Urbanismo, comercio e industria

• A actuación, cun investimento de 2,7 millóns de euros cofinanciado ao abeiro do Plan Extra e fondos europeos, permitirá transformar de maneira integral a parroquia
• Os traballos iniciaranse neste primeiro semestre deste ano

O Porriño, 9 de febreiro de 2026.- O Pleno do Concello do Porriño vén de aprobar en sesión extraordinaria a licitación da obra de rexeneración urbana do núcleo de Torneiros nun acordo que permite avanzar de maneira decisiva na execución dun proxecto estratéxico para esta parroquia, xa anunciado hai meses á veciñanza e aos medios de comunicación.

O asunto foi tratado como punto único da parte resolutiva da sesión e incluíu a aprobación do proxecto, do gasto, dos pregos de cláusulas administrativas particulares e do expediente de contratación, que se tramitará mediante procedemento aberto. Con este acordo, o Concello dá un paso clave para facer realidade unha actuación moi demandada pola veciñanza de Torneiros.

A actuación contará cun investimento total de 2.749.500 euros e estará cofinanciada pola Deputación de Pontevedra, a través do Plan Provincia Extraordinaria, e polos fondos europeos FEDER. Trátase dun dos proxectos de rexeneración urbana máis ambiciosos impulsados polo Concello do Porriño nos últimos anos, cun impacto directo na calidade de vida da veciñanza e na cohesión territorial do municipio.

Unha intervención integral: máis accesibilidade, servizos modernizados e espazos públicos de calidade

O proxecto de rexeneración urbana do núcleo de Torneiros contempla unha actuación integral sobre o espazo público e as infraestruturas existentes, coa finalidade de mellorar de maneira sostida as condicións urbanas, sociais e ambientais da parroquia.

Entre as actuacións previstas inclúese a renovación completa das redes de abastecemento de auga potable, a modernización do saneamento e a mellora do sistema de drenaxe pluvial, co obxectivo de garantir un funcionamento máis eficiente dos servizos básicos e previr problemas derivados das choivas intensas.

No ámbito da mobilidade e da accesibilidade, o proxecto aposta pola redistribución do espazo viario, favorecendo a mobilidade peonil fronte ao tráfico rodado. Prevese a ampliación das zonas peonís, a mellora e ampliación das beirarrúas, a eliminación de barreiras arquitectónicas, a adaptación dos itinerarios a criterios de accesibilidade universal e a creación de percorridos máis seguros, especialmente nos contornos de equipamentos de alta afluencia como os centros educativos, o multiusos de Torneiros e o centro cultural Alba.

A intervención inclúe tamén a renovación integral do alumeado público, que será substituído por luminarias LED de alta eficiencia enerxética, permitindo reducir o consumo eléctrico, mellorar a iluminación dos espazos públicos e diminuír as emisións de CO₂.

Así mesmo, incorporarase novo mobiliario urbano, mellorarase a calidade paisaxística do espazo público mediante a introdución de vexetación e zonas verdes, e crearase un entorno máis amable, seguro e sostible, pensado para o uso e desfrute da veciñanza.

O proxecto complétase coa creación dun parque acuático no Parque Alba, concibido como un novo espazo de lecer familiar e deportivo que reforzará a oferta de equipamentos públicos, fomentará a convivencia interxeracional e contribuirá á integración social da parroquia.

Alejandro Lorenzo: “Un proxecto que fará realidade a transformación de Torneiros e beneficiará a todo O Porriño”

O alcalde do Porriño, Alejandro Lorenzo, destacou: “Hoxe facémolo coa zona residencial de Torneiros, pero o obxectivo é que cada unha das parroquias do Porriño conte cun investimento importante que permita mellorar os seus servizos e a súa calidade de vida. Durante moitos anos, as parroquias non recibiron a atención que merecían, e a Axenda Urbana é a ferramenta coa que queremos garantir que todo o Porriño, sen excepción, se vexa beneficiado. Ademais, o feito de que falemos xa de licitación significa que este proxecto, ao longo do primeiro semestre do ano, comezará a ser unha realidade coa posta en marcha dos traballos. Queremos que o concello avance de maneira equilibrada, parroquia a parroquia, con planificación e pensando a medio e longo prazo. Esta actuación é un exemplo claro do modelo de desenvolvemento que defendemos: máis accesible, máis humano, máis seguro e máis sostible”.

