Novas

Budiño prepárase para acoller a elite do ciclismo de montaña co V Trofeo XCO e o VIII Mini BTT Concello do Porriño

 

O Porriño converterase unha vez máis en epicentro do ciclismo de montaña coa celebración do V Trofeo XCO Concello do Porriño e o VIII Trofeo Mini BTT Concello do Porriño, que terán lugar os días 12 e 13 de abril de 2025 nos montes de Budiño. O evento, que contará con máis de 700 ciclistas participantes e unha previsión de 2.000 asistentes, foi presentado onte pola tarde no Centro Cultural A Forna de Budiño polo alcalde Alejandro Lorenzo, o concelleiro de Deportes Abel Estévez, o presidente da AD Avanza, David García, e un numeroso grupo de ciclistas do club, que quixeron acompañar o acto.

A proba de XCO, incluída no calendario da Real Federación Española de Ciclismo, celebrarase na tarde do sábado 12 e está dirixida a participantes de 12 anos en diante, puntuando para o ranking nacional. Pola súa parte, o Mini BTT, incluído no calendario da Federación Galega de Ciclismo, desenvolverase na mañá do domingo 13 e estará destinada a nenos e nenas menores de 12 anos.

O alcalde Alejandro Lorenzo destacou a importancia do evento para o municipio. “Esta proba consolídase ano tras ano como unha cita indispensable no calendario deportivo do Porriño. Supón un impulso non só para o deporte base e de competición, senón tamén para a dinamización económica e social do noso concello, especialmente na parroquia de Budiño.”

Pola súa banda, o concelleiro de Deportes, Abel Estévez, puxo en valor o traballo organizativo e o nivel de participación. “Falamos dun evento que reunirá a máis de 700 deportistas e milleiros de persoas no entorno natural dos montes de Budiño. É un orgullo colaborar coa Asociación Deportiva Avanza para seguir facendo do Porriño un referente no deporte galego e estatal.”

Durante o evento habilitarase unha zona específica para equipos e carpas, na que estarán presentes técnicos, xuíces e persoal de apoio, garantindo o correcto desenvolvemento das probas e a seguridade de participantes e asistentes.

O Concello do Porriño convida á cidadanía a achegarse e gozar dunha fin de semana chea de deporte, natureza e convivencia.

04/04/2025 in Deportes

O Concello do Porriño acolle unha xornada formativa sobre comunicación e autoemprego dirixida a alumnado de FP

 

O alumnado do Ciclo Superior de Marketing e Publicidade do IES Indalecio Pérez Tizón participou esta mañá nunha xornada formativa no Concello do Porriño, centrada na importancia da comunicación institucional como ferramenta fundamental para achegar á cidadanía a actividade municipal e, ao mesmo tempo, coñecer de primeira man as oportunidades que ofrece a contratación pública como vía de autoemprego.

Durante a visita, foron recibidos polo alcalde do Porriño, Alejandro Lorenzo, quen destacou a importancia da comunicación como unha ferramenta esencial para construír unha administración máis próxima, transparente e eficaz.

“Nun momento no que as administracións públicas necesitan comunicar mellor e ser máis accesibles, os profesionais do marketing e a publicidade teñen un papel esencial. Formarse nestes ámbitos abre portas non só no sector privado, senón tamén na colaboración coas institucións a través da contratación pública”, sinalou o rexedor.

Durante a visita, o alumnado tivo a oportunidade de coñecer de primeira man como se xestionan os procesos de contratación administrativa na administración local, co obxectivo de abrir novas vías de colaboración e promover a posibilidade de ofrecer os seus servizos á administración pública.

“A contratación pública non debe ser algo alleo nin complexo para quen quere emprender. Hoxe achegámosvos un pouco máis a esa realidade e desexamos que esta experiencia vos anime a poñer en marcha os vosos proxectos”, engadiu Lorenzo.

A actividade forma parte dunha iniciativa didáctica promovida polo equipo docente do IES Indalecio Pérez Tizón, que busca vincular a formación académica co mundo real e promover a cultura do autoemprego entre o alumnado.

