Henry Méndez e París de Noia poñen a nota musical ao entroido do Porriño

 

“Rayos de sol”, “Noche de estrellas”, “Mi Reina” e unha versión da popular canción “El tiburón” serán algúns dos temas que soarán o vindeiro sábado no Porriño intepretados polo cantante, compositor e produtor dominicano, Henry Méndez. O artista actuará o primeiro dos días do Entroido formando parte dun programa que vén de presentar esta mesma mañá o goberno local e que abrangue cinco xornadas cheas de moita música, desfiles, obradoiros e animación que encherán de moita diversión as rúas da vila.

Acompañados dun grupo de escolares, os grandes protagonistas do Entroido 2025 no Porriño por seren os encargados de ler o pregón, o alcalde Alejandro Lorenzo e o concelleiro de Cultura Bienvenido Estévez deron a coñecer con detalle toda a programación que se desenvolverá do sábado 1 ao mércores 5 de marzo. “Celebraranse concertos, espectáculos e actividades pensadas para todos os públicos, onde non faltarán os xa tradicionais desfiles, dos que participarán 27 comparsas cunha comitiva integrada por máis de 2.200 persoas”, sinala o rexedor remarcando que “sen dúbida o deste ano será o máis multitudinario da historia do noso Concello e de toda a comarca, polo que animamos a toda a veciñanza e a xente de fóra a que se achegue ao Porriño e desfrute e participe destas xornadas festivas”.

O pregón dará o pistoletazo de saída, o sábado 1

O sábado 1 de marzo as charangas Vai de Baile e Noroeste, xunto cos xigantes e cabezudos animarán as rúas do centro da vila dende o mediodía. Será ás 13.00 horas cando teña lugar a lectura do pregón a cargo de Carla Marques Vaquero, alumna de 4º da ESO do Colexio Santo Tomás, gañadora do concurso de carteis de entroido convocado polo Concello, que estará acompañada polo resto de escolares clasificados nas diferentes categorías, rapaces de entre 6 e 17 anos.

Pola tarde haberá un obradoiro infantil e volverá un histórico, o Xogo da Ola, que celebra neste 2025 a súa 81 edición. A música de charanga amenizará a festa ata o inicio do primeiro dos desfiles, que será ás 18.30 horas con saída dende o pavillón e remate na praza Central. A Batucada Bate no Cobre e as charangas SDK e Vai de Baile acompañarán á comitiva.

Xa pola noite e para rematar a xornada, na praza Arquitecto Antonio Palacios, concertos de Gin Toni’s, Henry Méndez e Samu Pexe.

París de Noia, o domingo 2

A tarde da xornada dominical está pensada para a cativada. De 17.00 a 20.00 horas, na praza Arquitecto Antonio Palacios, festa infantil con inchables e obradoiros de temática do Entroido.

Ao serán, a partir das 19.00 horas, actuación da orquestra París de Noia.

Obradoiro infantil, o luns 3

Para o luns, ao igual que para o martes e mércores, xornadas non lectivas nos centros escolares, o Concello do Porriño organizou un campamento en horario de mañá coa finalidade de axudar ás familias a conciliar. Ademais, o luns ás 17.00 horas, na praza Arquitecto Antonio Palacios, haberá de novo un obradoiro infantil.

Desfile do martes de Entroido

O martes de entroido comeza coa animación de rúa a cargo das charangas Imperiais e Fanfarria Furruxa, de 12.00 a 14.00 horas. Xa pola tarde, a partir das 18.30 horas, novo desfile de comparsas, nesta ocasión amenizado pola Batucada Lenha Verde e as charangas Imperiais e Cantos Somos.

Enterro da sardiña, mércores de cinza

Como é de costume, no Porriño despedirase o entroido co Enterro da Sardiña o mércores de cinza. O velorio dará comezo ás 17.00 horas no Círculo Recreativo Cultural, dende onde, unha hora máis tarde, partirá a comitiva fúnebre, acompañada polas charangas Fanfarria Farruxa e Noroeste. Chegada esta á praza Arquitecto Antonio Palacios, sobre as 19.00 horas, procederase á lectura do testamento, tralo cal terá lugar o pasarrúas “Les Tambours de Feu”, da compañía Deabru Beltzak, para finalmente continuar coa sardiña ata a ponte do Valo sobre río Louro, percorrido amenizado polas Prañideiras e as charangas Imperiais e Anchoa.

