Deportes

O Porriño, 8 de febreiro de 2026.- O alcalde do Porriño, Alejandro Lorenzo, recibiu esta semana na Casa Consistorial ás deportistas Sabela Gándara Iglesias e Ainara Gándara Iglesias, proclamadas recentemente campioas galegas de Marcha en Ruta nas súas respectivas categorías durante o Campionato Galego celebrado en Marín.

Sabela Gándara Iglesias (10 anos) acadou o título galego na categoría SUB12, nunha proba de 2 quilómetros, mentres que a súa irmá Ainara (8 anos) fixo o propio na categoría SUB10, completando un percorrido de 1 quilómetro. Ambas forman parte do Club Atletismo Porriño, que aposta fortemente pola formación da canteira e polo desenvolvemento das modalidades técnicas do atletismo, como a marcha.

Segundo palabras de Miguel Novo Regueira, presidente do Club Atletismo Porriño: “Na nosa entidade estamos a traballar con especial atención na modalidade de marcha, porque é unha disciplina técnica e de gran valor formativo. A prioridade do club é a formación da nosa base, da nosa canteira, e estas novas xeracións, como Sabela e Ainara, son un exemplo do compromiso e do esforzo que queremos impulsar.”

Durante o acto, o alcalde quixo felicitar persoalmente ás deportistas polos excelentes resultados acadados, así como recoñecer o esforzo realizado polas súas familias e polo equipo técnico que as acompaña no seu proceso de formación. “O éxito de Sabela e Ainara é un orgullo para O Porriño e un exemplo do enorme potencial deportivo que temos no noso concello. Son dúas rapazas con moito talento, pero tamén con moita constancia e disciplina, valores fundamentais no deporte e na vida”, sinalou Alejandro Lorenzo.

O rexedor destacou tamén a importancia do apoio institucional ao deporte base: “Desde o Concello seguiremos apostando polo deporte e polo acompañamento ás nosas promesas deportivas, porque investir no deporte base é investir en saúde, educación e futuro”.

Desde o Concello do Porriño quérese poñer en valor o traballo que se está a realizar no Club Atletismo Porriño, así como a dedicación e a ilusión de novas xeracións de deportistas que levan o nome do municipio aos máis altos niveis da competición autonómica.

• A que é posiblemente a carreira máis rápida de Galicia permitirá a participación de ata 1.500 corredores de tódalas idades
• Os participantes terán ata o día 16 de marzo para realizar a inscrición

O Porriño, 22 de xaneiro de 2026. – Esta cita icónica do atletismo galego que ten lugar no Porriño abre o seu prazo de inscrición. A XVII edición da Carreira O Porriño 10K, que terá lugar o domingo 22 de marzo de 2026, xa comeza a rexistrar aos seus primeiros corredores, que terán ata o día 16 de marzo para confirmar a súa participación nesta proba.

O proceso de inscrición realízase exclusivamente a través da plataforma electrónica oficial. A organización establece diferentes tramos para anotarse, cun prezo inicial de 10 euros ata o 22 de febreiro, que se incrementará progresivamente ata o peche definitivo o 16 de marzo de 2026 ou ata acadar o límite máximo de 1.500 participantes, garantindo así unha proba segura e de calidade. A inscrición inclúe dorsal con chip, camiseta conmemorativa, avituallamentos, servizo médico, bolsa do corredor e acceso á zona de recuperación post-meta, entre outros servizos. Para inscribirse, accede á seguinte ligazón:

https://ccnorte.com/evento/inscribirme/id/3178/xvii-carrera-o-porrino-10k#.

Como cada ano, a carreira disputarase no centro urbano do municipio nun circuíto homologado pola RFEA, de 5 quilómetros, no que se celebrarán de forma conxunta a carreira OP10K (10.000 metros) e a OP5K (5.000 metros), convertendo as rúas da vila nun auténtico escenario deportivo aberto tanto a atletas de elite como a corredores afeccionados.

