Novas

Danos ao mobiliario urbano

Dende as concellerías de Parques e Xardíns e Limpeza denuncian que nos últimos días téñense producido unha serie de danos contra o mobiliario urbano, aparecendo pintadas nos elementos de xogo dos parques infantís, colectores de lixo, marquesinas e outros elementos que se atopan na vía pública.

Isto conleva que teñan que ser inutilizados para a súa reparación e un perxuízo económico que pagamos todos, o mobiliario urbano é patrimonio de todas as veciñas e veciños do Porriño. Por iso, dende o Concello do Porriño facemos un chamamento ao civismo e a que non se repitan estas accións que perxudican ao conxunto da cidadanía.

Lembramos que estes feitos son constitutivos de infracción administrativa, contemplando sancións económicas que van dende os 100 aos 600 euros

31/07/2023 in Alcaldía, Parques e xardíns, Vías e obras

O autobús LabEmprende fai escala no Porriño

O busde Lab Emprende, o proxecto educativo itinerante promovido pola Fundación La Caixa a través de EduCaixa, fixo escala no Porriño, incluíndo a nosa vila no percorrido que está realizando por diferentes localidades de España, para que pequenos e maiores, principalmente mozos, coñezan o mundo do emprendemento.
 
Para iso utilizan as últimas tecnoloxías, creando un espazo multimedia con diferentes actividades interactivas, que poñen de manifesto o proceso do emprendemento, as súas características e os valores dunha actitude emprendedora.
 
A concelleira de Educación, Carolina González, visitou a unidade móbil esta mañá para coñecer de primeira man como se desenvolve esta actividade que conta coa colaboración do Concello do Porriño.
O espazo interior de este bus comprende cinco ámbitos de experimentación: Emprender é unha actitude; Somos emprendedores; Mira. Aprende a observar; Pensa. Solucións innovadoras; Fai. Da idea ao negocio e Empeza. Si queres, podes.
 
Ao LabEmprende poden subirse principalmente mozos e mozas de idades comprendidas entre os 14 e os 18 anos.
 
“É unha proposta moi interesante que permitirá aos mozos e mozas estimular novas formas de pensar e de actuar, permitíndolles desplegar os seus talentos e potenciais”, apuntou a concelleira, “Por iso convido á mocidade a visitar este bus e descubrir todo o que lles pode ofrecer”.
31/07/2023 in Alcaldía, Educación e tecnoloxía

O Parque Piñeiro estreará novas zonas de xogo e espazos de lecer

O Concello do Porriño está a executar as obras de reacondicionamento e mellora do Parque Piñeiro, en Torneiros, unha área de xogo que constitúe o principal punto de encontro para os nenos e nenas da parroquia e da que gozan preto de 800 pequenos e pequenas que residen na súa contorna, ademais do alumnado dos centros educativos próximos que o utilizan como espazo de aprendizaxe ao aire libre.
 
“A situación que presentan moitos dos elementos instalados nesta área infantil poñen en perigo a seguridade dos nenos e nenas que diariamente concorren ao mesmo, polo que resultaba imprescindible a súa reparación”, explicou o alcalde, Alejandro Lorenzo.
 
O proxecto, que conta cun orzamento de 44.103 euros, reacondicionará un espazo de 1.300 m2 e inclúe a creación unha nova área de xogo, ampliando a oferta de actividades de lecer a nenos e nenas de idades post-infantís nunha área de 550 m2.
 
Os traballos contemplan a reparación e substitución de elementos de xogo danados, a reparación do pavimento, instalación de novos elementos como un novo tobogán, unha tirolesa de 20 metros de lonxitude ou unha pirámide de 3,5 m de altura, así como novo mobiliario urbano que fará deste un espazo verde para distrute de todas e todos.
 
Cabe destacar que se integrarán os xogos habituais con xogos accesibles e adaptados para nenos e nenas con problemas de mobilidade, para todas e todos poidan facer uso por igual deste parque.
“Queremos ampliar a oferta de actividades de espazos e actividades de lecer en Torneiros e no resto do Porriño, ofrecendo novas posibilidades de xogo activo para fomentar o desenvolvemento físico, cognitivo, emocional e social dos máis pequenos”, concluíu o rexedor.
 
Esta é unha das intervencións impulsadas polo Concello do Porriño para a posta en valor da parroquia de Torneiros, unha das máis poboadas do municipio con 3.950 habitantes. Os polígonos residenciais, onde se atopa o Parque Piñeiro, concentran o 98% da súa poboación e neste punto estase a intervir con diversas actuacións de mellora, entre as que destaca o proxecto de rehabilitación a nivel de barrio que achegará 1 M á veciñanza para a reparación das súas vivendas. Nas próximas semanas publicaranse as bases para a solicitude destas axudas.
 
