Novas

O Concello do Porriño instala unha pantalla xigante para seguir a Final do Mundial Feminino de Fútbol

 

  • Este domingo, ás 12.00 horas, dende a Praza Arquitecto Antonio Palacios, poderase seguir en directo o encontro España-Inglaterra

 

O Concello do Porriño únese á celebración do pase de España á final da Copa Mundial Feminina da FIFA e instalará unha pantalla xigante no centro da vila para que todo aquel que o desexe poida seguir en directo o encontro.

Será o vindeiro domingo, 20 de agosto, ás 12.00 horas. Sentados na Praza Arquitecto Antonio Palacios, os espectadores presenciarán este partido de fútbol inédito entre España e Inglaterra que se disputará no Stadium Australia de Sidney.

É a primeira vez que ambas seleccións chegan a unha final do Mundial. As españolas, entre as que se atopa a pontevedresa Teresa Abelleira, lograron o pase logo de vencer 2-1 a Suecia e as inglesas fixérono impoñéndose 3-1 ao equipo local, Australia.

19/08/2023 in Deportes

NOVA LOCALIZACIÓN POR PREVISIÓN DE CHOIVA – “MAXIA PARA SOÑAR” este sábado no Porriño

 

  • O Centro Cultural Municipal acolle este espectáculo do Mago Marco Pombo, ás 19.00 horas

O espectáculo “Maxia para soñar” do ilusionista Marco Pombo representarase no Porriño este sábado, 19 de agosto. Enmarcada no programa Cultura no Camiño 2023 da Xunta de Galicia, a función celebrarase no Centro Cultural Municipal ás 19.00 horas.

Trátase dun espectáculo para todos os públicos a través do cal o mago propón unha viaxe de soños envoltos nun misterio.

Marco Pombo é un ilusionista cunha ampla experiencia no mundo da animación e o espectáculo. Provén dunha familia cunha forte e enraizada tradición artística e desde moi novo demostrou moito interese nas artes escénicas, especialmente no teatro e o ilusionismo, pero foi nesta última onde realmente destacou. É membro da Sociedade Española de Ilusionismo (SEI). O seu obxectivo e proporcionar entretemento de alta calidade a través da maxia, o humor e a comunicación, sempre cunha constante participación do público, que entra así a formar parte do espectáculo.

18/08/2023 in Cultura e festas

A UNED estrea estudos de grao no Porriño coas titulacións de Socioloxía e Traballo Social

  • O prazo de admisión e matrícula está aberto ata o 23 de outubro
  • Celebrará en setembro unha xornada de portas abertas
  • Continúan os cursos de extensión universitaria

A aula da Universidade Nacional de Educación a Distancia (UNED) no Porriño estrea oferta formativa co comezo de curso. Así, neste 2023/2024 impartirá dous graos, o de Socioloxía e o de Traballo Social.

Cúmprese, deste xeito, un dos compromisos adquiridos e expostos na xornada inaugural, o pasado mes de marzo, desta aula localizada fisicamente no Multicentro de Torneiros. Alí disponse de seis salas nas que se desenvolve toda a actividade da UNED dende outubro de 2022, acollendo ata o de agora unha ampla oferta de cursos de extensión universitaria nos que se matricularon máis de 150 persoas.

O prazo de admisión e de matrícula para estes dous estudos de grao permanecerá aberto ata o 23 de outubro. Antes, o vindeiro mes de setembro, celebrarase unha xornada de portas abertas de divulgación e participación nas actividades da UNED en Porriño, dando oportunidade tamén de sumar ideas e propor suxestións de cara a unha futura oferta formativa da UNED na que se inclúe dende o acceso á universidade a graos, graos combinados, microtítulos, másteres e doutoramentos, idiomas, UNED senior, formación permanente e extensión universitaria.

