Alcaldía

Ana Abad de Larriva presentou “A nunca vista”, Premio Abrente de Textos Teatrais da MIT

O Centro Cultural Municipal acolleu onte a presentación e coloquio arredor do libro “A nunca vista”, de Ana Abad de Larriva, texto gañador do Premio Abrente de Textos Teatrais da Mostra Internacional de Teatro, MIT, de Ribadavia, en 2022, publicado pola editorial Difusora de Letras, Artes e Ideas.

Foi un encontro e diálogo aberto entre as persoas asistentes onde se profundizou sobre a obra, que aborda o problema relacionado co peche familiar de persoas con diversidades ou fóra do canon estético social imposto. Unha temática moi conectada coa antropoloxía cultural galega e dun gran poder emocional.

A autora amosouse moi contenta de presentar o libro no Porriño. “Para min é como unha segunda casa”, explicou Ana que dende hai anos coordina o Club de Lectura da Biblioteca, “Aquí presentei o meu primeiro libro, A sombra das árbores, que resultou gañador do Premio Roberto Vidal Bolaño de Textos Teatrais convocado polo IES Ribeira do Louro, o Concello do Porriño e a editorial Galaxia, e por iso quería tamén presentar aquí esta obra”.

No acto, que presentou o alcalde, Alejandro Lorenzo, interviron tamén Roberto Pascual, director artístico da MIT e dramaturgo, e a porriñesa Irene Moreira, directora escena.

“Ana é unha persoa que vive no teatro e ama profundamente o teatro” destacou Pascual, incidindo en que “o teatro é o grande muro contra o odio, é cohexión e respecto á diversidade e as diferencias”. O director artístico da MIT de Ribadavia tivo tamén palabras para o Premio Vidal Bolaño. “Tedes no Porriño un certame teatral único en Galicia, adicado a un público que moitas veces está na marxe, a mocidade”, explicou.

Pola súa banda, Irene Moreira centrou a súa intervención na obra mesma e deu paso ao coloquio, explicando que “A Nunca vista está centrada nun feito real que non queremos ver moitas veces, pero seguro se da no noso entorno” e incidindo no necesario de abordar estas cuestións. Ademais, adiantou que están a plantexar xa a posta en escena do texto.

O rexedor, que tamén participou do coloquio, agradeceu a Ana que “elexira O Porriño para presentar tamén a súa obra, xa que é unha persoa moi apreciada na vila polo seu traballo de coordinadora do club de lectura, unha actividade de promoción da lectura que pensó que é das máis atractivas  e demandadas. E iso é grazas a Ana, porque cando alguén ama e sinte de verdade algo ten unha inmensa capacidade para trasmitilo aos demais”.

Sobre a autora

Ana Abad de Larriva é escritora e actriz, ademais de exercer nos últimos anos como coordinadora do club de lectura da Biblioteca Municipal do Porriño. Cultiva diferentes xéneros literarios e dedícase especialmente á dramaturxia e á poesía, ademais de crear as súas propias pezas escénicas. Ademais do Premio Abrente por “A nunca vista”, obtivo outros recoñecementos, como o Premio Roberto Vidal Bolaño de Textos Teatrais, ,convocado polo IES Ribeira do Louro, o Concello do Porriño e a Editorial Galaxia, por “A sombra das árbores”, en 2019; o Premio de Microteatro da Memoria, da Deputación de Pontevedra e a ESAD de Galicia, por “Un biolo na noite”, en 2021; ou a bolsa de dramaturxia do Centro Dramático Galego por “Bailar no ceo”, en 2022.

08/06/2023 in Alcaldía, Cultura e festas

O Porriño prepárase para celebrar un San Xoán seguro

O Porriño xa está preparado para celebrar a noite de San Xoán. O alcalde, Alejandro Lorenzo, vén de emitir un bando municipal regulando as normas para a realización das tradicionais cacharelas e sardiñadas en espazos públicos.

En primeiro lugar, deberán realizarse en lugares despexados que disten un mínimo de 15 m ás edificacións e árbores. Ademais, o diámetro máximo da zona de combustión da fogueira será de 4 metros de ancho cunha altura máxima de 2 metros.

En segundo lugar, os asistentes non poderán concentrarse a unha distancia inferior á do ancho da fogueira.

Os materiais a empregar serán leñas, polas, toros de árbores e vellos materiais de madeira, xa que está prohibida a queima de neumáticos, plásticos e aceites, entre outros, en xeral calquera substancia que ao arder desprenda fume tóxico.  Tamén quedan prohibidas as cacharelas baixo tendidos eléctricos, telefónicos, etc…

A fogueira deberá permanecer vixiada polos solicitantes ata a súa completa extinción.

