Educación e tecnoloxía

O autobús LabEmprende fai escala no Porriño

O busde Lab Emprende, o proxecto educativo itinerante promovido pola Fundación La Caixa a través de EduCaixa, fixo escala no Porriño, incluíndo a nosa vila no percorrido que está realizando por diferentes localidades de España, para que pequenos e maiores, principalmente mozos, coñezan o mundo do emprendemento.
 
Para iso utilizan as últimas tecnoloxías, creando un espazo multimedia con diferentes actividades interactivas, que poñen de manifesto o proceso do emprendemento, as súas características e os valores dunha actitude emprendedora.
 
A concelleira de Educación, Carolina González, visitou a unidade móbil esta mañá para coñecer de primeira man como se desenvolve esta actividade que conta coa colaboración do Concello do Porriño.
O espazo interior de este bus comprende cinco ámbitos de experimentación: Emprender é unha actitude; Somos emprendedores; Mira. Aprende a observar; Pensa. Solucións innovadoras; Fai. Da idea ao negocio e Empeza. Si queres, podes.
 
Ao LabEmprende poden subirse principalmente mozos e mozas de idades comprendidas entre os 14 e os 18 anos.
 
“É unha proposta moi interesante que permitirá aos mozos e mozas estimular novas formas de pensar e de actuar, permitíndolles desplegar os seus talentos e potenciais”, apuntou a concelleira, “Por iso convido á mocidade a visitar este bus e descubrir todo o que lles pode ofrecer”.
31/07/2023 in Alcaldía, Educación e tecnoloxía

Profesionais da AEMET imparten un curso sobre o cambio climático na Aula UNED do Porriño

A aula UNED do Porriño acolle este verán o curso de extensión universitaria “Efectos do cambio climático en España e a problemática da súa comunicación”, impartido por profesionais da AEMET. A formación desenvolverase do 5 ao 7 de xullo e contempla un total de 20 horas lectivas (1 crédito ECTS).

Nos últimos anos os efectos do cambio climático fixéronse cada vez máis notorios, cun incremento dos fenómenos meteorolóxicos extremos. Trátase dun cambio rápido das condicións climáticas que se deixa sentir nos ciclos biolóxicos dos seres vivos, na saúde das persoas e nos nosos mares, fonte indispensable de recursos. Por todo isto, é necesario concienciar á poboación de que supón o cambio climático para o noso país, ubicado nunha das zonas máis vulnerables aos cambios de todo o planeta, e que podemos esperar nas próximas décadas.

Neste curso analizaranse todas estas cuestións e abordarase a problemática da súa comunicación.

A actividade permite ao estudante participar con asistencia presencial o asistencia online en directo ou diferido, sen necesidade de ir ao centro. A inscrición pode formalizarse a través da web da UNED.

26/06/2023 in Educación e tecnoloxía

As nenas e nenos do Porriño dan o pistoletazo de saída a Porrigalia 23

O pavillón municipal acolleu a segunda edición de “Pre-Porrigalia”, un evento co que preto de 200 nenos e nenas de sete centros educativos do Porriño iniciaron a conta atrás para Porrigalia 2023, que este ano se celebrará os días 7, 8 e 9 de xullo.

Os pequenos e pequenas disfrutaron do espectáculo de animación A BAILAR, da compañía Animar-T, unha festa interactiva con cancións en directo, xogos, divertidos bailes, un monicreque xigante, maxia, grandes bonecos, explosións de confeti, batalla de globos xigantes e moitas máis actividades que fixeron as delicias dos cativos.

Desta maneira, deron o disparo de saída á troula das civilizacións que este ano anegará de novo o Porriño. O fixeron acompañados polo alcalde do Porriño, Alejandro Lorenzo, os concelleiros de Educación e Cultura, Carolina González e Bienvenido Estévez, e os seus mestres. O rexedor convidou aos nenos e nenas a “disfrazarvos todos este ano e disfrutar a tope dunha festa da que sodes moi protagonistas e que está pensada por e para vós”.

21/06/2023 in Alcaldía, Cultura e festas, Educación e tecnoloxía

A conciencia social da mocidade porriñesa coa doazón e transplante de órganos deixouse sentir en Santiago de Compostela

Hoxe inaugurouse en Santiago de Compostela a exposición “Fai que suba a marea. Doa”, un traballo levado a cabo polo alumnado do IES Ribeira do Louro dentro do programa “Salvavidas” da Coordinación Autonómica de Transplantes da Axencia de Doazón de Órganos e Sangue (ADOS) e que poderá visitarse na planta baixa das dependencias dos edificios administrativos de San Lázaro.

Este acto tivo lugar dentro dos actos de conmemoración do Día Nacional do Doante de Órganos e Tecidos. Así, este proxecto multidisciplinar, desenvolvido polos alumnos e alumnas do IES porriñés e coordinado pola docente María José Iglesias, é unha actividade do programa “Salvavidas”, inserido no Plan Proxecta, que posibilita que entidades alleas ao sistema educativo, neste caso a Coordinación Autonómica de Transplantes ADOS, desenvolvan proxectos de diversa índole como sucede coa sensibilización a prol da doazón e transplante de órganos.

