Educación e tecnoloxía

O alumnado do IES Ribeira do Louro participa nunha charla sobre agresións sexuais e violencia sexual

O alumnado de 1º curso de bacharelato do IES Ribeira do Louro, en Torneiros, participou hoxe dunha charla informativa sobre agresións e violencia sexual.

Na conferencia, impulsada desde a Secretaría Xeral de Igualdade da Xunta de Galicia e organizada pola concellería de Igualdade,  abordáronse cos alumnos e alumnas do instituto porriñés os estereotipos de xénero, a tipoloxía de violencia sexual, a cultura da violencia, o consentimento, e outros recursos relacionados coas agresións sexuais.

A charla foi impartida por Angélica Mercado Torres, mestra de profesión, especialista en estudios de xénero e políticas de igualdade que conta cunha ampla experiencia en programas a mulleres migrantes e con discapacidade psíquica.

A concelleira de Igualdade, Carolina González, que participou da mesma, salientou que “a violencia sexual é un problema na nosa sociedade que debemos abordar dende todos os ámbitos. O máis importante é a concienciación, a formación e a información dende o ámbito educativo para que as nenas e nenos, mozas e mozos se formen e eduquen nos valores da igualdade e o respecto, e  eles serán nun futuro eses adultos que mostren tolerancia cero a calquera tipo de violencia”.

11/01/2022 in Educación e tecnoloxía, Igualdade

Actividades da Biblioteca Municipal: sesións de animación á lectura e xornadas “Acompañando na aventura de crecer”

Esta tarde ás 18,30 horas terá lugar na Biblioteca Municipal unha sesión de animación á lectura a cargo de Paula Carballeira, baixo o título “Un mes. Catro lúas. Unha sesión de contos”.

Trátase dunha actividade organizada pola Biblioteca Municipal, programada ao longo de varios meses coa intención de animar á lectura empregando os contos como ferramenta.

Segundo explica a páxina web de Cultura do Porriño “non hai mellor lugar para os contos que unha biblioteca. Nela, quedan ao abeiro dos libros, quentes e protexidos. A biblioteca do Porriño quere traer novas historias, desas que quedan na súa, na vosa memoria, coma un arrecendo ou un alento, porque as palabras van polo vento.

“Paula Carballeira dedícase a contar. Vai polo mundo recollendo contos. Trae os contos que foi atopando, e vainos contando. Escolle cada palabra, cada canción, cada xogo, porque nunha sesión de contos temos todo o tempo do mundo para desfrutalo mentres dura”.

“Cada catro lúas, chegará ao Porriño con contos novos. En xaneiro, contos de inverno. En febreiro, contos de bromas, de disfraces, de Entroido. En marzo, contos de primavera, de poesía, de maxia. En abril, contos deses que inventaba H. C. Andersen en Dinamarca. E en maio, contos de aquí, letras que coñecemos, lugares misteriosos dos que non sabemos”.

 

Ciclo “Acompañando na aventura de crecer”

Por outra banda, a Biblioteca Municipal tamén acollerá unhas xornadas para familias e profesionais baixo o título “Acompañando na aventura de crecer”, nas que abordarase, desde diferentes puntos de vista, como pode favorecerse o correcto desenvolvemento dos fillos e fillas desde que nacen e na súa primeira etapa infantil.

As conferencias serán mensuais e comezarán o venres 14 co tema “Impacto das pantallas no desenvolvemento cognitivo”, a cargo da pedagoga e mestra, María Couso Barja. Esta docente autora do proxecto “Cerebro e Xogo” que promove o uso de xogos de mesa como ferramenta de aprendizaxe infantil, defende a tese de que o contacto e uso da tecnoloxía dixital en idades prematuras deberían retrasarse.  

07/01/2022 in Cultura e festas, Educación e tecnoloxía

O novo goberno municipal potenciará a atención cidadá e a transparencia, e dedicará unha concellería á terceira idade

 

O alcalde Alejandro Lorenzo fixo público hoxe o reparto de responsabilidades e delegacións entre os seus concelleiros. Destaca a creación das áreas de Atención Cidadá e Transparencia que dependerán da concelleira Antía Carrera.

