Industria

• O alcalde Alejandro Lorenzo reúnese coa directiva da asociación para abrir unha canle de diálogo e avaliar posibles necesidades e oportunidades comúns, destacando o papel estratéxico do Porriño e a vontade municipal de apoiar a un sector clave para a economía

O Porriño, 29 de novembro de 2025.- O alcalde do Porriño, Alejandro Lorenzo, e o concelleiro de Industria, Carlos Martínez, mantiveron unha reunión de traballo coa dirección da Asociación Empresarial de Transporte de Mercadorías por Estrada de Galicia (Apetamcor), para analizar a realidade actual do sector e posibles vías de colaboración entre ambas entidades.

Durante o encontro, Apetamcor, a través da súa directora xeral, Natalia Blanco; do director provincial, Javier Carrascal, e do técnico de PRL, Isaac Araújo expuxo ao alcalde e ao concelleiro a situación dun sector composto maioritariamente por pequenas e medianas empresas e autónomos cunha crecente carga normativa e con necesidades específicas de apoio, formación e adaptación aos cambios europeos. A entidade, que leva 30 anos en funcionamento, é a máis representativa de Galicia, con 1.600 empresas asociadas e máis de 7.000 vehículos, e desenvolve un intenso labor de negociación, servizos e optimización de custos para as empresas.

A súa sede no Porriño, unha das máis recentes en Galicia, experimenta un forte crecemento, con máis de 500 empresas e arredor de 3.000 vehículos asociados, converténdose xa nun dos principais centros da organización. O municipio é tamén un punto clave na formación vinculada ao transporte: 1.500 dos máis de 4.000 alumnos anuais de APETAMCOR en Galicia fórmanse no Porriño.

Alejandro Lorenzo destacou a vontade municipal de acompañar ao sector, “O Porriño é un dos principais centros industriais e loxísticos de toda Galicia, un punto estratéxico no sur da Comunidade en conexión co país veciño. Para nós é fundamental manter un diálogo constante con entidades como Apetamcor, que representan a numerosas empresas e profesionais que forman parte do tecido económico do noso municipio. Queremos escoitar as súas necesidades e estudiar xuntos proxectos que poidan beneficiar ao sector e tamén ao Porriño”

Pola súa parte, dende a asociación explicaron que están a analizar diferentes liñas de traballo relacionadas coa profesionalización, a mellora da seguridade e os servizos de apoio ao transportista. Trátase de proxectos en estudo, sen decisións tomadas nin compromisos confirmados, polo que a entidade pediu ao Concello manter unha canle de comunicación permanente para valorar posibilidades de colaboración futura. “Queremos compartir a realidade do sector, explicar cara onde se dirixe a normativa europea e analizar, xunto ao Concello, posibles vías de colaboración que poidan ser positivas para O Porriño e para o transporte galego. O diálogo institucional é esencial neste momento de cambios profundos”, sinalaron.

Neste sentido expresouse tamén o alcalde, “este tipo de reunións permítennos anticiparnos, entender mellor a realidade dun sector esencial e identificar oportunidades comúns. O Concello está aberto a colaborar e a favorecer que O Porriño siga sendo un referente loxístico e de formación en Galicia”, asegurou.

Ambas partes coincidiron na importancia de continuar con esta comunicación para analizar cuestións necesidades reais do transporte, encaixe territorial ou urbanístico de posibles proxectos, oportunidades de traballo conxunto e vías de colaboración que poidan ser beneficiosas tanto para as empresas como para o municipio.

Alcalde e concelleiro agradeceron aos directivos de Apetamcor esta xuntanza e amosaron a súa disposición a seguir ampliando liñas de cooperación que contribúan ao fortalecemento do sector do transporte e ao desenvolvemento económico do municipio.

• O alcalde Alejandro Lorenzo acompañou ao director da Axencia Galega de Industria Forestal Alfredo Fernández na visita á nova nave da empresa Sumelga no polígono da Granxa
• Dende a entidade agradecen a implicación e o apoio da Xunta e do Concello para levar a cabo esta ampliación

O Porriño, 28 de novembro de 2025.- O Porriño apoia o crecemento empresarial. O alcalde Alejandro Lorenzo acompañou esta mañá ao director da Axencia Galega de Industria Forestal (Xera), Alfredo Fernández, nunha visita ás instalacións da empresa Sumelga, dedicada á distribución e almacenaxe de material eléctrico, que vén de ampliar a súa superficie coa construción dunha nova nave de apoio á principal, situada no polígono da Granxa, grazas a unhas subvención da Xunta de Galicia

Fundada no ano 2001, Sumelga consolidouse como unha compañía de referencia en Galicia grazas ao seu equipo humano especializado e a un servizo integral que lle permite ofrecer respostas personalizadas ao sector industrial. A nova nave, de 500 metros cadrados e con estrutura de madeira, está destinada ao almacenaxe de material eléctrico e automatización, coa finalidade de reforzar a capacidade loxística da empresa.

