Igualdade

O Porriño pon en valor o traballo e a entrega das mulleres que manteñen a alma das parroquias

  • O Concello celebra un emotivo acto de recoñecemento á traxectoria e ao legado de Carmen Alonso, Adoración Carrera, Mercedes Besada, Juana Freiría, Fermina Fernández, Dolores Codesada, Teresa Castro, Carmen Míguez e Carmen Martínez.

Porriño 8 de marzo de 2026.– Nun acto cargado de simbolismo e emoción, o Concello do Porriño rendeu homenaxe este domingo, 8M, a nove mulleres que representan a esencia viva e o motor invisible das parroquias do municipio. Baixo o lema de que “cada parroquia ten unha alma e moitas veces esa alma ten nome de muller”, a xornada serviu para reivindicar o papel fundamental das mulleres como piares da memoria, o traballo e a cohesión social.

As homenaxeadas, procedentes dos distintos puntos da xeografía local, foron: Adoración Carrera Rodríguez, fundadora de Érguete (O Porriño); Mercedes Besada Martínez, unha das fundoras da Coral de Budiño (Budiño); Juana Freiría Roris, xornaleira (Mosende); Carmen Alonso Alonso, tendeira (Chenlo); Fermina Fernández Pérez, costureira (Cans); Dolores Codesada Carracedo, leiteira (Atios), Teresa Castro López, mestra (Carracido), Carmen Míguez González, peixeira (Pontellas),  e Carmen Martínez Pérez, perruqueira (Torneiros). Todas as súas vidas representan traballo, esforzo, conciliación e unión coa comunidade.

Mulleres raíz e faros da comunidade

Durante o acto, o alcalde de O Porriño , Alejandro Lorenzo, destacou que estas nove mulleres son “como as raíces das árbores: non sempre se ven, pero sen elas nada se sostén”. A través de diversas metáforas, comparou a súa entrega coa firmeza das montañas, a fertilidade da terra e a guía constante dos camiños antigos. “Hoxe estas nove mulleres representan a todas esas mulleres que coidaron, traballaron, loitaron e ensinaron sen pedir nada a cambio. Son o pan de cada día: sinxelas, necesarias e imprescindibles”, sinalou durante o discurso oficial.

Un legado que constrúe pobo

A homenaxe puxo o foco en que a construción dun pobo non reside só nos seus edifícios ou as súas rúas, senón na súa xente e, moi especialmente, na “forza tranquila” das mulleres que uniron xeracións e transformaron o esforzo en froitos para a comunidade.

O acto contou coa participacion da Escola Municipal de Música do Porriño e coa intervención, ademais do alcalde, da concelleira de Igualdade, Carolina González Costas e, por suposto, das protagonistas, porque se trata de darlles voz para  facelas visibles.

O recoñecemento concluíu cun agradecemento unánime por seren “memoria, exemplo e camiño para quen vén detrás”, asegurando que o seu testemuño permite que as parroquias sigan sendo un fogar cheo de luz e esperanza.

As mulleres homenaxeadas:

  • CARMEN ALONSO ALONSO (Chenlo)

Á fronte dunha tenda e un bar ao longo da súa vida laboral, Carmen é unha institución en Chenlo. O seu traballo visible foi o sustento de moitos, pero foi o seu traballo invisible —o dos coidados, a crianza de catro fillos, as tarefas do campo e a atención aos animais— o que a converte como un expoñente máximo das mulleres da súa xeración.

A pesar de que Carmen afirma con humildade que “non viviu a vida” debido ao moito que traballou, a súa enerxía segue intacta: participa en clases de pilates, ximnasia de memoria e continúa activa no campo. O seu desexo para o futuro é claro e xusto: “que o home e a muller sexan iguais e que saiban facer de todo”.

  • DORA CARRERA (O Porriño)

A súa historia é a da , valentía e coraxe compartida. En 1984, Dora Carrera foi peza fundamental na fundación da Asociación Érguete xunto a Carmen Avendaño. Nunha época de sombras, este grupo de nais tivo a determinación de enfrontarse ao narcotráfico, saíndo á rúa para desenmascarar as súas tramas e logrando fitos históricos como a reforma das leis e a humanización do tratamento das persoas con adiccións.

Grazas a ese pulo inicial, o proxecto que Dora axudou a sementar non deixou de medrar con, aínda hoxe, unha rede que presta axuda anual ao miles de persoas e fai unha la labor integral en programas de prevención, vivenda, integración social e busca de emprego.

