Cultura e festas

• O Festival de Cans, a Imprenta Paz e Gráficas Bolfer, o Círculo Recreativo Cultural CRC,  Claudio Giráldez e Lola Magno son os premiados desta edición 

O Porriño, 14 de xuño de 2025.- A Praza Arquitecto Antonio Palacios acolleu esta noite a gala dos II Premios Antonio Palacios, un acto cargado de emoción, identidade e recoñecemento ao talento porriñés nos ámbitos da cultura, a empresa, o compromiso social, o deporte e a memoria histórica. Centos de persoas reuníronse para celebrar o labor e a traxectoria dos premiados nunha xornada festiva que comezou pola mañá e se prolongou ata entrada a noite.

O día arrincou co II Concurso de Pintura Rápida “Pintando a Palacios”, seguido dun concerto da Agrupación Musical do Porriño. Xa pola tarde, entregouse o premio do certame pictórico e, a partir das 21:00 horas, deu comezo a gala central da xornada, conducida pola presentadora Icia Alcalde, coa interpretación do Himno Galego a cargo de Noemi Fernández e Banda de Gaitas de Paramos e a proxección dun vídeo conmemorativo.

O primeiro dos recoñecementos da noite foi o Premio á Cultura, que recaeu no Festival de Cans, unha iniciativa que transforma o Porriño nun referente do cinema galego, combinando vangarda, participación veciñal e identidade rural. Recolleu o galardón o director do festival, Alfonso Pato. O premio foi entregado por Bienvenido Estévez, Concelleiro de Cultura do Concello do Porriño.

A continuación, entregouse o Premio á Empresa, que foi para Imprenta Paz e Gráficas Bolfer, dúas empresas familiares cunha longa traxectoria vencellada ao desenvolvemento do tecido económico local. Foron recoñecidas polo seu compromiso coa calidade, a innovación tecnolóxica e o servizo á comunidade. A entrega deste premio correu a cargo de Carlos Martínez, Tenente-Alcalde e Concelleiro de Industria do Concello do Porriño.

O Premio ao Compromiso Social recaeu no Círculo Recreativo Cultural CRC, unha entidade histórica no municipio que ten servido como espazo de encontro e dinamización durante décadas. Recolleu o premio o seu presidente, Abel Gallego, e fixo a entrega Nava Castro, Deputada de Turismo.

No ámbito deportivo, o Premio ao Deporte foi concedido a Claudio Giráldez González, actual adestrador do Real Club Celta de Vigo e referente na formación de base e nos valores do deporte. O galardón foi recollido polo seu sobriño xa que o premiado non puido asistir e enviou un vídeo de agradecemento. A encargada de facer a entrega foi Ana Ortiz, Delegada Territorial da Xunta de Galicia en Vigo.

O momento máis emotivo da noite chegou coa entrega do Premio de Honra, concedido a título póstumo a Lola Magno, coñecida como “Lola a fotógrafa”, pioneira da fotografía no Porriño e autora dun arquivo visual irrepetible sobre a vida e evolución da vila. O premio foi recollido pola súa filla, Cristina Blázquez, e entregado polo Alcalde do Porriño, Alejandro Lorenzo.

No peche da gala, o alcalde agradeceu a presenza de todos os asistentes e “o exemplo de cada persoa e entidade premiada, que coa súa traxectoria dignifican o nome do Porriño e representan o mellor da nosa identidade”. Na súa intervención, destacou tamén que:

“Hoxe reafirmamos algo que os porriñeses sentimos cada día: que aquí hai talento, hai memoria e hai futuro. Estes premios non son só unha homenaxe a Antonio Palacios, senón tamén unha mirada cara a todo o que somos capaces de construír como comunidade.”

A música da Banda de Gaitas de Paramos puxo o broche final a unha noite que quedará na memoria colectiva do municipio, unindo recoñecemento e celebración arredor da figura do arquitecto Antonio Palacios, símbolo do orgullo porriñés.

