Alcaldía

Beatriz Cabaleiro, finalista do premio Frei Martín Sarmiento

“Clover, unha porquiña diferente” é finalista no premio literario Frei Martín Sarmiento. A autora, a porriñesa Beatriz Cabaleiro, foi recibida no Concello polo alcalde, Alejandro Lorenzo, e os concelleiros de Cultura e Educación, Bienvenido Estévez e Carolina González, para darlle a noraboa pola súa nominación e desexarlle moita sorte.

O libro, un dos poucos álbumes ilustrados bilingües en galego e inglés, opta a facerse co galardón na categoría de 1º e 2º de primaria. En maio saberemos se a autora, xunto coa ilustradora Blanca Millán, reciben o premio.

“Clover”, o debú literario de Beatriz Cabaleiro, é unha obra de literatura infantil publicada por Aira Editorial que conta as andanzas dunha porquiña norirlandesa que acaba de chegar ao equipo de baloncesto de Vila Liberdade. As súas manchiñas, coa curiosa forma do trevo, chamarán a atención das súas compañeiras e espertarán as súas supicacias. A través das súas páxinas os pequenas/os lectoras/es entenderán a importancia de respectar a diversidade e afondarán nos valores do respecto e a igualdade.

O alcalde, Alejandro Lorenzo, felicitou a Beatriz e amosou o seu “orgullo porque O Porriño estea formado por xente coma ti, comprometida coa cultura e co seu pobo” e animouna a seguir “dando o mellor de ti mesma e facendo sempre o che apaixona. Esta nominación, e o premio que estou seguro recollerás,  dan  boa conta da importancia do teu traballo”.

Sobre a autora

Beatriz Cabaleiro naceu en 1992. Graduada en Xornalismo pola USC e na English Studies College of Marin, actualmente compaxina a docencia coa escritura. Tamén é membro do departamento de comunicación do Marisquiño e colaboradora do Festival de Cans. Redacta contidos relacionados coa cultura e a diversidade en diarios dixitais e exerce como profesora.  

13/04/2022 in Alcaldía

O Porriño celebra “Do Libro ás Letras”

O club de lectura da Biblioteca Municipal do Porriño celebra este ano o Día do Libro e o Día das Letras Galegas dun xeito moi especial: con varias actividades en aberto que enlazarán as dúas festividades, a do 23 de abril e a do 17 de maio, nun programa que leva como título “Do Libro ás Letras”. Calquera persoa interesada está convidada a unirse ao club de lectura os días 18 de abril e 2 e 16 de maio na Biblioteca, en horario de 18 a 19:30 horas, nuns encontros especiais que porán en valor tanto os libros como a riqueza do mundo das letras.

Nelas, as persoas asistentes poderán participar e compartir o amor polos libros a través de lecturas conxuntas, recomendacións e retos literarios, así como coloquios arredor de anécdotas e inquedanzas relacionadas co mundo das letras, e achegaranse tamén á figura e obra do autor homenaxeado este ano no Día das Letras Galegas, Florencio Delgado Gurriarán.

Programa especial despois de dous anos de celebracións a distancia

O club de lectura do Porriño volveu á súa actividade presencial o pasado mes de outubro, despois de case dous anos de pandemia, en que se vira obrigado a adaptarse ás circunstancias sanitarias e apostar por dinámicas de lectura e comentario a distancia para conseguir manter viva a súa actividade.  En 2022, logo de dous anos en que tivera que celebrar estas dúas festividades na distancia, o club de lectura, que conta con vinte participantes, quere resarcirse con este programa especial presencial, organizado pola Biblioteca Municipal e a coordinadora do club, Ana Abad de Larriva, en colaboración coas participantes.

O ano pasado conmemoraron o Día do Libro compartindo unha fotografía mosaico onde saían todas a ler un libro, cada unha nun lugar diferente, pero conectadas pola lectura. Este ano, por fin, poden celebralo tamén cunha imaxe de todas xuntas na biblioteca, acompañadas polo alcalde do Porriño, Alejandro Lorenzo, e o concelleiro de Cultura, Bienvenido Estévez.

