemática que abordará o análise e debate da situación actual do Porriño que leva máis de oito días de xeito consecutivos en máximo nivel de contaxios ou alerta vermella.

Eva García demandou hoxe datos á Consellería de Sanidade que lle informou que no Porriño, ata o sábado 31 de outubro había 61 contaxios activos. Restan por coñecerse os datos de onte domingo que non se lle facilitaron aínda.

A reunión que mañá manterá a Comisión Municipal de Seguimento adquire maior importancia porque se celebrará despois de coñecer a avaliación e as medidas que a Consellería de Sanidade poida adoptar, unha vez escoitado o comité científico que ten convocado previamente.

En declaracións efectuadas esta mañá, a alcaldesa porriñesa lamentou unha vez máis “a falla de permeabilidade na comunicación que a Xunta realiza porque adoece de máis cortesía institucional”. “Botamos en falla maior detalle na información solicitada o que nos permitiría aos concellos poder colaborar dun xeito máis eficaz nos diversos eidos posibles, xa sexa en tarefas de desinfección, control da mobilidade ou velar por que se cumpran os illamentos domiciliarios dos contaxiados”, manifestou Eva García.

02/11/2020 in Alcaldía

O Consello Municipal da Infancia e Adolescencia do Porriño estrea o seu propio perfil en Instagram

O obxectivo é ofrecer unha nova canle de comunicación coa poboación máis nova do concello e darlle maior visibilidade ao traballo realizado polo Consello Municipal da Infancia e da Adolescencia do Porriño que é un órgano de participación que ven funcionando nesta vila mesmo antes do seu recoñecemento como “Cidade amiga da infancia” por parte de UNICEF, dende 2018.

A iniciativa enmárcase nas actividades previstas para este mes de novembro en relación a conmemoración do Día dos Dereitos da Infancia, e que inclúe a dinamización da participación nos centros educativos, a participación dun representante do consello no encontro autonómico do día 17, a celebración dun pleno infantil o propio día 20 de novembro, e a iluminación da fachada do concello ese mesmo día.

Trátase dunha nova canle de participación na que nenas, nenos e adolescentes do Porriño poderán coñecer o traballo que realiza este órgano consultivo municipal, formado por representantes de todos os centros educativos do concello.

O perfil xa está activo en https://www.instagram.com/infanciadoporrino/ e para dalo a coñecer, dende a Concellería de Educación do Concello do Porriño e a Oficina de Información Xuvenil (OMIX) que son os impulsores desta iniciativa dos propios rapaces, organizaron unha votación. Trátase de elixir o que será o logotipo que represente ao Consello Municipal de Infancia e Adolescencia en cada un dos seus actos.

Para participar na votación teredes que seguir a este perfil en Instagram e comentar cal é o logotipo que máis vos gusta.

01/11/2020 in Alcaldía, Educación e tecnoloxía

Despregue da Policía Local e dos servizos de limpeza nos cemiterios coa ocasión do Día de Todos os Santos

Axentes da Policía Local encargáronse de vixiar o cumprimento da normativa autonómica nas visitas aos cemiterios da vila coa ocasión do Día de Todos os Santos


A mediodía, Lourdes Moure, concelleira de Seguridade comprobou o desenvolvemento do operativo acudindo a varios cemiterios, tanto no municipal como en diferentes parroquias. Segundo indicou a concelleira “o comportamento da veciñanza está sendo moi axeitado, evitando aglomeracións e colaborando cos protocolos”.


Deste xeito deuse cumprimento ao protocolo anti-Covid promulgado o pasado día 22 pola Dirección Xeral de Saúde Pública da Xunta de Galicia que limitaba a catro persoas do mesmo grupo familiar e a 30 minutos de duración, as visitas aos cemiterios. O mesmo protocolo instaba aos Concellos a tomar as medidas necesarias para garantir o cumprimento destas normas.

Paralelamente, outro departamento do goberno municipal, a Concellería de Limpeza que dirixe Sergio Casal despregou hoxe unha brigada de seis persoas que se encargaron de realizar desinfeccións periódicas nos accesos e zonas comúns dos distintos cemiterios ao longo do día.

