Novas

O scalextric de primeiro nivel chega ao Porriño

Esta fin de semana disputarase na vila do Louro a primeira proba en Galicia do Campionato Legend patrocinado pola marca SRC, que será puntuable por primeira vez para o European RallySlot Legend. Unha proba que discorrerá esta fin de semana, o venres 1 e o sábado 2 de marzo, organizada polo Slot Club Porriño en colaboración co Concello do Porriño.

“É toda unha honra para O Porriño ser sede dunha das probas deste campeonato e isto é posible grazas ao Slot Club Porriño, que foron quen de posicionarse como un club de referencia nesta disciplina e achegar á mesma a moitos porriñeses que a descoñecían”, explicou o alcalde, Alejandro Lorenzo.

O rexedor, xunto co presidente do club, Jorge Romero e o piloto Bruno Romero, presentou hoxe o Rally que enfrentará a máis de corenta pilotos chegados dende toda a xeografía galega e norte de Portugal. Estarán presentes os mellores pilotos do Slot Club Porriño, que veñen de colleitar o título galego de Escuderías na pasada edición deste campeonato, así como o segundo posto na categoría Grupo B e en Master 50. Para a ocasión contarán con rivais dos clubes de Barbadás, Braga, Lucus e Narón entre outros, que virán ao Porriño con ganas de vencer aos rápidos pilotos locais. Bruno Romero, Anxo Pazo o Jorge Romero serán algúns dos pilotos de casa que intentarán pelexar pola vitoria nas súas categorías.

A proba arrancará o venres ás 20 h cunha primeira manga, e continuará o sábado todo o día, arrancando os primeiros participantes ás 10 h. Os pilotos terán que percorrer os 20 tramos que ten preparada a organización no menor tempo posible. A  marca patrocinadora SRC proporcionará os premios aos primeiros clasificados, ademais de varios sorteos entre os participantes.

 

28/02/2024 in Alcaldía

O Porriño extenderá a rede de saneamento en Budiño para dar servizo a 300 veciños

O Concello do Porriño invertirá máis de 1 M de euros na conexión integral da parroquia de Budiño. Ás obras de extensión da rede no Picouzo, que dará servizo a 29 vivendas e ao colexio, sumaranse as dos barrios de Benunes, Eiriz, Rozadas, e parte da Vacaría e Mantelle.

En total, executaranse 4 km de rede e unhas 100 acometidas, o que permitirá que máis de 300 veciños/as da parroquia dispoñan de conexión a este servizo.

As concellerías de Vías e Obras e Urbanismo contan xa co proxecto e están só a espera das pertinentes autorizacións sectoriais, xa solicitadas, para proceder á licitación destes traballos.

A inversión para levar a cabo estas actuacións ascende a 538.529 euros no caso de Benunes e 345.000 no de Sobral Eiriz.

“Trátase dun dos proxectos de saneamento máis importantes, non só pola inversión que require senón polo número de vivendas que abastecerá. O noso compromiso coa execución do saneamento integral é firme, na parroquia de Budiño e en todas as parroquias do municipio, explicou o alcalde, Alejandro Lorenzo, “Traballamos para axilizar todos os trámites e axilizar a nosa folla de ruta todo o posible, sabemos cales son as necesidades, temos os proxectos e sabemos da urxencia que teñen para a veciñanza. Por iso son e serán sempre prioritarios”.

Unha vez rematen estas obras estará conectado o 90% da parroquia de Budiño, quedando só por executar tres proxectos xa redactados que beneficiarán a 180 veciños máis: o da Arrotea, cun orzamento de 180.000 euros, o do Cerquido con 80.000 euros e en Rega da Lama por 80.000 euros.

27/02/2024 in Alcaldía, Vías e obras

Charla informativa sobre o Documento de instrucións previas

O Centro Cultural acollerá o 7 de marzo unha charla informativa sobre o documento de instrucións previas organizada polo Centro de Saúde do Porriño coa colaboración do Concello.
 
Esta actividade, que forma parte do proxecto de investigación `Efectividade dunha intervención comunitaria no rexistro do Documento de Instrucións Previas”, ten a finalidade de informar á veciñanza desta ferramenta da que dispón para conseguir que o seu proceso de final de vida transcurra conforme aos seus valores e vontade.
 