• Claudio Giráldez, adestrador do RC Celta de Vigo,  recibirá o Premio ao Deporte pola súa traxectoria exemplar

O Porriño, 12 de xuño de 2025.– O Concello do Porriño celebrou esta mañá a presentación oficial da II edición dos Premios Antonio Palacios, nun acto no que se anunciou o nome do último dos galardóns desta convocatoria: o Premio ao Deporte será concedido ao adestrador porriñés Claudio Giráldez González, actual técnico do RC Celta de Vigo, que esta tempada conseguiu a clasificación para a UEFA Europa League.

O Concello quere recoñecer así unha traxectoria marcada polo traballo constante, a vocación formativa e a excelencia profesional no mundo do fútbol. Claudio Giráldez, que deu os seus primeiros pasos deportivos no Porriño, é hoxe unha figura de referencia no deporte galego, destacando tanto polo seu liderado no terreo de xogo como polo seu compromiso co crecemento dos máis novos.

“O éxito de Claudio non é só deportivo, é un exemplo de superación, humildade e conexión coas súas raíces. Representa á perfección os valores que queremos destacar con estes premios: esforzo, identidade e excelencia”, sinalou o alcalde Alejandro Lorenzo durante o acto.

Durante esta semana, foron anunciándose os demais galardóns que se outorgarán o sábado: o Premio á Cultura ao Festival de Cans, pola súa labor única na promoción do cinema galego e a dinamización do rural con creatividade e participación veciñal; o Premio ao Compromiso Social ao Círculo Recreativo Cultural CRC, por ser un espazo histórico de encontro e fomento da cohesión social; o Premio á Empresa ás imprentas Paz e Gráficas Bolfer, polo seu compromiso coa calidade, innovación e apoio á economía local; e o Premio de Honor a título póstumo a Lola Magno, pioneira fotógrafa que documentou a vida e evolución social do Porriño, deixando un valioso legado cultural.

A gala de entrega dos Premios Antonio Palacios celebrarase o sábado 14 de xuño na Praza Arquitecto Antonio Palacios, e contará cunha ampla programación de actividades culturais, artísticas e musicais ao longo de todo o día. A xornada comezará ás 9:30 horas co II Concurso de Pintura Rápida. Pintando a Palacios. Ás 12:30 horas haberá un concerto da Agrupación Musical do Porriño. Ás 19:00 horas entregarase o premio do II Concurso de Pintura Rápida. Xa pola tarde, ás 21:00 horas, a Banda de Gaitas de Paramos interpretará o Himno Galego, seguido da entrega dos Premios Antonio Palacios. Para pechar a noite, ás 22:00 horas, terá lugar unha actuación da Banda de Gaitas de Paramos.

Estes premios, promovidos polo Concello, teñen como obxectivo recoñecer e visibilizar o talento local en diferentes ámbitos —cultura, empresa, compromiso social, deporte e memoria histórica— ao tempo que se rende homenaxe á figura do gran arquitecto porriñés Antonio Palacios, símbolo do orgullo e da identidade do municipio.

• Lola Magno recibirá o Premio de Honor pola súa pioneira traxectoria na fotografía e pola súa contribución á memoria visual do Porriño

O Porriño, 12 de xuño de 2025. – O Concello do Porriño continúa a desvelar os nomes dos galardoados na II edición dos Premios Antonio Palacios, que se entregarán este sábado nunha gala especial. Hoxe, anúnciase o Premio de Honor, que será concedido a Lola Magno, coñecida como “Lola a fotógrafa”, en recoñecemento á súa pioneira labor no ámbito da fotografía e ao seu papel fundamental na construción da memoria visual do Porriño.

Lola Magno foi unha das primeiras mulleres en exercer como fotógrafa de rúa nun tempo e nun oficio dominados polos homes. A través da empresa familiar Foto Magno, activa entre os anos 50 e os 90, captou coa súa cámara a vida cotiá, as festas, os cambios urbanos e sociais da vila, deixando un arquivo fotográfico único e valiosísimo.

Traballando sen estudo propio, aproveitaba espazos naturais como a Malladoura para realizar as súas sesións, demostrando creatividade, sensibilidade artística e capacidade de adaptación. O seu traballo non só documenta unha época, senón que tamén visibiliza o papel das mulleres nun sector tradicionalmente masculino.

