Seguridade

A nova unidade móbil da Policía Nacional permite renovar o DNI e Pasaporte no Porriño ao instante

 

Ademais do DNI, a VIDOC permitirá a veciñanza expedir ou renovar o pasaporte sen necesidade de desprazarse a outros municipios.

As persoas interesadas en renovar ou expedir os seus documentos a través desta unidade deben solicitar cita previa nas dependencias da Policía Local do Porriño.

 

O Porriño, 14 de maio de 2025.- O novo Vehículo Integral de Documentación (VIDOC) da Policía Nacional estivo hoxe no Porriño, facendo parada na Praza do Concello, onde os veciños e veciñas tiveron a oportunidade de expedir ou renovar ao momento o seu Documento Nacional de Identidade (DNI) e por primeira vez tamén o pasaporte sen ter que desprazarse a outra localidade.

Este novo servizo, dependente da Comisaría de Vigo-Redondela, supón un importante avance na prestación deste tipo de trámites, especialmente para os municipios que, como O Porriño, non contan con unidades fixas da Policía Nacional.

O alcalde do Porriño, Alejandro Lorenzo, foi un dos primeiros en renovar o seu DNI na unidade móbil, e destacou a importancia da iniciativa: “Este tipo de servizos melloran a calidade de vida da veciñanza e afondan na igualdade de acceso aos recursos públicos, especialmente para as persoas maiores ou con dificultades de mobilidade. Agradecemos á Policía Nacional esta aposta pola proximidade.”

O VIDOC permite realizar toda a tramitación no momento e nun único desprazamento, grazas á súa capacidade tecnolóxica para a emisión instantánea dos documentos. Ata agora, a expedición do pasaporte só se realizaba en dependencias policiais, e para o DNI era necesario acudir en dúas fases a unidades móbiles que logo se desprazaban novamente para a entrega dos documentos xa emitidos.

O vehículo regresará ao Porriño de forma regular. As persoas interesadas en renovar ou expedir os seus documentos a través desta unidade deben solicitar cita previa nas dependencias da Policía Local do Porriño.

 

 

14/05/2025 in Seguridade, Sen categoría

Aviso de cortes de tráfico polo Enterro da Sardiña – 5 de marzo de 2025

 

O próximo 5 de marzo de 2025, con motivo da celebración do tradicional Enterro da Sardiña, estableceranse restricións de tráfico nas seguintes rúas:

  • A partir das 18:00 h:
    Rúa Domingo Bueno ata a baixada da fonte da rúa San Sebastián.
  • Última hora da tarde:
    Rúa Peña e rúa Buenos Aires ata a ponte do Valo.

Ademais, infórmase do percorrido da comitiva do Enterro da Sardiña:

  • Saída ás 18:00 h desde o Círculo Recreativo Cultural.
  • Itinerario: Rúa Domingo Bueno, rúa San Sebastián, rúa San Bieito e rúa peonil ata a praza Arquitecto Antonio Palacios.
  • A última hora da tarde, a comitiva continuará dende a praza Arquitecto Antonio Palacios por rúa Peña e rúa Buenos Aires ata a ponte do Valo.

Pregamos desculpen as molestias e agradecemos a colaboración da veciñanza.

04/03/2025 in Seguridade, Tráfico

Cortes de tráfico e prohibicións de estacionamento polo desfile de comparsas do Entroido

 

O Concello informa de que, con motivo do Desfile de Comparsas que terá lugar o martes 4 de marzo, estableceranse as seguintes medidas de tráfico:

Prohibición de estacionamento

A partir das 14:30 horas estará prohibido estacionar nas seguintes rúas:

  • Rúa Manuel Rodríguez
  • Rúa Domingo Bueno, en ambos marxes á altura do Parque Infantil e no marxe dereito desde o cruce da Pontenova ata a farmacia de Atios, en dirección Tui.
  • Rúa Ramiranes

Corte de tráfico

A partir das 18:30 horas procederase ao corte de tráfico desde a Rúa Manuel Rodríguez ata a Praza Central.

Rógase á veciñanza que respecte as indicacións e colabore para garantir o correcto desenvolvemento do desfile.

Grazas pola súa colaboración.

03/03/2025 in Seguridade, Tráfico

Restricións de tráfico e estacionamento pola actuación da orquestra París de Noia

 

O Concello informa que, con motivo da actuación da orquestra París de Noia, prevista para o domingo 2 de marzo ás 19:00 h, estableceranse diversas restricións de tráfico e estacionamento na zona.

Sábado 1 de marzo
Desde as 20:00 h, estará prohibido o estacionamento na rúa Domingo Bueno, no tramo comprendido entre a intersección coa rúa Pío XII e a intersección coa Avenida de Galicia.

