Benestar

Aberto o prazo para solicitar subvencións de ata 10.000 € para asociacións

  • As axudas poden cubrir ata o 100 % do investimento, cun importe mínimo de 6.000 €, e o prazo de solicitude remata o 1 de abril de 2026

O Porriño, 12 de xaneiro de 2025.- O Concello do Porriño informa ás asociacións veciñais e entidades sociais do municipio da apertura do prazo para solicitar as subvencións do Plan Provincia Comunitaria 2026, unha liña de axudas impulsada pola Deputación de Pontevedra destinada a financiar investimentos que contribúan á mellora das infraestruturas, dos equipamentos e dos locais sociais das entidades.

O prazo de presentación de solicitudes xa está aberto e remata o vindeiro 1 de abril de 2026, polo que se recomenda ás asociacións interesadas iniciar canto antes a preparación da documentación necesaria para concorrer á convocatoria.

As subvencións poden cubrir ata o 100 % do investimento presentado, cun importe mínimo de 6.000 euros e un máximo de 10.000 euros por entidade beneficiaria, o que supón unha oportunidade destacada para levar a cabo actuacións sen necesidade de achega económica propia.

A convocatoria está dirixida a asociacións de veciños, federacións, confederacións ou unións de asociacións veciñais, así como a asociacións de mulleres rurais, sempre que estean legalmente constituídas e debidamente inscritas no Rexistro de Asociacións da Comunidade Autónoma de Galicia.

As axudas están destinadas exclusivamente a investimentos, incluíndo actuacións como obras de mellora de locais sociais, a mellora ou creación de infraestruturas, equipamentos e espazos destinados á actividade da entidade, así como a adquisición de mobiliario e equipamento informático, audiovisual ou específico para o desenvolvemento das súas actividades. Tamén son subvencionables determinados gastos vinculados á tramitación da subvención, ás taxas e licenzas necesarias e aos traballos previos de desbroce ou limpeza cando formen parte dunha obra.

As actuacións deberán realizarse integramente na provincia de Pontevedra e será requisito indispensable que a entidade solicitante sexa titular ou conte cun dereito de uso mínimo de cinco anos sobre os inmobles ou terreos nos que se vaian executar os investimentos.

O alcalde do Porriño, Alejandro Lorenzo, destaca a importancia desta convocatoria para o tecido asociativo local e animou ás entidades do municipio a presentar as súas solicitudes. “Estas axudas son unha oportunidade moi importante para que as asociacións poidan mellorar os seus locais, renovar equipamentos e poñer en marcha investimentos que repercuten directamente na calidade de vida da veciñanza. Desde o Concello queremos que todas as entidades coñezan esta convocatoria e a aproveiten”, sinalou o rexedor.

Lorenzo subliñou tamén o papel fundamental que desenvolven as asociacións no ámbito social e comunitario do Porriño a as súas parroquias e barrios, e insistiu na necesidade de difundir amplamente esta liña de subvencións para que chegue ao maior número posible de colectivos.

Cada entidade poderá presentar unha única solicitude, que deberá tramitarse exclusivamente por vía electrónica, achegando o acordo do órgano competente da entidade e o resto da documentación esixida nas bases da convocatoria, incluíndo a memoria ou proxecto técnico cando resulte necesario.

Desde o Concello do Porriño anímase ás asociacións veciñais e entidades sociais do municipio a aproveitar esta oportunidade de financiamento, que contribúe á mellora dos seus espazos e recursos e ao fortalecemento do tecido asociativo local.

A data límite para a presentación de solicitudes é o 1 de abril de 2026.

12/01/2026 in Benestar, Parroquias, Política Social

O alcalde do Porriño presenta o balance de 2025: “Un ano histórico de saneamento, crecemento económico e investimento en calidade de vida”

  • Un concello saneado e uns Orzamentos 2026 pensados para reforzar a capacidade de investimento
  • Novo complexo deportivo, escolas infantís e ampliación do entorno do auditorio entre os proxectos clave

O Porriño, 29 de ecembro de 2025.- O alcalde do Porriño, Alejandro Lorenzo, presentou hoxe o balance do ano 2025 nun almorzo informativo cos medios de comunicación, no que destacou un exercicio “histórico, marcado polo saneamento das contas municipais, o dinamismo económico e unha clara aposta por mellorar a calidade de vida da veciñanza”.

