Alcaldía

Sergio Rodríguez parte do Porriño con moita forza para disputar o Campionato de Europa Máster en Polonia

  • O atleta, que foi recibido polo alcalde, Alejandro Lorenzo, vén de conseguir dous ouros no Campionato de España Máster 35 de Pista Cuberta.

Porriño 17 de marzo de 2026.– O alcalde do Porriño, Alejandro Lorenzo, vén de recibir ao deportista Sergio Rodríguez, que vén de acadar dúas medallas de ouro no Campionato de España Máster 35 de Pista Cuberta nas probas de 200 e 400 metros, logrando ademais o récord dos campionatos en ambas probas, ademais da terceira mellor marca española da historia da categoría na proba de 200 m en pista cuberta.

“O motivo desta visita, ademais de felicitalo por estes logros, é desexarlle sorte para Polonia”, explica o rexedor, xa que Sergio- que chegou á casa consistorial cos dous ouros acadados en Antequera- ten agora o reto do Campionato de Europa Master que se celebrará durante a Semana Santa, entre o 28 de marzo e o 2 de abril. Será na cidade de Toruń, que xa acolleu esta mesma proba hai dous anos.

Rodríguez, que aínda que naceu na Guarda leva afincado dende hai anos no Porriño, ten no seu haber xa 19 títulos de campión galego absoluto, así como 41 medallas galegas absolutas, con dous récords absolutos, tanto en 4×100 como en 200 metros. No mes de outubro trouxo ao Porriño xa o subcampionato de Europa Máster 35. Ten conseguido baixar da barreira dos 11” nos 100 metros e facer 21”45 nos 200 metros, o que supón a terceira mellor marca galega absoluta de todos os tempos. Saltou máis dos 7 metros en salto de lonxitude.

“Sergio é un exemplo no mundo do deporte e estou seguro de que acadará grandes logros tamén no europeo. Estamos orgullosos de que leve o nome do Porriño alí onde vai”.

17/03/2026 in Alcaldía, Deportes

O Porriño pecha 2025 co maior superavit da historia: 7,46 millóns, con 11,5 millóns de remanente e sen facturas pendentes

  • O documento de liquidación orzamentaria ratifica a solvencia do Concello, que reduce o pago a provedores de 501 días en 2021 a un mínimo histórico de 38 días e elimina por completo as facturas sen aplicación orzamentaria.

Porriño 16 de marzo de 2026.– O Concello do Porriño presentou hoxe os datos oficiais da liquidación do orzamento do exercicio 2025, unhas cifras que o alcalde, Alejandro Lorenzo, definiu como “as contas máis saneadas e co maior superávit da súa historia”, destacando que con elas “cumprimos co compromiso que asumimos ao comezo deste mandato cos porriñeses e as porriñesas. Así, segundo o informe de Intervención que o rexedor fixo público, a administración local pechou o ano cun resultado orzamentario axustado positivo de 7.464.037,45 €, o que supón o maior superávit rexistrado na historia do municipio.

Xunto a este fito, o remanente de tesourería para gastos xerais situouse en 11.200.917,91 €, unha cifra que foi medrando de forma constante desde os 4,5 millóns que se rexistraban en 2021, ascendendo coa xestión do actual goberno municipal, a 9,5  no 2022; 10,8 no 2023; 10,6 no 2024 e esa cifra histórica de 11,2 no 2025. Este músculo financeiro compleméntase cunha xestión de pagamentos de máxima eficiencia: o período medio de pago a provedores  caeu ata os 38 días, moi lonxe dos máis de 500 días de demora de hai catro anos.

O alcalde do Porriño, Alejandro Lorenzo, valorou estes resultados como o cumprimento dunha promesa fundamental coa cidadanía, lembrando a débeda que se atopou o chegar ao concello: “facturas acumuladas durante anos e mesmo gastos que non se correspondían cos prezos de mercado nin tiñan a validez que deberían ter”. Así, o concello do Porriño, lembrou, conseguira un fito histórico xa no ano 2025: deixar a cero todas esas facturas pendentes de exercicios anteriores. “Foi un paso fundamental para ordenar a situación económica do Concello. Pero hoxe podemos dicir algo máis importante aínda. Logo de anos de traballo, de xestión responsable, eficiente e rigorosa, o Porriño pecha o exercicio cun superávit de 7,46 millóns de euros e cun remanente de 11,2 millóns de euros”, recalcando que “é o maior superávit da historia do noso concello.”

