Limpeza

A alcaldesa, que xa deu orde o pasado día 9 de poñer en marcha medidas para a restrición do consumo, pide aos veciños que aforren auga

Dende o pasado día 9 deste mes, o Goberno local do Porriño, dacordo coas recomendacións da Confederación Hidrográfica Miño-Sil, está a aplicar as medidas contempladas no Plan Especial de Actuación en Situacións de Alerta e Eventual Seca, logo da alerta declarada pola propia Confederación Hidrográfica.

Seguindo as ordes da alcaldesa, puxéronse en marcha restricións e prohibicións no subministro non prioritarios, como o rego de xardíns ou o baldeo de rúas; tamén reduciuse a presión nocturna no subministro, para evitar fugas, reforzáronse os controis de potabilidade da auga para o abastecemento e aumentou a vixilancia no funcionamento das plantas de depuración.

Eva García de la Torre subliña que o Concello está preparado para realizar cortes de subministro pola noite, se a situación causada pola seca o fixese necesario, para asegurar que os veciños teñan garantido o abastecemento de auga.

Así mesmo, nos vindeiros días rematarase a revisión de todo o sistema de subministro para evitar perdas e se fixará un máximo de 12 horas para facer a calquera reparación no mesmo, dende o momento no que se teña coñecemento dunha avaría.

A rexedora, que tamén preside o Consorcio de Augas do Louro, lembra que a Oficina Técnica da Seca de Augas de Galicia tamén ten declarado a situación de alerta por seca en 6 dos 19 sistemas hidrolóxicos de Galicia, entre os que se atopa o  sistema do cal provén a auga que abastece a O Porriño, Mos e Salceda de Caselas.

Ante esta situación, pide ás veciñas e veciños que consuman responsablemente e que aforren auga tomando medidas como ducharse, non bañarse, pechar a billa mentres se enxaboan e se cepillan os dentes, non lavar o coche, regar plantas e xardíns dúas veces á semana, a primeira hora ou pola noite, non baleirar de cote as cisternas ou  non usar  as lavadoras e lavalouzas ata que estean ao máximo da súa capacidade.  

29/10/2017 in Alcaldía, Limpeza, Parques e xardíns

20 persoas sen emprego, do Porriño, asinan un contrato de traballo por 9 meses e, ao mesmo tempo, adquiren unha formación oficial no Obradoiro ‘Covelo II’

20 personas que estaban na procura de emprego, poderán traballar ata xullo de 2018 e, ao mesmo tempo, adquirir unha formación coma técnicos de atención sociosanitaria en domicilio e institucións e auxiliares da construcción, no obradoiro de emprego ‘Covelo II’.

Este mércores pola mañá, a concelleira de Emprego, Benestar e Igualdade, Soledad Girón, xunto co delegado da Xunta en Vigo, Ignacio López-Chaves, o xefe territorial da Consellería de Economía, Emprego e Industria, Ignacio Rial, e a directora do obradoiro, Begoña Echegaray, deu a benvida na sede de Porremprego, no Multiusos de Torneiros, aos participantes neste obradoiro e

No acto, Soledad Girón subliñou a importancia da colaboración entre diferentes administracións para “crear emprego” e, cualificou de “esencial” a formación coma canle para aumentar as posibilidades de voltar ou introducirse no mercado laboral.

A concelleira lembrou que este obradoiro é un bo exemplo desa colaboración posto que a súa realización é posible grazas a achega de 280.000€ por parte da Consellería de Economía, Emprego e Industria, cantidade á que hai que sumar 45.000€ que aporta o Concello do Porriño.

Girón indicou que os 20 participantes neste obradoiro teñen un contrato laboral de formación, obterán un certificado que vailles permitir acreditar, oficialmente, que contan cos comeñecentos que adquirirán no mesmo e, subliñou o feito de que a ampliación deste contrato pasa de 6 meses doutros ano a 9, o cal “ademáis de mellorar a súa preparación fai que adquiran dereitos que non terían cun contrato de so 6 meses de duración”.