03/04/2025 in Educación e tecnoloxía

O Porriño acolle a XXXVII Feira Apícola Rías Baixas cunha ampla programación para toda a familia

 

O Porriño prepárase para acoller, o vindeiro sábado 5 de abril, a XXXVII Feira Apícola Rías Baixas, un evento organizado pola Agrupación Apícola de Galicia en colaboración coa Asociación de Apicultores da Provincia de Pontevedra e o Concello do Porriño. Durante toda a xornada, que se desenvolverá na Praza do Cristo de 10:00 h a 20:00 h, o mel converterase no gran protagonista nunha celebración que mestura tradición, gastronomía e innovación apícola.

Hoxe tivo lugar a presentación oficial, na que participaron o alcalde de O Porriño, Alejandro Lorenzo, a delegada territorial da Xunta de Galicia en Vigo, Ana Ortiz, membros da Agrupación Apícola de Galicia, da IXP Mel de Galicia e da Asociación de Apicultores da Provincia de Pontevedra, así como autoridades municipais.

O alcalde do Porriño, Alejandro Lorenzo, salientou que “é un orgullo para o Porriño ser punto de encontro de expertos nacionais e internacionais que comparten coñecementos e experiencias en beneficio do sector apícola”. Tamén destacou “a importancia de atraer visitantes e dinamizar a economía local mediante eventos que poñen en valor a nosa tradición e cultura apícola”.

A delegada territorial da Xunta de Galicia en Vigo, Ana Ortiz, quixo manifestar o apoio do goberno autonómico a este tipo de iniciativas: “Desde a Xunta de Galicia sempre estaremos ao carón de proxectos que contribúan a poñer en valor sectores fundamentais para o desenvolvemento rural e a conservación do noso patrimonio natural”. Ortiz destacou, ademais, que “a Feira Apícola Rías Baixas é un exemplo de cooperación institucional que permite promover a excelencia e profesionalización dun sector esencial para Galicia”.

A feira comezará ás 10:00 e durará ata as 20:00, cunha programación que combinará actividades de divulgación e gastronomía. Entre as actividades destacadas, estarán as Xornadas Técnicas Internacionais de Apicultura, nas que se reunirá a expertos para abordar os retos do sector. Na Praza do Concello, tamén se celebrará un showcooking a cargo de Xulio Mato, do programa da TVG A voltas co prato, no que o mel será o ingrediente protagonista.

Ademais, haberá catas comentadas dos meles da IXP Mel de Galicia e da DOP Miel de la Alcarria, xunto cunha cata de queixos galegos con DOP premiados nas Catas de Galicia 2024. “Queremos que todos os asistentes vivan unha experiencia sensorial, degustando produtos de alta calidade e coñecendo de cerca o seu proceso de elaboración”, destacou o rexedor.

A parte máis lúdica incluirá o Bee Happy Market, un espazo de venda de meles e produtos artesanais, así como obradoiros infantís para achegar aos máis pequenos ao mundo da apicultura. Pola súa banda, o venres pola mañá terá lugar unha actividade didáctica para os centros educativos da vila, onde os escolares aprenderán sobre as abellas e a súa importancia na polinización.

Outra das propostas máis agardadas é a tradicional degustación do Pan do Porriño, que se celebrará ás 18:30. Tamén se organizará unha ruta de tapas nos establecementos locais e un sorteo de tres caixas con produtos galegos entre os asistentes á feira ou os clientes das tascas adheridas.

O evento converterá, un ano máis, ao Porriño no epicentro da apicultura en Galicia, demostrando o traballo colectivo e o compromiso co desenvolvemento sostible do sector.

 

 

 

03/04/2025 in Cultura e festas

As novas instalacións do Servizo de Atención Temperá do Porriño xa están en funcionamento

 

O Concello de O Porriño inaugurou hoxe as novas instalacións do Servizo de Atención Temperá, situadas na Rúa Doantes de Sangue nº 1. Este servizo, que xa se viña prestando en locais provisionais habilitados no Pavillón Municipal, mellora agora as súas condicións de atención grazas a un novo espazo deseñado especificamente para ofrecer un apoio integral ás crianzas de 0 a 6 anos e ás súas familias.

A conselleira de Política Social e Igualdade da Xunta de Galicia, Fabiola García Martínez, o alcalde de O Porriño, Alejandro Lorenzo, e a concelleira de Educación, Carolina González, acompañados por concelleiros da Corporación Municipal, persoal sanitario, equipos directivos de centros educativos e representantes de asociacións de nais e pais, percorreron as novas instalacións que xa están plenamente operativas.

