Mocidade

O Concello terá unha iluminación especial en catro datas inminentes de conmemoracións

O edificio do Concello terá unha iluminación especial en catro datas conmemorativas nas próximas semanas. A OMIX do Porriño, xunto coa Concellería de Educación e a de Igualdade e Cultura, anunciaron estas accións reivindicativas para estas catro datas: o 19 de outubro, Día Mundial contra o cancro de mama; 24 de outubro, Día Internacional contra o Cambio Climático; o 20 de novembro, Día Universal da Infancia, e o 25 de novembro, Día Internacional para a Eliminación da Violencia contra a Muller.

A primeira destas accións celebrarase o vindeiro martes 19, cando tanto a fachada principal como o lateral do edificio do concello estarán iluminados de cor rosa claro con motivo do Día Mundial contra o cancro de mama, unha data que busca sensibilizar e concienciar as persoas de todo o mundo sobre a importancia de realizar un exame de mamas regularmente, coa finalidade de detectar calquera signo ou anomalía. Tamén se pretende facer un recordatorio do compromiso da sociedade contra o cancro de mama.

Desde a OMIX de Porriño, a Concellería de Educación e o Consello da Infancia e a Adolescencia do noso concello, “animámosvos a que compartades todo o que descubrades sobre o cancro de mama nas vosas redes sociais e a que motivedes ás mulleres para realizaren o auto diagnóstico co cancelo #DíaInternacionaldelCáncerdeMama.

 

15/10/2021 in Alcaldía, Cultura e festas, Educación e tecnoloxía, Igualdade, Medio Ambiente, Mocidade

Chega ao Porriño “Creactivity”, un espazo para promover o enxeño

A Concellería de Educación e a OMIX do Concello do Porriño, en colaboración coa “Fundación La Caixa”, convidan a participar na actividade “Creactivity” que é un espazo itinerante promovido pola entidade financeira. Consistirá en obradoiros que se realizaran polos centros educativos do municipio.
Os días 15, 16 e 17 de setembro en horario de mañá para o alumnado de Primaria e de 1º e 2º da ESO, previa inscrición por parte de cada colexio e instituto.
Polas tardes, estes obradoiros permanecerán abertos para o público en xeral.

“Creactivity” é un espazo interactivo que fomenta o enxeño e a creatividade. Un novo proxecto itinerante que propón obradoiros para espertar o enxeño de nenos e nenas e axudalos a sentirse cómodos nunha sociedade cambiante.
O espazo permite investigar, formular retos concretos, pensar solucións, inspirarse, compartir, colaborar, improvisar, traballar en equipo e moito máis. O alumnado traballará competencias transversais no ámbito matemático, científico e tecnolóxico.

As localizacións do vehículo de “Creactivity” en Porriño serán as seguintes:
* 15 DE SETEMBRO 2021
Chaira da Igrexa de San Rosendo de Torneiros

* 16 e 17 DE SETEMBRO 2021
Polideportivo Municipal do Porriño

Para concertar visitas e reservar datas, ou realizar calquera consulta, as persoas interesadas poderán chamar ao teléfono gratuíto 900 101 493 ou enviar un correo electrónico ao enderezo: info@creactivitybus.com

CARTEL O PORRIÑO CREATIVITI

13/09/2021 in Educación e tecnoloxía, Mocidade, Novas Tecnoloxías

“Necesitamos socializar” reclamou a concelleira Cami Moreira na presentación das Festas do Cristo 2021

As Festas do Cristo, os festexos principais do Porriño, comezan esta noite coa celebración da carreira ciclista “A Nocturna” e a partir do sábado e o domingo coa feira de oportunidades “Merca na rúa”. E concluirán o domingo, 3 de outubro, coa celebración da XXVIII Festa dos Callos na que este ano participarán preto de trinta establecementos de hostalería, cun prezo de 7 euros por ración que inclúe o pan e a cazola de recordo.

Cami Moreira, concelleira de Cultura e Festas, que hoxe fixo a presentación oficial do programa, afirmou que “necesitamos festas, con serenidade, e socialización, dentro dos límites dos protocolos sanitarios”. Moreira dixo que neste segundo ano de celebración en pandemia, coa experiencia adquirida, “todas e todos necesitamos vivir unha normalidade, particularmente que os nenos tamén vexan esa normalidade”, engadiu.

En canto ao programa, a concelleira destacou a celebración de numerosos eventos ao aire libre, ata en seis lugares diferentes. Serán a Praza do Concello, o Parque do Cristo, San Sebastián, o auditorio ao aire libre do Centro Cultural Municipal, a carpa instalada na explanada de Roxy e, finalmente, o aparcadoiro do velódromo municipal que albergará unha sesión de auto-cine coa proxección das curtas finalistas no último Festival de Cans.

Entre as actuacións musicais que están programadas, Cami Moreira destacou a presenza o domingo 26, do grupo de cantareiras “As Tanxugueiras”, de máxima relevancia por ser as que lideran coa súa canción “Figa”, os votos dos seguidores a representar España no Festival de Eurovisión 2022.

