Novas - Páxina 62 de 270

Gofre, Trece e Fox, mestres de empatía nas aulas do Porriño

Escolares do Porriño participan este mes nunha actividade nos obradoiros sobre educación en valores asistidos por cans de terapia organizados pola concellería de Educación a través da OMIX.

O obxectivo xeral desta actividade, na que participarán preto de 400 escolares de infantil e primaria e usuarios/as do centro de día de Aceesca, é trasladar os beneficios que achegan os animais ás contornas escolares, coa finalidade de traballar de forma transversal a educación en valores e o coidado responsable de mascotas, con obradoiros específicos orientados a este fin.

O alcalde, Alejandro Lorenzo, e a concelleira de Educación, Carolina González, acudiron hoxe á primeira quenda destes obradoiros no CEIP Xosé Fernández López, para compartir cos escolares e con Gofre, Trece e Fox, os tres cans participantes, esta experiencia de concienciación e mellora da convivencia.

“Nestes obradoiros abórdanse, entre outras cuestións, a educación en positivo, o acoso escolar e os contratempos derivados de problemas de conduta, empregando os cans como modelo”, explicou a edil, “Ademais, a metodoloxía é sempre activa, participativa, lúdica e integradora, conseguindo que os pequenos/as aprendan mentres se divirten”.

A actividade divídese en dúas partes. Unha primeira centrada na educación en valores que se levará a cabo en horario escolar, dirixida ao alumnado de educación infantil e primaria e na que participarán 322 nenos e nenas dos colexios CEIP Antonio Palacios, CEIP Atios, CEIP Cruz Budiño, CI Mosende, CEIP Ribeira, CEIP Xosé Fernández López, CPR Hermanos Quiroga e CPR Santo Tomás.

A segunda, uns obradoiros de educación asistida con cans de terapia que se desenvolverase cada martes dos meses de marzo, abril e maio e na que participarán ao redor de 50 alumnos/as NEAE e usuarios/as do centro de día de Aceesca.

“A empatía ten catro patas, isto é algo que todos sabemos”, concluíu o rexedor, “Os animais son os mellores mestres para traballar cos nenos e nenas valores como a solidariedade, o compañeirismo, o respecto, a aceptación das diferenzas, a integración, autoestima e a igualdade, así como os hábitos de hixiene e alimentación saudable. Proba disto é ver o seu entusiasmo e implicación, divírtense e aprenden”.

03/03/2022 in Educación e tecnoloxía, Mocidade

O Porriño reivindica a “Igualdade dende o berce”

O Porriño vólcase na conmemoración do Día Internacional da Muller cunha completa programación dirixida especialmente á infancia e á mocidade.

A proposta da concellería de Igualdade, que dirixe Carolina González, xira baixo o lema “Igualdade dende o berce” destacando a importancia de educar en valores como principal ferramenta para construír unha sociedade igualitaria. “As/os nenas/os de hoxe serán as/os adultas/os de mañá”, apuntou a concelleira, “Unha xeración educada sen distincións de xénero dende pequenas/os, conscientes da necesidade de alcanzar unha igualdade real e implicadas/os na reivindicación deste dereito darán forma a unha sociedade máis xusta e igualitaria”.

No mesmo sentido se manifestou o alcalde, Alejandro Lorenzo. “O cambio é necesario e a forma máis efectiva de avanzar cara el é a apostando pola educación”, apuntou o rexedor, “Para rematar coas desigualdades que todavía sofren moitas mulleres polo mero feito de selo en moitos ámbitos das súas vidas, é necesario que a mocidade medre no respecto e na igualdade, condicións esenciais para evitar comportamentos machistas futuros e alcalzar unha igualdade real efectiva”.

O alcalde e a concelleira presentaron hoxe a programación que propón unha semana de actividades culturais, divulgativas e lúdicas. Foi no CEIP Plurilingüe de Atios, onde se celebraba a primeira das accións: o obradoiro de RealKiddys sobre a hipersexualización e os micromachismos que se impartirá ao alumnado de 4º a 6º de primaria de todos os centros escolares da vila.

A actividade conmemorativa do Concello estenderase tamén aos institutos. Os alumnos de 1º de Bacharelato do IES Pino Manso e do IES Ribeira do Louro coñecerán o papel fundamental da muller na eliminación da discriminación por razón de sexo, no seu empoderamento e na creación dunha sociedade baleira de roles e estereotipos de xénero a través dun divertido “Scape room”.

A programación que comezou hoxe continúa o 6 de marzo co espectáculo infantil “Eu de maior non quero ser princesa” amenizado polo dúo As Maimiñas. Será ás 17h na praza Arquitecto Antonio Palacios.