A OP10K é unha proba oficial da Federación Galega de Atletismo e está aberta a todas as persoas, federadas ou non. Ademais, a xornada volverá ter un marcado carácter familiar coa celebración das carreiras para as categorías base: desde chupetes, para nenos e nenas nacidos de 2020 en adiante; pitufos, para nacidos entre 2017 e 2019; e a as categorías benxamín (sub10), alevín (sub12) e infantil (sub14). Isto permite que os máis novos tamén poidan gozar dunha mañá deportiva nas rúas do Porriño. Podes ler o regulamento completo na seguinte ligazón:

https://ccnorte.com/uploads/eventos/reglamento-6944ff9960bba4.42688806.pdf

A saída da carreira de 5K e 10K terá lugar de forma simultánea mediante un sistema de caixóns, permitindo unha saída ordenada segundo os tempos estimados de cada participante. O tempo máximo para completar a proba será de 1 hora e 30 minutos.

No apartado competitivo, a OP10K manterá unha atractiva bolsa de premios en metálico. Os tres primeiros clasificados e clasificadas da xeral masculina e feminina recibirán premios de 500, 350 e 200 euros, respectivamente. Ademais, establécese un premio especial de 500 euros para o atleta masculino e/ou feminino que consiga bater o récord da proba, actualmente en posesión de Serbessa Workneh Fijire, con 29:09 (2025), e Ester Navarrete Santana, con 33:18 (2024).

O alcalde do Porriño, Alejandro Lorenzo, destacou que “a OP10K é xa unha das grandes citas deportivas do calendario galego e unha auténtica festa do atletismo e do deporte, que cada ano reúne no Porriño a milleiros de persoas entre participantes e público”. O rexedor subliñou tamén “o enorme traballo do Club Atletismo Porriño e de todo o voluntariado, que fan posible que esta carreira siga medrando edición tras edición e situando o nome do Porriño como referencia do atletismo de ruta”.

Por outra banda, o presidente do Club de Atletismo Porriño, Miguel Novo Regueira, afirmou que “É  un circuíto rápido en 10.000 m homologados, de maneira que pode ser un bo test ao principio da temporada. Ter unha marca homologada nunha carreira 10K facilita medir mellor as túas capacidades de cara ao resto de competicións do calendario”.

Desde o Concello e a organización anímase á veciñanza e aos amantes do running a participar nunha proba consolidada, rápida e atractiva, pensada tanto para competir como para desfrutar do deporte nun ambiente único, convertendo novamente ao Porriño nun punto de encontro para o atletismo galego e estatal.

O Porriño, 4 de xaneiro de 2026.- O alcalde do Porriño, Alejandro Lorenzo, recibiu hoxe no Concello a representantes do Grupeta Pan de Zarko, club ciclista asentado no municipio, para trasladarlles os parabéns polos seus recentes logros deportivos e pola súa traxectoria de dez anos fomentando o ciclismo na localidade.

Entre os deportistas destacados atópase Constantino Muñoz, gañador da Copa de Galicia de Ciclocross 2025 na categoría Máster 40. O seu éxito máis recente foi o primeiro posto no Campionato Galego de Ciclocross 2026, celebrado en Maceda, tamén na categoría Máster 40. Ademais, este deportista afincado en Chenlo acadou o terceiro posto no Campionato Galego de BTT XCO 2025.

Pola súa banda, Santos Lemos, da parroquia de Budiño, conseguiu o segundo posto no Campionato de España Máster 30 de BTT Enduro, así como o segundo posto no Campionato Galego de BTT Enduro 2025.

O Grupeta de Pan de Zarco conta con dez anos de traxectoria no Porriño e está formado por máis de 40 compoñentes, homes e mulleres, que compiten en distintas modalidades do ciclismo e representan ao municipio en probas autonómicas e estatais.

Durante o acto, que tamén contou coa presenza do presidente do club, Roberto Ramírez, o alcalde Alejandro Lorenzo felicitou ao Grupeta Pan de Zarko pola súa labor deportiva e social, destacando que “é un exemplo de constancia, traballo en equipo e compromiso co Porriño, levando o nome do municipio ao máis alto do ciclismo galego e estatal”.

O Concello quixo así recoñecer non só os resultados acadados, senón tamén a contribución do club á promoción do deporte e dos hábitos de vida saudables no municipio.