Toda a información actualizada pode consultarse na páxina web www.ecultura.net

 

O IV Concurso Escolar de Carteis do Entroido premia a creatividade de Carla Marques no Porriño

 

O Concello do Porriño, a través da Concellería de Educación, deu a coñecer hoxe o cartel oficial do Entroido 2025. A ilustración de Carla Marques Vaquero, alumna de 4º de ESO do Colexio Santo Tomás, foi a elixida como imaxe representativa deste ano tras proclamarse gañadora do IV Concurso Escolar de Carteis do Entroido.

O certame contou cunha gran participación dos centros educativos de primaria, secundaria e ACEESCA, que sumaron numerosas propostas con estilos e técnicas diversas, como acuarela, colaxe, cera ou carbón. A colaboración de Consuelo Rodríguez Domínguez, artista local, foi fundamental na organización deste evento, sendo a súa implicación e apoio chave para o éxito desta edición.

O xurado, formado polos artistas locais Juan de la Cruz Castaño Vicente, Nito Pereiro-Oliveira e Nuria Vilanova Ferreira, avaliou as propostas recibidas, tendo en conta a diversidade e a calidade das obras presentadas. A tarefa foi complicada debido á alta calidade e creatividade das propostas.

O alcalde, Manuel Alejandro Lorenzo Alonso, visitou o centro educativo da gañadora para comunicar a nova en persoa, sorprendendo a Carla nun emotivo momento cheo de aplausos e ledicia entre os seus compañeiros. “Cada ano sorpréndenos máis o talento dos nosos pequenos artistas. Temos unha mocidade creativa e con moita ilusión. Este concurso non só fomenta a expresión artística, senón que tamén reforza o sentimento de pertenza e tradición na nosa vila”, destacou o rexedor.

Pola súa banda, a concelleira de Educación, Carolina González Costas, quixo poñer en valor o esforzo de todos os participantes. “A calidade dos traballos presentados demostra o potencial creativo dos nosos estudantes. É unha honra ver como o Entroido esperta tanta paixón entre a mocidade e como se involucran para manter viva esta festa”, sinalou.

Dada a calidade dos traballos presentados, o xurado resolveu outorgar premios en tres categorías por idades, quedando a clasificación da seguinte maneira:

CATEGORÍA 1: De 6 a 8 anos

  • 1º premio: Thelma Táboas Fernández, 8 anos (2º E. Primaria), Colexio Santo Tomás.
  • 2º premio: Sofía Alonso Pérez, 8 anos (3º E. Primaria), Colexio Santo Tomás.
  • 3º premio: Joaquina, 8 anos (Colexio Xosé Fernández López).

CATEGORÍA 2: De 9 a 12 anos

  • 1º premio: Carla Sanandrés, 12 anos (1º ESO), IES Ribeira do Louro.
  • 2º premio: Leire Hermida Fernández, 11 anos (6º E. Primaria), Colexio Santo Tomás.
  • 3º premio: Mario Pintos Romero, 11 anos (6º E. Primaria), Colexio Santo Tomás.

CATEGORÍA 3: De 13 a 16 anos

  • 1º premio: Carla Marques Vaquero, 16 anos (4º ESO), Colexio Santo Tomás.
  • 2º premio: Gabrielly Silva Pereiro, 14 anos (2º ESO), Colexio Hermanos Quiroga.
  • 3º premio: Gastón Gaitán Monte de Oca, 14 anos (3º ESO), IES Ribeira do Louro.

Ademais, concedéuselle un accésit especial a Ibai Gómez Germán, de 17 anos (ACEESCA), en recoñecemento á súa creatividade e orixinalidade.

A entrega de premios terá lugar o xoves 27 de febreiro ás 18:00 horas na sala de comunicacións do Concello do Porriño. Como parte da celebración, Carla Marques Vaquero será a encargada de dar o pregón do Entroido 2025, acompañada polos demais gañadores no balcón da Casa Consistorial o sábado 1 de marzo.

Todos os carteis participantes serán expostos no Centro Cultural Municipal ao longo das festas do Entroido, permitindo que veciños e visitantes poidan admirar o talento artístico da mocidade do Porriño.

