Normalización Lingüística

O II Concurso de Postais de Nadal do Porriño xa ten gañadoras/es

A segunda edición do Concurso de Postais de Nadal do Porriño xa ten gañadores. O xurado, presidido polo alcalde, Alejandro Lorenzo, e formado pola concelleira de Educación e Normalización Lingüística, Carolina González, o concelleiro de Cultura, Bienvenido Estévez, a técnico de normalización lingüística, Andrea González, e o deseñador gráfico e publicista, Juancho, ditaminou hoxe por unanimidade outorgar os premios ás seguintes gañadoras/es en cada categoría:

 

  • Categoría 1: de 3 a 6 anos. O 1º premio é para Uxía Rodríguez Mouriño (3 anos), o 2º é para Uxía Pérez Alonso (3 anos) e o 3º para  Alba Saavedra Ferreira (6 anos)
  • Categoría 2: de 7 a 11 anos. O 1º premio é para Eva Vila Comesaña (7 anos), o 2º é para Aldara Pereira (9 anos) e o 3º é para Roberto (9 anos)
  • Categoría 3: de 12 a 14 anos. Dado que só se presentaron dúas postais nesta categoría outórganse dous premios iguais ás dúas persoas participantes. Un deles a Alberto Francisco Machado (12 anos) e o outro a Noemi Martíns de Jesús (12 anos)

O xurado acordou tamén, por unanimidade, conceder un accésit dentro da categoría 2 a Manuel (7 anos).

Lembramos que o acto de entrega dos premios terá lugar o martes 3 de xaneiro de 2023 ás 17 h no Centro Cultural Municipal.

27/12/2022 in Normalización Lingüística

O Porriño edita a súa primeira guía de linguaxe inclusiva

O Concello do Porriño, a través das concellerías de Normalización Lingüística e Igualdade, vén de publicar a súa primeira Guía de Linguaxe Inclusiva. “Trátase dun documento que constitúe unha ferramenta práctica para non perpetuar na linguaxe os estereotipos e erradicar o sexismo e calquera tipo de discriminación nas actuacións administrativas, tanto no consistorio como fora del”, explicou a concelleira, Carolina González.

A través desta Guía de linguaxe inclusiva o Concello do Porriño pretende proporcionar, tanto ao seu cadro de persoal coma á cidadanía en xeral, unha ferramenta práctica e sinxela cunha dobre finalidade: evitar o uso sexista ou discriminatorio nos documentos administrativos públicos e resolver as súas dúbidas mediante a achega de solucións que proporcionen unha lectura fluída e non discriminatoria coa sociedade.

A tal fin, repartiranse 500 exemplares entre a veciñanza e o persoal municipal.

“Dende o Concello temos que ser os primeiros en dar exemplo e comunicar, tanto internamente como coa cidadanía, de maneira igualitaria e respectuosa”, concluíu a concelleira.

Pola súa banda, o alcalde, Alejandro Lorenzo, destacou que “a través da linguaxe interpretamos e poñemos nome ás cousas que nos rodean, creamos realidades. Por iso, a través dela, podemos contribuír a construír formas de pensamento máis igualitarias e respectuosas”.

04/08/2022 in Igualdade, Normalización Lingüística

O Servizo de Normalización Lingüística do Porriño pon en marcha o seu propio espazo web

O Servizo de Normalización Lingüística do Porriño, pertencente á Concellería de Educación, conta xa cun espazo web propio (www.normalizacionlinguisticaoporrino.wordpress.com) co obxectivo de achegar o noso idioma á cidadanía e co que poderá dar visibilidade ás campañas de dinamización e normalización lingüística, así como a diversos materiais e recursos en lingua galega.

As persoas usuarias poderán, ademais, resolver as súas dúbidas lingüísticas e achegar as súas suxestións a través do formulario de contacto co que conta este espazo web.

A través do espazo dedicado a novas o SNL do Porriño manterá informada a súa cidadanía da actualidade relativa á lingua galega, tanto local coma autonómica.

O blog abre as súas portas co concurso O galego é, co obxectivo de dinamizar a lingua galega na mocidade, e coa presentación da Unidade Didáctica: Florencio Delgado Gurriarán (1903-1987), para achegar a figura do autor homenaxeado nas Letras Galegas 2022 á nenas e nenos de 5º e 6º curso de primaria. 

06/05/2022 in Normalización Lingüística

Cursos preparatorios gratuítos das probas Celga

Os cursos, presenciais e en liña, realizaranse entre o 21 de marzo e o 12 de maio

A Secretaría Xeral de Política Lingüística anuncia a convocatoria de cursos Celga de carácter voluntario e gratuíto, orientados a obter a certificación Celga nos niveis 1, 2, 3 e 4 nos exames oficiais da Xunta de Galicia.

As persoas interesadas poderán inscribirse ata o 7 de marzo na seguinte ligazón: https://formacion-lingua.xunta.gal/. Poderase escoller un curso de tipo presencial ou en liña, sendo requisito para este último dispor de:

  • Un ordenador con conexión á Internet (de banda larga)
  • Un navegador web (recoméndase ter instalada a última versión de Firefox)
  • Acceso á conta de correo electrónico especificada na solicitude de inscrición
  • Un micrófono ou calquera medio alternativo que permita a gravación de voz en formato electrónico (mp3 ou equivalente).

Cada curso terá unha duración de 70 horas lectivas. Nos cursos de carácter presencial, estas distribuiranse en sesións de dúas horas e media, de luns a xoves, nos lugares que determine a Secretaría Xeral de Política Lingüística.

Para máis información podes consultar a convocatoria destes cursos no DOG: https://www.xunta.gal/dog/Publicados/2022/20220214/AnuncioG0598-260122-0002_gl.html ou enviar un correo electrónico ao Servizo de Normalización Lingüística do Porriño (servizonormalizacion@oporrino.org).

24/02/2022 in Normalización Lingüística