A concelleria sinalou que o Goberno local está a impulsar, ademáis da colaboración co Goberno de Galicia e a Deputación de Pontevedra, a sinatura de convenios formativos con empresas privadas que permitiu que ducias de persoas estean traballando.

Froitos destas iniciativas, dacordo cos datos publicados a principios deste mes polo Ministerio de Emprego e Seguridade Social,a  taxa de desemprego situouse no Porriño no 18%, 6 puntos menos que cando o actual Goberno Local empezara  o seu mandato: daquela a porcentaxe do paro estaba  no Porriño por riba do 24% e 2.139 veciñas e veciños estaban na procura dun posto de traballo, preto de 500 máis que na actualidade.

Soledad Girón reiterou que a creación de emprego “é a prioridade número un deste Goberno local” e repetiu que todas as xestións e os recursos municipais están orientados a esta finalidade, algo que está a funcionar posto que O Porriño pechou setembro con 1.654 persoas desempregadas, unha realidade que non se vía dende hai case unha década e en so un ano “o paro reduciuse na preto de 5,5 puntos”, un dato inédito.

11/10/2017 in Alcaldía, Benestar, Emprego e formación, Limpeza

Avanzan as obras na senda peonil e ciclista na PO-331 ata o CEIP de Atín, nos concellos do Porriño e Mos

O concelleiro de Vías e Obras, Manuel Carrera, xunto coa alcaldesa de Mos, Nidia Arévalo, e o delegado da Xunta en Vigo, Ignacio López-Chaves, desprazouse hoxe ata a PO-331, no lugar de Atín, para supervisar o avance das obras da senda peonil e ciclista que a Administración galega executa nesta estrada, concretamente entre os puntos quilométricos 1+890 e 2+810, ao seu paso polos concellos de Mos e O Porriño.

Durante a visita constataron que os traballos avanzan a bo ritmo e que as obras iniciadas o pasado 2 de setembro poderían estar finalizadas no vindeiro mes de novembro. Esta actuación conta  cun orzamento de máis de 378.000 euros, e enmárcase no Plan de sendas de Galicia que na comarca de Vigo proxecta 11 treitos, que foron definidos en 9 proxectos de construción. A Axencia Galega de Infraestruturas executará 12,5 quilómetros de novas sendas nesta bisbarra, cun orzamento que se achega aos 5 millóns de euros, para o que conta co financiamento asegurado ao terse incluído no programa operativo de Galicia dos fondos europeos FEDER para o período 2014 -2020.

A senda na estrada PO-331 dará continuidade ao itinerario peonil existente no núcleo do Porriño ata o paso superior existente sobre a AP-9 nas proximidades de Atín.

A intervención iníciase na marxe esquerda da estrada, na que se construirá unha senda da 933 metros de lonxitude, desde as proximidades do Colexio Santo Tomás no que finalizan as actuais beirarrúas, ata a ponte sobre a AP-9, pasando pola intersección existente coa estrada a Pereiras–Tameiga.

Pola marxe dereita da PO-331, a obra terá unha lonxitude de 200 metros e comezará na intersección coa estrada municipal Pereiras- Tameiga, dado que ata este punto xa existe beirarrúa. A senda nesta marxe desviarase da estrada nos últimos 80 metros ata o acceso ao centro escolar de Atín. Neste último tramo terá un ancho de tres metros. Coa execución desta senda existirá un itinerario peonil continuo polas dúas marxes da vía que comunicará os dous centros de ensinanza co Porriño.

Tamén se proxecta a mellora da intersección entre a PO-331 e a estrada Pereira-Tameiga, na que se construirá unha semiglorieta para facilitar os xiros á esquerda neste punto.

02/10/2017 in Alcaldía, Benestar, Educación e tecnoloxía, Emprego e formación, Igualdade, Limpeza, Parques e xardíns, Tráfico, Turismo, Vías e obras

O Concello do Porriño e o Consorcio de Augas do Louro actúan nun verquido detectado no Polígono de As Gándaras

Técnicos da Concellería de Medio Ambiente do Porriño e do Consorcio de Augas do Louro –un enxeñeiro técnico municipal, o enxeñeiro responsable da UTE Consorcio do Louro, e membros da asistencia técnica de IDOM, ademais do propio xerente do Consorcio-, desprazáronse  onte, venres, á  zona da parte traseira do edificio dos Bombeiros, no Polígono de As Gándaras, onde, dende unha empresa, se producirá unha vertedura de aceites e graxas.

