Novas

• O Concello personarase na causa polo homicidio da traballadora do SAF 

O Porriño, 30 de xullo de 2025.– O alcalde do Porriño, Alejandro Lorenzo, compareceu esta mañá en rolda de prensa para ofrecer declaracións oficiais sobre o tráxico suceso acontecido onte, na parroquia de Atios, que rematou coa morte dunha traballadora do Servizo de Axuda no Fogar (SAF) mentres exercía o seu labor profesional.

O rexedor cualificou o día de onte como “un dos días máis tristes e escuros deste Concello e tamén para min, no plano persoal, como alcalde do Porriño”, e trasladou, en nome de toda a veciñanza, as condolencias á familia de Teresa, a vítima, así como “todo o noso cariño e apoio absoluto neste momento tan tráxico”.

Durante a súa intervención, Lorenzo anunciou que o Concello do Porriño se personará na causa e asegurou que se actuará “con firmeza” para que se esclarezan os feitos e se depuren todas as responsabilidades.

“O Concello personarase na causa. Tomaremos medidas contundentes, depurando responsabilidades, sexa quen sexa o responsable: órgano, empresa ou persoa física”, afirmou o alcalde.

O alcalde explicou tamén que non existía constancia de ningunha denuncia previa. Neste sentido, fixo un chamamento directo para que os traballadores e traballadoras denuncien calquera situación de risco ou violencia ante os órganos competentes: “Quero pedir a calquera traballadora ou traballador, sexa cal sexa o servizo que estea prestando no Concello ou non, que se ten constancia de calquera situación de risco, que denuncie. Desde o Concello actuaremos”.

O rexedor reiterou o compromiso do Concello coa familia da vítima e insistiu na vontade firme da institución de actuar con todos os mecanismos legais ao seu alcance.

• O Concello declara dous días de loito en memoria da vítima

O Porriño, 29 de xullo de 2025.– O Concello do Porriño gardou esta tarde, ás 20:00 horas, un minuto de silencio na Praza do Concello en memoria da traballadora do Servizo de Axuda no Fogar (SAF) que foi presuntamente asasinada esta mañá na parroquia de Atios, mentres realizaba o seu labor profesional.

Os feitos ocorreron arredor das 9:00 horas, cando a muller se atopaba atendendo unha usuaria do servizo. Segundo as primeiras informacións, foi asasinada presuntamente polo marido desta.

O minuto de silencio desenvolveuse en colaboración co Concello de Mos, xa que a vítima era natural dese municipio e veciña do noso. Ambas institucións, xunto con representantes das forzas e corpos de seguridade, da Policía Local, da Garda Civil, da Subdelegadación do Goberno e da Consellería de Política Social e Igualdade, unímonos neste xesto conxunto de dor, solidariedade e condena, acompañando a familia, amizades e persoas achegadas nun momento de enorme impacto emocional para a comarca.

Numerosos veciños e veciñas e representantes institucionais participaron no acto, no que se gardou un minuto de silencio como mostra de respecto, apoio á familia e rexeitamento rotundo ante calquera forma de violencia.

Desde ambos concellos expresouse tamén o pesar institucional e o alcalde do Porriño, Alejandro Lorenzo, afirmou: “Condenamos con toda firmeza todo tipo de violencia, porque non ten cabida na nosa sociedade. Queremos transmitir todo o noso cariño á familia nestes momentos tan duros. O que hoxe vivimos é profundamente inxusto e doloroso. É unha perda irreparable para a súa familia e para toda a comunidade. Por iso, desde o Concello decretamos dous días de loito oficial, durante os cales as bandeiras dos edificios municipais ondearán a media asta e suspenderanse os actos de carácter festivo.”

A conselleira de Política Social e Igualdade, Fabiola García Martínez, estivo presente no acto e expresou: “Quero amosar a nosa máis firme condena e trasladar as nosas condolencias en nome de toda a Xunta de Galicia, de todo o Goberno galego e do presidente da Xunta á familia da vítima. Desde a Consellería de Política Social e Igualdade puxemos xa todos os mecanismos sociais e psicolóxicos a disposición da familia, así como os recursos sociais necesarios para atender á muller dependente á que a vítima coidaba, garantindo a continuidade da súa atención.”

Ademais, a alcaldesa de Mos, Nidia Arévalo, destacou a dimensión humana da perda para o seu municipio: “A vítima era veciña nosa, de Mos, unha muller traballadora e entregada ao coidado dos demais. A súa morte conmociona a toda a nosa comunidade. Como alcaldesa, e como muller, quero expresar o noso profundo pesar e a nosa solidariedade coa súa familia. Hoxe Mos está de loito, xunto co Porriño, porque esta perda é de todas e todos nós.”

Con este acto simbólico, O Porriño e Mos queremos manter viva a memoria da vítima e alzar a voz de forma unida contra a violencia.

O Porriño, 29 de xullo de 2025.- Esta tarde, ás 20:00 h na Praza do Concello do Porriño, gardarase un minuto de silencio en memoria da traballadora do Servizo de Axuda no Fogar (SAF), vítima dun homicidio acontecido esta mañá na parroquia de Atios.

O Concello do Porriño e o Concello de Mos únense neste acto de lembranza e condena, dado que a muller falecida era natural de Mos e estaba empadroada no Porriño.

Dende o Concello do Porriño queremos trasladar o noso pesar e apoio á súa familia, aos seus achegados. 

Convidamos a toda a veciñanza a participar nesta mostra de solidariedade.