Alcaldía

As comisións informativas municipais de Urbanismo, Igualdade e Economía prepararán a orde do día do próximo pleno da corporación local que abordará como asunto máis relevante a creación do fondo de axudas económicas directas para hostaleiros, comercio e autónomos afectados pola crise derivada da pandemia.

Dúas das comisións municipais celebraranse mañá xoves 18 pola tarde e por vía electrónica.  O luns 22 terá lugar o resto.  Entre elas, a comisión de Economía, que informará sobre a operación de crédito extraordinario que creará este fondo de axuda para os sectores económicos do Porriño máis afectados pola crise.  O importe total que se propoñerá será de 140.000 €, dos cales unha parte, 57.000 € corresponde á achega da Deputación, con cargo ao 1% do orzamento da institución provincial, e o resto págao o Concello.

A aprobación deste asunto levase ao pleno municipal a celebrarse o vindeiro día 24. Esa sesión estará presidida por Pedro Pereira como alcalde accidental.

Por decreto Eva García cede temporalmente a alcaldía a Pereira Fernández, como consecuencia dunha baixa debido a unha intervención cirúrxica á que será sometida este xoves e a posterior convalecencia.

Eva García de la Torre solicitou unha reunión con Francisco Conde, vicepresidente segundo e conselleiro de Economía da Xunta de Galicia para tratar o desenvolvemento do planeamento urbano e do tecido industrial no concello do Porriño.
A alcaldesa pretende abordar co responsable autonómico cuestións comúns ás dúas administracións relacionadas co presente e futuro do Porriño.

A solicitude de entrevista con Conde, que foi enviada esta mañá a ese departamento autonómico, súmase á que o pasado decembro Eva García fixo ao propio Alberto Núñez Feijóo e que aínda non recibiu resposta do gabinete do presidente do Xunta.

O Concello do Porriño adhírese ao convenio de colaboración entre a Axencia Tributaria de Galicia (ATRIGA) e a Federación Galega de Municipios e Provincias (FEGAMP) para a transferencia de información tributaria, na loita contra a fraude fiscal. Así mesmo, o intercambio de información entre a Autoridade Tributaria de Galicia e os concellos abrangue outros ingresos de dereito público para a concesión de axudas, subvencións e contratación coa administración.
A adhesión foi acordada e asinada pola alcaldesa Eva García quen informará desta resolución no próximo pleno da corporación municipal porriñesa.

A produtora Voz Audiovisual solicita a nosa colaboración para difundir a través das redes sociais do Concello, unha chamada á colaboración de quen puidese dar algunha información sobre as persoas e o lugar onde se fixo esta fotografía adxunta. 

A imaxe corresponde á colección realizada pola fotógrafa norteamericana Ruth Matilda Anderson arredor de 1920, durante as súas xiras por Galicia.  De feito, exhibiuse xunto con outras imaxes, nunha exposición sobre a mencionada fotógrafa que montou “AFundación”, no Centro Cultural Municipal de Porriño entre maio e xuño de 2019.

Agora a citada produtora prepara un documental para a TVG co fin de recrear lugares e imaxes 100 anos despois, da man de Cristina Pato e Xan Padrón, que se chamará “Galicia de vinte a vinte”.

Se recoñecen ás persoas desta fotografía, se saben algo delas ou dos seus descendentes ou do lugar exacto onde foron tomadas, a produtora solicita que se poña en contacto cos números de teléfono que figuran na parte inferior da imaxe.