“O legado de Lola Magno é unha lección de superación e paixón polo oficio. A súa cámara foi testemuña da evolución do Porriño e hoxe, gracias a ela, conservamos fragmentos da nosa historia cotiá. Este Premio de Honor é unha homenaxe merecida a unha vida dedicada á identidade e á memoria da nosa vila”, destacou o alcalde Alejandro Lorenzo.

A gala de entrega dos Premios Antonio Palacios celebrarase este sábado e reunirá a representantes do mundo da cultura, da empresa, da ciencia, do deporte e da sociedade civil, nun evento que quere poñer en valor o talento, a identidade e a excelencia local.

Nas próximas horas, o Concello revelará o último dos cinco premios desta edición, reafirmando estes galardóns como un espazo de recoñecemento ao talento, ao compromiso e ao orgullo porriñés.

• 183 nenos e nenas do Porriño participaron nas probas deportivas como salto de altura, salto de lonxitude e loita
• Rafa Durán, humorista e comunicador, percorreu as rúas caracterizado de romano a bordo dun carro tirado por cabalos

O Porriño, 11 de xuño de 2025.- O Porriño converteuse esta mañá nun auténtico escenario digo da aldea gala de Astérix e Obélix, viaxando simbólicamente ao pasado, para dar o pistoletazo de saída a unha nova edición de Porrigalia, os Xogos Olímpicos máis orixinais e divertidos de Galicia que terán lugar o 12 e o 13 de xullo e nos que haberá moitas sorpresas. 

A cita tivo lugar na Praza Arquitecto Antonio Palacios que se transformou nun coliseo cheo de enerxía, entusiasmo e fantasía, gracias á celebración de Preporrigalia 2025, unha xornada que congregou a 183 alumnos e alumnas de 3º de Primaria dos centros educativos do Porriño, así como a alumnado de Aceesca.

O evento contou coa presenza do Alcalde, Alejandro Lorenzo, quen estivo acompañado doutras autoridades locais e do carismático Rafa Durán, humorista e comunicador, quen fixo unha entrada triunfal na Praza do Concello caracterizado de romano a bordo dun carro tirado por cabalos, tras un percorrido polas rúas do centro da vila.

“Preporrigalia é moito máis que un acto previo: é a semente que fai medrar o espírito de Porrigalia nas rúas, nos colexios e nos corazóns do Porriño. Hoxe, os máis pequenos déronnos unha lección de ilusión, enerxía e comunidade. Esta praza foi unha festa, pero tamén foi unha mensaxe: xa estamos preparados para vivir Porrigalia como nunca antes”, sinalou o Alcalde Alejandro Lorenzo.

Durante a mañá, os nenos e nenas desfrutaron dun amplo programa de actividades que incluíu:

• Probas deportivas como salto de altura, salto de lonxitude e loita
• Animación de rúa e xogos populares
• Representacións de personaxes históricos pertencentes a distintas civilizacións

O acto rematou coa simbólica entrega de medallas e das tradicionais laranxas de Porrigalia, poñendo o punto final a unha xornada chea de maxia, risa e espírito olímpico.

Preporrigalia 2025 foi unha xornada festiva e participativa que mesturou deporte, historia, diversión e convivencia, marcando o inicio dunha nova edición dun dos eventos máis emblemáticos do Porriño.

• O Círculo Recreativo Cultural CRC recibirá o Premio Antonio Palacios ao Compromiso Social pola súa longa traxectoria como esparzo de encontro, participación e dinamización social

O Porriño, 10 de xuño de 2025.- O Concello do Porriño vén de anunciar o segundo dos cinco recoñecementos que serán entregados este sábado na II edición dos Premios Antonio Palacios. Trátase do Premio ao Compromiso Social, que este ano será outorgado ao Círculo Recreativo Cultural CRC.

Este recoñecemento pon en valor a dilatada traxectoria do CRC como referente no ámbito social e cultural do municipio. Ao longo dos anos, o Círculo consolidouse como un espazo de encontro e dinamización que promove a participación cidadá, o lecer e a cohesión comunitaria. A súa labor constante no fomento de valores como a colaboración, a solidariedade e o servizo á comunidade fan desta entidade unha merecida gañadora do galardón., un espazo que ten sido un motor para o fomento da cultura, do lecer e da cohesión comunitaria, promovendo valores de colaboración e servizo ao municipio.

