Proxectos Europeos

O Goberno municipal do Porriño reestrutúrase para reforzar servizos esenciais e optimizar a execución dos fondos europeos

 

  • A reorganización inclúe a creación de novas concellerías e a remodelación doutras manténdose as mesmas dedicacións exclusivas e parciais, sen incremento ningún de gasto
  • Servicios sociais, saneamento, parroquias e formación e emprego serán as áreas que experimenten un maior fortalecemento, adaptándose ás novas necesidades da veciñanza e para o cal se incrementarán as respectivas partidas orzamentarias

O Porriño, 7 de xaneiro de 2026.- O alcalde do Porriño, Alejandro Lorenzo, anuncia unha actualización da estrutura do Goberno municipal coa finalidade de reforzar áreas clave e optimizar a capacidade executiva ante a chegada de proxectos estratéxicos financiados con fondos europeos, entre eles o PAI cun investimento global de preto de 11 millóns de euros. O rexedor subliñou que se trata dunha medida “pensada para dar un paso máis, consolidar o traballo destes anos e afrontar con maior capacidade técnica e organizativa os importantes proxectos que están a piques de iniciarse”.

Nesta liña, Lorenzo lembrou que este equipo “leva catro anos traballando de maneira estable e coordinada”, e que agora, aproveitando tamén que se dan determinadas circunstancias persoais nalgúns concelleiros, “é o momento de reforzar a estrutura para que O Porriño aproveite ao máximo os fondos europeos e cada proxecto se execute co nivel de esixencia que merece”. O alcalde insistiu en que “as cousas funcionan, e funcionan ben, pero agora entramos nunha fase que require máis dedicación e especialización debido ao volume de investimento que imos recibir e a infraestruturas que estamos creando, como as novas escolas infantís e o centro de día de Atios, e que se porán en servizo proximamente”.

Un dos principais axustes é a creación da Concellería de Saneamento, Servizos Rurais e Patrimonio Parroquial, que asumirá Marcos Martínez e que se coordinará en parte con outra nova área, a de Promoción da Identidade, Transformación dixital e Goberno Aberto a cargo de Bienvenido Estévez que continuará levando tamén Eventos e Festexos. O alcalde explicou que o obxectivo é dar un impulso adicional a un servizo esencial no rural, onde o Concello mantén obras continuas de ampliación da rede. 

“As nosas parroquias e o saneamento son unha das nosas máximas prioridades. Avanzamos día a día, ás veces de forma lenta pero sempre sen pausa, como sempre digo trátase dun servizo cunha altísima complexidade técnica e cun custo económico moi elevado. Esta nova concellería dálle máis forza a ese traballo e permítenos acelerar a súa execución”, afirmou Lorenzo. Nesta liña, é a destacar a inminente incorporación de sete persoas ao cadro de persoal do Concello como operarios de obras e servizos que, sen dúbida, reforzarán as actuacións neste campo, realizando acometidas pequenas e puntuais que axudarán a completar toda a rede, combinando así grandes e pequenas obras. “Poremos fincapé na mellora de todos os servizos xerais nas nosas parroquias, dende a mellora de viarios, a sinalización identificativa de cada un dos barrios, instalación de redes wifi e a comunicación co centro urbano a través dunha liña de autobús eléctrico”. Estas dúas concellerías complementaranse para preservar o patrimonio parroquial e potenciar todas e cada unha destas zonas rurais.

Outro eixo fundamental desta nova estrutura é a reorganización dos servizos sociais municipais, aos que se destinarán no vindeiro exercicio unha maior inversión, superando os dous millóns de euros ao ter en conta a dúas novas escolas infantís e centro de día de Atios. Estes dividiranse agora en dúas áreas especializadas para ofrecer unha atención máis eficaz e adaptada ás necesidades da veciñanza. A nova Área de Atención á Vulnerabilidade e Programas de Emerxencia, dirixida por Rosario Costas, centrarase na prevención e na resposta ás situacións máis urxentes. Pola súa banda, Bárbara Troncoso quedará á fronte da Área de Atención Cidadá, Asistencia Domiciliaria, Coidados e Benestar, reforzando o Servizo de Axuda no Fogar, os programas de envellecemento activo, a saúde comunitaria e a atención directa. “Con esta reestruturación gañamos eficacia, coordinación e capacidade para chegar mellor ás persoas”, explicou o alcalde.

