Novas

Este  xoves, día 21, entra en funcionamento no Porriño o novo sistema de transporte público baixo demanda

Este  xoves, día 21, entra en funcionamento no Porriño o novo sistema de transporte público baixo demanda, posto en marcha pola Xunta, logo da esixencia da maioría da Corporación, para que resolvese as graves dificultades de mobilidade xeradas ás veciñas e  veciños  coa implantación do novo Plan de Transportes de Galicia.

As persoas que precisen desprazarse poderán pedir o servizo chamando ao teléfono 988 68 78 00, que estará operativo de 8 da mañá a 8 da tarde todos os días laboráis.  Nunha única chamada poderá reservar varias prazas no autobús ou, mesmo, reservar varias viaxes para os seguintes 15 días.

A reserva debe facerse antes das 8 da tarde do día laborable anterior a aquel no que se vaia viaxar. Así, se o vindeiro mércores 27 de decembro quere coller o autobús para ir ao centro de saúde, deberá chamar antes das 8 da tarde do martes 26 de decembro. En cambio, se o martes 26 de decembro quere coller o autobús para ir facer compras, como o luns é festivo deberá chamar antes das 8 da tarde do venres 22 de decembro.

Para solicitar o servizo, cando chame, so deberá ter a man o número do seu DNI e saber cando quere viaxar e entre que paradas– poderá solicitar información da oferta dos servizos de transporte á empresa que o presta ou consultala na web www.bus.gal, na que tamén se publican os teléfonos e páxinas web das empresas-.

Ao final da chamada indicaráselle o número de confirmación da súa reserva, que deberá ter onde anotar.  Se ao chamar indica un correo electrónico, enviaráselle ao mesmo a confirmación da reserva co seu número e os seus datos, o que tamén lle facilitará a súa anulación, se fose o caso.

Si finalmente non vai viaxar deberá anular a reserva. Se non o fixese, outras persoas poderán quedar sen praza.

Só terá que chamar para reservar praza para autobuses que se presten baixo demanda. Tamén pode obter información dirixíndose á empresa de transporte que preste o servizo.

Ao subir ao autobús na súa parada deberá poder indicar ao condutor o nome da persoa que fixo a reserva e o código da reserva que se lle indicou.

Se ninguén fixo unha reserva para a súa parada o autobús non pasará por ela, polo que non poderá subir. Ademais, outras persoas poderán ter reservado noutras paradas as prazas das que dispoña o autobús, polo que aínda que non estean ocupadas pode que non queden prazas libres para a súa viaxe.

A partir da posta en funcionamento do novo sistema as reservas deberán facerse a través do teléfono 988 68 78 00, e xa non será posible facelas nos teléfonos das empresas.

20/12/2017 in Alcaldía, Tráfico

Salceda, Ponteareas, Mondariz, As Neves, Mos e Porriño únense para impedir o despido de 140 traballadores, ou todos os empregados de Maderas Iglesias

Os alcaldes de Salceda, Marcos Besada, Ponteareas, Xosé Represas, Mondariz, Xoán Carlos Montes, As Neves, Xosé Manuel Rodríguez, a alcaldesa do Porriño, Eva García de la Torre, e o tenente de alcalde de Mos, Camilo Augusto Martínez, mantiveron este luns unha xuntanza, no Concello do Porriño, con representantes do Comité de Empresa de Maderas Iglesias, e dos sindicatos CIG, CCOO e UXT, que trasladaron aos rexedores que a empresa comunicoulles a apertura dun expediente de extinción de 140 contratos-ou de todos eles, preto de 300- o vindeiro día 12 de xaneiro.

Ante esta situación, os alcaldes e alcaldesa veñen de solicitar un encontro ao máis alto nivel, con representantes da Xunta de Galicia, acompañados polos membros do Comité de Persoal, de cara a evitar a eliminación destes empregos- ou da totalidade deles-e o peche dunha empresa que consideran parte dun sector estratéxico para a economía galega como é o da madeira.

