Novas

O Concello daralle a palabra ás rapazas e rapaces e presentarase ao ‘Recoñecemento de Cidade Amiga da Infancia’ de UNICEF

Trátase dun proceso no que nenos, nenas e adolescentes dos distintos centros públicos do Porriño, terán a oportunidade de expresar a súa opinión sobre aqueles aspectos que mais lle preocupen, así como tamén achegar as propostas de solución que consideren, co compromiso de que serán tidas en conta polo Goberno Municipal.

Na mente do Concello está presentarse ao ‘Recoñecemento de Cidade Amiga da Infancia’, que promove UNICEF, e polo tanto trata de camiñar cara unha política local de infancia baseada nun diagnóstico da realidade dos nenos e nenas e da localidade, realizada de forma participativa.

Lourdes Moure, Concelleira de Xuventude e Educación,  a través da súa OMIX , e promotora da iniciativa considera que “o papel dos centros educativos é fundamental para  iniciar este camiño, xa que ademais de axudarnos a chegar ao conxunto da poboación implicada, poden converterse nos principais dinamizadores da devandita participación”, polo que mantivo unha xuntanza con representantes dos centros escolares para presentarlles a iniciativa e coordinar con eles a súa posta en marcha.

Nesta primeira toma de contacto a concelleira comprometeuse tamén darlles a palabra aos nenos e ás nenas do municipio nun ‘Pleno infantil’ que se realizará no mes de novembro, co motivo da conmemoración do Día dos Dereitos da Infancia.

O Concello pretende con isto, sentar as bases dun futuro órgano estable de participación infantil, xa que este tipo de accións non deben ser puntuais, polo tanto xa están previstas tamén outras iniciativas como a instalación de caixóns de suxerencias nos centros escolares, ou habilitar unha conta de correo na que calquera persoa poda realizar as súas aportacións.

15/10/2017 in Alcaldía, Educación e tecnoloxía

‘Llega 800’, está a levar adiante no Porriño as actuacións técnicas necesarias nas instalacións de recepción dos usuarios da Televisión Dixital Terrestre (TDT)

A entidade ‘Llega 800’, está a levar adiante no Porriño as actuacións técnicas necesarias nas instalacións de recepción dos usuarios da TDT, que son de balde para os veciños afectados polo inicio da prestación do servizo de telefonía móbil 4G, que pode afectar á recepción da televisión dixital terrestre.

Dacordo coa Orde Ministerial que regulamenta ente proceso, o prazo para solicitar as actuacións por parte dos usuarios que se vexan afectados é de  6 meses dende a data de posta en servizo das estacións de telefonía móbil.

Aínda que no caso do Porriño este prazo cumpriuse xa, o mesmo amplíase ata o 31 de outubro para solicitar as actuacións, de balde, por parte dos usuarios da TDT polas posíbeis afectacións ocasionadas polo 4G.

No futuro, no Porriño, poderían acenderse novas estacións de telefonía móbil, na  banda de 800 MHz, se así o consideran preciso os operadores para mellorar este servizo: neste caso atenderíanse, tamén de balde, as incidencias que houbese, abríndose outro prazo de 6 meses dende a data de acendido.

Os veciños que poidan verse afectados por estas incidencias poden poñerse en contacto con ‘Llega 800’ chamando ao teléfono 900 833 999.

14/10/2017 in Alcaldía, Benestar, Educación e tecnoloxía, Igualdade, Turismo

20 persoas sen emprego, do Porriño, asinan un contrato de traballo por 9 meses e, ao mesmo tempo, adquiren unha formación oficial no Obradoiro ‘Covelo II’

20 personas que estaban na procura de emprego, poderán traballar ata xullo de 2018 e, ao mesmo tempo, adquirir unha formación coma técnicos de atención sociosanitaria en domicilio e institucións e auxiliares da construcción, no obradoiro de emprego ‘Covelo II’.

Este mércores pola mañá, a concelleira de Emprego, Benestar e Igualdade, Soledad Girón, xunto co delegado da Xunta en Vigo, Ignacio López-Chaves, o xefe territorial da Consellería de Economía, Emprego e Industria, Ignacio Rial, e a directora do obradoiro, Begoña Echegaray, deu a benvida na sede de Porremprego, no Multiusos de Torneiros, aos participantes neste obradoiro e

No acto, Soledad Girón subliñou a importancia da colaboración entre diferentes administracións para “crear emprego” e, cualificou de “esencial” a formación coma canle para aumentar as posibilidades de voltar ou introducirse no mercado laboral.