Foi o Servizo de Conservación da Natureza quen alertou do mesmo ao redor das 9 da mañá polo cal, axiña, recolléronse varias mostras da balsa de retención que instalara o Servizo de Conservación -proceso no que estivo presente, ademais, un técnico da Confederación Hidrográfica del Miño-Sil-.

Membros do propio Consorcio do Louro, entidade presidida pola alcaldesa do Porriño, Eva García de la Torre, realizaron unha completa inspección da rede de pluviais do Polígono, ademais das acometidas das empresas da contorna ao tempo que axudaron, cun camión depresor, nos traballos de eliminación do verquido que superaba os 25 metros cúbicos.

O concelleiro de Medio Ambiente, Marcelino Coto, sinala que abriuse un expediente informativo en relación con este verquido, que as mostras están a ser analizadas e lembra que, segundo regulamento do Consorcio do Louro, a empresa responsable deste feito enfróntanse a unha sanción de entre 30.000 e 100.000€, ao considerarse como moi grave.

Son consideradas infraccións moi graves aquelas que, por cantidade ou calidade da vertedura, deriven a existencia dun risco moi grave para a saúde das persoas, os recursos naturais ou o medio ambiente.

23/09/2017 in Alcaldía, Limpeza

A Policía Local está a levar a cabo unha estreita vixilancia do cumprimento da Ordenanza de Convivencia que contempla multas por non recoller os excrementos dos cans ou deixar refugallos fora dos contedores

As concellerías de Seguridade e Limpeza veñen de iniciar unha Campaña de Sensibilización e Concienciación Ambiental que abrangue, ademais, o coidado dos espazos públicos, tanto no casco urbano coma nas parroquias, sublimando a importancia da separación selectiva dos residuos.

O obxectivo é o de promover e potenciar o valor e a necesidade social da reciclaxe, potenciando  o papel activo das veciñas e veciños, facilitándolles, dende o Concello, a súa colaboración coa finalidade de mellorar a separación do lixo, xa na casa, así coma o correcto verquido dos  refugallos orgánicos que será, obrigatoriamente, en bolsas que teñen que deixarse nos colectores que o Concello ten para elo.

Ademais, como xa anunciara o concelleiro de Limpeza, Orlando Márquez, co gallo da colocación de parte das novas papeleiras en diferentes partes do Porriño,  a Policía Local está a realizar xa unha especial vixilancia da recollida por parte dos seus donos dos excrementos que os cans deixen nas rúas.

Neste eido, o novo xefe da Policía Local, Daniel Rodríguez,  subliña que a propia Ordenanza Municipal Reguladora da Convivencia Cidadá, Limpeza de Vías Públicas e Recollida de Residuos “contempla sancións de ata 1.500€ polo seu incumprimento”.

O novo xefe da Policía Local, logo de que se repetisen os casos de aparición fora dos lugares sinalados ou en días e horas que non son os regulamentados de desproveitos voluminosos, lembra que para a súa recollida “é preciso avisar ao Concello, fixando o día e a hora para que se faga a retirada, atopándose o Punto Limpo habilitado no Polígono da Granxa, de luns a venres,en horario de mañá”.

Tamén no caso de que se deixen estes refugallos voluminosos, coma mobles, restos de obras e sobrantes de materiais de construción ou electrodomésticos, fora dos lugares indicados, ou en horarios que non foran pechados co servizo municipal de Limpeza, os axentes da Policía Local procederán a realizar a correspondente denuncia.

