- Tradicional concurso de paraugas, andaina simbólica, lectura de manifesto e música folk para conmemorar o Día Internacional das Persoas con Discapacidade
O Porriño, 3 de decembro de 2025.- O Porriño celebra hoxe o Día Internacional das Persoas con Discapacidade, que cada ano se conmemora o 3 de decembro, cunha xornada marcada pola participación, a creatividade e a reivindicación dos dereitos das persoas con diversidade. A previsión meteorolóxica obrigou a trasladar ao pavillón municipal todas as actividades previstas inicialmente para as rúas da vila e a Praza do Concello.
Aceesca foi a gran protagonista da xornada, acompañada de usuarios e alumnado doutros centros como Afaga, Cogami, IES Pino Manso e os colexios Ribeira, Antonio Palacios e Hermanos Quiroga. Tódolos participantes realizaron unha pequena andaina simbólica no interior do pavillón, á que se sumou tamén a veciñanza, a concelleira de Política Social Teresa Veloso e o alcalde Alejandro Lorenzo que sinalou que “hoxe é un día para poñer en valor o que nos fai únicos, para lembrar que a diversidade constrúe O Porriño que queremos: inclusivo, accesible e cheo de oportunidades. É unha alegría conmemorar o Día Internacional das Persoas con Discapacidade acompañados de todos vós. Gracias por estar aquí e por facer desta mañá un espazo de convivencia e respecto; gracias tamén ás familias, profesionais e veciñanza pola súa implicación e cariño. O voso traballo, a vosa forza e, sobre todo, a vosa diversidade enriquece e dá sentido ao Porriño que construímos cada día”, rematou dicindo.
A continuación celebrouse o tradicional concurso de paraugas, no que se puideron contemplar diversos deseños todo eles con mensaxes reivindicativas, resultando gañador o elaborado polos escolares do CEIP Antonio Palacios. O momento central da xornada foi a lectura do manifesto do grupo de autoxestores de Aceesca, “Os Dez de Porriño”, que fixeron un chamamento contundente a derrubar barreiras e garantir os dereitos das persoas con diversidade. No seu texto, lembraron que “non só é un día para celebrar a nosa fortaleza, senón tamén para esixir os cambios necesarios que nos permitan formar parte da sociedade dunha maneira plena, activa e equitativa”. Reivindicaron tamén a necesidade dun traballo digno, a accesibilidade universal física e cognitiva, e unha sociedade que respecte dereitos fundamentais como o da non discriminación, a ter familia, saúde con atención especializada, identidade propia, liberdade de expresión, privacidade, vivenda digna e unha vida independente. “Queremos que se escoite a nosa voz e que se respecten os nosos dereitos. Reivindicamos todo isto porque desexamos vivir nunha sociedade na que a diversidade sexa sinónimo de oportunidades para todos e todas”, proclamaron.
A xornada rematou con música, coa actuación do grupo de folk de Aceesca, que puxo o peche a unha mañá de convivencia e sensibilización colectiva. Desde a organización agradeceron o apoio nesta loita compartida.