Entre as novidades do programa, Cami Moreira destacou o “Trivium Porriño”, un xogo de “trivial” sobre o municipio que poñerá a proba o coñecemento sobre Porriño das parellas que participen nas sucesivas eliminacións que comezarán o domingo 19.

Finalmente, a concelleira anunciou que haberá uns pregoeiros moi especiais: Antonio Palacios e Corona Gónzalez, encarnados polos actores que interpretan a ambos personaxes nas visitas guiadas dedicadas ao arquitecto porriñés durante este ano 2021. O acto do pregón será o sábado 25, ás 13 horas, no que suporá o inicio da Semana Grande das Festas que  inclúe o festivo local do luns 27 e que rematará o domingo 3 de outubro, “O Recristo”. 

10/09/2021 in Alcaldía, Cultura e festas, Deportes, Mocidade, Turismo

A Escola Municipal de Música abre o prazo para formalizar a matrícula para o curso 2021/22


Dende o martes 14 ata o venres 17 de setembro pódese formalizar a matrícula e reservar horarios na sede da Escola Municipal de Música (no Centro Multiusos de Torneiros), en horario de 16 a 21 horas, segundo a preinscrición realizada no mes de xuño.

 

Da mesma forma, o alumnado de novo ingreso que teña feita a preinscrición correspondente no mes de xullo poderá matricularse a partir das 17 horas do venres 17 de setembro.

As listaxes co nome, día e hora do alumnado preinscrito están expostas nas portas do Centro Cultural e da Escola Municipal de Música.
Na formalización da matrícula cumpriranse as normas establecidas no protocolo anexo.

O alumnado sen preinscrición poderá matricularse a partir das 18.30 horas do venres 17 de setembro ou a partir do día 22 de setembro de 16.30 a 18.30 horas, sempre e cando queden prazas dispoñibles.

Máis información nesta ligazón 

A Escola Municipal de Música do Porriño abre o prazo para formalizar a matrícula do curso 2021/2022

02/09/2021 in Cultura e festas, Educación e tecnoloxía, Mocidade

Mozos e mozas porriñeses participarán nunha avaliación sobre o cumprimento da Convención dos Dereitos do Neno

 

Mozos e mozas que integran o Consello da Infancia e da Adolescencia do Porriño participarán ao longo do mes de setembro en diferentes grupos focais que traballaran nunha avaliación sobre o grao de cumprimento da Convención dos Dereitos do Neno por parte das institucións do noso país.
Segundo informan a Oficina Municipal de Información á Xuventude, OMIX do Porriño e a Concellería de Educación, os representantes porriñeses abordarán temas de igualdade de xénero, violencia, educación, saúde e benestar, a través do traballo de debate nos grupos de participación.
Os rapaces e rapazas porriñesas participarán na elaboración dun informe sobre diversos asuntos de actualidade que entregarán ao Comité de Dereitos dos Nenos, Nenas e Adolescentes.
Coas conclusións e propostas, os grupos focais, compostos a súa vez por nenas e nenos de todo o país, elaborarán o informe final para o Comité dos Dereitos do Neno. Este informe serviralle ao Comité para avaliar se o estado español está a facer todo o posible para respectar a Convención dos Dereitos do Neno da que forma parte.

25/08/2021 in Educación e tecnoloxía, Mocidade

Preto de 40 inscritos para participar na “Breaking Battle Porriño” que se celebrará este sábado coa ocasión das Festas de San Bieito

A competición-espectáculo “Breaking Battle Porriño” que constitúe a principal novidade da programación das Festas de San Bieito, celebrarase este sábado coa participación de preto de 40 mozos e mozas de toda Galicia que practican esta modalidade deportiva que será olímpica nos Xogos de París 2024.

Entre os participantes estarán David Amor, un mozo de Neda de 14 anos que xa é o segundo no ranking nacional desta modalidade e foi medalla de bronce no Campionato de España en 2020; e a rapaza ourensá, Alicia Babarro, de 10 anos que actualmente lidera a Liga Galega de Breaking en categoría iniciación.

O evento, incluído pola Concellería de Cultura na programación das festas, terá lugar por primeira vez na nosa vila. Aínda que inicialmente estaba previsto na praza de San Sebastián, acordouse trasladar ao auditorio exterior do Centro Cultural Municipal onde se montará unha pista de PVC. Ademais haberá un espazo con cadeiras reservado para o público asistente e os acompañantes dos participantes.

A concelleira Cami Moreira subliñou “o esforzo conxunto da OMIX do Porriño e das concellerías de Deportes e Festas para achegar novas propostas de lecer, cambiando rexistros e organizando eventos máis demandados pola mocidade”.

A competición durará catro horas (entre as 17:00 e as 21:00) e será “mediante sistema de eliminatorias ata chegar a unha final de un contra un. Tres xuíces, dous galegos e un andaluz, encargaranse da puntuación e control da competición”, segundo explicou Pablo Castiñeira, responsable de “Vella Escola”, produtora do evento.

