Igualdade

A Corporación do Porriño apoia ás nais e pais do CPI da Ribeira e rexeita, de novo, o peche das aulas da ESO do centro

Varios membros da Corporación Local, entre eles a alcaldesa, Eva García de la Torre, a concelleira de Educación, Lourdes Moure, e o voceiro de EU Son, Pedro Ocampo apoiaron, de novo, a reivindicación das nais e país do Centro Público de  Integración (CPI) da Ribeira para que non se pechen as aulas de Ensino Secundario Obrigatorio (ESO), do mesmo.

Os membros da ANPA concentráronse na Praza de Antonio Palacios e, logo, estiveron no Pleno do Concello onde as representantes das ANPA tiveron a oportunidade de intervir e pedir, unha vez máis, ao Goberno de Galicia que non siga adiante con esta medida.

A Corporación do Porriño aprobara na súa reunión anterior unha moción na que se rexeitaba este peche, ademáis dun ataque á Educación pública, gratuíta e de calidade, suporá unha merma para o único centro público de integración do Porriño, no que o 35% dos seus alumnos son de etnia xitana.

16/06/2017 in Alcaldía, Benestar, Emprego e formación, Igualdade

Xa podes inscribirte para participar en Porrigalia 2017

As persoas interesadas en participar en Porrigalia 2017, que se celebra no Porriño, organizada polo Concello, os días 21,22 e 23 de xullo, xa poden entrar no portal web porrigalia.gal e inscribirse dentro dos ‘Gremios’ que  estarán presentes na festa; integrar as Comparsas que desfilarán na mesma ou solicitar un dos postos que se abrirán nela.

En porrigalia.gal atoparán a ‘Folla de incrición de Gremios’ e as bases tanto de Participación de Comparsas como de Funcionamento dos Postos.

15/06/2017 in Alcaldía, Cultura e festas, Igualdade, Turismo

As alumnas e alumnos do Pino Manso reciben este luns o ‘Premio de Cooperativismo’ do Goberno de Galicia

Os alumnos e alumnas do IES Pino Manso recibirán este luns –ás 11 e media da mañá- o ‘Premio de Cooperativismo’ do Goberno de Galicia, pola realización dun mapa dixital de accesibilidade en cadeira de rodas a establecementos da contorna empregando as novas tecnoloxías.

O galardón, que vai acompañado dunha dotación económica de 1.000 €, forma parte da modalidade de actividades cooperativizadas, dirixida aos centros de educación secundaria obrigatoria e educación especial de Galicia.

Este concurso ten por obxecto potenciar e propiciar valores e principios que inspiran o cooperativismo como a solidariedade, o espírito democrático, a participación, a actuación colectiva ou a solución de conflitos de forma pactada.

Tras a entrega do galardón os estudantes poderán desfrutar da compañía teatral ‘Xarope Tulú’, que representará a súa obra ‘Cardume’, un espectáculo  que combina a narración oral coa música en vivo, no que o público participa converténdose en ocasións en protagonista.

11/06/2017 in Benestar, Educación e tecnoloxía, Igualdade

A alcaldesa e a concelleira de Educación inauguran, xunto co autor e estudantes do Porriño, a poesía visual ‘Azabache’

A alcaldesa, Eva García de la Torre, xunto coa concelleira de Educación, Lourdes Moure, asistiu este venres á inauguración do poema visual ‘Azabache’, do poeta e dramaturgo vigués David Fernández, poema que está xa na fachada da Piscina Municipal.

Os protagonistas foron as rapazas e rapaces de 5º e 6º de Primaria de todos os centros educativos do Porriño, cos que David Farnández levou adiante o seu Proxecto Caligrama 2000, unha iniciativa que ten coma obxectivo achegar a poesía visual aos máis pequenos.

“Dentro das múltiples e infinitas interpretacións da obra, ‘Azabache’ é, en síntese, unha reivindicación da infancia, a mocidade e, especialmente da nosa esencia ou autenticidade, un valor que contrasta totalmente coa superficialidade dunha parte importante da nosa sociedade”, subliñou o artista.

10/06/2017 in Alcaldía, Cultura e festas, Emprego e formación, Igualdade

A alcaldesa comprométese coa Asociación de Veciños de Cans

A alcaldesa comprométese coa Asociación de Veciños de Cans a acometer distintas melloras na parroquia e presentoulles unha idea para cubrir o Torreiro e humanizar a contorna

A alcaldesa, acompañada da concelleira de Emprego e Igualdade mantivo unha xuntanza con membros da Asociación de Veciños de Cans para coñecer ás súas necesidades e transmitirlles o seu compromiso persoal e do do Goberno local para acometer as melloras que precisa a parroquia.