27 comparsas participarán do entroido máis multitudinario da historia do Concello do Porriño

 

  • Estarán integradas por 2.155 persoas que desfilarán polas rúas da vila o sábado 1 e martes 4 de marzo

Un total de 27 comparsas participarán no Entroido do Porriño este ano. O Concello vén de pechar o prazo de inscrición, contabilizando o número máis alto ata o de agora rexistrado. Serán 2.155 as persoas que integren tales comparsas, pero serán máis aínda os compoñentes da comitiva dos desfiles que encherán de cor e moita ledicia as rúas da vila, pois a eles hai que sumar dúas charangas e unha batucada.

Dende o goberno local, o alcalde Alejandro Lorenzo sinala que, “de seguro, este será o entroido máis multitudinario da historia do noso Concello e da comarca. Xa non só polas máis de 2.000 persoas integrantes das 27 comparsas, senón polas miles que estas atraerán, veciños do Porriño e doutros concellos da comarca e da provincia que se achegarán á nosa vila para desfrutar dos desfiles do sábado e do martes de Entroido”.

Unha programación festiva que vai máis alá e que dende a Concellería de Cultura, que dirixe Bienvenido Estévez, darán a coñecer “e na que se incluirán grandes sorpresas musicais, ademais das xa tradicionais actividades e eventos propios desta festa, como pode ser o Xogo da Ola, o pregón ou obradoiros dirixidos sobre todo á cativada”, explica o concelleiro.

Así é todo, nos vindeiros días o goberno local presentará a programación detallada para cada unha das xornadas festivas do Entroido 2025, que rematará o mércores de cinsa co tradicional enterro da sardiña. Precisamente, segue aberto o prazo, ata este xoves 20 de febreiro, para participar na elaboración do testamento da sardiña. Este será redactado polas comparsas, cada unha redactará entre 10 e 15 liñas, podendo participar tamén a veciñanza que así o desexe. O texto deberá presentarse no primeiro andar do Centro Cultural Municipal nun sobre pechado e dirixido á Concellería de Festas, en horario de 09.00 a 14.00. Unha vez cerrado o prazo o comité de observación elaborará o documento final.

 

Premios á participación

E continuando con cifras récord, tamén este ano incrementouse a cantidade máxima destinada aos premios outorgados á participación. Nun primeiro momento ese aumento foi do 20% respecto do 2024, pero vista a alta inscrición e demanda, dende o goberno local acordouse elevar máis aínda a partida, “facendo un importante esforzo para que ningunha agrupación que quixese participar quedase fóra, recibindo así todas unha recompensa pola súa participación”.

O importe de cada premio determinarase segundo o número de compoñentes da comparsa e que será de 300 euros para aquelas de 12 a 19 integrantes, 500 euros para as compostas por entre 20 e 39 persoas, 800 euros para as de 40 a 55 compoñentes, 1.000 euros para as de 56 a 85 integrantes e para aquelas de 86 compoñentes en adiante a contía entregada será de 1.200 euros.

O Porriño presenta a súa candidatura ao Plan de Actuación Integrado (PAI) para optar aos fondos FEDER de desenvolvemento urbano sostible

 

  • Un investimento de 15 millóns de euros que permitirá transformar O Porriño cara a un modelo urbano máis sostible e inclusivo
  • A integración de Torneiros co centro de O Porriño será unha realidade grazas a unha mellor mobilidade, conexións máis eficientes e espazos urbanos que favorezan unha vila máis cohesionada e accesible para todos.

 

O Porriño deu hoxe un paso fundamental cara a un modelo de desenvolvemento urbano máis sostible e equilibrado coa presentación da súa candidatura ao Plan de Actuación Integrado (PAI), no marco da convocatoria FEDER de Desenvolvemento Urbano Sostible promovida polo Ministerio de Facenda. O acto tivo lugar na Casa Consistorial e contou coa presenza do alcalde, Manuel Alejandro Lorenzo Alonso, quen subliñou a importancia estratéxica deste proxecto para o municipio.

“O Porriño ten unha oportunidade única para transformar e integrar de xeito sostible os seus espazos urbanos, reducindo desigualdades e fomentando a inclusión social e económica. Con esta candidatura, aspiramos a obter un financiamento de 15 millóns de euros que nos permitirá desenvolver iniciativas clave para mellorar a calidade de vida da nosa cidadanía”, declarou o rexedor.