• O deportista foi recibido no Concello en recoñecemento a súa brillante traxectoria e o recente éxito acadado no European Masters Athletics Stadia Championships 2025, celebrado en Madeira

O Porriño, 7 de novembro de 2025.- O alcalde do Porriño, Alejandro Lorenzo, e o concelleiro de Deportes, Abel Estévez, recibiron no Concello ao atleta Sergio Rodríguez Teixeira, en recoñecemento á súa destacada traxectoria deportiva e, especialmente, ao recente subcampionato de Europa Máster 35 en 200 metros lisos, conseguido no European Masters Athletics Stadia Championships 2025, celebrado en Madeira (Portugal).

Durante o encontro, o rexedor trasladoulle en nome de toda a veciñanza o orgullo que supón contar cun deportista do seu nivel, que combina a docencia coa competición de elite. “Sergio é un exemplo de superación, disciplina e paixón polo deporte. É un orgullo para o Porriño e para Galicia”, destacou Alejandro Lorenzo.

Rodríguez Teixeira, afincado no Porriño, demostrou unha vez máis o seu excelente estado de forma nunha etapa da carreira deportiva na que o rendemento adoita minguar. O atleta, que tamén é profesor nun instituto de Vigo, logrou o segundo posto cun tempo de 22.34 segundos, cun forte vento contrario de -2 m/s, tras clasificarse para a final cunha marca de 21.95 segundos, a súa mellor no campionato e que ademais supón un novo récord galego M35. Neste sentido, Sergio explica que “as marcas en velocidade están moi influenciadas polo vento, por iso a semifinal foi con mellor tempo porque había menos vento”.

“Competir a este nivel, representando a España e levando o nome da miña terra ata Europa, é unha gran recompensa ao esforzo de todo o ano”, sinalou Rodríguez, quen atribúe a súa “vitalidade deportiva” á constancia no adestramento e ao apoio da súa contorna.

O subcampionato europeo consolida a Sergio Rodríguez Teixeira como un dos referentes do atletismo galego na categoría Máster, reforzando tamén o compromiso do Porriño co deporte. Dende o Concello do Porriño, reitérase o apoio ao deporte en todas as categorías e disciplinas, destacando o valor de deportistas como Sergio, exemplo para as novas xeracións e símbolo do esforzo, a constancia e a paixón que caracterizan á veciñanza porriñesa.

• As obras, en fase de licitación, contemplan a instalación dun novo céspede artificial que garantirá o bo estado do campo durante todo o ano tendo en conta a intensa actividade que soporta a diario. Tamén se realizarán melloras no sistema de rego e renovarase a iluminación do terreo de xogo
• A execución das obras e o mantemento do céspede, por un período de 5 anos, supoñen unha inversión de preto de 700.000 euros financiados con fondos propios

O Porriño, 4 de novembro de 2025.- O Concello do Porriño impulsa a renovación integral do campo de fútbol municipal do Lourambal. A actuación está incluída no mesmo expediente de licitación no que se atopa tamén a substitución e mantemento do céspede artificial do campo de fútbol de Pontellas, para o cal se empregará o mesmo modelo de xestión.

As obras contemplan a retirada do actual terreo de xogo de herba natural, o acondicionamento e nivelación do terreo con achega de zahorra, a instalación dun novo sistema de drenaxe perimetral e de subministración de auga, así como a instalación dun moderno céspede artificial de última xeración.

O cambio de herba natural a céspede artificial responde á necesidade de garantir o bo estado do campo durante todo o ano, tendo en conta a intensa actividade que soporta o terreo de xogo. Non se trata dun uso esporádico, xa que o club conta con preto de 400 fichas e realiza un uso diario e continuado das instalacións. Por este motivo, o céspede artificial constitúe a mellor opción, ao ofrecer unha maior durabilidade, menor mantemento e unha mellor adaptación ás condicións climatolóxicas da zona.

O proxecto, que responde a unha demanda histórica do club e das familias, prevé tamén a renovación completa do equipamento deportivo, no que se inclúe a substitución de porterías de fútbol 11 e dous xogos de porterías de fútbol 7, redes, un novo xogo de banderíns de córner, novos banquillos cubertos e pechados lateralmente, sinalización de campo e varandas perimetrais. Ademais, levarase a cabo mellora na rede de rego, instalando canóns emerxentes de largo alcance e un depósito enterrado para abastecer a instalación, e renovarase a iluminación do campo.