• O acordo permitirá sumar estas futuras vivendas protexidas ás 300 promovidas coa Xunta de Galicia ao abeiro do Proxecto de Interese Autonómico (PIA)

O Porriño, 26 de xaneiro de 2026.- O pleno municipal do Porriño vén de dar luz verde á cesión dunha nova parcela municipal na Gulpilleira (no sector SUR-PPR-5) e a formalización dun protocolo de colaboración coa Sociedade Vivenda Pública de Galicia, entidade pública dependente da Xunta de Galicia, co obxectivo de impulsar preto de 40 novas vivendas protexidas de promoción pública no municipio. A proposta saíu adiante cos votos a favor do goberno local, coa abstención do PSOE e o voto en contra do BNG.

Esta actuación permitirá avanzar na oferta de vivenda protexida no Porriño, facilitando o acceso a unha vivenda digna e adecuada, especialmente para persoas e colectivos con maiores dificultades, con atención especial ás necesidades da mocidade. O protocolo contempla a cesión gratuíta do solo, a súa aceptación pola administración autonómica competente e a posterior promoción das vivendas, que se adxudicarán ás persoas inscritas no Rexistro Único de Demandantes de Vivenda da comunidade autónoma de Galicia.

O Concello do Porriño comprométese a realizar as actuacións necesarias para que a parcela adquira condición de solo urbanizable e poida destinarse á edificación. O calendario prevé iniciar as obras de urbanización no segundo semestre de 2026, co obxectivo de rematalas no cuarto trimestre de 2027. Pola súa banda, a administración autonómica tramitará a aceptación do solo e redactará os proxectos técnicos previos ao inicio das obras, licitando a edificación no prazo de tres meses desde a aprobación dos proxectos, sempre que o estado da urbanización o permita.

O protocolo aprobado non contempla contraprestacións económicas entre as partes, asumindo cada administración os compromisos cos seus propios recursos.

O alcalde do Porriño, Alejandro Lorenzo, destacou que esta iniciativa supón un paso importante para responder ás necesidades reais da veciñanza nun momento de crecemento continuado do municipio, que xa supera os 20.000 habitantes. “O Porriño rexistrou nos últimos anos unha evolución poboacional significativa e unha demanda de vivenda cada vez maior, algo que se nota tamén na actividade diaria do concello e en indicadores como o incremento de matrículas no ámbito educativo”, sinalou Lorenzo.

O rexedor destacou que estas actuacións permiten planificar o crecemento do municipio con responsabilidade, garantindo que medre con servizos e oportunidades. “O Porriño segue consolidándose como un lugar atractivo para vivir e traballar, polo que é fundamental acompañar ese dinamismo cunha oferta de vivenda protexida que facilite o acceso especialmente á mocidade e ás familias”, explicou.

Lorenzo subliñou que “esta nova parcela súmase ao proxecto para a construción de 300 novas vivendas en colaboración coa Xunta de Galicia, na contorna da rúa Fernández Areal, que foi concedido ao Porriño como Proxecto de Interese Autonómico (PIA), reforzando a resposta do municipio ás necesidades actuais e futuras de acceso á vivenda e permitindo que o Porriño siga medrando como nunca”.

O protocolo inclúe a creación dunha comisión mixta de seguimento, formada por representantes das administracións implicadas, co fin de garantir o correcto desenvolvemento das actuacións previstas e impulsar o cumprimento dos obxectivos establecidos.

Desde o Concello do Porriño subliñase que esta iniciativa evidencia o compromiso do goberno local coa política de vivenda como eixo estratéxico, apostando pola colaboración entre administracións e pola utilización do solo público ao servizo do interese xeral, garantindo así un crecemento equilibrado, sostible e con oportunidades para todas e todos.

• A convocatoria permanece aberta ata o 31 de xaneiro de 2026 e está dirixida a comunidades e veciñanza que queiran mellorar a eficiencia enerxética das súas vivendas
• O importe total das axudas ascende a preto de 1 millón de euros

O Porriño, 20 de decembro de 2025.– O Concello do Porriño informa de que continúa aberta a convocatoria de axudas para a rehabilitación residencial na contorna residencial de rehabilitación programada (ERRP) de Torneiros, financiada a través do Plan de Recuperación, Transformación e Resiliencia, e que aínda quedan dispoñibles 328.164,97 euros na bolsa de subvencións para novas solicitudes.

Ata o de agora, dos 872.425,00 euros destinados á rehabilitación de vivendas, foron adxudicados 544.260,03 euros, correspondentes a tres actuacións, o que supón un 62,38 % dos fondos totais desta liña de axudas. Un cuarto decreto de adxudicación, non foi aceptado pola comunidade beneficiaria, polo que ese importe engrosa a bolsa e ponse a disposicións de futuras concesións.