O PAI de O Porriño estrutúrase en tres eixos fundamentais: a mellora da calidade urbana e ambiental, a inclusión social e a dinamización económica. Dentro deste marco, contémplase a transformación do espazo público de Torneiros, mellorando a seguridade e accesibilidade, soterrando a liña de alta tensión, potenciando a mobilidade sostible e creando eixes verdes. Tamén inclúe a mellora do Centro Multiusos de Torneiros e a implementación dun programa de Formación Dual en colaboración coas empresas locais, ademais da creación dunha Aula Virtual para a inclusión dixital.

O proxecto contempla ademais a implantación dunha liña de transporte eléctrico municipal, a creación dunha app para a xestión do transporte público e a mellora da conectividade peonil entre Torneiros e O Porriño. En termos de resiliencia ambiental, prevese a creación de espazos naturais multifuncionais para a redución da vulnerabilidade fronte a inundacións, así como a recuperación do patrimonio etnográfico do río Louro.

A dinamización cultural tamén é unha prioridade, polo que se propón a ampliación do Auditorio Municipal, a creación dunha nova sala de lectura e espazo TIC, a mellora dos espazos culturais e a adaptación da Rúa José Fernández López para fomentar a mobilidade peonil.

O investimento total destas actuacións ascende a 15 millóns de euros. “Con esta proposta, O Porriño aposta por un futuro sostible, moderno e inclusivo, garantindo unha mellor calidade de vida para todos os seus habitantes”, concluíu o alcalde.

A candidatura está agora en mans do Ministerio de Facenda, que avaliará os proxectos presentados para decidir a asignación dos fondos FEDER. O goberno municipal confía en que a iniciativa de O Porriño sexa seleccionada, permitindo a execución dunha estratexia de desenvolvemento urbano sostible que marque un antes e un despois no municipio.

Dan comezo as obras da nova escola infantil de Pontellas

 

 

  • O proxecto supón a rehabilitación e reconversión deste edificio municipal, actualmente en desuso, no cal se investirán máis de 763.000 euros
  • Os traballos estarán rematados neste mesmo ano e mellorarán a oferta educativa coa creación de 66 prazas para nenos de 0 a 3 anos

 

O Concello do Porriño vén de anunciar o inicio das obras de rehabilitación e ampliación da antiga Escola Unitaria de Pontellas para a creación dunha nova escola infantil municipal, reafirmando así o seu compromiso coa educación dos máis pequenos da casa e a recuperación de espazos públicos. Os traballos comezaron esta mesma semana e prolongaranse oito meses, polo que antes de rematar o ano, O Porriño disporá de 66 prazas públicas máis para nenos de 0 a 3 anos. Neste senso, o alcalde Alejandro Lorenzo subliña a importancia deste proxecto como “un avance clave na nosa aposta pola conciliación, ofrecendo ás familias do Porriño un servizo esencial e moi demandado, afianzando e fortalecendo a educación infantil pública no noso concello”. A maiores, e de xeito paralelo, “recuperamos un edificio actualmente en desuso, potenciando así o noso patrimonio histórico e arquitectónico, para darlle unha nova vida ao servizo da comunidade”, explica o rexedor local.

O proxecto conta cun orzamento total de 763.789,86 euros, dos cales 408.233,10 euros están subvencionados pola Consellería de Política Social a través do Plan de Recuperación, Transformación e Resiliencia NextGenerationEU.

A actuación contempla a rehabilitación integral do edificio existente, mantendo a súa esencia arquitectónica e elementos históricos á vez que se moderniza para albergar a nova escola infantil. “A rehabilitación deste espazo realizarase respectando a súa identidade, pero incorporando materiais modernos e eficientes que garantan o confort e a sustentabilidade do centro educativo. Ademais, incluímos medidas de eficiencia enerxética, como cubertas axardinadas e illamento térmico, que permitirán reducir o consumo enerxético”, explica o concelleiro de Vías e Obras, Ramón Porto.

Ademais de sala multiusos, cociña e outras estancias, a nova escola infantil contará cun total de cinco aulas distribuídas por idades e para o cal será preciso unha ampliación das instalacións, construíndo dúas novas alas que se dispoñen cara ao patio posterior, creando dous novos patios delimitados, con elementos vexetais. A reforma inclúe a mellora da cuberta, a instalación de iluminación LED, un sistema de climatización eficiente e a dotación de equipamento e mobiliario de alta calidade.