A subliñar tamén a creación da área de Terceira Idade que desenvolverá Ascensión Rosario Costas. Trátase dunha concellería específica para dar resposta ás necesidades dos nosos maiores e garantir que a nosa vila ofreza a calidade de vida que merecen, traballando conxuntamente co resto de departamentos.

DISTRIBUCIÓN DE ÁREAS E DELEGACIÓNS 

O propio alcalde, Manuel Alejandro Lorenzo levará tamén as áreas de Economía e Persoal.

Abel Estévez, que será o primeiro tenente de alcalde dirixirá Seguridade, Policía Local, Protección Civil, Voluntariado, Deportes e Benestar Social.

Carolina González, segunda tenente alcalde, desenvolverá as delegacións de Educación, Uned e Programas Europeos; Igualdade; Sanidade e Normalización Lingüística.

Ramón Porto será o concelleiro responsable de Vías, Obras e Servizos

Antía Carrera levará Urbanismo, Patrimonio Municipal do Solo, Contratación, Comercio, Mercado, Atención Cidadá e Transparencia, e Medio Ambiente.

José Carlos González terá as competencias de Parques e Xardíns; Limpeza; Lixo e Cemiterios.

Bienvenido Estévez colle as competencias de Traída de Augas Veciñais; Asociacións; Parroquias; Novas Tecnoloxías; Xuventude; Cultura e Festas.

Por último, Ascensión Rosario Costas asume a nova área de Terceira Idade e ademais as deegacións de Industria, Turismo, Formación e Emprego.

“EQUIPO POR E PARA PORRIÑO”

As competencias repártense entre os oito concelleiros do equipo. A idea é desenvolver un traballo transversal e coordinado que beneficie á cidadanía”, explicou o alcalde.

Trátase de “un equipo por e para Porriño”, afirmou Alejandro Lorenzo como síntese do esquema de traballo que propón.

“Xorden problemas e demandas cotiáns que non afectan só a un ámbito senón ao conxunto do Concello e tamén a diversos sectores da poboación e por iso son necesarias actuacións integrais para optimizar os recursos dos que dispoñemos, aproveitar as sinerxías, e dar unha maior eficiencia e eficacia. calidade do servizo que prestamos”, engadiu o rexedor municipal.

Alejandro Lorenzo mostrouse satisfeito de ter un equipo cohesionado que traballe xunto e témolo“. E citou como proba diso” o traballo da brigada de Deportes que se encarga de arranxar os parques infantís; ou a cooperación das concellerías de Vías e Obras, Servizos, Limpeza Viaria, Parroquias e Asociacións nas actuacións urxentes de lavado e limpeza como a que hoxe se leva a cabo no entorno da Igrexa de Santa María”, concluíu Alejandro Lorenzo.

28/12/2021 in Alcaldía, Benestar, Cemiterios, Cultura e festas, Deportes, Educación e tecnoloxía, Emprego e formación, Igualdade, Limpeza, Medio Ambiente, Mocidade, Novas Tecnoloxías, Parques e xardíns, Patrimonio Municipal, Proxectos Europeos, Seguridade, Servizos sociais, Tráfico, Turismo, Urbanismo, comercio e industria, Vías e obras

Porriño, quinto concello de Galicia en converterse en Cidade Amiga das Persoas Maiores

Nun acto celebrado hoxe no salón de plenos do Concello, a concelleira de Educación, Lourdes Moure anunciou a incorporación de Porriño á rede de “Cidades Amigas dos Maiores”. A Organización Mundial da Saúde (OMS) concedeu este recoñecemento ao Porriño, que foi comunicado a semana pasada ao Concello.

Un recoñecemento que se demorou máis do esperado pero que finalmente foi confirmado desde a sede da OMS en Ginebra e pola secretaría xeral do IMSERSO que é o organismo encargado de coordinar e dinamizar esta rede en España, dependente do Ministerio de Dereitos Sociais e Axenda 2030.

