Educación e tecnoloxía

• Unha publicación feita integramente polo alumnado, na que se recollen reflexións sobre cuestións sociais, dilemas éticos, poesía, música, entrevistas, política, psicoloxía, cultura ou cinema.

O Porriño, 20 de xuño de 2025.– Por cuarto ano consecutivo, o alumnado de 2º de Bacharelato do IES Pino Manso do Porriño presenta unha nova edición da súa revista OPino, un proxecto creativo e interdisciplinar centrado na filosofía, a arte e o pensamento crítico, que conta co apoio do Concello do Porriño.

OPino é unha publicación feita integramente polo alumnado, na que se recollen reflexións sobre cuestións sociais, dilemas éticos, poesía, música, entrevistas, política, psicoloxía, cultura ou cinema. A parte gráfica tamén é responsabilidade dos propios estudantes, convertendo a revista nun proxecto colaborativo que implica aos departamentos de Filosofía e Debuxo.

A edición deste ano —a cuarta da historia da revista— tivo como tema central “os tabús”. O proceso comezou coa formación dun equipo de dirección e traballo composto por estudantes das materias de Filosofía, Psicoloxía e Debuxo Artístico. Este equipo encargouse de coordinar a redacción dos textos, elaborar entrevistas, deseñar as imaxes que acompañan os artigos e realizar a edición final da publicación.

As persoas responsables da dirección foron:

Raquel Álvarez Gómez, Victoria Álvarez Linares, Alejandra Pérez López, Ariadna Martínez Gomes, Laura Rodríguez Rodríguez, Ainoa Alonso Flores, María Quintas Granja e Sara Conde Iglesias.

Todo o proceso contou co asesoramento do profesorado, en especial dos docentes Juanca e Pedro, que acompañaron o equipo ao longo do traballo.

O alcalde do Porriño, Alejandro Lorenzo, felicitou ao equipo de dirección, ao alumnado participante e ao centro educativo, sinalando que “este proxecto é un exemplo de traballo en equipo que amosa non só a defensa do pensamento crítico, a creatividade e o coñecemento, senón tamén o compromiso coa responsabilidade social por parte da mocidade do Porriño”. Engadiu ademais: “Noraboa e que OPino siga sumando edicións. Contade sempre co apoio do voso Concello.”

A revista OPino pode consultarse tamén en formato dixital a través da páxina web do IES Pino Manso.

O Porriño, 19 de xuño de 2025.– O Concello do Porriño concede, por primeira vez, as Becas Antonio Palacios aos mellores expedientes académicos da PAU do noso municipio, unha iniciativa coa que se recoñece o esforzo e a excelencia do alumnado de 2º de Bacharelato que acadou as mellores cualificacións na Proba de Acceso á Universidade (PAU).

O Concello concederá un total de 15 axudas de 300 euros cada unha, destinadas a apoiar os estudos universitarios do alumnado con mellores resultados. A selección do alumnado realizouse atendendo a unha nota igual ou superior ao 8,5 na fase xeral da PAU.

A entrega simbólica destas becas terá lugar nun acto institucional no Concello do Porriño nos vindeiros días, co obxectivo de homenaxear ao alumnado galardoado e poñer en valor o papel dos centros educativos e das familias no proceso formativo. As becas levan o nome de Antonio Palacios, arquitecto porriñés de renome, como símbolo do compromiso do Concello coa cultura, o coñecemento e a formación.

O Alcalde do Porriño, Alejandro Lorenzo, destaca que “é un orgullo para todo o municipio contar conestudantes deste nivel. Con estas becas queremos premiar o esforzo, recoñecer o talento e apoiar o futuro académico da nosa mocidade”.

As persoas galardoadas poderán acceder a estas axudas unha vez se publiquen as correspondentes bases reguladoras, que establecerán os requisitos e condicións para a súa concesión.

O Concello do Porriño continúa así a súa aposta decidida pola educación de calidade e polo apoio ás novas xeracións como base do desenvolvemento social e persoal do municipio.

O Porriño, 12 de xuño de 2025.– O Concello do Porriño organizou esta semana unha actividade educativa innovadora dirixida ao alumnado de 6º de Educación Primaria dos centros escolares do municipio. A iniciativa, que tivo lugar os días 10 e 12 de xuño, permitiu que 126 nenos e nenas, acompañados por 9 docentes, participasen en visitas guiadas á Escola de Motociclismo IKERIC RACING Sport Galicia, situada nun complexo de máis de 25.000 metros cadrados.

Durante as visitas, os participantes coñeceron as instalacións, recibiron nocións básicas sobre seguridade viaria, mecánica e o funcionamento do motociclismo de competición, e tiveron ocasión de compartir espazo con pilotos profesionais convidados/as especialmente para a actividade.