E, se en 2020 e 2021 celebraran o Día das Letras Galegas cun podcast a partir da lectura conxunta e o comentario de poemas das dúas persoas homenaxeadas, Ricardo Carvalho Calero e Xela Arias, respectivamente;  en 2022 poden por fin facer as lecturas e comentarios en formato presencial. 

Ademais, as ferramentas desenvolvidas durante eses dous anos a distancia seguen a empregarse agora para complementar a actividade presencial do club. A información destas actividades especiais pode consultarse no blog https://clublecturaporrino.wordpress.com/, un espazo virtual no que están accesibles as guías de lectura e comentario dos libros, así como podcasts, recomendacións de lectura e outros recursos de interese compartidos pola coordinadora e as participantes do club.

12/04/2022 in Alcaldía, Cultura e festas

O Concello propón á Xunta a creación dunha aldea modelo

A Consellería do Medio Rural estudará a posibilidade de desenvolver un proxecto de aldea modelo dentro do termo municipal do Porriño.

Así o acordaron o titular deste departamento, José González, e o alcalde, Alejandro Lorenzo , nunha xuntanza de traballo na que tamén participou, por videoconferencia, o director xeral de Defensa do Monte, Manuel Rodríguez.Así, os servizos técnicos de Medio Rural avaliarán a idoneidade de diversas localizacións para a posta en marcha da iniciativa, que se enmarca na Lei de recuperación da terra agraria de Galicia, xunto a outras como os polígonos agroforestais ou as agrupacións de xestión conxunta. Todos estes instrumentos teñen como principal obxectivo poñer en valor terras en desuso para poñelas a producir e xerar riqueza e emprego no rural, ao tempo que se fai unha prevención activa diante dos incendios forestais.

No caso concreto das aldeas modelo, o obxectivo é fomentar o aproveitamento agroforestal do perímetro do núcleo de poboación, co fin de xerar actividade nesa franxa e dese xeito contribuír á dinamización das terras e, simultaneamente, á anticipación aos incendios forestais.

Na reunión tamén se afondou na cooperación entre a Consellería e o Concello en materia de prevención de lumes, en particular no que atinxe aos labores de roza mecanizada para o control da biomasa.

12/04/2022 in Alcaldía

Restablecido o subministro da Fonte de San Sebastián

A emblemática Fonte de San Sebastián xa funciona de novo.

O Concello do Porriño levou a cabo obras de acondicionamento da fonte para evitar, na medida do posible, posibles focos de contaminación que afectaban á calidade da auga e causaban reiterados cortes de subministro.

As obras consistiron na canalización do caudal no tramo do nacente ata o grifo para impedir filtracións contaminantes e na construción dunha arqueta na entrada da mina para a conexión da auga non potable coa rede de pluviais.

“Unha vez realizadas as analíticas os valores paramétricos volveron á normalidade e por iso acordamos restaurar o subministro”, explicou o concelleiro de Vías e Obras, Ramón Porto, “Dentro dun mes volveremos analizar a auga para comprobar que segue a ser apta para o consumo”.

Pola súa parte, o alcalde, Alejandro Lorenzo, reiterou que dende o Concello “farase todo o necesario para manter o subministro con todas as garantías sanitarias”.

11/04/2022 in Alcaldía, Vías e obras

O alcalde súmase á celebración do Día do Pobo Xitano no CEIP da Ribeira

O alcalde do Porriño, Alejandro Lorenzo, e a concelleira, Antía Carrera, participaron hoxe na celebración do Día Internacional do Pobo Xitano do CEIP da Ribeira, en Torneiros.

Como cada 8 de abril, conmemórase o Primeiro Congreso Mundial Romaní-Xitano que tivo lugar en Londres, no ano 1971, e no que se instituíu a bandeira e o himno xitano.