14/09/2017 in Alcaldía, Cultura e festas, Limpeza, Parques e xardíns, Turismo

Empeza a substitución das papeleiras no Porriño, colocaranse cinceiros e ‘pipi-cans’ e aplicarase, de xeito rigoroso, a Ordenanza de Convivencia Cidadá

A Concellería de Limpeza, que dirixe Orlando Márquez, ven de iniciar a colocación das novas papeleiras en distintas partes do casco urbano do Porriño no que é o inicio dun proceso que abranguera todas as parroquias e que seguirá nas vindeiras semanas.

As novas papeleiras, indica o concelleiro, que teñen unha capacidade de 60 litros, evitan que o interior poida ser remexido por animais, coma paxaros ou gatos, e permiten que a retirada das bolsas do lixo se faga de xeito doado e limpo, en canto as mesmas se enchan, un proceso que pode facer a calquera hora do día, de maneira que se evite que estean cheas ou que haxa cheiros.

Estes novos recipientes virán a substituír aos existentes que, na maioría dos casos, están xa moi deteriorados e xunto con eles esta prevista a colocación de cinceiros e os popularmente coñecidos coma ‘pipi-cans’, con bolsas e dispensadores que teñen coma obxectivo manter as rúas limpas, facilitando a recollida das defecacións dos cans.

Neste sentido, o concelleiro subliña que os axentes da Policía Local aplicarán, de xeito rigoroso a Ordenanza Municipal de Convivencia Cidadá, Limpeza e Recollida de Residuos, que establece: “as persoas que conduzan cans e outros animais polas vías públicas, deberán levalos amarrados, impedindo que os mesmos depositen as súas dexeccións en calquera lugar destinado ao tránsito de peóns. No caso de que as dexeccións queden depositadas nas beirarrúas, en calquera zona peonil o una calzada, a persoa que leve ao animal está obrigada a súa limpeza”.

Orlando Márquez lembra que o incumprimento da obriga de recoller os excrementos dos cans ten establecida unha multa de ata 750€.

13/08/2017 in Alcaldía, Limpeza, Tráfico, Turismo

A Confederación do Miño-Sil empeza a recuperación das beiras do Louro nunha actuación que completará o Concello con varias actuacións nas vindeiras semanas

O alcalde accidental do Porriño, Manuel Carrera, xunto coa concelleira Soledad Girón e o concelleiro Orlando Márquez, acompañaron este xoves ao presidente da Confederación Hidrográfica do Miño-Sil, Francisco Marín, e a subdelegada do Goberno en Pontevedra, Ana María Ortiz, na visita que fixeron ás obras iniciadas pola Confederación, na beira do río Louro ao seu paso pola vila.

O proxecto, que ten un orzamento total de de 62.000€, abrangue varias actuacións en diferentes treitos que suman, en conxunto, máis dun quilómetro de lonxitude e que reforzarán as beiras máis afectadas pola subida das augas nas épocas de choiva.

Para as mesmas empregaranse troncos, estacas verticais, de piñeiro, e a parte superior estará recuberta de terra vexetal que facilitara a reforestación da mesma con especie propias da zona. Así mesmo, haberá unha actuación na senda, que ten partes moi danadas e que, coma lembrou o alcalde accidental, é moi empregada no so polos porriñeses, senón polos peregrinos, dado que a mesma é parte do Camiño Portugués a Santiago.

A actuación da da Confederación Hidrográfica do Miño-Sil estará completada por outras cinco que porá en marcha o Concello do Porriño nas vindeiras semanas para a mellora de camiños, e que contarán cun orzamento duns 45.000€.

03/08/2017 in Alcaldía, Benestar, Emprego e formación, Limpeza, Parques e xardíns, Turismo

Todo o programa de ‘Porrigalia 2017’ que dende o venres ao domingo ateigará O Porriño de diversión

Xa está todo listo para o comezo de ‘Porrigalia 2017’ que dende este venres, día 21, ata o domingo, 23 de xullo, ateigará as rúas do Porriño de animación, traxes de época, comparsas, castrexos, romanos, galos, exipcios, vikingos, gregos e celtas, música e a exhibición dos atletas que participarán nos xogos.