Dora Carrera   non só coidou da súa casa, uniu o seu pobo, senón que se converteu en fogar e esperanza para un país enteiro, demostrando que a unión das nais é capaz de cambiar o curso da historia.

  • CARMEN MARTÍNEZ PÉREZ (Torneiros)

Carmen é a viva imaxe de que a paixón polo traballo non entende de horarios, senón de compromiso. Comezou a traballar sendo apenas unha moza, nunha época na que ser perruqueira significaba moito máis que un oficio: era converterse en confidente, en veciña e nun piar fundamental da vida social de Torneiros.

Carmen é unha muller que loitou por amor, unha forza que a impulsou a sacar adiante o seu proxecto de vida e o seu negocio a base de horas roubadas ao descanso.  Ese amor polo oficio non quedou nela, senón que floreceu nas súas fillas, que hoxe herdan con orgullo a súa peluquería. Ver como a súa tesoira segue o tempo en mans da seguinte xeración é o maior recoñecemento ao seu esforzo.

  • CARMEN MÍGUEZ GONZÁLEZ (Pontellas)

Carmen é a personificación da cultura do esforzo que define ás mulleres da nosa terra. Durante 43 anos, foi a peixeira que unía as lonxas da ribeira coas casas de media bisbarra. Mentres o mundo durmía, Carmen xa estaba en pé; a súa xornada comezaba ás catro da mañá, desafiando o frío e o cansazo para escoller o mellor produto.

Unha ruta de servizo á comunidade que non quedaba en Pontellas, co seu coche percorría dferntes parroquias de Mos, O Porriño ou Tui para achegar   a vida e o recado de porta en porta. Unha muller que tamén atendeu o campo e a súa casa, nunha época na que o descanso non estaba pensado para elas. Cun currículo escrito con madrugóns e quilómetros, Carmen reivindica con firmeza a importancia da muller traballadora neste día tan especial.

  • DOLORES CODESADA CARRACEDO (Atios)

Lola é o retrato da forza e da determinación que levantou as nosas parroquias. Nun tempo onde as mans non descansaban, ela fixo da súa vida un exemplo de entrega total: a casa, o campo e, por riba de todo, o seu oficio como leiteira.

Ser leiteira “toda a vida” era un compromiso inquebrantable co reloxo e cos veciños. Foi o vínculo entre a produción da terra e a alimentación das familias de Atios. O seu traballo esixía unha disciplina de ferro, e ademais, muller de carácter foi   o centro de gravidade da súa casa.

  • FERMINA FERNÁNDEZ PÉREZ (Pontellas)

Fermina, costureira de Pontellas, é a guardiá dunha memoria que non debemos esquecer, transformando a dureza da posguerra nun camiño de aprendizaxe e oficio.Lembra ben que “a vida de antes non era a de agora”. Eran tempos de silencio e necesidade, de xente agochada nos montes e de ausencias marcadas pola guerra. Nese contexto, a escola era un luxo ao que só se ía “cando se podía”, porque as mans facían falta para o sustento diario.

Con 18 anos, Fermina decidiu labrarse o seu propio futuro. Baixou ao Porriño para aprender a arte de costureira, un oficio que require paciencia e precisión. Sen recursos para mercar unha máquina de coser, non se rendeu: logrou mercala a prazos, fío a fío, puntada a puntada, ata que aquela ferramenta foi de seu. Aquela máquina fiou a súa vida e a da parroquia.

  • TERESA CASTRO LÓPEZ (Carracido)

Luguesa de nacemento, porriñesa de adopción e mestra de vocación, Teresa dedicou 37 anos da súa vida a unha das tarefas máis nobres: cultivar o futuro a través do ensino. 

Testemuña do cambio social durante eses anos, ela, que foi educada nun colexio de nenas ata sexto,  viviu de primeira man como pouco a pouco se combatía o machismo, un traballo de respeto que se fixo tamén dende as aulas. Pero tamén sinala con preocupación que  aínda que avanzamos en dereitos, o machismo segue sendo un reto e mesmo se perciben retrocesos que nos obrigan a non baixar a garda.

  • MERCEDES BESADA MARTÍNEZ (Budiño)

Mercedes é o exemplo vivo de como a dureza do traballo e a beleza da arte poden camiñar da man. Foi unha das fundadoras da Coral de Budiño, onde leva 39 anos cantando e facendo parroquia, e pobo. A súa vida foi un constante equilibrio entre a entrega á terra e a paixón pola música, sendo hoxe unha das figuras máis queridas da súa parroquia.

