Cultura e festas

Ao longo do 2019 a Biblioteca Municipal do Porriño, que depende directamente da Alcaldía, desenvolverá un amplo programa de actividades gratuítas relacionadas coa “aprendizaxe permanente”.

A alcaldesa, Eva García de la Torre, subliña que “trátase de accións formativas non académicas que teñen como obxectivo o desenvolvemento do cidadán no plano laboral, social e persoal”. García de la Torre sinala que  “cada vez hai máis persoas con inquietudes de aprendizaxe permanente, e a Biblioteca Municipal do Porriño tentará responder durante este ano a estas inquietudes cun complto programa de actividades”.

Alfabetización dixital,inglés, linguaxe de sinais…

Desta forma están programados cursos de alfabetización dixital para maiores, grupos de conversación en inglés de varios niveis, cursos de lingua de signos, cursos de español para inmigrantes, de ferramentas de Google, obradoiros de cociña sen glute, cursos para aprender a falar en público, club de lectura, un wiki-maratón, ou unha intensa colaboración cos centros de ensino do Porriño que se traduce en visitas escolares á biblioteca con formación no uso da mesma, charlas para a “busca, selección e uso de información en internet” ou obradoiros de ciencia para escolares.

Animación Infantil á Lectura

Ademais desta intensa programación relacionada coa aprendizaxe, a Biblioteca Municipal do Porriño tamén ten presentado o seu programa de animación infantil á lectura para o 2019, que recibe o nome de “A Contateca”. Unha programación que ofrece ata trinta actuacións ao longo do ano, converténdose nunha das máis variadas e extensas das bibliotecas galegas.

Dende este mes, todos os xoves ás 18:00 horas celebrarase unha actividade de animación distinta na biblioteca porriñesa. Haberá contacontos en galego e inglés, obradoiros para toda a familia, talleres participativos, actuacións con kamishibai e libros pop-up, etc.

A biblioteca destaca a gran variedade da proposta, toda articulada ao redor do libro e da lectura, pero na que se tratarán ademais temas como a intelixencia emocional, as tradicións populares, a igualdade de xénero, a concienciación mediambiental ou o bullying. A programación da ‘Contateca’ está pensada para familias e público infantil, de 0 a 12 anos de idade, destacando a realización de numerosas actividades pensadas especificamente para bebés.

Aposta pola innovación e compromiso

Con esta programación, salienta a alcaldesa,  biblioteca do Concello do Porriño redobra a súa aposta pola animación á lectura e o traballo cos veciños e veciñas, coa “intención de afianzarse como un servizo público innovador e comprometido coa súa comunidade”.

…de novo ‘Premio María Moliner’

Eva García de la Torre subliña que por este labor “a nosa Biblioteca Municipal vén de ser  recoñecida, de novo, nos Premios María Moliner de Animación á Lectura convocados polo Ministerio de Cultura e a FEMP, como unha das 350 mellores bibliotecas do Estado”. Unha distinción que a biblioteca porriñesa leva conseguido “¡nada menos que 14 veces!” entre os anos 2002 e 2018.

Maxia, música, animación na rúa, charangas, o tradicional Xogo da Ola, comparsas, obradoiros, mesmo chocolatadas, Drags e DJs…todo cabe na Programación do Entroido do Porriño 2019.

Os días clave das festas deste ano serán o sábado, 2 de marzo, no que terá lugar a ‘Lectura do Pregón’, ás 12:30 h. na Praza do Arquitecto Antonio Palacios, a cargo de dous históricos do entroido porriñés, Abel e Maxi.

Ás 14:00 h. será o momento do Xantar do Entroido, animado por charangas e DJs. Ás 16:00 h. empeza o 76º Xogo da Ola. Ás 17:30 h. está marcado o inicio do ‘Desfile de Comparsas’, co espectáculo ‘Lume’ a cargo de Troula Animación. Ao remate do desfile empezará na carpa do Roxy a ‘Festa Rachada’.

