Sen categoría

O alcalde do Porriño, Alejandro Lorenzo, e o presidente da Asociación de Familiares de Enfermos de Alzheimer e outras Demencias de Galicia (AFAGA), Juan Carlos Rodríguez, asinaron un novo convenio de colaboración anual entre o Concello e AFAGA. Esta alianza reforza o compromiso de ambas as entidades para mellorar a atención ás persoas afectadas polo alzhéimer e outras demencias, a través do programa de prevención “Cultiva a mente” e de obradoiros de estimulación cognitiva e funcional.

O convenio, que prevé unha subvención de 21.000 euros destinada a financiar estes programas, ten como obxectivo primordial a prevención do deterioro cognitivo en persoas sen diagnóstico, así como proporcionar ferramentas terapéuticas a aquelas que xa padecen demencia, co fin de mellorar a súa calidade de vida e a dos seus familiares. A colaboración con AFAGA completa o servizo que se presta na súa Unidade de Atención Diurna Especializada non  Porriño, que atende a máis de 20 usuarios diagnosticados con alzhéimer ou outras enfermidades neurodexenerativas.

O alcalde do Porriño, Alejandro Lorenzo, destacou a relevancia deste acordo, subliñando que “a loita contra o alzhéimer require un compromiso firme e unha resposta integral. A través deste convenio, non só contribuímos á prevención, senón tamén na atención e no acompañamento ás persoas xa afectadas e ás súas familias. É crucial contar coa experiencia e o apoio de AFAGA para ofrecer unha atención de calidade que permita mellorar a calidade de vida daqueles que padecen esta enfermidade, pero tamén daqueles que están ao seu lado, como familiares e coidadores”.

Pola súa parte, Juan Carlos Rodríguez, presidente de AFAGA, agradeceu ao Concello do Porriño a súa colaboración constante e reiterou que “este tipo de convenios son esenciais para seguir ofrecendo programas que realmente marquen a diferenza na vida dos afectados polo alzhéimer. A prevención, a estimulación cognitiva e a atención especializada son fundamentais para mitigar o impacto desta enfermidade, que afecta cada vez a máis persoas”.

Ambas as entidades valoraron tamén a importancia de seguir ampliando a oferta de recursos destinados ás persoas con demencia e ás súas familias no municipio. Neste sentido, falaron da posibilidade de impulsar novas iniciativas que complementen os programas existentes, sempre dende a perspectiva da prevención da demencia e a promoción de hábitos saudables para un envellecemento activo.

Con esta sinatura, tanto o Concello do Porriño como AFAGA continúan fortalecendo a súa colaboración para facer fronte ao crecente reto social e sanitario que representa o alzhéimer, co obxectivo de ofrecer ás persoas afectadas o apoio necesario para levar unha vida digna e plena.

O Porriño prepárase para despedir o 2024 por anticipado. Un ano máis, o Concello -pioneiro neste evento- organiza unha xornada, a deste luns 30 de decembro, cunha chea de actividades para todas as idades.

A festa arrancará xa pola mañá. Ás 11.00 horas dará comezo a Festa infantil na que os máis pequenos serán protagonistas e terán o seu propio pre fin de ano con actividades, animación e pascalles de personaxes infantís. Uxía Lambona e a banda molona, será a encargada de continuar a festa tras as badaladas que soarán ás 12 do mediodía.

Ao redor das 19.00 horas iniciarase a festa grande co pasacalles das tres rondallas locais, a rondallas de Pontellas, Santa Eulalia de Atios e Santa María, que desfilarán polas rúas da vila. A continuación, sobre as 22.00 horas, dará comezo a actuación da orquestra El Combo Dominicano e a medianoite volverán soar as doce badaladas, da man da xornalista local, Raquel Atanes, e Juan Fuentes, presentadores do programa “Quen anda aí?” da TVG.

Haberá uvas, cotillón e chocolate gratuíto para todos os asistentes e unha sesión dj que promete pechar a noite ao grande.

“Desde o Concello convidamos á veciñanza e tamén a todas as persoas de fóra que así o desexen, a acudir ao Porriño a festexar xuntos de maneira anticipada o fin do ano 2024 e o recibimento do aninovo, unha cita convertida xa en tradición en Porriño”, sinala o alcalde Alejandro Lorenzo asegurando que se manterá sempre no calendario festivo e cultural do Concello.

A nova pista situarase nunha céntrica parcela ubicada na contorna da Avda. de Galicia Esta localización privilexiada ofrecerá un acceso cómodo para todos os usuarios, tanto da zona urbana como dos arredores, e converterase nun espazo de encontro e actividade deportiva. 

