Deportes

A Concellería de Deportes reitera a orde de que os eventos deportivos sexan sen público

 

A Concellería de Deportes enviou unha comunicación aos clubs porriñeses que esta fin de semana terán partidos como locais nas súas respectivas competicións, reiterándolles que segue en vigor a orde de que se celebren sen público.

A comunicación informa que segue en vigor o decreto municipal do pasado 22 de outubro que determinaba, entre outras medidas restritivas anti-Covid, que os eventos deportivos se celebren a porta pechada, xa sexan en recintos cubertos como ao aire libre.

Esta comunicación reiterouse ao C.D. Pontellas que xoga como local o domingo en San Campío. E tamén indicóuselle ao Porriño Baloncesto Base que celebra partido no Polideportivo Municipal da Liga EBA que se retoma.

06/11/2020 in Deportes

A alcaldesa e o concelleiro de Deportes participaron en sendas reunións telemáticas sobre a Volta Ciclista a España e o Camiño de Santiago

 

Eva García, alcaldesa de O Porriño participou este mediodía, xunto con outros alcaldes e alcaldesas de concellos da ruta xacobea, nunha reunión telemática coa presidenta da Deputación. Tratouse dunha reunión da Mesa Provincial do Camiño na que Carmela Silva explicou aos responsables municipais as diferentes iniciativas que a Deputación está a desenvolver para pór en valor este itinerario cultura como un eixe estratéxico da estratexia turística de O Porriño e demais concellos do Camiño.

VOLTA CICLISTA

Por outra banda, David Alonso, concelleiro de Deportes participou noutra reunión telemática de responsables municipais dos concellos pontevedreses polos que transcorrerán etapas da Volta Ciclista a España coa Subdelegada do Goberno e mandos da Garda Civil de Tráfico. Pola súa banda David Alonso estivo acompañado de Julio Bernárdez, xefe de Deportes e Daniel Rodríguez, inspector xefe da Policía Local.

 
Na reunión telemática con Maica Larriba repasaron o libro de ruta nas diferentes etapas e as previsións de paso polas localidades. No caso de O Porriño, o vindeiro xoves 5 de novembro, terá lugar a saída lanzada da etapa decimo quinta, a partir das 10:50 horas.
A caravana sairá de Mos e chegará ao Porriño pola Avenida de Galicia de xeito neutralizado sendo a saída lanzada dende a rotonda dos Aloques e avenida Antonio Palacios en dirección a Ponteareas.
Segundo as previsións da organización será preciso cortar o tráfico por todas estas vías e outras afectadas, como a rúa Domingo Bueno aproximadamente media hora antes do paso da comitiva.

29/10/2020 in Alcaldía, Cultura e festas, Deportes, Turismo

(Ampliación) A Concellería de Deportes comunica que as competicións en recintos pechados e abertos serán sen público

A Alcaldía e a Concellería de Deportes do Porriño comunican a decisión de prohibir o acceso de público aos eventos deportivos que se celebren en recintos pechados como o Polideportivo Municipal así como tamén nas instalacións ao aire libre, incluídos os campos de futbol.  

A restricción é para competicións federadas de ámbito autonómico e nacional. A medida é de aplicación a partir desta fin de semana e estará vixente en tanto en canto persista a actual situación sanitaria. Dende hoxe, O Porriño atópase en alerta vermella (nivel 3) cun total de 26 contaxios activos, segundo informouse a Alcaldía ante a Conselleria de Sanidade.

David Alonso, concelleiro de Deportes admitiu que “é unha decisión dura”. “Coido que debíamos adiantarnos ao avance do virus, a pesar de que no DOG informabase de que poderían permitirse certos cupos de espectadores”, manifestou o concelleiro.

