Parroquias

O Concello concede 175.000 euros en subvencións ás comunidade de augas para mantemento e inversión nas súas instalacións

 

  • O alcalde Alejandro Lorenzo e o concelleiro Marcos Martínez fixeron entrega as axudas aos representantes das 22 entidades beneficiarias

O Porriño, 2 de decembro de 2025.- O Concello do Porriño fixo entrega das subvencións ás 22 comunidades de augas beneficiarias da convocatoria municipal correspondente ao ano 2025, dotada con 175.000 euros. Esta liña de axudas, que o Concello vén convocando anualmente, ten por obxecto garantir un abastecemento seguro e de calidade en todas as parroquias, apoiando tanto o mantemento ordinario das instalacións como investimentos en obras e renovacións da rede de distribución.

A convocatoria comprende dúas liñas de actuación. A primeira, destinada ao mantemento, conta cun orzamento de 95.000 euros e inclúe traballos de captación de auga —como fontes, pozos e a súa contorna—, conservación de sistemas de almacenamento e potabilización, reparacións na rede de distribución, actuacións nas instalacións e gastos derivados da adaptación ao protocolo de autocontrol en coordinación co programa de vixilancia sanitaria da auga. A segunda liña, dedicada a investimentos, está dotada con 80.000 euros e permite executar obras en inmobles das propias entidades ou daqueles sobre os que teñan dereito de uso.

As entidades puideron solicitar axudas en ambas liñas, nun programa que se foi consolidando e reforzando ao longo dos últimos anos. En 2021 destináronse 82.479,42 euros, en 2022 foron 87.353,01 euros; en 2023 case duplicouse a cifra superando os 160.000 euros e, nos dous últimos exercicios, o importe incrementouse ata acadar os 175.000 euros.

O acto de entrega contou coa presenza do alcalde do Porriño, Alejandro Lorenzo, e do concelleiro de Parroquias e Comunidades de Auga, Marcos Martínez. O rexedor destacou o compromiso do Concello co mantemento dun servizo esencial para o rural. “Estas axudas son fundamentais para que as comunidades de augas poidan garantir un abastecemento seguro, moderno e en boas condicións. O noso obxectivo é seguir reforzando ano a ano esta colaboración para que todas as parroquias conten con infraestruturas adecuadas e unha auga de máxima calidade”, manifestou. O alcalde puxo en valor o traballo das entidades veciñais, “as comunidades son un exemplo de organización e responsabilidade colectiva. Estas subvencións son un recoñecemento ao seu esforzo e unha ferramenta para facilitarlles un labor que é esencial para a veciñanza”.

As entidades ás que se lle concedeu axuda por cumprir todos os requisitos da convocatoria son: Monte y Folón, Iglesia y Outeiro, San Jorge, Buraco da Raposa, Chenlo, Covelo, Torneiros, Bouza, O Cerquido, Cans, Atios, Contrasto, Carracido, A Devesa, A Graña, Mosteiro, 2ª Mosteiro, Vaquería, Rozadas-Eiris, Cruz, Vitureira e Casal-Chan-Orbenlle.

O Concello reafirma así o seu compromiso co abastecemento veciñal e coa mellora continua das infraestruturas de auga en tódalas parroquias do municipio.

 

02/12/2025 in Parroquias

Comezan as obras de pavimentación no Camiño da Louriña en Pontellas

 

  • O alcalde do Porriño, Alejandro Lorenzo, e os concelleiros Ramón Porto e Bienvenido Estévez, supervisaron o avance dos traballos
  • A actuación forma parte dun investimento global de máis de 73.000 euros no que se inclúen outro camiño en Pontellas e dous máis na parroquia de Atios

O Porriño, 1 de decembro de 2025.– O Concello do Porriño vén de iniciar as obras de pavimentación no Camiño da Louriña, na parroquia de Pontellas, unha das actuacións incluídas no proxecto de mellora de viarios municipais financiado pola Axencia Galega de Desenvolvemento Rural (Agader) ao abeiro do Plan Camiña Rural 2025-2026.

O alcalde do Porriño, Alejandro Lorenzo, e o concelleiros, Ramón Porto e Bienvenido Estévez, desprazáronse ata a zona para comprobar o avance dos primeiros traballos, centrados na limpeza, o desbroce e a preparación do firme previo ao asfaltado. A intervención forma parte dun investimento global de máis de 73.000 euros no que se inclúen outro camiño en Pontellas e dous máis na parroquia de Atios.