Unha parte da parcela xa está a ser utilizada como aparcamento público gratuíto, o que facilita o acceso á área. A instalación da pista multideporte non interferirá co uso do aparcamento, xa que se distribuirán os espazos de maneira eficiente para garantir tanto a actividade deportiva como a comodidade dos veciños que necesiten aparcar.

“Seguimos apostando pola creación de espazos públicos de calidade e polo lecer saudable, este será un lugar idóneo para a práctica de diversas actividades deportivas adaptándose ás demandas da veciñanza”, explicou o alcalde Alejandro Lorenzo. 

A previsión é que a pista multideporte esté en funcionamento nos próximos meses.

O Porriño transformarase nun escenario de auténtico terror coa celebración do Samaín, unha noite na que os espíritos vagan e as criaturas da escuridade cobran vida.

A xornada do 31 comezará coa tradicional exposición de calacús, onde os pequenos artistas dos colexios, e tamén os usuarios e usuarias de Aceesca e Afaga, puxeron o seu enxeño e creatividade. O resultado, máis de 500 calacús que adornarán o centro da vila. Desde a Fonte do Cristo ata o final do barrio de San Benito, estas terroríficas obras de arte iluminarán as rúas coa súa sinistra beleza.

Pero iso non é todo. Na véspera do día de Todos os Santos, a Casa do concello converterase nun auténtico castelo do terror. Criaturas horripilantes tomarán o control, desafiando aos máis valentes a entrar e enfrontarse aos seus peores pesadelos.

Desde as 17:00 ata as 19:45 horas, o Concello encherase de risas e berros no túnel do terror infantil, e despois, na praza os nenos e nenas poderán mover os osiños co arrepiante espectáculo “A bailar esqueletes”. Aqueles pequenos que se atrevan a participar recibirán un agasallo como recoñecemento á súa valentía.

A partir das 20:15 horas, o túnel do terror intensificarase para recibir aos maiores, prometendo unha experiencia aínda máis aterradora. Advertimos que será peor! E para aliviar un pouco a tensión, a noite culminará cunha sesión DJ na praza, onde todos poderán deixar atrás o medo e gozar da música.

Desde o Concello do Porriño convidan á veciñanza a defender a súa casa consistorial e disfrutar desta noite de terror e diversión no Porriño!

Este sábado 5 de outubro, O Porriño prepárase para recibir a peregrinos e turistas nunha celebración única: a Festa do Peregrino e do Turista. Cun programa cheo de actividades, a festa desenvolverase na emblemática praza Arquitecto Antonio Palacios e estenderase por todo o centro urbano, convertendo a vila nun perfecto escaparate da cultura e a tradición galega.

A xornada comezará ás 12:00 h cun divertido photocall do Camiño de Santiago, onde todos os asistentes poderán inmortalizar o seu paso por este máxico roteiro. Ás 16:30 h, os visitantes terán a oportunidade de participar nos roteiros guiados Antonio Palacios, que se levarán a cabo en seis quendas de 35 persoas cada unha, saíndo cada media hora desde a Botica Nova. Destacar que a inscrición será por orde de chegada.

A partir das 17:00 h, a praza encherase de vida con obradoiros participativos dirixidos a turistas, onde poderán aprender sobre o rico patrimonio cultural de Galicia. Haberá un obradoiro de baile tradicional galego e outro de música e canto tradicional, perfectos para aqueles que desexen mergullarse nos nosos costumes.

A festa culminará ás 20:30 h coa actuación na praza de Pan.Sen.Fron, que promete facer vibrar a todos os asistentes coa súa música. A continuación, sesión con DJ Mus.

Desde o Concello do Porriño lembran que o turismo é un piar fundamental para o desenvolvemento do municipio, e en especial, o turismo internacional que percorre o Camiño de Santiago. “Cada ano, miles de peregrinos fan unha parada no Porriño, e é unha honra para nós poder ofrecerlles unha experiencia inesquecible”, concluíu o alcalde, Alejandro Lorenzo, “A Festa do Peregrino e do Turista non só celebra esta conexión, senón que tamén quere agradecerlles todo o que nos aportan e  resaltar a hospitalidade da nosa veciñanza e a cultura local”.

Este mes de outubro, Porriño convértese no escenario do Ciclo de Teatro Fegateatro, organizado pola Federación Galega de Teatro Afeccionado. Este ciclo ofrecerá aos amantes do teatro a oportunidade de gozar de cinco obras de gran calidade, que prometen entreter e emocionar ao público.