O Premio Antonio Palacios ao Compromiso Social distingue a aquelas persoas ou entidades que destacan polo seu labor desinteresado a prol do ben común, reforzando o tecido social e contribuíndo á mellora da calidade de vida no Porriño.

O Alcalde do Porriño, Alejandro Lorenzo, subliña o papel fundamental do CRC na vida local e expresa o seu recoñecemento: “Todos no Porriño temos algún recordo ligado ao CRC. É moito máis ca unha entidade cultural: é unha parte da nosa historia e do noso día a día. Levan anos abrindo as portas á veciñanza, creando comunidade e facendo barrio. Este premio é unha maneira de dicirlles gracias, de corazón, polo que representan para todos nós.”

O acto de entrega da II edición dos Premios Antonio Palacios celebrarase este sábado nunha gala especial que reunirá a diversas personalidades do mundo da cultura, da empresa, do deporte e da sociedade civil, así como representantes da comunidade local.

O Concello do Porriño continuará nos vindeiros días desvelando o nome dos restantes galardoados, reafirmando o seu compromiso coa posta en valor do talento, a identidade e o orgullo porriñés.

• O Festival de Cans recibirá o Premio Antonio Palacios á Cultura polo seu compromiso coa identidade, a creatividade e a dinamización do rural

O Porriño, 9 de xuño de 2025.- O Concello do Porriño vén de anunciar o primeiro dos cinco recoñecementos que serán entregados este sábado na II edición dos Premios Antonio Palacios. Trátase do Premio á Cultura, que este ano será outorgado ao Festival de Cans, un evento singular que, ano tras ano, transforma a parroquia porriñesa no epicentro do cinema galego e da vangarda cultural.

O Premio Antonio Palacios á Cultura honra a aquelas persoas e entidades que, coa súa creatividade e paixón, manteñen vivas as tradicións culturais ao tempo que fomentan a innovación artística. Desde escritores e músicos, ata artistas visuais e docentes, este galardón recoñece o traballo daqueles cuxa obra une comunidades e transcende fronteiras. Na súa primeira edición, o premio foi concedido ao histórico Almanaque Agrícola ZZ, en recoñecemento ao seu valor simbólico, editorial e cultural dentro da memoria colectiva galega.

Nesta segunda edición, o recoñecemento irá para o Festival de Cans por ser unha iniciativa cultural única e profundamente enraizada na nosa identidade, que combina vangarda, participación veciñal e creatividade.

“O Festival de Cans non só é cine: é memoria, é orgullo de pertenza e é unha mostra de como a cultura pode dinamizar o rural e proxectalo internacionalmente”, subliñou o alcalde, Alejandro Lorenzo.

Engadiu ademais que “é de xustiza poñer en valor o seu impacto sostido no tecido social, artístico e económico do noso concello. Cans representa un modelo exemplar de cultura participativa, feita dende o local pero con capacidade para emocionar e conectar a nivel global”.

Con máis de dúas décadas de traxectoria —a súa primeira edición celebrouse no ano 2004—, o Festival de Cans consolidouse como unha cita imprescindible no calendario cultural galego, destacando pola súa capacidade de mesturar talento emerxente, humor, emoción e compromiso coa contorna. A súa evolución constante e a implicación da veciñanza fan del un modelo único de xestión cultural.

Pola súa banda, o concelleiro de Cultura, Bienvenido Estévez, destacou que o Festival de Cans “é moito máis ca unha cita cinematográfica: é un referente indispensable na nosa axenda cultural e un motor de dinamización para o Porriño”. 

O acto de entrega da II edición dos Premios Antonio Palacios celebrarase este sábado nunha gala especial que reunirá a diversas personalidades do mundo da cultura, da empresa, do deporte e da sociedade civil, así como representantes da comunidade local.

O Concello do Porriño continuará nos vindeiros días desvelando o nome dos restantes galardoados, reafirmando o seu compromiso coa posta en valor do talento, a identidade e o orgullo porriñés.