O Alcalde do Porriño, Alejandro Lorenzo, participou nunha das xornadas e destacou “a importancia de que o Concello promova accións formativas que saen fóra das aulas e que permiten ao alumnado aprender dun xeito práctico, ameno e con valores”. Durante a súa visita, afirmou tamén que: “Queremos que os rapaces e rapazas do Porriño teñan acceso a experiencias enriquecedoras que lles abran portas a novos intereses, como é o caso do motociclismo, sempre desde a seguridade e a formación”.

Pola súa parte, a Concelleira de Educación, Carolina González Costas, sinalou que “o obxectivo destas visitas foi proporcionar unha experiencia formativa distinta, que axude a concienciar sobre a seguridade na estrada, esperte vocacións e promova estilos de vida saudables a través do deporte”.

A actividade desenvolveuse en colaboración con IKERIC RACING Sport Galicia, e contou tamén coa implicación da Concellería de Educación e da OMIX do Porriño, que coordinaron o desprazamento e a organización dos centros educa6vos participantes: CPR Santo Tomás, CEIP Cruz-Budiño, CEIPP Xosé Fernández López e CEIPP Antonio Palacios.

Con esta iniciativa, o Concello do Porriño reafirma o seu compromiso cunha educación integral, dinámica e adaptada aos intereses da mocidade actual.

• Esta aula beneficiará directamente a uns 40 nenos e nenas do centro

O Porriño, 10 de xuño de 2025.– O CEIP da Ribeira inaugurou hoxe unha nova aula sensorial destinada a ofrecer un espazo adaptado e inclusivo para o alumnado con Trastorno do Espectro Autista (TEA) e outras dificultades de aprendizaxe.

O acto contou coa presenza do Alcalde, Alejandro Lorenzo; a Concelleira de Educación, Carolina González; o Xefe Territorial de Educación en Pontevedra, César Pérez Ares, así como da directora do centro, Teresa Castro, e profesorado.

“A aula sensorial é un lugar onde o alumnado pode interactuar co entorno dun xeito máis tranquilo e relaxado, favorecendo a súa aprendizaxe e benestar. Conta con diferentes zonas adaptadas aos distintos sentidos como a zona da luz, do tacto, do gusto, unha área de relaxación con piscina de bolas e ata un espazo para proxeccións audiovisuais con sons da natureza”, explicou Teresa Castro. Esta aula beneficiará directamente a uns 40 nenos e nenas do centro.

Fundado en 1984 no Polígono de Torneiros, o CEIP da Ribeira é un centro de referencia na atención preferente a alumnado con TEA e necesidades específicas, reafirmando así o seu compromiso coa educación inclusiva e de calidade.

O Alcalde, Alejandro Lorenzo, manifestou que “esta aula sensorial é un paso máis para garantir unha educación igualitaria e de atención personalizada para todo o alumnado do Porriño. Continuamos traballando para que os centros educativos da nosa vila dispoñan dos recursos necesarios para acoller a diversidade e promover o desenvolvemento integral do alumnado.”

Esta nova aula sensorial é a segunda que se habilita na vila, sumándose á xa existente no centro de educación especial de Aceesca, reforzando o compromiso do Concello do Porriño coa educación inclusiva e a atención a toda a diversidade.

Porriño, 30 de maio de 2025.– Esta tarde tivo lugar no Concello do Porriño a presentación oficial de ACiENCiACERTA 2025, a segunda edición da Mostra de Ciencias na Rúa, que este ano medra en duración e en ambición. A praza do Concello e as rúas do centro urbano converteranse durante tres días –do mércores 4 ao venres 6 de xuño– nun espazo aberto para a ciencia, a divulgación e a participación cidadá.

Durante a presentación interviron o Coordinador do evento, Juancho Castaño; a Concelleira de Educación, Carolina González; a Directora de Comunicación & Global Brand en Zendal Group, Beatriz Díaz; o Director Territorial de Educación en Pontevedra, César Pérez Ares e Alcalde do Concello do Porriño, Alejandro Lorenzo, que destacou o éxito da primeira edición e a clara aposta por consolidar este evento como unha cita anual de referencia no ámbito da divulgación científica.

ACiENCiACERTA está organizada polo Concello do Porriño co patrocinio de Zendal Group e, como novidade principal deste ano, conta coa colaboración institucional da Universidade de Vigo.

O tema protagonista desta edición será o cambio climático, que marcará tanto o contido das conferencias como a imaxe gráfica do evento. O obxectivo é achegar á cidadanía unha reflexión colectiva arredor da ciencia e os grandes retos ambientais do noso tempo.

A madriña de ACiENCiACERTA 2025 é a porriñesa Katia Guimaré González, enxeñeira industrial que desenvolve a súa carreira profesional na empresa ferroviaria alemá Deutsche Bahn AG. Un referente de talento galego no exterior, comprometida coa innovación e a excelencia técnica.