Ademais, o Concello do Porriño adianta que destinará 300.000 euros máis de fondos propios a diferentes melloras e obras dirixidas a mellorar a calidade de vida da veciñanza desta parroquia.
31/07/2023 in Alcaldía, Parques e xardíns, Parroquias

Cortes de tráfico no centro urbano pola celebración de Porrigalia

A Policía Local do Porriño informou hoxe dos cortes e restricións de tráfico que se aplicarán os 22, 23, 24 e 25 de xullo no centro urbano pola celebración de Porrigalia.
 
A avda. Domingo Bueno estará cortada ao tráfico e non se poderá estacionar, no tramo que vai dende o número 1 ata o cruzamento con Pío XII, dende as 9 h do sábado e ata as 9 h do luns. A prohibición de estacionamento nesta rúa estenderase ata o cruzamento con Fernández a partir das 15h do sábado e ata o luns.
 
Na rúa Pío XII estará prohibido estacionar dende o sábado en ambas marxes ata o acceso á rúa Fontevella e ás 12h procederase ao corte da rúa dende ese punto ata o cruzamento con Ramón González. Ambas permanecerán cortadas ao tráfico ata o mércores.
 
Dende o luns ás 12 h e ata o mércores ás 9 h cortarase ao tráfico e estará prohibido estacionar na rúa Antonio Palacios, dende o cruce con Enrique Peinador (sindicatos) ata o cruce con Pérez Leirós.
O luns, de 16 h a 19 h, cortarase tamén o tráfico na rúa Ramiranes dende a rotonda da Central ata o cruce coa rúa Estación.
 
En todos os casos, permitirase o acceso aos garaxes con vado.
21/07/2023 in Tráfico

Comunicado do Concello do Porriño ante a agresión acontecida en Pontellas

Dende o Concello do Porriño manifestamos a nosa máis enérxica condena á agresión sexual acontecida na madrugada do martes nas festas de Pontellas e o noso total apoio e solidariedade coa vítima e a súa familia, poñendo a súa disposición os recursos de apoio psicolóxico e protección que requira. A vítima interpuxo onte a denuncia ante a Garda Civil que investiga os feitos para dar cos agresores.
 
Dende o Concello, a petición da familia coa que mantivemos contacto en todo momento, facemos un chamamento á prudencia na difusión de informacións e pedimos o máximo respecto para preservar os seus dereitos e intimidade.
 
Reiteramos, de maneira clara e decidida, o noso rexeitamento contra calquera forma de violencia machista. O noso compromiso na loita contra calquera conducta que atente contra a dignidade e a integridade física ou moral das mulleres é firme.
 
Lembramos que nos eventos organizados por este Concello as mulleres teñen á súa disposición, nun lugar accesible e céntrico, o Punto Violeta ao que poden acudir en caso de sufrir ou ser testemuña dunha agresión sexual e ser atendidas por persoal cualificado nesta materia de inmediato.
21/07/2023 in Alcaldía

A delegada da Xunta mantén un encontro co Goberno Municipal para abordar proxectos e necesidades do Porriño

A delegada territorial da Xunta de Galicia en Vigo, Ana Ortiz, mantivo este mércores unha xuntanza de traballo co alcalde, Alejandro Lorenzo,  e parte do equipo de goberno do Porriño.
 
A representante autonómica e o rexedor abordaron os temas relacionados coa administración galega e que son prioritarios para o concello en materia de saneamento, cultura ou educación, entre outros. Así, durante a xuntanza fixeron repaso dos proxectos e necesidades que dependen da Xunta e estableceron unha folla de ruta para o traballo conxunto
21/07/2023 in Alcaldía

O Porriño mellora a accesibilidade do Polideportivo Municipal

O Concello do Porriño está a executar a mellora da accesibilidade e adecuación dos dous pavillóns do polideportivo municipal para garantizar a accesibilidade nas principais instalacións deportivas do municipio.

Os traballos, que avanzan a bo ritmo, adaptarán o pavillón municipal ás necesidades dos e usuarias con diferentes tipos de mobilidade, con percorridos accesibles que mellorarán os accesos, adecuándoas tamén para o desenvolvemento de actividades de deporte adaptado. Ademais, permitirán que os nenos e nenas dos colexios poidan facer uso destas instalacións.

O alcalde, Alejandro Lorenzo, e o concelleiro de Deportes e Benestar Social, Abel Estévez, visitaron as obras acompañados polo presidente de COGAMI, Ángel Holguera, e o directivo da Federación, Celso Álvarez, para valorar conxuntamente o desenvolvemento das mesmas, xa que dende a entidade se está a asesorar o proxecto.

“As barreiras arquitectónicas destas instalacións perxudicaban a moitos usuarios, era unha cuestión pendente dende hai tempo que urxía atender xa que se trata dun lugar moi concurrido e do que todas e todos debemos disfrutar, sen impedimentos”, explicou o alcalde, “Contamos co asesoramento de COGAMI para facelo , xa que ninguén mellor que eles para asegurar un resultado que atenda ás necesidades reais das persoas con problemas de mobilidade”.

