Novas

Ladrando ladrando a clase pasa voando

O Concello do Porriño, a través da concellería de Educación e a OMIX, está a desenvolver nos centros educativos os obradoiros de educación en valores asistidos por cans de terapia “Ladrando ladrando a clase pasa voando”.

Nesta actividade participan 206 nenas e nenos de segundo de primaria do CEIP Antonio Palacios, CEIP de Atios, CEIP Cruz Budiño, CEIP Ribeira do Louro, CEIP Xosé Fernández López, CEIP Ribeira, CEIP Xosé Fernández López, CPR Hermanos Quiroga, CPR Santo Tomás e EI de Mosende.

“O obxectivo desta actividade é trasladar os beneficios que achegan os animais nas contorans escolares, co fin de traballar de forma transversal a educación en valores e a posesión responsable de mascotas, con obradoiros orientados a este fin”, explicou a concelleira, Carolina González.

No mesmo sentido se manifestou o alcalde, Alejandro Lorenzo, que engadiu que se elaboraron para traballar tamén “o compañeirismo, o respecto, a integración, a solidariedade e a autoestima, así como os hábitos de hixiene e alimentación saudable”.

Nestes obradoiros abórdanse, entre outros temas, a educación en positivo o acoso escolar e os contratempos derivados de problemas de conducta.

A metodoloxía en todos eles é sempre activa, participativa, lúdica e integradora.

14/04/2023 in Educación e tecnoloxía

34 comercios locais amosarán na “I Porriño Fashion Weekend” as últimas tendencias da moda

Desfiles, música e moito máis é o que ofrecerá a primeira edición da “Porriño Fashion Weekend” que se desenvolverá dende o venres ata o domingo.

Este evento, que convertirá a vila nunha gran pasarela de tendencias, arrancará o venres 14 coa shopping Night, unha noite de comercio aberto na que os establecementos da vila abrirán tamén dende as 21 h e ata as 24 h. Unha noite de compras na que haberá tamén Djs, coctelería, sorteos e moitas propostas da man de comerciantes e hostaleiros.

O broche de ouro a esta primeira xornada será musical da man da orquestra Panorama que actuará a partir das 24 h na rúa Antonio Palacios (á altura do parque Ordóñez) e a continuación DJ DGrace.

A programación continúa o sábado 15 coq fashion Night. A partir das 19 h a rúa peonil transformarase nunha gran pasarela que mostrará as últimas tendencias en moda, peiteados e florería da man do comercio local. Zapatería, moda,  roupa infantil e deportiva, complementos, peiteados, maquillaxe, vestidos de noiva e arreglos florais compoñen as propostas que lanzan os establecementos participantes.

A xornalista porriñesa, Raquel Atanes, será a encargada de presentar o desfile, que rematará coa música en directo de Manu Pereyra (en colaboración con Origen Café).

A música tamén clausurará a xornada coa sesión dj na praza da man de DJ Raper & Traffic House.

O domingo 16 desenvolverase o Fashion Market, un gran mercado que se instalará na rúa Leandro Diz a partir das 16 h.

Participantes: Addiction, Elisardo Moda, Ishop, Moda Click, Volvoreta, Zafiro, Topitos, Polisport, Mapa Porriño, Orevshop, Meigallo, Dana Shop, Brooklyn Moda, Suengas, Andreu, Noa, Zapatería Tic Tac, Minerva, José Vila Estilistas, Sencar Peluqueros, Blackbird, Xiada Costas,  Merchy Díaz, Eliseo Peluquería, Ondas y Perfil, Dillarte, Abreu, Marisé, Xantar de Pepa, La de Chato, Nómadas, Scala, Francachela, Argentino 2, Hotel Parque, La Cueva, La Bendecida, El pincho, Origen, Underground, La bici, Bolboreta, Galibar, El cincuentaicinco, Safari, Ácronos e a Vinoteca.