A área de Emprego e Formación será asumida por Teresa Veloso, quen pasará a ocupar a dedicación exclusiva vacante trala xubilación de Rosario Costas. O obxectivo é fortalecer os programas de inserción laboral, a formación profesional e as novas competencias dixitais, nun momento no que o Porriño se prepara para importantes proxectos ligados ao desenvolvemento económico, no que se acondicionarán novas aulas de formación homologadas e salas de formación dual. 

Así mesmo, o alcalde informou de que, debido á baixa por maternidade da concelleira de Urbanismo, Promoción e Xestión de Vivenda, Medio Ambiente e Mercados, Antía Carrera, estas áreas serán asumidas temporalmente polo concelleiro de Industria, Contratación e Patrimonio, Carlos Martínez, garantindo deste xeito a continuidade e o normal funcionamento de todos os servizos municipais durante este período.

O rexedor destacou que esta reestruturación do equipo de goberno local non supón un maior gasto público, xa que se manteñen as mesmas dedicacións exclusivas e parciais e tódolos concelleiros conservan competencias. “Non é unha reforma por necesidade, senón por responsabilidade. Temos por diante proxectos europeos de enorme envergadura e queremos que se executen coa máxima eficiencia. Este Goberno funciona, e agora reforzámolo para funcionar aínda mellor”, concluíu.

07/01/2026 in Alcaldía, Proxectos Europeos

O Porriño impulsa unha transformación histórica cun investimento de 11 millóns de euros

  • O Concello vén de recibir por primeira vez unha subvención de Fondos Europeos que permitirá impulsar un plan integral de transformación urbana, social e ambiental, centrado na parroquia de Torneiros, na contorna do río Louro e no centro urbano, enmarcado na Axenda Urbana e Rural do Porriño

O Porriño, 3 de outubro de 2025.- O Concello do Porriño acadou por primeira vez na súa historia unha subvención dos Fondos Europeos de Desenvolvemento Rexional (FEDER) por un importe de 6.547.728 euros, para levar a cabo o seu Plan Integrado de Actuacións “O Porriño. O noso encontro”, cun orzamento total de case 11 millóns de euros (10.912.880 euros).

A resolución provisional da Dirección Xeral de Fondos Europeos, marca un antes e un despois na capacidade do Porriño para captar financiamento europeo, cun proxecto integral que aposta pola transformación urbana, a cohesión social, a resiliencia fronte ao cambio climático e a mobilidade sostible e eficiente. “É un fito histórico para O Porriño. Por primeira vez accedemos a unha subvención europea deste nivel, que nos permite dar un salto cualitativo no modelo de vila que queremos construír: máis sostible, máis cohesionada e pensada para as persoas”, explica o alcalde Alejandro Lorenzo. “Este logro non é só económico, senón tamén político e social: reflicte o traballo técnico, o consenso institucional e a capacidade do Porriño para pensar en grande e mirar cara a Europa”, engade.

O plan aprobado en pleno, o 24 de febreiro de 2025, inclúe cinco proxectos principais, tres deles con actuacións clave no núcleo de Torneiros para convertelo en saudable, inclusivo, integrador, sostible conectado e vertebrado, así levaranse a cabo melloras do espazo público, apostando pola súa renaturalización e calidade ecolóxica; programas de formación e capacitación para reducir as fendas socioeconómicas e impulso de redes de mobilidade sostible entre Torneiros e o centro do Porriño. Por outra banda, tamén se contempla actuacións na contorna do río Louro, coa creación de espazos naturais multifuncionais que reduzan o risco de inundación e, xa no centro urbano, o desenvolvemento dunha rede de espazos culturais para fomentar a cohesión social.

