Novas

Anuncio de consulta pública sobre o novo escudo heráldico e bandeira do Porriño

 

  • A cidadanía dispón de 15 días hábiles para presentar opinións e suxestións sobre as propostas deseñadas

O Porriño, 7 de agosto de 2025.– O Concello do Porriño abre un proceso de consulta pública para que a veciñanza poida coñecer e opinar sobre as propostas do novo escudo heráldico e da nova bandeira municipais, deseñadas coa colaboración da Comisión Heráldica da Xunta de Galicia.

A exposición pública das propostas estará dispoñible durante 15 días hábiles, tanto no Taboleiro de Anuncios do Concello como na súa Sede Electrónica. O obxectivo é garantir a máxima transparencia e participación cidadá neste proceso simbólico e representativo para a identidade do municipio.

Durante este período, todos os veciños e veciñas poderán consultar os deseños e presentar opinións, achegas ou suxestións a través do Rexistro Xeral do Concello.

Consulta o anuncio oficial e as propostas presentadas: 

CONSULTA PÚBLICA DO NOVO ESCUDO E BANDEIRA DO CONCELLO DO PORRIÑO

A aprobación definitiva do escudo e bandeira realizarase unha vez analizadas todas as achegas cidadás e emitido o ditame final por parte da Comisión Heráldica. 

O Concello convida á cidadanía a participar activamente neste proceso que definirá os símbolos oficiais do Porriño para as vindeiras xeracións.

07/08/2025 in Sen categoría

Yung Beef e Hard GZ encabezan o cartel do Negrita Music Festival do Porriño 2025

 

  • Esta terceira edición contará con 9 horas e música ininterrompida o vindeiro 6 de setembro 

O Porriño, 7 de agosto de 2025.- O Concello do Porriño presentou hoxe o cartel oficial da terceira edición do Negrita Music Festival, que se celebrará o sábado 6 de setembro. A xira española deste   festival escolleu O Porriño por terceiro ano consecutivo como única parada en Galicia, tras pasar por cidades como Santander e Barcelona.

A organización agarda superar os 10.000 asistentes que se reuniron na pasada edición, consolidando o evento como unha das citas musicais máis importantes do verán galego.

No cartel deste ano destacan dúas grandes figuras da música urbana:
Yung Beef, referente do trap e o underground español, e Hard GZ, o artista vigués que volve a Porriño tras o seu rotundo éxito na pasada edición. Xunto a eles, actuarán Cyril Kamer e La Pantera, nomes en auxe na escena nacional, así como unha selección dos DJs máis destacados do momento: Alvama Ice, Xiyo & Fernandez, e tamén os galegos Groove Amigos e Traffic House, que repiten participación grazas á excelente resposta do público o ano pasado. Completa o cartel Galicia Army, poñendo en valor o talento local e rexional.

Serán máis de 9 horas de música ininterrompida, mesturando directos, electrónica urbana e unha posta en escena que promete sorprender. 

O alcalde do Porriño, Alejandro Lorenzo, destacou a importancia de fomentar e apoiar as expresións culturais contemporáneas na vila: “O Negrita Music Festival é unha aposta firme por dinamizar a cultura e a economía local, ademais de ofrecer aos nosos veciños unha experiencia única que sitúa O Porriño no mapa musical nacional e internacional.”

Desde o Concello do Porriño seguimos a apostar por unha programación cultural diversa, actual e con proxección. A celebración do Negrita Music Festival non só achega á vila grandes nomes da música urbana, senón que tamén contribúe á dinamización económica, social e cultural do municipio.

07/08/2025 in Cultura e festas

Volve o Memorial Julio Gilsanz ao pavillón municipal do Porriño

  • O torneo, do que participarán catro equipos europeos, disputarase mañá, venres 8, e o sábado 9, con encontros ás 18.00 e ás 20.00 horas.
  • O alcalde Alejandro Lorenzo destacou no acto de presentación que serán dúas xornadas de altísimo nivel cheas de balonmán e sentimento

O Porriño, 7 de agosto de 2025.- Honrar á figura de Julio Gilsanz, fundador do Club Balonmán Porriño e presidente do mesmo durante moitos anos, é o obxectivo co que o Concello do Porriño organiza, en colaboración coa Federación Galega de Balonmán e o propio club porriñés, o Memorial Julio Gilsanz, un torneo que neste 2025 chega á súa segunda edición coincidindo co segundo aniversario do seu pasamento.