01/11/2020 in Alcaldía, Limpeza, Seguridade

O Porriño segue en alerta vermella por sexto día consecutivo. O noso concello non está afectado polas novas restricións que acaba de comunicar a Xunta de Galicia.

O Porriño segue en alerta vermella polo número de contaxios activos de Covid. Por sexto día consecutivo O Porriño manténse nesa relación segundo aparece no mapa actualizado do Servizo Galego de Saúde cos datos ata 18 horas de onte xoves.
O Porriño tiña ata o mércores 52 infectados, segundo a información que a alcaldesa Eva García acadou que lle facilitara onte a Consellería de Sanidade. Hoxe aínda non dispoñemos dun novo dato.
 
A Consellería de Sanidad comunicou este mediodía as novas restricións. Na nosa área, tan só a cidade de Vigo terá limitación de entrada e saída, dende hoxe, a partir das 15 horas e ata o martes 3.
 
O Porriño nin nos restantes concellos da área metroplitana teñen limitación de mobilidade, segundo ven de comunicar a Xunta de Galicia.
 
O PORRIÑO MANTEN AS MEDIDAS DECIDIDAS DENDE A PASADA SEMANA
 
Namentres o Concello manten as mesmas medidas restritivas que acordou dende o pasado xoves 22. As competicións deportivas desta fin de semana serán sen público, tanto en recintos cubertos como ao aire libre.
E do mesmo xeito o vindeiro martes 3 de novembro non haberá mercado ambulante semanal.
 
Tamén a Policía Local fará o domingo 1, festividade de Todos os Santos, un despregue en todos os cemiterios do termo municipal para velar polo cumprimento da normativa promulgada pola Xunta de Galicia que limita a catro persoas do mesmo grupo familiar e a 30 minutos de duración, as visitas aos cemiterios. O mesmo protocolo insta aos Concellos a tomar as medidas necesarias para garantir o cumprimento destas normas e evitar as aglomeracións.

 

30/10/2020 in Alcaldía

A alcaldesa e o concelleiro de Deportes participaron en sendas reunións telemáticas sobre a Volta Ciclista a España e o Camiño de Santiago

 

Eva García, alcaldesa de O Porriño participou este mediodía, xunto con outros alcaldes e alcaldesas de concellos da ruta xacobea, nunha reunión telemática coa presidenta da Deputación. Tratouse dunha reunión da Mesa Provincial do Camiño na que Carmela Silva explicou aos responsables municipais as diferentes iniciativas que a Deputación está a desenvolver para pór en valor este itinerario cultura como un eixe estratéxico da estratexia turística de O Porriño e demais concellos do Camiño.

VOLTA CICLISTA

Por outra banda, David Alonso, concelleiro de Deportes participou noutra reunión telemática de responsables municipais dos concellos pontevedreses polos que transcorrerán etapas da Volta Ciclista a España coa Subdelegada do Goberno e mandos da Garda Civil de Tráfico. Pola súa banda David Alonso estivo acompañado de Julio Bernárdez, xefe de Deportes e Daniel Rodríguez, inspector xefe da Policía Local.

 
Na reunión telemática con Maica Larriba repasaron o libro de ruta nas diferentes etapas e as previsións de paso polas localidades. No caso de O Porriño, o vindeiro xoves 5 de novembro, terá lugar a saída lanzada da etapa decimo quinta, a partir das 10:50 horas.
A caravana sairá de Mos e chegará ao Porriño pola Avenida de Galicia de xeito neutralizado sendo a saída lanzada dende a rotonda dos Aloques e avenida Antonio Palacios en dirección a Ponteareas.
Segundo as previsións da organización será preciso cortar o tráfico por todas estas vías e outras afectadas, como a rúa Domingo Bueno aproximadamente media hora antes do paso da comitiva.

29/10/2020 in Alcaldía, Cultura e festas, Deportes, Turismo