Parques e xardíns

Arrancan as obras de construción dun novo gran parque no corazón do Porriño

O Concello do Porriño inicia hoxe un ambicioso proxecto de transformación urbana co comezo das obras para a creación dun novo espazo público entre as rúas Antonio Palacios e Pío XII. Estes traballos, que inclúen a humanización da Rúa Pío XII, representan a primeira fase da construción dun gran espazo libre de lecer destinado a revitalizar o centro urbano e promover un urbanismo máis amable e accesible.

O obxectivo principal deste proxecto é dar uso á mazá interior delimitada polas rúas Antonio Palacios, Avenida Domingo Bueno e Rúa Pío XII.

O novo deseño prevé a creación dun parque completamente aberto, onde os distintos usos e espazos estean interconectados. Incluiranse áreas de lecer, descanso, reunión e convivencia, con bancadas integradas e bancos, incrementarase a vexetación e crearanse zonas de sombra que fomenten o uso da área.  

Ademais, melloraranse as características de acabado e circulación da Rúa Pío XII utilizando pavimento pétreo que continúe coa estética do parque. A actuación nesta rúa incluirá a renovación de todas as redes de servizo como abastecemento, saneamento, gas ou iluminación pública.

Unha das metas máis relevantes deste proxecto é recuperar a rúa como un lugar de socialización, garantindo a seguridade de peóns e ciclistas. Para iso, a Rúa Pío XII integrarase plenamente no parque, favorecendo a comunicación peonil co centro da vila e mellorando unha área que actualmente presenta malas condicións.

Entre as distintas zonas que se proxectan, destaca un parque infantil, que se redeseñará cunha xeometría circular en diálogo co resto da estética. Incorporaranse elementos de xogo en harmonía coa arboleda existente, creando unha contorna segura e atractiva para os máis pequenos.

“Este proxecto non só transformará a paisaxe urbana, senón que tamén creará un espazo inclusivo e dinámico, onde os cidadáns poidan gozar dunha contorna máis saudable e socialmente activa. Estou seguro que se converterá nun punto de encontro para toda a veciñanza”, explicou o alcalde, Alejandro Lorenzo.

O rexedor explicou que “as obras desenvolveranse buscando o menor perxuízo posible, sobre todo tendo en conta que coincide coas datas de Nadal, polo que estableceremos alternativas de circulación para que o noso comercio non se vexa afectado”.

Lorenzo concluíu explicando que as xestións para a segunda fase o proxecto están moi avanzadas. “Estamos ultimando a adquisición dos terreos necesarios para executar estas obras e aproveito para reiterar o meu agradecemento aos propietarios pola súa disposición á facilitar ao Concello que este gran parque sexa pronto unha realidade”.

28/10/2024 in Alcaldía, Parques e xardíns, Vías e obras

Comezan as obras do novo parque infantil do Outeiro, en Atios

O Concello do Porriño deu comezo xa as obras de construción dun novo parque infantil no Outeiro, en Atios. Este novo espazo, que como o resto dos proxectados no municipio este último ano responde á necesidade de crear e mellorar as zonas públicas de xogo para cativada, está situado no barrio dos Galegos, que non conta cun parque infantil.

O concelleiro de Parques Infantís, Marcos Martínez, explicou que neste momento está a acometerse a construción dun firme de formigón para a preparación do terreo, que será cuberto por pavimento de céspede artificial antiestático.

A zona de xogo contará con varios elementos como o un tobogán de 1,5 m de altura en caída, dous columpios e un balancín.

Instalarase tamén unha mesa de xogos. No mesmo recinto, que estará valado para garantir a seguridade dos máis pequenos, habilitarase tamén un parque biosaudable con varios elementos.

Estas obras requiren unha inversión de máis de 30.000 euros financiado no 70% con fondos autonómicos.

08/10/2024 in Alcaldía, Parques e xardíns

Avanzamos na creación dunha gran zona verde no centro urbano

O Concello do Porriño deu hoxe un paso importante na humanización do seu centro urbano dotando de partida orzamentaria un dos proxectos urbanísticos de maior impacto: a humanización da contorna do centro social que acondicionará as rúas Antonio Palacios, Domingo Bueno, Ramón González e Pío XII creando un gran espazo público.
 
A goberno municipal aprobou definitivamente a modificación orzamentaria que consigna a aportación municipal comprometida no convenio asinado coa Deputación de Pontevedra para executar a primeira fase do proxecto. Concretamente 460.000 euros, o 33% do orzamento total. Simultaneamente, a administración local está a adquirir os terreos necesarios para levar a cabo estas obras.
 