Ademais das axudas á rehabilitación de edificios residenciais, o Concello do Porriño prevé investir arredor de 102.000 euros na mellora e urbanización da contorna, reforzando así unha intervención integral en Torneiros orientada á súa humanización e revitalización que se complementará con outros proxectos futuros de mellora anunciados xa nas últimas semanas, e que se enmarcan no Plan Extra de Deputación e no PAI beneficiario de fondos europeos.

O alcalde do Porriño, Alejandro Lorenzo, salientou que “aínda hai unha cantidade moi importante de fondos dispoñibles e queremos que cheguen directamente á veciñanza. Esta convocatoria é unha oportunidade real para mellorar as vivendas, reducir o consumo enerxético e revalorizar os edificios”.
O rexedor engadiu que “o Concello está a acompañar a todas as comunidades durante todo o proceso, que foron notificadas, ofrecendo o asesoramento técnico e xurídico que precisen para facilitar a tramitación das solicitudes e garantir que ninguén quede fóra por falta de información”.

O prazo para solicitar estas axudas permanece aberto ata o 31 de xaneiro de 2026, polo que desde o Concello anímase ás comunidades de veciños de Torneiros a informarse e presentar solicitudes. Para iso, están á súa disposición os servizos técnicos e xurídicos municipais e a Oficina Municipal de Vivenda, que ofrecen atención personalizada durante todo o proceso.

“O noso obxectivo é claro: aproveitar o 100 % dos fondos dispoñibles e seguir transformando Torneiros nun zona máis eficiente, accesible e con maior calidade de vida”, concluíu Alejandro Lorenzo.

• A conselleira de Vivenda e Planificación de Infraestruturas, María Martínez Allegue, e o alcalde Alejandro Lorenzo estiveron esta mañá no lugar onde se desenvolverá este Proxecto de Interese Autonómico (PIA) por importe de 212.414 euros

O Porriño, 13 de decembro de 2025.- A construción de 300 novas vivendas das cales o 80 % estarán sometidas a réxime de protección, na rúa Fernández Areal, dá un paso máis coa licitación do proxecto. A conselleira de Vivenda e Planificación de Infraestruturas da Xunta de Galicia, María Martínez Allegue, acompañada do secretario xeral de Vivenda e Urbanismo, Heriberto García e do director territorial en Pontevedra, José Manuel González, acudiu esta mañá ao Porriño onde foi recibida polo alcalde Alejandro Lorenzo e concelleiros do equipo de goberno local, para anunciar, no mesmo lugar onde se situará o desenvolvemento residencial, a licitación deste Proxecto de Interese Autonómico (PIA) por importe de 212.414 euros.

O Consello da Xunta deulle xa luz verde ao inicio da tramitación do expediente relativo á delimitación e declaración de interese autonómico das actuacións para habilitar solo residencial destinado a vivendas protexidas (80%) e libre (20%). O visto e prace a este trámite ten por obxectivo a aprobación e a delimitación do ámbito de actuación identificado no planeamento xeral como solo urbanizanable, localizado na zona próxima aos Xulgados, centro de saúde e pavillón municipal de deportes, dentro do polígono SUR-PPR-2, cunha superficie de 43.000 metros cadrados na que se prevé tamén a creación de espazos libres e verdes.

O alcalde explicou que se trata “dun proxecto clave para responder á crecente demanda de vivenda accesible no municipio”, destacando o papel do mesmo para acompañar o crecemento demográfico do Porriño, “consolidando o municipio como un lugar atractivo para vivir e formar familia”. O rexedor cualificou a visita como “un paso importante para reforzar a colaboración institucional e garantir a continuidade dos trámites necesarios”. Neste sentido, sinalou tamén que “cando estea o proxecto realizado poderemos coñecer a ordenación exacta do ámbito e informaremos e atenderemos ás solicitudes da veciñanza que poidan xurdir”. Abordaranse as cuestións relacionadas coa planificación urbana, a integración de zonas verdes e a creación de espazos públicos de calidade que complementen as futuras vivendas.

O Concello reiterou a súa disposición a coordinar todos os pasos necesarios para que este proxecto avance con axilidade e se converta nunha realidade no menor tempo posible, contribuíndo a ofrecer vivenda accesible e a planificar o crecemento do municipio de forma ordenada e sostible.

• A iniciativa repartirá 3000 euros en vales para incentivar as compras no comercio de proximidade durante estas datas festivas

O Porriño, 11 de decembro de 2025.- O Concello do Porriño únese ao tecido empresarial local para apoiar a campaña de Nadal impulsada pola Asociación de Comerciantes e Industriais de Porriño (Acipor). A nova edición da campaña de promoción do comercio, que se desenvolve do 5 de decembro de 2025 ao 10 de xaneiro de 2026, sorteará 50 cheques-compra de 60 euros cada un deles entre a clientela que realice as súas compras nos establecementos asociados.