“É importante difundir a utilidade deste documento e capacitar á poboación para a toma de decisións anticipadas”, explicou a concelleira de Sanidade, Teresa Veloso, “Podemos deixar constancia da nosa vontade e a xente debe sábelo e tamén como facelo”.
 
Mediante o documento de instrucións previas unha persoa maior de idade, capaz e libre, manifesta anticipadamente a súa vontade sobre os coidados e tratamentos que podería precisar no futuro e o destino final do seu corpo, co fin de que esta sexa respectada no momento en que por determinadas circunstancias non poda expresala persoalmente.
 
A charla dará comezo ás 19 h e correrá a cargo de dous médicos e un traballador social do Centro de Saúde do Porriño.
27/02/2024 in Alcaldía, Sanidade

En marcha a conexión á rede do núcleo de vivendas da Droza

A rede municipal de saneamento do Porriño conecta novas vivendas na parroquia de Cans. Trátase concretamente do núcleo de A Droza, no que se están a executar as obras de mellora do saneamento de fecais que permitirán conectar 9 vivendas que ata o de agora non disponen de acceso a este servizo.
O alcalde, Alejandro Lorenzo, o concelleiro de Vías e Obras, Ramón Porto, e o concelleiro de Parroquias, Marcos Martínez, supervisaron hoxe os traballos que incluirán tamén a mellora da capa de rodadura na zona a intervir.
 
“Conectar cada vivenda do Porriño á rede pública de saneamento foi e seguirá sendo unha prioridade ata que toda a veciñanza dispoña deste servizo, reiterou o alcalde, Temos os proxectos, sabemos cales son as necesidades, queremos suprimir ao máximo a burocracia para chegar co traballo feito á hora de acceder á financiación. O noso obxectivo é o 100% do saneamento canto antes.
 
Para a conexión deste núcleo de vivendas á rede de fecais, estase a realizar un cruce con perforación horizontal dirixida na estrada N-120. Por outra banda, o firme atópase en mal estado, polo que se inclúe a reposición do firme na zona máis danada da intersección e a reposición da sinalización horizontal. Cabe destacar que se instalou unha canalización de recollida de augas residuais de PVC liso de diámetro 315 mm cunha lonxitude de 70,5 m e a execución de oito pozos de rexistro. Foi precisa a reposición de tres acometidas de saneamento.
 
Estes traballos, financiados con cargo ao Plan Concellos 22-23 da Deputación de Pontevedra, supoñen unha inversión de 102.073 euros que contempla tamén a mellora do asfaltado e saneamento en Covelo, na parroquia de Atios.
 
Esta é unha das actuacións de extensión da rede de saneamento e asfaltado levadas a cabo polo Concello do Porriño no marco do plan provincial do pasado exercicio, que supuxeron unha inversión de 262.000 euros. Concretamente interviuse nas parroquias de Mosende, Pontellas, Atios, Budiño, Chenlo e Cans
27/02/2024 in Alcaldía, Vías e obras

A Xunta Local de Seguridade aposta por reforzar a coordinación para unha resposta máis eficaz

A Xunta Local de Seguridade do Porriño, na que se atopan representados todos os corpos de seguridade que actúan no municipio, reuníuse onte  para abordar de maneira conxunta diversos temas relacionados coa seguridade.

Estiveron presentes o subdelegado do Goberno en Pontevedra, Abel Losada, o alcalde do Porriño, Alejandro Lorenzo, o tenente de Alcalde, Carlos Martínez, o asesor do subdelegado, Anxo Barros, o Coronel Xefe da Comandancia da Garda Civil, Simon Venzal, o Capitán da Garda Civil do Porriño, o Inspector Xefe da Policía Local do Porriño, Daniel Rodríguez,  e representantes de ambos corpos.

A Xunta centrouse na análise da seguridade no Porriño e nos procedementos de colaboración, coordinación e cooperación entre os corpos e forzas de seguridade con presenza no Concello.

Neste senso, acordouse reforzar  o intercambio de información entre todos eles,  asegurar a coordinación operativa das actuacións co fin de conseguir unha maior eficiencia e eficacia na resposta.