Os novos espazos disporán de grandes ventás que maximizarán a entrada de luz natural, favorecendo un ambiente saudable e confortable para o alumnado. As aulas de maior capacidade contarán con portas corredoiras que permitirán a conexión entre elas, fomentando unha metodoloxía educativa flexible.

A empresa adxudicataria da obra comprometeuse ademais a realizará melloras por importe de 77.275,38 euros, no que se inclúe a restauración da fachada con morteiro de cal, a renovación do falso teito, a substitución de tellas deterioradas e a instalación de caleiros e baixantes de cinc.

O Porriño tamén concilia no entroido

 

  • O Concello organiza un campamento para nenos de entre 3 e 12 anos os días 3, 4 e 5 de marzo en horario de mañá
  • O prazo de inscrición abre o vindeiro mércores 19 de febreiro

 

Chegadas as vacacións escolares do Entroido son moitas as persoas que precisan conciliar a vida laboral e familiar. Co fin de dar resposta a esta necesidade, a Concellería de Igualdade do Porriño, que dirixe Carolina González, organiza un campamento dirixido á cativada de entre 3 e 12 anos os días 3, 4 e 5 de marzo, en horario de 08.30 a 14.30 horas.

As prazas son limitadas, polo que as persoas interesadas en participar deben realizar a inscrición previa, a partir do vindeiro mércores, 19 de febreiro, e ata ás 09.00 horas do día 25 do mesmo mes. Estas poden realizarse en liña, a través da sede electrónica do Concello do Porriño, ou de xeito presencial no rexistro do Concello.

O campamento levarase a cabo en instalacións municipais e nel realizaranse diversos xogos e actividades nas que se promoverán os valores do respecto, a igualdade e a solidariedade.

 

 

FOLLA DE INSCRIPCIÓN E BAREMO – CAMPAMENTO DE ENTROIDO 2025

AUTORIZACIÓN DE ENTREGA E RECOLLIDA – CAMPAMENTO DE ENTROIDO 2025

A obra de Castelao fai parada no Porriño

 

A exposición itinerante “Castelao grafista” segue a percorrer Galicia neste 2025, no que se celebra o Ano Castelao, e O Porriño é a seguinte parada. Así, dende o 13 de febreiro e ata o 19 de marzo, o Centro Cultural Municipal acolle esta mostra do caricaturista, debuxante, ilustrador, columnista, escritor, pintor, escenógrafo, ensaísta, historiador, etnógrafo, teórico, político, Alfonso Daniel Rodríguez Castelao.

“Estamos moi orgullosos de ter no Porriño esta mostra que reúne unha ampla selección das múltiples facetas de Castelao e convido a toda a veciñanza a que se achegue ao centro cultural e poida contemplar a obra e o pensamento dun dos creadores galegos máis singulares”, sinala o alcalde Alejandro Lorenzo.

Organizada pola Fundación Gonzalo Torrente Ballester, a Real Academia Galega de Belas Artes e Turismo de Galicia, a exposición “Castelao grafista” pode visitarse, de balde, en horario ininterrompido, de 09.00 a 20.00 horas, de luns a venres.

Unha selección rigorosa de obras ensina o seu progresivo compromiso ético, social e político, pero tamén os seus recursos plásticos e como culmina a definición da súa linguaxe no encontro entre texto e imaxe. A mostra reúne 19 facsímiles da Colección de Arte Afundación e 89 debuxos do álbum Cousas da vida de Castelao, dos que 49 pertencen á Colección de Arte ABANCA; tamén obras procedentes doutras institucións, galerías e particulares. Así e todo, pódense ver tres retratos fotográficos, catro caricaturas e 17 debuxos e portadas de revistas. Ademais, tamén se pode ler o texto orixinal do álbum Nós e contemplar dous manuscritos de Castelao, 18 portadas das primeiras edicións dos seus libros, tres páxinas interiores, 14 portadas de libros ilustradas por Castelao e tres debuxos.

Cultura por alimentos

De xeito paralelo, e baixo o lema “ilusión compartida” lévase a cabo unha campaña solidaria de doazón de alimentos. Así, a exposición enmárcase en “Cultura por alimentos”, unha iniciativa de Afundación a favor da Federación Española de Bancos de Alimentos. Deste xeito, anímase a todas as persoas que visiten a mostra a colaborar doando algún alimento perecedoiro que irá destinado ao banco de alimentos local.