Na súa retina ainda, o na leira co seu bebé en brazos, os callos nas mans cando o chan se fregaba de xeonllos, e o retumbar da súa voz nunha agrupación qu pervive e que fai comunidade, demostrando que a cultura é o que nos mantén vivos e unidos.

  • JUANA FREIRÍA RORÍS (Mosende)

Aos seus 90 anos, Juana é a memoria viva dun Mosende de sacrificio, pero tamén de dignidade absoluta. Viúva con sete fillos ao seu cargo, lonxe de renderse, Juana multiplicou os seus esforzos. Traballou sen acougo, de sol a sol, para que na súa casa non faltase o sustento. Foi pai e nai, xornaleira e guía, levantando a súa familia coa única forza dos seus brazos e a súa vontade de ferro.

A súa vida é un relato de resistencia, o de quen tivo que converterse en xigante para protexer aos seus cando o destino se volveu difícil. Os seus 90 anos o tempo lle permite descansar pero segue sendo un exemplo para a súa parroquia.

08/03/2026 in Igualdade, Parroquias

O Porriño aposta pola reflexión interxeracional na súa programación do día da muller

  • Pon o foco no recoñecemento ás mulleres maiores das parroquias, na reflexión sobre os desafíos actuais en materia de igualdade e na visibilización do papel das mulleres en sectores tradicionalmente masculinizados

Porriño 3 de marzo de 2026.– O Concello do Porriño presentou hoxe, na Sala de Comunicacións da Casa Consistorial, a programación organizada con motivo do Día Internacional da Muller, 8 de Marzo, nun acto no que participaron o alcalde, Alejandro Lorenzo, e a concelleira de Igualdade, Carolina González.

A programación deste ano pon o foco no recoñecemento ás mulleres maiores das parroquias, na reflexión sobre os desafíos actuais en materia de igualdade e na visibilización do papel das mulleres en sectores tradicionalmente masculinizados. A actividade central será a homenaxe titulada “Cando elas falan, a historia permanece”, que terá lugar o domingo 8 de marzo e que pretende situar no centro a aquelas mulleres que, sen ocupar titulares, foron e son piares fundamentais das súas familias e comunidades. Tal e como se recolle na programación municipal, este acto busca recoñecer o seu traballo moitas veces invisible, a súa resiliencia e o seu dereito a unha vellez digna, activa e libre de violencias.

Durante a presentación, o alcalde Alejandro Lorenzo destacou que “este 8M queremos render tributo ás nosas mulleres maiores, auténticas protagonistas da historia viva do Porriño. Elas abriron camiños cando non existían e construíron comunidade desde o esforzo e o compromiso silencioso”. O rexedor subliñou ademais que “a igualdade non pode ser só unha declaración institucional nunha data concreta, senón unha liña de traballo permanente que se traduza en políticas reais e en oportunidades efectivas para todas as mulleres”.

A programación complétase coas xornadas “Igualdade, Muller e Dereitos: realidades e desafíos”, impulsadas polo Concello do Porriño como un espazo de reflexión, sensibilización e formación dirixido á cidadanía e ao tecido social do municipio

Estas sesións abordarán cuestións como a situación das mulleres maiores no rural, a violencia dixital que afecta ás mozas —incluíndo fenómenos como os deepfakes— e a desigualdade persistente no ámbito laboral.

A concelleira de Igualdade, Carolina González, explicou que “estas xornadas nacen coa vontade de abrir un diálogo interxeracional e de abordar as desigualdades desde unha perspectiva feminista e interseccional, atendendo ás diferentes realidades que viven as mulleres do noso concello”. González engadiu que “é fundamental visibilizar problemáticas como a violencia dixital ou a fenda laboral, pero tamén recoñecer o papel das mulleres maiores, porque o feminismo atravesa todas as idades e todos os espazos da vida”.