Katia Guimaré formará parte do xurado científico que o venres 6 de xuño avaliará os proxectos presentados polos dez centros educativos do Porriño, no marco do Concurso de Proxectos Científicos Escolares, con dúas categorías: menores e maiores de 12 anos, ademais dun premio do público. Completan o xurado Silvia Diz de Almeida, investigadora en medicina molecular e doutora pola USC e Ángel Pichel Loureiro, médico de Urxencias do Hospital Álvaro Cunqueiro e docente universitario. 

Programación completa

• Mércores 4 de xuño

Lugar: Botica Nova de Palacios

Brinde pola Ciencia con Aguas de Mondariz

Charlas:

– “Natureza que protexe: o papel da vexetación no río”. A cargo de Sofía Villar Rúa e Elena Seoane Martínez

– “O cambio climático contado por un Hominino a un Neandertal”. A cargo de Eduardo Méndez Quintas, Hugo Bal García e Iván Rey Rodríguez

• Xoves 5 de xuño

Charlas e actividades:

– “O extraordinario planeta A no que habitamos”. Con Martín Barreiro e Ana Mariño

– “A ornitoloxía e o cambio climático”. Con María Vidal Malde

– “Derivas”. Instalación artística sostible de Julia de la Cal

• Venres 6 de xuño

Mostra de Proxectos Científicos Escolares nas rúas do centro

Votación do Premio do Público

Charlas:

– “O mar e o cambio climático”. Con Laura García Peteiro e Xulia Pisón

– “A natureza na obra de Miguelanxo Prado”. Conversa co recoñecido autor galego de cómic

ACiENCiACERTA 2025 quere achegar a ciencia á rúa, fomentar vocacións e crear espazos de encontro entre profesionais da ciencia, estudantes e veciñanza. Desde o Concello do Porriño convidamos a toda a cidadanía a participar e gozar desta festa da ciencia ao aire libre.

• 135 alumnos e alumnas de 4º de Educación Primaria participaron na decoración de oito siluetas do icónico “Can Parede”, símbolo do festival, que xa se exhiben nos farois da zona durante toda a semana do evento.

O Porriño, 15 de maio de 2025.– Un ano máis, a Concellería de Educación do Porriño colabora co Festival de Cans para achegar esta cita cultural á comunidade educativa e promover a participación activa do alumnado. Froito desta colaboración coa OMIX, o festival ofrece unha programación específica para os centros escolares, que fomenta a creatividade, o traballo en equipo e o sentimento de pertenza.

Entre as propostas máis agardadas polos escolares destaca o “Mini Can Parede”, inaugurado esta mañá ás 10:30 horas na zona peonil do centro. Nesta edición, 135 alumnos e alumnas de 4º de Educación Primaria participaron na decoración de oito siluetas do icónico “Can Parede”, símbolo do festival, que xa se exhiben nos farois da zona durante toda a semana do evento.

Tomaron parte nesta iniciativa os centros CEIPP Antonio Palacios, CEIPP da Ribeira, CEIPP Fernández López, CEIPP Atios, CEIP Cruz-Budiño, CPR Sto. Tomás, CPR Hnos. Quiroga e Aceesca. Cada colexio decorou a súa silueta de maneira libre, sen limitacións temáticas nin técnicas, fomentando a expresión artística e a colaboración entre o alumnado.

O alcalde do Porriño, Alejandro Lorenzo, puxo en valor o talento da mocidade: “Cada ano os nosos nenos e nenas sorpréndennos coa súa creatividade e ilusión. O Mini Can Parede demostra que a cultura pode e debe ser accesible, participativa e integradora desde as primeiras etapas da vida”.

Pola súa banda, a concelleira de Educación, Carolina González, sinalou que “esta actividade é unha oportunidade para que os rapaces se sintan parte activa do festival, ao tempo que desenvolven habilidades artísticas e valores como a cooperación e o respecto polo traballo común”.

Tras a inauguración, o alumnado participante asistiu ao obradoiro “Pintando Cans”, unha proposta lúdica e educativa na que puideron seguir explorando a súa creatividade nun ambiente distendido.

Dende o Concello do Porriño agradécese especialmente a implicación dos centros educativos, do profesorado, das familias e da OMIX, que fan posible que o Festival de Cans sexa tamén unha festa da infancia, da imaxinación e da aprendizaxe compartida.

O Concello do Porriño deu comezo hoxe á actividade “Bautismo de Surf”, unha iniciativa destinada ao alumnado de 5º e 6º de Educación Primaria dos centros escolares do municipio. A proposta, que terá lugar durante a primeira quincena de maio na praia de Patos, en Nigrán, busca achegar aos máis novos ao medio mariño dun xeito lúdico, seguro e educativo. Ao tempo que descubren un deporte como o surf, os participantes terán a oportunidade de aprender sobre a importancia de manter hábitos de vida saudable, valorar o traballo en equipo e tomar conciencia do respecto e coidado do entorno natural.