As solicitudes para autorizar as cacharelas deben presentarse no Rexistro Xeral do Concello ou a través da sede electrónica antes das 23 h do día 16 de xuño.

 

08/06/2023 in Alcaldía, Cultura e festas

A conciencia social da mocidade porriñesa coa doazón e transplante de órganos deixouse sentir en Santiago de Compostela

Hoxe inaugurouse en Santiago de Compostela a exposición “Fai que suba a marea. Doa”, un traballo levado a cabo polo alumnado do IES Ribeira do Louro dentro do programa “Salvavidas” da Coordinación Autonómica de Transplantes da Axencia de Doazón de Órganos e Sangue (ADOS) e que poderá visitarse na planta baixa das dependencias dos edificios administrativos de San Lázaro.

Este acto tivo lugar dentro dos actos de conmemoración do Día Nacional do Doante de Órganos e Tecidos. Así, este proxecto multidisciplinar, desenvolvido polos alumnos e alumnas do IES porriñés e coordinado pola docente María José Iglesias, é unha actividade do programa “Salvavidas”, inserido no Plan Proxecta, que posibilita que entidades alleas ao sistema educativo, neste caso a Coordinación Autonómica de Transplantes ADOS, desenvolvan proxectos de diversa índole como sucede coa sensibilización a prol da doazón e transplante de órganos.

A exposición “Fai que suba a marea” recolle esculturas de escaiola de mans que amosan a súa disposición á doazón de órganos e tecidos, conformando unha marea como representación deste acto solidario. Entre as mans realizadas, podemos atopar as do Presidente da Xunta de Galicia, Alfonso Rueda, así como dos conselleiros de Sanidade e Educación, o alcalde do Porriño, Alejandro Lorenzo, unha doante viva, Eva González, receptores de órganos como César Núñez o Abraham Vicente, o xerente do Sergas, e membros de asociacións de doantes, coordinadores hospitalarios de transplante, entre outros.

A presentación foi levada a cabo polos estudantes e contu coa presenza do director xeral de Asistencia Sanitaria, Jorge Aboal, o director Xeral de Xustiza, José Tronchoni, o director xeral de Centros e Recursos Humanos da Consellería de Cultura e Eduación, Jesús Álvarez. Así, ademais da faceta artística, a presentación completouse cunha breve intervención musical e a lectura dunha poesía de Raquel Castro, resultando especialmente salientable o compromiso solidario amosado polas alumnas e alumnos que participaron.

07/06/2023 in Alcaldía, Educación e tecnoloxía, Sanidade

Formalizada a doazón de terreos para a ampliación do centro cultural de Mosende

O alcalde, Alejandro Lorenzo, e o presidente da Asociación de Veciños de San Xurxo de Mosende, Ángel Lago, asinaron esta semana o convenio de doazón de terreos entre ambas entidades para a execución de obras de ampliación do Cento Cultural de Mosende e o acondicionamento da súa contorna.

En virtude do mesmo, o Concello comprométese á executar nun prazo de catro anos as obras que consistirán na construción dunha sala multiusos de aproximadamente 320 m2 destinados a sala de concertos ou celebración de eventos, un almacén para material de ensaio, para uso e disfrute da veciñanza da parroquia, así como o acondicionamento da súa contorna mediante a construción dun parque infantil e un aparcamento.

“As instalacións das que dispoñen na actualidade en Mosende son insuficientes para as necesidades que presenta a parroquia”, salientou o alcalde, Alejandro Lorenzo, “Coa ampliación do centro cultural atendemos unha antiga e xustificada demanda da veciñanza, proporcionando un espazo acaído para o desenvolvemento das actividades culturais e veciñais da parroquia, ademais de acondicionar a contorna para uso e disfrute de todas e todos”.

Lorenzo agradeceu a disposición da asociación de veciños a axilizar os trámites precisos para levar a cabo este proxecto e a doazón destes terreos da súa titularidade polo interese da veciñanza da parroquia.