No marco desta programación tamén se realizará a estrea oficial do vídeo “Terra de Canteiras”, unha peza audiovisual que narra o percorrido dunha pedra desde a súa extracción ata a súa incorporación á obra, mostrando distintos perfís profesionais —na súa maioría mulleres— que traballan nas fases de extracción, transformación, deseño e construción

Ademais, presentouse o proxecto CONSTIC, desenvolvido polo IES Ribeira do Louro e financiado con fondos Next Generation EU, orientado á mellora das competencias en construción e TIC e ao fomento do acceso das mulleres a estas especialidades

Desde o Goberno municipal reiterouse o compromiso do Concello do Porriño coa promoción da igualdade efectiva entre mulleres e homes e coa prevención e erradicación de todas as formas de violencia machista, reafirmando que o 8M é unha data de reivindicación, memoria e compromiso colectivo.

04/03/2026 in Igualdade

O Concello do Porriño fai balance da seguridade en 2025 e reforza a coordinación na loita contra a violencia de xénero

  • O sistema VioGén mantén 60 casos activos no partido xudicial do Porriño
  • A Garda Civil rexistrou 782 infraccións penais en 2025, con máis de 300 feitos esclarecidos e un aumento das actuacións en materia de drogas
  • A Policía Local realizou 50 detencións o ano pasado e reforzou a actuación en delitos xudiciais, seguridade viaria e violencia de xénero

O Porriño, 11 de febreiro de 2026.- O Concello do Porriño celebrou esta mañá a Xunta Local de Seguridade, na que se fixo balance dos datos en materia de seguridade correspondentes a 2025 e ao inicio de 2026, así como unha análise específica da situación da violencia de xénero no partido xudicial do Porriño.

A reunión contou coa presenza do subdelegado do Goberno en Pontevedra, Abel Losada; da xefa da Unidade de Violencia de Xénero da Delegación do Goberno, María José Rodríguez Pérez; do tenente coronel Óscar Grañas e do tenente comandante da Garda Civil do Porriño, David Mejuto; do capitán da Garda Civil e xefe da Compañía de Vigo, Rafael Antonio Pereira; do inspector principal xefe, Daniel Rodríguez, e os oficiais Antonio Pereira e Jesús Costas da Policía Local do Porriño; do alcalde do Porriño, Alejandro Lorenzo; do concelleiro de Seguridade, Abel Estévez; do tenente de alcalde, Carlos Martínez; e do secretario do Concello do Porriño, Eduardo Portela.

No que respecta aos datos xerais da Garda Civil, durante 2025 rexistráronse 782 infraccións penais, con 315 feitos esclarecidos, ademais de 421 infraccións administrativas. Entre os delitos contabilizados figuran 65 lesións, 183 estafas, 79 furtos e 19 roubos con forza en vivendas. En relación co tráfico ou consumo de drogas, as actuacións pasaron de 112 en 2024 a 136 en 2025.

Pola súa banda, a Policía Local realizou, durante 2025, 50 detencións, das cales 44 foron homes e 6 mulleres, froito dunha maior actividade preventiva e dun traballo coordinado para garantir a convivencia e a seguridade no municipio. O delito con maior número de detencións foi o cumprimento de requisitorias xudiciais, con 24 persoas detidas. Outras actuacións destacadas incluíron delitos de robo con forza, abuso sexual, resistencia ou desobediencia a axentes, violencia de xénero, quebrantamento de medidas cautelares e delitos contra a saúde pública.

No ámbito da seguridade viaria, ao longo de 2025 foron investigados 46 condutores (40 homes e 6 mulleres) por distintos delitos, principalmente relacionados coa condución baixo efectos do alcohol, con 18 condutores investigados, seguido de 9 por carencia de permiso de conducir e 16 por perda de vixencia do mesmo. Ademais, un condutor foi investigado por negarse ás probas de detección alcohólica. Estes datos reflicten o reforzo da prevención e dos controis realizados pola Policía Local, fundamentais para evitar accidentes e garantir a seguridade nas vías públicas.

Balance da violencia de xénero no partido xudicial do Porriño

A Xunta Local de Seguridade analizou tamén os datos relativos á violencia de xénero no partido xudicial do Porriño. No ano 2024 rexistráronse 94 denuncias, mentres que en 2025 a cifra foi de 83. Das 83 denuncias rexistradas en 2025, existen actualmente 60 casos activos no sistema VioGén. Destes, 33 contan con orde de protección en vigor, 6 teñen asignado o servizo telefónico ATENPRO, 58 están catalogados con risco baixo e 2 presentan risco medio.

No seguimento destes casos activos, 17 están supervisados pola Policía Local e 44 pola Garda Civil, no marco da coordinación establecida entre ambos corpos.