Un concello saneado e unha xestión económica rigorosa

Un dos principais fitos do ano foi a consolidación da situación económica e financeira do Concello. Lorenzo explicou que 2025 supuxo un punto de inflexión ao acadarse, por primeira vez, saldo cero na conta 413, correspondente ás facturas pendentes de pagamento por gastos realizados fóra de orzamento ou sen contrato algún, xa que as únicas existentes eran de gobernos anteriores.

Neste proceso de saneamento económico, o Concello partía dunha débeda acumulada de 5.496.979,19 euros en decembro de 2021, que se reduciu ata un saldo de 33.680,97 euros a finais de 2024, quedando totalmente liquidada ao longo de 2025. Este resultado foi posible grazas a unha revisión individualizada de centos de facturas, que permitiu a devolución de máis de 2 millóns de euros en facturas irregulares, duplicadas ou sen contrato, así como a obtención de sentenzas xudiciais favorables que evitaron pagamentos indebidos por importe de 853.648,86 euros.

Na actualidade, a única débeda vixente do Concello corresponde a un préstamo estatal por un importe aproximado de 3 millóns de euros  destinado ao pagamento de facturas herdadas anteriores a 2022.

Neste contexto, o alcalde avanzou que o Concello está a traballar na elaboración dos Orzamentos Municipais de 2026, unhas contas especialmente relevantes ao elaborarse nun escenario de estabilidade financeira tras o proceso de saneamento. Lorenzo explicou que o actual préstamo procedente do Mecanismo de Pago a Proveedores (MPP) está a limitar a capacidade de investimento municipal, polo que o Goberno local estuda distintas opcións financeiras para reforzar a marxe de actuación económica do Concello e afrontar os vindeiros exercicios con maior axilidade, sempre desde a prudencia e o rigor económico.

Crecemento económico e actividade empresarial

No ámbito económico, o alcalde puxo en valor o peso do Porriño como un dos concellos con maior actividade de Galicia, cun PIB superior aos 1.240 millóns de euros, un crecemento anual do 6,6 % e unha industria que representa máis do 50 % da riqueza xerada. “Estes datos reflicten un Porriño dinámico, con máis de 2.200 empresas, emprego e capacidade para atraer investimento”, sinalou Lorenzo.

Vivenda, urbanismo e transformación das parroquias e barrios

En materia de vivenda, o rexedor destacou o avance do proxecto para a construción de 300 novas vivendas, das cales o 80 % serán protexidas, en colaboración coa Xunta de Galicia, e outras 40 a maiores a través da cesión dunha parcela municipal. A actividade urbanística mantívose tamén nun nivel elevado ao longo de 2025, cun incremento superior ao 10 % no número de licenzas respecto de exercicios anteriores.

Neste contexto, Lorenzo salientou a rexeneración integral de Torneiros, cun investimento próximo aos 2,75 millóns de euros, que permitirá mellorar servizos, accesibilidade, espazos públicos e zonas verdes, transformando de maneira significativa este ámbito do municipio.

Saneamento, servizos e cohesión social

Outro dos eixos fundamentais do balance foi o saneamento, cun investimento acumulado desde 2022 de case 5 millóns de euros e coa creación este ano dunha Concellería específica de Saneamento. “O saneamento deixou de ser unha actuación puntual para converterse nunha política estruturada, con planificación, recursos e atención directa ás parroquias”, afirmou o alcalde.

Lorenzo explicou que, partindo dos máis de 16 millóns de euros inicialmente necesarios, e tendo en conta a actualización de prezos, o xa executado, o que se está a realizar e o pendente de licitar, a inversión que resta para acadar o 100 % do saneamento elévase a 11.899.632,68 euros. Para facer fronte a este reto, o Concello prevé solicitar unha operación de crédito específica que permita completar os investimentos pendentes, traballando tamén en axudas doutras administracións.

“Este goberno local ten claro que o acceso a un saneamento digno é un dereito fundamental, non unha opción. Por iso, investiranse eses case 12 millóns de euros que aínda son necesarios para completar a cobertura en todas as parroquias”, subliñou o rexedor.