Música DJ e de tuna para celebrar o día dos namorados

 

 

  • O Concello do Porriño organiza un programa que inclúe tamén fotomatón e agasallos para festexar San Valentín

“Amor polo Porriño” ese é o lema co que o Concello do Porriño celebra o Día dos Namorados. Un programa, que abrangue o propio día 14 e tamén o 15 de febreiro, no que haberá moita música e a instalación dun fondo/escenario con elementos e decoración propia desta xornada para que todos poidan inmortalizar o momento.

Mañá venres, a partir das 18.00 horas na praza Arquitecto Antonio Palacios, haberá animación con DJ e habilitarase un espazo cun photocall, para que calquera que así o desexe deixe a súa pegada de “Amor polo Porriño”. Ademais realizarase tamén un sorteo de agasallos.

A música de tuna chegará o sábado, a partir das 12.00 horas polas rúas do centro urbano, cando a agrupación Tuniña Veterana Gaia deleite á veciñanza cos seus acordes.

O Concello do Porriño rehabilitará a Escola Unitaria de Chenlo para convertela nun espazo cultural de uso comunitario

 

  • Os traballos, nos que se investirán uns 50.000 euros, darán comezo neste primeiro trimestre do ano
  • A actuación ten un dobre obxectivo, a recuperación do patrimonio histórico e arquitectónico municipal e darlle unha nova utilización a unhas instalacións que levan anos en desuso 
  • O futuro centro de día na antiga escola de Atios e unha escola infantil na de Pontellas son outras das iniciativas do plan municipal de restauración e posta en valor de edificios singulares nas distintas parroquias

O Concello do Porriño rehabilitará a antiga escola unitaria de Chenlo para convertela nun espazo cultural e veciñal. Seguindo a mesma liña de actuación que noutros edificios municipais actualmente en desuso, o goberno local iniciou este proxecto cuxas obras se prevén que se inicien ao longo deste primeiro trimestre do ano.

O alcalde Alejandro Lorenzo, xunto co concelleiro de Vías e Obras, Ramón Porto e o alcalde pedáneo da Entidade Local Menor de Chenlo, Jacobo Alonso, visitaron recentemente as instalacións nas que se investirán uns 50.000 euros, para o cal se contará co apoio da Xunta de Galicia. “Este edificio, que forma parte do patrimonio histórico e arquitectónico local, representa un valor significativo para a comunidade e a súa recuperación permitirá darlle un novo uso, adaptado ás necesidades actuais da veciñanza”, subliña Lorenzo.

O concelleiro explica que coa rehabilitación deste inmoble “a parroquia de Chenlo disporá dun espazo moderno e accesible, pensado para a realización de actividades como cursos, obradoiros, exposicións e eventos comunitarios”. Pola súa parte, o alcalde pedáneo considera que “a creación deste novo espazo permitirá dinamizar a vida social e cultural da parroquia, proporcionando un punto de encontro para a veciñanza e fomentando iniciativas socioculturais”.

O proxecto contempla unha serie de melloras estruturais e funcionais para garantir a conservación do edificio e optimizar o seu uso. Así, renovarase o tellado, asegurando a súa impermeabilización e resistencia para protexer a estrutura do inmoble; rehabilitarase o xardín exterior, converténdoo nun espazo máis accesible e axeitado para actividades ao aire libre; melloraranse os aseos e os interiores, adaptándoos ás normativas de accesibilidade e confort; eliminaranse as barreiras arquitectónicas, facilitando a mobilidade e garantindo un espazo inclusivo para todas as persoas e conectaranse as diferentes estancias, creando un espazo máis amplo e versátil para diferentes usos.

“Dende o Concello reafirmamos así o noso compromiso coa recuperación do patrimonio local e coa creación de espazos que melloren a calidade de vida da cidadanía. A intervención na antiga escola unitaria de Chenlo é un paso máis nesta estratexia de valorización do territorio e de mellora dos servizos para a comunidade”, puntualiza o alcalde Alejandro Lorenzo.

Recuperación do patrimonio local

Esta iniciativa enmárcase dentro do plan municipal de recuperación e posta en valor de edificios singulares nas distintas parroquias. Neste senso, a antiga escola unitaria de Covelo, en Atios, será un centro de día; a de Pontellas acollerá unha das dúas novas escolas infantís, para nenos de 0 a 3 anos, que se abrirán no Porriño e, pola súa banda, a de Mosende seguirá mellorando para continuar como colexio de Educación Infantil dando servizo á cativada do rural.