A casa consistorial acolleu esta mañá a presentación deste evento “que vai máis alá da competición deportiva e representa a memoria viva dunha persoa que deixou unha fonda pegada no noso deporte, tanto polos seus valores humanos como pola súa paixón polo balonmán”, sinalou o alcalde Alejandro Lorenzo. E de xeito paralelo, este torneo “será unha oportunidade única para ver en acción a grandes equipos europeos, por iso animamos a toda a veciñanza e aos amantes do balonmán a que se acheguen ao pavillón municipal para desfrutar dun torneo de altísimo nivel. Van ser dúas xornadas emocionantes, cheas de balonmán e sentimento.”

O presidente do Club Balonmán Porriño, Abel Estévez, incidiu na finalidade de “recoñecer con este evento o labor do que foi fundador deste club e manter o seu recordo nas novas xeracións”. O tamén concelleiro de Deportes, remarcou que “Julio foi un namorado do balonmán e do deporte en xeral” lembrando que foi directivo do Porriño Industrial FC. Ismael Martínez, adestrador do Club Balonmán Porriño, fixo una valoración da importancia do memorial a nivel técnico e Bruno López, presidente da Federación Galega de Balonmán, sinalou que dende a FGBM seguirán traballando para apoiar iniciativas como esta. Pola súa parte, Alicia Campo, capitana do Club Balonmán Porriño, destacou a importancia de disputar este memorial a modo de preparación de pretempada.

Son catro os equipos participantes e catro tamén os partidos que se disputarán no pavillón municipal. Ao club anfitrión, que lembremos é o actual subcampión de Europa, acompañarano o Mecalia Atlético Guardés (subcampión da EHF Cup tempada 2022/23), o Rocasa Gran Canaria (campión da EHF Cup nas tempadas 2015/16, 2018/19 e 2021/22) e o ABC Braga (participante na EHF Cup na tempada 2025/26). Mañá venres, ás 18.00 e ás 20.00 horas celebraranse as semifinais nas que se enfrontarán o Guardés contra o Gran Canaria e o Porriño contra o Braga. Xa o sábado, ás mesmas horas, disputarase o terceiro e cuarto posto e a gran final. A entrada é gratuíta.

Asistiron tamén ao acto de presentación Graciela Domínguez e José Luis Gilsanz, muller e irmá de Julio Gilsanz, e Manuel R. Novoa, director do Colexio Marcote, patrocinador do memorial.

O acto de presentación deste memorial serviu tamén para presentar a nova imaxe corporativa do Club Balonmán Porriño. Foron César Martínez e Beatriz Arias, representantes da empresa Juanita Banana, os responsables de explicar o cambio de nome ao galego, o deseño do escudo e logo e a páxina web.

O alcalde pechou o acto reafirmando a aposta do Concello do Porriño polo deporte. A través de eventos como o Memorial Julio Gilsanz, o municipio segue a impulsar iniciativas que fomentan a participación, o espírito deportivo e a memoria das figuras que foron claves no deporte local.

07/08/2025 in Deportes

Gran acollida do Campamento de Verán 2025 no Porriño, que recibe a visita do alcalde

 

O Porriño, 7 de agosto de 2025.- O Concello do Porriño está a celebrar o éxito da edición 2025 do seu Campamento de Verán, unha iniciativa que ofrece unha alternativa educativa, lúdica e segura para os nenos e nenas de entre 3 e 12 anos durante o período estival. O campamento, que se desenvolve desde o 30 de xuño ata o 5 de setembro, acolle a un máximo de 50 participantes por semana, facendo posible un ambiente próximo e adaptado ás necesidades das familias porriñesas.