Lorenzo destacou que “a posta en marcha desta actuación responde a unha demanda da veciñanza e suporá unha mellora substancial na seguridade e comodidade das comunicacións interiores. Esta é unha actuación máis nas nosas parroquias, nas que sempre estamos a traballar para que dispoñan e conten cos servizos básicos que merecen”.

O estado do firme facía necesaria esta intervención, que permitirá dotar o camiño dun pavimento seguro e duradeiro. O Camiño da Louriña, cunha lonxitude de 270 metros e un ancho medio de 7 metros, é un dos catro viarios incluídos neste proxecto municipal. O Concello prevé iniciar a obra de Galegos en Atios antes de rematar o ano, mentres que o Camiño Outeiro (Pontellas) e o Camiño da Torre (Atios) quedan programados para o ano 2026.

Con esta actuación, o Concello do Porriño continúa executando a súa liña estratéxica de mellora das infraestruturas do rural, reforzando a seguridade viaria e respondendo ás necesidades da veciñanza.

 

 

01/12/2025 in Parroquias, Vías e obras

O Porriño impulsa un novo servizo de transporte público con autobús eléctrico que conectará as parroquias co centro urbano

  • O novo servizo municipal suporá un sistema de mobilidade sostible que mellorará substancialmente a liña autonómica xa existente, con máis frecuencias, máis paradas e un sistema intelixente de xestión e información en tempo real
  • O proxecto responde a unha demanda veciñal histórica e xa se está a realizar un estudo para determinar as necesidades reais dos potenciais usuarios

O Porriño, 14 de novembro de 2025.-  “Un salto cualitativo na mobilidade do Porriño é o que suporá o sistema pioneiro de transporte municipal eléctrico que hoxe presentamos”. Así daba inicio o alcalde do Porriño, Alejandro Lorenzo, a súa intervención ante os medios de comunicación esta mañá para dar conta deste proxecto. “Non se trata só de conectar as sete parroquias e o barrio de Carracido co centro, senón de ofrecer un servizo accesible, moderno e respectuoso co medio ambiente”, explicaba o rexedor.

O Concello do Porriño continúa a impulsar políticas de mobilidade sostible e inclusiva coa posta en marcha dun novo sistema de transporte público municipal mediante autobús eléctrico, que conectará as zonas rurais co centro urbano. O proxecto busca mellorar a comunicación entre os distintos núcleos do municipio, reducir a dependencia do vehículo privado e avanzar cara a unha vila máis verde, accesible e cohesionada.

O proxecto responde a unha demanda veciñal histórica, ao tempo que complementará o servizo autonómico existente, mellorando frecuencias, ampliando o número de paradas e garantindo conexións con puntos estratéxicos do centro urbano como o centro de saúde, o polideportivo municipal ou o concello e tamén aos diferentes polígonos industriais. “Precisamente, a día de hoxe xa se está a traballar nun estudo potencial a través do cal coñeceremos as demandas reais dos usuarios, para poder marcar horarios e frecuencias e conseguir ter así un servicio óptimo e adaptado ás necesidades da veciñanza, que sempre será susceptible de cambios”, sinalou o alcalde.

O novo autobús eléctrico municipal percorrerá tódalas parroquias do termo municipal, conectándoas co casco urbano mediante unha rede de paradas intelixentes. Así, cada parada contará con casetas identificadas, paneis informativos con horarios e rutas actualizadas e estará integrada nunha aplicación móbil que permitirá consultar información en tempo real, planificar desprazamentos e mesmo solicitar viaxes baixo demanda en situacións puntuais.

“O noso obxectivo é conectar de verdade O Porriño: parroquias, barrios e centro urbano. Apostamos pola innovación, a accesibilidade e a cohesión territorial, construíndo unha vila máis verde, máis humana e mellor comunicada”, engadiu Lorenzo.

A idea principal desta iniciativa está contemplada no Plan de Actuación Integral (PAI) “O Porriño O Noso Encontro”, que vén de ser beneficiario dunha asignación de fondos europeos. O proxecto está enmarcado no terceiro dos catro obxectivos estratéxicos do PAI, centrado en fomentar unha mobilidade integrada, sostible e eficiente entre Torneiros e o casco urbano pero o Concello amplía a actuación, cubrindo a totalidade das parroquias, por iso parte do proxecto contará cunha aportación municipal.

