Alcaldía

Pouco máis de cinco meses dende que o Consorcio de Augas do Louro rebaixara o prezo polo baleirado de fosas sépticas e no Concello do Porriño, chega agora outra boa nova para a poboación dos concellos do Porriño, Mos, Salceda de Caselas e Tui. Trátase da supresión da taxa anual que ata entón debían aboar aqueles veciños que solicitaban este servizo de limpeza de pozos negros e fosas sépticas, e que ascendía a 46,80 euros.

O importe a pagar dende finais de agosto de 2022 reduciuse ata un 60%, pasando de 100 a 40 euros e agora a maiores, en 2023, suprimiuse esa cota anual. Isto fai que dun ano a outro calquera usuario que solicite o baleirado da fosa séptica aforre máis dun 70%, pagando tan só 40 euros (máis o IVE) en vez dos 146,80 euros que debía aboar anteriormente.

“Era inaudito que se estivese cobrando eses importes cando hai unha porcentaxe importante da poboación que non está conectada ao sistema de saneamento”, explica o presidente do Consorcio e alcalde do Porriño, Alejandro Lorenzo. “Nos catro concellos hai moitos proxectos pendentes de executar nesta materia e por tanto é un deber dar facilidades á veciñanza que non dispón deste servizo, facilidades tanto rebaixando os prezos como tamén á hora de realizar a solicitude, simplificando ao máximo todo o proceso”.

O presidente sinala como dato a destacar que o ano pasado, ata a modificación da Ordenanza Reguladora do prezo público pola prestación do servizo de limpeza de pozos negros e fosas sépticas, a finais de agosto, rexistráronse unha ducia de solicitudes, e dende a entrada vigor do novo importe executáronse xa 19 baleirados (11 no que restaba de 2022 e 8 no que vai de 2023). Ante estes datos, dende o Consorcio estiman que “a este ritmo, neste 2023 se realizarían ata 75 baleirados, o que se multiplicaría por 3 a cifra rexistrada no exercicio anterior” .

Con todo, destaca tamén que se detecta un descoñecemento do servizo e destas novas medidas entre a poboación, de aí o impulso que lle queren dar dende o Consorcio, para que chegue a toda a veciñanza, “que todos saiban da existencia deste servizo, do seu prezo, agora reducido, e tamén do procedemento a seguir para beneficiarse”.

Os pasos son sinxelos, “pero estamos traballando para que o sexa aínda máis e simplificar os trámites”. As persoas interesadas teñen que, tralo pago dos 40 euros na sucursal bancaria, cubrir un impreso de solicitude que deben entregar por rexistro en calquera das oficinas que o Consorcio dispón nos catro concellos.

Para máis información pódese chamar ao número de teléfono 900 810 103 ou escribir un correo electrónico ao enderezo contacto@consorciodolouro.es

As rondallas volven ser as protagonistas do Nadal porriñés. O vindeiro domingo 8 de xaneiro a vila do Louro acollerá o tradicional Encontro de Rondallas do Porriño, no que se darán cita dez agrupacións.

Participarán a Rondalla da Asociación de Veciños Galiñeiro de Vincios (Gondomar), a Rondalla Nosa Merced de Chaín (Gondomar), a Rondalla Santiago de Parada (Nigrán), a Asociación Club Rondalla Santiaguiño de Guizán (Mos), a Rondalla Círculo Cultural e Deportivo Santa Eulalia de Mos (Mos), Rondalla Círculo Recreativo e Cultural de Torroso (Mos), Rondalla Círculo Recreativo e Cultural de Herville (Mos), a Asociación Rondalla O Mosteiro de Pexegueiro (Tui) e as anfitrionas, a Rondalla da Asociación Recreativa Santa Eulalia de Atios  e a Asociación Cultural Musical Rondalla de Pontellas.

Será como cada ano no Pavillón Municipal e, no caso de que a choiva non o impida, estará precedido dun pasarrúas no que participarán todas as rondallas e que dará comezo ás 17 h. 

A entrada é libre e de balde ata completar aforo.  As portas do municipal abriranse ás 17:15 h. 

O Concello do Porriño vén de presentar á Xunta de Galicia o seu proxecto para a implantación do transporte urbano municipal incluído na Rede de Transporte Público de Galicia.

A proposta, que tivo unha boa acollida por parte da administración autonómica, inclúe varias liñas de autobuses que conectarán todas as parroquias do municipio e o centro urbano e darán servizo aos dous grandes polígonos industriais.  Estas estableceríanse grazas a un convenio entre o Concello do Porriño e a Consellería de Infraestruturas e Mobilidade, que xestiona as concesións do transporte público de toda Galicia.

“Os veciños e veciñas do Porriño, tanto das parroquias como do centro urbano, teñen que ter a posibilidade de moverse por todo o termo municipal facendo uso do transporte público”, afirmou o alcalde, Alejandro Lorenzo, “A proxecto co que traballamos xa coa Xunta de Galicia inclúe varias liñas que conectarán as parroquias co centro urbano e tamén dúas lanzadeiras que darán servizo aos polígonos de As Gándaras e A Granxa con catro frecuencias, algo de vital importancia e moi reclamado polas empresas e traballadores da zona industrial”.

O rexedor agradeceu a disposición da “Consellería de Infraestruturas e Mobilidade para facilitar a posta en marcha deste bus urbano á maior brevidade posible. É un servizo do que non dispoñemos e que precisamos dende hai tempo”.  

Beneficios para os usuarios e usuarios

Os usuarios e usuarias do bus urbano do Porriño beneficiaríanse de todas as vantaxes da Tarxeta da Mobilidade de Galicia, TMG, disfrutando de de descontos, bonificacións e transbordos gratuítos en todo o territorio galego.

Ademais, os menores de 21 anos poderán viaxar totalmente gratis ao estar incluídas as liñas municipais na Tarxeta Xente Nova.

O Concello do Porriño traballa xa na aplicación dunha serie de bonificacións específicas a maiores para a súa poboación.