Domingo 2 de marzo
Desde as 12:00 h ata as 6:00 h (madrugada do luns), producirase un corte de tráfico na rúa Domingo Bueno, afectando o mesmo tramo: desde a rúa Pío XII ata a Avenida de Galicia.

Recoméndase planificar os desprazamentos con antelación e seguir as indicacións da Policía Local para garantir a seguridade e a boa organización do evento.

Grazas pola vosa colaboración.

01/03/2025 in Seguridade, Tráfico

A Policía Local do Porriño desactiva unha concentración ilegal de vehículos no polígono industrial Oceanis-Cataboi

A Policía Local do Porriño levou a cabo o pasado sábado 12 de outubro a “Operación Caba”, unha intervención destinada a desactivar unha masiva concentración de vehículos e persoas no polígono industrial Oceanis-Cataboi. Este evento, convocado a través de redes sociais, converteuse nun espazo para exhibicións de condución e carreiras ilegais, xerando un grave risco para a seguridade pública.

Desde hai varias semanas, as autoridades detectaron un aumento na concentración de turismos e asistentes no polígono os sábados pola noite. Inicialmente, estas reunións eran simples quedadas, pero co tempo evolucionaron cara a carreiras ilegais e manobras perigosas, como trompos e arranques que comprometían a seguridade de case un milleiro de persoas presentes.

A operación, en honra ao falecido policía local Manuel Cabaleiro Martínez, foi coordinada polo Xulgado de 1ª Instancia e Instrución número 1 do Porriño. Dispúxose un amplo dispositivo policial que incluíu o uso de drons e outros medios técnicos para documentar as infraccións. Ás 00:55 horas do 13 de outubro, a policía pechou sorpresivamente todos os accesos ao polígono, obrigando aos vehículos a saír por un único paso habilitado, onde se realizaron inspeccións exhaustivas.

Como resultado da operación, cinco condutores foron investigados pola presunta comisión dun delito contra a seguridade viaria (condución temeraria). Nove condutores enfrontan denuncias administrativas, con sancións de 500 euros e a perda de 6 puntos da súa licenza. Rexistráronse máis de 20 infraccións ao Regulamento Xeral de Vehículos, así como denuncias por circular sen seguro e sen cinto de seguridade.

As investigacións revelaron que este tipo de concentracións están a levarse a cabo en varios municipios da comarca e no país veciño, con organizadores que implementan medidas de vixilancia para detectar a presenza policial.

Entre os vehículos involucrados nestas carreiras ilegais atopáronse desde automóbiles con máis de 20 anos de antigüidade ata vehículos modernos, sorprendendo a participación mesmo dun vehículo fúnebre.

Os investigados foron citados perante o xulgado de 1ª Instancia e Instrución nº 1 do Porriño, onde catro deles aceptaron a pena de prisión e a retirada do permiso de condución solicitada polo Ministerio Fiscal, quedando un pendente de comparecer co seu avogado designado.

18/10/2024 in Alcaldía, Seguridade

O Porriño pon a proba os protocolos de evacuación en caso de incendio nos centros educativos

Escolares e profesorado dos centros educativos do Porriño viviron evacuacións realistas nos seus centros, guiados pola Policía Local. Soamente os directores/as dos centros estaban ao corrente destes simulacros, para que a experiencia fose o máis real posible.

Deste xeito, a Policía Local xunto con Protección Civil, simulou incendios con máquinas de fume estratéxicamente colocadas no interior dos centros para que se activaran tódolos protocolos de seguridade e evacuación. Incluso se contaba coa colaboración dos directores dos centros para `agochar´ algún neno/a nalgunha estancia e traballar a resposta nos profesores encargados, coa finalidade de comprobar si se cumpren os protocolos de evacuación e de afianzalos, tanto nos alumnos/as, coma nos mestres e resto de traballadores dos centros.

Nesta ocasión os centros nos que se fixeron os simulacros de evacuación foron o CEIPP Antonio Palacios, CEIPP da Ribeira, CPR Santo Tomás, CEIP Cruz Budiño, CPR Hermanos Quiroga e CEIPP Atios. O CEIPP Fernández López xa levara a cabo o simulacro no primeiro trimestre.

Estes teñen o obxectivo, polo tanto, de valorar a metodoloxía cun caso práctico realista: se a evacuación se desempeña no tempo e na forma adecuada, se reúnen no punto de encontro acordado e se os responsables comproban que están a salvo tódalas persoas baixo a súa responsabilidade.

Daniel Rodríguez, Inspector Principal Xefe da Policía Local do Porriño aclara que “esta é a metodoloxía de traballo idónea para fomentar os planes de autoprotección e, tanto o alumnado e o profesorado, teñan interiorizado unha evacuación nunha situación real”.