O alcalde do Porriño, Alejandro Lorenzo, congratúlase do crecemento da oferta formativa da aula da UNED na capital da Louriña e reafirma “o compromiso do Concello co sostemento e financiamento deste centro na nosa vila, xa que desenvolve un importante labor no eido cultural, social e empresarial do municipio”. O rexedor pon en valor o carácter vertebrador da UNED, que facilita o acceso ao ensino universitario e achega a educación superior á veciñanza de fóra das grandes cidades. “Eu creo firmemente nunha educación pública e de calidade, e contar con esta aula no Porriño contribúe a facelo posible”, asegura á vez que tamén destaca  “a ferramenta que supón para as máis de 2.000 empresas que temos no Porriño ás que convido a participar da traxectoria da UNED de cara a cualificar aos profesionais nas áreas que se precisen”. Neste senso, e atendendo a unha das demandas do mercado laboral máis próximo, “estase a estudar a posibilidade de impartir un curso de soldadura”.

 

Extensión universitaria

De xeito paralelo a estes dous graos e ás titulacións que nun futuro se irán incorporando, continuarán desenvolvéndose diversas actividades de extensión universitaria, que son todos aqueles cursos, xornadas, seminarios, congresos… impartidos baixo a metodoloxía da UNED e encamiñadas á expedición dun diploma ou certificado.

Neste curso 2023/2024 impartirase Reforzo exame ESO adultos, Lingua de signos española e Inglés. O primeiro deles é de asistencia presencial, do 3 de outubro ao 31 de maio, os martes, mércores, xoves e venres de 18.00 a 21.00 horas e os sábados en horario de mañá, de 10.00 a 13.00; as persoas interesadas deben inscribirse en liña a través da páxina web da UNED e é gratuíto para a veciñanza do Porriño.

Os cursos de Lingua de signos española (nivel II) e o de Inglés II poden realizarse presencial ou on line, requiríndose tamén inscrición previa por internet, o de lingua de signos realizarase do 25 de setembro ao 30 de outubro (os luns e xoves de 18.00 a 21.00 horas) e o de inglés do 6 de outubro ao 15 decembro (os venres de 18.00 a 21.00 horas).

17/08/2023 in Educación e tecnoloxía

O Concello do Porriño subvencionará o 90% da instalación dos sistemas de bombeo individuais

 

  • A veciñanza poderá solicitar esta axuda municipal para conectarse ao sistema de saneamento
  • O goberno local levará a pleno unha partida orzamentaria para a posta en marcha desta iniciativa, pioneira en Galicia

 

O Concello do Porriño ten rexistradas diversas solicitudes de conexión á rede de saneamento do río Loro para determinadas vivendas situadas topograficamente por debaixo da rasante do vial polo que discorre dita tubaxe, o que fai necesaria a instalación de sistemas de bombeo individuais, unha actuación que supón un coste adicional que debe asumir o propio usuario.

Neste senso, o goberno porriñés, no seu obxectivo de acadar o cen por cen do saneamento en todo o termo municipal resolvendo as situacións que requiren unha intervención máis complexa e que implica un gasto que repercute no peto da veciñanza, como o é esta, presentará unha liña de axudas destinada a quen precise a instalación dun bombeo, subvencionando ata o 90% do custe final. Para elo, o goberno local levará así ao vindeiro pleno unha partida orzamentaria específica para esta actuación.

A día de hoxe, logo do estudo preliminar realizado para acadar unha visión o suficientemente aproximada desta problemática, identificáronse un total de 53 vivendas que requiren da instalación dun bombeo para conectarse ao sistema de saneamento do río Louro. Por parroquias, repártese en: 13 en Mosende; 9 en Torneiros; 7 en Atios e outras tantas tamén en Cans e Pontellas; 5 en Budiño, 3 en Porriño e 2 en Chenlo.