“Este proxecto representa un paso adiante cara a un Porriño máis verde, igualitario, centrado nas persoas e conectado, impulsando por exemplo o uso de transporte público para conectar tódalas parroquias co centro urbano. A implementación destes proxectos permitirá mellorar a calidade de vida da veciñanza, promover a inclusión social e avanzar na transición ecolóxica do municipio”, sinala Alejandro Lorenzo.

Todas estas accións forman parte da Axenda Urbana e Rural do Porriño, aprobada en pleno no mes de xullo de 2024, que senta as bases para o desenvolvemento sostible do municipio nos vindeiros anos.

 

 

03/10/2025 in Proxectos Europeos

ECOYOUTH impulsa a sustentabilidade no Porriño con actividades dirixidas á mocidade

O Porriño acolle esta semana múltiples actividades dirixidas á mocidade no marco do proxecto europeo ECOYOUTH, no que participa o IES Ribeira do Louro.

A primeira delas será un seminario sobre reciclaxe que se desenvolverá mañá mércores, de 11 h a 13 h, no Centro Cultural Municipal. O obxectivo desta actividade é crear conciencia e ensinar aos mozos e mozas hábitos de reciclaxe, sobre todo nas zonas rurais.

Participa como moderador Rafael Alonso, enxeñeiro municipal do Concello do Porriño; Ana Pazó, licenciada en Bioloxía, Mestra Composteira; Amador Ordóñez, profesor do IES Ribeira do Louro e coordinador do proxecto europeo ECOBUILD. _Playing to Ecobuild for learning to protect Environment_,  e Manuel Viñas, enxeñeiro forestal xefe de servizo de FCC Aqualia e delegado dos servizos para o Consorcio de Augas do Louro.

O venres, ás 14:30 h no Restaurante Manolo,  celebrarase unha mesa redonda centrada na xestión de residuos industriais, contaminación ambiental e aforro enerxético. Na mesma compartiranse opinións e melloras e falarase de futuras colaboracións entre a industria e o Concello do Porriño a tal fin. Participarán Amador Ordóñez e Juana Ibernón, profesores do IES Ribeira do Louro, José Angel Lorenzo, gerente do Cluster do Granito, David Sobral, secretario xeral da FEGAPE, Carolina González e Rafael Alonso, en representación do Concello do Porriño e representantes de ACIPOR e AHOSPOR.

Por último, o luns 10 de outubro terá lugar a Andaina ECOYOUTH que sairá ás horas do Concello do Porriño e está dirixida á mocidade, a partir dos 14 anos de idade. A andaina, que ten o obxectivo de promover o valor paisaxístico e cultural da zona, estará guiada por persoal experto en sendeirismo e na natureza para profundizar nos puntos máis importantes do seu percorrido, entre eles as Gándaras de Budiño.

Para participar nas actividades é necesaria inscrición previa que pode facerse a través das seguintes ligazóns.

Seminario de Reciclaxe:

https://docs.google.com/forms/d/e/1FAIpQLScZby-XSnACZDreJjeFmQOqnjonvMUt3j3W8OfvbTIPHkEPmA/viewform?usp=sf_link

Mesa Redonda:  https://docs.google.com/forms/d/e/1FAIpQLScj-5eF1FH24PNKypbDMw2MDOEJMIdhLiCt1RTqC3B3zG_8Fw/viewform?usp=sf_link  

Andaina ECOYOUTH: https://docs.google.com/forms/d/e/1FAIpQLSdsV23yiWoN32CK38AS_PN1AnCTOn9cJ9gURX24ek0j3FJTcA/viewform?usp=sf_link

04/10/2022 in Proxectos Europeos

O proxecto ECOYOUTH no Porriño: colaboración na educación e na sustentabilidade

Os participantes no proxecto EcoYouth, coordinado polo Concello do Porriño e financiado con fondos da Unión Europea, foron recibidos onte na casa consistorial do Porriño pola alcalde, Alejandro Lorenzo, a concelleira de Educación, Carolina González, e a concelleira Lourdes Moure.