O novo local, adquirido recentemente polo Concello cun investimento próximo aos 170.000 euros, ofrece mellores condicións de traballo e atención ao público. Conta cunha entrada independente, unha zona de recepción e atención, e tres salas específicas para fisioterapia, logopedia e psicoloxía. Estes espazos permiten desenvolver unha intervención interdisciplinar esencial para detectar e tratar posibles trastornos do desenvolvemento.

“Os servizos sociais son unha prioridade para a Xunta de Galicia que continuará destinando recursos ao mantemento de servizos de calidade para garantir unha atención accesible e especializada ás familias que o precisen.” destacou a conselleira Fabiola García Martínez.

O alcalde de O Porriño, Alejandro Lorenzo, salientou a importancia deste proxecto para o municipio: “Estas instalacións renovadas supoñen un gran avance na atención temperá, garantindo que os nenos e nenas que o precisan teñan acceso a un servizo de calidade, nun espazo adecuado e pensado para eles”.

Pola súa parte, a concelleira de Educación, Carolina González, puxo en valor a coordinación institucional que permitiu esta mellora: “Hoxe inauguramos un servizo renovado que responde ás demandas da nosa veciñanza. A colaboración coas entidades implicadas fixo posible que este espazo sexa un referente na comarca.”

O Servizo de Atención Temperá, en funcionamento no Porriño dende o ano 2022 grazas a unha subvención da Consellería de Política Social no marco da Rede Galega de Atención Temperá, ofrece ás familias un equipo de profesionais dedicado á avaliación e diagnóstico de trastornos do desenvolvemento nos nenos e nenas. Este servizo traballa áreas clave como o desenvolvemento psicomotor, cognitivo, da linguaxe e comunicación, da autonomía e da área social e afectiva. Coa apertura das novas instalacións, o servizo consolídase e mellora a súa capacidade de resposta ás necesidades das familias do Porriño.

O acto concluíu cun percorrido polas instalacións e declaracións aos medios de comunicación presentes.

 

02/04/2025 in Educación e tecnoloxía, Política Social, Sanidade

O Porriño celebra a presentación do Club Ciclista Louriña

 

O Concello do Porriño celebrou este domingo a presentación do Club Ciclista Louriña con motivo do seu décimo aniversario. A entidade, que naceu fai dez anos cun obxectivo moi claro: formar a ciclistas e ofrecerlles todas as ferramentas fundamentais para que poidan desenvolverse neste deporte, continúa a consolidarse como un referente no ciclismo galego e nacional.

O club conta actualmente con 150 licenzas e estrutúrase en cinco categorías: feminino, masculino, adaptado, escolas e master. Nas tres primeiras sitúase entre os dez primeiros dos seus respectivos ránkings: o equipo masculino é sexto, o feminino oitavo e o adaptado segundo. Ademais, é o único club galego cun equipo oficial na Copa de España en ambas categorías, tanto feminina como masculina.

Durante o acto, o alcalde do Porriño, Alejandro Lorenzo, destacou o traballo exemplar do club e a súa contribución ao deporte local. “O Club Ciclista Louriña é un orgullo para O Porriño. Non só polos seus éxitos deportivos, senón tamén pola súa aposta pola formación da base, creando unha canteira sólida e comprometida. Desde o Concello continuaremos a ofrecer todo o noso apoio para que sigan acadando novos éxitos”, declarou Lorenzo.

Pola súa banda, o concelleiro de Deportes, Abel Estévez, subliñou a importancia de contar cun club desta relevancia na vila. “O Louriña é un exemplo de esforzo, dedicación e profesionalidade. É admirable o traballo que realizan con todas as categorías, especialmente coa súa nova Escola Louriña, que permite que os máis pequenos e pequenas teñan unha primeira toma de contacto co ciclismo nun entorno seguro e formativo”, afirmou Estévez.

O Club Ciclista Louriña destacou nos últimos anos por ser o club de Galicia con máis campións galegos na categoría élite-sub 23. Ademais, foi o único na historia galega en acadar o título tanto en masculino como en feminino no mesmo ano, concretamente no 2023.

Este ano, a entidade decidiu reforzar o seu compromiso coa base coa creación da Escola Louriña, onde dous monitores traballan semanalmente, os martes e xoves, co obxectivo de formar aos futuros ciclistas da comarca.