“Estes traballos supoñen un paso máis dentro do plan de mellora das instalacións deportivas municipais”, explica o alcalde Alejandro Lorenzo, asegurando que “queremos que tanto o Lourambal como Pontellas conten con terreos de xogo modernos, seguros e axeitados para a práctica do fútbol base e federado”.

A parte de obra civil conta un orzamento base de licitación de 399.077,73 euros e o correspondente ao renting para o posterior mantemento do céspede artificial, que ao igual que no caso de Pontellas tamén é de 5 anos, supón unha inversión de 292.458,95 euros.

O prazo de execución das obras de acondicionamento do terreo está fixado en catro meses e a instalación do novo céspede artificial levará outros dous meses adicionais, polo que se prevé que o campo estea completamente renovado no verán do próximo ano.

É a salientar que esta actuación no Lourambal supón a primeira fase dun proxecto ambicioso no que se inclúe a reforma das gradas e vestiarios valorado en máis de medio millón de euros.

Todas estas actuacións enmárcanse nun plan municipal máis amplo de mellora das instalacións deportivas do Porriño, co obxectivo de ofrecer espazos máis seguros, modernos e sostibles para o desenvolvemento da práctica deportiva en todo o municipio, así os campos de fútbol de Atios, Mosende e Budiño tamén contarán co seu proxecto de mellora.

• O Concello do Porriño saca a licitación o proxecto para a súa substitución e mantemento, por un período de cinco anos, por importe de 485.000 euros

O Porriño, 3 de novembro de 2025.-  O Concello do Porriño vén de sacar a licitación a obra de execución para a substitución do céspede do campo de fútbol de Pontellas, unha actuación que suporá a renovación integral da superficie de xogo e a mellora das instalacións deportivas.

O proxecto contempla o cambio de céspede natural a céspede sintético de última xeración lastrado con area de sílice e caucho, conservando as dimensións actuais do campo de fútbol 11 e os dous campos de fútbol 7, co correspondente marcaxe para ambas modalidades. Ademais, aproveitarase a manta actual como pavimento non deportivo nas zonas perimetrais e instalaranse novas porterías abatibles de fútbol 7, así como a reposición das redes de fútbol 11.

“O campo municipal de Pontellas necesitaba unha renovación urxente para que os xogadores poidan adestrar e competir nas mellores condicións. Este proxecto aposta por un céspede de última xeración e un sistema de mantemento profesional que garanta o seu rendemento ao longo dos anos”, explicou o alcalde do Porriño, Alejandro Lorenzo. E é que, logo do acondicionamento do terreo, cun orzamento máximo de licitación de 279.074,32 euros, a outra parte do proxecto céntrase na instalación do novo céspede e o seu mantemento en perfecto estado a través dun renting a cinco anos, cuxo importe total ascende a 206.515,18 euros.

 “É unha actuación moi demandada polos clubs e usuarios, que se suma ao esforzo do Concello por mellorar todas as instalacións deportivas do municipio. O deporte é un piar fundamental da vida social do Porriño e queremos ofrecer espazos de calidade para todos”, engadiu o alcalde.

A inversión total desta actuación no campo de fútbol de Pontellas supera os 485.000 euros e será financiada integramente con fondos municipais.

Unha vez adxudicadas as actuacións, a execución realizarase nun prazo aproximado de seis meses, tempo durante o cal os usuarios destas instalacións reubicaranse noutras do municipio, compartidas con outros clubs, para que non vexan interrompida a súa actividade deportiva.

Todas estas actuacións enmárcanse nun plan municipal máis amplo de mellora das instalacións deportivas do Porriño, co obxectivo de ofrecer espazos máis seguros, modernos e sostibles para o desenvolvemento da práctica deportiva en todo o municipio.