 

 

14/04/2023 in Cultura e festas, Urbanismo, comercio e industria

O Concello do Porriño distribúe desfibriladores nas parroquias

O Concello do Porriño fixo entrega de dez equipos DESA a asociacións veciñais e clubs deportivos do municipio que se distribuirán en todas as parroquias.

Os equipos foron entregados ao Porriño Industrial (Campo Municipal do Lourambal), Unión Deportiva Atios (Campo de fútbol O Carballo), CD Pontellas (Campo de fútbol San Campio), CF San Salvador de Budiño (Campo de fútbol de Budiño), AD Mosende (Campo de fútbol de Mosende), Club Atletismo Porriño (Pistas de atletismo no Polígono A Granxa-Budiño), AVC As Mimosas (Centro Cultural de Carracido), ELM Chenlo (Centro Cultural de Chenlo), AV O Castelo de Cans (Centro Cultural de Cans) e ao Multiusos de Torneiros.

A equipación inclúe un desfibrilador externo cun xogo de parches de electrodos, unha batería, cable de conexión a porto USB, kit de reanimación cardio-pulmonar e mochila impermeable.

O Concello dota así ás asociacións dun recurso para actuar de maneira coordinada cos profesionais do 061 para gañar tempo na atención dun paro cardíaco, intentando que o paciente aguante á chegada dos servizos profesionais. O principal factor de éxito ou fracaso nestes casos é o tempo e por iso se convirte nunha prioridade dispoñer de equipos de reanimación cardio-pulmonar distribuídos por todas as parroquias e formar a un equipo de persoas para a súa utilización.

O DESA é un aparato electrónico portátil sinxelo de manexar que identifica e trata a parada respiratoria. A súa efectividade radica na identificación automática da fibrilación ventricular ou unha taquicardia ventricular sen pulso restablecendo un ritmo cardíaco efectivo eléctricamente. É moi eficaz para a maior parte dos chamados paros cardíacos, que na súa maioría son debido a que o corazón fibrila e o seu ritmo non é o adecuado, estes equipos básicamente devolven o ritmo normal ao corazón.

13/04/2023 in Sanidade, Seguridade

700 ciclistas pedalearán este domingo nos montes de Budiño

Os montes de Budiño volverán ser este domingo epicentro do ciclismo galego. 700 ciclistas pedalearán no Porriño nas dúas probas organizadas pola AD Avanza, en colaboración co Concello do Porriño: o VI TROFEO MINI BTT CONCELLO DO PORRIÑO e o II XCO TROFEO CONCELLO DO PORRIÑO.

O alcalde, Alejandro Lorenzo, e o concelleiro de Deportes, Abel Estévez, acompañados polo presidente da AD Avanza, David García, e os/as ciclistas da AD Avanza, presentaron ambas probas no que será punto neurálxico do evento: o centro cultural A Forna de Budiño.

O rexedor felicitou á organización por poñer en valor o ciclismo na nosa localidade e polo labor que fan coa súa canteira.

Pola súa banda, dende a organización convidaron a todo o mundo a disfrutar do evento o próximo domingo e agradecer a colaboración das entidades que axudaron na posta en marcha do evento, Concello do Porriño, Comunidade de Montes de Budiño, Deputación de Pontevedra e Federación Galega de Ciclismo.

VI Mini BTT Trofeo Concello do Porriño

Arredor de 500 nenos e nenas, de entre 4 e 14 anos , participarán na sexta edición do torneo. A saída darase ás 9:30 h no Centro cultural A Forna.

A proba consta de cinco categorías: Benxamíns, Promesas, Principantes, Alevíns e Infantís.

III XCO Trofeo Concello do Porriño

A terceira edición do trofeo congregará a uns 200 ciclistas. A proba arrancará ás 16:30 h do centro cultural A Forna e estará aberta ás categorías de Élite (masc-fem), Sub23 (masc-fem), Junior (masc-fem), Cadete (masc-fem) e Master30/40/50/60 (masc-fem).

