Alcaldía

Cestería con alma: Julia de la Cal conquista a artesanía galega

O alcalde, Alejandro Lorenzo, e o concelleiro de Cultura, Bienvenido Estévez, recibiron na Casa do Concello a Julia de la Cal, a destacada artesá e deseñadora porriñesa especializada en cestería, quen foi galardoada co prestixioso Premio de Artesanía de Galicia 2024. Este premio, dotado con 9.000 euros, recoñece a súa obra “PERIFERIA #01”.

Julia, quen ten o seu estudo-obradoiro La Parabólica no barrio de San Sebastián, dedicou a súa vida á cestería, unha paixón que descubriu durante a súa formación na Escola Massana de Barcelona, tras estudar Ilustración na Coruña. Desde o seu regreso ao Porriño en 2015, traballou incansablemente, obtendo a Carta de Artesá de Galicia e acumulando unha serie de recoñecementos, entre eles a Bolsa Eloy Xesto de Artesanía de Galicia en 2021, que lle permitiu formarse en técnicas tradicionais de cestería en Francia. Ademais, foi finalista nos Premios Nacionais de Artesanía en 2023 na categoría de Emprendemento.

O seu traballo caracterízase polo uso de vimbia que ela mesma cultiva, creando pezas únicas. Julia destaca polo seu enfoque na sustentabilidade, utilizando vimbia viva para tecer estructuras que reflicten o seu compromiso co medio ambiente.

16/12/2024 in Alcaldía, Cultura e festas

Programa de incentivos á contratación para promover a inserción dos participantes no obradoiro de emprego

O Concello do Porriño puxo en marcha un novo programa de axudas a través de incentivos á contatación temporal, co obxectivo de facilitar a inserción laboral do alumnado-traballador do Obradoiro Dual de Emprego “Porremprego Cualifica II”. Esta iniciativa, financiada pola Dirección Xeral de Formación para o Emprego e a Orientación da Consellería de Promoción do Emprego e Igualdade , busca fomentar a empregabilidade e ocupabilidade dos participantes no obradoiro.

Poderán beneficiarse destas axudas todas as entidades empregadoras, incluídas as persoas autónomas, sociedades civís ou comunidades de bens, cuxa actividade estea relacionada coa formación impartida no obradoiro. En particular, en ocupacións relacionadas cos certificados de profesionalidade de Hostalería: Operacións Básicas de Cociña e Cociña, así como cos certificados de profesionalidade de  Novas tecnoloxías e Economía Dixital : de Operacións de Grabación  e Tratamento de Datos e Documentos e de Actividades Administrativas na Relación co Cliente.

A contratación temporal terá unha duración mínima de 3 meses, e deberá comezar nos días seguintes á finalización do prazo da presentación da  documentación obrigatoria por parte das empresas interesadas no Concello do Porriño. Con tal motivo o prazo para facer as solicitudes está aberto  dende o 9 de decembro 2024 ata o xoves 2 de xaneiro de 2025 para a presentación da documentación obrigatoria según as bases que que figuran na Sede Electrónica de do Porriño: https://oporrino.sedelectronica.gal .

Para máis información poden contactar co teléfono 691 35 37 45

É importante destacar que non poderán acceder a estas axudas as administracións públicas nin entidades vinculadas a elas.

O principal obxectivo deste programa é facilitar a contratación dos participantes no obradoiro dual, garantindo unha duración mínima de 3 meses e unha xornada laboral a tempo completo.  A contía total destinada a estas axudas ascende a 30.000 euros, cunha subvención fixa de 1.500 euros por cada traballador/a contratado/a , ata un máximo de 20 traballadores. 

13/12/2024 in Alcaldía, Emprego e formación

Charla informativa sobre a limpeza de fincas

O Concello do Porriño en colaboración co Servizo Agrario Galego organiza unha charla informativa sobre a limpeza de fincas situadas na franxa secundaria, arredor de vivendas ou núcleos de poboación, para a prevención de incendios forestais. Será o 17 de decembro, ás 17 h, no Centro Cultural Municipal e participará personal técnico e directivo da sociedade autonómica.

O Seaga inspeccionou máis de 10.000 parcelas no municipio, detectando que aproximadamente o 50% deben someterse a unha limpeza total ou parcial.

