- Publica o calendario para o inicio do período académico centrado na escolla de horarios de instrumento, que terá lugar os días 10 e 11 de setembro
O Porriño, 29 de agosto de 2025.- Co comezo do novo curso, a Escola Municipal de Música do Porriño publicará, a partir do vindeiro luns, 1 de setembro, a listaxe co nome, día e hora do alumnado matriculado, que ascende xa a 150, para que acuda a semana seguinte a escoller o horario de instrumento.
A actividade da Escola retómase co inicio do curso académico, “trátase dun espazo clave na formación cultural e artística dos nosos veciños e veciñas, pequeno e maiores, contribuíndo tamén a fomentar a creatividade, a disciplina e o traballo en equipo”, sinala o alcalde Alejandro Lorenzo durante unha visita ás instalacións da Escola onde non quixo deixar pasar a oportunidade de probar, el tamén, a experiencia de tocar un instrumento.
O luns 8 e martes 9, as instalacións da Escola, localizadas no Centro Cívico, estarán abertas en horario de 17.00 a 20.30 horas para resolver calquera dúbida ou obter información. Xa nas dúas xornadas seguintes o alumando debe acudir nunha hora determinada, segundo a especialidade elixida, para escoller o horario das clases individuais, o cal se realizará por orde de matrícula feita no mes de xuño. Así, o mércores deberán acudir ás 16.00 horas os de piano, ás 17.00 horas os de canto, ás 18.00 guitarra, ás 19.00 clarinete, ás 19.45 vento metal e ás 20.00 saxofón; o xoves 11, ás 16.00 horas frauta, ás 16.45 violín, ás 17.30 violoncello, ás 18.15 gaita, 19.00 percusión tradicional e ás 19.45 horas percusión sinfónica. Para rematar, o venres 12, de 17.00 a 20.30 horas, atenderase a novas matrículas no caso de que queden prazas vacantes, e o luns 15 de setembro establécese o inicio oficial do curso.
Ademais dos instrumentos ofertados, a Escola oferta clases de Música e movemento para nenos dende os 4 anos e de Linguaxe musical para tódalas idades e conta con sete agrupacións: banda de música, mini banda infantil, orquestra de corda, grupo de música tradicional, conxunto de guitarras, coral infantil e coral polifónica.
O inicio do curso na Escola Municipal de Música serve como punto de arranque para toda a actividade cultural e formativa do Concello, incluíndose a levada a cabo polas distintas asociacións veciñais e entes culturais que desenvolven accións formativas e de lecer nos seus locais distribuídos por tódalas parroquias, Carracido e o centro urbano. Actividades que realizan gracias á axuda recibida dende o Concello que colabora, organiza e apoia as súas iniciativas mediante as subvencións nominativas que outorga cada ano.