O rexedor quixo unirse a unha celebración “que segue a ser moi necesaria para rematar dunha vez por todas coa discriminación e a estigmatización deste pobo e poñer en valor a súa cultura e historia”. Neste sentido salientou a importancia de que dende os colexios se traballe en valores para contribuír a crear unha sociedade máis xusta. “Colexios como CEIP da Ribeira son un exemplo de integración, sensibilización social e convivencia. Un colexio de todas/os e para todas/os no que as nenas e nenos poñen en valor o orgullo da súa identidade e valores xitanos”, apuntou Lorenzo.

O alumnado deu a benvida ao alcalde e agasallouno con traballos feitos por eles mesmos.  Prepararon un programa de actuacións que foron dende lcturas de poemas de Lorca, exposicións dos seus valores e principios e, como non podía ser doutro xeito, música e baile. Lorenzo, non dubidou en arrancarse e bailar flamenco ao son dos caixóns, guitarras e tacóns.

 

08/04/2022 in Alcaldía, Educación e tecnoloxía

Concello e Diócese reúnense para abordar a reforma da Capela do Cristo

O alcalde, Alejandro Lorenzo, e a concelleira de Patrimonio, Antía Carrera, mantiveron unha xuntanza con representantes da Diócese de Tui-Vigo para abordar a rehabilitación da capela do Cristo.

Na reunión, na que tamén estivo presente o párroco da parroquia Santa María do Porriño, Joaquín Estévez,  ambas institucións coincidiron na urxencia de acometer a restauración da capela. “É urxente rehabilitar a capela non só polo seu valor patrimonial e emocional para os porriñeses, senón tamén pola perigosidade que implica o estado no que se atopa dende hai case dous anos. O parque do Cristo é un lugar de moita afluencia na vila, especialmente a súa zona infantil, e tal e como está o edificio supón un risco”, afirmou o Alcalde, agradecendo a “disposición do obispado a axilizar o máximo posible a execución destas obras”.

Cabe lembrar que o edificio está danado dende o 16 de marzo de 2020, cando unha grúa pluma de grandes dimensións caíu sobre el destrozando a cuberta e parte do interior. A Diócese de Tui-Vigo, propietaria do recinto relixioso, presentou unha reclamación contra as seis empresas implicadas no sinistro e as súas respectivas aseguradoras que está pendente de resolver. Os representantes da diócese trasmitiron o seu compromiso de comezar as obras tan pronto o xulgado que instrúe a causa o autorice.

“Non podemos esperar a unha resolución xudicial para comezar a reforma, cando o estado supón un risco evidente para a nosa veciñanza. Algo que dende a Diócese Tui-Vigo comparten”, apuntou o rexedor, “Trasmitíronnos que tan pronto se aporte a pericial pendente, que estiman que sexa no vindeiro mes, solicitarase a autorización para iniciar as obras”.  Cabe destacar, que ambas entidades acordaron iniciar os trámites para axilizar os prazos administrativos unha vez conten coa autorización.

No encontro os representantes municipais expuxeron tamén outros temas de interese para o municipio que se tratarán polo miúdo en vindeiras xuntanzas. Concretamente,  a formalización dun convenio para realizar melloras  no local que utiliza a Asociación de Veciños O Castelo de Cans, propiedade da diócese, a reparación da cuberta da Igrexa de Santa María do Porriño e melloras na capela de Santa Leocadia, en Mosende.

07/04/2022 in Alcaldía

O outro test, ese do que ninguén fala pero que che pode salvar a vida

A Xunta Local da AECC no Porriño está a desenvolver a campaña de prevención do cancro colorrectal entre a poboación maior de 50 anos, con motivo do Día Mundial para a Prevención do Cáncro de Colon que se celebra cada 31 de marzo.