No ámbito social, o alcalde destacou o apoio ao tecido asociativo do Porriño, con colaboracións coas asociacións culturais e veciñais, comisións de festas, ANPAS, clubs deportivos, así como co comercio local e a hostalaría. Neste sentido, precisou que o Concello colabora economicamente con todas estas asociacións mediante achegas nominativas anuais que superan os 500.000 euros, garantindo a continuidade e calidade das actividades en cada parroquia.

Emprego e formación

Durante 2025, os programas municipais de emprego e formación permitiron que 384 persoas accederan a polo menos un contrato laboral, incluíndo 92 contratacións directas municipais. Ademais, impartíronse 7.150 horas de formación, realizáronse 1.773 sesións de orientación laboral e acadouse unha taxa de inserción laboral do 82 % no Programa Integrado de Emprego. A Bolsa de Emprego Municipal conta actualmente con 7.130 persoas inscritas, consolidándose como unha ferramenta clave para a intermediación laboral.

Poboación e educación

O balance demográfico confirma unha tendencia positiva: o Porriño pasou de 16.997 habitantes en 2005 a 20.995 en 2024, segundo o Padrón Municipal, cunha poboación composta por un 51 % de mulleres e un 49 % de homes. Ao longo de 2025, rexistráronse 115 nacementos no municipio. “Medrar en poboación e manter datos positivos de natalidade é un reflexo de que o Porriño ofrece oportunidades, servizos e calidade de vida”, sinalou Lorenzo.

O alcalde destacou tamén a evolución da UNED do Porriño, que duplicou matrículas, ampliou a súa oferta académica e consolídase como referente comarcal.

Proxectos estratéxicos para 2026

De cara a 2026, Alejandro Lorenzo avanzou varios proxectos clave que permitirán seguir mellorando os servizos e os espazos públicos do municipio. Entre eles, destacou a apertura das escolas infantís de Budiño e Pontellas, un proxecto estratéxico para a conciliación das familias, e tamén o Centro de Día en Atios. 

No ámbito cultural e urbano, o alcalde anunciou a ampliación do entorno do futuro auditorio municipal, cun anfiteatro que contará cun espazo propio de cafetería e restaurante ao aire libre, configurando unha nova área de encontro, lecer e actividade cultural.

No eido deportivo, avanzou o desenvolvemento de novas pistas deportivas infantís e a creación dun novo complexo deportivo nun terreo municipal de arredor de 3.000 metros cadrados, a través dunha cesión dunha urbanización que se está a facer na rúa Antonio Palacios, que levará o nome do adestrador  do Celta porriñés Claudio Giráldez, pensado para o deporte base e a mocidade.

O alcalde concluíu sinalando tamén a importancia do apoio doutras administracións, destacando as axudas da Xunta de Galicia e da Deputación de Pontevedra, especialmente en materia de estradas autonómicas e provinciais, así como na execución de escolas infantís, que resultan fundamentais para facer realidade moitos dos proxectos desenvolvidos ao longo do ano.

“O balance de 2025 e os proxectos previstos para 2026 demostran que o Porriño avanza con paso firme, cun concello saneado, máis actividade económica e unha clara aposta polo futuro”, concluíu Lorenzo.

29/12/2025 in Alcaldía, Benestar, Emprego e formación, Industria, Infraestruturas, Mocidade, Parroquias, Sen categoría, Urbanismo, comercio e industria

O Concello do Porriño anima ás persoas maiores que viven soas a pasar unhas festas diferentes a través do “Xuntos polo Nadal”

 

  • A iniciativa, da Xunta de Galicia, vai dirixida a persoas de 60 anos ou máis e ten o prazo de inscrición aberto ata o 26 deste mes de novembro 
  • As persoas interesadas poden acudir ao Departamento de Servizos sociais do Concello onde recibirán información e axuda para formalizar a inscrición

O Porriño, 18 de novembro de 2025.- O Concello do Porriño informa de que a Xunta de Galicia abriu o prazo de inscrición no programa “Xuntos polo Nadal”, dirixido a persoas de 60 anos ou máis que viven soas e desexan pasar acompañadas as festas do Nadal. O período para presentar solicitudes permanecerá aberto ata o vindeiro 26 de novembro. 