A concelleira lembrou que este obradoiro é un bo exemplo desa colaboración posto que a súa realización é posible grazas a achega de 280.000€ por parte da Consellería de Economía, Emprego e Industria, cantidade á que hai que sumar 45.000€ que aporta o Concello do Porriño.

Girón indicou que os 20 participantes neste obradoiro teñen un contrato laboral de formación, obterán un certificado que vailles permitir acreditar, oficialmente, que contan cos comeñecentos que adquirirán no mesmo e, subliñou o feito de que a ampliación deste contrato pasa de 6 meses doutros ano a 9, o cal “ademáis de mellorar a súa preparación fai que adquiran dereitos que non terían cun contrato de so 6 meses de duración”.

A concelleria sinalou que o Goberno local está a impulsar, ademáis da colaboración co Goberno de Galicia e a Deputación de Pontevedra, a sinatura de convenios formativos con empresas privadas que permitiu que ducias de persoas estean traballando.

Froitos destas iniciativas, dacordo cos datos publicados a principios deste mes polo Ministerio de Emprego e Seguridade Social,a  taxa de desemprego situouse no Porriño no 18%, 6 puntos menos que cando o actual Goberno Local empezara  o seu mandato: daquela a porcentaxe do paro estaba  no Porriño por riba do 24% e 2.139 veciñas e veciños estaban na procura dun posto de traballo, preto de 500 máis que na actualidade.

Soledad Girón reiterou que a creación de emprego “é a prioridade número un deste Goberno local” e repetiu que todas as xestións e os recursos municipais están orientados a esta finalidade, algo que está a funcionar posto que O Porriño pechou setembro con 1.654 persoas desempregadas, unha realidade que non se vía dende hai case unha década e en so un ano “o paro reduciuse na preto de 5,5 puntos”, un dato inédito.

11/10/2017 in Alcaldía, Benestar, Emprego e formación, Limpeza

Cada estrada, camiño, lugar e rúa do Porriño estarà nomeada e numerada oficialmente e todo o concello estará cartografiado dixitalmente

Nuns meses, todo O Porriño estará cartografado dixitalmente, e todos os seus camiños, lugares, estradas, carrís, travesías e rúas estarán perfectamente nomeados. Os traballos, impulsados pola alcaldesa, Eva García de la Torre, e que están a ser realizados pola Concellería de Urbanismo, que dirixe Marcelino Coto, xa comezaron e o resultado da primeira fase dos mesmos poderá verse nun prazo de 6 meses.

O obxectivo é que cada casa do concello estea perfectamente sinalada, empezando polo seu emprazamento exacto, o nome da parroquia e do lugar, o camiño no que se sitúa e polo que se accede á mesma-se este é de terra, se grava ou de asfalto- a numeración, unha xeo-referencia que inclúe a súa situación e a dos seus habitantes e unha referencia catastral que pode consultarse, informáticamente, en medio minuto.

A empresa Laya, especializada na realización de rueiros e numeración municipal, en dixitalización cartográfica, elaboración de mapas e publicación dos mesmos en portais web, empezou este martes, no lugar de Pinzal, na parroquia de Cans, este traballo que se prevé estea rematado a vindeira primavera.

Persoal da mesma, “perfectamente identificado cunha acreditación que leva o selo do Concello”, indica Marcelino Coto, percorre xa O Porriño falando cos veciños e tomando os datos que demanda este Sistema de Información Xeográfica (SIG pola súa abreviatura en inglés), que permitirá dispor dos mesmos nun software e,dunha banda, pendurar esta cartografía, para a súa consulta, na páxina web do Concello e, doutra, que servizos municipais coma o Padrón, Estatística ou os servizos de Emerxencia, poidan consultar calquera información que precisen.

“Este proxecto terá tamén outras utilidades esenciais, coma que os envíos que reparte Correos cheguen ao domicilio ao que van dirixidos, algo que moitas veces non sucede posto que os carteiros cambian e cando non coñecen unha parroquia non teñen unha situación exacta na que deixar ese paquete ou esa carta xa que non hai o nome dun camiño e, moito menos o número de cada unha das casas do mesmo”, sinala Marcelino Coto.

Ao mesmo tempo que se leva a adiante esta labor, o Concello pedirá aos veciños de cada lugar que sexan os que decidan os nomes das estradas, travesías e camiños, “en función dos nomes polos que son coñecidos habitual ou historicamente”, nomes que pasarán a ser oficiais e a incorporarse a este novo ‘rueiro’ que, sinala o concelleiro, “mesmo contempla o feito de que nunha finca na que non haxa construción algunha pódase edificar no futuro, asignándolle xa un número por anticipado”.