“Deste xeito, Porriño convértese nun dos cinco primeiros concellos de Galicia en formar parte desta rede e no segundo da provincia de Pontevedra, xunto con Baiona, así como Castrelo do Miño, Ourense e Santiago de Compostela”, segundo anunciou a concelleira de Educación.

A misión da Rede é estimular e favorecer que as cidades e comunidades de todo o mundo sexan cada vez máis amigables coas persoas maiores. “Para O Porriño formar parte da Rede reflicte o compromiso do Concello para escoitar as necesidades da súa poboación de maior idade, avaliar e facer un seguimento da súa situación e traballar en colaboración coas persoas maiores en todos os ámbitos para crear contornas físicas e sociais amigables co envellecemento”, manifestou a concelleira Moure.

Para finalizar a concelleira recalcou que “todas e cada unha das fases deste proxecto leváronse e levaranse a cabo  a través do traballo realizado desde a  OMIX e a Concellería de Educación  do Concello do Porriño”.

No acto ao que asistiron invitados representacións de asociacións veciñais, culturais e entidades sociais do Porriño, tamén participou Rubén Varela, representante da firma “Atelier Social” que colabora co Concello no desenvolvemento da iniciativa. Segundo explicou, “continuando co exemplo xa recoñecido do Porriño como Cidade Amiga da Infancia que se visualiza na celebración anual dos plenos infantís e coa existencia dun consello da infancia e adolescencia, a idea é que os maiores de Porriño , tamén ter un diálogo instituído co Concello mediante procesos de participación comunitaria”.

17/12/2021 in Educación e tecnoloxía

O Porriño tamén recibe o título de “Cidade Amiga das Persoas Maiores”

O Concello de Porriño ven de recibir o título de Cidade Amiga das Persoas Maiores que se une ao de Cidade Amiga da Infancia que ostenta desde 2018.  A concelleira de Educación, Lourdes Moure Varela está a convidar á presentación aos medios informativos que se vai realizar o venres 17, ás 11 horas, no salón de plenos do Concello para que tamén acudan representantes das asociacións veciñais  e culturais das parroquias do concello e de diversos sectores sociais.

No acto, a concelleira Lourdes Moure explicará en que consiste a adhesión de Porriño á Rede de Cidades e Comunidades Amigables coas Persoas Maiores. O título outorgouse pola OMS e o Imserso.

A Rede Mundial de Cidades e Comunidades Amigas dos Maiores foi promovida pola Organización Mundial da Saúde (OMS) en 2010 en resposta ao rápido envellecemento da poboación e co obxectivo de conectar cidades, comunidades e organizacións de todo o mundo coa visión común de facendo do seu entorno un lugar mellor para envellecer con dignidade e calidade.

Trátase dunha iniciativa centrada na acción local, que aborda de forma integral os aspectos que inciden no día a día das vilas e cidades e faino promovendo a participación das persoas maiores, tendo en conta as súas necesidades, opinións e propostas no proceso. de análise e mellora da localidade en diversos ámbitos, co fin último de promover un envellecemento saudable e activo.

O Imserso, a través dun Convenio de Colaboración coa OMS, é o órgano encargado de coordinar e dinamizar a Rede en España.

Cartel_Amigable coas persoas maiores

14/12/2021 in Educación e tecnoloxía

O Porriño participa nas “IV Xornadas Formativas Cidades Amigas da Infancia” que organiza Unicef

A concelleira de Educación, Lourdes Moure participou hoxe na primeira quenda das “IV Xornadas Formativas Cidades Amigas da Infancia” que organiza UNICEF baixo o título “Estratexias para a promoción da participación infantil e adolescente desde o ámbito local”. Estas Xornadas se prolongarán ata mañá mércores e celébranse de xeito telemática.