O programa ofrece un total de 270 prazas, das que 130 corresponden á Residencia de Tempo Libre do Carballiño –para solicitantes das provincias de Pontevedra e Lugo– e 140 á Residencia de Panxón, en Nigrán -destinada ás persoas das provincias da Coruña e Ourense-. Esta iniciativa desenvolverase entre o 23 de decembro de 2025 e o 7 de xaneiro de 2026, establecéndose tres quendas entre as que só se poderá elixir unha: do 23 de decembro ao 7 de xaneiro (16 días), do 23 ao 30 de decembro (8 días) ou do 31 de decembro ao 7 de xaneiro (8 días). O programa inclúe aloxamento e manutención en réxime de pensión completa, transporte en autobús ás residencias e de regreso, así como actividades de animación sociocultural. 

Poderán participar aquelas persoas que teñan 60 anos ou máis, estean empadroadas en Galicia, vivan soas e non teñan con quen compartir estas datas, ademais de valerse por si mesmas. Terán prioridade na selección as persoas que perderan o seu cónxuxe ou persoa convivinte nos últimos dous anos, as de maior idade e aquelas que non participaran en edicións anteriores. 

As solicitudes presentaranse preferentemente por vía electrónica a través da Sede Electrónica da Xunta de Galicia, aínda que tamén se poderán entregar de maneira presencial no Concello. As persoas interesadas do Porriño que precisen apoio na tramitación poden dirixirse ao Departamento de Servizos Sociais do Concello, onde recibirán información e axuda para formalizar a inscrición.

 

18/11/2025 in Benestar, Servizos sociais

Volven ao Porriño as andainas saudables, sociais e deportivas

  • Concello organiza esta actividade para maiores de 65 anos todos os mércores e venres de outubro e novembro
  • As persoas interesadas xa poden inscribirse no rexistro municipal

O Porriño, 26 de setembro de 2025.- Tralo parón estival, a Concellería de Sanidade do Concello do Porriño retoma as andainas saudables, sociais e deportivas dirixidas a persoas maiores de 65 anos. Esta actividade, que tivo un gran éxito desde o seu inicio, volve co obxectivo de fomentar a actividade física e o envellecemento activo, ao mesmo tempo que contribúe a combater o illamento social que afecta a moitos dos nosos maiores.

“As andainas saudables son unha excelente oportunidade para que os participantes se manteñan activos e socialicen, evitando así o sedentarismo”, explica a concelleira Teresa Veloso. Durante o paseo, estarán acompañados en todo momento por persoal cualificado, garantindo así o seu benestar e seguridade.

Serán todos os mércores e venres ás 10.30 horas e arrancarán o vindeiro 1 de outubro, ata o 28 de novembro. Para participar é necesario inscribirse no rexistro do Concello do Porriño indicando os días que desexen asistir.

“Convidamos a todos os maiores a unirse a esta iniciativa que non só promove a saúde, senón que tamén crea un espazo de encontro”, indica o alcalde, Alejandro Lorenzo, que anima a “seguir camiñando xuntos cara un envellecemento activo”.

26/09/2025 in Benestar, Sanidade

O Concello do Porriño remata as obras de mellora nas galiñas azuis e no centro de día

  • O alcalde Alejandro Lorenzo e a concelleira de Política Social, Teresa Veloso, visitaron as instalacións para comprobar de primeira man que todo está a punto e funciona a pleno rendemento
  • As actuacións supuxeron unha inversión de preto de 80.000 euros financiados polo Consorcio Galego de Igualdade e Benestar

 O Porriño, 24 de setembro de 2025.- As obras de mellora acometidas nas dúas escolas infantís da rede Galiña Azul do Porriño e no centro de día de Torneiros xa están totalmente rematadas e os tres centros funcionan con total normalidade e a pleno rendemento. Así o comprobaron o alcalde Alejandro Lorenzo e a concelleira de Política Social, Teresa Veloso, nunha visita ás instalacións, destacando o bo estado no que se atopan os centros e a satisfacción das familias e usuarios, que acadan os 160, cos cambios acometidos. “Hoxe comprobamos o resultado dun traballo feito con responsabilidade e pensando no benestar das persoas. Agora contamos con centros máis seguros, eficientes e adaptados ás necesidades actuais. Seguiremos investindo para que os servizos públicos do Porriño estean sempre á altura da nosa veciñanza”, subliñou o alcalde.