10/10/2017 in Alcaldía, Educación e tecnoloxía, Urbanismo, comercio e industria

A alcaldesa entrega á Xunta todas as reclamacións dos veciños e pide que haxa “axiña” unha solución para o transporte

A alcaldesa do Porriño, Eva García de la Torre, e o concelleiro de Tráfico, Orlando Márquez, mantiveron este martes, en Vigo, unha xuntanza, solicitada polo Goberno local, co xefe territorial da Consellería de Infraestruturas en Pontevedra, José Luis Díaz Yañez, na que expuxeron os problemas causados na vila tras a posta en marcha do novo Plan de Transportes.

Eva García de la Torre entregou ao xefe territorial todas e cada unha das reclamacións presentadas por veciñas e veciños do Porriño que “víronse afectados por esta desorganización”, logo de que unha das empresas adxudicatarias do servizo de transporte interurbano renunciase a seguir prestando o mesmo,”e de que a Xunta non  preveraa, con suficiente adianto, os graves contratempos que isto causaría aos usuarios”.

A alcaldesa sinalou que estes problemas afectan, especialmente, ás veciñas e veciños de Budiño, “porque elimináronse liñas e frecuencias de Salceda”, e ás veciñas e veciños de Mosende, de Chenlo e de Torneiros, e subliñou que os datos difundidos publicamente pola Xunta e os que se manexaban dentro da propia administración autonómica “non cadraban”.

García de la Torre sinalou coma exemplo que, en teoría, O Porriño tería servizo, dende a Avenida de Galicia ata Vigo cada media hora, algo que na xuntanza púxose de manifesto que non está a ocorrer, e tamén, indica a alcaldesa, o feito de que se suprimiron autocares e horarios, entre eles un dos que tiña máis viaxeiros: o autobús de Vigo a O Porriño das 10 e media da noite.

A rexedora, que cualificou a reunión como moi cordial, afirma que o responsábel de Infraestruturas tomou nota de todo elo, salientou que “deixamos moi craro que unha cousa é o que se di nos papeis e outra o que ocorre na realidade no Porriño co transporte de viaxeiros” e reiterou que a Xunta ten reclamacións “no so do noso Concello, senón de Salvaterra, Salceda, Tui, Ponteareas e Mos” para saber que agora estamos nun problema de falla de planificación no transporte, aínda que constatou que viu o interese do xefe territorial por solucionar axiña esta situación, “e de o servizo se preste con regularidade e con previsibilidade, de xeito que os veciños saiban que cada 20 minutos ou cada media hora hai un autobús e que pasa a unha hora determinada e establecida”.

Neste senso, Eva García de la Torre adiantou que xa hai unha empresa disposta a facerse cargo do servizo de transporte que deixara de prestar a anterior e que agrada que isto faga que “este problema vaia solucionándose”.

10/10/2017 in Alcaldía, Benestar, Tráfico, Turismo

Rapazas e rapaces do Porriño participaron este sábado en’Deporuarte’

Organizado pola OMIX do Concello do Porriño e a Deputación Provincial de Pontevedra, este sábado tiveron lugar na Praza de Antonio Palacios as actividades do programa ‘Deporuarte’, dirixido a mozas e mozos maiores de 12 anos.

O mesmo tiña coma obxectivo que estes aprendese e desenvolver a súa creatividade nalgunhas das principais expresións da cultura urbana a través das iniciativas MusicArte, UrbanArte e CreArte as e os participantes coñecerán disciplinas coma breakdance, turntablism Dj, beatbox, graffiti e personalización de gorras.

Ademais, o programa tivo nesta nova edición un compoñente inclusivo para que as mozas e mozos e as monitoras e monitores con diversidade funcional poidesen participar nas súas actividades, como poideron comprobar a concelleria de Formación, Lourdes Moure, e a responsábel de Cohesión Social y Xuventude,Digna Rivas.

09/10/2017 in Alcaldía, Benestar, Cultura e festas, Educación e tecnoloxía, Igualdade, Turismo

Persoal do PAC do Porriño ensinará a estudantes de Salceda, Mos e O Porriño cómo actuar diante dun infarto

Os concellos de Mos, Salceda e O Porriño colaborarán na celebración do ‘Día Europeo de Concienciación do Paro Cardíaco’, que se celebra o 16 de este mes de Outubro, impulsada dende o Punto de Atención Continuada (PAC) do Porriño, co respaldo da Xerencia da Área Sanitaria de Vigo, por medio dunha actividade que pretende chegar aos máis novos.

‘As túas mans salvan vidas’, foi presentada este xoves no PAC do Porriño nun acto ao que asistiron a alcaldesa de Mos, Nidia Arévalo, a concelleira de Asuntos Sociais, Sara Cebreiro, Teresa Pérez, concelleira de Benestar Social de Salceda de Caselas, e Lourdes Moure, concelleira de Educación do Porriño.