A exposición “Fai que suba a marea” recolle esculturas de escaiola de mans que amosan a súa disposición á doazón de órganos e tecidos, conformando unha marea como representación deste acto solidario. Entre as mans realizadas, podemos atopar as do Presidente da Xunta de Galicia, Alfonso Rueda, así como dos conselleiros de Sanidade e Educación, o alcalde do Porriño, Alejandro Lorenzo, unha doante viva, Eva González, receptores de órganos como César Núñez o Abraham Vicente, o xerente do Sergas, e membros de asociacións de doantes, coordinadores hospitalarios de transplante, entre outros.

A presentación foi levada a cabo polos estudantes e contu coa presenza do director xeral de Asistencia Sanitaria, Jorge Aboal, o director Xeral de Xustiza, José Tronchoni, o director xeral de Centros e Recursos Humanos da Consellería de Cultura e Eduación, Jesús Álvarez. Así, ademais da faceta artística, a presentación completouse cunha breve intervención musical e a lectura dunha poesía de Raquel Castro, resultando especialmente salientable o compromiso solidario amosado polas alumnas e alumnos que participaron.

07/06/2023 in Alcaldía, Educación e tecnoloxía, Sanidade

Lume, unha invitación a preguntarnos de onde nace a violencia

O Centro Cultural Municipal acolleu hoxe a presentación de Lume, a obra de José Luis Baños de Cos que resultou gañadora do certame de textos de teatro xuvenil Roberto Vidal Bolaño na súa quinta edición.
Acompañando ao autor estiveron o alcalde do Porriño, Alejandro Lorenzo, o director xeral da Editorial Galaxia, Francisco Castro, e a secretaria do xurado do premio, Raquel Castro, así como unha representación do equipo directivo do IES Ribeira do Louro, que xunto coa editorial e o Concello do Porriño impulsan este certame.
 
É a segunda vez que Baños se impón no Vidal Bolaño, pois xa no ano 2020 o fixo coa obra A cámara escura. Desta vez, o xurado decidiu por unanimidade outorgalle o premio por ser unha obra moi acaída pola temática e pola linguaxe empregada para a súa representación ou lectura nos centros de ensino secundario.
 
O autor mostrouse “moi contento de estar de novo no Porriño e agradeceu ao Concello do Porriño, á Editorial Galaxia e ao IES Ribeira do Louro que organicen este premio, que creo que é moi importante para o arraigo do teatro na xente nova. Por iso oxalá sexan moitas máis edicións” .
 
Sobre Lume destacou o valor social do texto, cuxa verdadeira protagonista é a violencia, cada máis presente na nosa sociedade, con múltiples formas, e en moitos casos, agochada tralo anonimato da masa grupal. “Hai temas que hai que tratar”, afirmou, sobre todo cando nos diriximos á mocidade e aproveitar ferramentas como o teatro non só para facer arte senón tamén para educar.
 
No mesmo sentido se manifestou Raquel Castro, que destacou que Lume está aliñado cos obxectivos deste premio “xa que un deles é achegar a actualidade social aos mozos e mozas e a violencia social está moi de actualidade”, lamentablemente. Salientou tamén que José Luis “manexa con destreza a linguaxe que o une ao público ao que se dirixe, como xa demostrou coa outra obra premiada A cámara escura”.
Francisco Castro destacou unha vez máis a relevancia deste premio, único na dramaturxia xuvenil, que xa se consolidou como un referente e agradeceu o respaldo do Concello do Porriño e a iniciativa do IES Ribeira do Louro.
 
Por último o alcalde, Alejandro Lorenzo, lembrou a importancia de obras como Lume “que achegan o valor do respecto aos mozos e mozas a través do teatro e crean conciencia”. Lorenzo reiterou o apoio do Concello do Porriño a este certame, cuxa sexta edición se atopa en marcha xa.
02/06/2023 in Alcaldía, Cultura e festas, Educación e tecnoloxía

Catro patas de apoio

A concellería de Educación e a OMIX do Concello do Porriño están a desenvolver un Programa de Intervencións asistidas con Cans para o alumnado con NEAE do centro educativo ACEESCA.

Baixo o lema “4patas de apoio”, profesionais dedicados ás intervencións asistidas con animais trasladan aos participantes os beneficios que achegan os cans aos seres humanos, mediante a súa incorporación en contextos terapéuticos, co obxectivo de proporcionar motivación e estímulo. 

A través da alianza co can, o alumnado traballa as áreas que axudan ao seu desenvolvemento, promovendo a comunicación, o respecto, a autoestima e a valía persoal. 

19/04/2023 in Educación e tecnoloxía, Mocidade

Ladrando ladrando a clase pasa voando

O Concello do Porriño, a través da concellería de Educación e a OMIX, está a desenvolver nos centros educativos os obradoiros de educación en valores asistidos por cans de terapia “Ladrando ladrando a clase pasa voando”.

