Cultura e festas

• Imaxe: Cris Andina

O director do Festival de Cans, Alfonso Pato, será o pregoeiro das Festas do Cristo 2022. Así o deu a coñecer hoxe o alcalde, Alejandro Lorenzo, poñendo nome ao protagonista do esperado pistoletazo de saída das festas patronais.

O rexedor quixo agradecer ao pregoeiro que aceptase a proposta do Concello para ser o persoeiro destacado destas festas. “Podemos dicir que Pato é un símbolo do noso pobo, tanto a nivel cultural como persoal; un porriñés de corazón e un grandísimo embaixador da nosa vila”, apuntou o rexedor, “Conta coa condición indispensable para subir ao balcón como pregoeiro: sentir paixón polo Porriño e levalo sempre por bandeira”.

Pola súa banda, Alfonso Pato, destacou que “é toda unha honra para min dar o pregón das Festas e máis aínda neste ano tan sinalado, no que o Festival de Cans cumpre 20 anos”.

Unha importante traxectoria cultural e xornalística

Alfonso Pato é Director do Festival de Cans desde a súa primeira edición en 2004, onde formou parte do equipo fundador que puxo ao Porriño no mapa cultural nacional e internacional.

Ademais da súa visibilidade como director do Festival de Cans, Alfonso Pato é Licenciado en Filoloxía Hispánica pola Universidade de Santiago e ten unha traxectoria xornalística de máis de trinta anos traballando en ámbitos da comunicación en medios como Xornal Diarioe El País, en TVE e na TVG, ademais de multitude de produtoras audiovisuais. Na actualidade escribe habitualmente en El diario.es.

Na TVG desenvolveu unha longa traxectoria como guionista e como director de programas en máis de trinta espazos diferentes. Entre eles, foi director de “Onda Curta” , primeiro programa sobre  curtametraxes feito en Galicia, e polo que gañou un Premio Mestre Mateo en 2010. A título individual, foi galardonado tamén co Premio da Cultura que otorga o CRC de O Porriño, unha das grandes entidades locais.

En calidade de xestor de accións culturais singulares nun entorno rural, ten participado en encontros e coloquios por toda España (Bilbao, Oviedo, Cáceres, Madrid, Barcelona…) e en países como Portugal, Francia, Bélxica ou Inglaterra, en universidades galegas e noutras de fóra de Galicia como Deusto, Universidade Católica do Porto, ou Université Sorbonne- Paris 3, de París.

Pertence aos socios fundadores do Sindicato Profesional de Xornalistas de Galicia (SPXG), foi membro do Consello Asesor do Centro Dramático Galego (2010-2012), directivo da Asociación Galega de Guionistas (AGAG) (2011- 2015), sendo un dos impulsores da recentemente constituída Coordinadora de Festivais de Cinema de Galicia, Proxecta.

A concellería de Cultura, que dirixe Bienvenido Estévez, vén de ampliar o prazo para inscribirse no concurso musical “Tes Talento?”, que se celebrará este mes de setembro no marco das Festas do Cristo 2022.

A inscrición poderá formalizarse ata o 12 de setembro no Rexistro Xeral do Concello, de luns a venres en horario de 9 a 14h.

Lembramos que haberá dúas modalidades, infantil e adultos. En ambas poderán presentarse grupos ata un máximo de catro compoñentes e o tempo de actuación será de tres minutos como máximo.

O gañador desta edición farase con 400 euros e a gravación dun tema ou vídeo promocional, o segundo cun premio de 250 euros e o terceiro cun de 150 euros. Para os tres finalistas infantís, un lote de produtos escolares e trofeo.

As TANXUGUEIRAS serán un dos dos grandes atractivos das próximas Festas do Cristo. Sabela , Aida e Olaia recalarán no Porriño o 30 de setembro para ofrecer un concerto que promete ser todo un éxito de afluencia. O recital comenzará ás 22:30 horas e a entrada será gratuíta.

Dende que as galegas presentaran a súa candidatura para representar a España no festival de Eurovisión, o seu éxito non parou de medrar, e regresan ao Porriño co seu novo disco “Diluvio” que se presenta como unha viaxe de indagación e autocoñecemento.

As creadoras firman todos os temas de “Diluvio” e apostan pola reinterpretación da tradición galega a través da fusión con ritmos urbanos coa intención de achegar a música de raíz ao público máis novo.