Durante eses tres días, os participantes na festa deste ano terán a ocasión de asistir a Demostracións de Oficios Artesanais, na Praza do Cristo. Nela estarán Mestres especializados en Cantería, Cerería, Ebanistería e Cestería, que compartirán o seu saber e coñecemento co público.

O venres, 21, o programa empezará ás 9 da noite co ‘Desfile das Civilizacións’, dende a Capela de San Sebastián ata a Praza de Antonio Palacios. Nesta praza terá lugar, ás 10 da noite, da man do Campión de España de Aro, Hernán Sío, o ‘Aceso do Pebeteiro’.

Ás 10 e cuarto da noite chegará o Pregón do Anunciatis e ás 11 menos cuarto será a hora da actuación do grupo galego de heavy ‘Astarot’, na rúa Domingo Bueno.

O sábado, día 22, ‘Porrigalia 2017’ espertará ás 11 da mañá co Anunciatis polas rúas do Porriño e a ‘Animación na Rúa’, que chegará ata as 11 da noite, a cargo da Asociación Cultural ‘Os Zoqueiros’ do Porriño’, a ‘Charanga Os Imperiais’ e Os Festicultores.

De 11 da mañá a 1 da tarde, desenrolarase ‘Pekegalia’ e ‘Bebegalia’, fronte á Igrexa de Santa María do Porriño.

Ás 11 e media darán comezo os Xogos, na Praza de Antonio Palacios. Este ano os atletas medirán as súas forzas, pericia, habilidade e preparación  no Tiro da Corda, Tragabolas, Cuadrigas, Tres en Raia, Canasta, Esquís Comunitarios e Tiratacos.

Á 1 da tarde chegará o intre do Combate de Loita Romana, na Praza de Antonio Palacios e dende as 6 da tarde ata as 10 da noite, seguirá adiante ‘Pekegalia’ e ‘Bebegalia’, fronte á Igrexa de Santa María.

Ás 11 e media da noite dará comezo o concerto estrela deste ‘Porrigalia 2017’ o de ‘Obús’, a mítica banda integrada polo cantante ‘Fortu’ Sánchez, o guitarrista Paco Laguna, o batería Carlos Mirat e o baixista Fernando Montesinos.

O domingo, día 23, ás 11 da mañá empezará o Anunciatis polas rúas da vila; a esa mesma hora dará comezo ‘Animación na Rúa’-que seguirá ata as 11 da noite- da man da Asociación Cultural ‘Os Zoqueiros’ do Porriño’,a Asociación Cultural San Xurxo, de Mosende, e a Charanga Os Imperiais.

De 11 a 1, estará en marcha ‘Pekegalia ‘ e ‘Bebegalia’, fronte á Igrexa de Santa María do Porriño.

Ás 11 e media empezará o ‘Desfile de Comparsas’, dende a Capela de San Sebastián á Praza de Antonio Palacios.

De 6 da tarde a 11 da noite volve ‘Pekegalia’ e ‘Bebegalia’, fronte á Igrexa de Santa María; ás 6 da tarde empezará a Final dos Xogos e a posterior entrega de Trofeos e Medallas.

O final da Porrigalia 2017, co apagado do pebeteiro será ás 10 da noite, co Desfile da Garda Pretoriana, dende a Capela de San Sebastián á Praza de Antonio Palacios que dará paso, ás 11 da noite, ao Espectáculo de luz e lume de Troula Animación, polas rúas do Porriño, xusto antes do concerto de ‘Pa Ti Ma Na’ , ás 12 da noite, na Praza de Antonio Palacios.

19/07/2017 in Alcaldía, Cultura e festas, Educación e tecnoloxía, Limpeza, Turismo

Reformados e adaptados para persoas con diversidade funcional 6 parques infantís cun orzamento de máis de 72.000€

O Goberno local ven de rematar o arranxo de varios parques infantís da vila, que en moitos casos “non se tocaran en anos”,  e que xa están en funcionamento ou, coma o caso do parque da Praza do Cristo, poderán usarse dende esta mesma semana, logo de facer importantes melloras en todos eles.

