Alcaldía

A alcaldesa comprobou o arranxo das pistas de tenis do Polideportivo Municipal

A alcaldesa Eva Garcia comprobou hoxe o resultado das obras de arranxo das pistas de tenis do Polideportivo Municipal. A rexedora compartiu a visita co concelleiro de Deportes, David Alonso e co presidente do Club de Tenis Porriño, Agustín Doval.

 

Arranxouse a superficie de pavimento “tenninsquick” nas dúas pistas. Repararonse e pintaronse de cor violeta. O orzamento das obras superou os 12.000€.

Aproveitando o encontro, a alcaldesa e o presidente do club firmaron o convenio anual de subvención nominativa polo que a entidade deportiva recibe unha achega municipal de 2.000€.

Mediante o devandito convenio, o Concello cede gratuitamente as pistas do Centro Deportivo Municipal ao Club de Tenis Porriño para a práctica deportiva, tanto adestramentos como competicións. O uso das instalacións é gratuito para calquera persoa allea ao club que solicite hora a través das oficinas do Polideportivo Municipal.

01/06/2021 in Alcaldía, Deportes

A alcaldesa recibiu hoxe a segunda dose da vacina anti-Covid

Eva Garcia acudiu este mediodía ao Instituto Feiral de Vigo (IFEVI) onde fora citada para recibir a segunda dose da vacina contra a Covid-19. A alcaldesa do Porriño recibiu o preparado de “Pfizer”, como da primeira quenda e deste xeito completou a pauta completa.

A rexedora agradeceu o trato dispensado polo persoal do Sergas que realiza este proceso masivo de vacinación e apelou, de novo, a que toda a veciñanza do Porriño acuda á chamada para cumprir co obxectivo de acadar a inmunidade de grupo neste vindeiro verán.

01/06/2021 in Alcaldía

Tres visitas guiadas teatralizadas Antonio Palacios programadas para este mes de xuño

Este vindeiro sábado 5 de xuño terá lugar a segunda das visitas guiadas teatralizadas pola obra e vida de Antonio Palacios coa ocasión do 75 aniversario do falecemento do excepcional arquitecto porriñés.

Nesta quenda coa modificación das restricións pola Xunta de Galicia, agardase contar cun aforamento de 20 persoas.
Esta iniciativa do Concello do Porriño, a través da Concellería de Cultura, programouse ao abeiro do “Ano Palacios”, cun total de dez visitas das que tres están previstas para os sábados 5, 19 e 26 deste mes de xuño.
As inscricións deben realizase unha semana antes a través de correo electrónico no enderezo inscricionscultura@oporrino.org  

Os participantes inscritos partirán ás 12 horas dende unha das obras icónicas de Palacios, o Templete da boca de metro da Rede de San Luis e percorreran durante 90 minutos outras obras realizadas polo arquitecto. Casa do Concello, a Fonte do Cristo ou a Botica Nova. Un actor e unha actriz encárganse de representar a Antonio Palacios e a Corona Gónzalez, mecenas do arquitecto, contando ademais co acompañamento musical dun gaiteiro e un tamborileiro da Asociación Cultural Lumeirada.

Visita guiada teatralizada polas obras de Antonio Palacios. Xuño

01/06/2021 in Alcaldía, Cultura e festas, Turismo

A alcaldesa visitou en Madrid as obras da réplica do Templete de San Luis

Eva Garcia de la Torre visitou na capital do Estado, xunto con responsables de Metro de Madrid e da empresa porriñesa “Godoy Maceira”, a réplica do Templete de San Luis que está a construírse, de novo, no seu antigo emprazamento, na estación de Metro de Gran Vía.

A empresa porriñesa que dirixe Fernando Godoy traballa dende abril nesta réplica da obra orixinal de Antonio Palacios de hai un século e que conservamos no Porriño. A Comunidade de Madrid pretende inaugurar esta réplica xunto coas restantes obras de remoción da estación de metro de Gran Vía no mes de xullo.

O empresario porriñés xunto con María Teresa Diaz, coordinadora de relacións institucionais de Metro de Madrid, acompañaron á alcaldesa no percorrido polas obras de reconstrución.