Nos próximos días, o Concello do Porriño presentará a programación das Festas do Cristo 2022 que, xunto ás Tanxugueiras, vén cargada de pratos fortes e actividades para todos os públicos.

O Círculo Recreativo Cultural acolleu onte a inauguración da mostra que recolle os traballos dos artistas da asociación O Porriño Arte.

O alcalde do Porriño, Alejandro Lorenzo, acudiu onte ao acto inaugural da exposición “Punto de encuentro”, composta por 44 obras que acreditan o talento e boa técnica dos artistas que compoñen a asociación dirixida por Nuria Vilanova.

Andrea Cardoso, Rosa Pereira, Raquel Souto, Ana Carrera, Adela Crespo, Antía Lorenzo, Chola Amoedo, Pepa Carrera, Susana Carballas, Martina Caride, Breixo Paz, Mara Vicente e Candela Eiras expoñen o resultado do traballo de todo o curso.

“O Porriño é moito máis que o Concello do Deporte, tamén é o Concello da Cultura e proba diso son colectivos como O Porriño Arte que plasman sobre o lenzo a creatividade, o talento e a técnica artística da veciñanza do Porriño”, explicou o alcalde, “Por iso convídovos a todos a descubrir os seus traballos neste punto de encontro coa arte, que estou seguro non vos deixará indiferentes”.

A mostra permanecerá aberta ao público no Círculo Recreativo e Cultural do Porriño durante todo o mes de setembro, en horario de tarde.

A concellería de Cultura, que dirixe Bienvenido Estévez, informou hoxe que dende o martes 13 ao venres 16 de setembro pódese formalizar a matrícula e reservar horarios na sede da Escola Municipal de Música (no Centro Multiusos de Torneiros), en horario de 16 a 21 h, segundo a preinscrición realizada no mes de xuño.

Da mesma forma, o alumnado de novo ingreso que teña feita a preinscrición poderá matricularse a partir das 20 h do xoves 15 e dende as 16 h do venres 16 de setembro.

As listaxes co nome, día e hora do alumnado preinscrito estarán expostas nas portas do Centro Cultural Municipal e da Escola Municipal de Música dende o luns 5 ao venres 9 de setembro.

Na formalización da matrícula cumpriranse as normas establecidas no protocolo anexo.

O alumnado sen preinscrición poderá matricularse a partir das 19:20 h do venres 16 de setembro ou a partir do día 19 de setembro de 16:30 a 18:30 h, sempre e cando queden prazas dispoñibles.

A oferta da Escola Municipal de Música do Porriño é a que se indica a continuación:

• Música e movemento, de 4 a 7 anos de idade.
• Linguaxe musical: nivel elemental e medio (entre outras materias),  dende os 8 anos en diante e sen límite de idade.
• Especialidades instrumentais: violín, viola, violonchelo, guitarra, piano, canto, gaita, percusión tradicional, óboe, clarinete, saxofón, frauta traveseira, trompa, trompeta, bombardino, trombón, tuba e percusión sinfónica.
• Agrupacións: banda, orquestra de corda, conxunto de música tradicional e corais de nenas/os e adultas/os.

As clases comezarán o luns 3  de outubro.

ANEXO CO PROTOCOLO PARA REALIZAR A MATRICULA:

• As matrículas realizaranse en intervalos de entre 5 e 10 minutos. Rogamos a máxima puntualidade. Cada estudante ten a súa hora de matrícula e, unha vez pase a súa quenda, non poderá ser atendida/o.
• Preferentemente entrará a formalizar a matrícula unha única persoa por estudante. No caso de familias con varios membros, recomendamos que sexa unha única persoa representante a que formalice a matrícula.
• As persoas responsables de matricular as súas fillas e fillos deberán traer con eles toda a información e documentación necesaria, así como lapis ou bolígrafo para apuntar. Rogamos que leven varias opcións de horarios anotadas para axilizar o proceso da matrícula.
• Non se poderá permanecer na escola máis tempo do indispensable para realizar a matrícula.

O Porriño acolle o II Ciclo de teatro amador Feteagal, organizado polo Concello do Porriño e a Federación Teatral Afeccionada de Galicia en colaboración con Escena Amateur, con varias representacións programadas entre agosto e outubro nas que se poderá disfrutar de varios grupos galegos e de ámbito nacional.