As notificacións comezarán a chegar aos propietarios nas próximas semanas, dándolles un prazo de 15 días naturais para cumprir coas súas obrigas de xestión da biomasa. No aviso advírtese de que o incumprimento pode conlevar multas reiteradas cada 3 meses por unha contía de 900 euros por hectárea, ou o proporcional no caso de ser unha parcela de menor superficie. Tamén a execución subsidiaria por parte do Concello co correspondente cargo de gasto ao propietario.

12/12/2024 in Alcaldía

O Porriño presenta o seu V Plan de Igualdade

Nun acto celebrado no Concello, o alcalde Alejandro Lorenzo e a concelleira de Igualdade, Carolina González, presentaron o V Plan de Igualdade de Oportunidades entre mulleres e homes, un documento que marca un fito no compromiso do Concello coa igualdade de xénero e o cambio social.

“Hoxe damos un paso importante cara ao futuro”, afirmou o alcalde, quen destacou que este plan non só inclúe unha serie de medidas concretas, senón que tamén reflicte o firme compromiso do Concello coa igualdade de xénero. “No Porriño, a igualdade non é só un obxectivo, é unha realidade á que aspiramos todos os días”, engadiu.

O V Plan de Igualdade, que se implementará entre 2025 e 2028, ten como obxectivo garantir que todas as veciñas e veciños do Concello teñan as mesmas oportunidades, dereitos e liberdades, sen distinción de xénero. Con 10.446 mulleres fronte a 10.116 homes na poboación, o alcalde subliñou a importancia de que “esta equidade se reflicta nas políticas e decisións que tomamos”.

Entre os obxectivos do plan atópanse promover a igualdade real e efectiva, facilitar a conciliación da vida laboral, persoal e familiar, e erradicar a violencia machista, unha das maiores secuelas da sociedade actual. “Cada unha das 50 medidas que propoñemos está deseñada para transformar a sociedade de maneira real”, explicou Lorenzo.

Cabe destacar que o documento ten un forte enfoque educativo, recoñecendo que a clave para o cambio radica nas novas xeracións. “Debemos educar sen roles nin estereotipos de xénero para construír unha sociedade libre de violencia, onde todos e todas podamos vivir sen medo e con liberdade”, afirmou o rexedor.

A concelleira de Igualdade, Carolina González, explicou o documento polo miúdo  agradeceu a todos os que traballaron na elaboración do plan, destacando o labor da responsable do CIM do Porriño. “Non só falamos de medidas concretas, senón dunha folla de ruta que sitúa á igualdade no centro das políticas municipais.  Este plan é un gran paso cara a unha sociedade igualitaria, inclusiva e libre de violencia”, concluíu.

O alcalde pechou o acto reafirmando o compromiso do Concello: “O cambio é posible se estamos unidos na loita pola igualdade. Estamos aquí como administración máis próxima para lideralo”.

11/12/2024 in Alcaldía, Igualdade

Aberto o prazo para inscribirse na Cabalgata de Reis 2024

O Concello do Porriño, a través da Concellería de Festexos e Cultura, abre o prazo para que as ANPAS dos centros educativos e as asociacións culturais do municipio poidan inscribirse na tradicional Cabalgata de Reis, que terá lugar o próximo domingo 5 de xaneiro de 2025.

A Cabalgata de Reis, un dos eventos máis esperados das festas de Nadal no Porriño, contará con tres carrozas reais acompañadas de dúas de paquetaría e do tren do Nadal, que percorrerán as rúas da vila para levar a ilusión a nenos e maiores. Este ano, as ANPAS e asociacións culturais poderán optar a premios en función do número de participantes que leven á cabalgata.

Requisitos e bases da convocatoria

As ANPAS e asociacións culturais do Concello do Porriño que desexen participar deben contar cun mínimo de seis compoñentes (entre nenos e adultos) e un máximo de 16, con 8 nenos e 8 adultos por grupo. A inscrición estará aberta ata o 20 de decembro de 2024, sendo imprescindible presentar a documentación establecida, que inclúe a fotocopia do CIF da ANPA ou asociación, unha declaración responsable de non ter débedas tributarias nin coa Seguridade Social, así como o certificado orixinal da conta bancaria da entidade.

A inscrición poderán realizarse de forma telemática a través da sede electrónica do Concello.  O número total de prazas está limitado a 76, polo tanto, as ANPAS e asociacións culturais interesadas deben formalizar a súa inscrición o antes posible para garantir a súa participación.