No ámbito do financiamento, o Concello do Porriño recibe 29.911 euros procedentes do Pacto de Estado contra a Violencia de Xénero, fondos destinados ao desenvolvemento de políticas públicas de prevención, atención e sensibilización.

Durante a reunión, a xefa da Unidade de Violencia de Xénero da Delegación do Goberno, María José Rodríguez Pérez, realizou unha mención expresa ao Centro de Información á Muller (CIM) e á Concellería de Igualdade do Porriño, destacando a boa xestión dos recursos e o traballo continuo no acompañamento ás vítimas e na aplicación de políticas de igualdade.

O alcalde, Alejandro Lorenzo, subliñou a importancia da cooperación e coordinación entre todos os corpos de seguridade: “A cooperación e a coordinación son fundamentais. Quero agradecer aos corpos de seguridade pola súa labor, que moitas veces non se ve, pero que con traballo constante consigue resultados fundamentais para protexer ás persoas e manter a convivencia. O seu esforzo e compromiso son imprescindibles para garantir a seguridade no Porriño.”

Lorenzo puxo tamén en valor a coordinación institucional e o compromiso municipal nesta materia: “A loita contra a violencia de xénero é unha prioridade absoluta. Detrás de cada cifra hai unha persoa que precisa apoio, protección e recursos. No Porriño contamos cun CIM e cunha Concellería de Igualdade que están a facer un traballo rigoroso e comprometido, e seguiremos destinando todos os medios ao noso alcance para protexer ás vítimas.”

O Concello reafirma así o seu compromiso coa seguridade cidadá e coa defensa dos dereitos das mulleres, apostando pola cooperación institucional e pola mellora continua das políticas públicas no municipio.

11/02/2026 in Igualdade, Seguridade

O Porriño garda un minuto de silencio polo presunto asasinato machista dunha muller en Mos

O Porriño, 2 de febreiro de 2026.- O Concello do Porriño gardou hoxe un minuto de silencio en sinal de condena polo presunto asasinato por violencia machista dunha muller de 52 anos, veciña da parroquia de Sanguiñeda, no municipio de Mos.

O acto contou coa presenza de veciños e veciñas, do alcalde do Porriño, Alejandro Lorenzo, de membros da Corporación municipal, así como de Leopoldo Costas Alonso, tenente de alcalde de Mos, que quixo tamén estar presente.

No acto trasladouse o apoio, respecto e solidariedade do Concello do Porriño á familia e ás persoas achegadas da vítima, así como a condena firme e rotunda de calquera tipo de violencia, e en especial da violencia machista, unha grave lacra social que atenta contra os dereitos fundamentais das mulleres.

O alcalde do Porriño, Alejandro Lorenzo, sinalou que “hoxe o Porriño quere mostrar a súa repulsa máis absoluta ante este terrible suceso e expresar o seu apoio á familia da vítima”.

Desde o Concello reafírmase o compromiso coa defensa da vida, da igualdade e da dignidade de todas as persoas, así como coa prevención, sensibilización e erradicación da violencia machista, que non ten cabida na nosa sociedade e que debemos combater desde a unidade, a prevención e a tolerancia cero.

02/02/2026 in Igualdade

O Porriño celebra unha xornada para abordar a prevención da violencia de xénero e a protección das vítimas desde unha perspectiva social e tecnolóxica

 

  • Será este xoves, ás 17.30 horas, na Sala de Comunicacións aberta a toda a cidadanía

O Porriño, 9 de decembro de 2025.- Baixo o nome de “A prevención da violencia de xénero e a protección das vítimas, dende unha perspectiva social e tecnolóxica”, o Concello do Porriño organiza unha xornada enmarcada na conmemoración do 25N. Trátase de tres relatorios a través dos cales se busca ofrecer un espazo de reflexión, formación e coordinación entre profesionais, ademais de achegar á cidadanía información actualizada sobre os recursos dispoñibles fronte á violencia de xénero.

O encontro, co lema “non á violencia. Si a unha sociedade libre, xusta e segura” terá lugar este xoves, 11 de decembro, ás 17.30 horas na Sala de Comunicacións e contará coa participación de distintos perfís expertos na atención, intervención e apoio ás mulleres vítimas.