Con esta iniciativa, o Concello do Porriño dá un paso máis cara a un modelo de mobilidade sostible, moderna e adaptada ás necesidades da cidadanía, reforzando as conexións entre os núcleos urbanos e rurais do municipio, apostando pola innovación, a accesibilidade e a cohesión territorial.

14/11/2025 in Infraestruturas, Parroquias

O Concello impulsa o saneamento en Budiño cun investimento de máis de 220.000 euros no barrio de Trapa

  • A actuación permitirá conectar case unha trintena de vivendas, dando servizo a máis de 140 veciños, ao sistema xeral de saneamento do río Louro, ademais de mellorar o pavimento e o alumeado público da zona
  • O proxecto, financiado a través do Plan Máis Provincia da Deputación de Pontevedra, sairá nos vindeiros días a licitación e terá un prazo de execución de dous meses

O Porriño, 13 de novembro de 2025.- O Concello do Porriño sacará a licitación nos vindeiros o proxecto de saneamento en Budiño-Trapa, unha actuación que conta cun investimento de 220.430,31 euros, financiados a través do Plan Máis Provincia da Deputación de Pontevedra, e que terá un prazo de execución de dous meses desde a súa adxudicación.

O alcalde do Porriño, Alejandro Lorenzo, acompañado polos concelleiros Ramón Porto e Carlos González, visitou esta mañá o lugar no que se acometerán as obras e destacou a relevancia deste proxecto “para mellorar a calidade de vida dos veciños e veciñas de Trapa e avanzar cara a un Porriño con todos os servizos básicos garantidos”. O rexedor lembra que “o saneamento nas parroquias é unha das nosas grandes prioridades. Traballamos a diario para que ningún veciño quede sen este servizo esencial. Desde o inicio do noso mandato fixemos un esforzo económico e organizativo sen precedentes para planificar e executar todas as obras necesarias. Gracias a ese traballo previo, hoxe seguimos cumprindo a nosa folla de ruta”, engadiu Lorenzo.

Un proxecto integral de mellora dos servizos básicos

Na actualidade, o núcleo rural de Trapa, en Budiño, carece de rede de saneamento municipal polo que se fai necesario conectalo ao sistema xeral de saneamento do río Louro, ao tempo que se melloran a rede viaria e a iluminación da zona.

A solución proxectada permitirá prolongar a rede de saneamento desde o núcleo de O Mosteiro, eliminando as fosas sépticas actuais e conectando directamente un total de 28 vivendas, que agrupan a máis de 140 habitantes, ao sistema municipal. Ademais, reporase o pavimento dos camiños afectados, mellorarase o drenaxe superficial e renovarase o alumeado público con luminarias LED de 40W, semellantes ás instaladas noutras zonas do municipio.

“Esta é unha obra que non só mellora o saneamento, senón que tamén renova o aspecto e a seguridade do vial, reducindo o impacto ambiental e garantindo un servizo sostible a longo prazo”, explicou o alcalde

Un esforzo continuado e histórico en materia de saneamento

“Sabemos que o saneamento é unha prioridade para moitos veciños, pero tamén é un servizo de gran complexidade técnica e custo moi elevado. Por iso seguimos avanzando paso a paso, coa colaboración de institucións como a Deputación de Pontevedra e a Xunta de Galicia, que nos axudan a facer realidade proxectos coma este en tódalas parroquias”, concluíu Lorenzo.

13/11/2025 in Infraestruturas, Parroquias

O Concello acomete a transformación integral de Torneiros cun investimento de máis de 2,7 millóns de euros para convertelo nun espazo máis accesible, sostible e moderno

  • O proxecto, que será financiado pola Deputación de Pontevedra e fondos europeos, modernizará infraestruturas, mellorará a mobilidade e impulsará a cohesión territorial do municipio
  • Inclúe a creación dun parque acuático e actuacións de humanización que farán desta parroquia un modelo de rexeneración urbana que mellorará a calidade de vida da veciñanza

O Porriño, 8 de novembro de 2025.- O Concello do Porriño vén de presentar o proxecto de rexeneración urbana do núcleo de Torneiros, unha actuación estratéxica que suporá unha transformación profunda desta parroquia a nivel urbanístico, social e ambiental. Fíxoo esta mañá o alcalde Alejandro Lorenzo nun acto público celebrado no centro cultural Alba.