Eva García de la Torre presentoulles unha idea para cubrir o Torreiro, de xeito que poida usarse durante moitos máis días ao ano, unha obra que é posible acometer en pouco tempo.

Ademais, sinalou que no marco dese traballo se adiantará en conquerir un entorno máis habitábel e se rematarán as accións de saneamento que precisa Cans.

Os representantes da Asociación de Veciños expuxéronlle a rexedora unha lista de necesidades, parte das cales abordará xa o Concello, coma o arranxo das ‘marquesiñas’ e a colocación dunha nova na zona da gasolineira- para o transporte escolar-; achegar a rede wi-fi, formar ás persoas máis vellas nas novas tecnoloxías- o Goberno local disporá a realización dun curso destinado a exclusivamente a elas- e a humanización de parte da parroquia.

Así mesmo, os veciños amosaron á alcaldesa a súa satisfacción pola mellora da limpeza e, especialmente, polo remate do rozado de camiños e pistas, que era unha reclamación que se lle fixera ao Concello.

14/04/2017 in Alcaldía, Emprego e formación, Igualdade

Día Internacional do Pobo Xitano

Eva García de la Torre participa nos actos de celebración do ‘Día Internacional do Pobo Xitano’ e pon a O Porriño de exemplo de convivencia plena, dende hai décadas, entre paios e xitanos

A alcaldesa, acompañada polas concelleiras de Educación, Lourdes Moure, e Igualdade, Soledad Girón, participou este venres no CEIP da Ribeira, en Torneiros, na celebración do Día Internacional do Pobo Xitano, que se celebra en todo o mundo o 8 de abril.

Este día lembra o Primeiro Congreso Mundial Romaní-Xitano que tivo lugar en Londres el 8 de abril de 1971 e no que se instituíu a bandeira e o himno xitano.

A bandeira é verde e azul-simbolizando o ceo e o campo- cunha roda de carro, vermella, no centro, que representa o camiño dende a India cara a liberdade. O himno xitano, ‘Gelem, gelem’ (Andive, andive), foi composto polo autor Jarko Jovanovic en homenaxe ás xitanas e xitanos asasinados polo nazismo.

A finalidade desta data, como subliñou Eva García de la Torre, ten que ser facer que sexa verdade o fin dos prexuízos existentes cara a poboación xitana, coñecendo a súa realidade para chegar a unha convivencia plena.

A alcaldesa, que gozou dos actos organizados no CEIP da Ribeira, sumándose aos bailes e actividades programadas, puxo ao Porriño coma exemplo desa convivencia en harmonía entre paios e xitanos “unha convivencia que é algo natural dende hai décadas e da que podemos presumir, da que estamos satisfeitos e da que debemos estar moi orgullosos”.

Eva García de la Torre sinalou coma unha clara realidade deste feito o CEIP da Ribeira onde “a tradición e os costumes xitanos se incorporan á formación de todas as alumnas e alumnos do centro”, como se pode ver na participación neste acto e na exposición aberta sobre a historia e o patrimonio cultural do pobo xitano.

 
 
 
08/04/2017 in Alcaldía, Cultura e festas, Educación e tecnoloxía, Igualdade

X Carreira da Igualdade

280 alumnas e alumnos, pais, nais e profesores do IES Pino Manso disputaron este venres pasado a ‘X Carreira da Igualdade’ sobre un circuito urbano de 2,2 quilómetros

280 integrantes do IES Pino Manso disputaron este venres a X edición da ‘Carreira da Igualdade’ organizada pola Departamento de Educación Física do centro, cunha importantísima vinculación nesta ocasión da Asociación de Nais e Pais de Alumnos (ANPA) e a colaboración das concellerías de Educación e Seguridade, dirixidas por Lourdes Moure, Deportes, a cargo de Manuel Carrera, e Igualdade, á fronte da cal está Soledad Girón e que nesta edición ven de aportar as camisetas que levaban postas todas e todos os participantes.

Un ano máis preto de 300 alumnas e alumnos, pais, nais e profesores do Pino Manso percorreron un circuíto urbano polas inmediacións do centro sobre unha distancia de 2,2 quilómetros coa finalidade de facer visible e lembrar que están a prol da igualdade e que rexeitan calquera tipo de discriminación por razón de sexo.

