Sen categoría

Porriño, 3 de xullo de 2025.— O Consorcio de Augas do Louro entregou hoxe os premios do seu concurso de debuxo infantil, dirixido a escolares de 3º e 4º de Educación Primaria, co obxectivo de sensibilizar sobre o coidado da auga e do medio ambiente. Porriño estivo representado polos seus gañadores e finalistas, recoñecidos nun acto celebrado nas instalacións da EDAR de Guillarei.

A gañadora por Porriño foi Meriam Ziloul, alumna do CEIP Ribeira, que recibiu como premio unha tablet, entregada polo presidente do Consorcio e alcalde do Porriño, Alejandro Lorenzo, xunto con representantes dos concellos participantes. Ademais, os finalistas por Porriño, Vera Pérez (CEIP José Fernández López) e Mario Romero (Colexio Hermanos Quiroga), recibiron un reloxo dixital como recoñecemento ao seu esforzo e compromiso co coidado da auga e do planeta.

No acto tamén estiveron presentes a alcaldesa de Salceda de Caselas, Loli Castiñeira; o alcalde de Tui, Enrique Cabaleiro; e a alcaldesa e o tenente de alcalde de Mos, Nidia Arévalo e Camilo Grandal, respectivamente. Ademais de Meriam Ziloul, foron galardoados como gañadores Erick Dávila (Mestre Martínez Alonso, Mos), Iciar Martínez (CEP Altamira, Salceda de Caselas) e Martina Pintos (Maristas, Tui). Como finalistas, foron recoñecidos Evolet Fernández e Alba Pintos (Mestre Martínez Alonso, Mos); Vera Pérez e Mario Romero (Jose Fernandez Lopez e Hermanos Quiroga, Porriño); Alejandro Díaz e Sabela Gándara (CEP Altamira, Salceda) e Martina Pintos e Daniel Blanco (Maristas, Tui).

O presidente do Consorcio e alcalde de Porriño, Alejandro Lorenzo, destacou durante a entrega dos premios que esta iniciativa é “unha maneira lúdica de concienciar aos máis pequenos no uso responsable da auga, dando a coñecer a importancia deste recurso nas nosas vidas e as claves para protexer a biodiversidade”.

O concurso enmárcase nas accións para promover os Obxectivos de Desenvolvemento Sostible, reflectindo nos debuxos o compromiso co coidado da auga e do medio ambiente.

O Concello do Porriño felicita a estes rapaces pola súa excelente participación e anímaos a seguir promovendo o respecto e coidado polo entorno natural.

Porriño, 30 de xuño de 2025.- O Concello do Porriño vén de aprobar en pleno unha serie de actuacións estratéxicas que serán financiadas mediante crédito extraordinario e subvencións concedidas pola Deputación de Pontevedra e a Xunta de Galicia. Estes investimentos, que contaron cos votos a favor do goberno local e coas abstencións do PSOE e do BNG, permitirán avanzar en ámbitos clave como a educación infantil, o lecer, o deporte, a mellora de infraestruturas rurais e a humanización urbana.

Entre as principais actuacións destacan:

• Equipamento das escolas infantís de Budiño e Pontellas: O Concello destinará 71.491,64 euros para dotar de equipamento e mobiliario as novas escolas infantís financiadas pola Xunta de Galicia, garantindo así a súa posta en funcionamento durante este ano.
• Ampliación do parque infantil da Avenida de Galicia: Cun investimento de 33.153,70 euros, levarase a cabo a instalación de novos xogos infantís termoplásticos, unha cama elástica con pavimento de caucho e mobiliario urbano complementario para mellorar a funcionalidade e confort do espazo.
• Equipamento do campo de fútbol municipal de Lourambal: Para a primeira fase (obra civil) do equipamento do campo de fútbol de Lourambal, o Concello investirá 399.077,73 euros, reforzando o compromiso coa promoción do deporte base e a mellora das infraestruturas deportivas coa colaboración da Xunta.
• Mellora de camiños en Devesa, Filgueiras e Portela de Souto: Grazas á subvención da Deputación de Pontevedra a través do Plan +Provincia, executarase a mellora do pavimento en camiños destas parroquias cun orzamento total de 132.979,42 euros. Deste importe, a Deputación achega 57.324,23 euros e o Concello complementa a inversión con 75.655,19 euros.
• Humanización da prolongación da rúa Antonio Palacios: O Concello recibirá unha subvención de 645.024,26 euros da Deputación para executar esta obra, cun orzamento total de 860.032,34 euros, completado coa achega municipal de 215.008,08 euros.
• Acondicionamento do local nº 4 na rúa Antonio Palacios: O acondicionamento deste local, cunha superficie total de 72,75 m² máis dous anexos de 16 m² cada un, terá un custe estimado de 86.250 euros. O proxecto conta coa axuda da Xunta de Galicia.
• Substitución do céspede artificial no campo de fútbol de Pontellas: O Concello realizará a substitución do tapete de herba natural por céspede artificial, cun investimento de 279.074,32 euros que inclúe obras complementarias para garantir a correcta instalación.
• Instalación de pista deportiva no parque infantil do entorno do Campo da Feira: Segundo o informe do enxeñeiro municipal, esta actuación consistirá na instalación dunha pista deportiva, xogos biosaudables e mobiliario urbano necesario, cun custo valorado en 58.395,63 euros.