Ademais da concelleiro de Educación, a responsable da OMIX do Porriño, Noelia de la Fuente e a nena Kiara Vázquez Lescano, integrante do Consello local da Infancia e Mocidade, representan a Porriño e participan nas reunións telemáticas.

O papel da nena Kiara Vázquez, representante da infancia porriñesa, será a de ofrecer a visión da xente nova sobre a necesidade da creación dun consello a nivel autonómico.

Este encontro organizado por Unicef para O Porriño e demais Cidades Amigas da Infancia de Galicia, está encamiñado a formar e orientar a todas as persoas que queiran promover a participación infantil e adolescente nas súas localidades. Os obxectivos principais son capacitar aos municipios de Galicia en políticas de Infancia, ofrecendo ferramentas que axuden a mellorar as súas políticas dirixidas a fomentar a participación infantil e adolescente no ámbito local.

14/12/2021 in Educación e tecnoloxía

Unha pancarta na fachada do Concello lembra a conmemoración do Día Internacional das Persoas con Discapacidade

 

A concelleira de Educación, Lourdes Moure, xunto con alumnos, profesores e coidadores do centro “Aceesca” participaron esta mañá no despregamento da pancarta conmemorativa do Día Internacional das Persoas con Discapacidade.

A pancarta seguirá ao longo desta semana na fachada do edificio do Concello. Ademais o mañá venres, ao anoitecer, o edificio do Concello iluminarase de cor verde.

O Día Internacional das Persoas con Discapacidade celébrase o 3 de decembro, por acordo da ONU. Este ano 2021 baixo o lema. “Reconstruír mellor: cara a un mundo pos-Covid inclusivo, accesible e sostible por, para e coas persoas con discapacidade”.

O Concello de Porriño, a través da Concellería de Educación, da OMIX, do Consello de Participación da Infancia e a Adolescencia e ACEESCA, anima a todas as persoas a conmemorar este Día.

A conmemoración deste Día Internacional procura unha toma de conciencia e de medidas orientadas cara á constante mellora da situación das persoas con discapacidades e á consecución da igualdade de oportunidades para elas.  

02/12/2021 in Educación e tecnoloxía

“GivingTuesday” (Martes de Dar): a concelleira de Educación comprobou o comezo da recollida solidaria no CEIP da Ribeira

UN ANO MÁIS O PORRIÑO SÚMASE A ESTA INICIATIVA #GivingTuesday (Martes de dar)

A infancia e mocidade de Porriño leva a cabo nestes días a iniciativa solidaria “Giving Tuesday” (Martes de dar), que é un movemento internacional e solidariedade, a través da recollida de alimentos non perecedoiros e productos de hixiene para o seu posterior reparto entre as familias máis necesitadas.

No recente pleno infantil celebrado o 19 de novembro polo Concello do Porriño, aprobouse por unanimidade de todos os representantes dos centros docentes, realizar esta recollida.

Lourdes Moure, concelleira de Educación acudiu hoxe ao CEIP da Ribeira, en Torneiros, onde comprobou o desenvolvemento da recollida xunto coa directora do colexio, Teresa Castro.

A OMIX do Porriño e a Concellería de Educación  apoian e organizan  un ano máis  esta inicitiva “#GivingTuesday2021”. Este ano a prioridade é a recollida de  alimento non perecedoiros e produtos de hixiene para bebés (cueiros, cremas, toalliñas, purés, leites e alimentos infantís de todo tipo) para a súa posterior distribución entre as familias do concello con menores recursos. A recollida comezou hoxe e continuará ata o venres 3 de decembro e realizase contando coa  colaboración dos centros escolares, nos que se instalan  puntos de  recollida.

O Giving Tuesday, ou “Martes de dar”, é un movemento internacional que quere incentivar e multiplicar as boas accións das persoas. O obxectivo é dedicar un día en todo o mundo (que é hoxe 30 de novembro), para celebrar o feito de dar, poden ser alimentos, diñeiro, tempo (voluntariado), obxectos de segunda man, etc. Este movemento naceu como alternativa ao Black Friday e Cyber Monday, que promoven o consumismo.

