Deportes

O reto de acabar as maratóns máis importantes e multitudinarias do mundo é moito máis que correr seis carreiras. Trátase dos coñecidos como ‘Abbot World Marathon Majors’, circuito que comprende as seis grandes maratóns entre las que figuran Tokio, Boston, Londres, Berlín, Chicago e Nueva York. Todo aquel ou aquela que o completa faise coa codiciada medalla de seis estrelas.

Só setenta españolas conseguiron este recoñecemento e, entre elas, xa se atopa unha porriñesa, Ana Gómez Sousa, que se uníu ao grupo da élite do atletismo hai unha semana tras completar a maratón de Tokio.

Ana é funcionaria do Concello do Porriño e os seus compañeiros e compañeiras seguen con entusiasmo a súa traxectoria deportiva. Á súa volta a casa, foi sorprendida entre aplausos por toda a plantilla municipal, concelleiros, concelleiras e o alcalde, Alejandro Lorenzo, que lle fixo entrega dun agasallo en recoñecemento polo seu logro, de parte dos seus compañeiros de traballo, do Concello do Porriño e do seu pobo, que sinte un enorme orgullo.

“A súa constancia, o seu empuxe e o enorme sentido de responsabilidade que ten fan que sexa merecedora deste e calquera outro recoñecemento. Ana é quén de conseguir todo o que se propoña e facer que os seus éxitos sexan motivo de ledicia para todos os que a rodeamos”, apuntou o alcalde, “É unha gran compañeira e unha gran persoa”.

Ana comezou no mundo do maratón hai case 10 anos, antes fixo baloncesto e montañismo. Atopouse co atletismo de maneira casual, cando unha amiga a animou a participar nunha carreira benéfica contra o cancro. Eses 5 km despertaron nela a inquedanza que a levou a ir máis a alá e correr a súa primeira maratón, a de Berlín. A día de hoxe, e con moitas máis no seu haber, a porriñesa conta cun palmarés envidiable no que destaca ser a primeira española en entrar en meta na Maratón de Chicago (2019) e ser primeira na súa categoría e terceira na xeral na Maratón de Tromso (Noruega), a maratón de Nova York ou a recén conquistada maratón de Tokio.

O piloto porriñés Iker Rodríguez aspira esta fin de semana a ser Campión de España en Moto4. Será no circuíto de Montmeló onde disputará a última proba da temporada.

O porriñés, que será o máis novo dos participantes na proba, chega á última xornada a un punto do seu compañeiro, Andrés García, e con tres vitorias ás súas costas. Pase o que pase en Montmeló, xa ten asegurado o salto á cilindrada superior e o ano que vén competirá en PreMoto3.

Pese á súa idade, Iker conta xa cunha sólida traxectoria. Aos tres aniños de idade subiuse a unha moto por primeira vez, con nove proclamouse Campión de España de SuperMotard e agora con doce pode ser o primeiro piloto galego que se faga co campionato nacional de velocidade na súa primeira temporada en Moto4.

O alcalde, Alejandro Lorenzo, despediu onte a Iker antes de saír cara Montmeló. “Iker é o claro exemplo da importancia de loitar polos teus soños e facelo con responsabilidade, constancia e esforzo”, apuntou o alcalde, “O seu pobo está ao seu lado para apoialo no que se propoña porque os seus éxitos sentímolos nosos. Estamos moi orgullosos de ti Iker”.

O Porriño acolle este mércores 8 a terceira e última xornada da XXVII Liga Galega de Baloncesto Adaptado. 160 deportistas daranse cita no polideportivo municipal para pechar a clasificación da competición organizada pola Federación Galega de Deporte Adaptado.

Serán un total de 15 os equipos que disputarán os 14 partidos da xornada. Na categoría de competición masculina xogarán o Asdan, San Rafael e Celta Integra; na adaptada masculina o Vilagarcía, Juan María, Ambar, Aspavi, Aspanaex, Celta Integra e San Rafael; na adaptada mixta o Méndez Núñez, Saiar, Saladino Cortizo “A” e Saladino Cortizo “B”.

Os encontros arrancarán ás 10:30 h e en cada categoría competición xogaranse catro períodos de 8 minutos e en adaptada serán 4 períodos de 6 minutos.

A xornada rematará arredor das 13:45 h.

O Porriño acollerá este sábado unha nova edición do Trofeo Ciclocrós Avanza Concello do Porriño organizado por Avanza AD en colaboración co Concello do Porriño.

Na que será a sexta edición desta proba deportiva daranse cita máis de 215 ciclistas das diferentes categorías, entre os que concurrirán figuras locais do ciclismo. Como na pasada edición, realizarase unha proba de promoción, aberta para a categoría infantil, nados no 2010 e 2011.

Desta vez o escenario será a contorna das pistas municipais de atletismo, no polígono industrial da Granxa, onde se habilitará un circuíto de 2,8 km.

“Un percorrido de ciclocros moi clásico que non vai defraudar , con zonas para todos os gustos, dende as máis rápidas onde abrir gas ata outras máis retorcidas e resbaladiza”, indicaron dende Avanza, “Pero sobre todo o que garantizamos é ciclocros en estado puro con moita auga e barro para disfrutar a tope”.

Pola súa banda o alcalde, Alejandro Lorenzo, quixo agradecer aos organizadores  non só a organización dun evento deste nivel, senón o traballo que desenvolven durante o ano na súa escola de ciclismo “onde moitos nenos e nenas descubren a súa vocación e medran como persoas e como deportistas”.

A proba dará comezo ás 11:30 h coas categorías infantís masculino e feminino. A seguinte manga será ás 12 h cos cadetes, 12:45 h Féminas Cadete, Féminas Master, Feminas Élite, Sub 23 e Junior, ás 13:30 h pechan a mañá as categorías Elite-Sub 23 e Junior. Xa pola tarde retómase a carreira ás 15:45 h con Máster 30/50/60 e ás 16:40 h Master 40.

Un ano máis, e xa van dezaseis, o velódromo municipal do Porriño acollerá a Dirt Track Xacob Agra. Como cada ano, o motoclub Papaya en colaboración co Concello do Porriño, organiza esta carreira noturna que reunirá no óvalo porriñés a pilotos chegados de toda a xeografía galega e tamén do país veciño.

O alcalde, Alejandro Lorenzo, e o concelleiro de Deporte, Abel Estévez, xunto a Xoaquín Agra, presidente do motoclub Papaya, e o piloto porriñés Xacob Agra, presentaron esta mañá o evento.

“Como cada ano por estas datas poderemos disfrutar deste espectáculo deportivo, unha cita marcada na axenda de todos os amantes do motor que cada edición conta cunha enorme participación e implicación do público”, apuntou o alcalde, Alejandro Lorenzo, que quixo agradecer ao Motoclub Papaya o “gran nivel organizativo que demostran cada ano, que fixo posible consolidar este evento deportivo de referencia en toda Galicia”.

A proba desenvolverase como cada ano en eliminatorias por grupos (clasificatorias, repescas, semifinais e finais). Prevese que disputen a proba preto de 40 pilotos, 20 en adultos e outros na modalidade infantil que será exhibición, chegados de toda a xeografía galega e tamén do país veciño. Cabe destacar que nesta edición debutará nesta disciplina o piloto local Jose Calvar.