Os alcaldes e a alcaldesa, coñecedores do interese da Xunta en evitar a eliminación destes empregos, considerando que a a empresa recibiu no seu día fondos públicos por medio do IGAPE e lembrando que todos os grupos do Parlamento de Galicia aprobaron unha iniciativa apoiando tomar a iniciativa para facer viable Maderas Iglesias, piden ao Goberno de Galicia que nesta situación de extrema gravidade para a continuidade desta firma, fagan efectivos os termos desta iniciativa e preste as garantías posibles e necesarias para manter os empregos.

19/12/2017 in Alcaldía, Benestar, Emprego e formación

O libro ‘O Porriño. Historia e Patrimonio Cultural’ amosa o pasado da vila e fai unha viaxe pola súa riqueza patrimonial, arquitectónica, etnolóxica, cultural, natural e paisaxística

“O Porriño. Historia e Patrimonio cultural”, escrito por Xosé Ramón Paz Antón e ilustrado polo fotógrafo Xulio Gil ven a “encher un vacío sobre a historia porriñesa que se contempla neste libro dende os tempos prehistóricos ata a actualidade”.

Paz Antón resume en algo máis de duascentas páxinas o pasado deste territorio e as súas xentes ao tempo que se describe unha parte relevante do seu patrimonio cultural e paisaxístico, un relato que vén de salientar o excelente labor de Xulio Gil, quen capta coa súa cámara aspectos insólitos ou pouco coñecidos e engade unha lectura visual que fai moi atractiva a obra que se presenta.

Partindo dos xacementos arqueolóxicos, da romanización e da alta idade media, a información vai facéndose densa coas incursións viquingas e árabes, a creación dos mosteiros de Budiño e Cans, os señoríos e loitas medievais, o nacemento do concello da Louriña, a dependencia de Baiona e Salvaterra, a queima das fábricas de pan na guerra con Portugal, a forte reedificación de templos no Barroco e a invasión dos franceses.

A partir de aquí resúmense os fitos máis relevantes dos séculos XIX e XX, o concello constitucional, a vida social e cultural, a emigración, os movementos agrario e obreiro, a guerra civil, o franquismo e a industrialización. Entre outras achegas destacadas cabe citar a reproducción do primeiro mapa do concello que se conserva no Archivo General de Simancas e que foi realizado en 1655.

Como subliña a alcaldesa, Eva García de la Torre, “O Porriño. Historia e Patrimonio cultural”, que foi editado grazas a colaboración do Concello, “é unha excelente mostra dos nosos recursos naturais, o noso patrimonio arqueolóxico, arquitectónico e cultural e amosa quenes somos, e ensina o porqué temos que estar orgullosos do noso pasado e, en base ao mesmo seguir avanzando cara ao futuro”.

García de la Torre reitera que este “magnífico traballo” que O Porriño non tiña e que necesitaba e que servirá de clave para mirar cara ao futuro e á necesidade de poner en valor os nosos costumes e a nosa esencia.

17/12/2017 in Alcaldía, Cultura e festas

A alcaldesa, Eva García de la Torre, e varios concelleiros acompañan á conselleira de Medio Rural na súa visita á empresa alimentaria ‘La Torta’, do Porriño

A conselleira do Medio Rural,Ángeles Vázquez, acompañada pola alcaldesa do Porriño, Eva García de la Torre, o delegado da Xunta en Vigo e os concelleiros da Corporación, Manuel Alejandro Lorenzo e Carlos Martínez, entre outras autoridades, coñeceron de primeira man a ampliación e expansión da empresa alimentaria “La Torta”, do Porriño.

A conselleira destacou que todos estes proxectos contribúen a facer un rural vivo e dinámico e valorou o labor dos GDR, que –lembrou– xestionan os fondos Leader cun enfoque de abaixo cara arriba, integrando aos poderes públicos e á sociedade civil no deseño e aplicación das políticas de desenvolvemento do agro.