05/06/2023 in Alcaldía, Urbanismo, comercio e industria

Lume, unha invitación a preguntarnos de onde nace a violencia

O Centro Cultural Municipal acolleu hoxe a presentación de Lume, a obra de José Luis Baños de Cos que resultou gañadora do certame de textos de teatro xuvenil Roberto Vidal Bolaño na súa quinta edición.
Acompañando ao autor estiveron o alcalde do Porriño, Alejandro Lorenzo, o director xeral da Editorial Galaxia, Francisco Castro, e a secretaria do xurado do premio, Raquel Castro, así como unha representación do equipo directivo do IES Ribeira do Louro, que xunto coa editorial e o Concello do Porriño impulsan este certame.
 
É a segunda vez que Baños se impón no Vidal Bolaño, pois xa no ano 2020 o fixo coa obra A cámara escura. Desta vez, o xurado decidiu por unanimidade outorgalle o premio por ser unha obra moi acaída pola temática e pola linguaxe empregada para a súa representación ou lectura nos centros de ensino secundario.
 
O autor mostrouse “moi contento de estar de novo no Porriño e agradeceu ao Concello do Porriño, á Editorial Galaxia e ao IES Ribeira do Louro que organicen este premio, que creo que é moi importante para o arraigo do teatro na xente nova. Por iso oxalá sexan moitas máis edicións” .
 
Sobre Lume destacou o valor social do texto, cuxa verdadeira protagonista é a violencia, cada máis presente na nosa sociedade, con múltiples formas, e en moitos casos, agochada tralo anonimato da masa grupal. “Hai temas que hai que tratar”, afirmou, sobre todo cando nos diriximos á mocidade e aproveitar ferramentas como o teatro non só para facer arte senón tamén para educar.
 
No mesmo sentido se manifestou Raquel Castro, que destacou que Lume está aliñado cos obxectivos deste premio “xa que un deles é achegar a actualidade social aos mozos e mozas e a violencia social está moi de actualidade”, lamentablemente. Salientou tamén que José Luis “manexa con destreza a linguaxe que o une ao público ao que se dirixe, como xa demostrou coa outra obra premiada A cámara escura”.
Francisco Castro destacou unha vez máis a relevancia deste premio, único na dramaturxia xuvenil, que xa se consolidou como un referente e agradeceu o respaldo do Concello do Porriño e a iniciativa do IES Ribeira do Louro.
 
Por último o alcalde, Alejandro Lorenzo, lembrou a importancia de obras como Lume “que achegan o valor do respecto aos mozos e mozas a través do teatro e crean conciencia”. Lorenzo reiterou o apoio do Concello do Porriño a este certame, cuxa sexta edición se atopa en marcha xa.
02/06/2023 in Alcaldía, Cultura e festas, Educación e tecnoloxía

Comezan as obras de humanización e mellora das rúas Buenos Aires e Progreso

O alcalde do Porriño, Alejandro Lorenzo, supervisou hoxe o inicio das obras de humanización e acondicionamento das rúas Buenos Aires e Progreso, acompañado polo concelleiro de Vías e Obras, Ramón Porto, técnicos do departamento autonómico de Infraestruturas e da empresa adxudicataria.

Os traballos, que contemplan a reforma integral da PO-329 ao seu paso polo centro urbano transformándoa nunha rúa na que os coches ceden protagonismo aos peóns, deron comezo hoxe e teñen un prazo máximo de execución de 5 meses.

“Con esta actuación daremos vida a unha zona do centro urbano que precisa dinamizarse e acondicionaremos un dos principais accesos á vila, reforzando a seguridade peonil, mellorando a accesibilidade e a estética e favorecendo a integración urbana, ademais de retirar o paso de vehículos pesados da zona”, explicou o alcalde.

Os traballos comprenden a intervención nun treito de case 700 metros desta vía, na que se reforzará a seguridade a pé dos vecinos, ademáis de mellorar a accesibilidade e tamén o aspecto estético deste treito da vía, favorecendo a súa mellor integración urbana. En concreto, os traballos consistirán na execución de beirarrúas máis anchas, para o que se reducirá un pouco a anchura dos carrís de circulación na reordenación das zonas de aparcadoiro en todo o treito de actuación, na renovación dos pavimentos, tanto das beirarrúas como dos aparcadoiros; e na rehabilitación da calzada. Completarase a actuación coa dotación de mobiliario urbano: dispoñeranse bancos, papeleiras, xardineiras e árbores; ademáis de mellorar a iluminación con 22 novos puntos de luz e con 12 reforzos luminosos nos pasos peonís, para garantir unha maior seguridade.