Amortización de débeda

A excelente situación de liquidez permitirá ao Goberno local facer fronte a obrigas herdadas sen comprometer a estabilidade futura. O alcalde destacou que este superávit permitirá amortizar o crédito das facturas pendentes do anterior goberno, que ascende a 2,7 millóns de euros, ademais de devolver outros 2,7 millóns cuxa veracidade non puido ser acreditada. “todo gracias a esta boa xestión”.

O municipio cos impostos máis baixos

“Hoxe O Porriño é un exemplo de que se pode xestionar con rigor mantendo unha presión fiscal contida”, apuntou Lourenzo, quen destacou que o municipio conta cos impostos máis baixos de toda Galicia e que esa seguirá sendo a referencia do goberno local. “É algo do que tamén podemos presumir: O Porriño é o concello cos impostos máis baixos de Galicia. Esa segue sendo a nosa aposta: manter unhas contas saneadas, con superávit, e unha presión fiscal moderada para as familias e as empresas, porque estamos convencidos de que esa é a mellor maneira de seguir facendo avanzar O Porriño”.

A liquidación tamén reflicte que a débeda viva a longo prazo reduciuse ata os 2,7 millóns de euros, mentres que a débeda a curto prazo mantense en cero, consolidando ao Porriño como un referente de estabilidade financeira na provincia.

CIFRAS CLAVE DO DOCUMENTO

Remanente de Tesourería

O Remanente de Tesourería para Gastos Xerais axustado sitúase en 11.200.917,91 euros no exercicio 2025, fronte aos 4.498.268,75 euros de 2021, tras unha evolución condicionada polo proceso de regularización das obrigas pendentes e pola aplicación do mecanismo de financiamento anteriormente mencionado. O resultado obtido en 2025 constitúe o valor máis elevado da serie da historia, reflectindo a consolidación da situación financeira tras o proceso de regularización contable desenvolvido nos exercicios anteriores.

Evolución:

2022: 9,5 millóns €

2023: 10,8 millóns €

2024: 10,6 millóns €

2025: 11,2 millóns €

Débeda  a longo prazo

En relación coa débeda a longo prazo, obsérvase un incremento nos exercicios 2022 e 2023, pasando de inexistente en 2021 a 769.365,71 euros en 2022 e 2.978.803,75 euros en 2023. Este incremento deriva da concertación dos préstamos ICO correspondentes ao mecanismo estatal de pago a provedores, de aplicación obrigatoria para o Concello do Porriño debido ao volume de obrigas pendentes de aplicar ao orzamento existente nese momento, asociadas principalmente a gastos correspondentes a exercicios anteriores ao 2021, pendentes de imputación orzamentaria.

Período de pago a provedores

Respecto ao período medio de pago a provedores, obsérvase unha evolución moi favorable ao longo do período analizado. Desde valores moi elevados nos exercicios 2021 e 2022 (501,13 e 456,89 días respectivamente), prodúcese unha redución moi significativa a partir de 2023 (42,81 días), manténdose en niveis claramente inferiores nos exercicios seguintes (63,72 días en 2024 e 37,95 días en 2025, o valor máis baixo da serie analizada), situándose xa en niveis próximos aos prazos establecidos pola normativa de morosidade.

Sen obrigas pendentes

Polo que se refire ás obrigas pendentes de aplicar ao orzamento (conta 413), prodúcese unha redución progresiva ao longo do período analizado, pasando de 5.496.979,19 euros en 2021 a 0,00 euros no exercicio 2025, no que queda definitivamente cancelado o saldo desta conta. Esta evolución está vinculada, en gran medida, á aplicación do mecanismo de pago a provedores e ás actuacións de regularización e depuración contable realizadas nos exercicios posteriores.

Un Concello cos impostos máis baixos de Galicia, apostando pola xente e polas empresas, sen aumentar a presión fiscal.

Ese é o noso modelo: un Concello que xestiona con responsabilidade para poder investir máis onde realmente importa, por iso aprobar un novo orzamento que incremente o gasto social, que nos permita eliminar definitivamente préstamos de pagamentos de exercicios anteriores e que reforzará tamén as subvencións para melloras nas parroquias e no casco urbano.

Pero, sobre todo, será un orzamento pensado para o futuro: con plans e investimentos que impulsen a xeración de emprego e o desenvolvemento económico do Porriño.

Porque a nosa prioridade é clara: contas saneadas, máis investimento na xente e máis oportunidades para vivir, traballar e emprender no Porriño.

16/03/2026 in Alcaldía

Aviso de suspensión temporal do subministro de auga

O Porriño, 16 de marzo de 2026.- O Concello do Porriño informa á veciñanza dunha suspensión temporal do subministro de auga debido á realización de traballos de mantemento na rede.