A Concellería de Parques e Xardíns, que dirixe Orlando Márquez, renovou totalmente o Parque da Urbanización do Sol, no que se arranxaron todos os bambáns, colocouse un para persoas con diversidade funcional e colocouse o chan de caucho, facendo un investimento de 21.777€.

Tamén está acabado o do Campo da Feira, que “ven de recuperarse totalmente”, coma indica o concelleiro, logo de contar cun orzamento de 4.173€; o mesmo sucedeu co Parque Lamazares, detrás de Correos, no que se cambiaron os seus elementos investindo 4.655€.

Igualmente, están xa reformados os de San Diego, no que ademais colocouse un chan de caucho continuo, logo de facer unha inversión de 1.952€ e o de Torneiros no que, cun investimento de 9.181€, ademais dos distintos xogos, se arranxaron os bancos, as varandas, o valado de madeira e adaptouse para persoas con diversidade funcional.

Por último, a metade desta semana que ven,  as cativas e cativos poderán xogar de novo no Parque do Cristo logo dunha reforma que abrangueu a reparación dos compoñentes do mesmo- tobogán, balancín ou a torre- a substitución do chan por un novo de caucho que evita que os pequenos poidan mancarse, a colocación dun bambán para persoas con diversidade funcional  e a eliminación de calquera elemento que represente un risco para nenos. En total o orzamento para este traballo superou os 30.300€.

Orlando Márquez subliña que “logo de que se publique no Boletín Oficial do Estado a lei de Orzamentos Xerais do Estado, o Goberno local levará ao Pleno da Corporación a proposta para arranxar outros seis parques, os de Orbenlle, e A Forna, en Budiño e o do Centro Social de Atios, os dos centros sociais de Pontellas e Mosende e o de Pío XII”.

Márquez lembra que ata o dagora, o Ministerio de Facenda  non autoriza aos concellos con superávit, como é o do Porriño, a destinar partidas a gastos coma estes e confía en que tal situación quede solucionada nos Presupostos do Estado para este ano o cal posibilitaría que se rematase a mellora de todos os parques do Porriño.

26/06/2017 in Alcaldía, Benestar, Limpeza, Parques e xardíns

O Concello segue adiante coa limpeza das parroquias completando a de Torneiros en lugares que “non se limparan nunca”

O Concello está a levar a cabo unha completa labor de limpeza no Porriño, traballos que, como adiantara hai unhas semanas a alcaldesa, Eva García de la Torre, chegará a todas as parroquias.

Nas mesmas estase a completar o desborde dos camiños, corte de maleza, retirada de silvas, saneamento de pontes e sendas, corte de herbas, roza, poda de árbores, mellora dos xardíns, arranxo de parques, aviado de pistas e beiravías ou colocación e baldeado de colectores do lixo.

Dentro deses traballos completouse a limpeza de beirarrúas, escaleiras e prazas de Torneiros con maquinaria a presión e chegando a puntos que, subliña a alcaldesa “non se limparan nunca en máis dunha década” e que presentaba un aspecto “lamentable e descoidado e que, maila as constantes queixas dos veciños, nunca se adecentaran”.

García de la Torre subliña que estes traballos seguirán por todas as parroquias, sumaranse aos realizados en diferentes  partes da vila, nos que se completan “a diario” labores de desborde, baldeo, corte de céspede, retirada de lixo e moblaxe e varrido.

Así mesmo, axiña estará rematada xa a recuperación e reforma da práctica totalidade dos parques infantís do Porriño, coma os da Praza do Cristo, Centro Social de Atios, os de Orbenlle, e A Forna, na parroquia de Budiño, os dos centros sociais de  Mosende e Pontellas, o de Torneiros, o da rúa Pío XII ou o do Matadeiro, varios dos cales xa están listos para o gozo dos cativos e, nalgúns casos, de maiores, posto que incorporan compoñentes biosaudabeis-como timóns, andadores, volantes ou barras paralelas-, e elementos para persoas con diversidade funcional.

17/06/2017 in Alcaldía, Benestar, Limpeza, Parques e xardíns