Este proxecto consiste na creación dun gran espazo público pensado para dar prioridade á mobilidade peonil e máis importancia ás zonas verdes, ao tempo que se limita o paso de vehículos. Para conseguilo está prevista a creación dun espazo contínuo, accesible e verde, no que se mellorará a comunicación peonil entre o centro urbano e a rúa Pío XII, crearanse novas zonas de convivencia baixo a sombra de novas especies arbóreas e buscarase a apertura da contorna do centro social coa rúa e o parque, ademais de executarse a renovación integral da zona de ocio infantil. Ao mesmo tempo, na calzada de Pío XII renovaranse todas as redes de servizos e dotarase dunha plataforma única que conecte coa nova zona verde da contorna, reducirase o tráfico e a súa velocidade.
13/05/2024 in Parques e xardíns, Urbanismo, comercio e industria, Vías e obras

Porriño completa o proxecto que transformará o antigo Campo da Feira con dúas novas actuacións

 

A humanización do antigo campo da feira do Porriño coñecido agora como Parque Infantil será en breve unha realidade logo de dúas recentes licitacións de obras que complementan a que xa está a piques de rematar e que supoñen, todas xuntas, unha inversión que supera o millón de euros.

O obxectivo é convertela nunha gran zona verde con arboredo, un espazo a modo de escenario e gradas e unha área de xogo infantil na que se inclúan chorros de auga, os primeiros no municipio.

O alcalde, Alejandro Lorenzo, visitou esta tarde o lugar no que se están levando a cabo as obras. “Co paso dos anos este parque foi deteriorándose e perdeu o seu atractivo deixando de ser un lugar de paseo e desfrute para nenos e adultos, que é o que precisamente se persegue agora con este proxecto”, explica o alcalde, lembrando que se sitúa nunha das entradas ao casco urbano, “de aí que as obras de humanización comprendan tamén a mellora da contorna, a avenida Domingo Bueno e a rúa Parque Infantil, que o Concello acometerá co fin de unificar a zona do parque con San Sebastián e a zona peonil de San Bieito”.

Para a realización desta obra que actualmente está en execución o Concello de Porriño e a Axencia de Turismo de Galicia asinaran un convenio de colaboración cun orzamento de 498.213,12 euros. A esta cantidade hai que sumarlle agora dúas novas inversións, que supoñen unha inversión total de 1.153.056 euros.

Por unha banda, a Xunta de Galicia vén de sacar a licitación por 224.843,45 euros as obras de restauración do templete de San Luís, obra do arquitecto Antonio Palacios que foi acceso a primeira liña da rede de Metro de Madrid e que se trasladou ao Porriño no ano 1970. A Consellería de Cultura, Educación, FP e Universidades publica o inicio do proceso de contratación desta obra que contará cun prazo de execución de cinco meses para resolver as diversas patoloxías que afectan ao estado da estrutura e adecuar o contorno para mellorar a súa presenza no lugar.

E, por outra parte, o Concello do Porriño sacaba a licitación, tamén nos últimos días, por 430.000 euros a obra de humanización da rúa Parque Infantil entre rúa Salgueiro e Avenida Domingo Bueno.

 

17/01/2024 in Parques e xardíns, Vías e obras

Porriño dá comezo ás obras que transformarán o antigo Campo da Feira cunha inversión dun millón de euros

 

  • Supón a humanización e acondicionamento dunha gran área verde de descanso, con gradas para acoller eventos e chorros de auga nunha nova zona de xogo infantil, que se completará coa mellora das rúas da contorna conectando o parque co casco urbano
  • Concello e Xunta financian o proxecto ao cal se suma a restauración do Templete de San Luís

 

A humanización do antigo campo da feira do Porriño coñecido agora como Parque Infantil, nome dunha das rúas que o bordea, será unha realidade a comezos de 2024. Converterase nunha gran zona verde con arboredo, un espazo a modo de escenario e gradas e unha área de xogo infantil na que se inclúan chorros de auga, os primeiros no municipio.

O alcalde, Alejandro Lorenzo, visitou esta mañá o lugar das obras, cuxa execución darán comezo mañá mesmo e prolongaranse durante un prazo de cinco meses. O proxecto acométese logo da sinatura dun convenio de colaboración entre o Concello do Porriño e a Axencia de Turismo de Galicia e que supón unha inversión total de 498.213,12 euros, aos cales hai que sumar uns 250.000 euros para acondicionar tódalas rúas da contorna.