Cun investimento total de 2.749.500 euros, dos cales 1,1 millóns serán financiados pola Deputación de Pontevedra a través do Plan Extra 2025 e o resto con fondos europeos, o proxecto converterase nun dos máis ambiciosos impulsados polo Concello nos últimos anos. Nel inclúese tamén o proxecto de parque acuático no Parque Alba, que complementará a intervención coa creación dun novo espazo de lecer familiar e deportivo, reforzando a oferta de equipamentos e a integración social da zona. “Son consciente de que se fixeron moitas novas infraestruturas, en distintos puntos do municipio, e nesta ocasión actuaremos en Torneiros, en cada un dos cinco polígonos residenciais que concentra un dos maiores núcleos de vivendas do Porriño. Pero isto non quedará aquí, continuaremos a rexenerar e transformar todas e cada unhas das parroquias, porque sabemos que son moitas as melloras que precisan e niso estamos a traballar cada día, en facer que eses proxectos sigan adiante e vaiamos avanzando, porque é moi complexo, case imposible ter os recursos suficiente para facer todo en tan pouco tempo, de aí que traballemos a medio e longo prazo”, explicaba o alcalde.

O investimento previsto abrangue dende a modernización dos servizos públicos básicos, a mellora da accesibilidade universal, a eficiencia enerxética, a creación de espazos públicos de calidade, ata a revitalización social e económica do núcleo de Torneiros. A intervención proposta responde a unha necesidade real e prioritaria do Concello do Porriño: mellorar de forma sostida e equilibrada as condicións urbanas, sociais e ambientais dun dos núcleos máis relevantes do municipio, garantindo a cohesión territorial e o benestar da poboación.

O proxecto en Torneiros busca mellorar o medio ambiente urbano e fomentar a mobilidade peonil mediante a redistribución do espazo viario. Prevese ampliar as zonas peonís, mellorar as beirarrúas e a iluminación, eliminar barreiras arquitectónicas e incorporar vexetación e mobiliario urbano. Estas actuacións permitirán crear un espazo máis amable, accesible e sostible, no que a veciñanza poida gañar protagonismo fronte ao tráfico motorizado facendo especial fincapé naqueles viarios nos que se localizan puntos de gran afluencia como poden ser os centros educativos, o multiusos de Torneiros ou o centro cultural Alba.

A intervención contempla ademais a renovación das redes de abastecemento, saneamento e drenaxe pluvial, así como a modernización do alumeado público con tecnoloxía LED, reducindo o consumo enerxético e as emisións de CO₂. A actuación aposta por un modelo de mobilidade sostible e accesibilidade universal. Segundo explicou o alcalde “Torneiros é un dos núcleos máis dinámicos e con maior potencial do Porriño, pero tamén un dos que máis precisaba unha modernización profunda. Con este proxecto imos equilibrar o territorio, mellorar a calidade de vida da veciñanza e crear un espazo máis humano, seguro e sostible”. O rexedor destacou que a actuación permitirá equiparar o nivel de servizos desta parroquia ao do centro urbano, reforzando a cohesión interna e reducindo a dependencia funcional do núcleo principal.

“Queremos que o Porriño avance de maneira equilibrada, onde cada parroquia teña servizos e espazos públicos de calidade. Torneiros vai ser un exemplo de como queremos construír o futuro do noso concello”, concluíu o rexedor.

O Concello do Porriño reafirma así a súa aposta por un modelo de desenvolvemento sostible, inclusivo e eficiente, en liña coa Axenda Urbana 2030 e cos Obxectivos de Desenvolvemento Sostible, consolidando a Torneiros como un espazo máis habitable, seguro e ambientalmente responsable.