Pola súa banda, Eva Garcia explicoulle aos responsables do Metro de Madrid que O Porriño está a celebrar dende o 27 de outubro de 2020, o “Ano Antonio Palacios”, en conmemoración do 75 aniversario do seu pasamento e, precisamente, nesta fin de semana comeza outra das actividades programadas polo Concello, coas visitas guiadas teatralizadas que continuarán ata outubro.

A alcaldesa agasallou aos máximos responsables de Metro de Madrid, Angel Garrido, conselleiro de Transportes da Comunidade, e Silvia Roldán, conselleira delegada da compañía de transportes, con exemplares dos libros editados polo Concello do Porriño sobre Antonio Palacios. Do mesmo xeito, a alcaldesa recibiu un libro editado pola Comunidade de Madrid sobre o legado de Antonio Palacios na capital de España.

29/05/2021 in Alcaldía, Cultura e festas, Educación e tecnoloxía, Turismo

O Porriño proxecta un gran parque público no Louro

O Concello do Porriño, a través da Concellería de Patrimonio e Urbanismo dirixida polo nacionalista Pedro Pereira, anuncia que chegou a un acordo para a compra de aproximadamente 20.000 metros cadrados de terreos na contorna do río Louro.

Pedro Pereira ven de formalizar un acordo de compra con persoas propietarias de parcelas próximas ao río que permitirán crear un parque público tan necesario na contorna do Louro para mellorar a calidade de vida da veciñanza.

“Temos que apostar por abrir o río para as persoas. Pensamos que a contorna do Louro ten que ser a gran zona verde e de lecer do centro urbano do Porriño. Este  é o primeiro paso necesario para transformar este entorno. Queremos proxectar un parque público na zona, que gañe máis espazos para a xente e no que instalar novos equipamentos”, apuntou  Pedro Pereira.

Na imaxe adxunta pódese observar as parcelas que vai adquirir o Concello 

 

29/05/2021 in Alcaldía, Infraestruturas, Medio Ambiente, Parques e xardíns

ADIF agarda financiar a supresión do paso a nivel con fondos “Next Generation”, segundo a información recibida pola alcaldesa

O ADIF (Administrador de Infraestruturas Ferroviarias) agarda que no prazo máximo de dez días rematen as catas xeotécnicas que están a realizar as empresas “GOC” e “Prointec” para determinar as características do chan. Coas conclusións dos traballos de sondaxes, acometerán a redacción do proxecto de construción coa alternativa que os técnicos elixan para soterrar a vía férrea e poñer en valor os terreos que se liberaran coa supresión do paso a nivel. Segundo o contrato que ADIF subscribiu con esas empresas, dispoñen dun prazo de 16 meses para entregar o proxecto, prazo que comezou a contar en novembro do ano pasado.

Esta información foi trasladada por Maria Luisa Domínguez, directora xeral de Planificación Estratéxica e Proxectos do ADIF á alcaldesa Eva García na reunión celebrada esta mañá na sede dese organismo en Madrid. Na reunión tamén participaron Miguel Angel Leor, Juan Carlos Monge e Luis Vicente Moreno, tamén directivos do ADIF.

A terceira cuestión que se abordou na reunión entre a alcaldesa do Porriño e os directivos de ADIF, é a consecución de fondos “Next Generation” da Unión Europea para o financiamento das obras. Eva García amosouse esperanzada polas expectativas que lle trasladaron os directivos do ADIF. 

“Saímos moi satisfeitos porque vemos que o proxecto avanza e que ademais xa está enriba da mesa o financiamento para a súa execución”, manifestou Eva Garcia. A alcaldesa asegurou que “o Concello do Porriño vai seguir pelexando para que se faga realidade”.

28/05/2021 in Alcaldía

Dous axentes da Policía Local evitaron un suicidio desde unha ponte no polígono das Gándaras

Dous axentes da Policía Local do Porriño evitaron onte o suicidio dunha persoa que estaba na varanda da ponte de acceso á Autovía A55 co polígono das Gándaras. Grazas á colaboración cidadá recibiuse aviso de que unha persoa estaba agarrada pola parte exterior da varanda da ponte, “con claras intencións de arroxarse cara a vía do tren”, segundo sinala o atestado. Cando a patrulla policial chegou atoparon esa situación e tamén a un grupo de persoas que, a unha distancia prudencial, intentaban convencelo para que non se tirara. Nese intre circulaba un tren por debaixo da ponte.
Os dous axentes actuaron con rapidez e destreza. Mentes un deles empezou a falar coa persoa que pretendía tirarse, o outro policía agarrouno polos brazos e o pescozo para evitar que se lanzase e puideron retiralo da zona de perigo ata que chegou unha ambulancia e tralasdouno ata o Centro de Saúde.
A persoa protagonista desta tentativa de suicidio identificouse como un veciño de Salceda de Caselas, de 47 anos.