Os traballos proxectados polo departamento de Infraestruturas da Xunta dividiranse en cinco treitos, en función das necesidades de actuación detectadas en cada un deles. NO primeiro tramo, entre as dúas interseccións coa rúa dos Muíños, que chega ao comezo do peche protexe as vías dotren, aumentarase o ancho da beirarrúa, reducíndose os carrís e deixando as prazas de aparcadoiro na marxe dereita. No segundo treito, desde o comezo do peche de Adif ata o paso a nivel, reordenarase a sección actual da calzada para aumentar o ancho das beirarrúas, manténdose tamén aquí os aparcadoiros na marxe dereita.

O tramo tres vai desde o paso a nivel ata o cruce coa rúa Ponte do Valo, onde se proxecta nunha plataforma compartida a nivel, de sentido único de circulación desde o mesmo paso a nivel ata a rúa Avelino Villasuso. No cuarto treito, que descorre cruzando o río Louro e pasa baixo a autovía A-55, vaise mellorar a seguridade peonil, colocando pasos elevados e adaptándose á normativa de accesibilidade. E no quinto treito, que acaba na glorieta da PO-331, reordenarase a calzada para gañar espazo para os peóns

02/06/2023 in Alcaldía, Vías e obras

A Vida nun Click, gardando as lembranzas das persoas con alzhéimer

O centro cultural acolleu onte a proxección dos traballos de “A Vida nun Click” , a actividade interxeracional que levou a cabo o alumnado do IES Pino Manso e as persoas usuarias da Unidade Asistencial de Día de Afaga no Porriño.

O obxectivo desta actividade era escoitar as historias de vida dos maiores e recollelas nun soporte dixital de imaxe, texto e audio. En resumo, crear uns documentos de vida e axudar a que maiores e mozos se coñezan e valoren.

Despois de dous meses e cinco encontros nos que se apostou por conectar a curiosidade do alumnado coa xenerosidade e experiencia dos maiores, onte proxectáronse os vídeos.

Samu traballou con Dorinda, Paula con Lidia, Nash con Fita, Eloy con Carmen, Raúl con Mari Paz, Nabor con Rosa, Iago con María, Nerea e Sara con Fina, Iker con Naty, Isma con Manolo, Yoel con Pepe, Raúl con Cholo e Bryan con Esperanza. Onte disfrutaron xuntos do traballo.

O alcalde, Alejandro Lorenzo, quixo poñer en valor esta iniciativa “xa que traballando da man, implicando a todas as xeracións, será como consigamos avanzar e concienciar sobre esta enfermidade”. Lorenzo destacou que “moitas veces é complicado explicar aos mozos e mozas o que lle está a acontecer ao seu avó ou avoa, incluso aos maiores nos costa entendelo, e non se me ocorre mellor maneira de explicalo que que sexan eles mesmos quen o faga, os que conten o que sinten e o que lles está a pasar. Ademais, gardamos as súas historias. Nin o tempo poderá borrar xa estas lembranzas e por iso o valor deste traballo é incalculable”.

31/05/2023 in Alcaldía, Benestar

O Porriño proxecta a construción dun Refuxio Municipal de Protección Animal

O Concello do Porriño vén de iniciar o proceso para a creación dun refuxio de protección animal municipal. O executivo, que preside Alejandro Lorenzo, formalizou o contrato para a redacción do anteproxecto -cun orzamento de 17.545 euros- de construción dun refuxio municipal de acollida de animais como alternativa ao actual sistema de recollida, que terá como fin recoller, coidar e xestionar as adopcións responsables de cans e gatos. Todo baixo o principio de sacrificio cero.

As instalacións construiránse nunha parcela municipal ubicada no Polígono de A Granxa de preto de 3.500 m2 que, tras as reunións mantidas con asociacións de protección animal da zona para valorar e dar forma ao proxecto e tras ter o visto bo dos técnicos municipais, conta con todos os requisitos necesarios.

“Da man de protectoras, que teñen a experiencia necesaria, proxectamos un refuxio sostible, capaz de dar resposta ás necesidades do municipio e garantir o coidado dos animais que se recollan. Coidado tanto a nivel veterinario como a xestión da súa adopción e do tempo que pasen en acollida no centro”, explicou a concelleira, Antía Carrera, “Queremos un concello con sacrificio cero, que coide dos animais e lles procure calidade de vida e se algo tiña claro dende que me fixen cargo do departamento de Medio Ambiente é que O Porriño ten que contar cun refuxio de protección animal e mudar os sistemas de recollida”.

