Educación e tecnoloxía

A corporación infantil do Concello do Porriño reuniuse esta mañá para celebrar a súa sesión plenaria anual cumprindo co compromiso adquirido da administración local de conmemorar cada ano o Día Internacional dos Dereitos da Infancia.

O alcalde do Porriño, Alejandro Lorenzo, presidiu o pleno acompañado polas concelleiras de Educación e Infancia, Carolina González e Rosa Isabel ALonso. A corporación completábana representantes dos nove centros educativos de primaria e secundaria do municipio e de ACEESCA.

Os portavoces de cada uns dos centros tiveron a oportunidade de transmitirlle de primeira man, tanto ao alcalde coma ao resto de concelleiros e concelleiras, o resultado do traballo feito cos seus compañeiros e compañeiras nas aulas e defender as súas propostas para que O Porriño sexa un concello máis implicado na loita polos dereitos da infancia. Baixo o lema deste ano “Para cada infancia, todos os dereitos!” puxeron o foco na participación dos nenos e nenas na sociedade, na consecución dun planeta habitable e na paz.

No eido más local, propuxéronse cuestións como unha nova piscina pública, a necesidade de habilitar parques libres de fumo, a eliminación de barreiras arquitectónicas ou o transporte público.

Outro dos puntos da orde do día era a convocatoria dunha nova edición da campaña de recollida de alimentos infantís e productos de hixiene A Hora de Dar que axudarán a moitas familias do Porriño que o necesitan. A proposta foi aprobada por unanimade e desenvolverase o vindeiro 28 de novembro nos centros escolares.

O Concello de Porriño acolleu hoxe a presentación da oferta formativa da UNED Porriño para este curso, un evento que contou coa presenza do alcalde, Alejandro Lorenzo, o director da UNED Pontevedra, Víctor M. González, e o coordinador de Extensión Universitaria, Rafael Cotelo.

A Universidade Nacional de Educación a Distancia o ampliou a súa oferta no municipio, incluíndo graos oficiais en Dereito, Socioloxía e Traballo Social. Estes programas permiten aos estudantes avanzar ao seu propio ritmo, beneficiándose de recursos de alta calidade e acompañamento académico personalizado.

Ademais, a UNED Porriño ofrece actividades e cursos de extensión universitaria para quen desexe completar a súa formación. Entre estas atópase un curso para a obtención do título da ESO para maiores de 18 anos e os cursos de UNED Senior, deseñados para fomentar a aprendizaxe sen límite de idade. Tamén se ofertan novos cursos, como a segunda parte do taller de xestión do estrés a través do movemento e un curso sobre a elaboración de pan de `masa madre´, rescatando a tradición culinaria.

O director da UNED Pontevedra, Víctor M. González, agradeceu “o compromiso do Concello do Porriño coa UNED. Somos unha universidade vinculada ao territorio e iso non sería posible sen o compromiso das institucións e a súa colaboración. Un compromiso compartido enfocado a dinamizar na medida das nosas posibilidades a nosa presenza no Porriño”. González concluíu animando á veciñanza do Porriño e da contorna a estar este novo grao de Dereito e lembrando que non é necesaria nota de corte.

Pola súa banda, o alcalde, Alejandro Lorenzo, destacou a importancia de seguir ampliando a oferta educativa no Porriño, subliñando que “é fundamental que a xente poida estudar e forxarse un futuro sen necesidade de abandonar o seu pobo”.

Engadiu que isto non só beneficia aos cidadáns, senón que tamén é clave para o desenvolvemento do concello, xa que “Porriño conta cun gran potencial industrial con máis de 2.200 empresas e formar persoal cualificado para elas supón un avance enorme”. Concluíu apuntando que “en definitiva, a UNED no Porriño representa o noso compromiso coa educación e o desenvolvemento local e sempre estarei agradecido porque ese compromiso co noso pobo e a nosa xente sea mutuo”.

A UNED do Porriño empezou a súa actividade no curso 2022-2023, consolidándose ao longo dos seguintes anos cunha gran acollida por parte da cidadanía.