O horario do campamento, cofinanciado polo Plan Corresponsables do Ministerio de Igualdad, Gobierno de España e pola Consellería de Política Social e Igualdade da Xunta de Galicia, é de luns a venres, de 8:30 a 14:30 horas, e cada semana está dedicada a unha serie de actividades variadas que fomentan a creatividade, o respecto, a solidariedade e a autonomía dos pequenos. Entre as propostas destacan obradoiros de cociña, manualidades, actividades de reciclaxe e diferentes saídas que enriquecen a experiencia dos participantes.

Esta semana, o alcalde do Porriño, Alejandro Lorenzo, visitou o campamento para compartir un anaco con nenos e nenas, participando activamente e coñecendo de primeira man o funcionamento das actividades. Durante a súa visita, os rapaces presentáronlle as súas mascotas: Patoliña, Cactusiño, Pingüiniño e Caneliña, que xa forman parte da experiencia lúdica e educativa do verán.

En relación ao éxito do campamento, o alcalde Alejandro Lorenzo destacou:
“É un orgullo ver como este campamento non só ofrece unha solución para a conciliación familiar, senón que tamén promove valores fundamentais e estimula a creatividade dos máis pequenos. Continuaremos apoiando iniciativas que poñan ao neno e á nena no centro, garantindo un verán divertido e formativo.”

O Concello do Porriño, a través da Concellería de Igualdade e do Centro de Información á Muller (CIM), reafirma o seu compromiso coa conciliación da vida persoal e laboral das familias e coa promoción dunha infancia feliz e saudable. Esta iniciativa enmárcase dentro do programa “O Porriño en favor da conciliación da vida persoal e laboral” e seguirá funcionando durante todas as semanas do verán, facilitando que as familias poidan organizarse mellor durante o período de vacacións escolares.

07/08/2025 in Educación e tecnoloxía, Igualdade

O Porriño recoñece a unha familia exemplo de talento e tradición

  • O alcalde Alejandro Lorenzo recibe no Concello a Toni Fernández, apicultor que vén de gañar un ouro na Paris Internacional Honey Awards, e á súa filla Lola, finalista do Concurso de Patrimonio Nacional de Pintura Infantil e Xuvenil

O Porriño, 7 de agosto de 2025.- Doce e colorido triunfo é o acadado por unha familia do Porriño. Toni Fernández representa a catro xeracións de apicultores que gañou un ouro no Paris Internacional Honey Awards 2025 coa súa marca Puramel Sacra, a única galega que conseguiu colarse entre as mellores deste  concurso de meles celebrado na capital francesa e que conta cos indicativos da IXP Mel de Galicia, Artesanía Alimentaria e Galicia Calidade, unha distinción que non só avala o produto, senón tamén o traballo dunha familia que leva 130 anos dedicada á apicultura.

Este éxito veu acompañado doutro, o da súa filla Lola Fernández que, cursando 6º de Primaria resultou finalista do XXXIV Concurso de Patrimonio Nacional de Pintura Infantil e Xuvenil polo cal recibiu un premio, da man da Súa Alteza Real a Infanta Doña Elena, nun acto celebrado no Palacio Real de El Pardo. Só dúas galegas lograron acadar esta distinción, situándose nun lugar destacado entre os máis de 3000 participantes.

“Esta familia representa os valores que máis apreciamos: dedicación, orgullo polo noso, respecto pola tradición e unha clara aposta polo futuro. O Porriño enteiro celebra con vós estes éxitos, que tamén sentimos como nosos”, indicou o alcalde, Alejandro Lorenzo, durante a recepción no Concello a pai e filla, que agradeceron este recoñecemento institucional. “Levar máis dun século facendo mel e que agora se valore así, tanto dentro como fóra de Galicia, é unha emoción enorme. Este recoñecemento non é só para min, é para toda a miña familia e para todas as persoas que apostan polo produto local e de calidade”, sinalou Toni Fernández que eloxiou o labor do seu bisavó, avó e agora do seu pai, tamén Antonio, que aos seus 84 anos segue en activo.

O premio de pintura, pola súa parte, pon en valor o talento artístico da xuventude e o traballo educativo nas aulas. Lola agradeceu do mesmo xeito ao Concello este recoñecemento, “faime sentir orgullosa e con moitas ganas de seguir traballando e mellorando” e tivo boas palabras tamén para “os meus profesores e compañeiros que me animaron a participar e a aprender cada día máis sobre a arte e o patrimonio, que son unha parte importante da nosa identidade.”