Trátase dunha iniciativa na que participan o instituto porriñés Ribeira do Louro, a Universidade de Cabo Verde e asociacións de Portugal e Mozambique, que ten como obxectivo promover o empoderamento da mocidade na loita contra o cambio climático nos países participantes no proxecto.

As diferentes delegacións estarán no Porriño ata o venres desenvolvendo diferentes accións e actividades e seminarios dirixidos a empoderar á mocidade para facilitar a transición ecolóxica.

A primeira delas, tivo lugar esta mañá. Os participantes no proxecto visitaron as instalacións da Estación de Tratamento de Auga Potable dos Valos e a Estación Depuradora de Augas Residuais, en Guillarei.

O alcalde e a concelleira de Educación acompañáronos nesta primeira xornada onde profundizaron na xestión de residuos, a depuración e o ciclo integral da auga.

“Esta experiencia está a ser moi enriquecedora, non só para eles, tamén para nós”, afirmou o rexedor, “O coñecemento e os valores medioambientais son a base deste proxecto, pero tamén o é a convivencia que reforza sen dúbida a aprendizaxe”.

19/04/2022 in Educación e tecnoloxía, Proxectos Europeos

O Porriño comparte os seus coñecementos sobre a industria da pedra cos Balcáns

O alcalde do Porriño, Alejandro Lorenzo, e a concelleira de Educación e Programas Europeos, Carolina González, recibiron onte aos representantes dos centros de educación de Italia, Grecia e Rumanía que xunto co Porriño participan no proxecto “Higher Education – Entreprise platform for fostering, modernisation and sustainable growth in natural stone industry in Western Balkans”.

Trátase dun proxecto no que socios da Unión Europea trasferirán as súas competencias e coñecementos relacionados coa extracción, elaboración, colocación e comercialización no sector da pedra natural aos Balcáns.

No frente galego, representan ao proxecto o IES Ribeira do Louro, da man do seu impulsor Amador Ordoñez, que traballa baixo a Secretaría Xeral de Educación e Formación, e a Universidade da Coruña.

No que respecta aos países da Unión Europea, participarán centros de educación superior e FP de España, Italia, Grecia e Rumanía e como receptores do coñecemento participan universidades de Albania, Bosnia Herzegovina, Montenegro e Kosovo.

“O Porriño é un lugar de referencia na industria mineira polo que, ademais de exportar pedra podemos exportar os nosos coñecementos e experiencia a países cun gran potencial no sector, nos que as súas empresas institucións de formación carecen dos coñecementos e tecnoloxías que lles permitan acceder aos mercados internacionais”, explicou o alcalde, que aproveitou para dar a noraboa aos organizadores pola iniciativa xa que, “Para nós é un pracer manter estas sinerxias á vez que os nosos estudantes aprenden e se forman”.

11/03/2022 in Proxectos Europeos

O novo goberno municipal potenciará a atención cidadá e a transparencia, e dedicará unha concellería á terceira idade

 

O alcalde Alejandro Lorenzo fixo público hoxe o reparto de responsabilidades e delegacións entre os seus concelleiros. Destaca a creación das áreas de Atención Cidadá e Transparencia que dependerán da concelleira Antía Carrera.

A subliñar tamén a creación da área de Terceira Idade que desenvolverá Ascensión Rosario Costas. Trátase dunha concellería específica para dar resposta ás necesidades dos nosos maiores e garantir que a nosa vila ofreza a calidade de vida que merecen, traballando conxuntamente co resto de departamentos.

DISTRIBUCIÓN DE ÁREAS E DELEGACIÓNS 

O propio alcalde, Manuel Alejandro Lorenzo levará tamén as áreas de Economía e Persoal.

Abel Estévez, que será o primeiro tenente de alcalde dirixirá Seguridade, Policía Local, Protección Civil, Voluntariado, Deportes e Benestar Social.