“Co paso dos anos este parque foi deteriorándose e perdeu o seu atractivo deixando de ser un lugar de paseo e desfrute para nenos e adultos, que é o que precisamente se persegue agora con este proxecto”, explica o alcalde, lembrando que se sitúa nunha das entradas ao casco urbano, “de aí que as obras de humanización comprendan tamén a mellora da contorna, a avenida Domingo Bueno e a rúa Parque Infantil, que o Concello acometerá tamén neste mesmo período de tempo”. Deste xeito, o pequeno muro que serve para delimitar o parque desaparecerá xerando un único espazo aberto, con beirarrúas e pasos de peóns empedrados que conectarán directamente coa zona peonil de San Benito.

Posta en valor do Templete de San Luis

De xeito paralelo executaranse as obras de restauración integral do Templete de San Luís. Uns traballos cun orzamento a maiores doutros 250.000 euros financiados integramente pola Xunta de Galicia. O obxectivo é poñer en valor un dos emblemas patrimoniais do Porriño autoría do tamén porriñés arquitecto Antonio Palacios.

Respectarase a súa localización, mellorando a súa conexión e visibilidade. Dispoñerase ao seu arredor un espazo a modo de gradas vexetais que lle darán un novo uso como pano de fondo para pequenos eventos. Ademais, enlazarase coa ruta xacobea e crearanse novos espazos de descanso e xuntanza, coa instalación de bancos, e máis zonas de sombra.

“Coa posta en marcha deste proxecto o que pretendemos é recuperar a antiga esencia da carballeira e campo da feira e facer deste espazo un lugar de encontro, mellorando a mobilidade peonil, conectándoo co casco urbano, o Camiño de Santiago e o cemiterio municipal, aumentando a zona verde e, por suposto, poñendo en valor o Templete de San Luís para fomentar a recuperación histórica e patrimonio inmaterial do lugar”, remarca Alejandro Lorenzo.

Área de xogo infantil con gran vinculación á auga

Outro dos principais obxectivos desta iniciativa é crear un espazo atractivo e útil para os máis pequenos da casa. Por iso, e á vista de que a zona de xogo existente actualmente non cumpre as súas funcións, dispoñeranse novos elementos para todas as idades. Ademais instalaranse uns chorros de auga para xogar e refrescar, pequenos e tamén maiores en época estival, que se integrarán na praza central.

23/08/2023 in Parques e xardíns

Danos ao mobiliario urbano

Dende as concellerías de Parques e Xardíns e Limpeza denuncian que nos últimos días téñense producido unha serie de danos contra o mobiliario urbano, aparecendo pintadas nos elementos de xogo dos parques infantís, colectores de lixo, marquesinas e outros elementos que se atopan na vía pública.

Isto conleva que teñan que ser inutilizados para a súa reparación e un perxuízo económico que pagamos todos, o mobiliario urbano é patrimonio de todas as veciñas e veciños do Porriño. Por iso, dende o Concello do Porriño facemos un chamamento ao civismo e a que non se repitan estas accións que perxudican ao conxunto da cidadanía.

Lembramos que estes feitos son constitutivos de infracción administrativa, contemplando sancións económicas que van dende os 100 aos 600 euros

31/07/2023 in Alcaldía, Parques e xardíns, Vías e obras

O Parque Piñeiro estreará novas zonas de xogo e espazos de lecer

O Concello do Porriño está a executar as obras de reacondicionamento e mellora do Parque Piñeiro, en Torneiros, unha área de xogo que constitúe o principal punto de encontro para os nenos e nenas da parroquia e da que gozan preto de 800 pequenos e pequenas que residen na súa contorna, ademais do alumnado dos centros educativos próximos que o utilizan como espazo de aprendizaxe ao aire libre.
 
“A situación que presentan moitos dos elementos instalados nesta área infantil poñen en perigo a seguridade dos nenos e nenas que diariamente concorren ao mesmo, polo que resultaba imprescindible a súa reparación”, explicou o alcalde, Alejandro Lorenzo.
 
O proxecto, que conta cun orzamento de 44.103 euros, reacondicionará un espazo de 1.300 m2 e inclúe a creación unha nova área de xogo, ampliando a oferta de actividades de lecer a nenos e nenas de idades post-infantís nunha área de 550 m2.
 