Premios e recompensas

O Concello do Porriño destina un total de 3000 euros en premios para as ANPAS e asociacións culturais que participen na Cabalgata de Reis. Os premios serán os seguintes:

  • 300 euros para ANPAS ou asociacións culturais con entre 6 e 10 participantes.
  • 450 euros para ANPAS ou asociacións culturais con entre 11 e 16 participantes.

DESCARGA AS BASES NA SEGUINTE LIGAZÓN:

Incricións para o concurso con premios ás ANPAS dos centros educativos e ás asociacións culturais do Concello do Porriño participantes na cabalgata de reis de 2025
11/12/2024 in Alcaldía, Cultura e festas

400 escolares aprenden a alimentarse de maneira saudable nos colexios

O Concello do Porriño segue apostando pola promoción de hábitos de vida saUdable entre a cativada e a mocidade con múltiples iniciativas centradas na educación. No marco do Plan de Saúde Local a concellería de Sanidade e a OMIX, en colaboración co SERGAS, impulsa un ano máis o programa de “Nutrición na Escola” no que participan 400 escolares de 3º de Educación Primaria e 2ª da ESO. 

O obxectivo desta actividade é promover unha alimentación saudable e tamén a actividade física na infancia e adolescencia; así como reducir o sobrepeso e a obesidad nesta poboación.   Os nenos e nenas que participan aprenden a elixir os alimentos correctamente e nas cantidades adecuadas, favorecendo deste modo o autocontrol da alimentación.

“Promover unha alimentación saudable durante a infancia e os primeiros anos da adolescencia é un aspecto clave para asegurar un correcto crecemento e desenvolvemento de nenos e nenas”, explicou a concelleira, Teresa Veloso.  Ademais, “trátase dunhas etapas moi importantes na adquisición de hábitos alimentarios, polo que é primordial darlle a importancia que merece a alimentación na etapa escolar e desde o Concello non queremos quedar ao marxe”

11/12/2024 in Alcaldía, Educación e tecnoloxía, Sanidade

Mercado de Nadal da AECC do Porriño

A Asociación Española Contra o Cancro (AECC) do Porriño inaugurou xa o seu tradicional Mercado de Nadal, unha iniciativa solidaria cuxo obxectivo é recadar fondos para apoiar ás familias afectadas polo cancro. Este evento conta coa colaboración do Concello de Porriño e os comercios locais, e estará aberto ao público ata o próximo 30 de decembro, no número 68 da rúa Ramón González, en horario de 10:00 a 13:00 horas e de 17:00 a 20:00 horas.

O Mercado de Nadal ofrece unha ampla variedade de produtos artesanais elaborados polas voluntarias da AECC, así como artigos doados xenerosamente polos comercios da vila. Todo o recadado será destinado á loita contra o cancro, apoiando a aqueles que se enfrontan á enfermidade e aos seus familiares, quen a miúdo atravesan momentos difíciles durante o tratamento.

Mari Palacín, presidenta da AECC do Porriño, destacou a importancia deste tipo de iniciativas: “Desde a AECC de Porriño, queremos achegar o noso gran de area para os enfermos e familiares desta terrible enfermidade. Facémolo con todo o noso agarimo e estamos encantados de recibirvos no noso Mercado de Nadal. Cada pequeno xesto conta e este mercado é unha forma de ofrecer esperanza e apoio a quen máis o necesita.”

Pola súa banda, o alcalde do Porriño, Alejandro Lorenzo, expresou o seu apoio á AECC e ás súas iniciativas:  “Este Mercado de Nadal é un exemplo claro do que significa a solidariedade no Porriño. Estamos moi orgullosos de poder colaborar e constatar que unión dos comercios locais, as voluntarias e as institucións é fundamental para que podamos seguir loitando xuntos contra esta enfermidade e ofrecer o apoio que necesitan os afectados.”

11/12/2024 in Alcaldía, Política Social, Sanidade

Obradoiro infantil de galletas: este Nadal será máis doce que nunca!

A maxia do Nadal xa se sinte en cada recuncho do Porriño con propostas para pequenos e maiores. Dentro da programación preparada polo Concello para estas festas atópase o Obradoiro infantil de galletas que fará as delicias da cativada. 

Dirixido a nenos e nenas de entre 5 e 12 anos, o obradoiro desenvolverase na zona infantil da Praza de Abastos Municipal en varias datas: os días 23, 26 e 30 de decembro e o 2 e 3 de xaneiro. Os máis pequenos terán a oportunidade de elaborar as súas propias galletas, decoralas e, por suposto, saborealas!