 

22/10/2020 in Alcaldía, Deportes

O Concello decide precintar parques infantís, suspender o mercado ambulante, controlar aforos na Praza de Abastos e competicións deportivas sen público

A Alcaldía comunica que compre adoptar una serie de medidas complementarias no ámbito municipal á vista do crecemento dos contaxios por covid-19 que motivaron que dende hoxe, O Porriño estea en alerta vermella. O Porriño cun total de 26 contaxios activos, entrou en nivel 3 polo que o goberno municipal, tras unha reunión de urxencia, resolveu as seguintes disposicións:

 

  • Suspender o mercado ambulante dos martes
  • Precintar os parques infantís
  • Establecer na Praza de Abastos, un control de acceso e un aforo restrinxido, con circuito de entrada e saída.
  • Suspensión de actividades culturais tanto nos recintos municipais como nas asociacións.
  • Peche da Sala de Estudo Municipal
  • Competicions deportivas federadas sen público en recintos pechados e ao aire libre.

Todas estas medidas estarán vixentes ata que mellore a situación.

A alcaldesa Eva García explicou que todas estas decisións “precisan da colaboración da veciñanza” e fixo “unha chamada á prudencia para que os porriñeses e porriñesas limiten os contactos con persoas non convivintes para protexerse a sí mesmos, a súas familias e aos demais. O Ministerio de Sanidade advirtenos de que agardamos meses moi duros e teremos que ser moi responsables”.

22/10/2020 in Alcaldía, Cultura e festas, Deportes

A pista 2 do Polideportivo Municipal estrea nova imaxe

 

A pista 2 do Polideportivo Municipal, unha vez rematadas as obras de lixado, arranxo e colocación da nova superficie de madeira para concluír a reparación dos danos ocasionados polas inundacións do 1 de xuño, estrea nova imaxe co pintado das liñas da cancha en cor morada.

A decisión responde a “un xesto de solidariedade coa perspectiva de igualdade e contra a violencia de xénero”, manifestou David Alonso, concelleiro de Deportes que hoxe estivo a comprobar diversas actuacións no Polideportivo. Entre elas, a colocación nas dúas pistas de novas proteccións na zona das canastras.

 

O concelleiro inspeccionou os traballos de arranxo do ximnasio do Pavillón 1 que están a rematarse coa colocación do novo parqué de vinilo, despois de ter concluídas as obras de impermeabilización. Neste ximnasio terán lugar as clases de pilates e de ximnasia de mantemento en catro quendas, cada unha con 10 persoas e divididas por días.

14/10/2020 in Deportes

Aida Valiño, do equipo “Louriña Cycling Team”, encabeza os éxitos deportivos dos nosos clubs no Campionato Galego de Contra Reloxo 2020

A triatleta Aida Valiño, flamante fichaxe do novo equipo ciclista porriñés “Louriña Cycling Team”, produto da fusión entre “Máster da Louriña” e “A.D. Avanza”, proclamouse campioa galega de contra reloxo individual 2020, na categoría elite. Cun crono de 19:36, Aida amosou a súa calidade. Hai que ter en conta que volveu á competición xa que estivo aleixada do ciclismo nestes últimos anos despois da súa maternidade e de sufrir dous accidentes de tráfico cando adestraba.

Na mesma categoría, a porriñesa “Chus” Barros, do “Spol C.C.” foi subcampioa de Galicia cun tempo de 21:09.

A proba disputouse sobre un circuíto de 13 quilómetros na vila termal de Baños de Molgas, con saída e meta no Santuario dos Milagres.

No que atinxe á categoría elite masculina, o ciclista Roberto Mediero, do “Louriña Cycling Team”, foi medalla de bronce, a 1:13 do gañador, Samuel Blanco. Por outra banda, Gustavo Rodríguez, (“Louriña Cycling Team”) que partía como favorito ao título, rematou cuarto a consecuencia dun pinchado que rebaixou as súas posibilidades.

Na categoría cadete masculino, Roberto Pereira (“A.D. Avanza”), foi terceiro. Parou o crono en 21:00, a 19″ do gañador.

Finalmente, en categoría Máster 40 masculina, Carlos Iván Vidal de Sa (“Louriña Cycling Team”) foi medalla de prata e na categoría Máster 40 feminina, Mónica Alarcón (“Louriña Cycling Team”) foi medalla de bronce. 

 

 

13/10/2020 in Deportes

Novas canastras laterais no Polideportivo Municipal

 

O Concelleiro de Deportes, David Alonso e o xefe do Servizo, Julio Bernárdez comprobaron a instalación no Polideportivo Municipal das novas canastras laterais xa que as anteriores estaban moi deterioradas.