 

O Porriño impulsa o seu turismo cun enfoque fresco e dinámico

 

  • Desde celebracións tradicionais ata rutas culturais, o Concello soubo aproveitar a súa riqueza para posicionarse como un destino interesante, especialmente para aqueles peregrinos que transitan polo Camiño de Santiago na súa vertente portuguesa

O turismo no Concello do Porriño consolidouse nos últimos anos como un dos piares clave para o desenvolvemento económico e cultural do municipio. A través de diversas iniciativas ao longo do último ano, a concellería de Turismo logrou poñer en valor non só o patrimonio local, senón tamén dinamizar a economía mediante actividades que atraeron a máis de 4.000 visitantes, a maiores dos máis de 95.500 peregrinos que chegaron ao municipio facendo o Camiño de Santiago. Desde celebracións tradicionais ata rutas culturais, Porriño soubo aproveitar a súa riqueza para posicionarse como un destino interesante, especialmente para aqueles peregrinos que transitan polo Camiño de Santiago na súa vertente portuguesa.

Vanessa Ucha, a concelleira de Turismo, destaca o enfoque integral e accesible das actividades, que buscan fomentar tanto o turismo como o sentimento de identidade local. “Cada evento que organizamos está pensado para que, ademais de atraer visitantes, podamos sensibilizar sobre a importancia das nosas tradicións e produtos. Este ano conseguimos atraer a máis de 4.000 persoas, que non só se achegaron a coñecer o municipio, senón que tamén participaron activamente na conservación e promoción do noso patrimonio”, explica Ucha.

O apoio ao sector apícola, a valorización do Camiño de Santiago e a celebración de tradicións centenarias foron os eixes das principais actividades. Entre elas, a Festa Apícola destacou como unha das máis innovadoras. O evento logrou reunir a máis de 1.000 persoas nunha xornada que combinou obradoiros educativos e actividades lúdicas, co fin de concienciar sobre a importancia das abellas na biodiversidade e na economía local.

Na Festa do Peregrino e Turismo, a pesar do mal tempo, máis de 500 persoas participaron en obradoiros e visitas guiadas relacionadas co legado do arquitecto Antonio Palacios, deixando claro o compromiso do Concello coa valorización do seu patrimonio e coa atención aos peregrinos que percorren o Camiño. “Estas iniciativas reflicten a nosa vocación de acoller aos visitantes, pero tamén de ofrecerlles unha experiencia auténtica vinculada á nosa historia e tradicións”, comenta o alcalde Alejandro Lorenzo.

A Festa do Pan e as Alfombras de Corpus son outras das grandes citas do calendario, con actividades que promoven o comercio local e a cultura popular. Ambos eventos lograron mobilizar a máis de 1.700 persoas, dinamizando a economía local e facendo que o municipio se dera a coñecer máis alá das súas fronteiras.

Ademais, o Concello tamén se centrou no turismo cultural mediante a creación da Ruta de Antonio Palacios, coa impresión de folletos promocionais que permiten aos visitantes coñecer os edificios máis emblemáticos do arquitecto, unha figura clave para o patrimonio arquitectónico do municipio.

“A Ruta de Antonio Palacios é só un exemplo de como estamos traballando para poñer a Porriño no mapa. A través desta e outras actividades, estamos non só promocionando o noso patrimonio cultural e arquitectónico, senón tamén fomentando a economía local e o emprego”, subliña Lorenzo.

O balance é claramente positivo. “O Concello do Porriño demostrou que, con creatividade, traballo en equipo e unha visión clara, é posible transformar a tradición en motor de desenvolvemento económico e cultural”, engadiu o alcalde.

Así, con a vista posta en novas iniciativas, o Concello continúa o seu camiño cara a un futuro no que o turismo é unha das pezas clave para seguir crecendo. “O noso obxectivo é seguir creando experiencias únicas que, ademais de ser atractivas para os turistas, fortalezcan o sentido de pertenza e orgullo da nosa veciñanza”, concluíu o rexedor.

Este ano, o Concello conseguiu deixar unha pegada tanto nos turistas como nos porriñeses, consolidándose como un destino dinámico que mira ao futuro sen perder de vista as súas raíces.