Ademais do labor deportivo, o Louriña tamén actúa como organizador de probas de relevancia nacional como a Xarotos Gran Fondo, a Nocturna, a Challenge As Rías Baixas, o Gran Premio Concello do Porriño e o Trofeo Horacio Barros – O Porriño o Noso Encontro.

Grazas ao apoio de institucións como o Concello do Porriño, o club procura ofrecer os mellores medios para que os seus ciclistas poidan dar o salto ao profesionalismo. Un exemplo diso é a deportista americana Allison Mugral, que comezou no Louriña e conseguiu dar o salto ao ciclismo profesional.

O equipo feminino do club disputou dúas carreiras esta fin de semana da copa de España, o sábado en Betanzos e o domingo en Pontevedra, onde conseguiron por primeria vez na historia en Galicia, que un club galego de ciclismo ganase a xeral dunha proba Copa de España femenino coa bielorrusa Alina Abramenka, ademais de conseguir as metas volantes coa campioa rusa de pista Maria Rostovtseva.

01/04/2025 in Deportes

Cortes de tráfico por obras na Rúa Pío XII

 

O concello informa que, debido a obras na zona, haberá restricións de circulación na Rúa Pío XII durante o día de hoxe, luns 31 de marzo.

  • Horario: De 15:00 h a 19:00 h
  • Zona afectada: Rúa Pío XII, desde a Rúa Domingo Bueno ata a Rúa Manuel Rodríguez

Durante o horario indicado, a circulación estará restrinxida debido aos traballos de mellora na zona. Recomendamos aos veciños e veciñas planificar as súas rutas con antelación para evitar posibles contratempos.

Pedimos desculpas polas posibles molestias e agradecemos a comprensión da veciñanza durante a realización destas obras.

31/03/2025 in Tráfico

O prazo de inscrición para o Campamento de Semana Santa arranca o 1 de abril

 

O vindeiro martes, 1 de abril, ás 9:00 h, abrirase o prazo de inscrición para o Campamento de Semana Santa organizado polo Concello do Porriño. Esta iniciativa, destinada a nenos e nenas de entre 3 e 12 anos, desenvolverase en instalacións municipais os días 14, 15, 16 e 21 de abril, en horario de 8:30 a 14:30 h, cun aforo limitado a 50 participantes.

O alcalde do Porriño, Alejandro Lorenzo, salientou a importancia deste recurso para favorecer a conciliación familiar e laboral durante os períodos non lectivos. “Queremos ofrecer ás familias unha opción de calidade que permita ás nais e pais compaxinar as súas responsabilidades laborais co coidado dos seus fillos e fillas durante as vacacións de Semana Santa”, afirmou Lorenzo.

A concelleira de Igualdade, Carolina González, destacou tamén o compromiso do Concello coa inclusión e a igualdade de oportunidades. “Establecemos criterios prioritarios que aseguran que as familias en situación de especial vulnerabilidade teñan preferencia no acceso a esta iniciativa. Traballamos para que ningunha nena ou neno quede atrás por razóns económicas ou sociais”, explicou González.

O proceso de inscrición poderá realizarse tanto a través da sede electrónica do Concello como de maneira presencial no Rexistro Municipal, ata o luns 7 de abril ás 9:00 h. A selección dos participantes levarase a cabo mediante un proceso de baremación que combina a orde de presentación das solicitudes e a consideración de situacións de especial vulnerabilidade social, garantindo así un acceso prioritario ás familias que máis o precisan. Os criterios detallados de baremación están dispoñibles para a súa consulta na páxina web municipal.

FORMULARIO DE INSCRICIÓN

AUTORIZACIÓN PARA A RECOLLIDA DE PARTICIPANTES

O Concello do Porriño anima a todas as familias interesadas a presentar as súas solicitudes e aproveitar esta oportunidade de conciliación e desfrute para os máis pequenos e pequenas.

 

30/03/2025 in Educación e tecnoloxía, Igualdade

Sesións formativas sobre saúde mental no Concello do Porriño

 

O Concello do Porriño acollerá dúas importantes charlas formativas sobre saúde mental os vindeiros 3 e 24 de abril, ás 18:30h, na Sala de Comunicacións do propio Concello. As sesións, organizadas polo Consello Xeral de Colexios de Farmacéuticos de España e coa colaboración do Concello do Porriño, estarán impartidas pola farmacéutica local, Dª Celia Diz Rodríguez.