O Alcalde, Alejandro Lorenzo, destacou que “estas actuacións reflicten o compromiso do Goberno local coa mellora continua dos servizos e infraestruturas do Porriño e das súas parroquias, contando coa colaboración institucional para optimizar os recursos e dar resposta ás necesidades da veciñanza. Queda moito por facer e seguiremos traballando para atender a moitas máis necesidades e demandas Energie”.

O Pleno tamén acorda recorrer os custos do encoro de Eiras fixados por Vigo

Outro dos puntos clave da sesión foi a aprobación por unanimidade da interposición dun recurso contencioso-administrativo contra o acordo plenario do Concello de Vigo do 29 de marzo de 2023, que modifica unilateralmente os termos da participación do Porriño nos custos de mantemento do embalse de Eiras, establecidos nun acordo de 1998.

Segundo o informe xurídico municipal, esta modificación podería supoñer un prexuízo económico para os intereses do Porriño, polo que o Pleno acordou:

1. Interpoñer o recurso contencioso-administrativo.
2. Facultar á Alcaldía para realizar os trámites necesarios para a execución deste acordo.

Outros asuntos

O Pleno tamén aprobou a determinación dos festivos locais para o ano 2026 e a inclusión dun novo vial no inventario municipal, entre outros puntos de trámite.

• A intervención no núcleo de Picouzo-Cruz-Cortés-Eirís reforza o compromiso municipal co rural e co medio ambiente

O Porriño, 20 de xuño de 2025.- O Concello do Porriño continúa dando pasos firmes cara ao obxectivo de lograr o saneamento integral en todas as súas parroquias. Un novo proxecto, cun investimento de 344.382,01 euros, permitirá dotar deste servizo esencial a 38 vivendas do núcleo rural de Picouzo-Cruz- Cortés-Eirís, na parroquia de Budiño.

A obra dará resposta a unha demanda histórica da veciñanza e porá fin ao uso de fosas sépticas, mellorando substancialmente a calidade de vida e contribuíndo á protección do medio natural. Trátase dunha das actuacións máis relevantes dos últimos meses dentro da estratexia de equilibrio territorial e sustentabilidade impulsada polo Goberno local.

O Alcalde do Porriño, Alejandro Lorenzo, destacou que:

“Cada nova conexión ao saneamento é unha conquista para o rural. Seguimos executando actuacións que garantan servizos públicos de calidade en todas as parroquias, sen excepcións. Esta obra en Budiño é un novo exemplo dese compromiso.”

Un proxecto integral e técnicamente avanzado

 A actuación contempla a instalación de 1.142 metros de novos colectores, repartidos en catro tramos e os seus ramais, así como a repavimentación de 5.450 m² de superficie afectada.

Entre os materiais e técnicas empregadas destacan:

• Tuberías de PVC SN4 macizo, de 250 e 300 mm de diámetro.
• Pozos de rexistro de 1 metro de diámetro.
• Tapas de fundición certificadas segundo norma UNE-EN
• Excavacións especiais, nalgunhas zonas, superiores aos 3 metros de

O proxecto inclúe tamén:

• Escavacións e recheos (1.500 m³), con catas para identificar servizos
• Obras de fábrica para estabilización e protección de conducións.
• Saneamento e acometidas individuais (36% do orzamento).
• Nova pavimentación e reforzo estrutural da vía (35% do orzamento).
• Xestión de residuos (9%) e medidas de seguridade e saúde (1%).