A actuación que abre o certame teatral correrá a cargo de Coles Teatro, que representará “Pepa Loba” o xoves 11 de agosto, ás 23 h no parque Alameda (Avda. de Galicia). O venres 12, á mesma hora, no parque do Sol, Metátese Teatro presentará “Escola de Vaqueiras”.

As seguintes citas serán, o sábado 20 de agosto, ás 22h no barrio de San Benito, con “Tantos Anos de Silencio” de Esteta Teatro e o domingo 21 á mesma hora no parque do Cristo, Oreteiro Teatro presentará Arritmia.

Grupos de música e solistas emerxentes terán unha nova oportunidade de promoción no Porriño: volve TES TALENTO?. 

Como nas anteriores edicións, o certame busca descubrir novos talentos e promover aos/as músicos/as emerxentes da contorna.

“Hai anos preguntámonos se había talento no Porriño e a resposta foi moi clara: hai talento! Hai moito talento na vila e o menos que podemos facer dende o concello é dalo a coñecer”, afirmou o alcalde, Alejandro Lorenzo. Así, tras anos sen convocarse, o novo executivo decidiu recuperalo atendendo á demanda da veciñanza.

A inscrición abrirase o día 16 de agosto e rematará o día 26 de agosto, de luns a venres en horario de 9 a 14 h nas dependencias do rexistro do Concello do Porriño.

Haberá dúas modalidades, infantil e adultos. En ambas poderán presentarse grupos ata un máximo de catro compoñentes e o tempo de actuación será de tres minutos como máximo.

Un xurado formado polo concelleiro de Festexos, tres especialistas no campo artístico musical e unha persoa funcionaria do Departamento de Cultura e Festexos que designe o Concello, será o encargado de outorgar os premios.

O gañador desta edición farase con 400 euros e a gravación dun tema ou vídeo promocional, o segundo cun premio de 250 euros e o terceiro cun premio de 150 euros. Para os tres finalistas infantís, un lote de produtos escolares e trofeo.

A fase preliminar (audicións pechadas ao público) celebrarase o día 3 de setembro. As/os seleccionadas/os disputarán as semifinais, que terán lugar o día 18 de setembro para a categoría infantil (menores de 16 anos) e os días 27 e 29 de setembro para adultos (de 16 anos en diante).

A gran final, na que se decidirán aos/as gañadores/as, terá lugar o día 2 de outubro. 

O Concello do Porriño celebra esta fin de semana unha das súas festas patronais: as Festas de San Bieito.

A programación arrancará o sábado 9 de xullo, a partir das 21 h, coa verbena a cargo do Grupo Trópico, a Orquestra Ritmo Joven e a sesión de DJ Samu Pexe. A música continúa o domingo 11 de xullo (21 h) da man de Antonio Barros, Dos pájaros y un trío e a sesión dj de Khris Guez.

O luns 11 de xullo, o día grande das festas, chega cargado de actividades. Ás 12 horas comezará a misa na honra a San Bieito seguida da procesión, amenizada pola Agrupación Musical do Porriño. De seguido, terá lugar aos pés da capela a tradicional poxa.

Xa pola noite, a partir das 21 h verbena a cargo do Grupo Distrito 7 e Orquestra Charleston Big Band. Pechará a sesión Dj Pitty.

Os máis pequenos poderán disfrutar tamén da festa da auga, inchables e animación infantil o domingo e o luns.

O alcalde, Alejandro Lorenzo, animou á veciñanza do Porriño e dos concellos da contorna a visitar a vila e “disfrutar xunto aos veciños e veciñas de San Bieito destas festas con tanto arraigo”.

Os amantes do canto coral teñen unha cita este domingo no Porriño. A Avenida de Galicia acollerá, a partir das 20 h,  o concerto no que participarán tres agrupacións porriñesas: a Coral da Asociación Veciñal Agarimo de Torneiros, a Coral Os Penediños de Atios e a Coral Polifónica San Blas de Budiño.

Esta última estará acompañada pola reputada Banda de Música de Alcalá de Guadaíra, de Sevilla con cuxo director, Ángel Lasheras, a coral de Budiño garda unha estreita relación.