  • Data: 16 de marzo de 2026
  • Hora de inicio: 09:30 h
  • Hora prevista de finalización: 12:30 h

Zonas afectadas:

  • Rúa Pinar
  • Rúa Cruceiro
  • Antonio Palacios

Dende o Concello do Porriño pedimos desculpas polas molestias ocasionadas e agradecemos a comprensión da veciñanza.

16/03/2026 in Alcaldía, Benestar, Parroquias, Vías e obras

O Porriño acolle a presentación da biografía do empresario José Fernández López

  • A obra, galardoada co XXI Premio LID de Biografía Empresarial, reconstrúe a traxectoria dun empresario discreto pero decisivo, cuxa pegada segue presente décadas despois.

Porriño 13 de marzo de 2026.- A sala de Comunicacións do Concello do Porriño acolleu este venres a presentación do libro “José Fernández López. Un empresario sin miedo al riesgo”, da xornalista Marisa Gallero, unha biografía que recupera a traxectoria dun dos empresarios galegos máis influentes do século XX.

No acto participaron a propia autora; José María Fernández Sousa-Faro, fillo do biografiado; e o xornalista Bieito Rubido, director de El Debate. Ao encontro asistiron tamén representantes de empresas vinculadas á traxectoria empresarial de Fernández López, así como veciños e persoas interesadas na historia económica e empresarial de Galicia.

A obra percorre a vida dun empresario que destacou pola súa capacidade emprendedora e pola súa aposta pola innovación e polo desenvolvemento industrial. Fernández López estivo detrás de iniciativas que marcaron a evolución da industria española, participando na creación e impulso de compañías como Zeltia, Transfesa ou Pescanova, entre outras.

A obra, galardoada co XXI Premio LID de Biografía Empresarial, reconstrúe a traxectoria dun empresario discreto pero decisivo, cuxa pegada segue presente décadas despois.

Durante o acto, Bieito Rubido mantivo unha conversa coa autora na que repasaron os principais episodios da vida e da carreira empresarial de Fernández López, así como o contexto histórico no que desenvolveu os seus proxectos.

A clausura correu a cargo do alcalde do Porriño, Alejandro Lorenzo, quen destacou o papel do empresario no desenvolvemento industrial de Galicia e a súa ligazón coa vila.

“José Fernández López foi un exemplo de visión empresarial e de capacidade para asumir riscos. A súa traxectoria demostra que desde Galicia tamén se poden impulsar proxectos que transforman a economía”, sinalou.

O rexedor puxo en valor a importancia de lembrar figuras que contribuíron ao progreso económico e social e destacou que obras como esta permiten achegar ao público a historia de empresarios que deixaron unha fonda pegada no desenvolvemento industrial da nosa comunidade.

13/03/2026 in Alcaldía, Cultura e festas, Industria, Patrimonio Municipal

O Porriño únese aos grandes eventos do Prexacobeo co nacemento do “Petra Rosa Festival”

  • “Estamos ante un festival que será un fito para O Porriño e tamén para Galicia”, asegura o alcalde, Alejandro Lorenzo.

Porriño, 25 de febreiro de 2026.– O Concello do Porriño acolleu hoxe a presentación de “Petra Rosa Festival”, un novo evento do ano prexacobeo que busca consolidar o municipio como un dos grandes epicentros musicais de Galicia. O festival converterá as canteiras da vila nun escenario natural único durante catro días consecutivos, do 25 ao 28 de xuño.

O cartel reunirá algúns dos nomes máis destacados da música estatal, encabezados pola festa internacional Bresh, que abrirá a programación o 25 de xuño, e completado por artistas de referencia como Pablo López (26 de xuño), Antonio Orozco (27 de xuño) e Sergio Dalma (28 de xuño). Xunto a eles, o festival contará tamén con artistas locais, unha aposta que o alcalde, Alejandro Lorenzo, destacou como “fundamental para impulsar o talento emerxente que temos no noso pobo”.

Os grandes reclamos da programación —Bresh, Pablo López, Antonio Orozco e Sergio Dalma— configuran unha das propostas máis potentes deste verán en Galicia, combinando figuras de enorme proxección con artistas da comarca da Louriña.

O espazo elixido, unha canteira de O Porriño, constitúe un dos elementos máis diferenciadores da proposta, ao integraren o símbolo máis recoñecido da localidade: o granito rosa. Neste sentido, o alcalde destacou que “somos un pobo cuxa referencia é a pedra e a industria, e un evento como este axudará a promocionar a nosa identidade”.

Lorenzo agradeceu a aposta dos organizadores e o apoio da Xunta de Galicia e da Deputación de Pontevedra para facer realidade esta primeira edición. “Estamos ante un festival que será un fito para O Porriño e tamén para Galicia”, engadiu.