Outro dos días centrais será o mércores, 6. Esa xornada será a de despedida do Entroido e abranguerá o ‘Velorio da Sardiña’, no Centro Recreativo e Cultural, ás 17:00h. De seguido o ‘Enterro’, ás 19:00h. con saída do Centro Recreativo cara a Praza de Antonio Palacios. Seguirá a ‘LectUra do Testamento’, a cargo de Drag Star e, finalmente, na Ponte do Valo, a ‘Queimada e últimas vontades’.

A Concellería de Festas do Concello do Porriño convoca o tradicional desfile de comparsas, dentro do programa de actividades do Entroido 2019.

As presentes bases rexerán a concesión de premios ás comparsas por participación nos desfiles programados polo Concello.

REQUISITOS XERAIS:

a) Participantes.-

Poderán optar aos premios establecidos nas presentes bases, todas aquelas comparsas integradas por un mínimo de 10 compoñentes, e poderán inscribirse en dúas modalidades:

Infantil: ata 12 anos.

Adultos: a partir de 13 anos en adiante.

O maior número de compoñentes por idades definirá a clasificación da comparsa na categoría infantil ou adultos.

Cada asociación ou colectivo únicamente poderá presentar unha comparsa en cada unha das modalidades.

b) Inscricións:

As inscricións deberán presentarse no Rexistro Xeral do Concello en impreso normalizado para esta finalidade, e achegarán a seguinte documentación de carácter obrigator

c) Prazo de inscrición:

As asociacións e colectivos participantes poderán inscribir as súas comparsas no Rexistro Xeral do Concello, no impreso normalizado que se achega ás bases, dende o luns día 11 de febreiro ata o mércores 20 de febreiro do 2019, ambos inclusive.

d) Importe dos premios a repartir:

A cantidade máxima destinada a premios de participación, para ambas modalidades no entroido establécese en 13.950 euros con cargo ao vixente orzamento municipal, aplicación orzamentaria 334.4800010 (RC Nº 249).

O importe dos premios determinaráse según o número de compoñentes da comparsa seguindo este desglose:

ADULTOS:

de 10 a 19 compoñentes………………….. 300 €

de 20 a 39 compoñentes………………….. 550 €

de 40 a 59 compoñentes …………………. 850 €

de 60 compoñentes en adiante……….. 1.000 €

INFANTIL:

Repetiráse a mesma estrutura.

O importe máximo establecido de 13.950 euros, repartiráse ata acadar esta cifra e seguindo rigurosamente a orde de inscrición.

Aquelas comparsas que desexen participar no Entroido fóra deste orzamento, poderán inscribirse pero sen opción a premio por participación.

e) Orde de participación:

Nos desfiles participarán en primeiro lugar as comparsas inscritas na categoría Infantil seguidas das comparsas de adultos e según a orde de inscrición no concurso.

Cada comparsa deberá levar un cartel que indicará o seu nome, o lugar que ocupa no desfile e o número de compoñentes.

f) Obrigas das comparsas:

As comparsas que aspiren ao premio de participación teñen a obriga de estar inscritas e participar nos desfiles do sábado e martes de entroido, e no acompañamento do enterro da sardiña o mércores de cinza.

g) Percorrido nos desfiles:

Os desfiles celebraránse nas datas e horarios sinalados no programa de festas do entroido.

Sábado: Partirá da rúa Antonio Palacios, desprazándose por Domingo Bueno, Praza San Sebastián e rematará na Praza Arquitecto Antonio Palacios.

Martes: Partirá da praza San Sebastián e rematará na Praza Arquitecto Antonio Palacios.

Enterro da sardiña: As comparsas participarán no acompañamento da sardiña co seguinte percorrido: Saída do Círculo Recreativo Cultural, continuando pola rúa Domingo Bueno, baixada pola fonte de San Sebastián seguindo por Manuel Rodríguez ata o Concello onde se procederá á lectura do testamento. De seguido rúa Peña e rematará perto do albergue de peregrinos (Paseo do Louro) onde se procederá á incineración.

O velorio terá lugar nas instalacións do Círculo Recreativo Cultural en horario de 17.00 horas ata ás 19.00 horas.

O testamento da sardiña será redactado polas comparsas pero sen carácter obrigatorio. Aquelas que desexen participar no testamento deberán presentalo no Centro cultural municipal en sobre pechado e dirixido á Concellería de Festexos, dende o luns día 11 de febreiro ata o mércores 20 de febreiro do 2019, ambos inclusive, en horario de 9.00 h. ata ás 14.00 h.