09/07/2021 in Cultura e festas, Deportes, Mocidade

Os Consellos da Infancia e Adolescencia dos concellos do Porriño, Redondela e Tomiño condearon a morte violenta de Samuel Luiz

Os nenos e nenas que forman os Consellos da Infancia e Adolescencia dos concellos do Porriño, Redondela e Tomiño condearon a agresión e morte do mozo Samuel Luiz, vítima dunha malleira. Na sesión conxunta telemática que mantiveron os compoñentes destes tres consellos, os nenos participantes amosaron a súa preocupación pola “LGTBI fobia” existente na sociedade.

Precisamente a reunión “on line” convocouse para tratar outro problema de convivencia, neste caso nas aulas, o “bullying”. Fixeron especial fincapé na necesidade de levar a cabo accións que se centren nas orixes deste problema en lugar de centrar os esforzos nas consecuencias. “Foron moitas as conclusións ás que chegaron e moi diversas propostas que sairon. Agora haberá que concretar as máis factibles para darlles traslado aos respectivos Concellos”, explicou Noelia de la Fuente, responsable da Oficina Municipal de Información Xuvenil, OMIX do Porriño.  

Na reunión telemática tamén participaron Lourdes Moure, concelleira de Educación do Porriño e as súas homólogas de Redondela, Olga García e Tomiño, Fátima Rodríguez.

 

07/07/2021 in Educación e tecnoloxía, Mocidade

Mozas e mozos porriñeses fixeron a súa achega á conmemoración do Día do Orgullo, colaborando nun mural no Centro Cultural

Mozas e mozos porriñeses que forman parte do Consello Municipal de Participación da Infancia e Adolescencia, fixeron a súa achega á conmemoración do Día Internacional do Orgullo LGTBIQ+ 2021 colaborando na execución dun mural no Centro Cultural Municipal.

A Oficina Municipal de Información Xuvenil (OMIX do Porriño) coordinou esta actividade, desenvolvida coa asistencia técnica de “Vella Escola”.A intervención artística realizouse onte mércores, durante tres horas co resultado que se pode apreciar nas imaxes adxuntas.

24/06/2021 in Mocidade

“Dende O Porriño ata París”: presentada a “Breaking Battle” que se celebrará ao abeiro das Festas de San Bieito

O Concello do Porriño vai celebrar o sábado 10 de xullo a “Breaking Battle Porriño” que será unha competición/encontro de Breaking Dance que terá lugar por primeira vez na nosa vila.

Celebrarase ao abeiro das Festas de San Bieito na praza de San Sebastián onde se montarán unha pista principal e dúas máis pequenas para quecemento dos participantes. Ademais haberá un espazo con cadeiras reservado para o público asistente e os acompañantes dos participantes.

A concelleira subliñou “o esforzo conxunto da OMIX do Porriño e das concellerías de Deportes e Festas para achegar novas propostas de lecer, cambiando rexistros e organizando eventos máis demandados pola mocidade”.

Agardase “unha alta participación aproveitando que o breaking está declarada modalidade olímpica para os Xogos de París 2024”, segundo lembrou Pablo Castiñeira, representante de “Vella Escola”, produtora do evento.

Entre os participantes que se darán cita no Porriño agardase o concurso de David Amor, un mozo de Neda de 14 anos que xa é o segundo no ranking nacional desta modalidade e foi medalla de bronce no Campionato de España en 2020. De aí que a concelleira de Festas, Cami Moreira concluíse coa frase “Dende O Porriño a París” tendo en conta as posibilidades do mozo nedense de ser seleccionado para as vindeiras Olimpíadas.

 

03/06/2021 in Cultura e festas, Deportes, Mocidade

Obradoiro sobre novas profesións para o alumnado de ensino secundario

A Oficina Municipal de Información á Xuventude xunto coa Concellería de Educación levan a cabo, ata o 31  de maio, a actividade “Mentoring para adolescentes: obradoiro sobre novas profesións, Pensando no meu Futuro”, que se imparte polos centros de ensino secundario do Porriño. Hoxe correspondíalle ao alumnado de 4º da ESO do IES Ribeira do Louro.

¿Cómo podemos tomar boas decisións sobre o noso futuro? ¿Que opcións temos? ¿Cómo podemos saber que é axeitado para nós?. Os adolescentes enfróntanse a moitas preguntas e vense na obriga de tomar decisión sobre os seus estudos case sen reflexionar ou investigar as mellores opcións para eles. Este obradoiro aborda o proceso de autocoñecemento e as novas profesións nun formato de duas horas. Neste tempo proporcionarase aos estudiantes unha visión de conxunto sobre as novas profesións que existen grazas á tecnoloxía, cales poden desenrolar en Galicia e como coinciden eses perfís profesionais coas súas habilidades e intereses naturais.

Indice de contidos:

  • Novas profesións relacionadas coa tecnoloxía: intelixencia artificial, automatización e robótica, etc.
  • Sectores productivos en Galicia e estudios relacionados.
  • Moocs e formación online gratuita.
  • Detección de fortalezas e definición de obxectivos.

Estes obradoiros (teórico-práctico de 2 horas) son impartidos dende o 13 de maio e chegarán a un total de 177 alumnos de 3º e 4º da ESO.

 

 

20/05/2021 in Educación e tecnoloxía, Mocidade