Roberto Barba, director Xeral de Loita contra a Violencia de Xénero da Xunta de Galicia, abrirá a xornada cun relatorio centrado nas prestacións económicas e dispositivos a man das mulleres vítimas de violencia de xénero. A continuación, Mª José Rodríguez, xefa da Unidade da Violencia sobre a Muller en Pontevedra, abordará o papel das mesas locais de violencia de xénero como mellora na coordinación entre os axentes que interveñen directamente coas vítimas. Ademais, profundará nos dispositivos de seguridade destinados a garantir a protección destas. Pechará as intervencións Elena Molanes, directora do Centro de Emerxencias para Mulleres Vítimas de Violencia de Xénero (CEMVI), co relatorio “Cando a emerxencia se transforma en esperanza: o rol dos centros de acollida”, na que explicará como estes recursos se converten nun espazo seguro e nunha oportunidade de reconstrución vital para as mulleres que dan o primeiro paso para saír da violencia.

Con esta xornada, o Concello do Porriño reafirma o seu firme compromiso na loita contra a violencia de xénero e na promoción dunha sociedade libre, xusta e segura, facilitando espazos de colaboración e formación que contribúan a mellorar a prevención, a detección e a atención ás vítimas.

09/12/2025 in Igualdade

O Concello aposta un Nadal máis pola conciliación das familias

 

  • O vindeiro luns ábrese o prazo de inscrición para o campamento dirixido á cativada de 3 a 12 anos
  • As prazas están limitadas a 50 e outorgaranse por orde de entrada no rexistro presencial ou telemática

O Porriño, 26 de novembro de 2025.- Un ano máis, O Porriño vístese de Nadal cunha proposta pensada para facilitar a conciliación da vida laboral e familiar das familias do municipio. Dende a Concellería de Igualdade ponse en marcha o Campamento de Nadal “Anímate e vén a xogar connosco”, un espazo seguro no que os máis pequenos e pequenas poderán desfrutar destas datas tan especiais a través do xogo e de actividades orientadas a fomentar valores como a cooperación, o respecto, a empatía e a solidariedade.

O campamento desenvolverase os días 22, 23, 26, 29 e 30 de decembro e o 2, 5 e 7 de xaneiro, en horario de 08.30 a 14.30 horas, en instalacións municipais, sendo o punto de entrega e recollida o CEIP Xosé Fernández López. Está dirixido a nenos e nenas de 3 a 12 anos e a o número máximo de participantes é de 50, tendo preferencia os empadroados no Porriño.

O prazo de inscrición abrirase o vindeiro luns, 1 de decembro, ás 09.00 horas e pecharase o día 8 de decembro, tamén ás 09.00 horas. As familias interesadas deberán cubrir o modelo oficial de solicitude, dispoñible na web do Concello ou no Rexistro, e presentalo xunto coa documentación requirida, de xeito presencial ou de maneira telemática a través da sede electrónica. As prazas outorgaranse por rigoroso orde de inscrición.

FOLLA DE INSCRICIÓN E BAREMO CAMPAMENTO DE NADAL 2025

26/11/2025 in Cultura e festas, Igualdade

O Porriño inaugura a Praza 25N nun acto cheo de memoria e compromiso contra a violencia machista

 

  • A nova praza nace como espazo simbólico para lembrar ás vítimas e promover unha sociedade xusta, libre e segura
  • A xornada reuniu alumnado, autoridades e veciñanza nun lazo humano, varias intervencións e a lectura do manifesto institucional

O Porriño, 25 de novembro de 2025.- O Porriño celebra este 25 de novembro cunha intensa xornada de actos polo Día Internacional da Eliminación da Violencia á Muller, marcada pola inauguración oficial da nova Praza 25N, un espazo dedicado á memoria das vítimas e ao compromiso colectivo contra a violencia machista.

A programación comezou onte coa colocación do lazo morado na fachada do Concello. Hoxe ao mediodía instalouse o Punto Violeta na Praza do Concello, seguido do acto de inauguración da Praza 25N, fronte a igrexa parroquial de Santa María do Porriño, acompañada dunha peza de violín que deu inicio a un momento especialmente emotivo.

Tralo descubrimento da placa, o alcalde Alejandro Lorenzo lembrou que se trataba dun compromiso adquirido en pleno e que agora se fai realidade. “Esta praza, ata agora sen nome, pasa a chamarse oficialmente Praza 25N, en homenaxe a todas as mulleres vítimas de violencia machista”. O rexedor subliñou que a loita non debe reducirse a un único día, senón que é unha responsabilidade de toda a sociedade cada día do ano. “Cada recuncho desta praza lembrará non só ás vítimas, senón tamén a necesidade de educar en igualdade, promover o respecto e construír relacións libres de violencia”. Pechou desexando que este novo espazo se convertese nun lugar “de reflexión, de memoria e de compromiso colectivo”.