Desde o Concello destacan que estas intervencións, que supuxeron unha inversión total de preto de 80.000 euros, financiados polo Consorcio Galego de Igualdade e Benestar forman parte dun plan de mellora continua das infraestruturas públicas, especialmente aquelas que atenden á infancia e ás persoas maiores. “Sabemos que o benestar das familias do Porriño comeza por contar con centros públicos de calidade. Esta é unha prioridade do noso goberno, e así vai seguir sendo”, puntualizou a concelleira.

A visita desta mañá concentrouse na parroquia de Torneiros, onde se localizan o centro de día e unha das escolas infantís. Nesta última, executouse a maior das obras, cun orzamento de 47.790 euros, consistente na substitución da cuberta, deteriorada por un problema continuo de filtracións, e instalación dun equipo de climatizacións. Pola súa banda, no centro de día, co fin de mellorar a seguridade, accesibilidade e funcionalidade do recinto, instalouse un novo peche perimetral, que supón unha inversión de 26.250 euros. No caso da Galiña Azul de Doantes de Sangue, no casco urbano, levouse a cabo a impermeabilización das fachadas e reparación interior dos danos causados polas humidades e filtración de auga; uns traballos valorados en preto de 5.000 euros.

A maiores destas obras realizáronse outras menores de mantemento das instalacións e mobiliario, co fin de garantir o bo estado das infraestruturas e ofrecer un entorno máis adecuado e acolledor para os 160 usuarios destes tres centros. Estas actuacións incluíron reparacións eléctricas e de fontanería, revisión e axuste de peches interiores, reposición de mobiliario danado e labores de pintura en distintas estancias.

24/09/2025 in Benestar, Política Social

Instagramers e tiktokers aos 80 no Porriño

 

  • Veciños maiores de 65 anos aprenden a concertar citas médicas, realizar compras e crear perfís nas redes sociais a través do seu teléfono móbil
  • O alcalde Alejandro Lorenzo e a concelleira de Política Social, Teresa Veloso, estiveron na última sesión do obradoiro dixital do que participou unha quincena de veciños de entre 65 e 80 anos

O Porriño, 30 de agosto de 2025.- Concertar cita co seu médico de cabeceira, consultar a predición meteorolóxica, reservar para visitar a praia das Catedrais e mesmo crear os seus propios perfís nas redes sociais son algunhas das accións que aprenderon un grupo de persoas maiores de 65 anos participantes nun obradoiro dixital que se celebrou no Centro Sociocomunitario do Porriño. O alcalde Alejandro Lorenzo e a concelleira de Política Social, Teresa Veloso, coincidiron co propio alumnado en que foi unha experiencia enriquecedora e moi produtiva para o día a día deste sector da poboación, que naceu fóra da era dixital e que no Porriño supón case unha quinta parte do padrón, ao seren 4.002 as persoas maiores de 65 anos.

 “O mundo avanza e nós non podemos quedar atrás, renovarse ou morrer, como di o refrán”, sinalaba María, unha das quince persoas participantes con idades que chegan ata os 80 anos, como é o caso de Alberto e Fernanda que aseguran empregan o WhatsApp a diario e consideran “moi útil utilizar o móbil para realizar determinadas xestións evitando así desprazamentos e gañando tempo”. Todos dispoñen dun teléfono intelixente, co que seguiron moi detalladamente e con moita atención as indicacións da monitora ao longo de todo o obradoiro e é que “o que non avanza, retrocede”, subliñan. “Este curso foi unha verdadeira revelación para min. Sempre oíra falar de WhatsApp e das redes sociais, e pensei que era cousa dos mozos, pero logo de aprender a usalas vexo que non é tan complicado e son moi útiles”, explicaba Josefa.

Estas reflexións mostran como, ao principio, pode haber resistencia ou medo, pero logo da formación, a sensación de seguridade increméntase. A relación coa tecnoloxía xa non é exclusiva da xente máis nova, senón que as persoas maiores tamén están empezando a usala de xeito práctico e significativo. “A realización destes obradoiros resulta esencial para asegurar que as persoas maiores teñan acceso ás novas tecnoloxías. Non podemos permitir que queden excluídas nun mundo que cada vez está máis baseado na dixitalización. É un verdadeiro pracer ver o interese e a implicación que están demostrando os nosos maiores neste tipo de actividades”, sinala o alcalde.