Os traballos contemplan a reparación e substitución de elementos de xogo danados, a reparación do pavimento, instalación de novos elementos como un novo tobogán, unha tirolesa de 20 metros de lonxitude ou unha pirámide de 3,5 m de altura, así como novo mobiliario urbano que fará deste un espazo verde para distrute de todas e todos.
 
Cabe destacar que se integrarán os xogos habituais con xogos accesibles e adaptados para nenos e nenas con problemas de mobilidade, para todas e todos poidan facer uso por igual deste parque.
“Queremos ampliar a oferta de actividades de espazos e actividades de lecer en Torneiros e no resto do Porriño, ofrecendo novas posibilidades de xogo activo para fomentar o desenvolvemento físico, cognitivo, emocional e social dos máis pequenos”, concluíu o rexedor.
 
Esta é unha das intervencións impulsadas polo Concello do Porriño para a posta en valor da parroquia de Torneiros, unha das máis poboadas do municipio con 3.950 habitantes. Os polígonos residenciais, onde se atopa o Parque Piñeiro, concentran o 98% da súa poboación e neste punto estase a intervir con diversas actuacións de mellora, entre as que destaca o proxecto de rehabilitación a nivel de barrio que achegará 1 M á veciñanza para a reparación das súas vivendas. Nas próximas semanas publicaranse as bases para a solicitude destas axudas.
 
Ademais, o Concello do Porriño adianta que destinará 300.000 euros máis de fondos propios a diferentes melloras e obras dirixidas a mellorar a calidade de vida da veciñanza desta parroquia.
31/07/2023 in Alcaldía, Parques e xardíns, Parroquias

Avanzan os traballos de mellora dos parques infantís

O Concello do Porriño avanza no seu obxectivo de acondicionar e mellorar todos os parques infantís. Os traballos, que abranguen 33 zonas de xogo do centro urbano e das parroquias, están a ser acometidos con varias vías de financiación, algún deles con fondos propios e outros con cargo a unha liña de axudas do Plan Concellos da Deputación Provincial que supón unha inversión de 228.000 euros.

Os traballos licitados contemplan sete parques do centro do Porriño nos que se están a acometer limpezas, melloras e reparacións son o do Cristo, o do Matadoiro, o de Fontevella (Pío XXII), o do Camiño do Cando (fronte á Igrexa), o da urbanización O Sol, o de Lamazares e o do Campo da Feira. As actuacións a levar a cabo cenráronse principalmente na reparación dos pavimentos coa colocación de céspede sintético en cinco deles, o arranxo de diferentes elementos ou partes destes (tobogáns, columpios, balancíns.) algúns dos cales foron substituídos por outros novos; axuste e fixación de pezas e elementos; limpeza e preparación de distintas superficies para posterior aplicación de pintura e verniz protector.

En Torneiros estase a actuar en dous parques, no da fase II e no da fase III. Alí tamén se acometen reparacións e limpezas de diferentes elementos de xogo, así como o reemprazo de pezas novas, e a maiores tamén se están a arranxar os bancos. Ademais, no primeiro deles estase a substituir o actual pavimento coa colocación dunha capa de area e no segundo será preciso toda a retirada do pavimento existente e a disposición dun novo con instalación de céspede sintético.

Os outros parques que completan a lista son o da Escola Unitaria de Mosende e o de San Diego, na mesma parroquia. No da escola levarase a cabo unha recolocación dos elementos de xogo, que serán postos a punto; colocarase unha capa de area e procederase á retirada do peche perimetral para a instalación dun novo. No outro, ademais da reparación e limpeza das diferentes estruturas, demolerase o pavimento e realizarase un novo.

A superficie na que se actuará nestas sete áreas de xogos suman un total de 2.280 metros cadrados.

A maiores, como xa dixemos, estas actuacións completáronse con melloras no resto dos parques sufragadas con fondos propios. Moitas delas xa executadas como o de Carracido, A Graña, Candosa, San Paio , A Guía, Vilafría, Cerquido, Orbenlle, A Forna, Sanguío, Devesa ou Costeira.

“Manteño o meu compromiso de facer do Porriño unha auténtica cidade da infancia e por iso a mellora dos parques infantís é unha prioridade”, explicou o alcalde, Alejandro Lorenzo, “Hai moitos nenos e nenas no pobo, non só no centro urbano, senón tamén nas parroquias e todos eles teñen que disponer de espazos seguros para xuntarse a xogar. Por iso non só acondicionaremos as existentes, senón que farei o preciso para habilitar novos parques para eles.

02/06/2023 in Parques e xardíns