Para levar a cabo esta expansión, Sumelga foi beneficiaria da última convocatoria das axudas Xera-Madeira, que promove o Goberno galego para impulsar a utilización da madeira como elemento estrutural no eido da construción. Os seus propietarios, Javier Sousa e Enrique Besada, agradeceron tanto o apoio da Xunta de Galicia, a través da cal recibiron unha achega para a redacción do proxecto e a execución da nave, como a colaboración do Concello do Porriño que, segundo indicaron, resultou esencial pola axilización dos trámites de licenza necesarios para cumprir os prazos previstos na subvención.

Actualmente, a empresa conta cun cadro de persoal de 36 traballadores, e esta ampliación permitirá tamén aumentar o emprego no municipio nos próximos meses.

O alcalde destacou que “Sumelga é un exemplo de como a colaboración entre administracións e empresas permite xerar riqueza e emprego no noso concello. Desde o Concello do Porriño traballamos para facilitar e axilizar os trámites ás compañías que queren investir e medrar aquí, porque cada nova nave, cada ampliación e cada posto de traballo consolidado contribúe a fortalecer o noso tecido industrial e o futuro económico do noso municipio”.

A expansión empresarial no Porriño reflicte o compromiso do Concello en promover o desenvolvemento económico e o emprego no municipio. Proxectos como este sitúan ao Porriño como un referente de crecemento industrial na provincia e tamén en Galicia.

• O alcalde Alejandro Lorenzo acompañou hoxe ao presidente da Xunta de Galicia, Alfonso Rueda, nunha visita ás instalacións da multinacional biofarmacéutica no Porriño, única en España

O Porriño, 24 de outubro de 2025.-  O alcalde do Porriño, Alejandro Lorenzo, destacou hoxe “a excelente nova que supón para o noso concello que unha multinacional de referencia como Lonza siga apostando por medrar e consolidarse no Porriño”, durante a visita que realizou ás instalacións acompañando ao presidente da Xunta de Galicia, Alfonso Rueda, e na tamén estiveron a conselleira de Economía e Industria, María Jesús Lorenzana; a delegada territorial da Xunta en Vigo, Ana Ortiz; o concelleiro de Industria, Carlos Martínez e, por parte da empresa, o director de Lonza Porriño, Fernando Rodríguez

Lonza, multinacional biofarmacéutica con sede en Suíza e presenza nos cinco continentes, ampliará as súas instalacións no Porriño, a única en España, con 2.000 metros cadrados máis destinados a zona loxística, dotada con sistemas de alta tecnoloxía que permiten mellorar a eficiencia operativa e optimizar o almacenamento e transporte seguro dos produtos biolóxicos. “Esta ampliación non só reforza a competitividade e a excelencia de Lonza, senón que reafirma o seu compromiso coa innovación e co futuro”, subliñou Lorenzo.

O rexedor lembrou que “Lonza non é só un referente internacional no ámbito biofarmacéutico, é tamén un motor de emprego e desenvolvemento para a nosa vila”. Actualmente, máis de 540 profesionais traballan na planta do Porriño, que conta cunha superficie de 35.000 metros cadrados e na que nos últimos cinco anos investíronse 60 millóns de euros.

Lonza Porriño é hoxe un centro clave na fabricación das terapias do futuro, especializado na produción de cultivos celulares de mamíferos, anticorpos monoclonais e proteínas terapéuticas. A planta é un referente no escalado industrial e na fabricación de novos tratamentos contra o cancro, así como contra enfermidades raras e autoinmunes.

“Desde o Concello do Porriño seguiremos traballando da man das empresas que apostan polo noso territorio, como Lonza, creando as condicións necesarias para que poidan seguir crecendo, xerando riqueza e contribuíndo ao progreso común”, asegurou o alcalde, que agradeceu tamén “a presenza e o apoio do presidente da Xunta, Alfonso Rueda, que con esta visita amosa o compromiso do Goberno galego coa industria estratéxica e co desenvolvemento empresarial no sur de Galicia”.