Baixo o lema “O outro test. Do que ninguén fala pero que pode salvar a vida”  preténdese concienciar sobre a importancia de realizarse unha sinxela proba en casa que pode identificar signos de lesións no colon e previr o alcance.

O alcalde, Alejandro Lorenzo, achegouse ao punto informativo instalado frente ao Concello para respaldar esta campaña e reiterar á presidenta, Chelo Conde, a súa disposición a colaborar en todas as iniciativas de sensibilización xa que, apostando pola prevención poden salvarse moitas vidas.

“Igual que nos familiarizamos co test da COVID-19 debemos facelo con outro tipos de probas, como o TSOH”, “Este tipo de cancro, o de maior incidencia no noso país, pode detectarse precozmente e incluso nalgúns casos evitarse. Por iso é vital que a cidadanía participe nos cribados que poden axudar a superar este tipo de tumor no 90% dos casos se se detecta a tempo”.

AECC O PORRIÑO
C/ Domingo Bueno, S/N, 36400 O Porriño (Centro Cívico)
Tlf: 986 33 95 03
01/04/2022 in Alcaldía, Sanidade

CONCERTO SOLIDARIO POR UCRANIA: COMBO DOMINICANO, AMÉRICA, ANTONIO BARROS E IALMA ESTE DOMINGO NO PORRIÑO!

O Porriño acollerá este domingo, día 3 de abril, o concerto solidario organizado polo Concello en beneficio do pobo ucraíno, que tanto está a sufrir pola invasión rusa.  

O evento, no que participarán altruístamente o Grupo América, o Combo Dominicano e os artistas, Antonio Barros e iAlma, foi presentado esta mañá no salón de plenos do Concello.

O alcalde, Alejandro Lorenzo, e os concelleiros Bienvenido Estévez e Antía Carrera, estiveron acompañados no acto de presentación por representantes das entidades colaboradoras do evento: o presidente da Entidade Urbanística de Conservación da Granxa, Indalecio Cuevas, o xerente, David Sobral, o artista local, Antonio Barros, e os representantes das empresas Go Music e Eventos Salpor, Miguel Díaz e Leonardo Fernández.  

O rexedor convidou a toda a veciñanza do Porriño e da contorna a asistir ao evento e contribuír a axudar ás persoas refuxiadas. “Síntome moi orgulloso de formar parte deste pobo”, asegurou Lorenzo, “En canto apelamos á súa colaboración os porriñeses e porriñesas, unha vez máis, deron exemplo de solidariedade e entrega. O fixeron cargando un trailer de axuda humanitaria e sei que o farán agora tamén”. Neste sentido o rexedor quixo extender o seu agradecemento “a todos aqueles veciños que de maneira totalmente desinteresada ofreceron as súas vivendas para acoller a persoas refuxiadas” . 

Cabe destacar que en total foron 20 as familias porriñesas que se ofreceron para acollida e cuxa disposición, xunto coas 20 prazas ofertadas polo Concello, se enviou ao Ministerio encargado de coordinar e xestionar a acollida de refuxiados.

Pola súa banda, o presidente dos empresarios, Indalecio Cuevas, animou a colaborar á cidadanía “e darlle un pouco de cor e música a esta situación que lamentablemente estamos a vivir e na que temos que ser enormemente solidarios”. Así, os empresarios abriron unha conta na que conseguiron recadar fondos que serán canalizados a través do Concello para axudar á poboación ucraína.

 

Tamén estiveron presentes na presentación Arturo López e Merchi Díaz, dous veciños do Porriño que acolleron xentilmente na súa casa a catro mozos ucraínos que abandoaron o seu país fuxindo da guerra. Os mozos, de entre 12 e 24 anos, pediron axuda para sair de Jarckov, a primeira cidade ucraína bombardeada, e esta familia porriñesa non dubidou en abrirlles as portas da súa casa. Un xesto de xenerosidade que o rexedor quixo agradecer públicamente “en nome de toda a veciñanza do Porriño, moitas grazas polo voso exemplo”.

