Novas

A alcaldesa, Eva García de la Torre, recibiu este martes o nomeamento do Porriño coma ‘Cidade Amiga da Infancia’, outorgado por UNICEF, nun acto celebrado no Pazo de Exposicións e Congresos de Oviedo.

O Porriño é un dos 8 concellos de Galicia que vén de recibir este  recoñecemento que fora aprobado o pasado 26 de Outubro por UNICEF grazas á iniciativa do persoal da Oficina Municipal de Información Xuvenil (OMIX) do Porriño que iniciou o procedemento para que a vila se representase a esta convocatoria.

A alcaldesa, que estivo acompañada pola concelleira Lourdes Moure, e polo concelleiro Orlando Márquez, presidira o pasado día 20 o Pleno Infantil, no que as rapazas e rapaces plantexaran distintas iniciativas relacionadas cos espazos públicos, as barreiras arquitectónicas existentes, a peatonalización das rúas ou a eliminación do paso a nivel do centro do Porriño.

Resumo do proceso

O proceso para que O Porriño chegase a ser considerada por UNICEF coma ‘Cidade Amiga da Infancia’ empezara ao comezo do curso escolar 2017-2018: realizouse unha xuntanza coas directoras e directores dos centros de ensino para presentarlles o proxecto e valorar a posibilidade de organizar en cada centro talleres de participación, en especial no referente aos dereitos dos máis novos.

Ao mesmo tempo, adiantábanse nos traballos de elaboración do Plan de Infancia e Adolescencia do Concello do Porriño, que cubriu diferentes fases implicando, ademais dos centros educativos, a clubs deportivos, país e nais ou persoal técnico municipal.

Os talleres escomezaron hai máis dun ano en unha, dous ou tres aulas por centro, participando nos mesmos un total de 356 nenas, nenos e adolescentes de 19 grupos distintos, pertencentes aos  10 centros educativos existentes no concello.

Coma resultado celebrouse o primeiro Pleno Infantil no Concello o 28 de novembro de 2017 no que os representantes de cada centro, ademais de celebrar o Día dos Dereitos da Infancia, presentaron á alcaldesa as súas demandas, constituíndose o Consello Municipal de Infancia do Porriño.

Paralelamente se iniciara o labor de documentación e análise bibliográfico, coa intención de dar os primeiros pasos para coñecer a realidade da infancia e adolescencia no concello, as súas necesidades e demandas e así coma detectar situación de vulnerabilidade entre a poboación infantil e adolescente.

Coñecida a realidade e as demandas e opinión de cada un dos axentes participantes, elaborouse un documento base do plan cos obxectivos xerais de 5 grandes áreas e as actuacións concretas a realizar.

A participación seguiu nos meses de  marzo e abril deste ano materializando o seu traballo nun novo Pleno Infantil, o 18 de abril, con entrevistas individuais con técnicos municipais xuntanzas do órgano de coordinación interno (formado por persoal técnico de distintas áreas municipais), que finalmente deu a súa aprobación ás actuacións previstas.

A alcaldesa, Eva García de la Torre, vén de poñerse en contacto coa xefa de servizo do Punto de Atención Continuada (PAC) do Porriño para amosarlle  seu apoio e poñerse a súa disposición ante a situación que está a sufrir o persoal do mesmo.

García de la Torre lembra que o servizo neste PAC vense prestando en equipos de dous médicos e dous enfermeiros  que fan gardas de 17 ou 24 horas cada catro días: 8 médicos e 8 enfermeiras que cobren todos os días, as noites e as fins de semanas do ano.

Nos vindeiros días, por mor das vacacións de Nadal, baixas por enfermidade ou excedencias, o equipo contará con catro médicos menos o que suporá que os outros catro terán que realizar o mesmo traballo que facían oito.

A alcaldesa considera esta situación “intolerábel e inaguantábel” e denuncia á Xunta de Galicia por someter a estes profesionais a unha presión e carga de responsabilidade  totalmente insoportábel e por “tratar ás veciñas e veciños do Porriño cunha falta de respecto insultante e consideralos coma cidadáns de segunda”.

Eva García de la Torre lembra que no pasado Pleno, no que se aprobara, a proposta de EU-Son, e co voto en contra do Partido Popular, pedir a dimisión do conselleiro de Sanidade, Jesús Vázquez Almuiña, a responsábel de sanidade do grupo municipal do PP insistiu, mesmo increpando a postura do resto dos concelleiros da Corporación, que O Porriño conta cun bo servizo de saúde e gabou o traballo da Xunta neste sentido.

A alcaldesa subliña que a xestión de Alberto Núñez Feijóo e do seu conselleiro de Sanidade no que atangue á atención sanitaria das porriñesas e porriñeses pódese resumir nunha palabra:desprezo.

Este abafallo amósase no feito de que non ten consideración algunha polos médicos e enfermeiras que traballan no Porriño, non ten intención de mellorar os actuais servizos: nin o centro de saúde, nin ten en conta as súas necesidades en radioloxía, saúde mental ou pediatría.

Aquel desprezo amósase de xeito máis descarado no silencio diante das constantes solicitudes por parte do Goberno local do Porriño para manter unha xuntanza cos responsábeis da Consellería de Sanidade, solicitudes, como sucede con varias das remitidas por correo electrónico, que se eliminan sen abrilas sequera.

Veciñas e veciños do barrio da Vaquería, en Budiño, realizarán cortes de tráfico na estrada PO-510, para esixir, de novo ao Goberno de Galicia, que atenda as súas reivindicacións e que se deseñe unha ‘isleta’ central e pasos peonís entre os quilómetros 2,200 e 2,600.

Así o decidiron este xoves nunha xuntanza, á que acudiu  o tenente de alcalde, Manuel Carrera, e na que aprobaron solicitar permiso para realizar ese corte de tráfico todos os mércores-empezando polo vindeiro, o día 21 de novembro- de 1 a 1 e media da tarde, e denunciar, de novo, que o barrio está dividido por unha liña continua na estrada que fai imposible aos coches xirar para chegar ás casas  ou negocios e cruzar aos peóns que, ante o perigo que supón teñen que andar máis de un quilómetro.

A alcaldesa, Eva García de la Torre, que non puido achegarse hoxe ata a Vaquería, reiterou todo o seu apoio a esta reivindicación e lembrou que “hai xa máis de 6 meses que os responsábeis da Xunta comprometéranse a estudar á proposta dos habitantes desta parte do Porriño para rematar con esta situación e ata hoxe non deron sinais de vida”.

Os veciños amosaron o seu desexo de que na mobilización do vindeiro mércores haxa representantes de todos os grupos políticos do Concello, “porque este é un tema que afecta a toda a veciñanza, que divide a familias e no que temos que estar todos esixindo unha solución que ten que tomarse xa”.