 

 

08/11/2025 in Infraestruturas, Parroquias

O Concello saca a licitación as obras de pavimentación de camiños de Pontellas e Atios, cun investimento de máis de 73.000 euros

  • O proxecto, subvencionado ao abeiro do Plan Camiña Rural 2025 da Axencia Galega de Desenvolvemento Rural, mellorará a seguridade e accesibilidade en catro viarios municipais
  • O alcalde, Alejandro Lorenzo, indica que actuacións como estas son fundamentais para enxalzar o rural e dar resposta ás necesidades da veciñanza das parroquias

O Porriño, 27 de outubro de 2025.- O Concello do Porriño vén de iniciar o proceso de licitación para a contratación das obras de pavimentación dos camiños de Louriña (Rocal) e Outeiro, en Pontellas, e Galegos e A Torre, en Atios. A actuación supón un investimento total de 73.868,08 euros, financiados pola Axencia Galega de Desenvolvemento Rural (Agader) ao abeiro do Plan Camiña Rural 2025-2026.

O proxecto contempla a repavimentación de 971 metros de camiños de titularidade municipal, que actualmente presentan un estado de deterioro considerable, afectando á mobilidade e seguridade dos usuarios. As obras, cun prazo de execución de tres meses, inclúen tarefas de desbroce, limpeza e fresado previo ao asfaltado con aglomerado, sen modificar o trazado nin a rasante dos camiños.

O alcalde do Porriño, Alejandro Lorenzo, destacou a importancia deste tipo de investimentos no rural, “seguimos avanzando na mellora das infraestruturas nas nosas parroquias. Estas actuacións son fundamentais para velar polo benestar da veciñanza que viven no rural e enxalzar os espazos que son parte da nosa identidade como concello. Este proxecto é unha mostra máis do compromiso do Goberno municipal con atender as demandas reais dos veciños e veciñas e garantir unhas comunicacións seguras e accesibles en todo o territorio”, engadiu.

Os camiños que se verán beneficiados polas obras son Camiño Louriña (Pontellas), de 270 metros de lonxitude e 7 metros de ancho medio; Camiño Outeiro (Pontellas), 365 metros, con tramos de 5 e 4,5 metros de ancho; Camiño A Torre (Atios), 100 metros de lonxitude e 4 metros de ancho medio e Camiño Galegos (Atios), con 136 metros divididos en tres tramos con anchos de 4,5, 3,5 e 4,5 metros, respectivamente.

Con este proxecto, o Concello de O Porriño continúa coa súa liña de actuación enfocada na dinamización do medio rural, co obxectivo de mellorar a calidade de vida e os servizos en todo o termo municipal

27/10/2025 in Parroquias, Vías e obras

Arranca outubro co inicio dos cursos nas asociacións veciñais e culturais con máis de 90 clases á semana

  • 19 entidades das oito parroquias ofrecen, gracias ás axudas nominativas do Concello, máis de 550 horas mensuais de actividades para todas as idades e gustos, con formación en música, idiomas, pintura, costura, teatro e deporte

O Porriño, 2 de outubro de 2025.- O Concello do Porriño dá a benvida ao mes de outubro cunha intensa programación de actividades formativas e de lecer nas distintas parroquias, da man do tecido asociativo local. Son 19 asociacións veciñais e culturais, repartidas polas oito parroquias do municipio, as que ofertan máis de 550 horas mensuais de cursos, o que supón unha media de 138 horas semanais distribuídas nunhas noventa clases de luns a sábado.

A programación abrangue propostas para todas as idades e gustos, desde actividades deportivas como ximnasia, pilates, zumba ou ioga, ata obradoiros de música tradicional (percusión, canto, pandeireta, acordeón, gaita, coro), pasando por clases de inglés, costura, labores, corte e confección, pintura, restauración, traballos con coiro, teatro e arte floral, entre outras. As actividades desenvólvense de luns a sábado, en diferentes horarios, maioritariamente polas tardes para facilitar a participación da veciñanza.

Na xornada inaugural, o alcalde do Porriño Alejandro Lorenzo visitou unha das actividades con maior participación, o curso de ximnasia en Pontellas, que se ofrece en dúas quendas debido á alta demanda. “Desde o Concello apostamos por apoiar o dinamismo das asociacións e garantir que en todas as parroquias haxa acceso a actividades culturais, deportivas e formativas. É unha forma de facer comunidade, de mellorar a calidade de vida e de fortalecer o tecido social que tanto caracteriza ao noso municipio”, sinalou o alcalde.

Esta ampla oferta de cursos é posible gracias á colaboración entre o Concello e as entidades organizadoras. O Concello do Porriño colabora economicamente con todas estas asociacións mediante achegas nominativas anuais, cuxo importe total supera os 50.000 euros, que permiten garantir a continuidade e calidade das actividades en cada parroquia..