Un paso máis cara ao Porriño que queremos

Esta intervención súmase a outras xa realizadas noutras parroquias, dentro dun plan global que busca garantir equidade territorial, eficiencia nos servizos públicos e coidado ambiental.

“Non falamos só de infraestruturas, falamos de xustiza territorial, de ofrecer as mesmas oportunidades e condicións de vida a todos os veciños e veciñas, vivan onde vivan”, concluíu o alcalde.

O Concello do Porriño leva investidos máis de 600.000 euros na redacción dos proxectos totais para acometer o saneamento integral de todas as parroquias do municipio. Estes documentos técnicos foron xa remitidos á Confederación Hidrográfica, ao Ministerio de Fomento e a outras administracións, co obxectivo de obter as autorizacións correspondentes. Este proceso de tramitación está a retrasar a licitación de novas obras.

• A Travesía Domingo Bueno, no tramo que vai dende a Rúa Fernández Areal ata Avenida Domingo Bueno, xa é a “Rúa Juaniña”

O Porriño, 7 de xuño de 2025.–  O Concello do Porriño celebrou esta mañá unha homenaxe moi especial a unha das súas veciñas máis queridas e lonxevas, Juana da Cruz —Juaniña, como é coñecida por todos— que cumpre hoxe 100 anos. Con motivo do seu centenario, o Alcalde, Alejandro Lorenzo, quixo sorprender a Juaniña cun recoñecemento que permanecerá para sempre: a rúa onde vive pasará a chamarse Rúa Juaniña. “Ti es pasado do Porriño, es presente, pero serás moito futuro tamén do Porriño”, díxolle o rexedor a Juaniña antes de que se descubrira a placa. 

O acto comezou cun emotivo pasillo formado por veciños e familiares, seguido do Himno Galego interpretado pola banda de gaitas e percusión Os Zoqueiros, e a descuberta da nova placa que bautiza oficialmente a rúa co nome de Juaniña. Este foi un momento especialmente emotivo para a homenaxeada, que ata se animou a cantar. O alcalde entregoulle un ramo de flores como mostra de admiración e cariño. “Toda a miña vida quixen moitísimo a todo Porriño”, afirmou Juaniña. A homenaxe continuou cunha festa, onde non faltaron os pinchos nin as apertas compartidas coa súa familia e amizades.

Un século de historia, elegancia e talento

A historia de Juaniña está fondamente ligada á do Porriño. Viviu a Segunda República, a Guerra Civil e a ditadura, e foi testemuña directa da transformación da vila. A súa figura tamén está ligada ao tranvía que unía o Porriño con Vigo, onde acudía acompañada das súas clientas para mercar tecidos e ver in situ como lles caían os vestidos.

Costureira excepcional, foi quen de replicar traxes icónicos como o de Lady Di ou o da Raíña Fabiola. Na súa sala de costura nunca faltaban revistas de moda internacional, e tiña a habilidade de reproducir os deseños de Chanel, Dior, Valentino ou Versace. A súa elegancia continúa intacta: segue a confeccionar a súa propia roupa.

O alcalde, durante o acto, dirixiu unhas palabras que mesturaron orgullo, afecto e recoñecemento:

“Celebramos os 100 anos dunha veciña que non só viviu a historia do Porriño, senón que axudou a construíla. Juaniña é un exemplo de traballo, de elegancia, de superación. É desas persoas que fan grande unha vila co seu saber facer e o seu trato cercano. Para min é unha honra como alcalde, pero tamén como veciño, poder dicir que temos unha rúa que leva o seu nome. É un xesto pequeno en comparación co que ela representa para todos nós. O Porriño está orgulloso de ti, Juaniña, e hoxe deixámolo escrito nunha placa, pero tamén na memoria de todos nós”.

O Concello do Porriño quere agradecerlle a Juaniña o seu exemplo de vida, traballo e estilo, e a través da nova Rúa Juaniña manter viva a memoria dunha muller que representa o mellor da nosa vila.

Este nomeamento non é só simbólico: o cambio de nome á rúa foi aprobado no Pleno da Corporación Municipal do pasado mes de maio, tras ser unha proposta tratada nunha comisión especifica. Unha rúa que identifica á muller e impulsa o feminismo no Concello. Concretamente será a Travesía Domingo Bueno, no tramo que vai dende a Rúa Fernández Areal ata Avenida Domingo Bueno, a que dende hoxe xa é a “Rúa Juaniña”.