Durante a presentación, o director de Turismo de Galicia, Xosé Merelles, subliñou que o festival “nace nun momento estratéxico, nun contexto no que os eventos musicais se consolidan como ferramentas clave para a dinamización económica e turística”. Ademais, destacou que “é a primeira vez que un escenario natural destas características acolle un festival no marco dos Concertos do Xacobeo”.

Pola súa parte, o promotor José Antonio Torrano explicou que o obxectivo é ofrecer “unha experiencia completa, reforzando os concertos cunha ampla oferta gastronómica e con festas pre e post concerto con artistas locais”.

Entradas

A cita apunta xa ao éxito incluso antes do seu inicio: só o concerto de Antonio Orozco leva vendidas preto de 1.000 entradas desde o anuncio da súa participación.

As entradas para o resto da programación poranse á venda este venres ás 14:00 horas a través da web oficial: www.petrarosafestival.com

As persoas empadroadas no Porriño poderán acceder a un desconto do 20% durante os dez primeiros días de venda.

O festival está organizado polas promotoras Emotional Events e Elemental Events, coa colaboración do Concello do Porriño e o apoio da Xunta de Galicia e da Deputación de Pontevedra.

26/02/2026 in Alcaldía, Cultura e festas

O Porriño rende unha homenaxe a Santiago Gómara

  • O alcalde Alejandro Lorenzo referiuse a él como un gran xestor e un home preclaro na necesidade de impulsar a industria porriñesa e comprender o asociacionismo empresarial

Porriño 24 de febreiro de 2026.- O Porriño rendeulle este martes unha homenaxe institucional a Santiago Gómara, unha das figuras empresariais máis destacadas da historia industrial do municipio, coincidindo coa súa despedida profesional tras corenta anos de traxectoria á fronte da planta de Pescanova no Porriño.

O alcalde, Alejandro Lorenzo, destacou durante o acto o papel fundamental que Gómara desempeñou tanto no crecemento e modernización da factoría —entón Frinova S.A.— como na consolidación do Porriño como epicentro industrial da provincia. “Porriño e os seus empresarios tivemos a sorte de contar con Santiago Gómara, un gran xestor e un home preclaro na necesidade de impulsar a industria porriñesa e de comprender que o asociacionismo é fundamental”, afirmou o rexedor.

Licenciado en Ciencias Químicas pola Universidad de Zaragoza, Gómara incorporouse ao grupo Pescanova en 1978 e asumiu a dirección da planta do Porriño en 1984, cargo que ocupou ata 2024. Ao longo destas catro décadas foi unha peza clave na modernización das instalacións e nun modelo de xestión que converteu o centro nunha referencia do sector alimentario.

O seu compromiso co desenvolvemento industrial local quedou patente tamén no eido asociativo. En 1985 participou, en representación de Frinova, na creación da Asociación de Empresarios de As Gándaras, entidade clave para a defensa dos intereses empresariais do polígono de As Gándaras. Entre 2002 e 2024 ocupou a presidencia da asociación, coincidindo cunha etapa de crecemento na que Frinova pasou a integrarse como centro industrial de Nueva Pescanova, fortalecendo a súa posición estratéxica dentro do grupo.

A súa traxectoria excedeu o ámbito municipal. Foi presidente da Federación Galega de Parques Empresariais en dúas etapas (2004-2008 e 2010-2025) e vogal do comité directivo da Confederación de Empresarios de Pontevedra entre 2003 e 2015, contribuíndo á mellora da competitividade dos espazos industriais galegos e á coordinación entre empresas e administracións.

O Concello subliñou que a súa carreira profesional está marcada polo liderado, a visión estratéxica e unha aposta firme pola cooperación empresarial como motor de desenvolvemento económico. A súa contribución foi decisiva para a dinamización do polígono de As Gándaras e para consolidar o Porriño como un dos principais núcleos industriais da provincia.

Coa súa xubilación, péchase unha etapa de profunda dedicación ao tecido produtivo local e autonómico, deixando como legado unha industria máis forte, innovadora e preparada para afrontar os retos de futuro. O Concello expresou o seu agradecemento e recoñecemento a unha figura esencial na historia recente do municipio.

25/02/2026 in Alcaldía, Industria

O Concello do Porriño recibe a Toni Fernández tras acadar dúas medallas de ouro en París co seu mel

  • O apicultor recibe o recoñecemento municipal tras ser premiado no Paris International Honey Awards pola calidade e o deseño do seu produto

O Porriño, 27 de xaneiro de 2026.- O Concello do Porriño recibiu esta mañá a Toni Fernández, creador da marca galega Puramel Sacra, tras acadar recentemente dúas medallas de ouro no prestixioso certame Paris International Honey Awards, celebrado na capital francesa. Os galardóns foron outorgados á calidade da mel e ao deseño e presentación do produto, sumándose á medalla de ouro conseguida na edición anterior do concurso.