Instaláronse dous xogos de canastras colgantes suxeitas ao teito, dotadas de adaptadores para baloncesto e minibasket e con automatismos para a súa recollida.
O equipamento contratouse coa empresa “Mondo Ibérica”, mediante contrato menor, cun orzamento de 17.363 €.

07/10/2020 in Deportes

Presentado o primeiro equipo do Balonmán Porriño

O Balonmán Porriño presentou hoxe o seu equipo que xogará unha tempada máis na “Liga Guerreras Iberdrola” da División de Honra feminina. O vindeiro sábado 19 realizará a súa estrea ante a afición local recibindo no Pavillón Municipal ao BM. Morvedre.

O acto celebrouse no patio do Centro Cultural Municipal. Polos protocolos anti-covid tan só presentouse o primeiro equipo que este ano denominase “Conservas Orbe Rubensa BM Porriño”. Abel Estévez, presidente do club, agradeceu de xeito especial que o xogador do Celta de Vigo, Rubén Blanco incrementase o seu apoio económico, razón pola que  a firma “Rubensa” incorporase ao nome oficial do equipo xunto con Conservas Orbe que comezou a pasada campaña.

Estévez referiuse ao Concello do Porriño “ao que adicamos este acto para agradecerlle o seu apoio xa que é o noso principal soporte económico” e definiu os meses anteriores como “moi difíciles ata que soubemos que o equipo non descendería porque non puidemos pelexar pola permanencia nas canchas a causa do parón da Liga que impuxo a pandemia”.

O presidente vaticinou que “este ano, se as lesións nos respectan, temos plantel para facer unha boa tempada”.

A continuación, David Alonso, concelleiro de Deportes do Porriño dixo “celebrar a unión de vontades das diferentes administracións e o club para garantir deporte seguro”. Alonso felicitou a Abel Estévez e a xunta directiva do club “polo cumprimento dos protocolos anti-covid que observo cada día nos adestramentos no Pavillón e polo traballo que estades a realizar”.

Pola súa banda, Bruno López, presidente da Federación Galega de Balonmán, dirixíndose ás xogadoras, díxolles que “sodes o punto de mira de 10.000 deportistas, xogadores e xogadoras de balonmán que aínda non poden volver á normalidade polo que o voso comportamento e responsabilidade, amosará que o balonmán é un deporte seguro”.

O presidente da FGB garantiu que os protocolos anti-covid que se acordaron coa Secretaria Xeral do Deporte que permiten aforo reducido nos pavillóns, “van funcionar”.    

Daniel Benavides, xefe territorial de Deportes da Xunta de Galicia ponderou “a importancia de que levedes o nome de O Porriño, o concello do deporte, e que estades mantendo e dando continuidade ao compromiso de moita xente que vos apoia como a Secretaria Xeral para O Deporte”.

Por último, pechou os discursos a alcaldesa Eva García que abundou na referencia á hostalaría local que “realiza un esforzo moi especial”. “Ten moito valor o apoio económico que dan os hostaleiros do Porriño a este club nun intre tan durísimo a pesar de ser un dos sectores máis castigados”.

17/09/2020 in Alcaldía, Deportes

Novo éxito de Carla Guisande proclamándose subcampiona de España de triatlón sprint

 

O Concello do Porriño, a través da Concellería de Deportes que dirixe David Alonso quere amosar a súa felicitación a triatleta porriñesa Carla Guisande que ven de proclamarase subcampiona de España na modalidade Triatlón Sprint, nas probas celebradas en Pontevedra.

Carla acadou o segundo mellor tempo na proba, tan só por detrás de Helena Moragas. Ademais a prestación da triatleta porriñesa sumou para que o seu equipo, Cidade Fluvial de Lugo, proclamarase campión de España por clubs.

Este novo éxito de Carla Guisande no panorama nacional, cando puido reiniciarse a tempada 2020, despois do parón polo estado de alarma e cos novos protocolos anti-covid, resulta prometedor. Lembremos que a boa racha de resultados de 2019 valeulle para ser galardoada na recente Gala do Deporte da área de Vigo.

 

25/08/2020 in Deportes