• Alejandro Lorenzo enxalza o compromiso, a continuidade xeracional e o impacto económico desta entidade durante unha visita institucional xunto á conselleira de Economía e Industria, María Jesús Lorenzana, as súas instalacións no Polígono da Granxa

O Porriño, 3 de outubro de 2025.- O alcalde do Porriño, Alejandro Lorenzo, puxo hoxe en valor a traxectoria da empresa Darlim, que representa un modelo de éxito da empresa familiar galega, durante unha visita institucional as súas instalacións, no polígono da Granxa, na que acompañou á conselleira de Economía e Industria, María Jesús Lorenzana. A compañía, con máis de 40 anos de historia, é unha das referencias do sector a nivel nacional e encarna á perfección o papel estratéxico que xogan as empresas familiares no tecido económico da nosa comunidade.

“Darlim é un orgullo para O Porriño, para Galicia e para todo o país. Un exemplo claro de como a empresa familiar, con compromiso, esforzo e visión de futuro, pode medrar xeración tras xeración ata converterse nunha referencia no seu sector”, sinalou Lorenzo.

Durante a visita, na que estivo presente a directiva de Darlim encabezada polo seu presidente Indalecio Cuevas, e á cal tamén asistiu o concelleiro de Industria, Carlos Martínez, o rexedor subliñou o valor engadido que supón a incorporación da cuarta xeración da familia Cuevas á fronte da empresa. “É unha mostra de continuidade, arraigo e compromiso co territorio. Unha empresa que naceu no Porriño, que creceu aquí e que segue apostando polo noso concello como centro das súas operacións”, engadiu.

Pulmón industrial e motor económico

Lorenzo definiu O Porriño como o “pulmón industrial de Galicia”, cunha concentración empresarial que achega riqueza, innovación e emprego de calidade. “Temos a sorte de contar con empresas punteiras como esta, que non só xeran emprego, senón que aplican políticas de benestar laboral que son exemplo para calquera outra compañía”, destacou.

Segundo os datos que ofreceu a conselleira, máis do 80% do emprego privado en Galicia procede da empresa familiar, e no caso galego o peso destas empresas supera o 94% do tecido empresarial, moi por enriba da media estatal.

Pola súa banda, o presidente de Darlim, Indalecio Cuevas, agradeceu a visita e reafirmou o compromiso da empresa co territorio e co futuro: “Estamos moi orgullosos do noso equipo humano, que é a clave do noso crecemento. Levar máis de 40 anos traballando e ver como a cuarta xeración toma a remuda é, sen dúbida, a nosa maior satisfacción.

• Alejandro Lorenzo participa nunha xornada que reuniu a 120 distribuidores chegados de medio cento de países de todo o mundo que viñeron coñecer as novas instalacións desta empresa localizada no polígono das Gándaras

O Porriño, 1 de outubro de 2025.- O alcalde do Porriño, Alejandro Lorenzo vén de participar esta mañá dunha xornada internacional celebrada na empresa Ceamsa (Compañía Española de Algas Marinas). 120 representantes comerciais de todo o mundo coñeceron as instalacións recentemente ampliadas desta multinacional galega que impulsa dende O Porriño produtos para o sector da alimentación e farmacéutico.

“Ceamsa é un exemplo de innovación, internacionalización e compromiso co territorio. A súa expansión confirma que O Porriño é un enclave estratéxico para a industria galega con vocación global. Dende o Concello celebramos este crecemento, é un orgullo que empresas desta dimensión sigan escollendo o noso municipio como base de operacións para chegar ao mundo enteiro”, sinalou o alcalde durante a súa visita ás instalacións, localizadas no polígono das Gándaras. Durante o recorrido, o rexedor estivo acompañado do presidente de Ceamsa, Íñigo Alzueta; a vicepresidenta, Mónica Alzueta e o director xeral, Julio Juberías.

Todas as persoas participantes da xornada de hoxe son distribuidores de Ceamsa chegadas de medio cento de países como EE.UU., Sudáfrica, México, Brasil, India ou China. A ampliación da superficie supón  unha aposta polo concello porriñés como punto de partida para chegar ao resto do planeta, pasando de 40.000 a 90.000 metros cadrados de superficie, destinada principalmente a almacenaxe para lograr así un maior control loxístico propio e un incremento de capacidade produtiva.

Os asistentes visitaron as instalacións centrais e participaron de sesións de traballo nos laboratorios da empresa, onde coñeceron de primeira man as últimas innovacións tecnolóxicas e de produto que está a desenvolver Ceamsa, que conta cun cadro de persoal de máis de 400 traballadores e prepara xa o seu 60 aniversario o vindeiro ano.