27/05/2021 in Alcaldía, Seguridade

A alcaldesa reunirase en Madrid co “Adif” para coñecer as xestions para acadar fondos da UE para suprimir o paso a nivel

Eva García de la Torre viaxará o xoves a Madrid para manter unha reunión de traballo con responsables do “ADIF” (Administrador de Infraestruturas Ferroviarias) a fin de coñecer de preto como están as xestións que realiza este organismo para acadar fondos para suprimir o paso a nivel do centro urbano do Porriño

“ADIF” xa anunciara que o o financiamento deste proxecto realizarase con fondos “Next Generation” da Unión Europea.

A alcaldesa terá a reunión o venres 28, ás 9,30 horas con María Luisa Domínguez, directora xeral de Planificación e Proxectos e outros directivos do ADIF.

Namentres este mediodía Eva Garcia comprobou, á altura da Praza de Abastos, o avance das catas xeotécnicas que realizan as empresas “GOC” e “Prointec”, contratadas polo ADIF para estes traballos. Os resultados destas sondaxes servirán para definir a solución que contemplará o proxecto de supresión do paso a nivel.   

26/05/2021 in Alcaldía

Hoxe celebrase pleno municipal ordinario de maio

A aprobación definitiva do contrato coa empresa “Soom Management”, nova concesionaria da Piscina Municipal do Porriño é un dos asuntos que se tratarán no pleno municipal ordinario que celebrará esta tarde a corporación local, a partir das 18 horas.

A aprobación provisoria desa adxudicación decidiuse en marzo e hoxe vai para a súa ratificación. No seu día aceptouse a proposta realizada pola mesa de contratación para adxudicar á firma “Soom Management” que foi a plica mellor valorada, cunha oferta anual de 508.000 € e o compromiso de subrogar ao persoal actual de 24 traballadores desa instalación deportiva.

Tamén os corporativos coñeceran a proposta da mesa de adxudicación da licitación do servizo de recollida de residuos sólidos urbanos e xestión do “Punto Limpo” do Concello, en favor da empresa “Valoriza Servizos Medio Ambientais”. 

Ademais o temario da sesión inclúe media ducia de mocións que se especifican na orde do día que se adxunta no seguinte “pdf”. 

Pleno Mayo 2021

 

 

 

26/05/2021 in Alcaldía, Deportes, Limpeza, Medio Ambiente

Firmada na notaría a venda dunha parcela municipal á empresa “Iberembal”para a construcción dunha fábrica de envases metálicos

Eva García, alcaldesa do Porriño firmou este mediodía con Enrique Mastral, director xeral da empresa “Massilly Ibérica Iberembal”, a operación de compra venda dunha parcela municipal que a industria navarra adquire para construir unha fábrica no termo municipal.

O predio ten 13.335 metros cadrados de superficie dos que 10.668 son edificables con fins industriais. Localizase no PPI 7, na parroquia de Budiño.  A firma compradora vai construir unha factoría de envases metálicos para conservas alimenticias. O director xeral da firma manifestou que “temos en marcha un importante proxecto de futuro para o seu desenvolvemento nos mercados de Galicia e Portugal”

“Masilly Ibérica IBEREMBAL” fora a única empresa que presentou plica no prazo de presentación de ofertas que o Concello do Porriño convocara e que rematou en decembro de 2020.

A operación é por un importe de 960.000 euros (máis IVE) o que suporá un ingreso moi importante para a tesorería municipal que “se destinará a diversos investimentos no concello para a mellora da calidade de vida da veciñanza”, manifestou a alcaldesa, Eva Garcia ao remate da firma.

25/05/2021 in Alcaldía