O seguemento do protocolo VioGén, a raíz do convenio asinado entre o Concello do Porriño e a Comandancia da Garda Civil, a petición do Concello, foi outro dos puntos relevantes da xuntanza. Para abordalo con máis profundidade, pois trátase dun tema especialmente relevante para o executivo local, convocarase próximamente a Mesa local de coordinación contra a violencia de xénero.

“O Porriño é un concello seguro, vivo e dinámico no que estamos preaparados para garantir a seguridade da veciñanza”, explicou o alcalde, Alejandro Lorenzo, “E isto non podería ser así sen o encomiable labor da nosa Policía Local e da Garda Civil, aos aque agradezco enormemente o traballo que realizan”.

21/02/2024 in Alcaldía

Arranca o Plan Integrado de Emprego do Porriño no que participan un centenar de persoas

O Plan Integrado de Emprego do Porriño xa está en marcha cun obxectivo moi claro: mellorar a ocupabilidade e a promover a inserción laboral dun centenar de porriñeses/as.

Nesta iniciativa de emprego e formación, promovida pola Xunta de Galicia e o Concello do Porriño, participan 100 persoas desempregadas, que ao longo dun ano recibirán de información, orientación e asesoramento para a búsqueda de emprego.

O Concello do Porriño impulsa este programa co compromiso de acadar o 45% de inserción laboral dos participantes e en todo caso, dotalos das ferramentas que precisan para mellorar a súa empregabilidade.

“A mellor inversión que un concello pode facer é a dirixida a ofrecer á súa veciñanza é a súa capacitación e accesibilidade a un posto de traballo”, explicou o alcalde, Alejandro Lorenzo, “Non deixaremos de traballar e facer todo o que estea na nosa man para ofrecerllo”.

O rexedor, que participou na entrega de material e presentación dos/as participantes, aproveitou para trasmitirlles “o respaldo do Concello e de todo o equipo de Porremprego neste proceso que emprendedes de búsqueda de emprego, estamos aquí para axudarvos e acompañarvos”.

E é que durante todo o proceso contarán cun seguemento personalizado de inserción adaptado e individualizado para cada unha das persoas participantes.

Ademais, impartirase formación, coa organización de diversos cursos. De maneira complementaria levaranse a cabo técnicas de coaching, intelixencia emoción ou técnicas de motivación para a búsqueda de emprego. Desenvolveranse obradoiros nos que entrenen habilidades sociolaborais e simulación de entrevistas.

Outro dos eixos transversais deste programa é o do fomento da capacidade emprendedora, prospección empresarial e mobilidade laboral. Ademais realizarase un casamento adecuado entre a oferta e a demanda, recollendo a oferta laboral existente na controna e seleccionando ás/os candidatos/as idóneos para cubrila.

Unha vez concluída a formación teórica e práctica, complementarase coa realización de prácticas profesionais en empresas colaboradoras baixo a supervisión dun tutor.

Para a posta en marcha deste Plan Integrado de Emprego, o Concello do Porriño contou cunha subvención da Consellería de Promoción do Emprego e Igualdade de 220.000 euros, aos que se suma unha aportación municipal de 55.000 para a mellora da empregabilidade no municipio.

20/02/2024 in Alcaldía

O Entroido volverá ao Porriño o 24 e 25 de febreiro

O Concello do Porriño fixo públicas hoxe as novas datas nas que se desenvolverá a programación do Entroido que foi aprazada polo mal tempo. As comparsas volverán percorrer as rúas da vila o 24 de febreiro, cando retomaremos toda a programación.

O sábado 24 de febreiro arrancará a festa co pregón de Afaga Alzhéimer e o desfile de comparsas sairá ás 18 h do pavillón muncipal. A programación será a mesma que a prevista para o sábado de Entroido, excepto o concerto dos Gin Tonic´s, xa que no seu lugar tocarán Los Coleguitas.

O domingo 25 as rúas vestiranse de loito e celebrarase, cos mesmos horarios e programación, o velorio e enterro da Sardiña. Hai que sumar este día o fin de festa que será a cargo da Turre´s Band unha vez finalizados os actos fúnebres.

Queremos agradecer ás comparsas participantes, grupos musicais, de animación…. a súa disposición para coordinar axendas e conseguir que o Entroido, aínda que uns días máis tarde, se celebre por todo o alto.