A iniciativa conta, un ano máis, coa colaboración do Concello do Porriño, que destaca o impacto positivo deste tipo de accións na economía local e na dinamización das rúas durante o Nadal. “O comercio local é unha parte esencial da identidade do noso municipio, un motor económico e social que mantén vivas as nosas rúas. Por iso, desde o Concello estamos sempre ao lado de Acipor para impulsar este tipo de campañas que favorecen tanto aos negocios como á veciñanza porriñesa”, salientou o alcalde do Porriño, Alejandro Lorenzo, durante a presentación na que estivo unha representación dos comerciantes encabezada pola súa presidenta Juana Pérez.

A campaña contempla dúas modalidades de participación: por un lado, rifas en papel que entregarán os comercios adheridos e que permitirán participar nos sorteos presenciais do 22 de decembro de 2025 e do 14 de xaneiro de 2026, ás 20.30 horas, na propia sede de Acipor; e, por outro, o rexistro de tíckets a través da páxina web www.ccamorea.es ou escaneando o código QR, opción que ofrece aos clientes a posibilidade de inscribirse tamén nos dous sorteos dixitais, previstos para as mesmas datas. Nun acción de incentivar a participación online, dende Acipor promocionan esta vía destinando 34 vales para o sorteo dixital, que se realizará mediante unha app, e 16 para os boletos entregados fisicamente.

En total, repartiranse 25 cheques en decembro e 25 cheques en xaneiro, que deberán ser consumidos exclusivamente nos establecementos pertencentes a ACIPOR nas datas indicadas en cada vale.

O alcalde concluíu destacando que “apostar polo comercio de proximidade é investir no Porriño. Cada compra que facemos aquí revértese directamente na economía local, no emprego e na vida diaria do noso pobo. Esta campaña de Nadal é un exemplo de colaboración que funciona, e estou convencido de que volverá ser un éxito”.

• O alcalde Alejandro Lorenzo salienta que a medida responde ao forte crecemento demográfico e ao atractivo do municipio para as familias, “O Porriño é un municipio de oportunidades e necesitamos máis vivenda para acompañar o crecemento que estamos a experimentar”

O Porriño, 25 de novembro de 2025.- O Concello do Porriño celebra a decisión adoptada polo Consello da Xunta de Galicia, que vén de autorizar o inicio da tramitación do expediente para declarar de interese autonómico o ámbito destinado a habilitar solo residencial na contorna do pavillón municipal de deportes, dentro do sector SUR-PPR-2, cunha superficie total de 4,3 hectáreas.

Esta actuación permitirá transformar o solo urbanizable para crear 300 novas vivendas, das cales 240 estarán sometidas a réxime de protección pública, ademais de incorporar novos espazos libres e zonas verdes vencelladas ao río Couso, respectando a contorna natural e ampliando as zonas públicas de esparexemento.

O alcalde do Porriño, Alejandro Lorenzo, cualifica esta medida como “unha excelente nova para o noso municipio, que chega nun momento no que O Porriño está a experimentar un crecemento sostido e moi significativo”. O rexedor subliña que “O Porriño é un dos concellos que máis medra en poboación na provincia e en toda Galicia, cunha das taxas de natalidade máis altas da contorna, que se reflexa por exemplo en que neste curso escolar fomos o único municipio da área que aumentou o número de matrículas, un indicador claro de que seguimos sendo un lugar atractivo para as familias”. Outro indicador do incremento da poboación reflexouse nas últimas eleccións municipais, na que a corporación incrementouse en número de concelleiros ao superarse oficialmente os 20.000 habitantes. “Isto non é unha casualidade, senón o reflexo dun municipio dinámico, vivo e en expansión, que necesita máis vivenda para acompañar este crecemento e garantir un futuro sólido para a súa veciñanza”. Segundo o alcalde, “O Porriño é hoxe un municipio de oportunidades, atractivo para vivir, traballar e formar unha familia, e proxectos como este consolídanos como un dos concellos con maior proxección da área metropolitana”.

Dende o Concello expresan o seu compromiso para colaborar coa Xunta de Galicia en todos os trámites necesarios co obxectivo de que o proxecto avance con axilidade e se converta nunha realidade canto antes, contribuíndo a ofrecer vivenda accesible e a planificar o crecemento do municipio de forma ordenada e sostible.