O Concello do Porriño demostra, unha vez máis, o seu compromiso coa promoción e apoio ao talento local. Así, a través deste recoñecemento público, “non só valoramos o esforzo e os éxitos dunha familia que representa o mellor do noso patrimonio cultural e produtivo, senón que tamén fomenta o orgullo colectivo e impulsa a continuidade dunha historia que une xeracións”.

07/08/2025 in Cultura e festas

Noelia Mouriño desfruta no Porriño da súa medalla de ouro antes de cruzar o Atlántico

  • O alcalde Alejandro Lorenzo recibiu á pivote porriñesa que vén de lograr o Campionato de Europa Sub-18 coa Selección Española de Baloncesto e apura os últimos días na súa terra natal antes de viaxar aos Estados Unidos

O Porriño, 7 de agosto de 2025.- Noelia Mouriño fóra recibida fai xusto un ano no Concello do Porriño por gañar o bronce coa Selección Española de Baloncesto no Mundial Sub-17 disputado en México e hoxe volve á casa consistorial despois de lograr o ouro de Europa Sub-18 e a piques de cumprir o seu soño na Universidade de San Francisco.

O alcalde Alejandro Lorenzo trasladoulle a esta moza de 18 anos e veciña de Torneiros os seus parabéns polo incremento do seu particular palmarés “o cal seguro, co mesmo esforzo e dedicación, seguirá medrando alá por onde vaias”. Neste sentido, o rexedor desexoulle moita sorte nesta nova etapa que comezará logo duns días de descanso na súa terra natal. Noelia que xa na visita do pasado verán anunciaba que a súa carreira deportiva transcorrería posiblemente nos Estados Unidos, de onde xa estaba a recibir chamadas de universidades que estarían dispostas a outorgarlle unha beca e contar con ela nos seus equipos, confesa que tivo unha oferta de Texas pero que finalmente despois de escoitar a experiencia doutras xogadoras españolas decidiuse por San Francisco, a onde irá coa súa compañeira de selección Aina Cargol.

“Para nós é un orgullo contar con mozos e mozas como Noelia, que levan o nome do Porriño por todo o mundo co seu talento, esforzo e valores. Esta medalla de ouro é un recoñecemento ao seu traballo, pero tamén unha inspiración para toda a nosa mocidade”, remarcou o alcalde.

Noelia representa o espírito de superación e traballo en equipo que distingue aos grandes deportistas e desde o Concello do Porriño deséxanlle todo o éxito na súa nova etapa nos Estados Unidos, seguros de que seguirá a acadar grandes fitos.

07/08/2025 in Deportes

Sergio Fernández Bacelo suma un novo mérito ao palmarés do Concello do Porriño

  • O alcalde, Alejandro Lorenzo, recibiu a este deportista veciño de Torneiros que vén de conseguir en Madrid a medalla de ouro en absoluto GI

O Porriño, 6 de agosto de 2025.- Sergio Fernández Bacelo suma un novo logro para o palmarés do Concello do Porriño. Trátase das medallas de ouro en absoluto GI e ouro no seu peso GI, sen perder ningunha loita en No GI, no Campionato Grappling Industries 2025. 

Con tal motivo, o alcalde, Alejandro Lorenzo, recibiuno na casa consistorial nun encontro no cal lle trasladou os seus parabéns polos méritos acadados e a súa traxectoria exemplar no ámbito deportivo. “Son moitos os deportistas que conseguen méritos e postos destacados nas diferentes modalidades e especialidades no ámbito do deporte”, sinalaba o alcalde. “Para nós é unha honra que todos vós levedes o nome do Porriño en tódalas competicións nas que participades polo mundo enteiro. E logros como os de Sergio son unha mostra de que o esforzo, a dedicación e o compromiso, son exemplo e motivo de orgullo para todo O Porriño”.