As quendas levaranse a cabo de 11 a 12:30 h, e organizaranse en grupos de 12 nenos ou nenas, asegurando así unha atención persoalizada e un ambiente divertido. Esta actividade impulsouse de novo tras o éxito de edicións anteriores, nas que os pequenos convertíronse en auténticos chefs reposteiros. 

Para participar, os interesados deben enviar un correo a rexistro@oporrino.org co nome do neno ou nena e os datos do titor ou titora. Desde o Concello do Porriño convidan a cativada a vivir unha experiencia inesquecible chea de creatividade, amigos e deliciosas galletas para compartir.  

10/12/2024 in Alcaldía, Cultura e festas, Urbanismo, comercio e industria

Traballo en equipo para mellorar a calidade educativa no Porriño

O Concello do Porriño deu o pistoletazo de saída a unha nova e prometedora iniciativa: os “Almorzos Pedagóxicos”, reunións trimestrais entre a administración local e os/as directores/as dos centros educativos do municipio.

A proposta nace coa intención de manter unha canle constante de diálogo e colaboración, onde as necesidades e desafíos do sector educativo poidan ser abordados de maneira conxunta. En cada un destes encontros, trataranse temas relevantes, desde a xestión de recursos ata as boas prácticas e as ideas innovadoras que poidan enriquecer a calidade educativa no Porriño.

O alcalde, Alejandro Lorenzo, destacou a importancia deste novo formato de encontros, que, segundo el, non só axudan a identificar as necesidades dos centros, senón que tamén reforzan a alianza entre a administración local e os equipos educativos. “Gústanos que as cousas non queden en papeis ou reunións formais. Queremos traballar de maneira práctica, que o diálogo sexa real, directo e con resultados. Estes almorzos son unha excelente oportunidade para compartir ideas, mellorar o día a día dos nosos colexios e institutos e, sobre todo, apoiar aos nosos docentes e alumnos”, declarou o rexedor.

Os “Almorzos Pedagóxicos” celebraranse de maneira trimestral, e xa se expuxeron novos temas de interese para o seguinte encontro, entre os que se atopa a creación dun club escolar de lectura do que participen todos os centros. “A idea é que cada reunión sexa unha ocasión para aliñar as políticas locais coas necesidades educativas reais e así garantir que os centros conten co respaldo necesario en forma de recursos, apoio institucional e colaboración”, concluíu o alcalde. 

10/12/2024 in Alcaldía, Educación e tecnoloxía

O Porriño clausura o Obradoiro de Emprego Porremprego Cualifica II

Hoxe tivo lugar clausura do obradoiro de emprego “Porremprego Cualifica II”, un programa de formación dual impulsado polo Concello do Porriño en colaboración coa Xunta de Galicia. A iniciativa permitiu a 20 persoas desempregadas formarse en dúas áreas de alta demanda, relacionadas coa cociña e coa comunicación e economía dixital.

Os participantes recibiron os seus diplomas acreditativos da man do alcalde do Porriño, Alejandro Lorenzo; a directora xeral de Formación e Colocación da Xunta de Galicia, Zeltia Lado; a concelleira de Emprego e Formación, Rosario Costas; e a directora do obradoiro, Ángela Vizoso.

O obradoiro, que tivo unha duración dun ano, permitiu aos alumnos adquirir formación en dúas especialidades de gran relevancia no mercado laboral: Restauración e Tecnoloxías da Xestión da Información e a Comunicación.

Na área de cociña, os participantes levaron a cabo diferentes actividades, como o servizo de comedor social dirixido a colectivos máis desfavorecidos, a preparación de almorzos saudables para os colexios e a organización de xornadas temáticas gastronómicas de portas abertas, entre outros. Pola súa banda, os alumnos de tecnoloxías da información e da comunicación traballaron na modernización dos procesos administrativos do Concello, dixitalizando o arquivo municipal, coa notable tarefa de procesar un total de 2.000 expedientes.

O programa “Porremprego Cualifica II” contou cun orzamento próximo aos 600.000 euros. Concello e Xunta puxeron en marcha xa a edición 2024-2025, o obradoiro “O Porriño Humaniza” que se centrará, con outra vintena de participantes, na construción. En concreto, en operacións auxiliares de revestimentos continuos, pintura decorativa, operacións auxiliares de acabado rígidos e urbanización, operacións de formigón, pavimentos e albañilería de urbanización cun orzamento de máis de 450.000 euros.

10/12/2024 in Alcaldía, Emprego e formación