Un dos momentos máis destacados foi o lazo humano formado polo alumnado de 2º e 4º da ESO do colexio Hermanos Quiroga, que portaba cartolinas moradas cos nomes das 39 vítimas mortais deste ano. Antes de iniciar a lectura de cada una desas vítimas, a concelleira de Igualdade, Carolina González, destacou que o 25N é “un día de recordo, reflexión e compromiso coa prevención e eliminación da violencia machista”. Subliñou que “o respecto non é só unha palabra, senón un modo de vida” e lembrou que cada asasinato “é unha ferida colectiva que obriga a continuar alzando a voz”. Alertou tamén sobre as violencias cotiás —insultos, humillacións, silencios— e insistiu en que “educar en valores debía seguir sendo unha prioridade”. A concelleira reafirmou o compromiso do Concello coa creación de espazos seguros e coa colaboración con centros educativos, asociacións, familias e cidadanía para construír “un lugar libre, sen medo e xusto”.

A continuación, cada estudante foi abandonando a formación do lazo para achegarse ao micrófono e ler o nome da vítima correspondente, regresando logo ao seu sitio para depositar unha rosa morada sobre a súa cartolina. O alcalde Alejandro Lorenzo foi o encargado de portar a última das cartolinas, correspondente á vítima número 39, unha muller de 60 anos asasinada en Málaga o pasado sábado. Tras nomeala, pediu gardar un minuto de silencio, afirmando que “O Porriño érguese unido para lembrar ás mulleres asasinadas e para reafirmar que non imos tolerar nin un só paso atrás”. A continuación procedeuse á lectura do manifesto institucional por parte da Ilustre Señora Xuíza María Jesús Mosteiro, encargada do Xulgado de violencia sobre a muller, no que se reafirmou o compromiso coa defensa dos dereitos humanos e coa erradicación de todas as formas de violencia machista. A xuíza subliñou “a necesidade de políticas públicas eficaces, a importancia da prevención, a coordinación institucional, a formación de profesionais e a garantía de recursos accesibles para as vítimas e os seus fillos e fillas”. Con firmeza, concluíu que “só mediante o compromiso colectivo poderemos avanzar cara a unha sociedade libre de violencia machista”.

Un concerto de corda e piano da Escola Municipal de Música puxo o broche emocional a unha programación na que O Porriño reivindicou, con unidade e determinación, unha vida libre de violencia para todas as mulleres.

 

 

25/11/2025 in Igualdade

O Concello do Porriño reivindica un 25N cheo de unidade, memoria e compromiso na loita pola eliminación da violencia á muller

 

  • Baixo o lema “Non á violencia, si a unha sociedade libre, xusta e segura”, o alcalde Alejandro Lorenzo e a concelleira de Igualdade, Carolina González, presentaron unha programación ampla e participativa que envolve centros educativos, colectivos sociais e veciñanza en xeral

O Porriño, 18 de novembro de 2025.- O Concello do Porriño conmemora este 25N, Día Internacional da Eliminación da Violencia á Muller, cun amplo programa de actividades presentado polo alcalde, Alejandro Lorenzo, e pola concelleira de Igualdade, Carolina González. Baixo o lema “Non á violencia, si a unha sociedade libre, xusta e segura”, a administración local reafirma o seu compromiso firme coa loita contra todas as formas de violencia machista, apostando pola prevención, a educación e a concienciación social.

“O Porriño non pode nin quere permanecer en silencio ante a violencia machista. A educación, a implicación da cidadanía e o apoio ás vítimas son a nosa prioridade”, destacou o alcalde. Pola súa banda, a concelleira subliñou “a importancia de facer visible esta realidade os 365 días do ano e de ofrecer recursos efectivos que permitan avanzar cara a unha sociedade verdadeiramente libre e igualitaria”.

A colocación dun lazo morado na fachada do Concello o vindeiro luns, como símbolo de apoio ás vítimas e de rexeitamento rotundo a esta lacra, será o punto de partida da programación que terá como xornada central o propio 25 de novembro. Ás 12.00 horas instalarase na Praza do Concello o Punto Violeta, un espazo de información e sensibilización, ao tempo que se levará a cabo a inauguración da nova Praza 25N, un lugar que pretende converterse nun recordo permanente e colectivo de solidariedade, situado enfronte á igrexa parroquial de Santa María.