Sergio, de 24 anos e veciño de Torneiros, leva cinco anos practicando de xeito profesional o jiu jitsu e para el recibir este recoñecemento por parte do seu concello “é un orgullo inmenso. Este tipo de xestos dan moita forza para seguir adiante, mellorando e loitando por novos retos. Agradezo este detalle, que comparto con todas as persoas que me apoian no meu día a día. É un recordatorio de que o esforzo, a disciplina e a paixón polo deporte sempre teñen recompensa”, asegurou o deportista.

Con este acto, o Concello do Porriño reafirma o seu compromiso co deporte, recoñecendo públicamente os logros da súa veciñanza.

06/08/2025 in Deportes

O Concello do Porriño apoia a campaña do Bono Peixe

 

  • O alcalde Alejandro Lorenzo estivo esta mañá na praza de abastos promovendo esta iniciativa que aposta polo produto fresco e de proximidade, poñendo en valor o trato personalizado do comercio local

O Porriño, 6 de agosto de 2025.- O Concello do Porriño únese á iniciativa do Bono Peixe en apoio a este sector. “Continuamos impulsando e colaborando cos nosos comerciantes, que nos ofrecen a diario produto fresco e de calidade, xunto cun trato personalizado e de confianza”, explicaba o alcalde Alejandro Lorenzo nunha visita esta mañá á praza de abastos da localidade.

Nesta ocasión trátase dunha campaña da Xunta de Galicia para promover o consumo de produtos do mar adquiridos nas peixerías tradicionais e postos da praza de abastos, ademais de en supermercados que conten con peixería. As persoas interesadas deben descargar o bono desconto de ata 50 euros na páxina web bonopeixe.gal para poder gastalo nos diferentes establecementos e operadores comerciais participantes. En cada compra de peixe e marisco fresco o cliente pode obter un desconto do 25 % do importe, establecéndose como máximo 5 euros por compra.

O Concello do Porriño pon en valor así o papel fundamental das peixerías da praza de abastos na dinamización da economía local, na promoción de hábitos saudables e na defensa do produto fresco e de proximidade. “Mercar aquí é apostar polo noso, pola economía local e polo futuro do Porriño”, concluíu o alcalde.

06/08/2025 in Urbanismo, comercio e industria

O Concello do Porriño destina 175.000 euros en axudas ás comunidades de augas das parroquias

 

  • Publicadas as bases da nova convocatoria: o prazo para presentar solicitudes xa está aberto e rematará nun mes 

O Porriño, 6 de agosto de 2025.- O Concello do Porriño reafirma o seu compromiso coas parroquias publicando unha nova liña de axudas destinada ás comunidades de usuarios de auga, reforzando así o compromiso coa mellora das infraestruturas básicas e o benestar da cidadanía. As traídas do municipio poderán beneficiarse destas achegas ás que se destinarán un total de 175.000 euros. Desta contía, 95.000 euros estarán destinados á liña de mantemento de instalacións e 80.000 euros á liña de investimentos, mantendo o incremento realizado na anterior convocatoria, cando se duplicou o orzamento nesta última partida.

Dúas liñas de axuda: mantemento e investimentos

A primeira liña, enfocada ao mantemento, ten como obxectivo financiar a contratación de obras de reparación e a substitución de redes de distribución sempre que estas non superen os 50 metros lineais. Ademais, cubriranse gastos relacionados coas analíticas de control sanitario e cos traballos de mantemento e conservación nos sistemas de captación de auga, almacenamento, potabilización e distribución.

A segunda liña de axudas está destinada á execución de obras de investimento en instalacións que sexan propiedade das comunidades ou sobre as que teñan dereito de uso. Neste caso, inclúese a substitución de redes de distribución cando se superen os 50 metros de lonxitude.

Tamén serán subvencionables os gastos derivados da adaptación ao protocolo de autocontrol do abastecemento, en consonancia co programa de vixilancia sanitaria da auga de consumo da Delegación de Pontevedra da Consellería de Sanidade. Igualmente, cubriranse os custos derivados da elaboración do protocolo sanitario e os relacionados coa inscrición no Sistema de Información Nacional de Augas de Consumo (SINAC).