Durante o encontro, o alcalde Alejandro Lorenzo felicitou persoalmente a Toni Fernández e destacou que “estes recoñecementos internacionais amosan que a tradición apícola galega, combinada coa innovación e a calidade, pode competir ao máis alto nivel”. Engadiu que “Puramel Sacra é un exemplo de como o traballo do rural galego proxecta Galicia fóra das súas fronteiras”.

Puramel Sacra foi creada hai tres anos, aínda que a familia Fernández acumula catro xeracións dedicadas á apicultura. O proxecto nace en O Saviñao como homenaxe á avoa de Toni, Pura, e céntrase na produción de mel monofloral de castiñeiro da Ribeira Sacra, cun coidado especial tanto no proceso produtivo como no deseño e presentación, aspectos que foron recoñecidos internacionalmente.

Pola súa banda, Toni Fernández agradeceu o recoñecemento do Concello do Porriño e sinalou que “estas medallas supoñen unha enorme satisfacción persoal e profesional, porque detrás hai anos de traballo, formación e tradición familiar”. Engadiu que “intentar distanciarse da imaxe tradicional que temos todos do mel é clave para que o noso chegue un pouco máis alá e sexa máis apetecible á vista. Estes premios axúdanos a poñer en valor o que se produce en Galicia”.

Desde o Concello do Porriño, reiterouse a importancia de apoiar proxectos emprendedores ligados ao rural e á produción artesanal de calidade, que contribúen a proxectar unha imaxe moderna, competitiva e auténtica de Galicia máis alá das súas fronteiras.

27/01/2026 in Alcaldía, Cultura e festas

O Concello do Porriño inicia os trámites para convidar ao Papa León XIV no Xacobeo 2027 e valora a dedicación dun espazo público co seu nome

O Porriño, 14 de xaneiro de 2026.- O Concello do Porriño vén de iniciar os trámites institucionais para trasladar formalmente ao Vaticano a invitación para que o Papa León XIV poida visitar O Porriño con motivo do Xacobeo 2027, no marco das relacións históricas e culturais recentemente documentadas entre o Pontífice e o municipio.

Esta iniciativa baséase nunha investigación histórica rigorosa, elaborada polo canónigo e arquiveiro da catedral de Tui, Avelino Bouzón Gallego, que confirma que un antepasado directo do Papa León XIV viviu no século XVII na parroquia de San Salvador de Torneiros. Trátase dunha liñaxe documentada en arquivos parroquiais, da que xa se tiña coñecemento previo e que vén sendo agora recoñecida públicamente.

O alcalde do Porriño, Alejandro Lorenzo, sinala que “falamos dun feito histórico de enorme relevancia para o noso concello, que conecta O Porriño cunha figura central da historia contemporánea a través das nosas raíces”. Segundo explicou, “é unha oportunidade única para poñer en valor a nosa historia e o papel das parroquias porriñesas ao longo dos séculos”.

Á vista desta circunstancia, o Concello considera que o Papa León XIV pode ser recoñecido como fillo ilustre de orixe porriñesa, polo que, ademais da invitación oficial para unha posible visita no contexto do Xacobeo 2027, está a estudarse a dedicación dunha praza ou dunha rúa co seu nome, como recoñecemento institucional e símbolo do vencello histórico entre O Porriño e a figura do Pontífice.

Neste sentido, Alejandro Lorenzo subliñou que “non se trata dun xesto simbólico sen máis, senón dun recoñecemento institucional baseado no rigor histórico e no orgullo pola nosa identidade”, engadindo que “O Porriño é unha terra de emigrantes, e esta historia representa a moitas familias que ao longo dos séculos levaron o nome da nosa vila polo mundo. A historia deixa pegadas e, ás veces, esas pegadas volven ao lugar onde todo comezou”.

Desde o goberno municipal destácase tamén que esta proposta se enmarca na vontade de proxección cultural e institucional do Porriño coincidindo cun acontecemento de alcance internacional como é o Ano Santo Xacobeo 2027, e sempre desde o respecto ás institucións e á historia.

O Concello do Porriño continuará traballando de maneira coordinada con outras administracións, co tecido social e cos medios de comunicación para que esta iniciativa poida avanzar de forma ordenada e consensuada.