15/12/2017 in Alcaldía, Educación e tecnoloxía, Emprego e formación

Protección Civil do Porriño recibe da Xunta de Galicia un novo remolque que servirá para completar o material de emerxencias que manexa a diario este servizo

Manuel Carrera, tenente de alcalde do Porriño recibiu, en nome do Concello e de mans da Vicepresidencia do Goberno de Galicia, un novo remolque para o Servizo de Emerxencias e Protección Civil do Porriño.

O remolque inclúe unha electro-bomba somerxible, unha motobomba para augas residuais, un xerador de electricidade portátil de gasolina, unha motoserra, unha rozadora, unha torre de iluminación e kit de balizamento e sinalización todos estes elementos con todos os complementos de seguridade necesarios para una correcta utilización.

Carrera, que estivo acompañado por responsábeis de Protección Civil do Porriño, salientou o “importantísimo traballo, altruísta e desinteresado e constante” dos integran deste servizo que, subliñou, contribúen a garantir a seguridade e tranquilidade das porriñesas e porriñeses en cooperación co traballo que levan a cabo outros servizos profesionais de emerxencias.

15/12/2017 in Alcaldía, Benestar, Vías e obras

Este venres, día 8, co acendido das luces, arranca o programa do Concello para este Nadal

Exposicións, festivais, música, teatro, obradoiros, os anunciados Campamentos para facilitar a conciliación da vida familiar e laboral, rondallas, amais do acendido das luces, a Festa Pre-Fin de Ano ou a Cabalgata de Reis, son algunhas das actividades programadas polo Concello para este Nadal.

As mesmas desenrolaranse durante máis dun mes, dende o día 1 de decembro ata o 6 de xaneiro de 2018, en todas as parroquias do Porriño.

Os ‘pratos fortes’ deste Nadal serán o Acendido das luces, este venres, día 8 ás 8 da tarde, un acto amenizado polo grupo musical ‘Os Claretes’; a Festa Pre-Fin de Ano, o sábado, 30 de decembro, ás 11 da noite, na Praza de Antonio Palacios e na Carpa do Roxy, coas actuacións da Rondalla de Pontellas e a Orquestra Club Naval, e a ‘Cabalgata de Reis’, o 5 de xaneiro de 2018, ás 6 da tarde, polas rúas da vila.

 

07/12/2017 in Alcaldía, Cultura e festas

O Concello ten xa un proxecto que permitirá ampliar a rede municipal de abastecemento a todas as vivendas do Contrasto que non estaban ‘enganchadas’ ao mesmo

O Concello do Porriño conta xa, nun tempo “récord”, cun proxecto, elaborado polo Consorcio de Augas do Louro, que recolle a conexión á Rede de Abastecemento Municipal, das casas do Contrasto, na parroquia de Torneiros, afectadas pola contaminación por lindano.

Tal e coma se comprometerá cos veciños deste lugar, a alcaldesa acurtou, “ao máximo”, os prazos para poder ter un proxecto-que xa é coñecido por todos os grupos da Corporación- que permita que todas as vivendas reciban auga da popularmente coñecida coma ‘traída’ e non dependan da dos pozos para o seu consumo.

A ampliación da rede de saneamento ata “todas e cada unha das casas do Contrasto que aínda non están ‘enganchadas’ ao mesmo, requirirá un investimento, aproximado, duns 350.000€”, coma explicou Eva García de la Torre aos voceiros dos grupos municipais nunha xuntanza mantido o pasado venres, día 1.

Esta cantidade, indica a alcaldesa, será asumida na súa totalidade polo Concello do Porriño, algo no que estiveron dacordo todos os representantes da Corporación que amosaron a súa conformidade en que se convoque un Pleno extraordinario no que se aprobe a habilitación urxente dunha partida orzamentaria destinada a este fin. A intención do Goberno municipal es que as obras poidan empezar en 3 meses.

García de la Torre insiste en que, coma sinalou ás veciñas e veciños nas xuntanzas que mantivo con eles, esta solución é para facer fronte, “o antes que nos sexa posible”, ao problema do subministro, “con todas as garantías” ás vivendas do Contrasto, pero en modo algún pretende resolver a acumulación de lindano baixo o chan do Porriño.