Unha das impulsoras desta celebración, a doutora do PAC Monserrat Rodríguez Cabaleiro, explicou que este proxecto, que se fará xunto co grupo musical   “As Maimiñas”, consistirá nunha actividade lúdica para concienciar ás rapazas e rapaces da importancia de saber que, “cos coñecementos axeitados” poden axudar a salvar unha vida no caso de que unha persoa achegada a eles sofre unha parada cardiorrespiratoria.

‘As túas mans salvan vidas’, ten coma obxectivo lograr que os estudantes  adquiran os coñecementos básicos de reanimación para poder reaccionar nun caso de morte súbita, sabendo que tendo eses coñecementos “increméntase nun 20% a posibilidade de supervivencia”.

A doutora Rodríguez salientou a importancia deste aprendizaxe dende os primeiros anos e de levar a mesma aos colexios, “polos que pasa o cen por cen da poboación” e nos que é posible que aprendan a técnica dunha reanimación cardio-pulmonar (RCP), cómo actuar diante dun paro cardíaco e a quen chamar para pedir axuda.

A actuación dentro dos primeiros 5 minutos despois dunha parada cardíaca, subliñou a doutora, é transcendental e pode marcar a diferencia entre manter a unha persoa con vida ou que morra.

Isto será o que persoal especializado do PAC do Porriño e ‘As Maimiñas’ ensinarán, de xeito ameno, con xogos e cancións, ás rapazas e rapaces dos tres concellos en diferentes actividades que terán lugar o luns día 16 deste mes, no Multiusos de Mos- ás 10:30 e 12:00h-; o día 17 no Auditorio de Salceda-no mesmo horario-e, finalmente, tamén ás mesmas horas, na Praza de Antonio Palacios do Porriño, o 18 deste mes.

06/10/2017 in Alcaldía, Benestar, Educación e tecnoloxía

Este sábado, día 7, na Praza de Antonio Palacios, unha nova edición de ‘Deporuarte’

Desde a OMIX do Concello do Porriño, en colaboración ca Deputación Provincial de Pontevedra,  ponse en marcha  o programa ‘Deporuarte’, dirixido a mozas e mozos maiores de 12 anos.

O mesmo  ten como obxectivo que estes aprendan e desenvolver a súa creatividade nalgunhas das principais expresións da cultura urbana a través das iniciativas MusicArte, UrbanArte e CreArte as e os participantes coñecerán disciplinas coma breakdance, turntablism Dj, beatbox, graffiti e personalización de gorras.

Ademais, o programa terá nesta nova edición un compoñente inclusivo para que as mozas e mozos e as monitoras e monitores con diversidade funcional poidan participar nas actividades de ‘DepoRúarte’.

Os obradoiros desenvolveranse este sábado, día 7 de outubro de 5 a 8 da tarde horas, coas actividades de música, baile e pintura urbana na Praza Arquitecto Antonio Palacios.

06/10/2017 in Alcaldía, Benestar, Cultura e festas, Educación e tecnoloxía, Emprego e formación, Igualdade, Turismo

A colaboración desinteresada dos veciños permite a Vías e Obras realizar un muro de contención para asegurar unha estrada en Cans

A Concellería de Vías e Obras está a piques de rematar o muro de contención dunha estrada municipal na zona de A Graña, na parroquia de Cans, que presentaba perigo de derrube.

Manuel Carrera explica que estes traballos están a ser posibles grazas á cesión desinteresada dos veciños propietarios da zona dunha franxa de terreo de 2 metros e medio cara ás súas fincas, “que é o que gaña de ancho a estrada” e, ao mesmo tempo, aproveitouse para  colocar unha tubaxe dun cruzamento que hai de auga, “que quedou xa instalada”.

Manuel Carrera e David Alonso, presidente AAVV Cans

O muro, subiña Carrera, levará unha protección para impedir que haxa accidentes, se procederá ao asfaltado da estrada e se rematarán as entradas  a tres das fincas da zona, “que era unha vella demanda dos veciños do lugar”.

A obra, na que se investiron uns 40.000€ de fondos municipais, estará finalizada no prazo dunha semana, cumprindo o compromiso que adquirirá o Concello,como explicou o concelleiro ao presidente da Asociación de Veciños de Cans, David Alonso Barciela.

Manuel Carrera agradece, de novo, aos propietarios dos terreos que cedesen estas franxas  para poder asegurar o muro e anchear a estrada o cal suporá unha mellora da seguridade.

06/10/2017 in Alcaldía, Vías e obras