04/04/2023 in Deportes

Volven as xornadas para familias e profesionais “Acompañando na aventura de crecer”

Aproveitando a boa acollida que tiveron as xornadas `Acompañando na aventura de crecer´, impulsadas no 2022 pola Concellería de Cultura e Igualdade do Porriño a través da Biblioteca Municipal, ponse en marcha unha segunda edición deste ciclo de xornadas para familias e profesionais co obxectivo de seguir achegando información á sociedade adulta,  a responsable de guiar e acompañar á nosa infancia.

Como na anterior edición, as diferentes perspectivas abordaranse desde a oportunidade e o desafío que supón entender mellor o desenvolvemento do cerebro infantil e cal é o noso papel como coidadores/as, ben sexamos as súas figuras referentes ou ben as persoas que atendemos as súas necesidades en momentos puntuais. Porque o noso modo de estar presentes, de crear oportunidades e acompañalos/as no seu camiño así como o modo no que nos comunicamos os condiciona.

Nesta ocasión, vólvese apostar por diferentes perfís profesionais para afondar no campo da comunicación, o procesamento sensorial e a aprendizaxe.

Como novidade, nesta edición desenvolverase antes de cada conferencia, un obradoiro práctico onde se darán e proporán ferramentas útiles para aplicar cada día coa conciencia e co propósito de favorecer un bo desenvolvemento infantil. Estes obradoiros levaranse a cabo en grupos reducidos e requirirán inscrición previa no seguinte correo electrónico: biblioteca@oporrino.org .

Os relatorios son abertos a todo o público sen necesidade de inscrición.

Obradoiro de comunicación infantil e conferencia `Por que lle doe a tripa?´

As xornadas arrancarán o venres 14 de abril co obradoiro `Comunicación no conflito´ e a conferencia `Por que lle doe a tripa´ a cargo de Gloria González.

O obradoiro práctico desenvolverase de 16 a 18:30 h. Está dirixido a nais, pais e profesionais do ámbito educativo e da saúde e nel poderán aprender as claves emocionais e comunicativas necesarias para manexar conflitos e convertelos nunha oportunidade.

Ás 19 h comezará a conferencia `Por que lle doe a tripa?´ que terá como relatora a Gloria González, psicóloga sanitaria, formadora e psicoterapeuta experta en desenvolvemento, apego e trauma.

Dirixida tamén a nais, pais e profesionais do ámbito da saúde e da educación. Nesta charla traballaranse as claves para entender o que nos están expresando os/as nenos/as co seu comportamento e como poder abordar, dunha maneira máis adecuada as necesidades que están a manifestar.

 

04/04/2023 in Igualdade

O Porriño proxecta a construción dun Refuxio Municipal de Protección Animal

O Concello do Porriño vén de iniciar o proceso para a creación dun refuxio de protección animal municipal. O executivo, que preside Alejandro Lorenzo, formalizou o contrato para a redacción do anteproxecto -cun orzamento de 17.545 euros- de construción dun refuxio municipal de acollida de animais como alternativa ao actual sistema de recollida, que terá como fin recoller, coidar e xestionar as adopcións responsables de cans e gatos. Todo baixo o principio de sacrificio cero.

As instalacións construiránse nunha parcela municipal ubicada no Polígono de A Granxa de preto de 3.500 m2 que, tras as reunións mantidas con asociacións de protección animal da zona para valorar e dar forma ao proxecto e tras ter o visto bo dos técnicos municipais, conta con todos os requisitos necesarios.

“Da man de protectoras, que teñen a experiencia necesaria, proxectamos un refuxio sostible, capaz de dar resposta ás necesidades do municipio e garantir o coidado dos animais que se recollan. Coidado tanto a nivel veterinario como a xestión da súa adopción e do tempo que pasen en acollida no centro”, explicou a concelleira, Antía Carrera, “Queremos un concello con sacrificio cero, que coide dos animais e lles procure calidade de vida e se algo tiña claro dende que me fixen cargo do departamento de Medio Ambiente é que O Porriño ten que contar cun refuxio de protección animal e mudar os sistemas de recollida”.