“Dende o Concello convidamos a tódolos veciños e veciñas a participar nesta iniciativa solidaria. día, no que todo o mundo se une para DAR, No seu caso os productos terán que entregarse no banco de alimentos SOS Porriño”, lembrou a concelleira Lourdes Moure.

O venres 3 persoal voluntario de “SOS Porriño” realizará a retirada da recollida nos centros para o seu traslado e clasificación.

30/11/2021 in Educación e tecnoloxía

O pleno infantil aprobou celebrar unha nova edición do “Martes de dar” para unha recollida solidaria de alimentos e produtos de hixiene

Os representantes de todos os centros educativos de Porriño que participaron hoxe no pleno infantil que se celebra coa ocasión do Día Mundial da Infancia que se conmemorará mañá, acordaron por unanimidade que o Concello organice e lidere unha nova iniciativa “GivingTuesday” (Martes de dar).

Consistirá na recollida de alimentos e produtos de hixiene e a súa posterior clasificación para que sexan repartidos entre as familias con menos recursos do municipio.
Tamén os nenos e nenas acordaron por unanimidade sumarse á petición doutros concellos pontevedreses que solicitan a celebración dun pleno infantil anual na Deputación no que poidan participar os representantes dos distintos consellos municipais da infancia existentes na provincia. A solicitude trasladarase á presidenta da Deputación, Carmela Silva.


No pleno infantil os representantes do CEIP de Atios, CEIP Cruz-Budiño, CEIP da Ribeira, CEIP Antonio Palacios, CPR Santo Tomás, CEIP Fernández López, Centro ACEESCA, IES Pino Manso, CPR Hermanos Quiroga e IES Ribeira do Louro, expuxeron as súas propostas para que Porriño sexa un concello máis sostible.
As peticións máis repetidas foron carrís bici, unha piscina ao aire libre ou polo menos uns chorros para refrescarse no verán, máis papeleiras, limpeza do paseo do río Louro e o traslado das instalacións de “Coren” a un polígono industrial.

A concelleira de Educación, Lourdes Moure que presidiu a sesión, asistida por Noelia de la Fuente, responsable da OMIX do Porriño, tomou nota de todas as peticións dos rapaces e aproveitou para reiterarlles que mañá sábado vaise celebrar o “Pinchoneno”, a versión infantil do “Pinchorriño”, que foi unha das peticións que a infancia porriñesa fixera hai tempo.

19/11/2021 in Educación e tecnoloxía, Mocidade

O venres 19, o pleno infantil do Porriño

Un ano máis, o Concello do Porriño, para conmemorar o Día Internacional dos Dereitos da
Infancia, celebrará un Pleno Infantil, coa participación de nenas, nenos e adolescentes do
municipio.
O Pleno celebrarase o venres 19 de novembro, ás 10:30h da mañá no salón de sesións do Concello, onde acudirán unha voceira e un voceiro de cada centro de ensino do municipio, en representación de todas as nenas, nenos e adolescentes. En total participarán os dez centros do municipio; sete colexios, dous institutos e a asociación ACEESCA.
A temática deste ano, seguindo as indicacións do Comite de Unicef Galicia, será o medio ambiente. As persoas participantes xunto coas compañeiras e compañeiros do seu centro, están debatindo, reflexionando e preparando as propostas que presentarán no pleno para que o Concello do Porriño sexa máis sostible e sexa quen de axeitarse mellor aos impactos do cambio climático.

Previamente, este martes dous nenos porriñeses, Carla Godoy Magalhaes e Nicolás Freiría Casal representaron ao Consello Municipal da Infancia e Adolescencia local no Parlamento de Galicia. Participaron no Foro de Participación Infantil e Adolescente. Este encontro, organizado polo Parlamento autonómico e o Comité de Unicef Galicia, celebrase anualmente para conmemorar o Día Internacional dos Dereitos da Infancia. 

16/11/2021 in Alcaldía, Educación e tecnoloxía, Mocidade