14/01/2026 in Alcaldía, Cultura e festas, Vías e obras

O Goberno municipal do Porriño reestrutúrase para reforzar servizos esenciais e optimizar a execución dos fondos europeos

 

  • A reorganización inclúe a creación de novas concellerías e a remodelación doutras manténdose as mesmas dedicacións exclusivas e parciais, sen incremento ningún de gasto
  • Servicios sociais, saneamento, parroquias e formación e emprego serán as áreas que experimenten un maior fortalecemento, adaptándose ás novas necesidades da veciñanza e para o cal se incrementarán as respectivas partidas orzamentarias

O Porriño, 7 de xaneiro de 2026.- O alcalde do Porriño, Alejandro Lorenzo, anuncia unha actualización da estrutura do Goberno municipal coa finalidade de reforzar áreas clave e optimizar a capacidade executiva ante a chegada de proxectos estratéxicos financiados con fondos europeos, entre eles o PAI cun investimento global de preto de 11 millóns de euros. O rexedor subliñou que se trata dunha medida “pensada para dar un paso máis, consolidar o traballo destes anos e afrontar con maior capacidade técnica e organizativa os importantes proxectos que están a piques de iniciarse”.

Nesta liña, Lorenzo lembrou que este equipo “leva catro anos traballando de maneira estable e coordinada”, e que agora, aproveitando tamén que se dan determinadas circunstancias persoais nalgúns concelleiros, “é o momento de reforzar a estrutura para que O Porriño aproveite ao máximo os fondos europeos e cada proxecto se execute co nivel de esixencia que merece”. O alcalde insistiu en que “as cousas funcionan, e funcionan ben, pero agora entramos nunha fase que require máis dedicación e especialización debido ao volume de investimento que imos recibir e a infraestruturas que estamos creando, como as novas escolas infantís e o centro de día de Atios, e que se porán en servizo proximamente”.

Un dos principais axustes é a creación da Concellería de Saneamento, Servizos Rurais e Patrimonio Parroquial, que asumirá Marcos Martínez e que se coordinará en parte con outra nova área, a de Promoción da Identidade, Transformación dixital e Goberno Aberto a cargo de Bienvenido Estévez que continuará levando tamén Eventos e Festexos. O alcalde explicou que o obxectivo é dar un impulso adicional a un servizo esencial no rural, onde o Concello mantén obras continuas de ampliación da rede. 

“As nosas parroquias e o saneamento son unha das nosas máximas prioridades. Avanzamos día a día, ás veces de forma lenta pero sempre sen pausa, como sempre digo trátase dun servizo cunha altísima complexidade técnica e cun custo económico moi elevado. Esta nova concellería dálle máis forza a ese traballo e permítenos acelerar a súa execución”, afirmou Lorenzo. Nesta liña, é a destacar a inminente incorporación de sete persoas ao cadro de persoal do Concello como operarios de obras e servizos que, sen dúbida, reforzarán as actuacións neste campo, realizando acometidas pequenas e puntuais que axudarán a completar toda a rede, combinando así grandes e pequenas obras. “Poremos fincapé na mellora de todos os servizos xerais nas nosas parroquias, dende a mellora de viarios, a sinalización identificativa de cada un dos barrios, instalación de redes wifi e a comunicación co centro urbano a través dunha liña de autobús eléctrico”. Estas dúas concellerías complementaranse para preservar o patrimonio parroquial e potenciar todas e cada unha destas zonas rurais.

Outro eixo fundamental desta nova estrutura é a reorganización dos servizos sociais municipais, aos que se destinarán no vindeiro exercicio unha maior inversión, superando os dous millóns de euros ao ter en conta a dúas novas escolas infantís e centro de día de Atios. Estes dividiranse agora en dúas áreas especializadas para ofrecer unha atención máis eficaz e adaptada ás necesidades da veciñanza. A nova Área de Atención á Vulnerabilidade e Programas de Emerxencia, dirixida por Rosario Costas, centrarase na prevención e na resposta ás situacións máis urxentes. Pola súa banda, Bárbara Troncoso quedará á fronte da Área de Atención Cidadá, Asistencia Domiciliaria, Coidados e Benestar, reforzando o Servizo de Axuda no Fogar, os programas de envellecemento activo, a saúde comunitaria e a atención directa. “Con esta reestruturación gañamos eficacia, coordinación e capacidade para chegar mellor ás persoas”, explicou o alcalde.

A área de Emprego e Formación será asumida por Teresa Veloso, quen pasará a ocupar a dedicación exclusiva vacante trala xubilación de Rosario Costas. O obxectivo é fortalecer os programas de inserción laboral, a formación profesional e as novas competencias dixitais, nun momento no que o Porriño se prepara para importantes proxectos ligados ao desenvolvemento económico, no que se acondicionarán novas aulas de formación homologadas e salas de formación dual. 