Engadiu o rexedor que a colaboración entre ambas entidades irá máis alá desta intervención, contando co seu asesoramento noutros proxectos a desenvolver . “No novo orzamento consignamos unha aportación a COGAMI de 6.000 euros para levar a cabo accións conxuntas dirixidas á inclusión efectiva, social e laboral das persoas con discapacidade e a eliminación de barreiras arquitectónicas. Queremos facer do Porriño un lugar amable e accesible para todos”.

ACCESOS E VESTIARIOS ADAPTADOS EN AMBAS PISTAS

Os traballos no pavillón principal centráronse en garantizar o acceso á pista e ás salas de ximnasia para persoas con mobilidade reducida e na construcción dun vestiario adaptado ao mesmo nivel. Para iso construíronse dúas plataformas que permiten acceder de maneira segura ás instalacións dende o exterior.

No segundo pavillón a intervención centrouse na ampliación de espacios baixo a grada e a construción dunha plataforma de acceso e tamén da creación dun itinerario interno que conecte a segunda pista coa principal, permitindo desta maneira a mobilidade no complexo sen ter que saír ao exterior.

21/07/2023 in Alcaldía, Deportes

A Mochila da Luz chega ao Porriño

Hoxe recibimos no Porriño á Mochila da Luz, unha mochila que percorre o Camiño Portugués desde Oporto cargada de luz e esperanza organiza ao longo do ano saídas desde Oporto a Santiago que, a raíz da pandemia, dedícanse especialmente ás vítimas do covid, aínda que nesa mochila peregrina cárganse de xeito simbólico recordos de moitas persoas que quedaron atrás.

A súa porteadora este ano foi a peregrina Mila Rodao, que esta tarde xunto aos peregrinos que a acompañan chegou á vila do Louro onde foi recibida polo alcalde, Alejandro Lorenzo, concelleiros do goberno municipal e os usuarios e usuarias da unidade de AFAGA no Porriño que tiñan preparado un regaliño para eles.

Trátase dunhas fermosas cunchiñas que pintaron para que acompañen a estes peregrinos durante o seu Camiño, unha das cales pendura xa da Mochila da Luz.

Aos pés do Concello os estaban agardando todos eles xunto aos gaiteiros, Yoli e Anxo, e todos xuntos botamos uns bailes.

BO CAMIÑO!

21/07/2023 in Cultura e festas, Turismo

Recuperadas máis de 1600 ferramentas líticas do xacemento paleolítico das Gándaras de Budiño

O equipo de investigadores liderado polos arqueólogos Eduardo Méndez-Quintas e Manuel Santonja, da Universidade de Vigo e do Centro Nacional de Investigación sobre a Evolución Humana (CENIEH), retoman estes días os traballos de investigación das Gándaras de Budiño, o xacemento paleolítico máis importante e antigo de Galicia.
 
Esta sería a terceira intervención na zona, e a primeira dende que se determinou que os niveis máis antigos do xacemento datan de máis de 310.000 anos e se confirmou que no Porriño viviron os primeiros habitantes de Galicia.
 
Os traballos, que contan co apoio económico do Concello do Porriño, consistiron na última campaña nunha excavación dun área de 30 m cadarados, que complementaban a fase de sondaxes arqueolóxicos de 2018 que deu valiosa información sobre as condicións de formación dos depósitos xeolóxicos e, sobre todo, das densas acumulacións de ferramentas líticas que se atopan no lugar. E é que se trata dun xacemento de referencia para Galicia tras o seu descubrimento en 1961 por Emiliano Aguirre, reputado arqueólogo impulsor do proxecto de Atapuerca.
 
Naquel momento determinouse erroneamente que tiña unha antigüidade duns 26.000 anos, algo que levou a concluír que no noroeste da Península Ibérica existía un paleolítico anacrónico e tardío respecto do que acontecía no resto do suroeste europeo e consolidaba a equivocada idea do atraso secular de Galicia.
 
Nesta pequena superficie recuperáronse xa 1623 artefactos líticos, entre os que destacan abundantes exemplos de bifaces e outras pezas características do tipo achelense.
 
O alcalde, Alejandro Lorenzo, acompañado polo concelleiro Marcos Martínez, visitou hoxe o xacemento para interesarse polo desenvolvemento dos traballos e incidiu no “valor cultural e patrimonial que estes teñen para O Porriño xa que nos axudan a escribir a nosa historia e tamén, en gran parte, a do resto do mundo”. Incidiu o rexedor en que a man do Concello estará sempre tendida para “que continuedes coa investigación e a posta en valor deste tesouro que gardou a nosa terra durante séculos”.
 
Os traballos desta terceira fase concluirán este venres e, en colaboración co Concello do Porriño, os nenos e nenas do campamento municipal participarán nunha visita guiada para coñecelos. Ademais será tamén unha xornada de portas abertas na que todo aquel que queira coñecer de primeira man a excavación poida facelo guiado polos arqueólogos que dirixen o estudo.
21/07/2023 in Cultura e festas, Patrimonio Municipal