Carolina González, segunda tenente alcalde, desenvolverá as delegacións de Educación, Uned e Programas Europeos; Igualdade; Sanidade e Normalización Lingüística.

Ramón Porto será o concelleiro responsable de Vías, Obras e Servizos

Antía Carrera levará Urbanismo, Patrimonio Municipal do Solo, Contratación, Comercio, Mercado, Atención Cidadá e Transparencia, e Medio Ambiente.

José Carlos González terá as competencias de Parques e Xardíns; Limpeza; Lixo e Cemiterios.

Bienvenido Estévez colle as competencias de Traída de Augas Veciñais; Asociacións; Parroquias; Novas Tecnoloxías; Xuventude; Cultura e Festas.

Por último, Ascensión Rosario Costas asume a nova área de Terceira Idade e ademais as deegacións de Industria, Turismo, Formación e Emprego.

“EQUIPO POR E PARA PORRIÑO”

As competencias repártense entre os oito concelleiros do equipo. A idea é desenvolver un traballo transversal e coordinado que beneficie á cidadanía”, explicou o alcalde.

Trátase de “un equipo por e para Porriño”, afirmou Alejandro Lorenzo como síntese do esquema de traballo que propón.

“Xorden problemas e demandas cotiáns que non afectan só a un ámbito senón ao conxunto do Concello e tamén a diversos sectores da poboación e por iso son necesarias actuacións integrais para optimizar os recursos dos que dispoñemos, aproveitar as sinerxías, e dar unha maior eficiencia e eficacia. calidade do servizo que prestamos”, engadiu o rexedor municipal.

Alejandro Lorenzo mostrouse satisfeito de ter un equipo cohesionado que traballe xunto e témolo“. E citou como proba diso” o traballo da brigada de Deportes que se encarga de arranxar os parques infantís; ou a cooperación das concellerías de Vías e Obras, Servizos, Limpeza Viaria, Parroquias e Asociacións nas actuacións urxentes de lavado e limpeza como a que hoxe se leva a cabo no entorno da Igrexa de Santa María”, concluíu Alejandro Lorenzo.

28/12/2021 in Alcaldía, Benestar, Cemiterios, Cultura e festas, Deportes, Educación e tecnoloxía, Emprego e formación, Igualdade, Limpeza, Medio Ambiente, Mocidade, Novas Tecnoloxías, Parques e xardíns, Patrimonio Municipal, Proxectos Europeos, Seguridade, Servizos sociais, Tráfico, Turismo, Urbanismo, comercio e industria, Vías e obras

Unha delegación de Porriño  viaxou a Cabo Verde polo proxecto EcoYouth

 

Unha delegación municipal desprazouse a Cabo Verde para participar nunha serie de sesións de traballo do proxecto “EcoYouth”, coordinado polo Concello do Porriño e financiado con fondos da Unión Europea. Trátase dunha iniciativa participada polo Instituto Porriñés de Educación Secundaria “Ribeira do Louro”, pola Universidade de Cabo Verde e por asociacións de Mozambique e Portugal. “EcoYouth” ten como obxectivo promover o empoderamento da mocidade na loita contra o cambio climático nos países participantes no proxecto.

A delegación do Concello estivo encabezada por Lourdes Moure, concelleira de Educación e integrada por Noelia de la Fuente, responsable da OMIX de Porriño e Rafael Alonso, enxeñeiro municipal. Durante a primeira xornada de traballo, a delegación porriñesa asistiu aos traballos de repoboación forestal e limpeza de praias na illa de Sao Antón realizados pola poboación autóctona en colaboración con dúas asociacións locais sen ánimo de lucro (“Amupal” e “Luipa”). Á conselleira Lourdes Moure Varela, conxuntamente con outros xefes das distintas delegacións, fai entrega da maior parte do material didáctico facilitado polo Concello.

 

Na segunda xornada da viaxe, a delegación porriñesa participou no “VI Congreso de Educación Ambiental dos Países e Comunidades de Lingua Portuguesa”.