No mesmo sentido se manifestou o alcalde, Alejandro Lorenzo, que agradeceu á concelleira “o esforzo realizado para poñer en marcha este proxecto e facelo de maneira viable”. O rexedor incidiu en que o Refuxio de Protección Animal non só contará coas instalacións acaídas para a acollida e coidado, tamén cunha zona social onde se levarán a cabo actividades para a sensibilización sobre o abandono e a adopción animal”.

03/04/2023 in Alcaldía, Medio Ambiente

Porriño dá o primeiro paso para a creación dun gran parque á beira do río Louro

Unha nova inversión de 401.763,52 euros é o que vén de recibir o Concello do Porriño da man da Xunta de Galicia. Así, a conselleira de Medio Ambiente, Territorio e Vivenda, Ángeles Vázquez, e o alcalde porriñés, Alejandro Lorenzo, asinaron un convenio para a execución do proxecto de acondicionamento do viario asfaltado paralelo á vía do tren nas proximidades do Paseo do Louro, ou o que popularmente se coñece como “ruta do colesterol” transitado a diario por centos de veciños, pequenos e maiores, que empregan o lugar para pasear, correr ou andar en bicicleta.

O tramo sobre o que se acometerán os traballos é de quilómetro e medio (1.460 metros exactamente) que comprende dende Atios ata o paso soterrado peonil da vía do tren que da acceso ao casco urbano. O proxecto inclúe a instalación de alumeado público e a mellora do pavimento habilitando un carril ciclista bidireccional e outro para peóns, eliminando o tráfico rodado, que na actualidade xa é escaso ao ser unha estrada sen saída e que só conduce ás veigas; aínda que si se habilitaría unha zona de aparcamento de vehículos para facilitar o acceso da veciñanza de fóra que acuda ao lugar.

 “Esta actuación suporía unha primeira fase de transformar a contorna do río Louro, ao seu paso por Porriño, no pulmón da vila, unha gran área verde, con parques para pequenos e maiores, zona de paseo, bici e tamén unha superficie acondicionada para a celebración de eventos que poden ser dende grandes concertos, a modo de auditorio ao aire libre, ata incluso o oficio de vodas”, explica o alcalde. Para elo, a empresa Frigolouro xa ten cedido unha superficie importante e estanse a adquirir terreos de particulares para acondicionalos a tal fin.

O convenio asinado fai uns días na casa consistorial por parte da conselleira e do alcalde foi posible trala recepción de todos os permisos e informes sectoriais, que se demoraron meses imposibilitando que se formalizase antes o convenio. Unha vez aprobado o proxecto pola Xunta de Galicia procederase á súa licitación para o inicio dos traballos que estarán rematados neste mesmo ano 2023.

“Con esta actuación Porriño suma e sigue en zonas verdes e recreativas. Está en marcha o gran espazo en pleno casco urbano que une as rúas Antonio Palacios e Pío XII e tamén a remodelación integral do antigo Campo da Feira. Ademais temos proxectadas tamén áreas de lecer e adecuación de espazos públicos nas diferentes parroquias. Somos un pobo comercial e industrial si, pero tamén dispomos de áreas de lecer ás que a veciñanza pode acudir a desconectar, soa ou en grupo, con familia e amigos, tanto a cativada como a mocidade e os nosos maiores, un espazo de convivencia sen necesidade de saír da vila”, conclúe Lorenzo.

03/04/2023 in Alcaldía, Medio Ambiente, Parques e xardíns

O Porriño contará cunha área para autocaravanas

O Porriño contará cunha área de caravanas e autocaravanas en pleno centro urbano, un servizo que vén a sumarse aos que xa de por si ofrece o municipio.

O alcalde, Alejandro Lorenzo, acompañado polo presidente da Asociación de Autocaravanas de Galicia (Aga),  Manuel Fernández-Arruti, e o concelleiro de Vías e Obras, Ramón Porto, visitou esta mañá a parcela na que se habilitará o aparcamento para valorar de maneira conxunta as actuacións a realizar para a súa pronta posta en marcha.  