A xornada reivindicativa do 8 de marzo arrancará na Praza de Abastos do Porriño cunha “Homenaxe ás peixeiras” no que participarán o alcalde do Porriño e a alcaldesa de Mos. Será ás 10 h.

Os actos trasladaranse á praza Arquitecto Antonio Palacios pola tarde. Ás 17 h comeza “Voces na rúa”. Unha actividade na que a cidadanía será a principal protagonista achegando os seus coñecementos, opinións e reflexións sobre a importancia da muller ao longo da historia, a súa presenza e o seu arduo traballo na consecución do recoñecemento dos seus dereitos en igualdade cos homes. Pechará a programación na praza a lectura do manifesto do 8M, ás 20:30h.

Ademais, o Concello do Porriño fará pública a súa Guía de linguaxe inclusiva a través das súas redes sociais e páxina web.

03/03/2022 in Igualdade

O pobo do Porriño con Ucrania

O Concello do Porriño comprométese co pobo ucraíno ante a crise humanitaria derivada da invasión das tropas rusas no seu territorio, e confirmou á Federación Galega de Municipios e Provincias, FEGAMP, que acollerá ata 20 persoas refuxiadas de Ucrania.

A resposta humanitaria do Concello inclúe, ademais de aloxamento, poñer ao dispor das persoas refuxiadas persoal especializado en psicoloxía, servizos xurídicos e traballo social.

Ademais, e ante a petición de varios particulares que xa ofreceron os seus domicilios para acoller a familias refuxiadas, desde o Concello informan de que todo aquel que queira sumarse ao ofrecemento se poña en contacto coa administración local que se encargará de xestionar a acollida.

Esta decisión comunicarase hoxe ao resto dos grupos da corporación na Xunta de Voceiros convocada para as 17:30 h na que se abordará a posibilidade de adoptar máis medidas en base a como se desenvolva o conflito.

“Queremos mostrar o noso respaldo ao pobo ucraíno e condear a inxustificable e brutal agresión por parte de Rusia”, afirmou o alcalde, “Nun momento coma este todas as administracións debemos estar á altura e contribuir na medida das nosas posiblidades”.

Do mesmo modo, en sinal de apoio a Ucrania, a súa bandeira lucirá na pantalla instalada na rúa Antonio Palacios.

03/03/2022 in Alcaldía

Contos de Entroido con Paula Carballeira

Este venres, ás 18:30 h, terá lugar na Biblioteca Municipal unha nova sesión de animación á lectura a cargo de Paula Carballeira, baixo o título “Un mes. Catro lúas. Unha sesión de contos”.

Trátase dunha actividade organizada pola Biblioteca Municipal, programada ao longo de varios meses (os primeiros venres des de xaneiro ata maio) coa intención de animar a ler empregando os contos como ferramenta.

Paula dedícase a contar. Vai polo mundo recollendo contos. Trae os contos que foi atopando, e vainos contando. Así, cada catro lúas, chega ao Porriño con contos novos. En xaneiro, foron contos de inverno. En marzo, serán contos de primavera, de poesía, de maxia. En abril, contos deses que inventaba H.C. Andersen en Dinamarca. En maio, contos de aquí, letras que coñecemos lugares misteriosos dos que non sabemos. E como non podía ser doutra forma, en febreiro, tocan contos de bromas, de disfraces, de Entroido.

03/03/2022 in Cultura e festas

Detectado un aumento de furtos de carteiras en días de mercado

A concellería de Seguridade Cidadá, que dirixe Abel Estévez, informou hoxe que se detectou un aumento significativo de furtos de carteiras os martes de mañá, coincidindo co mercado semanal. Nas últimas semanas notouse un repunte importante, chegando a denunciarse ata catro ou cinco furtos nalgunha xornada.

A Policía Local, en colaboración coa Garda Civil, traballan de forma coordinada para tratar identificar aos presuntos autores destes feitos e evitar que sigan producíndose estes actos delictivos no municipo.