Estes percorridos e horarios poden ser obxecto de variación por causas meteorolóxicas.

h) Comité de observación e valoración de premios:

Este comité será nomeado mediante resolución da Alcaldía e terá competencias para a valoración das inscricións realizadas polas asociacións ou colectivos, cumprimento da documentación esixida según as presentes bases, desenvolvemento dos desfiles, descalificacións e asignacións dos premios según n.º de compoñentes, emitindo proposta de concesión de premios que será resolta por resolución da Alcaldía.

Estará formado por n.º impar de membros no que se incluirá, cando menos, un representante da Policía Local, un representante do departamento de Cultura e un representante da Concellería de Festas.

A participación supón a plena aceptación do disposto nas presentes bases e o incumprimento de calquera das cláusulas dará lugar á perda do dereito de optar aos premios de participación.

A alcaldesa do Porriño, Eva García de la Torre, acompañou este venres ás veciñas e veciños de Cans que viaxaron ata o mosteiro de Montederramo, na Ribeira Sacra, onde Keka Losada -presidenta da Asociación Arela-, Alfonso Pato e a “Señora Alicia”, veciña de Cans que colabora activamente co festival, recibiron hoxe o Premio da Cultura Galega que outorga o Goberno de Galicia.

Do xoves 10 de xaneiro  ao  30 deste mesmo mes, poderá visitarse na OMIX do Concello do Porriño -na planta baixa do Centro Cultural Municipal-a  Exposición de fotografía “Viaxando” que mostra os traballos presentados ao 12º Certame de fotografía do mesmo nome.

Este Certame, que aposta pola creatividade e orixinalidade da mocidade plasmada nunha fotografía,  foi creado no ano 2007 polas Oficinas de Información Xuvenil (OMIX) dos concellos do Rosal, Tomiño, A Guarda, Baiona, Salceda de Caselas, Gondomar, O Porriño e o Espazo Xove de Tui, dentro do traballo en rede que veñen realizando o longo destes anos.

Participaron un total de 13 mozos de idades comprendidas entre os  12 a 30  anos e o ano pasado o gañador, unha vez reunido o xurado, foi   Sergio Lorenzo Ares pola súa foto“ Comeza a Viaxe”.

Dentro do programa de lecer destas festas, este xoves chega un dos días máis salientábeis co ‘Festival de Nadal da Escola Municipal de Música’, ás 7 da tarde no Círculo Recreativo e Cultural, no que participarán alumnas e alumnos de Música e Movemento, Coral Infantil, Coral Polifónica, Grupo Tradicional, Grupo de Guitarras, Orquestra e Banda de Música Municipal.

A Escola Municipal de Música do Porriño, unha das máis importantes do sur de Galicia, conta  con 14 profesores que semanalmente imparten clases das diferentes especialidades instrumentais a máis de 150 alumnos de idades comprendidas entre os 3 e 74 anos. Esta escola municipal está integrada por cinco agrupacións que dan cabida non só aos alumnos da escola, senón tamén a todos os vecinos e veciñas de O Porriño.

A Escola Municipal de Música de O Porriño está configurada como un primeiro paso para todos os alumnos que desexen estudar académicamente nun conservatorio, xa que os seus curso de Grao Elemental está programados seguindo as pautas de esixencia para una futura proba de acceso a grao medio. Na Escola Municipal de Música ademais, impártense clases ata segundo curso de Grao Medio.

O Porriño ultima os últimos arranxos para o acendido do alumeado de Nadal, este mércores, día 5 de decembro, ás 8 e media da tarde, na Praza de Antonio Palacios, un acto que estará animada pola actuación de ‘As Maimiñas’.

A alcaldesa, Eva García de la Torre, supervisou persoalmente a colocación das luces e da decoración que, subliñou, terá un custo inferior ao do ano pasado,“chegará a todas as parroquias” e, por primeira vez, tamén á zona da oficina de Correos ao redor das rúas Enrique Peinador, O Pinar e Cruceiro.