Estas charlas teñen como obxectivo mellorar a saúde e a calidade de vida da poboación rural, facendo especial fincapé no autocoidado e no papel fundamental que desempeñan os coidadores no tratamento da saúde mental.

O alcalde do Porriño, Alejandro Lorenzo, destacou a importancia destas sesións para o benestar da cidadanía: “A saúde mental é fundamental para o benestar persoal e colectivo, e a colaboración con profesionais como Celia Diz Rodríguez permite sensibilizar á poboación e mellorar a calidade de vida da veciñanza”.

Pola súa parte, a farmacéutica Celia Diz Rodríguez detallou o contido das charlas:
“A primeira sesión, o 3 de abril, está dirixida á cidadanía en xeral e falarase sobre o benestar emocional, os problemas de saúde mental, os estigmas e os mitos falsos ao redor destas enfermidades, así como a importancia da terapia e a adherencia ao tratamento. Na segunda sesión, o 24 de abril, abordaremos a figura do coidador, a súa importancia no proceso terapéutico e as mellores prácticas para apoiar aos seus seres queridos.”

Estas formacións teñen como obxectivo non só mellorar a saúde mental dos participantes, senón tamén promover o papel do farmacéutico como axente clave no ámbito asistencial e no apoio á saúde mental da poboación.

As sesións informativas son de acceso libre e están abertas a todos os interesados en mellorar a súa comprensión sobre a saúde mental e o autocoidado.

30/03/2025 in Benestar

O Concello do Porriño recupera unha subvención de 645.000 euros grazas á súa perseveranza

 

O Concello do Porriño logra finalmente recuperar unha subvención de 645.024,26 euros ao abeiro do Programa Provincial de Infraestruturas e Dotacións Singulares para a Recuperación Postcovid-19 (Programa REACPON), despois dun longo proceso administrativo e xudicial que avala os dereitos desta administración local.

O alcalde do Porriño, Alejandro Lorenzo, expresou a súa satisfacción por esta resolución favorable: “Esta é unha gran nova para O Porriño que demostra que a perseveranza e o traballo constante do goberno local deron os seus froitos. A xustiza deunos a razón e permitiunos recuperar un financiamento esencial para levar a cabo un proxecto que mellorará a accesibilidade, a seguridade e a calidade de vida dos nosos veciños”

Unha das primeiras actuacións de Lorenzo tras estrearse como alcalde no ano 2021

A negativa da Deputación Provincial de dar a coñecer os criterios de baremación asignados ao proxecto que foi solicitado en diversas ocasións polo Concello así como polo propio Alejandro Lorenzo, na súa condición de deputado provincial, deu lugar a presentación dun recurso de reposición contra a denegación inicial da subvención por parte da Deputación.

Este fundamentábase na falta de motivación suficiente para a exclusión do proxecto, xa que o acordo non xustificaba de maneira clara e concreta os criterios aplicados para a súa desestimación. “A utilización dunha expresión tan xenérica, sen unha exposición clara dos motivos que levaron á comisión de persoas expertas a excluír determinados proxectos e admitir outros, impedía a este Concello defenderse adecuadamente e cuestionar a corrección da decisión adoptada” salientou o rexedor.

Unha loita pola xustiza administrativa

A concesión desta subvención fora inicialmente denegada polo anterior goberno provincial en decembro de 2021, argumentando que o proxecto presentado polo Concello non acadara a puntuación mínima requirida. Ante esta situación, o Concello do Porriño iniciou unha batalla legal para defender os seus dereitos, presentando recursos administrativos e finalmente acudindo aos tribunais.

O Xulgado do Contencioso-Administrativo número 2 de Pontevedra deu a razón ao Concello do Porriño, anulando a resolución da Deputación que establecía a inadmisión a trámite por extemporáneo (fóra de prazo) do recurso de reposición presentado polo Concello do Porriño, ordenando a retroacción das actuacións aos efectos de ditar unha nova resolución. Posteriormente, a Deputación interpuxo recurso de apelación ante o Tribunal Superior de Xustiza, que foi desestimado.