O terceiro e último día da viaxe, acolleu a reunión de traballo final de todos os socios do proxecto “EcoYouth”. A delegación municipal participou xunto cos profesores que representaron ao IES Ribeira do Louro e con portavoces da Universidade de Cabo Verde e das asociacións ASEJANA -de Mozambique- e ASPEA -de Portugal-.

Tomáronse decisións relevantes no que atinxe ao proxecto que terán continuidade en Porriño, a desenvolverse en 2022.

07/11/2021 in Proxectos Europeos

O Porriño participou en Portugal na pimeira mobilidade do proxecto “EYFET” para a transición ecolóxica

O Concello do Porriño ven de participar en Portugal, na primeira mobilidade do proxecto “EYFET” para o empoderamento da mocidade para facilitar a transición ecolóxica.  O proxecto ten como obxectivo xeral o empoderar á sociedade, en especial aos mozos e mozas, e ás institucións públicas, empresas, Ong e demais axentes sociais, para que actúen como axentes de cambio para o desenvolvemento ambiental e sostible.

Está liderado polo Concello do Porriño, a través da Concellería de Proxectos Europeos, dirixida pola concelleira socialista Lourdes Moure Varela. Como promotor do proxecto, O Porriño participou conxuntamente cos seus socios na primeira das 4 mobilidades previstas, celebrada entre os días 15 e o 20 de xuño, en Lisboa e Castelo dá Vide.

 

En representación do Concello do Porriño, asistiron Rafael Alonso Lago, enxeñeiro municipal e Noelia de la Fuente Pérez, Técnica no departamento de Educación e Mocidade, xunto con representantes do IES Ribeira do Louro. 

 

Xunto co Concello do Porriño e o Instituto Ribeira do Louro, participan deste proxecto EYFET, en calidade de socios, a Associação Portuguesa de Educação Ambiental (ASPEA) com sede en Aveiro; a Universidade de Cabo Verde e a Associação de Educação de Jovens e Adultos de Nampula (Mozambique).

21/06/2021 in Proxectos Europeos

O Concello abre a fase informativa do proxecto internacional de empoderamento da mocidade contra o cambio climático, financíado pola UE

O Concello do Porriño iniciou a fase informativa cunha primeira reunión con diversas asociacións para explicarlles o proxecto sobre mocidade e cambio climático no abeiro do Programa de Desenvolvemento das Capacidades da Mocidade, xestionado directamente pola Comisión Europea e cun orzamento total de 150.000€.
O proxecto internacional liderado polo Concello de Porriño “inclúe accións de capacitación con cursos, seminarios e campamentos formativos, e accións de mobilidade coa organización de eventos no Porriño e nos países participantes que son Portugal, Cabo Verde e Mozambique”, segundo explicou Lourdes Moure, concelleira de Educación e Fondos Europeos.
Moure Varela presidiu esta primeira reunión de traballo convocada a través da Oficina Municipal de Información Xuvenil (OMIX) e coa colaboración do profesor Amador Ordóñez, director do proxecto. Asistiron representantes das asociacións: Amas de Casa, “As Mimosas” de Carracido; Centro Cultural de Carracido; e representantes da entidade local menor de Chenlo, Casal Chan Budiño e San Xurxo de Mosende.
Xunto co Concello participan as ong’s ASPEA (Asociación Portuguesa de Protección Ambiental) e a mozambicana ASEJANA (Asociación para a Xuventude e Educación de Adultos de Nampula). Tamén o centro de ensino porriñés IES Ribeira do Louro en representación da Consellería de Educación da Xunta de Galicia e finalmente a Universidade de Cabo Verde.
O proxecto denominado “EYFEC” (siglas en inglés de “Empowering Youth for Facilitating Ecological Transition”) ten como obxectivo empoderar á mocidade e ás institucións públicas e ás ong’s como axentes de cambio para o desenvolvemento ambiental sostible, obxectivo que cobra especial importancia no contexto actual de crise económica provocada pola pandemia sanitaria.

07/04/2021 in Educación e tecnoloxía, Proxectos Europeos