14/02/2024 in Alcaldía, Cultura e festas

Retomamos o Entroido co desfile de comparsas do martes

O tempo comeza a dar unha tregua e no Porriño aproveitan para retomar o seu Entroido. Tras coordinarse coas diferentes comparsas, a concellería de Cultura, que dirixe Bienvenido Estévez, acordou celebrar mañá o desfile de Entroido no que están confirmadas 18 comparsas, máis de 1600 participantes nas rúas da vila.

Para o resto da programación aprazada fixarase data nos próximos días. O desfile arrancará mañá ás 19 h da praza de San Sebastián e percorrerá o centro da vila ata pasar a praza Arquitecto Antonio Palacios.

 

12/02/2024 in Alcaldía, Cultura e festas

O Porriño sumará 17 traballadores ao seu cadro de persoal

O Concello do Porriño sumará a 17 novos/as traballadores/as ao seu cadro de persoal no marco do Plan  +Provincia da Deputación de Pontevedra.

A administración local recibirá 211.000 euros do ente provincial para a contratación de persoas que se atopen en situación e desemprego, tal e como vén de aprobarse na súa Xunta de Goberno. Isto supón o 72,30 % do orzamento total, financiándose o restante con fondos municipais.

Serán concretamente 6 peóns forestais, 3 conserxes, 2 peóns de obras públicas, 1 analista de xestión, 1 publicista, 1 auxiliar de enfermería, 1 oficial de albanelería, 1 oficial de soldador e 1 oficial de carpintería. Todos eles engrosarán o persoal dos diferentes departamentos municipais.

“Con estas incorporacións poderemos mellorar o servizo que prestamos aos cidadáns e atender as súas necesidades como corresponde. Moitas veces nos vemos atados de mans por non contar co persoal suficiente para dar a resposta que queremos e debemos dar, por iso serán de gran axuda para nós”, explicou o alcalde, Alejandro Lorenzo.

As persoas interesadas deben estar inscritos no Servizo Público de Emprego , xa que será este organismo o fará a preselección.

12/02/2024 in Alcaldía, Emprego e formación

A piques de abrir as súas portas a cafetería LUME, un espazo de inclusión e encontro

O Porriño acolleu hoxe a presentación dun proxecto pioneiro en Galicia impulsado por Aceesca Asociación en colaboración coa Xunta de Galicia e o Concello do Porriño: o programa de Formación Dual de hostalería para persoas con diversidade intelectual.
 
Foi nas instalacións do Centro Cutlural Alba, acondicionadas e cedidas polo Concello do Porriño para albergar a formación que desenvolve a asociación. Trátase dun proxecto financiado pola Consellería de Promoción do Emprego e Igualdade que, en colaboración co Concello, permitirá que a cafetería habilitada para servir de centro de formación, abra tamén para a atención ao público.
 
O obxectivo deste programa de formación dual é que as persoas con discapacidade intelectual poidan obter un certificado de profesionalidade para exercer un oficio e facilitar a súa incorporación ao mercado laboral común. Mediante contratos de formación en alternancia a través de Aceesca e na práctica no centro habilitado en Torneiros, avanzarán na súa capacitación para que –unha vez concluido o proxecto- poidan atopar unha oportunidade nas empresas de hostalería da contorna.
A maiores desta modalidade que se implementa por primeira vez, Aceesca tamén desenvolverá un programa de formación dual de xardinería, campo no que xa tiñan levado a cabo unha iniciativa deste tipo.
 
Se ben o curso comezou xa o pasado mes de xaneiro, a cafetería Lume abrirá as súas portas o 24 de febreiro “pretendendo ser ademais dunha actividade formativa un punto de encontro para a veciñanza de Torneiros”, explican dende Aceesca.
 
No mesmo sentido se manifestou o alcalde, Alejandro Lorenzo, que agradeceu a Aceesca a súa implicación coa integración laboral e social das persoas con diversidade e esta iniciativa en particular, que “non só será enriquecedora para os participantes senón tamén para a parroquia de Torneiros, creando un lugar onde atoparse nun ambiente onde se farán notar os valores do respecto, a pluralidade e a inclusión”.
12/02/2024 in Alcaldía, Política Social