Esta última é unha labor que debe acometer a Xunta de Galicia cun “plan cuantificado e orzamentado para, en primeiro lugar, identificar e sinalizar as zonas afectadas en todo o Porriño polo depósito de lindano e, de seguido, dar unha resposta efectiva que acabe coa contaminación e os riscos para a saúde”.

Neste senso, García de la Torre vén de mandar un “oficio” ás consellerías de Medio Ambiente e Sanidade da Xunta de Galicia pedindo que se cumpran as demandas das veciñas e veciños do Contrasto que pediron que, ademais das análises na terra e na auga, se realicen probas médicas de sangue e graxa, entre outras, ás persoas residentes neste lugar para coñecer o seu estado e detectar si o seu organismo está afectado polo lindano.

Así mesmo, a Xunta de Voceiros do Concello, aprobou a proposta de crear unha ‘Comisión de Seguimento do Lindano’, na que ademáis da alcaldesa e os representantes dos grupos da Corporación, se sente, tamén, unha persoa nomeada pola Plataforma de Afectados polo Lindano, que está a piques de constituírse.

Nesta Comisión tamén se invitará a participar á Xunta de Galicia por medio de técnicos das consellerías de Medio Ambiente e Sanidade.

Abastecemento ás casas e nova capa de asfalto

Como adiantara aos veciños na xuntanza que tiveron no Salón de Plenos do Concello o pasado día 17 de novembro, todas as vivendas do Contrasto que so puidesen abastecerse de auga nos seus pozos e carecesen de ‘enganche’ coa rede municipal, teñen xa uns depósitos de emerxencia de 1.000 litros cada un, cun motor, que permite que dispoñan de auga para o lavado de roupa e louza e o aseo persoal. Ademais, faise chegar a cada vivenda auga en bidóns para poder cociñar e para beber, nos dos casos, sen custo algún.

Amais, o Concello vén de contratar unha empresa autorizada para o tratamento da terra, seguindo as normas específicas do Servizo de Xestión de Residuos, para que retire a terra nas beiravías e no propio camiño no que se realizaron as obras de saneamento que levaron ao descubrimento da acumulación de lindano, antes de realizar, nuns días, un novo asfaltado, polo miúdo, desta pista, tal e como demandaran veciñas e veciños da zona.

05/12/2017 in Alcaldía

O paro baixa un mes maís no Porriño

O paro descendeu por terceiro mes consecutivo no Porriño e a finais do mes pasado había na vila 1.639 persoas desempregadas, un dato que non se daba dende hai preto de dez anos.

Dacordo cos datos publicados este luns polo Ministerio de Emprego e Seguridade Social e Xunta de Galicia,a  taxa de desemprego situouse no Porriño no 17,7%, en total 5,3 puntos menos que cando o actual Goberno Local empezara  o seu mandato, cando 2.139 porriñeses estaban na procura dun posto de traballo, 500 máis que na actualidade.

En relación co mes de novembro de 2016, o número de veciñas e veciños anotadas coma demandantes na oficina do Servizo Galego de Emprego do Porriño baixou de 1.836 a 1.639, o que supón que hai 197 traballadoras e traballadores máis no concello: en so un ano o paro caeu preto de 2,5 puntos.

A alcaldesa, Eva García de la Torre lembra que o paro medrou en Galicia en 1.277 persoas e en 7.255 no conxunto de España mentres que no Porriño descende, polo cal amósase convencida que “as medidas que estamos a impulsar dende a Concellería de Emprego, que dirixe Soledad Girón, funcionan” e subliña entre elas o programa ‘Porriño Accede’, baseado en convenios asinados entre o Concello e empresas da vila, grazas ao cal hai ducias de veciñas e veciños que volveron ao mercado laboral ou empezaron a traballar.

Tamén están a facilitar o descenso do paro os ‘Plans de Emprego’, posibles en base a un acordo coa Deputación de Pontevedra e do investimento de máis de 600.000€ de fondos municipais.