A primeira representación terá lugar este domingo, 6 de outubro, ás 18:00 horas no Centro Cultural de Porriño. A entrada é libre e gratuíta ata completar aforo. Nesta ocasión, presentarase a obra “Cartas da muller ausente”, a cargo da compañía Ditirambo Teatro. Este texto, gañador do Accésit do VI Certame de Textos Teatrais Parábasis, convocado pola Escola Superior de Arte Dramática de Estremadura, é dirixido por Lola Roel.

A trama xira ao redor dunha muller que acode á consulta do seu psiquiatra para tratar o trastorno de personalidade múltiple que padece desde o seu divorcio. Como parte da súa terapia, o doutor suxírelle escribir cartas para que a muller, que estivo silenciada durante o seu matrimonio, poida expresar as súas emocións e buscar a súa ansiada recuperación.

O ciclo continuará o sábado 19 na Forna de Budiño con “O Agasallo” de Farándula Velutina, o domingo 20 na AC Pontellas con “Heroes en decembro” de Abran paso! Teatro, sábado 26 de outubro no Centro Cultural de Atios con “Mal do miolo” da Asociación Dramaturxica Pico do Castro da Foz e o sábado 26 de outubro en San Salvador de Torneiros: “Fauna 113” de Os veciños do lado.

O Concello de Porriño iniciou xa os traballos de construción  dun novo parque infantil na parroquia de Budiño, un proxecto que forma parte dunha serie de iniciativas destinadas a crear e mellorar zonas públicas de xogo para a cativada en todo o municipio. Este novo espazo, que responde á necesidade de áreas infantís na zona, situarase nunha parcela próxima ao polígono industrial no barrio Vaquería, onde actualmente non hai parques próximos para os máis pequenos.

O concelleiro de  Parques Infantís, Marcos Martínez, explicou que o novo parque “ten unha superficie de máis de 150 m² e  contará cunha variedade de elementos de xogo deseñados para fomentar a diversión e a seguridade dos nenos. Entre as instalacións incluiranse dous balancíns individuais, un multixogo e un bambán.” Para garantir a seguridade dos usuarios, as obras comezaron co movemento de terras necesario para a instalación dunha malla geotextil perimetrada en formigón, sobre a cal se estenderá unha grosa capa de area.

Este proxecto representa un investimento de 15.000 euros, dos cales o 70% está financiado grazas a unha subvención autonómica destinada á creación e mellora de infraestruturas e equipamentos. “Seguimos comprometidos co benestar dos máis pequenos e a creación de espazos de calidade onde poidan socializar e xogar”, concluíu o alcalde, Alejandro Lorenzo “Queremos que O Porriño sexa un lugar onde todos os nenos poidan crecer felices e activos”.   

A fin de semana no Porriño está marcada pola solidariedade. E é que dentro dos múltiples eventos que acollerá a Vila do Louro hai dous que destacan polo seu carácter benéfico.

O sábado 5 de outubro celebrarase un Bingo Solidario organizado por Acipor CCA Morea e o CRC, en colaboración co Concello do Porriño. Todo o recadado irá destinado ao proxecto “Miña casa, miña comunidade” de ACEESCA, que pretende ofrecer unha residencia inclusiva para 30 persoas con grandes necesidades de apoio, axudándolles a vivir de maneira independente e segura na comunidade de Torneiros. O Bingo Solidario ofrece unha noite de diversión asegurada na que se repartirán máis de 1.000 euros en premios.

Celebrarase no salón de actos do Círculo Recreativo Cultural a partir das 21 h. A entrada é libre ata completar aforo, así que, animádevos a participar!

Xa o domingo 6 de outubro, levarase a cabo a II Carreira de Empresas de Galicia -XIII Interrunning, que este ano ademais inclúe a I Andaina Antonio Palacios. Este evento deportivo ten un nobre propósito, xa que os fondos recadados irán á asociación de axuda aos nenos de oncoloxía do hospital Álvaro Cunqueiro, Bicos de papel, e tamén á Asociación Española Contra o Cancro e ao programa municipal de alimentos SOS Porriño. Contará tamén coa participación de Discamino, abrindo un horizonte máis inclusivo para as seguintes edicións.

“Esperamos vervos a todos e todas para disfrutar dun gran fin de semana e, ao mesmo tempo, contribuir a causas moi importantes”, concluíu o alcalde, Alejandro Lorenzo, “É unha gran oportunidade de axudar e sei que O Porriño, como sempre, será exemplo de empatía e traballo en equipo”.