Na primeira xornada, celebrada esta mañá, o alumnado foi recibido polo alcalde do Porriño, Alejandro Lorenzo, pola concelleira de Educación, Carolina González, polo alcalde de Nigrán, Juan González Pérez, e por Daniel Benavides Alonso, xefe do Servizo Provincial de Deportes de Pontevedra, que quixeron dar a benvida aos participantes e poñer en valor a importancia dunha experiencia que une deporte, aprendizaxe e concienciación ambiental.

O alcalde Alejandro Lorenzo afirmou que “apostamos por unha educación integral que vai máis alá das aulas. Actividades como esta permiten que os nosos nenos e nenas se relacionen co entorno, practiquen deporte e aprendan valores fundamentais como o compañeirismo ou o respecto polo medio ambiente”.

A actividade desenvolverase ao longo de catro xornadas e contará coa participación de 207 alumnos e alumnas de 5º e 6º de Primaria dos centros CEIP Antonio Palacios, CEIP da Ribeira, CEIP Xosé Fernández López, CEIP Atios, CEIP da Cruz Budiño, CPR Santo Tomás e CPR Irmáns Quiroga.

A experiencia está guiada por monitores cualificados da asociación Quenlla Surf Clube, que velarán pola seguridade dos participantes e adaptarán a actividade ás súas idades e capacidades. O programa non só pretende iniciar aos rapaces na práctica do surf dun xeito lúdico e seguro, senón tamén fortalecer o espírito de colaboración, o coñecemento do medio mariño e a sensibilización sobre a importancia da súa conservación.

A concelleira de Educación, Carolina González, destacou que “a finalidade deste programa é promover os beneficios do deporte e a vida saudable entre os máis novos, ao tempo que se crea unha experiencia lúdica e educativa nun entorno natural privilexiado como é a costa galega”. Subliñou tamén a importancia de ofrecer actividades que descubran aos nenos e nenas novas paixóns e formas de relacionarse co mundo que os rodea.

A iniciativa é posible grazas á colaboración entre o Concello do Porriño e a Xunta de Galicia, a través do Servizo Provincial de Deportes de Pontevedra, no marco do seu compromiso co fomento da actividade física e dos valores educativos no entorno natural.

Con este tipo de programas, o Concello do Porriño reafirma o seu compromiso cun modelo educativo activo, participativo e respectuoso coa sustentabilidade, promovendo experiencias que contribúan ao desenvolvemento integral da infancia.

• “Ondas Creativas” achega aos escolares do Porriño ao mundo da radio e do podcast, fomentando a súa creatividade, a comunicación e o traballo en equipo
O Porriño, 25 de abril de 2025-. O CEIP da Ribeira acolleu hoxe unha nova sesión do programa “Ondas creativas. A voz dos nenos/as do Porriño no aire”, unha iniciativa organizada pola OMIX e a Concellería de Educación do Concello do Porriño. O proxecto, dirixido ao alumnado de 5º de Educación Primaria, está a desenvolverse en distintos centros educativos da vila e continuará nas próximas semanas.
O programa ten como obxectivo achegar os nenos e nenas ao mundo da radio e do podcasting, ofrecéndolles unha experiencia educativa innovadora, na que poden aprender a producir contidos sonoros, traballar en equipo e mellorar as súas habilidades de comunicación.
Durante a súa visita ao CEIP da Ribeira, o alcalde do Porriño, Alejandro Lorenzo, destacou “a importancia de promover actividades que fomenten a creatividade e o espírito crítico dos máis novos. Queremos que a nosa mocidade aprenda a expresarse e a comunicar dun xeito claro e efectivo, e iniciativas como esta son fundamentais para conseguilo”.
Pola súa parte, a concelleira de Educación, Carolina González, salientou que “a través desta iniciativa, pretendemos ofrecerlles aos mozos e mozas unha experiencia única que lles permita descubrir o fascinante mundo da radio e do podcast, consolidando a súa formación de maneira divertida e significativa”.
Os obradoiros, que continúan a súa programación nas vindeiras semanas, culminarán o 9 de xuño, e contan coa participación de profesionais do sector que guían aos estudantes no proceso de creación dos seus propios programas. A actividade fomenta non só o desenvolvemento da expresión oral e escrita, senón tamén o traballo colaborativo e a comprensión dos medios de comunicación como ferramentas de transformación social.
Con propostas coma esta, o Concello do Porriño reafirma o seu compromiso coa educación innovadora e coa promoción do talento creativo da súa mocidade.