O obradoiro, organizado por Cruz Vermella en colaboración co Concello do Porriño, desenvolveuse en sesións semanais durante os meses de xullo e agosto, e dado a boa acollida e a demanda do propio alumnado de continuar aprendendo nesta materia, xa valoran próximas edicións pero centradas, desta vez, no manexo dun ordenador. Nesta ocasión traballaron co teléfono móbil, adquirindo unha formación básica do seu manexo para navegar en internet, xestión de aplicacións, redes sociais e compras seguras.

A concelleira Teresa Veloso sinalou que “os resultados foron moi positivos, o que demostra que iniciativas como estas son necesarias para que ninguén quede atrás nun mundo cada vez máis tecnolóxico. Superar o medo ás novas aplicacións e poder realizar diversas xestións desde o teléfono móbil de cadaquén debe ser algo accesible para toda a poboación, loitando contra o edadismo”.

A realización de obradoiros dixitais para persoas maiores como este non só contribúe a mellorar a súa inclusión e autonomía na sociedade actual, senón que tamén fortalece a súa autoestima e benestar ao permitirlles adaptarse ás novas tecnoloxías. A boa acollida e a demanda de continuar aprendendo son sinais de que este tipo de iniciativas son fundamentais para que ninguén, sen importar a súa idade, quede atrás e todos poidan acceder aos beneficios do mundo dixital.

 

 

30/08/2025 in Benestar, Política Social

A veciñanza do Porriño aprende a salvar vidas

  • O Concello organizou unha nova sesión práctica de RCP da que que participaron máis de 40 persoas
  • A boa acollida da actividade fai que se programe outra nas vindeiras datas

O Porriño, 18 de agosto de 2025.– Co obxectivo de capacitar á cidadanía e mellorar a súa capacidade de resposta en situacións de emerxencia, o Concello do Porriño organizou esta tarde unha sesión práctica de reanimación cardiopulmonar (RCP) aberta a toda a veciñanza.

Foron máis de 40 persoas as que amosaron o seu interese por participar desta actividade que, trala gran acollida, volverase a repetir e así o amosou a concelleira de Sanidade, Teresa Veloso, asistente tamén á sesión celebrada na sala de usos múltiples do polideportivo municipal. “Completouse a cota prevista de participación, foi un éxito total, por iso repetirase en vindeiras datas”, sinalou a edil quen agradeceu tamén aos profesionais do sistema sanitario pola clase impartida. Estes achegaron os coñecementos clave, tanto teóricos como prácticos, para actuar con seguridade ante situacións de risco vital, como é o caso dunha parada cardiorrespiratoria.

O alcalde Alejandro Lorenzo indica que “estamos comprometidos co benestar da nosa xente, e actividades como esta de reanimación cardiopulmonar son unha mostra de que, ademais de atender as necesidades sanitarias, tamén debemos formar a nosa veciñanza para que poidan actuar con seguridade e eficacia en momentos de emerxencia. A gran acollida desta sesión demostra o interese da cidadanía por mellorar a súa preparación e, por iso, seguimos apostando por este tipo de formacións que contribúen á prevención e á saúde comunitaria”.

Esta actividade enmárcase dentro da estratexia do Concello en prevención, saúde comunitaria e formación cidadá, consolidando a imaxe dun Porriño preparado e comprometido co benestar da súa xente.

18/08/2025 in Benestar, Sanidade

O Concello do Porriño organiza unha nova sesión formativa en RCP para toda a veciñanza

  • A actividade terá lugar o luns 18 de agosto e as persoas interesadas poden anotarse ata o xoves no Rexistro

O Porriño, 11 de agosto de 2025.– O Concello do Porriño continúa coa súa aposta pola formación en emerxencias sanitarias e convoca unha nova sesión práctica de Reanimación Cardiopulmonar (RCP), aberta a toda a veciñanza e de carácter gratuíto.