“É primordial que dende as administracións públicas tendamos a man á veciñanza e poñamos tamén da nosa parte para acadar un obxectivo común como é o cen por cen do saneamento como prioridade e servizo esencial do Concello”, sinala o alcalde Alejandro Lorenzo. O rexedor porriñés preside ademais o Consorcio de Aguas do Louro, entidade dende a cal se está a impulsar tamén esta iniciativa, tentando introducila nos outros tres concellos que a integran (Mos, Salceda de Caselas e Tui) e para o cal dende o propio Consorcio se está xa a valorar a realización de estudos pormenorizados que abrangan o ámbito territorial dos concellos consorciados para identificar os problemas de conexión individual de todas as vivendas existentes nas proximidades das redes de sumidoiros, á vista da cantidade de vivendas identificadas de xeito preliminar.

Coa convocatoria destas axudas “Porriño convértese nun concello pioneiro en Galicia subvencionando o bombeo para as vivendas que non teñen a cota necesaria para o enganche á rede principal”, subliña o rexedor, á vez que lembra outras iniciativas xa postas en marcha como a eliminación da taxa anual polo baleirado das fosas sépticas e a redución do importe do servizo nun 60%.

16/08/2023 in Infraestruturas

Listaxe de admitidos/as no obradoiro ludoteca

Deixámosvos os enlaces á listaxe de admitidos/as no obradoiro ludoteca que se desenvolverá do 14 de agosto ao 8 de setembro en horario de mañá, de 9 a 14h.

Esta actividade está enmarcada no proxecto “Medidas de impulso por unha mellora na búsqueda de emprego e incorporación ao mercado laboral das mulleres con cargas familiares” cofinanciado pola FEMP e IMS, no marco do convenio suscrito o 31 de marzo de 2023.

DESCARGAR: LISTAXE DE ADMITIDAS/OS

DESCARGAR: INFORMACIÓN

DESCARGAR: AUTORIZACIÓN ENTREGA E RECOLLIDA DE PARTICIPANTES

09/08/2023 in Igualdade

Avanza a bo ritmo a segunda fase da mellora do Parque da Alameda

  • Coa primeira fase xa executada, o Concello do Porriño continúa co acondicionamento deste espazo coa substitución do pavimento existente e a impermeabilización do soporte estrutural

O alcalde do Porriño, Alejandro Lorenzo, e o concelleiro de Vías e Obras, Ramón Porto, comprobaron de primeira man os avances da segunda fase das obras de mellora e humanización que se están a desenvolver no parque da urbanización Alameda, na Avenida de Galicia.

As continuas filtracións que se daban neste espazo de uso público estaban a causar danos estruturais no soporte da praza e afectando ao garaxe que se atopa baixo a mesma, algo que estaba a causar numerosos perxuízos aos usuarios destas prazas de aparcamento.

Co fin de resolver este problema, o Concello do Porriño acometeu as obras de impermeabilización deste espazo, que abrangue unha superficie de 2.000 metros cadrados, aproveitando a actuación para levar a cabo a humanización da outra parte da praza e o seu acondicionamento como espazo público de lecer, creando un novo parque infantil para disfrute dos máis pequenos.

“Coa primeira fase xa executada, continuamos coa humanización da praza cunha segunda intervención de substitución do pavimento existente e a impermeabilización do soporte estrutural da propia praza”, explicou Lorenzo, “Ademais, facilitarase a accesibilidade ás vivendas e baixos comerciais con acceso ao interior da praza, xa que algún deles presentaba desniveis que dificultaban a accesibilidade”.

O orzamento desta segunda fase do proxecto ascende a 83.182,61 euros. A humanización e mellora desta céntrica praza supuxo unha inversión de 138.868 euros, financiada na súa totalidade a través dun convenio de colaboración asinado coa Vicepresidencia Segunda e Consellería de Presidencia, Xustiza e Deportes da Xunta de Galicia.

04/08/2023 in Alcaldía, Vías e obras

O Porriño incrementa nun 84,21% as axudas ás traídas de augas

  • O novo orzamento destina 175.000 euros ás subvencións a comunidades de usuarios de augas

O Concello do Porriño destinará 175.000 euros a axudas para as comunidades de usuarios de auga do municipio. A administración local suma 80.000 euros aos 95.000 consignados no orzamento prorrogado, incrementando nun 84,21% as subvencións para a mellora e mantemento das instalacións das traídas.