Así mesmo, o alcalde informou de que, debido á baixa por maternidade da concelleira de Urbanismo, Promoción e Xestión de Vivenda, Medio Ambiente e Mercados, Antía Carrera, estas áreas serán asumidas temporalmente polo concelleiro de Industria, Contratación e Patrimonio, Carlos Martínez, garantindo deste xeito a continuidade e o normal funcionamento de todos os servizos municipais durante este período.

O rexedor destacou que esta reestruturación do equipo de goberno local non supón un maior gasto público, xa que se manteñen as mesmas dedicacións exclusivas e parciais e tódolos concelleiros conservan competencias. “Non é unha reforma por necesidade, senón por responsabilidade. Temos por diante proxectos europeos de enorme envergadura e queremos que se executen coa máxima eficiencia. Este Goberno funciona, e agora reforzámolo para funcionar aínda mellor”, concluíu.

07/01/2026 in Alcaldía, Proxectos Europeos

O alcalde do Porriño presenta o balance de 2025: “Un ano histórico de saneamento, crecemento económico e investimento en calidade de vida”

  • Un concello saneado e uns Orzamentos 2026 pensados para reforzar a capacidade de investimento
  • Novo complexo deportivo, escolas infantís e ampliación do entorno do auditorio entre os proxectos clave

O Porriño, 29 de ecembro de 2025.- O alcalde do Porriño, Alejandro Lorenzo, presentou hoxe o balance do ano 2025 nun almorzo informativo cos medios de comunicación, no que destacou un exercicio “histórico, marcado polo saneamento das contas municipais, o dinamismo económico e unha clara aposta por mellorar a calidade de vida da veciñanza”.

Un concello saneado e unha xestión económica rigorosa

Un dos principais fitos do ano foi a consolidación da situación económica e financeira do Concello. Lorenzo explicou que 2025 supuxo un punto de inflexión ao acadarse, por primeira vez, saldo cero na conta 413, correspondente ás facturas pendentes de pagamento por gastos realizados fóra de orzamento ou sen contrato algún, xa que as únicas existentes eran de gobernos anteriores.

Neste proceso de saneamento económico, o Concello partía dunha débeda acumulada de 5.496.979,19 euros en decembro de 2021, que se reduciu ata un saldo de 33.680,97 euros a finais de 2024, quedando totalmente liquidada ao longo de 2025. Este resultado foi posible grazas a unha revisión individualizada de centos de facturas, que permitiu a devolución de máis de 2 millóns de euros en facturas irregulares, duplicadas ou sen contrato, así como a obtención de sentenzas xudiciais favorables que evitaron pagamentos indebidos por importe de 853.648,86 euros.

Na actualidade, a única débeda vixente do Concello corresponde a un préstamo estatal por un importe aproximado de 3 millóns de euros  destinado ao pagamento de facturas herdadas anteriores a 2022.

Neste contexto, o alcalde avanzou que o Concello está a traballar na elaboración dos Orzamentos Municipais de 2026, unhas contas especialmente relevantes ao elaborarse nun escenario de estabilidade financeira tras o proceso de saneamento. Lorenzo explicou que o actual préstamo procedente do Mecanismo de Pago a Proveedores (MPP) está a limitar a capacidade de investimento municipal, polo que o Goberno local estuda distintas opcións financeiras para reforzar a marxe de actuación económica do Concello e afrontar os vindeiros exercicios con maior axilidade, sempre desde a prudencia e o rigor económico.

Crecemento económico e actividade empresarial

No ámbito económico, o alcalde puxo en valor o peso do Porriño como un dos concellos con maior actividade de Galicia, cun PIB superior aos 1.240 millóns de euros, un crecemento anual do 6,6 % e unha industria que representa máis do 50 % da riqueza xerada. “Estes datos reflicten un Porriño dinámico, con máis de 2.200 empresas, emprego e capacidade para atraer investimento”, sinalou Lorenzo.

Vivenda, urbanismo e transformación das parroquias e barrios

En materia de vivenda, o rexedor destacou o avance do proxecto para a construción de 300 novas vivendas, das cales o 80 % serán protexidas, en colaboración coa Xunta de Galicia, e outras 40 a maiores a través da cesión dunha parcela municipal. A actividade urbanística mantívose tamén nun nivel elevado ao longo de 2025, cun incremento superior ao 10 % no número de licenzas respecto de exercicios anteriores.