Desde a concellería de Seguridade Cidadá chaman a tomar certas precaucións para non ser vítima dos carteiristas:

O lugar predilecto dos carteiristas son os espazos cheos de xente, nestes lugares somos vulnerables ao roubo, polo que é moi importante abrir os nosos ollos, ter as nosas pertenzas sempre ao noso alcance e non confiar o absolutamente ningún descoñecido que se achegue demasiado a nós con calquera pretexto.
Nunca saias de casa cun bolso que non pecha ben ou que permite o fácil acceso ás túas pertenzas. Estes son os favoritos dos carteiristas.
Se utilizas mochila, lévaa sempre no peito en lugar das costas, desta forma terás sempre a vista posta nas túas cousas mentres estás nos espazos onde es propenso ao roubo.
Se usas bolsos o mellor é levalos cruzados e ben agarrados a ti, desta forma evitas que alguén poida pasar correndo e arrincalo do teu ombreiro. Ademais convén pechar ben o bolso e levar sempre a nosa man encima del.
Cando prepares o teu bolso e mochila, coloca os obxectos de valor abaixo, no fondo do mesmo. Así se un carteirista tenta roubarche non conseguirá acceder facilmente a eles, senón que se atopará na superficie con cousas sen valor (unha botella de auga, un xersei, unha bufanda, etc).
Se levas unicamente a carteira e o móbil, o mellor é telos sempre nos petos dianteiros do teu pantalón, ao teu alcance. No peto traseiro resultan moi fáciles de extraer polos carteiristas profesionais.
Atención cando falas con estraños, non deixes en ningún momento as túas cousas nin che distraias. Os carteiristas, ademais de actuar en lugares públicos, moitas veces van en grupos de dous ou tres e abordan ás persoas con distintas técnicas de distracción para roubar as súas pertenzas. É importante manterche alerta das túas cousas.
É necesario que esteas pendente do que ocorre ao teu ao redor. Moitas veces os carteiristas seguen ás súas vítimas durante un bo tempo ata que descobren un momento no que son vulnerables para atacar.
Se descobres a un carteirista en pleno acto, non temas gritar e chamar a atención da xente. Estes adoitan actuar en lugares públicos polo que ao ser descubertos foxen de inmediato. A discreción é o seu maior arma, ante a evidencia non reaccionan de forma violenta senón que prefiren escapar sen ser identificados.

02/03/2022 in Seguridade

O Porriño celebra este venres o Desfile de Comparsas que fora aprazado pola choiva

A concellería de Cultura e Festexos, que dirixe Bienvenido Estévez, informa de que este venres celebrarase o Desfile de Comparsas de Entroido aprazado onte pola choiva.

As comparsas sairán dende o Pavillón Municipal ás 19:30 h e completarán o percorrido habitual: Antonio Palacios, Avda. Domingo Bueno, Travesía Fernández Areal, Manuel Rodríguez e Ramón González.

O sábado terá lugar o Enterro da Sardiña, nos mesmos horarios previstos na programación.

Restricións e cortes de tráfico o venres 4 de xaneiro

Dende as 15h prohíbese estacionar nas seguintes rúas:

Fernández Areal, dende o número 1 ata a o cruce coa Avda. Domingo Bueno.
Antonio Palacios, dende o cruce coa rúa Cruceiro ata a rotonda dos Aloques.
Doantes de Sangue, ambas marxes que afectan a toda a fachada do CEIP Fernández López.

Dende ás 19h cortarase o tráfico na rúa Doantes de Sangue.

Dende ás 19:30h e ata que finalice o desfile cortarase o tráfico nas seguintes rúas:

Antonio Palacios, desde cruce do Pavillón Municipal ata a rotonda dos Aloques.
Domingo Bueno, ata cruce con Fernández Areal.
Fernández Areal, cruce Avda. Domingo Bueno ata o número 1.
Manuel Rodríguez, dende o Celtiña.
Ramón González.

02/03/2022 in Cultura e festas

As nenas e nenos visten de Entroido O Porriño

O Entroido segue a encher de ledicia e cor as rúas do Porriño. Despois do vistoso desfile do sábado, que congregou na vila a miles de persoas, continúa a programación deseñada pola concellería de Cultura, que dirixe Bienvenido Estévez.

A proposta do Concello do Porriño para estas festas está pensada para todos os públicos. Fíxose un importante esforzo por incluir actividades para o público infantil e familiar contando co periodo vacacional dos máis pequenos. Unha delas, o Obradoiro de Máscaras para Nenas e Nenos que esta mañá impartiu a Asociación “O Porriño Arte”.

Dende as 11h, pequenas e pequenos artistas tomaron a Praza Arquitecto Antonio Palacios armados con ceras, rotuladores, purpurina e toda clase de materais plásticos para confeccionar as súas máscaras de Entroido coa axuda das pintoras e pintores da asociación.

Martes de Entroido: Desfile de comparsas

A programación de Entroido continúa este martes. Como é tradición, as comparsas lucirán de novo os seus disfraces polas rúas do Porriño. Serán 8 as que desfilen e o farán polo percorrido habitual.