Coma indicou a concelleira de Educación, o feito de que toda a sociedade estea representada nesta proba, profesoras e profesores, alumnas e alumnos, nais e pais, responsábeis dos organismos institucionais, coma o Concello, axentes da Policía Local e voluntarios de Protección Civil, “amosa que a sociedade xa decidiu a que a igualdade sexa o seu xeito de vida e que as oportunidades teñan que ver so coa capacidade e non con ningunha outra condición”.

 
 
08/04/2017 in Deportes, Educación e tecnoloxía, Igualdade

Guadi Galego actúa este mércores no Porriño

Guadi Galego actúa este mércores, día 8 de marzo, no Porriño dentro dos actos do ‘Día da Muller’

Este mércores, día 8 de marzo, dentro dos actos organizados pola Concellería de Igualdade do Concello do Porriño, Guadi Galego, actuará no Círculo Recreativo e Cultural ás 8 e media da tarde. O aforo é limitado e as portas se abrirán ás 8,media hora antes do inicio da actuación.

Esta gaiteira, pianista e vocalista no grupo Berrogüetto até xaneiro de 2008, cando abandonou a banda, tamén formou parte do dúo Espido e de Nordestin@s. A súa carreira en solitario iniciouse co álbum Benzón, que se publicou en 2009, ao que seguirían Lúas de outubro e agosto (2014) e O mundo está parado (2016).

07/03/2017 in Cultura e festas, Igualdade

Performance de ‘Violencia Zero’ no Porriño

Performance de ‘Violencia Zero’ no Porriño, este luns, día 6, para reivindica a Igualdade de Xénero e concienciar aos cidadáns do problema da Violencia Machista

‘Mulleres en acción: violencia zero 2016-2017’ é un proxecto de acción artística que se desenvolve no espazo público co fin de reivindicar a igualdade de xénero, concienciar a poboación do problema da violencia machista e, sobre todo, para tratar de unir forzas para loitar contra esta lacra presente na sociedade.

Esta edición recolle 25 accións de arte contemporánea nas súas diferentes modalidades (pintura, música, danza, teatro, poesía, graffiti ou performance), que se levarán a cabo ata novembro de 2017 en 25 concellos da provincia, O Porriño entre eles.

As actividades programadas pola Deputación de Pontevedra funcionarán como arma de visibilización e de reflexión, para promover una sociedade igualitaria entre homes e mulleres, sen discriminación nin violencia, cos mesmos dereitos e deberes.

Este luns, ao mediodía, organizado polo organismo provincial e o Concello do Porriño, na Praza de Antonio Palacios-ou no caso de que chova, no Centro Cultural Municipal-, terá lugar unha performance aberta á participación de todas as veciñas e veciños da vila, a cargo da artista Sandra Bejarano, que interpretará a peza “Non me queiras así”.

05/03/2017 in Cultura e festas, Igualdade

‘Visións’, no Cineclube do Porriño

Este domingo, 12 de febreiro ás 7 da tarde, o cineclube do Porriño acolle a proxección da película colaborativa “Visións”, enmarcada no proxecto da Deputación de Pontevedra “Cinema e Muller” que ten por obxectivo visibilizar ás creadoras do audiovisual da provincia, fomentando unha maior participación das mulleres na creación da cultura e da arte.

“Visións” trátase dunha película na que participan activamente dez mulleres cineastas da provincia de Pontevedra aportando dez olladas onde cinema e arte se funden nunha produción íntima e poliédrica centrada en cuestións relacionadas co xénero. Así, a película aborda dende a intimidade da creación e a construción da corporeidade da natureza, ata berros, o corpo feminino, o día a día dunha creadora audiovisual, a dificultade de conciliar así como a relación entre a casa e a muller ou entre xeracións de mulleres dunha mesma familia.

Nesta película colaborativa, promovida pola institución provincial, participan Carla Andrade, Bego Santiago, Carme Nogueira, Eva Calvar, Sonia Méndez, Andrea Zapata, Lara Bacelo, Olaia Sendón, Diana Toucedo e Claudia Brenlla. “Visións”, realizada en dous meses, inclúe dez minicurtas nas que as directoras fixeron tamén de cámaras e de montadoras, realizando a película de principio a fin, coas súas propias mans, cun axustado orzamento como exemplo do cinema que practican.

O proxecto de “Cinema e Muller”, que impulsou a posta en marcha da película “Visións”, trátase dunha aposta por darlle visibilidade ao traballo das máis de setenta mulleres que se dedican ao mundo audiovisual da provincia de Pontevedra, ben como cineastas, ben como editoras, produtoras ou guionistas.

11/02/2017 in Cultura e festas, Igualdade