O Concello continuará a traballar da man das asociacións para ampliar e diversificar a oferta ao longo do ano, consolidando o seu compromiso cun Porriño activo, participativo e unido.

02/10/2025 in Cultura e festas, Parroquias

O Porriño presenta un novo proxecto que transformará a mobilidade entre o casco urbano e as parroquias

  • Destínase máis dun millón de euros a humanizar preto de dous quilómetros da rúa Antonio Palacios, nos que se inclúe as inmediacións dos centros educativos, o polideportivo municipal e o acceso á A-52
  • Crearase un carril bici dende o parque Gonzalo Ordóñez ata a entrada á parroquia de Cans e ampliaranse as beirarrúas, dando prioridade aos peóns e mellorando a seguridade viaria e a accesibilidade universal

O Porriño, 16 de agosto de 2025.- Promover un cambio modal cara un tipo de transporte menos contaminante, máis saudable e seguro, dando prioridade aos peóns fronte aos vehículos a motor, e mellorando a accesibilidade universal, é o obxectivo do último dos proxectos presentado polo Concello do Porriño que transformará unha das arterias de entrada e saída ao casco urbano.

Os traballos do proxecto “Senda ciclista e pavimentación rúa Antonio Palacios no tramo rúa Cruceiro-Cans” céntranse na construción dun carril bici, ampliación de beirarrúas e redimensionado e pavimentación dos viais de circulación, mellorando así a seguridade viaria e a accesibilidade universal. A actuación conta cun orzamento de 1.066.887,26 euros, dos cales 645.024,26 euros serán financiados cunha axuda da Deputación de Pontevedra, enmarcada no programa Reacpon, unha vez concedida neste ano 2025 e modificado e ampliado o seu proxecto inicial.

A transformación afectará a un tramo cunha lonxitude de 1.625 metros e cunha superficie de 22.960 metros cadrados, que abrangue dende o parque Gonzalo Ordóñez ata a entrada da parroquia de Cans, establecéndose un prazo de execución de seis meses.

“A creación deste carril bici formará un dos futuros eixos de mobilidade sostible que dá servizo ao conxunto do Porriño facilitando o acceso ao casco urbano da vila”, explica o alcalde Alejandro Lorenzo, facendo referencia á continuidade que terá este carril ciclista pola avenida Domingo Bueno ata chegar á rotonda de A Casilla, en Atios, “para o cal xa temos tramitada outra posible subvención, o que suporía a unión destas dúas parroquias a través do centro do municipio”.

Con todo elo, esta transformación dos usos provocará un notable aumento da mobilidade ciclista e peonil nos desprazamentos cotiáns, á vez que mellorará a calidade do aire e o medio ambiente.

Ademais, este carril bici dará servizo a equipamentos municipais como son o Instituto Pino Manso, o colexio Xosé Fernández López e o polideportivo, que verán a súa contorna humanizada coa ampliación das beirarrúas en ata catro metros de ancho. De xeito paralelo, para a mellora da seguridade no tráfico rodado e nos itinerarios peonís nesta zona está proxectada  a execución dunha rotonda (prevista xa no PXOM do ano 2003) que enlazaría a rúa Antonio Palacios coa estrada que dá acceso á autovía A-52.

No proxecto “Senda ciclista e pavimentación rúa Antonio Palacios no tramo rúa Cruceiro-Cans” contémplase a reforma e reparación da capa de rodadura do vial, cun novo asfaltado e sinalización horizontal; instalación de sinalización vertical; soterramento da liña de alumeado coa recolocación dos puntos de luz e a instalación de novas columnas de tecnoloxía led; reforma dos sumidoiros; reposición da rede de abastecemento e plantación de árbores.

16/08/2025 in Infraestruturas, Medio Ambiente, Parroquias, Urbanismo, comercio e industria, Vías e obras

O Concello do Porriño destina tres parcelas municipais para a construción de vivenda protexida

  • O alcalde Alejandro Lorenzo presenta as tres grandes liñas de actuación do goberno municipal para os vindeiros anos. Os terreos están localizados no centro urbano e en Torneiros e suporán a creación de 80 novos fogares
  • A atención ás persoas maiores e o saneamento integral son as outras dúas prioridades

O Porriño, 11 de agosto de 2025.- O alcalde do Porriño, Alejandro Lorenzo, presentou esta mañá nun encontro informativo cos medios de comunicación as principais liñas de actuación que dende o Concello se pretenden levar a cabo nos vindeiros anos 2026 e 2027, centradas na posta en marcha dun ambicioso programa de vivenda protexida, a construción dunha residencia de maiores e un novo centro de día e o avance decidido nas obras para acadar o saneamento integral.