Esta nova convocatoria, a de maior contía proposta desde a administración local,  suma unha nova liña destinada a inversións. Así o obxecto destas axudas comprenderá non só o mantemento e reparación das instalacións senón tamén a súa mellora. As beneficiarias poderán optar a financiación para a contratación de obras de reparación, substitución ou ampliación de redes de distribución, analíticas de control sanitario ou mantemento e conservación en captación, mantemento das instalacións ou sistemas de almacenamento e potabilización.

O concelleiro, Marcos Martínez, adiantou que “nas próximas semanas publicaranse as bases da convocatoria de axudas, á que poderán optar todas as comunidades de augas do Porriño que estean formalmente constituídas. En calquera caso, informaremos a todas as traídas para explicarlles máis polo miúdo o obxecto destas bases e facilitarlles a tramitación das solicitudes”.

“Con estas axudas queremos axudar ás traídas a aumentar a calidade do servizo que prestan á veciñanza, contribuír a mellorar tanto o sistema de abastecemento como a calidade da auga. Ademais, por suposto, de promover un uso máis eficiente dos recursos hídricos dos que dispoñemos, algo de vital importancia nun momento no que as alertas por seca son cada vez máis habituais”, explicou o alcalde, Alejandro Lorenzo.

03/08/2023 in Alcaldía, Parroquias

O Concello do Porriño adianta a redacción dos proxectos necesarios para completar o 100% do saneamento

O Concello do Porriño adianta a redacción de proxectos de obra de saneamento en todas as parroquias do termo municipal e no centro urbano, co obxectivo de axilizar ao máximo os trámites administrativos necesarios.
 
A tal fin, o Goberno Municipal aprobou este luns no pleno a súa proposta de inversión para a redacción dos proxectos e os traballos de topografía. O gasto total da execución das actuacións pendentes de proxectar, derivadas do Plan director do Consorcio de Augas do Louro ascende a 9.383.912 euros, e a estimación dos gastos para a redacción dos proxectos ascende a 404.709 euros.
 
“Contar cos proxectos listos, con todos os informes sectoriais das correspondentes administracións e, no caso de ser preciso, a cesión de terreos por parte de particulares é necesario para executar as obras. Todo este procedemento é algo que soe retrasar bastante os traballos”, explicou o alcalde, Alejandro Lorenzo, “Ademais ao dispoñer dos proxectos e a documentación necesaria preparada podemos optar de maneira case inmediata ás diferentes subvencións ou axudas que se oferten”.
 
Trátase pois de dar unha resposta máis áxil e eficaz a este problema que arrastra O Porriño dende hai anos e que é, sen dúbida, unha das maiores necesidades que presentan as súas parroquias. “Traballamos para avanzar da maneira máis rápida e eficaz cara o saneamento integral do municipio”, concluíu o rexedor, “Este foi sempre un dos nosos principais compromisos e o será ata que consigamos que todas as vivendas do Porriño estean conectadas á rede de saneamento”.
 
Cabe destacar que hai un ano o municipio tiña pendentes de execución obras de saneamento por valor de 14 millóns de euros e na actualidade restan 11 millóns.
03/08/2023 in Alcaldía

A banda folk “Abril” actúa este sábado no Porriño

A praza Arquitecto Antonio Palacios acollerá este sábado, a partir das 21 h, un dos concertos do ciclo Cultura no Camiño, da Xunta de Galicia, a cargo da formación de música folk Abril.

Abril está formado por Mariña Carpente ao violín, Claudia Abril á voz e pandeireta e Antón Lago á guitarra clásica.

As distintas influencias musicais do trío vigués conflúen no seu repertorio, que inclúe melodias tradicionais galegas e tamén do resto da península arranxadas e mesturadas con ambientes sonoros máis actualizados. Para isto utilizan guitarra flamenca, arranxos de fiddle con influencias americanas e europeas e percusións tradicionais ibéricas. Tamén utilizan todas a voz como acompañamento e harmonías das músicas modernas.

03/08/2023 in Alcaldía