A actividade, que ten o obxectivo de mellorar a capacidade de resposta cidadá ante situacións de emerxencia sanitaria, celebrarase o luns 18 de agosto, de 18:00 a 20:00 horas, na sala de usos múltiples do Pavillón Municipal 1, e estará dirixida a persoas de todas as idades. A formación será impartida por profesionais do sistema sanitario, que achegarán coñecementos clave para actuar con seguridade ante situacións de risco vital, como unha parada cardiorrespiratoria.

As persoas interesadas poderán anotarse ata o xoves 14 de agosto no Rexistro Xeral do Concello.

O alcalde do Porriño, Alejandro Lorenzo, destacou a importancia desta iniciativa como parte da política municipal en materia de saúde e seguridade: “Formarse en RCP é unha ferramenta clave que pode marcar a diferenza entre salvar ou non unha vida. Quero que os nosos veciños e veciñas estean preparados e preparadas, porque cada minuto conta nunha emerxencia. Este tipo de accións reflicten o noso compromiso cun Porriño máis seguro e máis humano. Seguiremos apostando por este tipo de formacións, como vimos facendo dende hai tempo, porque salvar unha soa vida xa é un éxito total e absoluto.”

Esta actividade enmárcase dentro da estratexia do Concello en prevención, saúde comunitaria e formación cidadá, consolidando a imaxe dun Porriño preparado e comprometido co benestar da súa xente.

11/08/2025 in Benestar, Sanidade

O Concello do Porriño anima á veciñanza a participar na campaña de doazón de sangue desta fin de semana

 

 O Porriño, 31 de xullo de 2025.- O Concello do Porriño informa da presenza esta fin de semana no municipio da unidade móbil da Axencia de Doazón, Órganos e Sangue (ADOS), que estará operativa para facilitar a doazón de sangue á cidadanía.

A unidade móbil instalarase na Avenida Domingo Bueno, ao carón do Centro Cultural, e funcionará nos seguintes horarios:

  • Venres, 1 de agosto: de 10:00 a 14:30h e de 15:30 a 21:00h

  • Sábado, 2 de agosto: de 10:00 a 15:00h

Desde o Concello facemos un chamamento á solidariedade da veciñanza, lembrando que cada doazón pode salvar ata tres vidas. A colaboración cidadá é especialmente importante durante os meses de verán, cando as reservas de sangue adoitan baixar.

O Concello do Porriño agradece de antemán a participación e compromiso da veciñanza nesta campaña tan necesaria.

31/07/2025 in Benestar, Sanidade

O Concello do Porriño porá en marcha cursos gratuítos de reanimación cardiopulmonar (RCP) abertos á veciñanza

O Porriño, 29 de xullo de 2025.– O Concello do Porriño porá en marcha nas vindeiras semanas unha serie de cursos de formación en Reanimación Cardiopulmonar (RCP) dirixidos á veciñanza, co obxectivo de mellorar a capacidade de resposta cidadá ante situacións de emerxencia sanitaria.

As sesións serán de balde e estarán impartidas por profesionais do sistema de saúde. Esta iniciativa permitirá que as persoas asistentes adquiran coñecementos básicos en RCP, que poden resultar fundamentais á hora de actuar ante unha parada cardiorrespiratoria, ou outra situación de risco vital, e supor a diferenza entre a vida e a morte. 

O alcalde do Porriño, Alejandro Lorenzo, salienta a importancia desta acción formativa no marco dun compromiso municipal continuado coa seguridade e a saúde pública: “As propias asociacións culturais, os clubs deportivos e mesmo as instalacións municipais repartidas polas distintas parroquias do noso concello están a ser dotadas de mochilas de reanimación específicas para actuar ante emerxencias. Seguiremos apostando por esta formación, algo que xa fixemos en moitas ocasións, porque somos conscientes de que pode salvar vidas. O feito de salvar unha soa vida é para nós un éxito total e absoluto.

As datas e localizacións dos cursos comunicaranse próximamente a través dos canais oficiais. A participación está aberta a toda a veciñanza interesada. O Concello está a analizar a demanda por parte de colectivos interesados, así como a dispoñibilidade de espazos e técnicos cualificados para garantir o éxito da actividade.

Esta nova acción forma parte da liña de actuación do Concello en materia de prevención, saúde comunitaria e formación cidadá, consolidando O Porriño como un concello preparado e comprometido coa vida. 

29/07/2025 in Benestar, Sanidade