Finalmente, o Pleno Provincial aprobou a concesión da subvención na sesión celebrada o 28 de marzo de 2025, a proposta da comisión de valoración, recoñecendo así o dereito do Concello do Porriño a recibir estes fondos.

Un proxecto clave para a mobilidade sostible

Os fondos recuperados destinaranse á execución do proxecto “Humanización da rúa Antonio Palacios”, unha iniciativa que inclúe a ampliación das beirarrúas, a creación dun carril bici e a renovación de servizos básicos como saneamento, abastecemento e iluminación pública. Ademais, mellorarase a seguridade viaria con novos pasos de peóns sobreelevados e sinalización adaptada.

O proxecto inicial será ampliado con actuacións específicas destinadas a mellorar e reforzar a seguridade nos centros educativos da zona, garantindo así unha contorna máis segura para os nenos e as familias.
O alcalde Alejandro Lorenzo destacou a importancia desta obra: “Este proxecto transformará unha das principais arterias do Porriño, facéndoa máis accesible, sostible e segura. Non só recuperamos unha subvención, senón que garantimos un futuro mellor para os nosos veciños”.
O Concello do Porriño reafirma así o seu compromiso coa mellora das infraestruturas e a defensa dos intereses da veciñanza.

28/03/2025 in Infraestruturas

O Porriño implementa o método CES para protexer ás colonias felinas nas rúas

 

O Concello do Porriño vén de asinar definitivamente un protocolo de actuación co obxectivo de garantir o máximo nivel de protección e benestar dos animais, así como de promover a responsabilidade e concienciación da cidadanía na defensa e preservación das colonias felinas

Por iso, levárase a cabo o método CES/CER co que se pretende tanto promover a protección destes animais como controlar adecuadamente a súa poboación mediante a esterilización e o control sanitario, onde as condicións o permitan. O método CES/CER (Captura- Esterilización – Solta) que se realiza nas colonias controladas de gatos urbanos no municipio do Porriño ten como finalidade a de conseguir a mellora da calidade de vida dos gatos, diminuír os problemas de superpoboación e xerar beneficios por unha adecuada integración na realidade existente no municipio do Porriño que contribúa á súa socialización e convivencia.

A través de este método, redúcese ou elimínanse os posibles problemas que poidan xurdir asociados á presenza de gatas e gatos urbanos non controlados; estabilizar o tamaño das colonias, diminuíndo o volume de animais ingresados nos centros de acollida; ademais de favorecer a colaboración dos colectivos de alimentadores/as e colaboradores/as (imprescindible en moitos casos para a efectividade dos programas de control).

O alcalde do Porriño, Alejandro Lorenzo, destacou a importancia deste protocolo afirmando que “É fundamental garantir o benestar dos animais e promover a convivencia harmónica co entorno urbano. Este método CES/CER permítenos abordar un problema de saúde pública e protección animal dunha maneira ética e efectiva”.

Neste sentido, a Concelleira de Medio Ambiente, Antía Carrera, engadiu que “A colaboración cidadá e o traballo das asociacións e voluntarios é clave para o éxito deste proxecto. Queremos promover un Porriño máis respectuoso cos animais e máis consciente da súa responsabilidade cara a eles”.

Para levar a cabo este método é necesario establecer un programa de xestión de colonias felinas urbanas. Programa cuxo obxectivo é establecer un protocolo para a autorización, rexistro e xestión das colonias por parte dos servizos municipais implicados, asociacións protectoras de animais e colaboradores/as autorizados/as polo Concello. Este proxecto apóiase no labor da sociedade e facilita a colaboración de persoas voluntarias, colectivos e asociacións sen ánimo de lucro de protección animal e veterinarios/as quen, xunto co Concello do Porriño, traballan pola protección animal, cumprindo a demanda e obriga de respecto cara aos animais.

Para ter en conta todas as colonias existentes é importante o apoio de todos, por iso se a cidadanía interesada na autorización/rexistro dunha colonia felina deberá presentar a solicitude de autorización/alta de colonia mediante unha declaración responsable, ao servizo municipal competente e encargado da súa xestión. A solicitude deberá incluír: o nome, o teléfono de contacto e o correo electrónico dos/as colaboradores/as propostos/as, localización da colonia e descrición do número de gatos e gatas.

 

 

28/03/2025 in Medio Ambiente