Número de conta para axuda humanitaria

Os fondos obteranse coa “Fila 0”, na que todo aquel que queira disfrutar do concerto poderá facer a súa doazón. A tal fin, o concello habilitou un número de conta cuxa recadación se destinará íntegramente a axuda humanitaria e na que se poderán facer as súas achegas tanto particulares como empresas.

IBAN ES13 2080 5054 0831 1002 7980

31/03/2022 in Alcaldía, Cultura e festas

43 persoas comezan a traballar hoxe no Concello do Porriño

43 traballadores/as incorporáronse hoxe ao cadro de persoal do Concello do Porriño, onde desenvolverán as súas funcións a xornada completa durante seis meses.

A primeira hora da mañá, o alcalde, Alejandro Lorenzo, e os concelleiros Rosario Costas, Ramón Porto e Jose Carlos González, déronlle a benvida ao Concello na súa primeira xornada laboral.

“Agardo que estes meses de traballo sexan enriquecedores para todos vós, que vos sirvan para gañar experiencia, mellorar o voso perfil profesional e abrirvos novas oportunidades”, apuntou o alcalde. Lorenzo recordou que estas contratacións non só permiten incorporar ao mundo laboral a estas persoas que se atopaban en búsqueda activa de emprego, senón tamén prestar en condicións servizos que non se estaban a prestar de maneira axeitada nos últimos anos e impulsar novas iniciativas. “Co voso traballo contribuiredes a poñer en marcha de novo O Porriño”, concluíu o rexedor.

Para facer posible este reforzo de persoal o Concello fixo a maior aportación de fondos da súa historia, reafirmando o seu compromiso coa xeración de emprego. A contratación destas 43 persoas supuxo unha inversión total de 450.489 euros, dos que o Concello aportou 224.061 euros e os restantes proceden da liña 3 do Plan Concellos 2022 da Deputación de Pontevedra.

Os traballadores/as prestarán servizo nos diferentes departamentos municipais. No de Obras incorpóranse dous carpinteiros, un soldador, tres albaneis, un fontaneiro e un tractorista/condutor de grúa. No departamento de Parques e Xardíns traballarán doce peóns forestais, na área de Servizos Sociais un auxiliar administrativo, na Unidade Asistencial a Drogodependentes un auxiliar de enfermería e no de Cultura dous auxiliares administrativos.

Un técnico exercerá no departamento de Turismo e outro o fará no de Novas Tecnoloxías. Tamén se incorporan hoxe seis conserxes nas áreas de Deportes, Mercados, Persoal e Cultura e dous orientadores laborais que traballarán en Porremprego.

30/03/2022 in Alcaldía, Emprego e formación

O Concello pecha coa CMVMC de Torneiros a cesión dunha parcela para habilitar aparcamentos na Fase I

 O Concello do Porriño e a Comunidade de MontesVeciñais en Man Común de Torneiros asinaron hoxe o convenio de cesión que permitirá á administración local facer uso duns terreos situados frente á Fase I do polígono residencial de Torneiros.


Concretamente, trátase dunha parcela segregada de 914 m2, propiedade dos comuneiros, que o Concello do Porriño destinará a ampliación do viario e a habilitar novas prazas de aparcamento na zona.


O acordo asinado hoxe transmite a propiedade e a posesión do terreo á administración local e lexitima ao Concello á ocupación do solar e a realizar no mesmo as obras oportunas.


“Trátase dun acordo que levaba tempo negociándose e que permitirá reordenar o tráfico nesa zona e habilitar algunhas prazas de aparcamento para a veciñanza da Fase I, que carece de zonas onde estacionar preto das súas vivendas”, explicou o rexedor, Alejandro Lorenzo, quen agradeceu á CMVC de Torneiros “a súa disposición a chegar a acordos en beneficio dos veciños da súa parroquia”.

25/03/2022 in Alcaldía, Urbanismo, comercio e industria