Pola súa banda, a Concelleira de Educación, Carolina González apunta que “dende o Concello, en colaboración cos centros educativos do Porriño, realizamos estos simulacros tratando de ser o máis reais posibles e nunha situación de risco, tal e como aparecen recollidos nos plans de evacuación dos propios centros. Trataremos de levalos a cabo todos os anos para que estean preparados en caso de que se presente unha situación na que teñan que evacuar o edificio”. 

Abel Estévez, Concelleiro de Seguridade engade que “é moi importante que este tipo de normas de seguridade e protocolos de evacuación se aprendan e interioricen, especialmente na rapazada, para que as poidan aplicar sen dubidar en caso de situación de risco”. O alcalde, Alejandro Lorenzo, concluíu destacando a importancia de “enfrentarse a determinadas situacións de emerxencia para poder detectar posibles fallos na resposta e poder actuar con dilixencia e efectividade no caso de incendio real” e agradeceu “o traballo da Policía Local e Protección Civil que se implica especialmente nestas actividades e tamén da comunidade educativa”.

17/06/2024 in Educación e tecnoloxía, Seguridade

A Policía Local intercepta a un conductor ebrio que circulaba con tres nenos no coche

A Policía Local do Porriño denunciou a un home, de 34 anos de idade, por conducir ebrio levando a tres menores de idade no vehículo.

Os feitos aconteceron ás 1 h do día 10 de marzo, cando no marco dun control preventivo de alcoholemia e seguridade cidadá na Avda. Buenos Aires, se da o alto a un vehículo e se require ao condutor a realización da proba de detección alcohólica, arroxando un resultado positivo cunha taxa de alcol de 0,81 mg/l en aire espirado.

O condutor está investigado por un presunto delito contra a seguridade vial por conducir baixo os efectos de bebidas alcohólicas. Cabe destacar que no interior do vehículo viaxaban tres nenos, polo que se inmobiliza o vehículo no domicilio do investigado, coa súa autorización. Ao tratarse de menores, dende a xefatura da Policía Local do Porriño deuse conta, ademais da fiscalía, aos servizos sociais do seu concello de procedencia.

ℹ️ A efectividade dos controis de alcoholemia e drogas ponse de manifesto co balance do último ano. No referente ás probas de alcoholemias positivas, vese unha redución dun 30% respecto do último ano, logo de estar dende o ano 2018, incrementándose paulatinamente. O 82% das mesmas foron detectadas en controis establecidos, o 18% pola comisión dunha infracción de tráfico, o 11% por presentar síntomas de alcoholemia e o 2% por accidente. Nos mesmos controis detectáronse 42 positivos en drogas.

Puede ser una imagen de 3 personas, coche, carretera y texto

Ver insights y anuncios

Anunciarte

Todas las reacciones:

1010

11/03/2024 in Alcaldía, Seguridade

A 15ª promoción de Policía Local da Agasp realiza prácticas no Porriño

O director xeral de Emerxencias e Interior, Santiago Villanueva, recibiu hoxe no Porriño xunto co alcalde Alejandro Lorenzo aos 78 integrantes da 15ª promoción de Policía Local que se está a formar na Academia Galega de Seguridade Pública (Agasp). Desde onte e ata mañá, o alumnado está a coñecer de primeira man como traballan os axentes da patrulla de Policía Local do municipio.
 
Trátase dun primeiro contacto coa actividade ordinaria dos axentes deste corpo de seguridade, antes de que comecen as súas prácticas este verán nos seus concellos de orixe. De feito, este mesmo venres remata a primeira parte da formación teórica na Academia, durante a época estival realizarán a parte práctica e en setembro volverán ás aulas a rematar a parte teórica e graduarse antes de tomar posesión.
Santiago Villanueva reafirmou o compromiso de colaboración da Xunta cos concellos galegos na selección e formación dos membros da Policía Local e puxo en valor que a AGASP é o centro de referencia na formación das forzas e corpos de seguridade no que xa se formaron máis de 3.000 alumnos nas promocións de Policía Local e das distintas promocións de categorías de mandos.
 
Cada semana pasan tamén polas instalacións centos de forzas e corpos de seguridade e efectivos de servizos de emerxencias para actualizar os seus coñecementos nos cursos do plan de formación continua da Academia.
 
O rexedor, pola súa banda, deulles a benvida ao Porriño e animounos a aproveitar estes días que pasarán cos axentes da Policía Local para aprender deles e empezar a disfrutar dunha profesión que de seguro lles traerá moitas satisfaccións e boas experiencias. Lorenzo destacou tamén a responsabilidade e profesionalidade da Policía Local do Porriño.
21/06/2023 in Alcaldía, Seguridade