García de la Torre deu especial importancia ao “intenso” programa de actos e actividades de lecer, “especialmente para as pequenas e pequenos”, deseñado polo Concello este Nadal e que, lembrou, abranguen exposicións, festivais, música, teatro, obradoiros, os anunciados Campamentos para facilitar a conciliación da vida familiar e laboral, amais do da “xa tradicional e propia do Porriño,  Festa Pre-Fin de Ano”, a Cabalgata de Reis, a visita de Papa Noel o novo Concurso de Rondallas e, por suposto, a Cabalgata de Reis.

A estas actividades súmanse outras para todos os públicos coma o Festival de Panxoliñas (o día 15), o Festival de Nadal da Escola Municipal de Música (o día 20), o Concerto de Jazz (os día 21 e 22), a Gala Benéfica da Asociación Bastón ( o día 22 no Centro Cultural Municipal), o Flashmob e exhibición de baile Studio 57 (o domingo 23) ou o Concerto da Orquestra de Cámara Galega, o 6 de xaneiro.

O Concello abrirá este luns, día 3 de decembro, e ata o vindeiro día 14, o prazo de inscrición no 1º Concurso de Rondallas Concello do Porriño que terá lugar o vinddeiro 1 de xaneiro de 2019.

BASES DO I CONCURSO DE RONDALLAS

Primeira.- A Concellería de Festexos do Concello do Porriño organiza o I Concurso de Rondallas que terá lugar o día 1 de xaneiro de 2019, ás 18:00 h, no Pavillón Municipal de Deportes do Porriño.

Segunda.- Neste concurso poderán participar todas aquelas agrupacións que teñan un mínimo de 40 compoñentes e un máximo de 120.

O número máximo de agrupacións participantes limítase a 10 (dez). Como único criterio de selección estabelécese a orde de inscrición no Rexistro Xeral do Concello do Porriño.

Aquelas inscricións realizadas antes ou despois do prazo estipulado nestas bases non serán admitidas calquera que sexa a causa.

Terceira.– As inscricións para este concurso deberán presentarse no Rexistro Xeral do Concello, no impreso normalizado que se achega ás bases, dende o 3 ao 14 de decembro de 2018, ambos inclusive. Así mesmo, deberase acompañar á inscrición, unha certificación bancaria e fotocopia compulsada do CIF ou NIF segundo proceda.

As bases publicitaranse a través de anuncio nos medios de comunicación local nos días previos ó comezo do prazo e estarán a disposición dos/as interesados/as no citado rexistro e na páxina do Concello: https://oporrino.org/.

Cuarta.– Os premios do concurso serán os seguintes:

PRIMEIRO CLASIFICADO: 1.500 euros.

SEGUNDO CLASIFICADO: 1.000 euros.

TERCEIRO CLASIFICADO: 500 euros.

Todos os premios estarán suxeitos á normativa fiscal que proceda aplicar.

Quinta.- As agrupacións participantes realizarán, previo ó inicio do concurso e na mesma orde de actuación, un pasarrúas de trinta minutos polas seguintes rúas da vila: Praza do arquitecto Antonio Palacios, Rúa Antonio Palacios, Rúa Doantes de Sangue, manténdose neste último lugar á espera da entrada ó concurso.

No caso de suspensión dos pasarrúas por choiva, concentraranse na mesma orde e horario no Pavillón Municipal de Deportes do Porriño.

Sexta.- A orde de actuación no Pavillón Municipal de Deportes do Porriño das rondallasinscritas decidirase mediante un sorteo que se realizará na Casa do Concello do Porriño o día 17 de decembro ás 12:00 horas. Recoméndase que a este sorteo acuda un/unha representante de cada rondalla inscrita.

Sétima.– Cada agrupación disporá dun máximo de 12 minutos para realizar as interpretacións que estime oportunas.  O tempo dispoñible computarase dende o momento no que as agrupacións comecen a interpretar a primeira peza.