Neste contexto, Lorenzo salientou a rexeneración integral de Torneiros, cun investimento próximo aos 2,75 millóns de euros, que permitirá mellorar servizos, accesibilidade, espazos públicos e zonas verdes, transformando de maneira significativa este ámbito do municipio.

Saneamento, servizos e cohesión social

Outro dos eixos fundamentais do balance foi o saneamento, cun investimento acumulado desde 2022 de case 5 millóns de euros e coa creación este ano dunha Concellería específica de Saneamento. “O saneamento deixou de ser unha actuación puntual para converterse nunha política estruturada, con planificación, recursos e atención directa ás parroquias”, afirmou o alcalde.

Lorenzo explicou que, partindo dos máis de 16 millóns de euros inicialmente necesarios, e tendo en conta a actualización de prezos, o xa executado, o que se está a realizar e o pendente de licitar, a inversión que resta para acadar o 100 % do saneamento elévase a 11.899.632,68 euros. Para facer fronte a este reto, o Concello prevé solicitar unha operación de crédito específica que permita completar os investimentos pendentes, traballando tamén en axudas doutras administracións.

“Este goberno local ten claro que o acceso a un saneamento digno é un dereito fundamental, non unha opción. Por iso, investiranse eses case 12 millóns de euros que aínda son necesarios para completar a cobertura en todas as parroquias”, subliñou o rexedor.

No ámbito social, o alcalde destacou o apoio ao tecido asociativo do Porriño, con colaboracións coas asociacións culturais e veciñais, comisións de festas, ANPAS, clubs deportivos, así como co comercio local e a hostalaría. Neste sentido, precisou que o Concello colabora economicamente con todas estas asociacións mediante achegas nominativas anuais que superan os 500.000 euros, garantindo a continuidade e calidade das actividades en cada parroquia.

Emprego e formación

Durante 2025, os programas municipais de emprego e formación permitiron que 384 persoas accederan a polo menos un contrato laboral, incluíndo 92 contratacións directas municipais. Ademais, impartíronse 7.150 horas de formación, realizáronse 1.773 sesións de orientación laboral e acadouse unha taxa de inserción laboral do 82 % no Programa Integrado de Emprego. A Bolsa de Emprego Municipal conta actualmente con 7.130 persoas inscritas, consolidándose como unha ferramenta clave para a intermediación laboral.

Poboación e educación

O balance demográfico confirma unha tendencia positiva: o Porriño pasou de 16.997 habitantes en 2005 a 20.995 en 2024, segundo o Padrón Municipal, cunha poboación composta por un 51 % de mulleres e un 49 % de homes. Ao longo de 2025, rexistráronse 115 nacementos no municipio. “Medrar en poboación e manter datos positivos de natalidade é un reflexo de que o Porriño ofrece oportunidades, servizos e calidade de vida”, sinalou Lorenzo.

O alcalde destacou tamén a evolución da UNED do Porriño, que duplicou matrículas, ampliou a súa oferta académica e consolídase como referente comarcal.

Proxectos estratéxicos para 2026

De cara a 2026, Alejandro Lorenzo avanzou varios proxectos clave que permitirán seguir mellorando os servizos e os espazos públicos do municipio. Entre eles, destacou a apertura das escolas infantís de Budiño e Pontellas, un proxecto estratéxico para a conciliación das familias, e tamén o Centro de Día en Atios. 

No ámbito cultural e urbano, o alcalde anunciou a ampliación do entorno do futuro auditorio municipal, cun anfiteatro que contará cun espazo propio de cafetería e restaurante ao aire libre, configurando unha nova área de encontro, lecer e actividade cultural.

No eido deportivo, avanzou o desenvolvemento de novas pistas deportivas infantís e a creación dun novo complexo deportivo nun terreo municipal de arredor de 3.000 metros cadrados, a través dunha cesión dunha urbanización que se está a facer na rúa Antonio Palacios, que levará o nome do adestrador  do Celta porriñés Claudio Giráldez, pensado para o deporte base e a mocidade.

O alcalde concluíu sinalando tamén a importancia do apoio doutras administracións, destacando as axudas da Xunta de Galicia e da Deputación de Pontevedra, especialmente en materia de estradas autonómicas e provinciais, así como na execución de escolas infantís, que resultan fundamentais para facer realidade moitos dos proxectos desenvolvidos ao longo do ano.

“O balance de 2025 e os proxectos previstos para 2026 demostran que o Porriño avanza con paso firme, cun concello saneado, máis actividade económica e unha clara aposta polo futuro”, concluíu Lorenzo.

29/12/2025 in Alcaldía, Benestar, Emprego e formación, Industria, Infraestruturas, Mocidade, Parroquias, Sen categoría, Urbanismo, comercio e industria