García de la Torre sinala, por último, como “fundamental” para crear emprego o  feito de chegar a acordos con outras administracións, obtendo axudas e subvencións que tiveron coma destino accións que serviron para incrementar as probabilidades de empregabilidade das veciñas e veciños do Porriño, e pon coma exemplo o recen aprobado ‘Plan Integrado de Emprego para Mulleres’ (PIEM), que conta cun orzamento total de 255.000€, dos cales a Consellería de Economía, Emprego e Industria da Xunta de Galicia achega 204.000€ e a Concellería de Emprego do Porriño, 51.000 para facilitar que as 85 mulleres que participarán no mesmo realicen formación e prácticas en distintas empresas o cal abrirá a posibilidade “real” de que poidan entrar, ou voltar, ao mercado laboral.

05/12/2017 in Alcaldía, Emprego e formación

En marcha o ‘Plan Integrado de Emprego para Mulleres’ (PIEM) que permitirá que 85 porriñesas se formen e opten a un posto de traballo

Un total de 85 mulleres desempregadas, veciñas do Porriño, terán a oportunidade de formar e optar a un posto de traballo grazas ao ‘Plan Integrado de Emprego para Mulleres’ (PIEM), posto en marcha polo Concello do Porriño e o Goberno de Galicia.

O Plan conta cun orzamento total de 255.000€, dos cales a Consellería de Economía, Emprego e Industria achega 204.000€ e a Concellería de Emprego do Porriño, 51.000 para facilitar que as mulleres que participen neste plan realicen formación e prácticas en distintas empresas, 7 das cales xa amosaron o seu interese en participar nesta iniciativa.

A concelleira de Emprego, Soledad Girón subliña que o obxectivo do ‘Plan Integrado de Emprego para Mulleres’ é, “coma todas as medidas e proxectos que estamos desenrolando dende o Goberno municipal, a de reducir a taxa de desemprego no Porriño e en especial o que padecen as mulleres”.

Para conquerilo, se realizarán accións de orientación laboral, formativas, con prácticas en empresas, “que permitirán mellorar as competencias profesionais das participantes neste plan e chegar á súa inserción no mercado de traballo”.

Para que esta finalidade sexa máis doada de acadar, as beneficiarias do Programa gozarán de “medidas que permitan conciliar o seu aprendizaxe coa súa vida familiar, coma acceso ao servizo de gardería”, indica a concelleira de Emprego.

Para participar no ‘Plan Integrado de Emprego para Mulleres’ as interesadas deberán acudir á Oficina de Emprego e solicitar na súa demanda o servizo de “Programas experimentais” (930).

05/12/2017 in Alcaldía, Benestar, Emprego e formación, Igualdade

Este luns, día 4 de decembro, na Aula CeMIT do Porriño, ‘Dalle luz a túa factura’

A Aula da Rede de Centros para a Modernización e Inclusión Tecnolóxica, Rede CeMIT, do concello do Porriño, emite a través de videoconferencia  a charla “ Dalle luz a túa factura”,  impartida pola “Escola Galega de Consumo”

O programa Dálle luz á túa factura pretende facilitar os coñecementos básicos necesarios para comprender a factura eléctrica, para adoitar medidas de aforro no gasto eléctrico e para realizar unha reclamación nos distintos supostos que se poidan presentar en relación á contratación dos servizos prestados polas compañías eléctricas.

Os contidos da charla serán:Mercado regulado/mercado libre; comercializadoras de referencia; conceptos básicos: potencia eléctrica, ICP, CUPS; tipos de tarifas; tipos de contadores y medidas de aforro

A acitvidade será retransmitida  o vindeiro día 4 de decembro en horario de 11:00 horas a 12:00 horas, dende a  aula CeMIT do Porriño. As persoas interesadas en asistir deberán facer a súa reserva da praza na propia Aula CeMIT, no teléfono 986.338.217 ou ben enviando un correo electrónico a cemit.oporrino@xunta.gal.

03/12/2017 in Alcaldía, Educación e tecnoloxía