• O polígono de Cataboi acollerá o vindeiro domingo, 9 de novembro, a máis de 300 ciclistas nunha xornada de competición e promoción do deporte

O Porriño, 1 de novembro.- A Copa Galicia de Ciclocross 2025-2026 regresa ao Porriño para celebrar a súa quinta cita do calendario. Despois de ter iniciado a competición nesta mesma localidade co VIII Trofeo Ciclocross Avanza Concello do Porriño, o vindeiro domingo, 9 de novembro, celebrarase o IV Trofeo Ciclocross Grupeta Pan de Zarko. Será a partir das 10.00 horas no Polígono Industrial de Cataboi.

A proba está organizada polo Club Ciclista Grupeta Pan de Zarko e contará cun amplo abano de categorías, tanto na modalidade masculina como feminina, desde cadete, infantil e junior, a sub 23, elite e master 30, 40 e 50/60 que deberán completar un circuíto de preto de tres quilómetros, cualificado pola oranización como “largo e duro”. Haberá dous actos de entrega de premios, un sobre ás 12.00 e outro ás 14.30 horas aproximadamente. As categorías élite e sub 23 recibirán un premio en metálico e as restantes trofeos.

Dende a organización, espérase a participación de entre 300 e 350 ciclistas, con todo o prazo de inscrición continúa aberto ata ás 15.00 horas do vindeiro xoves 6 de novembro, de xeito telemático a través da páxina web da Federación Galega de Ciclismo, www.fgalegaciclismo.es. O custo da inscrición é de 10 euros e está limitada a só federados. A recollida de dorsais realizarase o mesmo día da competición, a partir das 08.30 horas.

O alcalde do Porriño, Alejandro Lorenzo, destacou a importancia deste evento para o municipio, “estamos encantados de volver acoller unha proba da Copa Galicia de Ciclocross. Este evento non só pon de relevo a vitalidade do deporte na nosa localidade, senón que tamén atrae afeccionados e participantes de toda Galicia, xerando un ambiente festivo e de promoción do deporte”, indicou durante o acto de presentación ao que asistiron o presidente e o secretario do Grupeta Pan de Zarko, Jose Roberto Ramírez e Pablo Márquez, respectivamente, e, por parte da Federación Galega de Ciclismo, Juan Carlos Muñiz e Óscar Fernando Sánchez, presidente e vicepresidente, ademais de integrantes do club e colaboradores da proba.

O IV Trofeo Ciclocross Grupeta Pan de Zarko promete ser un gran espectáculo para os afeccionados e competidores, reforzando a importancia do Porriño como referencia do ciclocross galego, en particular e do deporte en xeral.

• A actividade con inicio e fin na Praza Arquitecto Antonio Palacios, está aberta a persoas de todas as idades e require inscrición previa
• A saída será ás 09.30 horas e realizarase un percorrido de 8 quilómetros

O Porriño, 23 de outubro de 2025.- O Concello do Porriño convida a toda a veciñanza a participar na tradicional ruta ciclista pensada para todas as idades, que se celebrará o vindeiro domingo, 26 de outubro, cun percorrido circular de 8 quilómetros que partirá e rematará na Praza Arquitecto Antonio Palacios.

A actividade, de carácter recreativo e familiar, pretende fomentar o uso da bicicleta como medio de transporte sostible e saudable, ao tempo que promove a convivencia entre veciños e veciñas de todas as xeracións.

A saída está prevista para as 09.30 horas, diante da Casa Consistorial. As persoas interesadas poden inscribirse previamente en liña a través da seguinte ligazón https://forms.gle/is2TgnQ6u8vMTETf9 ou no mesmo día do evento, achegándose á zona de saída con antelación suficiente.

“Queremos que esta ruta sexa, como sempre foi, unha festa da bicicleta e da convivencia”, destaca o alcalde do Porriño, Alejandro Lorenzo, quen subliñou o compromiso do goberno local coa promoción do deporte, de hábitos de vida saudables e o respecto polo medio ambiente. “É unha oportunidade perfecta para desfrutar en familia, redescubrir a nosa contorna e facer deporte de maneira segura e divertida”, engadiu.

Desde o Concello faise un chamamento a participar nunha xornada que promete ser “un punto de encontro para todas as idades”, animando tamén a todas as persoas asistentes a circular con responsabilidade e empregar casco e roupa adecuada. Ademais, á chegada haberá recompensa, chocolate de balde para todos.