Ás 18 h sairán do Pabillón Municipal e marcharán pola rúa Antonio Palacios, Avda. Domingo Bueno, Travesía Fernández Áreal, Manuel Rodríguez e Ramón González. Amenizarán o desfile a Batucada Oledum de Coio, as charangas Anchoa e Vai de Baile, Os Beretes e os Cabezudos.

28/02/2022 in Cultura e festas, Educación e tecnoloxía

Concello e COGAMI traballarán da man por un Porriño máis accesible e inclusivo

O alcalde do Porriño, Alejandro Lorenzo, e o concelleiro de Servizos Sociais e Benestar Social, Abel Estévez, reuníronse esta semana cos directivos de COGAMI, Celso Álvarez e Ángel Holguera, para definir vías de colaboración entre ambas entidades.

Os responsables municipais amosaron a súa vontade de estreitar a relación coa Confederación Galega de Persoas con Discapacidade, plantexando varios proxectos a desenvolver en materia de accesibilidade, formación e inclusión das persoas con diversidade funcional.

“Nesta primeira toma de contacto púxose de manifesto por ambas partes a necesidade de traballar da man”, explicou o rexedor, “Quedan moitas barreiras por derribar e moito que traballar pola inclusión para que O Porriño sexa un lugar que ofreza a todas e todos as mesmas oportunidades”.

Baixo esta premisa, o novo executivo propón a elaboración dun Plan de Accesibilidade que permita acometer de maneira planificada a eliminación de barreiras arquitectónicas e garantir o cumprimento da normativa en obra pública. “Non queremos seguir poñendo parches, é necesario sentar unas bases de actuación para facer accesibles o centro urbano e as parroquias”, indicou Lorenzo.

Tamén se valoraron outras accións conxuntas dirixidas á inclusión efectiva, social e laboral, das persoas con discapacidade.

25/02/2022 in Alcaldía, Benestar

Cursos preparatorios gratuítos das probas Celga

Os cursos, presenciais e en liña, realizaranse entre o 21 de marzo e o 12 de maio

A Secretaría Xeral de Política Lingüística anuncia a convocatoria de cursos Celga de carácter voluntario e gratuíto, orientados a obter a certificación Celga nos niveis 1, 2, 3 e 4 nos exames oficiais da Xunta de Galicia.

As persoas interesadas poderán inscribirse ata o 7 de marzo na seguinte ligazón: https://formacion-lingua.xunta.gal/. Poderase escoller un curso de tipo presencial ou en liña, sendo requisito para este último dispor de:

Un ordenador con conexión á Internet (de banda larga)
Un navegador web (recoméndase ter instalada a última versión de Firefox)
Acceso á conta de correo electrónico especificada na solicitude de inscrición
Un micrófono ou calquera medio alternativo que permita a gravación de voz en formato electrónico (mp3 ou equivalente).

Cada curso terá unha duración de 70 horas lectivas. Nos cursos de carácter presencial, estas distribuiranse en sesións de dúas horas e media, de luns a xoves, nos lugares que determine a Secretaría Xeral de Política Lingüística.

Para máis información podes consultar a convocatoria destes cursos no DOG: https://www.xunta.gal/dog/Publicados/2022/20220214/AnuncioG0598-260122-0002_gl.html ou enviar un correo electrónico ao Servizo de Normalización Lingüística do Porriño (servizonormalizacion@oporrino.org).

24/02/2022 in Normalización Lingüística

Escolares do Porriño descubren o universo Antonio Palacios no Museo do Mar de Galicia

O alumnado dos centros de educación primaria e secundaria do Porriño están a disfrutar das visitas-obradoiro á exposición temporal do Arquitecto Antonio Palacios “Soños de modernidade. Compromiso con Galicia”, instalada no Museo do Mar de Galicia.

Na actividade, organizada pola Concellería de Educación e a OMIX do Concello do Porriño, participarán 214 alumnas e alumnos dos colexios do municipio. As visitas comezaron hoxe e desenvolveranse ata o 29 de marzo.

O alcalde, Alejandro Lorenzo, acompañou hoxe ao primeiro dos grupos que participou da actividade. “Estas visitas permiten aos nosos pequenos e pequenas descubrir máis a fondo a obra de Antonio Palacios dende un punto de vista práctico, dinámico, participativo e, por suposto, educativo”, explicou o rexedor, “É unha forma divertida de coñecer a figura e o traballo dun dos porriñeses máis ilustres”.

Os primeiros en participar hoxe foron o CEIP Plurilingüe de Atios e o CEIP Plurilingüe Antonio Palacios. Nas próximas quendas o farán o IES Ribeira do Louro, CPR Hnos. Quiroga, CPR Sto. Tomás, CEIP da Ribeira e CEIP Cruz Budiño.