A zona que se acondicionará ocupará uns 200 m2 da parcela de Leandro Diz habilitada como aparcamento gratuíto e estará acondicionada con todos os servizos necesarios.

“O turismo de autocaravana tense consolidado como unha alternativa ás viaxes tradicionais. É unha modalidade en auxe que se caracteriza pola liberdade que ofrece, por iso hai tanta demanda e por iso moitos concellos de todo o país dispoñen xa dese servizo. O Porriño non vai quedar atrás”, explicou o alcalde, Alejandro Lorenzo.

15/03/2023 in Alcaldía, Turismo, Vías e obras

Continúa a recuperación da fonte de San Sebastián coa reposición da pérgola

O Concello do Porriño continúa coa recuperación da emblemática fonte de San Sebastián. Tras levar a cabo as obras de acondicionamento do manantial e canalización do caudal para evitar focos de contaminación que afectaban á calidade da auga e causaban reiterados cortes no subministro, a concellería de Vías e Obras, que dirixe Ramón Porto, deu comezo hoxe aos traballos de reposición da pérgola que cubre o conxunto patrimonial.

“O entramado de madeira que cubre a fonte atopábase nun deficiente estado de conservación, supoñendo un perigo para a seguridade das persoas que fan uso deste espazo”, explicou o concelleiro, “Retiraranse todos os elementos e substituiranse por novas vigas e correas de madeira de iroko, coas mesmas dimensións e características que as actuais”.

A estrutura ten unha dimensión total de 13 m e 5 m e está formada por 18 pezas, dúas vigas lonxitudinais e cinco transversais, con oito correas transversais e tres lonxitudinais. 

“A fonte de San Sebastián é sen dúbida un icono patrimonial do Porriño e hai que poñelo en valor”, concluíu o alcalde, Alejandro Lorenzo, “E non só hai que ter en conta o seu valor patrimonial, tamén o social, xa que se trata dun lugar ao que moitos veciñas e veciñas se achegan cada día a coller auga e tamén, como é ben sabido, moitos grupos de ciclistas. Por iso é importante que se atope en bo estado”.  

Os traballos termínanse que estén rematados no prazo dunha semana.

 

14/03/2023 in Alcaldía, Vías e obras

Fegatea e Concello danse a man traer ao Porriño o mellor teatro amador

O Concello do Porriño une forzas coa Federación Galega de Teatro Afeccionado para traer á vila cinco obras de compañías de teatro amador.

A presidenta da FEGATEA, Chelo Pampillón, e a vicepresidenta da federación, Ana Rodríguez, formalizaron a súa colaboración coa administración local que incluirá na programación cultural deste ano a posta en escena de cinco representacións teatrais no Centro Cultural Municipal e en centros culturais das parroquias para disfrute da veciñanza.  O concello aportará a tal fin 3.000 euros.

“A nosa proposta cultural inclúe sempre o teatro nun lugar destacado, xa que o entendemos como unha expresión cultural e artística que enriquece tanto aos que están nas butacas como aos que pisan o escenario”, explicou o alcalde, Alejandro Lorenzo, “E nesta liña o teatro amador ten moito que aportar ademais de ter sempre unha gran acollida do público no Porriño. A Fegatea é un gran aliado para nós e garante de calidade “.  

A Federación Galega de Teatro Afeccionado está formada hoxe en día por 50 compañías que suman máis de 600 actores, afianzándose como axente cultural indispensable para a promoción da cultura e das artes escénicas en Galicia.  A través de actividades  como o Circuíto Galego de Teatro Amador, a Mostra Fegatea Móvete, o Festival Agustín Magán ou os festivais organizados ao abeiro da Plataforma Transfronteiriza PLATTA conseguiron congregar a máis de 8.000 espectadores ao ano. Unha cifra que da fe do seu valor como axente de desenvolvemento da cultura teatral.

 

 

14/03/2023 in Alcaldía, Cultura e festas