Dende fai máis de 20 anos non se impulsou ningún proxecto de vivenda protexida no Porriño e, sen embargo, a poboación non deixou de medrar, pasando dos 16.000 habitantes hai dúas décadas aos máis de 21.000 na actualidade. A posta a disposición de tres parcelas municipais que suman máis de 3.000 metros cadrados e que suporán a creación de aproximadamente 80 vivendas protexidas foi o primeiro dos temas a tratar. O alcalde anunciou a localización de cada un destes terreos no casco urbano e na parroquia de Torneiros, máis concretamente “na rúa Fernández Areal en conexión con Antonio Palacios; en Domingo Bueno, na contorna da Capela da Guía, e entre os polígonos tres e cinco de Torneiros”. Unha oferta que ben seguro terá unha rápida resposta se se teñen en conta as 738 persoas rexistradas como demandantes de vivenda protexida, incluídas aquelas que escollen O Porriño como concello secundario.  “Este dato unido  tamén ao da alta taxa de natalidade fan do Porriño un municipio con gran demanda de vivenda e dende o Concello queremos transmitir a todas esas persoas interesadas que estamos xa en marcha para a promoción da creación de novas vivendas. O Porriño vai garantir que vivir aquí sexa unha opción real, non un luxo”, incide o rexedor. Neste sentido, explicou tamén que dende o Concello “estudaremos posibles axudas e bonificacións para a construción e o acceso a este tipo de vivenda”.

A maiores deste solo municipal enmarcado no Programa de Oferta de Solo de Entidades Locais que facilita que a Xunta de Galicia promova vivenda protexida en terreos municipais, o municipio dispón duns 45.000 metros cadrados para destinalos á posible construción de vivendas, “que podería ser tanto para venda como para aluguer”, puntualiza Lorenzo. As parcelas dispoñen de condicións urbanísticas favorables e licenza directa, o que permitirá reducir prazos e iniciar os proxectos de forma áxil.

 

Dous novos centros para dar resposta ao envellecemento activo da poboación

A segunda das prioridades presentadas por Alejandro Lorenzo foi a atención ás persoas maiores, a través de dous proxectos estratéxicos que combinan a recuperación de espazos públicos con valor social coa creación de novos servizos de proximidade. O primeiro é o proxecto de construción dun novo Centro Residencial de Maiores en Budiño. Cun orzamento estimado de 1,2 millóns de euros, construiríase nunha parcela municipal de máis de 4.000 metros cadrados situada en Budiño e disporía dunha capacidade para 24.

Pola súa parte, o novo Centro de Día será froito da rehabilitación da antiga escola unitaria do Covelo, na parroquia de Atios. Terá capacidade para unha vintena de usuarios e contará cun investimento de 420.000 euros, cofinanciado pola Xunta de Galicia.

“Ambas iniciativas, cuxos proxectos iniciamos xa en 2023, responden a un modelo de coidado máis humano, próximo e de calidade, que dignifica a atención ás persoas maiores e á vez, no caso do centro de día, dá unha segunda vida a edificios históricos en desuso. O Porriño ten hoxe máis de 4.000 persoas maiores de 65 anos e estes dous centros permitirán que moitas delas poidan seguir vivindo preto das súas familias, coa atención que precisan e merecen. Apostamos por un modelo que combina calidade asistencial e arraigo no territorio”, sinalou o alcalde.

 

Saneamento integral en todas as parroquias

A terceira liña de actuación que tratou o rexedor no encontro foi o saneamento  presentada polo alcalde foi o saneamento, asegurando que dende o goberno local “trabállase sen descanso para acadar o obxectivo do saneamento integral, marcado tamén dende o Consorcio Augas do Louro”, o cal el mesmo preside. Dende 2022 o Concello leva investidos máis de 3,5 millóns de euros nesta materia, “cando accedemos ao goberno marcamos como prioritario a redacción de todos os proxectos pendentes e así coñecer de primeira man a situación real. Con todo elo xa elaborado, a día de hoxe quedan por executar obras por importe total de 16 millóns euros, para o cal iremos avanzando con medios propios e a través de fondos doutras administracións, seguindo a nosa folla de ruta inicialmente establecida, clara, técnica e realista”.