Un dos momentos máis emotivos da xornada será sen dúbida o lazo humano que se formará coa colaboración do alumnado de 2º da ESO, na Praza do Concello, que participará portando cartolinas moradas co nome das vítimas deste ano. O acto rematará cun minuto de silencio, tralo cal a Escola de Música do Porriño ofrecerá un concerto de corda.

Pero a celebración do 25N vai máis alá do propio día, e o Concello do Porriño desenvolve actividades ao longo de todo o ano. Así organízanse as II Xornadas 25N “A prevención da violencia de xénero e a protección das vítimas, dende unha perspectiva social e tecnolóxica”; cursos de defensa persoal dirixidos ao alumnado de 1º de Bacharelato dos IES do municipio, que se celebran cada trimestre en coordinación cos profesores de educación física; un taller de empoderamento feminino, destinado a mulleres vítimas de violencia e aberto a todas aquelas que queiran fortalecer a súa autonomía persoal e o proxecto de patios coeducativos en igualdade dirixido ao alumnado de 3º de Educación Primaria d os centros educativos ao longo de todo o curso 2025/2026, promovendo actitudes igualitarias desde idades temperás.

O Concello do Porriño reafirma así o seu compromiso coa erradicación da violencia de xénero, coa memoria das vítimas e coa construción dun futuro no que todas as mulleres poidan vivir en liberdade, dignidade e seguridade.

18/11/2025 in Igualdade

O Orbe Zendal Porriño súmase á campaña “NON” e reafirma o seu compromiso coa loita contra a violencia de xénero

  • O equipo porriñés presentou hoxe no Concello o encontro do vindeiro sábado, ás 19.00 horas, fronte ao BM Zonzamas no polideportivo municipal, marcado pola mensaxe de igualdade e rexeitamento á violencia machista

O Porriño, 12 de novembro de 2025.- O Orbe Zendal Balonmán Porriño únese á campaña “NON”, impulsada pola Fundación Deporte Galego, para reafirmar o seu compromiso coa igualdade e coa loita contra a violencia de xénero. O club quere, unha vez máis, facer visible a súa postura firme fronte a calquera tipo de violencia contra as mulleres e lembrar que a loita continúa cada día, dentro e fóra das pistas.

Con tal motivo o encontro do vindeiro sábado, 15 de novembro, ás 19.00 horas, contra o BM Zonzamas, estará marcado cunha mensaxe de igualdade e rexeitamento á violencia machista. O partido, que será ás 19.00 horas, chega nas semanas previas ao 25 de novembro, Día Internacional da Eliminación da Violencia contra as Mulleres, unha data na que o deporte galego amosa de maneira unánime o seu rexeitamento a esta lacra social.

A presentación oficial do partido celebrouse hoxe no Concello do Porriño, coa presenza dunha das xogadoras, Julia Pestana, o alcalde do Porriño, Alejandro Lorenzo e os concelleiros de Deportes, Abel Estévez, e de Igualdade, Carolina González. Durante o acto, as deportistas promoveron a iniciativa e convidaron á veciñanza a asistir ao partido e a participar nas accións simbólicas que se desenvolverán para lembrar a importancia de erradicar a violencia machista. Neste senso, o Concello do Porriño instalará durante o encontro un punto de información e, a vindeira semana, presentará os actos programados para conmemorar o 25N.

O alcalde do Porriño destacou “o orgullo que supón para o noso municipio contar cun club que, ademais de representar o nome do Porriño por toda España, se implica activamente en causas sociais tan importantes como a loita pola igualdade e contra a violencia de xénero”. Engadiu tamén que “o deporte é unha ferramenta poderosa para educar, concienciar e construír unha sociedade máis xusta e respectuosa”.

O deporte feminino galego leva anos alzando a voz fronte á violencia de xénero, e o Porriño quere seguir formando parte desa mensaxe colectiva que se estende por toda Galicia. Tal e como se viu en campañas anteriores, deportistas, clubs, federacións e afeccións suman esforzos nesta causa, unindo as súas voces nun berro común: NON. O Orbe Zendal Porriño reafirma así o seu compromiso coa igualdade e coa defensa dos dereitos das mulleres, demostrando que o deporte pode e debe ser un vehículo de cambio e de sensibilización social.

12/11/2025 in Deportes, Igualdade