  • Accede ás bases pinchando na seguinte ligazón: 

BASES CONVOCATORIA AXUDAS COMUNIDADES DE AUGAS

Contías e condicións da axuda

Cada comunidade poderá optar a un máximo de 8.000 euros por cada liña de axuda, podendo alcanzar os 12.000 euros no caso de solicitar apoio en ambas as liñas. En ningún caso a contía total subvencionada poderá superar o 80 % do custo total do proxecto presentado.

O concelleiro Marcos Martínez, anunciou que as bases reguladoras xa están publicadas no Boletín Oficial da Provincia de Pontevedra (BOPPO) e que o prazo de presentación de solicitudes permanecerá aberto durante un mes. Tamén lembrou que as comunidades interesadas poden contactar co Concello para solicitar información ou resolver dúbidas.

Pola súa parte, o alcalde, Alejandro Lorenzo, destacou a importancia desta convocatoria sinalando que “é fundamental apoiar ás traídas para que poidan prestar o mellor servizo posible aos nosos veciños. Estes investimentos non só mellorarán a calidade da auga, senón que tamén contribuirán ao benestar de toda a veciñanza ao contar cun abastecemento seguro”.

Cómpre lembrar que o ano pasado concedéronse as axudas por importe íntegro, evidenciando o interese e a boa xestión das comunidades solicitantes.

Desde o Concello do Porriño faise un chamamento ao uso responsable da auga, especialmente nesta época de seca, tanto pola importancia de preservar este recurso como pola necesidade de garantir a súa calidade sanitaria.

06/08/2025 in Parroquias

O Porriño gaña industria e emprego coa ampliación das instalacións da empresa Eurobanan Galicia

 

  • O alcalde Alejandro Lorenzo visitou no polígono da Granxa esta compañía punteira no sector das froitas e hortalizas que xa iniciou os trámites legais para a súa expansión

O Porriño, 5 de agosto de 2025.- O crecemento dun proxecto empresarial asentado xa dende hai anos no Porriño é a última das novas no eido da industria e do emprego no municipio do Val da Louriña. Trátase da empresa Eurobanan Galicia SL asentada no polígono da Granxa, a onde se desprazou este martes o alcalde, Alejandro Lorenzo, para coñecer de primeira man o proxecto de ampliación de instalacións e o plan de crecemento que está a levar a cabo esta compañía dedicada á produción, selección, envasado, manufactura, importación, exportación, distribución e comercialización de froitas e hortalizas.

Dende o Concello do Porriño cualifican esta actuación como “un gran exemplo do potencial do noso tecido industrial”, remarcando “o noso compromiso de seguir colaborando e apoiando ás empresas na súa expansión e crecemento, como xeradores de riqueza e de oportunidades de emprego”, sinala o rexedor local. “É un pracer que os empresarios do Concello me conviden ás súas instalacións e sigan apoiándose na administración para lograr ampliacións e novos retos. Este é o camiño para seguir facendo medrar o Porriño”, engadiu.

Durante a visita, os responsables da empresa encabezados polo seu Director Xeral, Rafael Álvarez; o director de Administración, José Carlos Ferreira; a directora de Calidade, Apolonia Abreu; e o director  de Chef Maestro, Rubén Álvarez, amosáronlle as instalacións ao rexedor e explicáronlle de maneira máis pormenorizada os traballos de ampliación que se iniciarán previsiblemente antes de finalizar este ano co obxectivo de dar cobertura ao crecemento da demanda de produtos. O plátano de Canarias, con 10 millóns de quilos vendidos en 2024, é sen dúbida a estrela do seu catálogo. Álvarez resaltou o seu posicionamento “cun volume de negocio de preto de 86 millóns de euros en 2024 e un cadro de persoal duns 200 traballadores”. 

Lorenzo lembrou que o Concello continúa coas bonificacións para todas aquelas empresas que se instalen ou amplíen as súas instalacións no municipio, “por ser concello emprendedor, como non podería ser doutro xeito, tendo máis de 2.200 empresas e 3,5 millóns de metros cadrados de solo industrial”. O Concello do Porriño reitera deste xeito o seu compromiso co desenvolvemento empresarial e o impulso do emprego de calidade como motor de progreso e benestar para a vila.

05/08/2025 in Industria