No mesmo sentido se manifestou o alcalde, Alejandro Lorenzo, que agradeceu á concelleira “o esforzo realizado para poñer en marcha este proxecto e facelo de maneira viable”. O rexedor incidiu en que o Refuxio de Protección Animal non só contará coas instalacións acaídas para a acollida e coidado, tamén cunha zona social onde se levarán a cabo actividades para a sensibilización sobre o abandono e a adopción animal”.

03/04/2023 in Alcaldía, Medio Ambiente

Porriño dá o primeiro paso para a creación dun gran parque á beira do río Louro

Unha nova inversión de 401.763,52 euros é o que vén de recibir o Concello do Porriño da man da Xunta de Galicia. Así, a conselleira de Medio Ambiente, Territorio e Vivenda, Ángeles Vázquez, e o alcalde porriñés, Alejandro Lorenzo, asinaron un convenio para a execución do proxecto de acondicionamento do viario asfaltado paralelo á vía do tren nas proximidades do Paseo do Louro, ou o que popularmente se coñece como “ruta do colesterol” transitado a diario por centos de veciños, pequenos e maiores, que empregan o lugar para pasear, correr ou andar en bicicleta.

O tramo sobre o que se acometerán os traballos é de quilómetro e medio (1.460 metros exactamente) que comprende dende Atios ata o paso soterrado peonil da vía do tren que da acceso ao casco urbano. O proxecto inclúe a instalación de alumeado público e a mellora do pavimento habilitando un carril ciclista bidireccional e outro para peóns, eliminando o tráfico rodado, que na actualidade xa é escaso ao ser unha estrada sen saída e que só conduce ás veigas; aínda que si se habilitaría unha zona de aparcamento de vehículos para facilitar o acceso da veciñanza de fóra que acuda ao lugar.

 “Esta actuación suporía unha primeira fase de transformar a contorna do río Louro, ao seu paso por Porriño, no pulmón da vila, unha gran área verde, con parques para pequenos e maiores, zona de paseo, bici e tamén unha superficie acondicionada para a celebración de eventos que poden ser dende grandes concertos, a modo de auditorio ao aire libre, ata incluso o oficio de vodas”, explica o alcalde. Para elo, a empresa Frigolouro xa ten cedido unha superficie importante e estanse a adquirir terreos de particulares para acondicionalos a tal fin.

O convenio asinado fai uns días na casa consistorial por parte da conselleira e do alcalde foi posible trala recepción de todos os permisos e informes sectoriais, que se demoraron meses imposibilitando que se formalizase antes o convenio. Unha vez aprobado o proxecto pola Xunta de Galicia procederase á súa licitación para o inicio dos traballos que estarán rematados neste mesmo ano 2023.

“Con esta actuación Porriño suma e sigue en zonas verdes e recreativas. Está en marcha o gran espazo en pleno casco urbano que une as rúas Antonio Palacios e Pío XII e tamén a remodelación integral do antigo Campo da Feira. Ademais temos proxectadas tamén áreas de lecer e adecuación de espazos públicos nas diferentes parroquias. Somos un pobo comercial e industrial si, pero tamén dispomos de áreas de lecer ás que a veciñanza pode acudir a desconectar, soa ou en grupo, con familia e amigos, tanto a cativada como a mocidade e os nosos maiores, un espazo de convivencia sen necesidade de saír da vila”, conclúe Lorenzo.

03/04/2023 in Alcaldía, Medio Ambiente, Parques e xardíns

O Porriño contará cunha área para autocaravanas

O Porriño contará cunha área de caravanas e autocaravanas en pleno centro urbano, un servizo que vén a sumarse aos que xa de por si ofrece o municipio.

O alcalde, Alejandro Lorenzo, acompañado polo presidente da Asociación de Autocaravanas de Galicia (Aga),  Manuel Fernández-Arruti, e o concelleiro de Vías e Obras, Ramón Porto, visitou esta mañá a parcela na que se habilitará o aparcamento para valorar de maneira conxunta as actuacións a realizar para a súa pronta posta en marcha.  

A zona que se acondicionará ocupará uns 200 m2 da parcela de Leandro Diz habilitada como aparcamento gratuíto e estará acondicionada con todos os servizos necesarios.

“O turismo de autocaravana tense consolidado como unha alternativa ás viaxes tradicionais. É unha modalidade en auxe que se caracteriza pola liberdade que ofrece, por iso hai tanta demanda e por iso moitos concellos de todo o país dispoñen xa dese servizo. O Porriño non vai quedar atrás”, explicou o alcalde, Alejandro Lorenzo.

15/03/2023 in Alcaldía, Turismo, Vías e obras