Oitava.- Estabelécense as seguintes penalizacións por exceso de tempo:

10 puntos.- polo primeiro minuto ou fracción

20 puntos.- polo segundo minuto ou fracción

30 puntos.- polo terceiro minuto ou fracción

Descualificarase inmediatamente a unha agrupación nos seguintes casos:

✔ cando o exceso de tempo supere os tres minutos;

✔ cando figuren na pista menos de 40 compoñentes;

✔ cando entre os seus compoñentes ou concursantes, figuren “majorettes”.

Novena.– Os himnos oficiais dos estados e das comunidades autónomas non poderán ser incluídos nos repertorios que executarán as rondallas participantes.

Décima.- A rondalla gañadora do concurso terá que actuar un día a convir por ambas partes, a organización e a agrupación, durante as festas de Nadal nas rúas do Concello do Porriño.

Décimo primeira.– O xurado do concurso cualificará entre 0 e 16 puntos cada unha das agrupacións, valorando os seguintes elementos:

1. a) Criterios relacionados coa cultura tradicional e popular galega (valoración máxima 10 puntos):

– Instrumentación musical tradicional: máximo 4 puntos

– Repertorio musical: máximo 4 puntos

– Vestimenta de toda a rondalla: máximo 2 puntos

1. b) Outros criterios (valoración máxima 6 puntos):

– Evolución e coreografía en pista: máximo 2 puntos

– Instrumentación musical xeral: máximo 1 punto

– Número de compoñentes: de 40 a 60 – 1 punto; de 60 a 80 – 2 puntos; de 80 a 120 – 3 puntos.

Décimo segunda.- O xurado do concurso, nomeado por resolución da Alcaldía, estará composto polos seguintes membros, en número impar:

Presidente/a: A alcaldesa-presidenta ou persoa en quen delegue

Vocais:

– dúas persoas relacionadas coa música, danza, etnografía, folclore ou cultura tradicionais galegos.

– un/unha representante das rondallas participantes.

– Un/dous representante/s do Concello.

A composición do mesmo variará para obter, en todo caso, un número impar de membros con voz e voto.

Secretario: Un funcionario do Concello do Porriño, con voz e sen voto, que certificará o cumprimento das condicións establecidas nas bases do concurso que se achegan no anexo a este convenio.

O presidente do xurado dispón tamén de voto de calidade para resolver os posíbeis empates.

Décimo terceira.- A concelleira de Festexos mailo xurado do concurso quedan facultados para resolver as posíbeis eventualidades e dúbidas que puidesen xurdir, non previstas nestas bases.

Décimo cuarta.- A participación neste concurso supón a aceptación de todas e cada unha destas bases. A decisión do xurado será inapelábel.

Dende o día 1 de decembro ata o sábado 6 de xaneiro de 2019, o Concello do Porriño leva adiante un completo programa de Nadal que abrangue dende ‘Animación na rúa’, concertos, actividades para cativos, Flashmob, a tradicional ‘Pre-Festa Fin de Ano’ ou a Cabalgata de Reis.

Este ano, ademais haberá novas propostas, coma a 1ª Xornada pola Integración da Discapacidade (o domingo día 2 de decembro, no Pavillón Municipal de Deportes); a celebración, o luns, día 3, do Día Internacional da Integración das Persoas con Diversidade Funcional; o 1º Concurso de Rondallas Concello do Porriño, o 1 de xaneiro, no Pavillón de Deportes, ou o Concerto da Orquestra de Cámara de Galicia, o 6 de xaneiro.

Xunto con estas novidades estarán as actividades tradicionais, coma o ‘Encendido das luces de Nadal’, o vindeiro mércores, día 5 de decembro, ás 8 e media da tarde na Praza do Arquitecto Antonio Palacios; o ‘Festival de Panxoliñas’, o venres día 14; a Visita de Papa Noel a San Benito e San Sebastián, o día 21; o Concerto dos Bolechas, o día 22 deste mes; a Festa ‘Pre Fin de Ano’, o domingo día 30 ás 11 da noite ou a Cabalgata das Súas Maxestades Melchor, Gaspar e Baltasar,o día 5 de xaneiro dende as 6 da tarde.

A estas propostas súmanse as actividades da Biblioteca Municipal, que depende directamente da Alcaldía, e que abrangue Club de Lectura para Adultos, Conta-Contos, o Teatro de Monicreques, entre os días 3 e 27 de decembro.