Actualmente está en execución a obra de Picouzo, en Budiño, cun investimento de 380.000 euros e están xa licitadas outras dúas actuacións, unha en Sobral–Eiriz, tamén en Budiño, cun orzamento de 344.000 euros, e a conexión entre Seixo, en Torneiros, e Arrotea, en Pontellas, que suporá un investimento próximo aos 200.000 euros.

11/08/2025 in Alcaldía, Infraestruturas, Parroquias, Política Social, Urbanismo, comercio e industria

O Concello do Porriño destina 175.000 euros en axudas ás comunidades de augas das parroquias

 

  • Publicadas as bases da nova convocatoria: o prazo para presentar solicitudes xa está aberto e rematará nun mes 

O Porriño, 6 de agosto de 2025.- O Concello do Porriño reafirma o seu compromiso coas parroquias publicando unha nova liña de axudas destinada ás comunidades de usuarios de auga, reforzando así o compromiso coa mellora das infraestruturas básicas e o benestar da cidadanía. As traídas do municipio poderán beneficiarse destas achegas ás que se destinarán un total de 175.000 euros. Desta contía, 95.000 euros estarán destinados á liña de mantemento de instalacións e 80.000 euros á liña de investimentos, mantendo o incremento realizado na anterior convocatoria, cando se duplicou o orzamento nesta última partida.

Dúas liñas de axuda: mantemento e investimentos

A primeira liña, enfocada ao mantemento, ten como obxectivo financiar a contratación de obras de reparación e a substitución de redes de distribución sempre que estas non superen os 50 metros lineais. Ademais, cubriranse gastos relacionados coas analíticas de control sanitario e cos traballos de mantemento e conservación nos sistemas de captación de auga, almacenamento, potabilización e distribución.

A segunda liña de axudas está destinada á execución de obras de investimento en instalacións que sexan propiedade das comunidades ou sobre as que teñan dereito de uso. Neste caso, inclúese a substitución de redes de distribución cando se superen os 50 metros de lonxitude.

Tamén serán subvencionables os gastos derivados da adaptación ao protocolo de autocontrol do abastecemento, en consonancia co programa de vixilancia sanitaria da auga de consumo da Delegación de Pontevedra da Consellería de Sanidade. Igualmente, cubriranse os custos derivados da elaboración do protocolo sanitario e os relacionados coa inscrición no Sistema de Información Nacional de Augas de Consumo (SINAC).

  • Accede ás bases pinchando na seguinte ligazón: 

BASES CONVOCATORIA AXUDAS COMUNIDADES DE AUGAS

Contías e condicións da axuda

Cada comunidade poderá optar a un máximo de 8.000 euros por cada liña de axuda, podendo alcanzar os 12.000 euros no caso de solicitar apoio en ambas as liñas. En ningún caso a contía total subvencionada poderá superar o 80 % do custo total do proxecto presentado.

O concelleiro Marcos Martínez, anunciou que as bases reguladoras xa están publicadas no Boletín Oficial da Provincia de Pontevedra (BOPPO) e que o prazo de presentación de solicitudes permanecerá aberto durante un mes. Tamén lembrou que as comunidades interesadas poden contactar co Concello para solicitar información ou resolver dúbidas.

Pola súa parte, o alcalde, Alejandro Lorenzo, destacou a importancia desta convocatoria sinalando que “é fundamental apoiar ás traídas para que poidan prestar o mellor servizo posible aos nosos veciños. Estes investimentos non só mellorarán a calidade da auga, senón que tamén contribuirán ao benestar de toda a veciñanza ao contar cun abastecemento seguro”.

Cómpre lembrar que o ano pasado concedéronse as axudas por importe íntegro, evidenciando o interese e a boa xestión das comunidades solicitantes.

Desde o Concello do Porriño faise un chamamento ao uso responsable da auga, especialmente nesta época de seca, tanto pola importancia de preservar este recurso como pola necesidade de garantir a súa calidade sanitaria.

06/08/2025 in Parroquias