Nesta actividade participan 206 nenas e nenos de segundo de primaria do CEIP Antonio Palacios, CEIP de Atios, CEIP Cruz Budiño, CEIP Ribeira do Louro, CEIP Xosé Fernández López, CEIP Ribeira, CEIP Xosé Fernández López, CPR Hermanos Quiroga, CPR Santo Tomás e EI de Mosende.

“O obxectivo desta actividade é trasladar os beneficios que achegan os animais nas contorans escolares, co fin de traballar de forma transversal a educación en valores e a posesión responsable de mascotas, con obradoiros orientados a este fin”, explicou a concelleira, Carolina González.

No mesmo sentido se manifestou o alcalde, Alejandro Lorenzo, que engadiu que se elaboraron para traballar tamén “o compañeirismo, o respecto, a integración, a solidariedade e a autoestima, así como os hábitos de hixiene e alimentación saudable”.

Nestes obradoiros abórdanse, entre outros temas, a educación en positivo o acoso escolar e os contratempos derivados de problemas de conducta.

A metodoloxía en todos eles é sempre activa, participativa, lúdica e integradora.

14/04/2023 in Educación e tecnoloxía

O servizo de Aula Madruga chegará a todos os coles do Porriño

O Concello do Porriño formalizou hoxe as súas primeiras axudas municipais directas para a posta en marcha dun servizo de vital importancia para as familias: a implantación de Aula Madruga nos colexios.

O alcalde, Alejandro Lorenzo, e a concelleira de Educación, Carolina González, asinaron hoxe os convenios de colaboración coas presidentas das ANPAS do Santa Eulalia CEIP Plurilingüe de Atios e “A Oliveira” do CEIP Xosé Fernández López, Bárbara Belén Costas e Mónica Pita, respectiva.

No caso do centro escolar do centro urbano esta achega municipal permitirá afrontar o 50% do gasto que supón a posta en marcha por primeira vez deste servizo de conciliación. Concretamente serán 3.000 euros ao tratarse do primeiro ano. No caso do colexio de Atios a achega será de 1.500 euros, xa que a aula madruga xa estaba funcionando.

Cabe destacar que os dous centros educativos que aínda non dispoñían deste servizo, o CEIP Cruz Budiño e o CPI da Ribeira, xa o ofertan para vindeiro ano, e contarán a tal fin co respaldo do concello nos mesmos termos.

“Trátase de facilitar ás familias conciliar a vida laboral e familiar, e demostrouse que a Aula Madruga é un servizo moi efectivo a este fin ao ofrecer acompañamento e custodia aos nenos e nenas ata a hora de comezar as clases”, apuntou o alcalde, Alejandro Lorenzo, “Considero que como administración máis próxima é o noso deber tender a man sempre ás asociacións de pais e nais para o que precisen, xa que isto repercute directamente na mellora da calidade de vida da veciñanza”.

Neste sentido se manifestou tamén a concelleira, Carolina González, que agradeceu ás ANPAS “a iniciativa e as ganas de traballar da man co Concello a prol da comunidade educativa”.

28/02/2023 in Alcaldía, Educación e tecnoloxía

Os nenos e nenas do Porriño aprenden hábitos saudables de alimentación xogando

Preto de 150 nenos e nenas do Porriño participan estes días na actividade “Coa comida si se xoga”, impulsada polo Concello do Porriño a través da Concellería de Educación, que dirixe Carolina González, e a OMIX.

Este programa, no que participa o alumnado de educación infantil dos centros educativos do municipio, ten como obxectivo principal consolidar a adquisición de hábitos de vida saudables, en especial alimentarios, dende idades temperás e o fai mediante o xogo.

“A construción de rutinas, que posteriormente se converterán en hábitos, é esencial na etapa da Educación Infantil, xa que reporta enormes beneficios aos pequenos e pequenas, axudándoos no seu desenvolvemento integral e na formación da súa personalidade”, apuntou a concelleira, “Entre estes hábitos están o de ter unha alimentación adecuada, a actividade física diaria, ou os correctos hábitos do sono e a hixiene. Para evitar a resistencia a eles, aconséllase comezar canto antes coa súa aprendizaxe e posta en práctica”.

No mesmo sentido se expresou o alcalde, Alejandro Lorenzo, durante a súa visita á primeira xornada que se celebrou esta mañá no CEIP Cruz Budiño e na que puido comprobar de primeira man a implicación e interese dos pequenos. “Son especialmente receptivos e a través dos xogos que se lles propoñen coñecen os distintos tipos de alimentos e a súa frecuencia de consumo para ter unha alimentación variada ademais de coñecer a procedencia dos que máis coñecen”, concluíu o rexedor, “Sen dúbida móstranse moi interesados no que están a aprender e iso é moi bo sinal”.

28/02/2023 in Alcaldía, Educación e tecnoloxía